Post: #1
Title: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 09:22 PM
جربت يوم طعم (الفشل) في عز نجاح ونصراً كبير حققتو بعد الإنتظار سنوات طوال ؟!!
|
Post: #2
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 09:29 PM
Parent: #1
جربت تكون ماشي في سكة أمان وفي نص طريق الطمأنينة يطلع ليك ( القدر) شايل كوم الهواجس والخوف والغدر والتحطيم
يرميها ليك في طريقك ويجهجهك ويبتسم (شمتان) ويمشي ؟!!
|
Post: #3
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: عمر عبد الله فضل المولى
Date: 01-07-2010, 09:38 PM
Parent: #2
نعم
|
Post: #13
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 10:57 PM
Parent: #3
عمر
ولقيتو كيف ؟!
|
Post: #4
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 09:40 PM
Parent: #2
جربت مرات في عز فرحتك يهجم عليك ( وحش الحزن) يأكل ( مصارين ) ضحكتك ؟! ( وش متألم ) !
|
Post: #5
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 09:46 PM
Parent: #4
جربت يوم أقرب صديق يتخلى عنك ساعة الوجع الحريق وينفض إيدينو من الأحاسيس الجميلة
ولقمة العيش والملح ؟!!
|
Post: #7
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: احلام وهبي
Date: 01-07-2010, 09:51 PM
Parent: #5
جربت مرات في عز فرحتك يهجم عليك ( وحش الحزن) يأكل ( مصارين ) ضحكتك ؟! ( وش متألم ) !
ايوه جربتها وانت انشاءالله ما تجربيها ياغاليه
|
Post: #16
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 11:18 PM
Parent: #7
الحبيبة آحلام وهبي
| Quote: ايوه جربتها وانت انشاءالله ما تجربيها ياغاليه |
أنا ؟!!
آه ياحبيبة وفي أكتر من طعم موت حبيبك ( نار) ؟!
أكاد أجزم إني جربت كل الوان الحزن بكل نكهة وطعم !!
خليها على الله بس !!
|
Post: #6
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: حاتم الياس
Date: 01-07-2010, 09:48 PM
Parent: #4
تكونى بس ماقاعده تتحصنى.....
|
Post: #17
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 11:29 PM
Parent: #6
حاتم
| Quote: تكونى بس ماقاعده تتحصنى..... |
جربت يوم يكبس عليك غول الهموم وتجري على برش الصلاة وتقعد تحنس في الكريم يمسح خطاياك ثم بعدها يرحمك
ويرسل ( الملك) الشديد براحة ينزع مهجتك .. شرطاً ( حبيبك) يدفنك ؟!!
|
Post: #8
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 09:54 PM
Parent: #2
جربت في يوم ( الصفاح) والأم تزعرد بإنشراح ورصاص فرح شايلو الهواء (تاح تراح )!!
وفي لحظة بس ( كتاحة) جات وشلعت الصيوان تمام ومن باقي ( كانون) الضلع طارت شرارة وحرقت العرسان كمان !!
|
Post: #9
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: منال
Date: 01-07-2010, 10:10 PM
Parent: #8
Quote: جربت في يوم ( الصفاح) والأم تزعرد بإنشراح ورصاص فرح شايلو الهواء (تاح تراح )!!
وفي لحظة بس ( كتاحة) جات وشلعت الصيوان تمام ومن باقي ( كانون) الضلع طارت شرارة وحرقت العرسان كمان !! |
لاحولاااااا
مالك يانادية
ربنا يبعد عنك كل شر ويجعل ايامك كلها فرح يارب ...
|
Post: #11
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 10:23 PM
Parent: #9
جربت لما ( أبوك) ينادي لزول بحبو وكل يوم يسأل عليهو وتحنس الزول شان يجي وبمحنة يجبر خاطر أبوك
والزول ده أبداً مابجي وينزف نزيف خاطر أبوك وتتشقى إنت من الوجع ؟!!
|
Post: #19
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 11:44 PM
Parent: #9
منال
Quote: مالك يانادية
ربنا يبعد عنك كل شر ويجعل ايامك كلها فرح يارب ...
|
جربتي يوم تشتري الدهب المجمّر وتمشي فرحانة وتختي في خزنتك ويكون كمان حقك براك ولما الصباح يطلع خلاص
تلاقي (دهبك ) كان نحاس ويبقى حزنك ساس ورأس ؟!!!
|
Post: #10
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: ابو جهينة
Date: 01-07-2010, 10:18 PM
Parent: #8
كيفنك يا نادية
جربت مرات في عز فرحتك يهجم عليك ( وحش الحزن) يأكل ( مصارين ) ضحكتك ؟!
الفرح أنواع ... و وحش الحزن أنواع
هناك فرح خفيف الوزن لا يتناسب مع حجم وحش حزنٍ من العيار الثقيل ...
و هناك فرح عيار 21 .. مهما هجمتْ عليه وحوش الحزن لا ينالوا من توهجه شيئا .. بل يتساقطون على عتباته كما ذباب الرتينة المنتحر على جوانبها ...
و هناك شيء مهم ... لا القدر و لا كل وحوش الحزن تجرؤ على الإقتراب من فرحة القلب و الروح لو كانت أسباب الحزن قد تلاشت بالفعل جراء الفرح الغامر .. فالأنسان هو الذي يستدعي جحافل الحزن كنوع من ( تعذيب النفس ) و حاجته إلى الحزن لكى يحدث التوازن النفسي المتأرجح بين الفرح و غمامات الحزن و لكى تقارن روحه بين أسراب الفرح المخيمة عليه و بين أطياف الحزن البعيدة.
إنها النفس البشرية ... تحتاج إلى الجوع بعد الشبع .. و إلى الصحو بعد غفوة الوسن .. و إلى وخزات الألم بعد تجرع إنسراب العافية بكامل ثيابها في طيات الجسد ..
أو هكذا أعتقد
كوني بخير و تحياتي للأسرة
|
Post: #12
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 10:34 PM
Parent: #10
جربت يوم ( ولدك) وهو لسع زول صغير يتحمل الحزن الجسيم
لمن يشوفك تبكي جد وإيديهو أصغر من تشيل حجم الجرح من مهجتك ؟!!
|
Post: #15
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نصار
Date: 01-07-2010, 11:09 PM
Parent: #10
اللهم لا حسد يا نادية
يبدوا انه مازالت الاحباطات و الالام و .. هي الاستثناء
يظهر (بغضها) الضد
نحنا مشينا بعيييييييييد خالص
|
Post: #22
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 11:58 PM
Parent: #15
نصار
Quote: نحنا مشينا بعيييييييييد خالص
|
جربت يوم تركب ( أمجاد) الحياة وتنزل محطة فرحتك تلاقي ( دفّار) الوجع يحلف يفرتق جتتك ؟!!
|
Post: #23
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-08-2010, 00:02 AM
Parent: #10
العزيز الحكيم أبو جهينة
| Quote: إنها النفس البشرية ... تحتاج إلى الجوع بعد الشبع .. و إلى الصحو بعد غفوة الوسن .. و إلى وخزات الألم بعد تجرع إنسراب العافية بكامل ثيابها في طيات الجسد .. |
جربت يوم طعم الوجع لمن يزيد وفي الجوف يقيد والروح مصفدة بالحديد ومرات يلوح ليك الأمل ولو من بعيد
وتلهث وراءه تلقاه سراب وجرحك ينوسر بالنزيف وريحة الصديد ؟!!
|
Post: #14
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 11:01 PM
Parent: #8
جربت يوم كل ( الجلاليب) طالعة بيضاء عشان تصلي العيد هناك فوق المسيد
وتهليل وتكبير تلقى في النص ( عنقريب) وزولاً مودع أهلو للدار البعيد ؟!!
|
Post: #18
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: Emad Abdulla
Date: 01-07-2010, 11:38 PM
Parent: #14
الدنيا خميس .. لا إله إلا الله ..
ما معانا أيام الخمايس كفيت يا بت ..
أدينا حبة فرح في ليلنا البيض ده .
|
Post: #20
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-07-2010, 11:53 PM
Parent: #18
عماد
| Quote: أدينا حبة فرح في ليلنا البيض ده . |
جربت لما تكون ( خمايسك) كلهن بيض دون ( جداد) ؟!!
عماد
هو الليلة الخميس بالله ؟
قادر الله والله لافارزة خميس لا جمعة وكلووووو كلو بيض ياخ !!
|
Post: #21
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: اناهيد كمال
Date: 01-07-2010, 11:54 PM
Parent: #14
وتهليل وتكبير تلقى في النص ( عنقريب) وزولاً مودع أهلو للدار البعيد [
-------------------
اى يا نادية
ودة البفوق حد الاحتمال
وحزن يدوم
ما دامت الحياة
---------
مالك علينا يا ندوية
احنا كملنا كل ادوات التخدير
ما تصحى لينا وجع
لا بنتهى
ولا بزول
|
Post: #24
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-08-2010, 00:15 AM
Parent: #21
أناهيد
Quote: احنا كملنا كل ادوات التخدير
ما تصحى لينا وجع
لا بنتهى
ولا بزول |
جربتي يوم حزنك يشيلك زي ( صغيرة) وتلقي في الشريان درب وكلكوز مملح سكروز والدنيا حولك
كوم عيا ونسوان كأنهن أمهات من حيث لا تدري وكأنك دون أهل ساعة صديقتك تخذلك ؟!!
|
Post: #25
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: أمين محمد سليمان
Date: 01-08-2010, 00:19 AM
Parent: #24
لا حوله و لا قوة إلا بالله
ياخي دي كميه من الغم ما طبيعيه !
الحاصل شنو يا ناديه ؟
|
Post: #29
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-08-2010, 00:49 AM
Parent: #25
أمين العزيز
Quote: لا حوله و لا قوة إلا بالله
ياخي دي كميه من الغم ما طبيعيه !
الحاصل شنو يا ناديه ؟
|
جربت يوم طعم الظلم ووكت السواد يكتر عليك لا شمعة توقد دنيتك لا صديقك يمسح دمعتك
لا تعرف الليل من نهار وطعم الفرح يصبح مرار ؟!!!
|
Post: #26
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: Dr. Salah Albashier
Date: 01-08-2010, 00:20 AM
Parent: #21
الأخت العزيزة الكنداكة نادية عثمان
لك التحية والتجلة ووافر الإحترام
لا يا كنداكة المشاعر هذا الكلام لا يشبهك .. وانظري للنصف الممتلئ من الكوب.
مع خالص تحياتي
د. صلاح البشير
|
Post: #27
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: وجن
Date: 01-08-2010, 00:34 AM
Parent: #26
نادية انتي قاصداني صاح آآآي كلو جربتو
زعلتيني منك شديد أنا ما صدقت لمار كفكفت دميعاتي
وفعلا طعم
( ولدك) وهو لسع زول صغير يتحمل الحزن الجسيم لمن يشوفك تبكي جد وإيديهو أصغر من تشيل حجم الجرح من مهجتك ؟!!
طعم مر شديد حنظل عديل
نادية لمار نامت وانتي تاني نزلتي دميعاتي البمسحن منوبكل الشفقه والحنان دي
|
Post: #33
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-08-2010, 01:22 AM
Parent: #27
وجن ياحبيبة
| Quote: نادية انتي قاصداني صاح آآآي كلو جربتو |
لاحولا جربتي كل المر ده ياوجن ؟!
Quote: زعلتيني منك شديد أنا ما صدقت لمار كفكفت دميعاتي
وفعلا طعم
( ولدك) وهو لسع زول صغير يتحمل الحزن الجسيم لمن يشوفك تبكي جد وإيديهو أصغر من تشيل حجم الجرح من مهجتك ؟!!
طعم مر شديد حنظل عديل
نادية لمار نامت وانتي تاني نزلتي دميعاتي البمسحن منوبكل الشفقه والحنان دي
|
خلاص هسسسسسسسسسسسس
تعالي نمشي على أطراف الحزن ونبعد ومن وراء الستار نمسح الدمعات عشان لمار ماتصحى وتحزن لجراحنا سمح؟
|
Post: #28
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: وجن
Date: 01-08-2010, 00:35 AM
Parent: #26
|
Post: #30
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-08-2010, 00:58 AM
Parent: #26
د. صلاح
| Quote: لا يا كنداكة المشاعر هذا الكلام لا يشبهك .. وانظري للنصف الممتلئ من الكوب. |
جربت إنك تبقى صادق وتعيش جراحك دون تجمّلها بابتسامة مزيفة وتقدس الحزن النبيل ؟!!
|
Post: #31
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: العوض المسلمي
Date: 01-08-2010, 01:06 AM
Parent: #30
ما جربتي احساس ان تذهب لمن تحب الاف الاميال ولا تجد منه الا الصد ..
وما اقساه من احساس ان تاتي فارد ذراعيك لزولك وتجده ببرود المتجمد الشمالي ,,
وما اصعبه من احساس ان تجد الصد والمنع وتبذل الغالي والنفيس ولا تجد الا التبخيس ..
وكمان صعب ان تتقرب الي الانسان في لحظة احتياجك ولا تجده .. ويغضب اذا انعكس الامر عليه
احساس قاتل ومميت ان يبادلك احد شعورا بشعور ولكن بعد ان تموت مشاعرك ويتساوي لديك الجميل والقبيح ..
احساس صعب ان يشعرك من تحب انه ما احباك الا نتيجة اصرارك عليه ومتابعتك له ومطاردتك اياه ...
الاحاسيس لا تتجزاء ولا تفرق بين رجل وامراة
|
Post: #34
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-08-2010, 01:39 AM
Parent: #31
العوض المسلمي
Quote: ما جربتي احساس ان تذهب لمن تحب الاف الاميال ولا تجد منه الا الصد ..
وما اقساه من احساس ان تاتي فارد ذراعيك لزولك وتجده ببرود المتجمد الشمالي ,,
وما اصعبه من احساس ان تجد الصد والمنع وتبذل الغالي والنفيس ولا تجد الا التبخيس ..
وكمان صعب ان تتقرب الي الانسان في لحظة احتياجك ولا تجده .. ويغضب اذا انعكس الامر عليه
احساس قاتل ومميت ان يبادلك احد شعورا بشعور ولكن بعد ان تموت مشاعرك ويتساوي لديك الجميل والقبيح ..
احساس صعب ان يشعرك من تحب انه ما احباك الا نتيجة اصرارك عليه ومتابعتك له ومطاردتك اياه ...
الاحاسيس لا تتجزاء ولا تفرق بين رجل وامراة
|
جربت أن تعشق أنسان وتديهو روحك وقلبك وكل ماتملك من مقدرة على العشق ويرفعك لعنان السماء
ويشعرك إنك لامس السماء بيديك ثم فجأة يتحول ذلك المحبوب (لوحش كاسر) بعد ماكان يبكي لبكاك
ومايتحمل فيك شكة الأبرة ؟!
جربت طعم (سوط العنج الممسح بقطران) وحبيبك بجلدك بيهو كل لحظة بدون رحمة عشان حبيتو بصدق ودون رياء ؟
جربت مرارة أن تحس إنو زول حباك عشان لما تبادلو الحب يذل قلبك ويتلذذ بدموعك وآهاتك وتجريحك ؟!
جربت طعم كسر خاطر قلبك وقبيلتك بدوافع الإنتقام من حبيب ماخاف الله فيك وفي قلبك وقبيلتك ؟!
|
Post: #43
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: اناهيد كمال
Date: 01-08-2010, 08:22 PM
Parent: #34
جربت أن تعشق أنسان وتديهو روحك وقلبك وكل ماتملك من مقدرة على العشق ويرفعك لعنان السماء
ويشعرك إنك لامس السماء بيديك ثم فجأة يتحول ذلك المحبوب (لوحش كاسر) بعد ماكان يبكي لبكاك
ومايتحمل فيك شكة الأبرة ؟!
جربت طعم (سوط العنج الممسح بقطران) وحبيبك بجلدك بيهو كل لحظة بدون رحمة عشان حبيتو بصدق ودون رياء ؟
-----------------------
والله يا ندوية
البوست دة مقلب
على المواجع من امبارح
|
Post: #32
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: Dr. Salah Albashier
Date: 01-08-2010, 01:07 AM
Parent: #30
الأخت العزيزة الكنداكة نادية عثمان
لك التحية والود
التسامي فوق الجراحات هو قمة الإنسانية، وامثالنا لا تعرف الإبتسامة المزيفة طريقها إلينا
مع خالص تحياتي
د. صلاح البشير
|
Post: #35
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-08-2010, 02:19 AM
Parent: #32
د. صلاح
| Quote: التسامي فوق الجراحات هو قمة الإنسانية، وامثالنا لا تعرف الإبتسامة المزيفة طريقها إلينا |
مابتكون جربت تمسح دموعك وتعمل (فل ميكب) وتلبس قناع الإبتسامة وتتخلى عن كل الخاص البيوجعك
عشان راح تطل على المشاهدين ولازم تكون مبتسم حتى لو (أمك) ميتة وقلبك مكسور لأنو الناس الداخل بيوتهم ماليهم
ذنب في موت ( أمك) صاح ؟!
إذن أحياناً تضطر لابداء الإبتسامة وإنت في عز الجمر .. جربت ؟!
|
Post: #38
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: الكباشى البكرى
Date: 01-08-2010, 02:38 AM
Parent: #35
سلام ناديه
بي طريقتك دي يوم بتموتى ليك زول من الحزن
إن حظي كدقيق فوق شوك نثروه .. ثم قالو لحفاة يوم ريح اجمعوه
صعب الأمر عليهم ثم قالو اتركوه ..ان من اشقاه ربي كيف انتم تسعدوه.
|
Post: #39
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-08-2010, 03:01 AM
Parent: #38
الكباشي البكري
Quote: إن حظي كدقيق فوق شوك نثروه .. ثم قالو لحفاة يوم ريح اجمعوه
صعب الأمر عليهم ثم قالو اتركوه ..ان من اشقاه ربي كيف انتم تسعدوه.
|
جربت من كترة ماحظك كعب كل مابتمسك الفرحة بيديك تلاقيها خيوط دخان غشاش ؟
جربت كل ماتولع شمعة تجيك هبوب وهووووووف ترجعك للضلام الدامس ؟!
جربت تجيب دفاية وقبل ماتدخلها بيتك الفي كوريا تلقى جليدكم داك ردم فوقها وحولها لكتلة صقيع ؟!!
|
Post: #36
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-08-2010, 02:31 AM
Parent: #32
جربت يجيك حبيبك في المنام ويقلع الكفن ويحلف ليك إنو رجع ليك ومابخليك تاني
وتصحى الصباح تلاقى الحقيقة المرة مادة ليك لسانها وتقول ليك ( البموت مابرجع تاني) ؟!!
|
Post: #37
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-08-2010, 02:33 AM
Parent: #32
جربت ( جنا حشاك) يقوم الصباح يقول ليك ( بابا) وينو ؟
تقول ليهو مشى (الجنة) يقوم يجرك من يدك ( أرح نمشي ليهو قوام عشان يشتري لي الشوكلاتة) ؟!
|
Post: #40
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادر الفضلى
Date: 01-08-2010, 03:20 AM
Parent: #37
| Quote: مابتكون جربت تمسح دموعك وتعمل (فل ميكب) وتلبس قناع الإبتسامة وتتخلى عن كل الخاص البيوجعك |
ما أقسى التحامل فوق الجراح والمعاناة و الأحزان ،
ليلبس الوجه قناع إبتسامة تنشر الفرح للناس
(الشمعة تحرق نفسها حزناً لتضئ الفرح للآخرين)
الحزن يقيم دون كلفة .. كالليل و النهار (سند)
والعدل كى يصير ثابتاً فى كفة الميزان لا بد
من وجهين .. للذى يموت والذى يعيش فى الدماء
فليسقط الكلام عن تراحم الإنسان عالياً ..
فليسقط الضجيج والهراء .... (سند)
نادية .. لقد أخرج حزنك و معاناتك أحاسيس
وأدبيات وتعابير صادقة جميلة، رغم ما تحمله
من حزن مخيف .. أصارحك القول إستمتعت بها وبحزنك
لو كنت أنانياً .. لتمنيت أن تتواصل أحزانك لتخرجى
لنا هذه الخواطر .. ولكننى أتمنى أن يذهب الله
عنك الهم والغم والحزن ..، فمن عبر عن هذا الحزن
بهذا النبل بإمكانه أن ينشر الفرح أيضاً !
|
Post: #41
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: انور التكينة
Date: 01-08-2010, 04:20 AM
Parent: #40
Quote: جربت في يوم ( الصفاح) والأم تزعرد بإنشراح ورصاص فرح شايلو الهواء (تاح تراح )!!
وفي لحظة بس ( كتاحة) جات وشلعت الصيوان تمام ومن باقي ( كانون) الضلع طارت شرارة وحرقت العرسان كمان !! |
دى يا نادية ( شحنة ) حزن ما عندنا ليها( قندرانات )....
ان شاء الله هبوب امل و اعصار فرح يشيلوا كل احزانك ...
و مطر مودة يغسل دواخلك ..
و تتفتح جواك مليار زهرة سعادة
|
Post: #42
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: Amany Elamin
Date: 01-08-2010, 03:29 PM
Parent: #41
ناديه مالك علينا؟
جربت أغلّب المذكور أعلاه,
بعدين انت طلعتي وصّافه شديد شديد ,
براحه علينا يا ناديه عليك الله ..
|
Post: #44
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: عبدالعزيز الفاضلابى
Date: 01-08-2010, 11:58 PM
Parent: #42
| Quote: جربت من كترة ماحظك كعب كل مابتمسك الفرحة بيديك تلاقيها خيوط دخان غشاش ؟ |
قال لى:
والله جنس حظى ماشفت زيو.
انا اركب البص امشى القضارف
حظى يركب البص الجاى من القضارف .
وقال آخر:
دى حالة من يومها شوم.
عينا ليها فى الشجرة قمرية ,, نضربها تقع بومة.
دعينا نعيش الحاضر بالممكن المتاح والماضى بالنسيان والمستقبل بالأمل.
|
Post: #45
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-09-2010, 00:58 AM
Parent: #44
بجيكم وبرد عليكم بس رأسي وعيني وأجعني حبة كدا سمح؟
|
Post: #46
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: قاسم المهداوى
Date: 01-09-2010, 02:05 AM
Parent: #45
نادية
سلااام وعام سعيد
| Quote: جربت يوم طعم (الفشل) في عز نجاح ونصراً كبير حققتو بعد الإنتظار سنوات طوال ؟!! |
جربت يوم شاكوش فى حصة الصباح فى الاديشنال ماثماتيك .. والجزور التربيعية والتكعيبية
؟؟؟ ؟؟
هكذا ارى الاشياء ,, واحسها
دون تردد
او
الرجوع الى الوراء
الالتفات الى الخلف
وساسير و موات الاشاء ..
وبس
ولا كــــيف ؟؟؟
قاسم
|
Post: #47
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: خالد درق
Date: 01-09-2010, 07:43 AM
Parent: #46
الاخت نادية عثمان تحياتى
دة كل جربتها
طيب لماذا ما جربتى ....
أن ترفعى راية التحدي في وجه حظكى العاثر؟
هل فكرتى بأن الدنيا حقيرة و لا تستحق أن نحزنى من أجلها ؟
هل حاولتى أن تعايشى الفرح برغم حزنكى الذي يسكنكى ؟
فالأيام يانادية تمضي و الأحزان تتزاحم بدواخلنا في زمن نحن أحوج فيه إلى السعـــادة
في زمن غاب عنه أصحاب القلوب وكثرت فيه تلك القلوب القــاسية
فإلى متى ونحن لا نجيد سوى الاستسلام في شتى أمورنا ؟
فلقد أصبح لكل منا موطناً من الحزن يسكنه ويضع الأغلال والأقفال عليه
ليكتمها بين أحضانه و إذا أختنقت يخرجها لترى النور لا لتذهب
فلم لا نرسم أوجاعنا على ورقة النسيــان ونضعها في أدراج الرياح لكي
يتراكم عليها الغبار لتختفي و نبدأ بطريقُ يكون في التفاؤل هدفنا
لكي لا تسيطر الأحزان علينـا من جديد
ولكى الود نادية
|
Post: #48
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: عفاف الصادق بابكر
Date: 01-09-2010, 07:56 AM
Parent: #47
ندوية ..
انشاء ربنا بلاحولة ولا قوة إلا به .. يحول بوستيك لي ليل فرح ..
| Quote: أكاد أجزم إني جربت كل الوان الحزن بكل نكهة وطعم !! |
يا ندوية ..لا لا لا لا ..
الدنيا حلوه ..
وربنا لطيف بعباده ..
ولو حبه عبد ابتلاه ..
وانتي محبوبة من الكل ..
ضحكتك يشهد الله اراها ولا اسمعها ..
بس احساسي بيها انه فيكي الجمال البطغي على الهم ..
انسي يا صديقتي .. هذا الجانب الغتيم ..
وافرحي بي عروستك ايمان فهي كنز يفتش عليه الكثير ..
ونعمة ليس بالساهل وجودها ..
يلا ... افرحي وفرحينا وخلي دنيانا فرح .. اصلوا الحزن ملازمنا ..
|
Post: #49
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: saif massad ali
Date: 01-09-2010, 07:57 AM
Parent: #47
والله يا نادية
كلامك ده قاصداني عديل كده
انا كل المراحل دي مريت بيها
وما بجسدي من شبرا الا به طعنة من طعنات الدهر
|
Post: #50
Title: Re: جربت يوم إحساس كدا ؟! توجد ( مفارقات عجيبة ياخ ) !!!
Author: نادية عثمان
Date: 01-09-2010, 01:07 PM
Parent: #40
نادر ياصديقي
Quote: ما أقسى التحامل فوق الجراح والمعاناة و الأحزان ،
ليلبس الوجه قناع إبتسامة تنشر الفرح للناس
(الشمعة تحرق نفسها حزناً لتضئ الفرح للآخرين) |
جربت يوم (ضربة جزاء) في الزمن البدل الضائع وكورة ملعوبة تهز شبكة الخصم وقووووون
وفرحة عظيمة و( كلاتشي) وهو فرحان بنشوة النصر وفي نص الميدان يجيبو ليهو خبر موت عزيزاً ليهو .. بالله ماحارة ؟!!
Quote: نادية .. لقد أخرج حزنك و معاناتك أحاسيس
وأدبيات وتعابير صادقة جميلة، رغم ما تحمله
من حزن مخيف .. أصارحك القول إستمتعت بها وبحزنك
لو كنت أنانياً .. لتمنيت أن تتواصل أحزانك لتخرجى
لنا هذه الخواطر .. ولكننى أتمنى أن يذهب الله
عنك الهم والغم والحزن ..، فمن عبر عن هذا الحزن
بهذا النبل بإمكانه أن ينشر الفرح أيضاً ! |
عارف يانادر ؟
من عظمة ربنا انو يديك ملكة الكتابة البتعبر عن حزنك وفرحك وحزن الآخرين وفرحهم !
يعني أنا هنا مابعبر عن ( نادية) تحديداً وأحزانها بس لكن لو قريت فوق حاتلاقي
ناس كتار قالوا إنو حالات محددة وناس قالوا كل الحالات طابقت حالاتهم !
جميل انو قلمك يقدر يعبر عن لسان حال غيرك زي مابعبر عن حالك موش ؟؟!
|
|