بوستات للبيع والعربون محبة

اول حاجة اي زول جاي داخل هنا شايل قروشو عشان
يشتري ليهو بوست بوستين يدق خلف ويرجع طوالي ..
واي زول جاي داخل هنا شايل محبتو حبابو عشرة
اليغرف ويشيل ويفيد ويستفيد كان الله مدَّ في عمر البوست وحقق اغراضه

قبل فترة ليست بالقصيرة كتبت كتابات مطولة عن الراحل مصطفى سيد احمد، وعلاقتي به خلال السنوات الأخيرة قبيل سفره الى روسيا في مايو 1990 كعازف كمان في فرقته، وتطرقت في تلك الكتابات بعمق للجانب الإجتماعي والإنساني لمصطفى، وكيفية تعامله مع العازفين ومع طلاب الجامعات الذين يقصدونه لإحياء حفلات روابطهم الإقليمية والأكاديمية ومداعباته للعرسان قبل اتفاقهم معه لإحياء حفل زفافهم، واظهرت تلك الكتابات بوضوح الجانب الإنساني المضيء في شخصية الأستاذ الراحل مصطفى وامتلأت بالكثير من المواقف والطرائف التي ظلت حبيسة جدار الذاكرة .. لم تكتمل تلك الكتابات خلال عصرية او يوم يومين، بل كتبتها خلال سنوات طويلة على شكل خواطر وكنت ارجع لأوراقي لتسجيل كل خاطرة او موقف يقفز للذهن .. المحزن في الأمر بعد اكتمال تلك الكتابات كنت بصدد طباعتها على الكمبيوتر وإرسالها للأخ وعضو البورد عبد الله محمد عبد الله او عبد الله فلوت عازف الفلوت في فرقة مصطفي لمراجعتها قبل نشرها، الا ان الاوراق اختفت بقدرة قادر اثناء رحيلي من منزل لآخر ولم اعثر لها على اثر ..
اها انا لو كنت كتبت اول خاطرة او موقف في بوست هنا كنا اتجادعنا فيه انا وعبد الله فلوت وآخرين وربما وصلتنا مشاركات اخرى عبر الإيميل ويمكن البوست كان بقى اطول من بتاع الشعبية داك وربما اصبح مرجع للأجيال الجديدة للتعرف عن قرب على شخصية الراحل مصطفى وعلى الثوابت الإنسانية الرفيعة التى تحكم تفكيره وتعاطيه اليومي للحياة وتعامله مع البشر ..

دعوني ادلف لموضوع البوست بعد هذه المقدمة التمهيدية ..
الثابت ان هناك الكثير من الأفكار والخيوط تتبادر الى اذهاننا كل يوم ومعظم تلك الأفكار تصلح لأن تكون خيوطاَ جيدة ومواد قابلة للإضافات الثقافية والمعرفية القيمة وحتما مفيدة لنا كأعضاء وللقراء على حد سواء، ولكن لا نستطيع الكتابة عنها لأسباب كثيرة كقلة الوقت وكثرة المشغوليات وزحمة الحياة وعدم توفر القدر الكافي من المعلومات وافتقاد روح البحث والكسل الذهني او البدني ... الخ

كثيراً ما نقرأ هنا عبارات على شاكلة والله بوستك ده وقع لي في جرح او الله كنت عايز اكتب في نفس الموضوع لكن سبقتني .. يعنى في اعضاء رؤوسهم مليانة مواضيع مهمة وحيوية لكن ما لاقيين زمن للكتابة او الإلتزام بمسئوليات البوست الأدبية كالمتابعة والردود، لكن ممكن يكونوا فعَّالين جداً في البوستات التي تروق لهم ويمددوا اقامتهم فيها وفي بعض الأحيان يستلموها ويرفدوا تلك البوستات بإسهامات غنية وهامة قد تفوق إسهامات صاحب او صاحبة البوست نفسه ..
وفي المقابل بيننا الكثير من الأعضاء الرايح ليهم موضوع وعايزين ليهم اي حاجة يكتبوا عنها لكن ما لاقين عشان كده كل صباح بنلقى الصفحة الأولى فيها موضوعين ثلاثة بالكثير يستحقوا القراءة والباقي بعضه تشيلو وتدي البحر والبعض الآخر بيعمل ليك فتاق في الجمجمة ويندمك على اليوم الدخلك وخلاك تخش تقرا ذاتو!!!

فكرة البوست بسيطة جداً

اي زول عنده فكرة بوست لكن ما داير او ما قادر يفتح بيها
بوست لأي من الأسباب اعلاه، او لأي اسباب اخرى يجي
يجدع فكرته هنا - الفكرة وبس - و أي زول رايح ليهو
موضوع او فكرة يجي يدفع عربون محبة ويغرف و يتخارج
ويفتح بوستو وبالتأكيد صاحب الفكرة حا يساعده كثير
وبتكون حركة ظريفة منو لو اشار لي صاحب الفكرة في البوست البفتحو

ما عارف ليه جاني احساس بأنه فكرة البوست ده بقت لي قريبة من فكرة دكتورة نجاة محمود وخالة دوما بتاعة الزيجات ديك !!

خلوني ابدأ ليكم بي بوست ظل عالق في ذهني منذ فترة و ياريت القى ليهو زول يباصرو ..

موضوع البوست تناول اوضاع السودانيين الذين هاجروا الى دول اخرى وتعرضوا للكثير من المضايقات والإبتزاز بسبب إقامتهم غير الشرعية، وياريت نحكي تجارب الإبتزاز التي تعرض الكثير من السودانيين المقيمين في ليبيا من البحارة السمارة وتجارب نقلهم بحراً الى جزيرة مالطا وحشرهم بالعشرات لشهور في بيت "مخالى" ذلك السمسار الإغريقي الذي كان يحرص على امتصاص آخر دولار في جيوبهم قبل يسلمهم لسمسار بحار آخر ليقذف بهم في شواطئ احدى الجزر اليونانية وليس في جيوبهم دولاراً واحداً ..
لو في زول عايز يفتح بوست بالفكرة دي ممكن اساعده كثير بي إفادات سودانيين قابلتهم في اليونان مروا بهذه التجربة وتجارب اخرى مماثلة ..

الحبيب الصاوي

شوقنا بحر أبوروف

يا أخي والله بالغت عدييييل كدا (وش معبر عن إعجاب بالفكرة)

تعرف يالصاوي عندي بوست في ذهني ليه ثلاثة سنوات
ربنا ما شاء ليه النزول - إمكن لأنني رابطه بي موسمية الموضوع
نفسه - عيد الأضحية !!

الموضوع في شكل بحثي عن الخرفان في السودان
الأنواع ، مناطق التواجد ، الجودة إلخ . .

غايتو دا عرض أول
إمكن نسكن هنا


همسة:
أتفق معك كاملاً في ما جاء أعلاه عن المطروح


مرفق:
كل المحبة

إسماعيل حميم


.

الصاوى,,,,,سلاام وبركة بالشوفة,,,

اى شئ عربونو المحبة فيهو الخير,,,,

فى الدنيا دى رهانى على المحبة وابدا ماخسرت,,,

واى زول يشوف غير كدا,,يراجع روحو,,,

انا حجزت ,,,,وشريكتك,,

بصراحة كده أنت مطلوب أمام العدالة

والعدالة الناجزة

لأنه كتابتك كانت متاهة في عالم الإبداع ، تدخل ولا تدري مكان الخروج ، بل كانت مرشد حقيقي لعالم كبير هو عالم مصطفى سيد أحمد، وبالرغم من الهرجلة من بعضهم كنت أتمنى لو أستمرت...

في حالتك هذه مافي عفو رئاسي أو شرعية ثورية

وعقلك في رأسك
تذكر كل الكتبته
وتجيبو هنا
ولا كلمة !!
ولا نفس!!

اميرة الشيخ سلامات وزارتنا البركة والله

Quote: الصاوى,,,,,سلاام وبركة بالشوفة,,, اى شئ عربونو المحبة فيهو الخير,,,, فى الدنيا دى رهانى على المحبة وابدا ماخسرت,,, واى زول يشوف غير كدا,,يراجع روحو,,,

احسنت اختيار الفرس الرابح وكسبت الرهان
لن يخسر ابدً من يزرع المحبة حوله فتنمو حائطاً
تتكسر فيه كل سهام الشرور قبل ان تصيبه بأذى
وكما قال بيتر يوزتينوف في وصف المحبة
Love is an act of endless forgiveness, a tender look which becomes a habit
ولا يبدو هذا العمق في تعريف المحبة غريباً على شخص مثل
الكاتب والممثل الروسي السويسري الإنجليزي الأثيوبي بيتر يوزتينوف ذلك الإنسان الذي رفض الإنتماء لبلد محدد
ووصف نفسه بأنه International citizen متحرراً من كل قيود
الدول وحدودها الجغرافية ومنتمياً فقط للإنسانية وقيمها السامية

Quote: انا حجزت ,,,,وشريكتك,,

اتفقنا والبوست بوستك تعالي بي جرادل محبتك ورهانك الرابح
وقطعاًَ لن تخسري، وياريت تجدعي لينا كل المواضيع الفي راسك المليان فهم ده
والبتعتبري انها هامة و جديرة بالنقاش وربما نلقى ليها ناس
يكتبوا عنها ..

سلامات ومحبة يا ابو السباع ياصديق الصبا وابن ابي روف الجميلة
شاكر جداً اعجابك بالفكرة ومساهمتك، واتمنى انك ترجع تاي بموضوعات جديدة، وياريت تعيد فتح موضوعك بتاع المخطوطات القديمة لأجدادنا والتي يحتفظ بها العديد منا وتذخر بها المكتبات العتيقة في بيوت ام درمان وغيرها من المدن الأخرى، وربما استطعت ان تحفز الكثيرين على الإسهام بما في اياديهم من مخطوطات ومكاتبات قديمة .. ومن المهم جداً اشراك غير الأعضاء في مثل هذه المواضيع وتحديد ايميل لإستقبال مساهماتهم التي اتوقع ان تكون اكثر بكثير من مساهمات الأعضاء ..

Quote: تعرف يالصاوي عندي بوست في ذهني ليه ثلاثة سنوات ربنا ما شاء ليه النزول - إمكن لأنني رابطه بي موسمية الموضوع نفسه - عيد الأضحية !! الموضوع في شكل بحثي عن الخرفان في السودان الأنواع ، مناطق التواجد ، الجودة إلخ . .

موسمية شنو وبطيخ شنو يا ابو السباع ياخ؟
يا اخوي الناس تراها تكدكد في العضام السنة كلها!!
اتمنى ان يجد موضوعك احد المهتمين وبالتأكيد لن تبخل عليه بما لديك من معلومات ..

تحياتي ومحبتي يا صديق

Quote: (عدل بواسطة ابو القاسم حسن on 12-01-2010, 09:59 م)

الأخ العزيز ابو القاسم
تحايا ومحبة
قرأت مداخلتك المليانة محبة وقلت ارد ليك بعدين برواقة
لكن لما رجعت وجدتك قد حذفتها، ولا ادري ما سبب ذلك
عموماً محبتك وصلت يا انسان، ودايرنك ترفد لينا البوست
ده بالمواضيع الهامة الفي راسك وما قادر او ما داير تغطيها
واحتمال تلقى ليك زملاء عندهم الإهتمام بنفس مواضيعك
وتقدروا مع بعض تغطوها بالعقل الجمعي والجهد المشترك
لك خالص ودي ومحبتي

بالناسبة اتصلت بجمال عبد الرحيم وطمنني كثيراً على ناهد جبر الله

Dear elsawi
Salam
Thanks for the post
with love

والله يا الصاوي، لو قلت ليك فكرة بوستك ده زااتها كانت عندي ليها مده من الزمن، بس غلبني القي وكت اكتب فيه البوست و عارفة روحي، بتابع بصعوبة فقلت مافي داعي للشلاقة، فدحين شاكراك شكر كتير و اضيف لاقتراحك عشان الناس تتشجع و تطرح العندها، البيحب يكتب في موضوع لقاهو هنا، يا ريت يكتب اسم الزول الاقترح الموضوع في عنوان البوست
مجرد اقتراح
و الوجد انه الموضوع انكتب، بس مقترح الموضوع ما عارف، اليجيب اللينك هنا برضه


افكار متناثرة لبوستات

بوست عن العمل الطوعي في السودان، و مشاكله، كنت وعدت اني افتحه بعد ان اكمل دراسه بديتها فيه، و لكن ما قدرت

كنت حابه افتح بوست عن الخادمات و العاملات و المربيات بالمنازل و ابداهو بسؤال هل نحن بحوجه لهم فعلا؟ و اذا كان ضروري الاستعانه ببعضهم، الكيفيه كيف؟ و حبيت اذكر الناس بضرورة الاحسان اليهم و تذكر ان لهم اهل و مشاكل و بعضهم تركو ابنائهم ليربو ابناء غيرهم عشان يعيشوهم، و في نفس البوست كنت حابه اناقش ضرورة روتين في حياة الاسرة و حدود للتعامل مع المربيات

بوست اخر عن bilingualism and multilingualism, and culture in general
بالنسبة للاطفال الابوينهم جايين من ثقافات مختلفة



النمشي المطبخ و نجي، بتذكر زيادة ان شاء الله :)

سلام يا الصاوي،

فكرة المول بتاع البوستات دا فكرة في السلك وأنا أكتر زول ممكن يبيع فيهو لهوايتي المتمثّلة في تجهيز البردعة قبل الحمار...أي، العنوان قبل فكرة الموضوع وقبل الشروع في بناء البوست.

قبل فترة فكّرت أجي أفتح لَـيْ بوست أسمّيهو "عمود غدا الجمعة" أو "عمود غدا الخميس" أو السبت أو الأحد أو اليوم البفيق فيهو أكان بفيق وكان همّي أن أزوّد العمود في كلّ اسبوع بمقال من مقالاتي المبعثرة بهذا البورد (مع إنّو بعضها محل غَتَس ما عارفو) لكين لقيت الفكرة فيها تكرار وكدا.

أها الفكرة للبيع بي يفتح الله ويستر الله وأكان الله فتح عليّ ببعض الوقت حا أجي أشتريها أنا ذاتي وجاهزة عندي حالياً خمس بردعات لخمسة حمير، البلمّنا في رقبة الحمير شنو:

1. المريض الانقليزي الساكن معايَ ("هيستوريكال" عن فلم المريض الانقليزي لكنّه عن رحلات المستكشف المجري الكونت ألماشي بشمال وغرب السودان وبعض أثرها).
2. قصة مصحف: حيّوا "أم كتيرةَ" حيّوها (Suspense عن مصحف مخطوط باليد تمّت سرقته وبيعه بإنداية وتمّت استعادته مع رحلة وارثه، الطفل آنئذٍ، لاستلامه)
3. نو وومان نو كراي! أولرايت...أولرايت إلا المناحة حاصلة ("ميوزيكال دراما" عن المناحة في أغنية نو وومان نو كراي مربوطة بشيء عن رحيل مايكل جاكسون)
4. "أحوال المحارب القديم": من يحارب من! ("بوليسي" عن رواية الحسن بكري "أحوال المحارب القديم" مع إنّو دا مقال داير ليهو جكّة جامدة وأكون شاكراً لمن يهديني عبر بوستك هذا روابط تتحدّث عن هذه الرواية أو تنقدها)
5. سباق أغاني المسكنة (ما عارف عن شنو بالضبط لكين فيهو أغاني وفيهو مسكنة، ممكن يكون مقال "ميوزيكال كوميدي" وممكن يكون فكرة بوست بين البائع والمشتري)

أها الداير يغرف اليغرف مجّاناً والداير يساعدني مجّاناً اليساعدني.

قصّرتَ معاك؟ أها، اتجدعن كِدا وسلّم لي على الجماهير العِندك: أيمن وديفينيشن وطارق وجاليليو وحاتم وجبرونا وصلاح وكلّ من وقف الخرف حائلاً بيني وبين أن أذكره...سُنّة قالوا بالخرطوم.