Post: #1
Title: الريموت كونترول !!
Author: صلاح أبودية
Date: 01-13-2010, 12:00 PM
Parent: #0
(1)
الريموت كونترول !!!
حق منو فى البيت ؟
كلو واحد عاوز يشوف حاجة براهو !!
واحد عاوز يشوف الكورة
واحدة مفعوصة عاوزة تشوف المسلسل !
واحدين صغار كده عاوزين يشوفوا سبيس توون !!
وواحد كبير وعوير وحسو بقى زى التور عاوز يشوف فلم آكشان (وبراهو) !!
حتى الحبشية دايرة تشوف قناة زوول السودانية !
وواقفة بعيد منتظرانا كلنا نحرد التلفزيون ...
أها الشمطة قامت ، وكل واحد متمسك بى رأيو !
وأنا ماسك الريموت طبعا ، دكتاتورية وكده يعنى !
|
Post: #2
Title: Re: الريموت كونترول !!
Author: صلاح أبودية
Date: 01-13-2010, 12:03 PM
Parent: #1
أها تمت الناقصة جات ضيفة وبعدما ما شربت الشاى قالت : عليكم الله أفتحوا لينا النيل الأزرق قالوا جايبين حواء الطقطاقة !! (يطقطقك الحرامى فى نص راسك المدوقس ده) !
عليك الله أشربى شاييك ده وقومى إتفكفكى (لسان حال الأولاد) !
ونستجيب كلنا على مضض ونفتح النيل الأزرق جانا ليك واحد بكورك زى المجنون
يا ناس البلد يا ناس البلد الخور جاكم !!
قال دى دعاية بتاعت إسبيرات ، طيب الخور علاقتو شنو بالإسبيرات ؟؟
ورّونا يا جماعة لو عندكم فكرة !!
|
Post: #3
Title: Re: الريموت كونترول !!
Author: صلاح أبودية
Date: 01-13-2010, 12:05 PM
Parent: #2
وبعدما إنتهت دعايات الإسبيرات والبوهيه والشربات والعدس والصلصة (عاد هى ما صلصة) وطبخنا الحلة بزيت صباح زيت السرور شربنا الشامبيون وضربنا شاى الغزالتين
وعملنا مكالمة من سودانى لى سودانى (بنصف القيمة) والقيمة كم ما معروفة!
جابو لينا رجال كبار كده قاعدين يبكوا ويتمخطوا سألت الأولاد : الرجال الكبار ديل مالم؟
قالوا لى ده برنامج نجوم الغد !
مالم نجوم الغد .. ماتوا ؟؟
جارتنا إستغفرت وإتخارجت !
بعد داك جاتنا واحدة يدها زى الشجرة ختت لينا دهبها جنب علامة الباناسونيك
وقالت لينا فاصل ونواصل !
وإستمرت تعاين لينا وتعاين لى دهبها فى بلاهة لغاية ما المخرج جاء بنفسو وشالها من قدام الكاميرا !!
يا أولاد الجماعة ديل حا يجوا يفتحوا البكاء ده تانى !
|
Post: #4
Title: Re: الريموت كونترول !!
Author: صلاح أبودية
Date: 01-13-2010, 12:10 PM
Parent: #3
كده إنشوف الكورة بدت ولّ لسه ؟
يا ولد كورة شنو ، المسلسل قرّب ينتهى !!
طبعاّ ما فى زول فى البيت ده بقول لى يا ولد إلا أمى ..
وقال أمك قال ثم من قال أمك قال ثم من قال أمك
قال ثم من قال أبوك وأنا أبوى ميت ، يعنى أمك بس !
خلاص خليتو ليكم التلفزيون ده !
ومشيت عدل على الناشونال الرادى الضكر !
فتحتو ..
ألو ألو معاى منو؟
يا جماعة ده الرادى ولّ تلفون !
|
Post: #5
Title: Re: الريموت كونترول !!
Author: صلاح أبودية
Date: 01-13-2010, 12:12 PM
Parent: #4
أيوة أيوة معاك الرياضية سامعنك !!
برنامج واحدة من ستة ؟
أيوة برنامج واحدة من ستة !
ممكن أشترك ؟
أيوة إتفضل ..
الإجابة تساوى خمسة !!
خمسة شنو يا شيخنا الظاهر إنت ما فاهم الموضوع !
طيب تساوى سالب خمسة !
يا أخ ده برنامج أغنيات إسمو واحدة من ستة !
يعنى تختار أغنية من واحد لغاية ستة !
طيب تساوى سبعة !!!
يا أخوانا البحلنا شنو من الزول ده
أسمعى عندى أخوى عاوز يشترك !!
طيب طيب
طيب معانا إتصال تانى .. ألو
عليك الله لو سمحت وطّى صوت الراديو عشان نسمعك ..
حاضر حاضر لكن أنا ما عندى رادى !
ممكن أشترك ؟؟
أيوه إتفضل ..
طيب عبدالكريم الدافى أصلو ما ممكن يسجل فى الهلال
أوريك ليه عشان المادة ..
يا شيخنا إنت فاهم غلط ده برنامج منوعات !
ألو ألو .. آى خليكى معاى دقيقة معاى مكالمة من السعودية !!!
يا أخوانا دى مصيبة شنو الوقعت فيها دى ..
يا ولد حبوبتك مشت ؟؟
آى يا أبوى .
وأمك ؟
مشت مع حبوبة !!
طيب جيبوا الريموت يا اولاد الكلب !
|
Post: #6
Title: Re: الريموت كونترول !!
Author: omer osman
Date: 01-13-2010, 12:21 PM
Parent: #5
ياسيادتك حاولت احل المشكلة دي ...... خشيت لي في تلفزيون كبير بالاقساط وخليت القديم للشفع ...................
انقر عملوا شنو ؟
هم زاتم خلو القديم وبقوا مداقرني في الجديد وحددوا لي نشرة اخبار واحدة في اليوم واذا عاوز اشوف كورة الا اشتري ليهم حاجة حلاوة بيبسي اى حاجة ..........
يعني كأس الامم الافريقة ده عاوز ليهو ميزانية عديل كده ........................
|
Post: #7
Title: Re: الريموت كونترول !!
Author: صلاح أبودية
Date: 01-13-2010, 01:05 PM
Parent: #6
يا جنابو عمر
كيف حالك ياخ
خليتنى براى فى بوست عضوية المريخ
عاوزين نتلاقى !
| Quote: خشيت لي في تلفزيون كبير بالاقساط وخليت القديم للشفع |
والله أنت أخير
أنا حا أخلى ليهم البيت ده وأخش لى فى بيت تانى بالأقساط !!
|
Post: #8
Title: Re: الريموت كونترول !!
Author: صلاح أبودية
Date: 01-14-2010, 08:32 AM
Parent: #7
(2)
الريموت كونترول !
تصدقوا المنبر ده برضو فيهو ريموت كونترول !
وبرضوا ما معروف حق منو !!
تكتب بوست تلقاهو مشى الخور !
تكتب مداخلة تلقاها مافيشة (مافيشة دى أخت مافى) !!
البوستات الفوق دى البختها منو فوق ؟؟
والبوستات البتتحزف دى البحزفا منو وليه ؟
والبحزف المداخلات منو؟؟
مش الحاجات دى دايرة ريموت كونترول ؟؟
|
|