Post: #1
Title: فاطنة السمحة ام سعدا شين ..
Author: عشة بت فاطنة
Date: 01-15-2010, 09:50 PM
Parent: #0
احكي ليكم حكاية فاطنة
السمحة ام سعدا شين
أهدي ليكم سيرتها :
سيرة فاطنة الفايقة كمالها
سيرة الزهرة الفارضة جمالها
زي عصفورة فاردة جناح
السلم الاخضر
رافعة شعار الحب والريد
تهوى اللون
والظل الكامن
في الاشياء
من سمارنا الباهي لونها
ومن غابة الابنوس عيونها
فاطنة ......
معجونة من طين الجروف
مليانة بالحب والحروف
يا فاطنة يا قمرة
اقلبي السنسنة الحمرا
شوفي هلالنا ما هلا ؟
شوفي سعدنا ما طلا ؟
وتحكينا فاطنة
عنها وعن القمرة
والمشاطة
والبت السمحة
في ضل الشدرة
متكية ....
القمرة عندها قمرين
قمر الوهج الشايل صورة
وقمر دورين
تمشط في خيالنا دروب وتنسج
من رؤانا بحور
وتنثر في دروبنا زهور
وتطلق في سمانا بخور
عين يا عنية
كان عين صبي جِناً
غبي
كان عين فتى (فتاة)
تروي الواطة
فاطنة السمحة ام سعدا شين.....
.....
فاطنة تحجي
فاطنة تربي
تغرس القيم
الجميلة
تعشق الاخضر ونيلة
تسال-ها-ا البت ام ضفيرة :
صحي البت ما زي الولد ؟
وتجاوب الحلوة الشقية
ابدا ...الكل جميل
أمل الحياة
سند البلد
فاطنة..
فاطنة تهم وفاطنة تلم
فاطنة الفال الزين والجرتق
فاطنة تفيض ان فاض النيل
تسقي الشدر اليابس يفرهد
ودايما تحكي تغني تردد
يا حبايبي ...
صباحكم خير
مساكم خير
حداكم نيل
يكفي الكل
وطينكم زين
حداكم ضل
وتحكي وتحكي
تحكي وتحكي
مرة تفرٍح
ومرة تبكٍي
فاطنة
آه يا فاطنة ام سعدا شين
أحكي ليكم انا من وين !!!
كانت دنيا بحالها
كانت نجمة تغازل النخلة
تضاحك النيل
تحجينا وتغنينا
تمسحنا وتغطينا
فاطنة السمرة سميرة النيل
فاطنة القمرة هويدة الليل
بس يا خسارة ...............
غاروا عليها
غاروا عليها دغشية
وشالوا الضل الامي الكل
وقطعوا الشجرة المروية
وطارت عصافيرها
عصافير فاطنة السمحة
ام سعدا شين
طارت عصافيرها
تناثرت اوراقها
تفاصيلها الحميمة
أجمل حكاويها
فارسات الحُلم
سُمر الوجوه
جموح الخيال
هزموا الحُلم وكسروا الصورة
وطار عصفورها
زي بلورة
حرق النار
هزموا الحلم
وعمّ الظلم
ضفاف النيل
فاطنة السمحة ....
آه يا فاطنة .
حرفوا حكاياتها الجميلة
زوروا مغانيها
عبق التاريخ
جمال الكلمة
سحر اللون
اسفار تكوينها
علي الضفاف
وترانيم جداتها
السائحات الائي
حملن البذرة الاولى
وشهدن مخاض الصخور
و ميلاد المدن
وحملنّ فاطنة
اسفار الخروج
الوصول وتراجيديا الرحيل في سيرة فاطنة.....
وسكتت فاطنة
انشودة الحلم الجميل
سكتت فاطنة واختارت الرحيل
في لوحة غروب
لون الشفق وقت الاصيل
وقت الحمارساعة الودار
سكتت فاطنة
سكتت
كل حكاويها
غناويها واحاجيها
أُخت الشمس
ساقت الشمس
وغشانا .. ليل
ليل الحُزن قيل مقيل
وبكت الربوع
نزفت دموع
لبس الحزن كل الدروب
*****
******
حُلم العودة ....او معزوفة الرجوع
فاطنة الدوحة
سحر اللوحة معنى اللون
فاطنة الكلمة سر الكون
ارجعي لينا غنوة وفرحة
اافردي توبك غطي الدنيا
الحان وجمال
وخلي ملامحك
تشرق فينا
تسكن فينا
تضوي حياتنا ليل ونهار
ارجعي لينا
ارسم فينا
ندى الازهار
فاطنة السمحة فاتنة النيل
فاطنة السمحة ست الليل
في نظراتها تشوف كم صورة
تشوف كم طيف
تشوف القُبة
تشوف القيف
فاطنة تجييك
من كم صوب
فاطنة شمالنا
فاطنة جنوب
فاطنة الطِرقة
فاطنة التوب
فاطنة التُم تم
فاطنة المردوم
فاطنة جوبا
فاطنة الخرطوم
فاطنة الفكرة صوفية
وفاطنة السحنة نوبية
وفاطنة اللهجة نيلية
فاطنة السمحة
انسانية
كل لغات الدنيا
حكاوي الدنيا
تسكن فيها
كل الشافة
ما اتصور
ليلو اتبدل
هلل وكبر
غنى وبشر
يا عديل الليل
عديلة ..................
ما زالت فاطنة تواصل المشوار.. bold
|
Post: #2
Title: Re: فاطنة السمحة ام سعدا شين ..
Author: احمد العربي
Date: 01-15-2010, 10:02 PM
Parent: #1
هزموا الحُلم وكسروا الصورة
وطار عصفورها
زي بلورة
حرق النار
هزموا الحلم
وعمّ الظلم
ضفاف النيل
فاطنة السمحة ....
آه يا فاطنة .
|
Post: #3
Title: Re: فاطنة السمحة ام سعدا شين ..
Author: عشة بت فاطنة
Date: 01-16-2010, 08:52 AM
تسلم يا عربي
ومبروووووووك
الماجستير
|
Post: #4
Title: Re: فاطنة السمحة ام سعدا شين ..
Author: عشة بت فاطنة
Date: 01-16-2010, 06:07 PM
Parent: #3
فاطنة
انشودة الحلم
الجميل
|
|