ضُلْ الشِدَره .. وبيت الطِين

كنا صُغار انا و (بابكير)
وكان الدنيا لسه بخير
عصفورين ..
فوق فرعاً أخدَر
يلعبو زين
رغم الريح أبطبعاً شين
كنا نساسق لي جيهتين
ضل الشدره وبيت الطين

كان العيد
وجية المطره
عيداً تاوق بي طعمين
لا هامينا الريح الويل
ولا لامينا الليل والسيل
بي غبَشَتنا كنا وجاهةً
لما نفتِّش زولنا شليل
كان الدنيا تشد الحيل
وكان الناس جد طيبين
كانت صحبه
وضحكة عافيه
ومافي هموماً زي المافيا
لقمه كِسره وجُقمة موية
كانت كافيه
فكة ريقه في التاتيقه
ساتره ودافيه
وزايد فوقه حِن والدين
كنا شقايا واللا تقايا
ماعارفين
مافي صباحاً ما اتشاكلنا
إلاّ دقايق وإتصالحنا
حِس (أبنتره) كان بندهنا
حِن والدنا هو الشكّلنا
(وبت كرموش) شوف العين
----
مره مشينا قلنا نعوم
وكان الدنيا دميرةً شوم
هو كان عوّام
شان فايتني بي سنتين
قلعنا هدومنا..
ومافي رقيباً كان شايفنا
إلا الخالق هو الحارسنا
طَفَّر قبلي..
عايم واقف..
زي ماتقول ما ها غريقه
إطمنت ماها غريقه
وغير ألفاه مافي طريقه
وأطير لا فوق
وجب في المويه
وجب لا الطين
وحين قلّعت كان العين فنجان
وكان الخوف في الجوف بركان
كانت غرقه بيها عرفت
ضعف الكاذب ها الإنسان
كانت غرقه وكانت توبه
يا مخلوق من حفنة طين
-------
كنا أصحاب
كان في الشارع
كان في البيت
كانو اصحابنا
طير الجنه
وفاطنه القصب اللحمر
وعمي علي بياع الزيت
ساق مرتو وداها البيت
في البيت عامل زعلان
في القهوه شارب فنجان
والهون ضرب التلفون
الجبه وقعت في البير
صاحبه واحد خنزير
وهو لبلب ..
كم في الخط
مو حداشر؟
كضباً كاضِب
هو لبلب ..
كم في الخط ؟
مو خمسه ؟
شِد واركب
شِدّ الرُكَبْ
الميس بعيد
ولا قرّبْ
ولا بنتعب
ويوت نلعب
يوم شديت ويوم حرينا
الرمه والحراس
زمناً سمح بالحيل
لا وسواس ولا خناس
إتعشينا
إتدمدمنا
واتغتينا
وكنا بنحلم بي حاجتين
ضل الشدره وبيت الطين
ومرات مرات بين البين
غرقتي ديك وحجم العين
-----
شويه شويه نحن كبرنا
ودرب المدرسه ليه خِبِرنا
في الصُبحِيه كان قايدني
في واجباتي هو الفايدني
وفي زنقاتي كان ساندني
بين الحصه وبين التانيه
كان بفقدني
أيا يمين
قبل الفُسْحَه كان واعدني
هين بركاوي
لمن اسمِّع كل (ياسين)
أتعودت عليه الوافر
كان عافيتي البيها بجاهر
مافرقتنا كيميا وجبر
واللا الإحصا السَمّهَا كافِر
إتخرجنا واتفرقنا
ويومي القلت بسافر أهاجر
كانت فرقتو حد سكين
وعيك يا غربه
وفيك يا كربه
لما تلِمّك بلد الغير
تبقي مبهدل زي الطير
لما يفارق عش الخير
ولسه مبهدل زي الطير
يوم فارقت أخوي بابكير
ويوم وادعت لي حاجتين
ضل الشدره..
وبيت الطين.




فاروق أبوحـوه
______________
لا الود انتهي لنرحل ...
ولا الحنين يكفي لنبقي ..

عصفورين ..
فوق فرعاً أخدَر
يلعبو زين
رغم الريح أبطبعاً شين
كنا نساسق لي جيهتين
ضل الشدره وبيت الطين

الرائع
فاروق ابو حوة

تحية برائحة الجروف ونسيم القيفة

الشدرة اجتثوها ليسفلتوا الطريق أو ليبنوا بقالة أو محل اتصالات
أو لأنها أصبحت مأوا للمتسكعين والعطالة والذين لايعطون الطريق حقه

اما بيوت الطين لم تعد كذلك بعد ان قام بهدمها أولاد المغتربين .. وشيدوا
مكانها بيوت الأسمنت .. بيوت الطين فقدت بريقها وعفويتهاونقاءها منذ اعتلتها أطباق الديجتال
أنت تكتب عن أشياء نحملها في دواخلنا لم يعد لها وجود على أرض الواقع .. وان بدا لنا غير ذلك .......... شاهق التحايا

الفاروق ..

كم أهوى هذه المفردة التي تخرج منك

مزيد من الدهشة يا صديق

الرائع جدا الفاروق

لك تحية مضمخة بعبق

الزمن الجميل

كلام معتق

أخوى ابوحوه..سلام يازين..

كلامك زين وسمح بالحيل..

فيهو جمال وفيهو حنين.

حنين زى ريحة اهلنا الطيبين..

Quote: يوم فارقت أخوي بابكير ويوم وادعت لي حاجتين ضل الشدره.. وبيت الطين.

الله يجمع الشمل يا حنين...

تقديرى وأحترامى.....إسماعيل محمد احمد عباس...

Quote: أخوى ابوحوه..سلام يازين.. كلامك زين وسمح بالحيل.. فيهو جمال وفيهو حنين. حنين زى ريحة اهلنا الطيبين..

سمعه يا عباس:

سلامات حبابك يا حبوب ..

ما أجمل الغناء للإلفة

بين الإنسان والبيئة المحيطة به من ناس وغيره.

وما أجمل تفاصيل الحياة البسيطة.

Quote: الله يجمع الشمل يا حنين... تقديرى وأحترامى.....إسماعيل محمد احمد عباس...

آمين يا (سماعين)

وتلتئم كل جراح الغربة فينا.


كل الود

Quote: كلام معتق

فيصل محمد خليل:


يا عتيق




كل الموده

Quote: الرائع جدا الفاروق لك تحية مضمخة بعبق الزمن الجميل

عزيزي عكود:

كل التحايا:

الزمن الجميل يزدان بك حضوراً وبهاء..

شكراً يا حبوب


تحياتي

Quote: الفاروق .. كم أهوى هذه المفردة التي تخرج منك مزيد من الدهشة يا صديق

نهله محكر:


يا فاتحة طاقة شجونك نم..

كم أهوي حرفك الحاضر المقيم..

مشتاقين يا بت الناس الطيبين

كل الموده نهله محكر


تحياتي

فاروق أبو حوة

ياعزيز

لا كلام ولا حديث يصح....في حضرة صاحب (الكلمة)

Quote: كم في الخط ؟ مو خمسه ؟ شِد واركب شِدّ الرُكَبْ الميس بعيد ولا قرّبْ ولا بنتعب ويوت نلعب يوم شديت ويوم حرينا الرمه والحراس زمناً سمح بالحيل لا وسواس ولا خناس إتعشينا إتدمدمنا واتغتينا وكنا بنحلم بي حاجتين ضل الشدره وبيت الطين ومرات مرات بين البين غرقتي ديك وحجم العين -----

Quote: فاروق أبو حوة ياعزيز لا كلام ولا حديث يصح....في حضرة صاحب (الكلمة)

مازن يا زين

في حضرتك..

روضت ليك

كل الحروف

المستحيله

وومكنه.


شكراً يا صاحب


كل الود

Quote: الرائع فاروق ابو حوة تحية برائحة الجروف ونسيم القيفة الشدرة اجتثوها ليسفلتوا الطريق أو ليبنوا بقالة أو محل اتصالات أو لأنها أصبحت مأوا للمتسكعين والعطالة والذين لايعطون الطريق حقه

منتصر محمد ذكي

أهلاُ بك بين جروفنا التابره زي غابه..
وبك أخد نسيم الدغش شبالو من جريد نخلنا السامق..

لا أحد بمقدوره إجتثاث خضرة قلوبنا وطوحاتنا وطفولتنا ..
(يسفلتوا شنو يا حبوب) ؟
دي كل البلد زفت إلا الشوارع ما فيها ( زفت )..

أملا ضراعك بالبلد
لسه الضراع أخدر

Quote: اما بيوت الطين لم تعد كذلك بعد ان قام بهدمها أولاد المغتربين .. وشيدوا مكانها بيوت الأسمنت .. بيوت الطين فقدت بريقها وعفويتهاونقاءها منذ اعتلتها أطباق الديجتال أنت تكتب عن أشياء نحملها في دواخلنا لم يعد لها وجود على أرض الواقع .. وان بدا لنا غير ذلك .......... شاهق التحايا

بيوت الطين راكزه يا طيب بالأرض كالمقام المبارك..
بيوت الأسمنت إن لم تمنحك راحة البال والهواء البارد يبقي هي وبيوت الطين لا قاسم مشترك يجمعهما..

( حرم يا منتصر أنا من المغتربين ديل لكن بيتنا طين لليله لا أسمنت ولا هم يحزنون)..

ولسه مراحنا يعشي ويفشي
وبي بقيراتنا وغنيماتنا..
كم كلب وكوم حمير.

لسه أم كرم الله مكسيكيه يا منتصر..

ممتن

لطالما أحتفينا بضل الشدرة وبيوت الطين قبل ان تزحف
علينا المدينة أو نزحف عليها ونغوص في أتونها ومتاهاتها
ومن يومها لم نضوق العافية وراحة البال ............


لكم أشتهي شاي فجر بي لبن غنماية لبونة يعقبه شاي سادة بي لقيمات
والصبح يتمطى قبل ان تلامس وجهه خيوط الشمس الأولى ................. شاهق التحايا

Quote: لكم أشتهي شاي فجر بي لبن غنماية لبونة يعقبه شاي سادة بي لقيمات والصبح يتمطى قبل ان تلامس وجهه خيوط الشمس الأولى ................. شاهق التحايا

يا منتصر أخوي:

صدقني مشتاق للبلد
في كل لحظه عليّ تمر
ضيع سنيني الإغتراب
في الغربه ضيّعت العمر

طاري الديار الطاعمه ديك
زي قهوه في ضُل الضُهُر
كِسرَه ومُلاحه كمان فرِك
جرجير وشطاةً خُدُر
بصلاً مفقَّش بي طرف
سِعن الغُباشه هناك يكُر
خيتين سمِن
تمسح وشيك..
بعد الشبع..
شاياً..
( مَـقـنـَّن )
فوق.
جمر.
وين المراييق البُطان ؟
كُر من فوتتُن..
يا غربه كُر




بجيك راجع

فارع الشوق

.