العلاقـــة بين اعضاء المنبر .. ( فرض عين أم فرض كفاية ) ..

سؤال كبير جدا ..
هل اي زول بكتب في سودانيزاونلاين من المفترض انه يكون صاحبي ..
و هل كل الناس دي كلها ناس كويسة .. و مفروض يكونوا اصحابك ..
و لو ما صاحبتهم و ما مشيت ليهم هل انت زول ما كويس و مطنقع ..
و لو ما شاركتهم في افراحهم و اتراحهم .. بيكون يعني عندك رأي فيهم ..

..
..

ليه الناس بتدي نفسها مساحة اكبر من الواقع بتاعها ..
؟؟

Quote: العلاقـــة بين اعضاء المنبر .. ( فرض عين أم فرض كفاية ) ..

خلاص داير تقوم على المساخه
انشاء الله يلاقيك زئب يا حميده .. عشان تعرف حاجه

وانتا فى الخرطوم لسه والا رجعت الرياض ؟

Quote: العلاقـــة بين اعضاء المنبر .. ( فرض عين أم فرض كفاية ) ..

بالنسبه للسؤال دا
انا بفتكر انها .. كفايه

علي محمد ..
ذئب شنو ياخي .. الواحد يقوم من الصباح .. يطق ليك كلب الجيران طلقة في رأسه ..
و يقول ليك هجم الذئب ..

..
..

مناسبة البوست دا .. انه في ناس لواميين جدا .. يضربوا ليك ستين مرة ما ترد عليهم ..
و بعد دا يجو يلوموك ..
و و السؤال الكبير .. ديل منو ..؟ .. انا ما بعرف الناس دي .. !!

Quote: مناسبة البوست دا .. انه في ناس لواميين جدا .. يضربوا ليك ستين مرة ما ترد عليهم ..

يا حميضة كيف يعني زول يضرب ليك كذا مره وما ترد عليهو؟ أعرف الزول منو وداير شنو؟ دي ذاتها الطنقعة الما داير يوصفوك بيها دي..
___
أقل شيء عشان ما يزعجوك، رد التلفون، ولو لقيتو ما بينفّع معاك، قول ليهو/ا تاني ما تضرب لي، ولا تعوزّك المساخة في أن تفعل ذلك..

حميضة سلامات ..

واجازة سعيدة ..

بعتقد انه المعرفة بين اعضاء المنبر زيها وزي المعرفة الممكن تعملها مع زملاء الدراسة او ولاد الحلة

او اي مجموعة انت ارتبطت بيها حتي لو الخدمة الالزامية ..

يبقي بتنتقي منهم العاوز تعرفهم وتجلي الما وقعوا ليك في نفسك ..

يعني ما شئ مفروض علي الواحد وفي نفس اللحظة واجب اجتماعي بيفرضوا عليك السلوك الجمعي انك تؤازرهم في الفرح وتواسيهم في الترح ..

الواقع بيقول انه سودانيز اونلاين مجتمع اصبح قائم ومشاهد ومدرك بكمية من الشواهد وللواحد ان يختار ان يكون جزء منالمجتمع دا او ينعزل وفي كل الحالتين لا لوم عليه زي ما انه الواحد ممكن ينطوي في حلته ويكون زول بيت بس مافي زول من ناس الحلة حايدق ليك الباب ويقول تعال شاركني لكنه بيتخذ موقف وما حايشاركك انت بالمقابل في شئ ..

حيدر الزين ..
كلامك صحيح ..
بس انا اضرب ليك مثال حي .. الاخوان في ( بورداب الخرطوم ) .. اصبح عليهم عبء كبير .. و انا بعتبره انه وقتهم الببذلوه دا تفضلا منهم ..
بستقبلوا الناس .. و عزومات و شاي و عشا .. و بقوموا بالواجب علي اكمل وجه .. و انا شخصيا بلجأ ليهم في بعض المشاكل ..
السؤال .. هل من حق اي عضو في سودانيزاونلاين .. يمشي السودان .. الناس دي ما تقابله لظرف ما .. يجي راجع زعلان انه الناس دي ما قابلته و ما عملت ليهو ذي ما عملوا لفلان ..
هل بسلوك بورداب الخرطوم الجميل اصبح الامر فرض عين عليهم .. اذا ما عملوه بجيب ليهم الهوا ..
نحن في بورداب الرياض تعرضنا للانتقاد الغير مبرر من أحد الاعضاء انه ( اخوه ..!! ) جا الرياض و لا اشتغلنا بيهو .. بدون ادني معرفة من طرفنا عن من هو اخوه ..
البدي الناس دي الحق شنو انها تنتقد ..

الناس دي بتدي نفسها اكتر من مساحتها ليه ؟؟
ده من عشمها في خوة صادقة ولقاء مع اناس كان يراهم عبر الكي بورد ...
واي زول بيكتب في سودانيز اون ما مفروض يكون صاحبك بس بيكون بالتاكيد بعرفك . وزي ما قال حيدر الزين
ممكن زي ناس الفصل الواحد في المدرسة بتعرف كل الفصل بس اصحابك محددين ...
وكان وجدت فرصة تنك تشارك الناس افراحها فدة شئ جميل اذا سمحت ظروفك بذلك , والا مافي داعي للوم الذي يفرضه
الكثيرين دون تقدير لحالة الاخر ..
شخصيا مرة تاثرت جدا لانه في زول جاء السودان وانا كنت في ظروف مرضية ورجع بدون ان التقي بيه طبعا" هو بوردابي "
فقال للمقربين منه العوض فتح لي !! دون ان يكلف حتي نفسه بالاتصال او السؤال عني او معرفةالظرف الانا فيه ,,,
حميدة موضوعك فعلا يستحق النقاش ..

ألأخ/حميدة السلام عليكم..وحمدآ ..لله على السلامة...

Quote: سؤال كبير جدا .. هل اي زول بكتب في سودانيزاونلاين من المفترض انه يكون صاحبي .. و هل كل الناس دي كلها ناس كويسة .. و مفروض يكونوا اصحابك .. و لو ما صاحبتهم و ما مشيت ليهم هل انت زول ما كويس و مطنقع .. و لو ما شاركتهم في افراحهم و اتراحهم .. بيكون يعني عندك رأي فيهم ..

هذا السؤال الكبير ده..مافى زول قلبو كبير بيسألو..خلى قلبك كبير ممكن يشيل الدنيا كلها.....

Quote: هل اي زول بكتب في سودانيزاونلاين من المفترض انه يكون صاحبي ..

من جهتى الشخصية..صاحبى نعم ولكن صديق إلا بعد ما أعرفه جيد..وفى فرق بين الصاحب والصديق والزميل..

Quote:

Quote: و هل كل الناس دي كلها ناس كويسة .. و مفروض يكونوا اصحابك

مافى زول مفروض على زول...والدنيا دى فيها الكويس والبطال وألأنسان حسب شخصيته يميز..وألأسفير ده مكان تلاقى زى مابنتلاقى فى أماكن كثير فى الدنيا الواسعة دى.....

Quote: و لو ما صاحبتهم و ما مشيت ليهم هل انت زول ما كويس و مطنقع ..

دى بتعتمد على مدى العلاقة يا حميدة...

Quote: و لو ما شاركتهم في افراحهم و اتراحهم .. بيكون يعني عندك رأي فيهم .. .. .. ليه الناس بتدي نفسها مساحة اكبر من الواقع بتاعها .. ؟؟

ياحميدة يا اخوى دى إفتراضات منك ما منطقية..وزى ماقلنا مافى زول جابر زول هنا على تكوين علاقة معاهو....يا أخى نحن ناس إلتقينا فى مكان آملين ان نكون حادبين على جمال علاقتنا مع بعض وإستمراريتها إن أمكن ومافى زول مفروض على زول..

يا اخى انا عرفتك من هنا..ماذا انت قائل فى تصور علاقتى معاك.؟؟

والله عرفت الكويس والبطال..الكويس إحتفظت بيهو والبطال بأدب بعدته عنه.....

سؤالك مشروع..وإجابتنا مشروعة....لك التحية والتقدير.....السؤال ده ماكبير بس إنت كبرتو ساى...دى وجهة نظر.......

حميده ...سلامات ...

مادام هي علاقة انسانية اذن هي مربوطة بخيارات شخصية .. يعني مابالضرورة اني اكون صديق لكل عضو او متقرب منهم بدرجة واحدة ...وممكن جداً تكون علاقتي بيهم اسفيريه فقط ...لذلك هي كالعلاقاقات العادية التى نكتسبها في حياتنا الواقعية .. نختار منها مانشاء لتكون صداقة وتقارب اكثر وممتد ...وهي ليست فرض عين على الكل ...لكن فرض كفاية دي قدر ماحاولت فيها ابت تجي ... يعني ياحميدة مثلاً انت صديق ودالصايم او تمبس في الرياض انا معناها اقنع اعمل علاقة معاهم باعتبار الشغلة فرض كفاية ولا كيف ؟!!!



ودي ،،،

فايز ..
انا بتكلم عن ( مجموعات ) كبورداب الخرطوم .. و بورداب الرياض .. و ليس عن افراد بالتحديد ..
مثلا اذا جيتنا انت في الرياض .. و قابلك اتنين من بورداب الرياض .. و الباقيين ما اشتغلوا بيك الشغلة ..
البزعلك شنو ..

..
..

وقع ليك ..

عشان كده شخت لي في عزومة قندهار

Quote: فقال للمقربين منه العوض فتح لي !!

العوض ..
انا بالتحديد بتكلم في النقطة دي .. الحق البخليهو يقول كدا شنو ..
و القصص البنسمعها كتيرة جدا .. و الامر بتحول لتجريح في الاشخاص ..
عادي جدا ممكن يتطور الامر الي انه العوض دا و الله لمن جات فلانة ديك ما قصر معاها .. و فلانة ديك برضو ما قصر معاها ..
بس لمن جيت انا فتح لي كبري .. يعني عشان ما عندي طرحة ..
و كوم من الكلام دا .. يخليك تكره زاتو تلاقي بوردابي ..
يعني الاجازة الجاية اضرب ليك .. تقول لي خليت البورد زاتو .. و فكيت وهبة عكس الهوا ..

..
..

Quote: عشان كده شخت لي في عزومة قندهار

ما مشيت قندهار زاتو ..
قلنا ليك تعال عند عوضية .. عملت لي فيها مدير ..

.....



سلامات يا حميدة

و عساك طيب



مما قمنا بنسمع كلام من عِينة :


اللوم بيزيد المحنَّة .. و الما دارك ما لامك


لكن بصراحة كدة أخوك ما مقتنع بالكلام دا


الزول الجنُّو لوم دا أكيد زول ما مقدِّر للظروف


وإنسان محورى و إتجاه واحد ..


و معرفتو ما من الصالح .



و عموما العلاقات الإنسانية دى خيارات خاصة


و ذاتية ، ما مفترض تكون مرتبطة بأكثر من


الرغبة فى إنجازها.








إحتراماتى





....

حميدة سلام
العلاقات التي تكلف الإنسان فوق طاقته غالبا ما يتحاشاها الكثيرون
ولذلك يجب أن نتحرى متى نلجأ للأخوان ومتى نكون نحن ملجأ لهم
و فوق كل ذلك حسن النية يكون متوفر
حتى لو ظننت أن ذلك (الأخ) البوردابي خذلك
في لحظة احتياجك له...


حميدة ما تشيل هم
نحن معاك في الرياض

انا مشترك في البورض لشنو ..
عشان الاستثمار العلائقي لما قبل المرئية
بمعنى انو ياعمك زي انا جاااي الرياض الاسبوع الجااااي
بورضاب الرياض يجلونى معناها هنالك دقسة اسفيرية

اسماعيل عباس ..
ما تشخصن الامور .. انا تحديدا بتكلم عن الناس الما بتعرفها ألا من خلال مداخلة عابرة قد تكون لاحظتها او ما لاحظتها ..
امكن ظروفك تتيح ليك انك تلتقي بالشخص و تلقى عنده مواصفات كتيرة تخليكم قريبين لبعض و خير مثال تجربة بورداب الخرطوم و بورداب الرياض ..
لكن هل التجربتين حيبقوا استاندر في التعامل بين اعضاء المنبر .. و هل يتحول الامر الي ( فرض عين ) .. بالمفهوم دا ..
انا شخصيا اتمنى ان إلتقى بجميع البورداب متى ما اتاحت لي الظروف ذلك ..
لكن ما بقدر ألوم زول أنه ما بعرفني .. كونه عضو في سودانيزاونلاين

يا حميدة ..
إنت لسه في السودان ولا رجعت مليان ..

خلينا نتعامل مع الموضوع دا بدون حساسية السودانيين عشان الناس ما تزعل من بعض ..
أقدر كل المجهود القاعدين يعملوهو بورداب الخرطوم بالتحديد لأنه يقع عليهم العبء الأكبر في إستقبال القادمين من الخارج وأن لا نرمي عليهم اللوم في إستقبال أحد أو تجاهل البعض ..
ما بالضرورة تصاحب كل الناس ولكن لا يمنع من معرفتهم وبما أن البورد دا جمع الكثيرين فمن باب العشم إنو الآخر يؤد التعرف بك كما أنا أحمل نفس الشعور تجاه الآخر ولا ننسى الحميمية الكبيرة بين أعضاء المنبر والتي يندر أن نجدها في المنابر الأخرى ..
قد نجد إتنين مشاكلين هنا وحين لقائهما تزول كل هذه المشاكل ودا بفضل هذه التجمعات التي نراها ..
أتمنى أن نتعامل مع الأمر بصورة عادية وبسودانيتنا السمحة بدون تعقيدات ..

Quote: العلاقات التي تكلف الإنسان فوق طاقته غالبا ما يتحاشاها الكثيرون ولذلك يجب أن نتحرى متى نلجأ للأخوان ومتى نكون نحن ملجأ لهم و فوق كل ذلك حسن النية يكون متوفر حتى لو ظننت أن ذلك (الأخ) البوردابي خذلك في لحظة احتياجك له...

نعم .. يعني الاستاندر في التعامل يكون قايم علي اسس صحيحة .. و ليس مجرد عضوية في سودانيزاونلاين ..
من خلالها داير تلوم الناس ..

..
..

ياسـر طيفور .. ردك فيهو شخصنة للموضوع .. ما بقدر ارد عليك .. عذرا ..

العلاقة بين اعضاء المنبر في شكلها العام وحدها الأدني هي (زمالة) والزمالة تلزم العضو بواجبات اجتماعية او خلافه اتجاه باقي الاعضاء ............

من داخل هذا الاطار الواسع (الزمالة) تصطفي بعض (الاصدقاء) أو يصطفوك وتتوثق علاقتكم ويزداد التواصل بينكم ..................

على اى حال البوست مفيد ومهم لتوضيح مثل هذه المفاهيم ......................

لا ....


فريضة غائبة

يا شيخنا....

Quote: العلاقـــة بين اعضاء المنبر .. ( فرض عين أم فرض كفاية ) ..

بل هي رجس من عمل الشيطان ..
وقد قالها الحكيم سقراط في منتديات يونانيز اون لاين :
عاشر الدابي ولا البوردابي..

Quote: بل هي رجس من عمل الشيطان

يعنى يا عمر الفاروق لو قلت أعوذ بالله من الشيطان الرجيم وللا بسم الله..علاقتى معاك بتنحرق...

يا اخى انا بفتش لى لسبب..الله يجازى عمران الكان السبب......





______________________________________________________________

مع امنياتى بدوام العلائق الجميلة بين كل أعضاء المنبر....تقديرى وأحترامى...

الإجابة تعتمد على النية التى جعلت الواحد يصبح عضو فى سودانيزاونلاين..

التفاصيل فى العدد القادم!

Quote: عاشر الدابي ولا البوردابي

قصدك منو .. محمد عبدالرحيم الدابي ..
و الله دا زاتو عشرتو ألا تحلب فيها ليمونة ..

..
.

Quote: قلنا ليك تعال عند عوضية .. عملت لي فيها مدير

فى زول بمشى عوضية اثناء الدوام
ومالو الويكند ..
بعدين الخميس دا شوربة القراقير مهمة
واشياء اخر ..

_________

انت ما زلت فى الديار !!؟
اها لو الاجابة نعم ..
اعتبر علاقتنا فرض عين ..
عملت تلفون ولا ثرووو وهبة برضو

نتمناها علاقة أخوية خالصة خارج الإسفير قدر المستطاع ...

عموما العلاقات الإنسانية دى خيارات خاصة
صح لسانك

Quote: انا شخصيا اتمنى ان إلتقى بجميع البورداب متى ما اتاحت لي الظروف ذلك .. لكن ما بقدر ألوم زول أنه ما بعرفني .. كونه عضو في سودانيزاونلاين

صح لسانك يا ابو لحية غانمة

Quote: صح لسانك يا ابو لحية غانمة

صح بدنك .. يا المهلي ما تولي ..

حميدة
سلام


هل اي زول بكتب في سودانيزاونلاين من المفترض انه يكون صاحبي ..

صداقات سودانيز أونلاين نوعين :
1. نوع صداقة من نوع صداقة زمان البتنشأ من الزمالة الدراسية أو الجيرة في الحي أو في العمل حيث تتوافق كل المرئيات أو أغلبها مع بعض و تحس إنو فعلا صديق وقت الضيق
2. صداقة أسميها إسفيرية زي الحاصلة عندنا في الرياض أو بورداب الخرطوم و جدة و الدمام ، صداقة زي تكاتف أهل الفريق .. فيهم ال بيحبوا بعض و فيهم نع ما بدورك و ما بحمل بلاك ، و فيهم نوع أنا و البوردابي على الغريب و هلم علاقات تحتمها الغربة أو الحالة الإجتماعية في المنفى أو الوطن.

الصحوبية كلمة واسعة و فضفاضة ... و أنا شخصيا أحبذ على أن يكون معارفي بلا عدد و كثيروين نتلاقى في الملمات للتاكتاف.. و أصدقائي قليلين نتفاكر في أدق الخصوصيات

الريس ابوجهينة .. شكرا للمداخلة الشحمانة .. و بجيك برواقة ..