إستطلاع للرأي : ماهو إنطباعك الأولي عندما تسمع عبارة (فلان متدين) ؟

ماهو إنطباعك الأولي عندما تسمع عبارة (فلان متدين) عن شخص لم تره و لم تقابله من قبل ؟
____________________________________________________

هل ستعتقد أنه :

1. مهذب.

2. متشدد.

3. أهل للثقة.

4. منفر.

إختار\ي الإجابة التي تمثل إنطباعك الأولي عندما تسمع عبارة (فلان متدين) من شخص آخر على علاقة ما ب(فلان المتدين) و يعرفه حق المعرفة.

لنفترض ان ناقل المعلومة : (فلان متدين) هو شخص محايد مجرد (مصدر للمعلومة) و لا تربطك به علاقة سابقة تجعل من تقيمه مرجعاً لك في إختيارك


الرجاء إختيار إجابة واحدة.












_____________________________________

* هذا الإستطلاع للرأي إختياري.

* يهدف هذا الإستطلاع الى معرفة الوعي الجمعي لمفهوم (التدين) في الأيام الحالية ووسط الظروف الراهنة محلياٌ و عالمياٌ.

* لا يقصد هذا الإستطلاع تكوين رأي (سالب أو موجب) عن التدين بقدر ما يهدف إلى معرفة ردود الأفعال الأولية عند سماع عبارة (فلان متدين) عن شخص لا تربطك به سابق معرفة.

* صيغة السؤال (التعميمية) مقصودة و كذلك (الخيارات).


أرجو المشاركة


شكراً









سبب التعديل : إضافة توصيف لمصدر المعلومة أن (فلان متدين) حتى تكون الخيارات أكثر دقة

سلام حاتم علي
1- مهذب
معاي أخوي ممكن يشارك (وش مبتسم)

سلام يا مرتضى

شكراً ليك على إجابتك الواضحة :

Quote: 1- مهذب

أخوك حبابوا طوالي (وش مجامل)

الفكرة دائماُ في إستطلاعات الرأي الحصول على إجابات متعددة من شرائح متباينة من الناس

تسلم

2. متشدد.

ممكن اهدي

الاخ سيف النصر

مشكور على توضيح الإجابة :

Quote: 2. متشدد.

اهدي طوالي ، لكن الإهداء على مسئوليتك

أنا برة (وش ملاوز)

اول انطباع بيجي يا حاتم على مافي خياراتك ممكن اقوله ..




ــــ
اذا كان ممكن فأول انطباع بقول كضااااااااب ..

لو ماممكن اعتبرني ممتنع عن إبدا شعوري


تحياتي لك

Quote: لو ماممكن اعتبرني ممتنع عن إبدا شعوري

حيدر الزين سلامات

من حقك الإمتناع عن إبداء شعورك

إجابتك السابقة بتجيب لينا الهوا

(وش خايف) ههههههههههههه


تحياتي

كل الاحتمالات واردة حسب معرفتك لمفهوم ناقل الخبر للتدين

انطباعى بيكون على حسب راى فى الزول اللى قال عن فلان متدين!

الأخ محمد النيل و الاخت smart_ana2001

لنفترض ان ناقل الخبر (فلان متدين) شخص محايد مجرد (مصدر للمعلومة) و لا تربطك به علاقة سابقة

سأقوم بتعديل صيغة الإستطلاع لتشمل العبارة أعلاه

شكراٌ للتنبيه

وأنتظر منكما المشاركة

بعد التعديل

تحياتي

سلامات يا حاتم....
احسن تعمل الإستطلاع...:لو اتكلمت مع زول (ما بتعرفه)فى التلفون لاول مرة و قال ليك بانه متدين. انطباعك بيكون شنو?
_________________________________
ضرورى فى التلفون دى...لان طريقة اللبس بتدى انطباع برضوا

سمارت الزول البقول عن روحو متدين دا ما بشككني انا طوالي ببقى مع حيدر الزين وبقول الزول دا كضاب
حاتم علي ممكن أهدي الغنيه (وش لايوق)

Quote: احسن تعمل الإستطلاع...:لو اتكلمت مع زول (ما بتعرفه)فى التلفون لاول مرة و قال ليك بانه متدين. انطباعك بيكون شنو? _________________________________ ضرورى فى التلفون دى...لان طريقة اللبس بتدى انطباع برضوا

سلام يا سمارت

حتت (قال ليك عن نفسه انو متدين) بنفسه بتؤثر على إنطباعك بصورة او بأخرى

لنفترض ان المعلومة وصلتك بصورة غير مباشرة بدون ما تشوفي (فلان المتدين) دا او تتكلمي معاهو

القياس هنا لرد الفعل الاولي المباشر عن عبارة (فلان متدين) بإسقاط أية عوامل أخرى مساعدة

تحياتي

Quote: حاتم علي ممكن أهدي الغنيه (وش لايوق)

على طول يا مرتضى

الاهداء للاغنيات - داخل الاستطلاع - على مسئولية مهديها

(وش متبري) للضمان كدا

الحبيب حاتم
اول شى حايخطر على بالى سؤال.

من منو؟

حتى بعد داك نشوف الحاصل شنو؟

الحبيب علي سر الختم

Quote: من منو؟

لنفترض ان ناقل المعلومة : (فلان متدين) هو شخص محايد مجرد (مصدر للمعلومة) و لا تربطك به علاقة سابقة تجعل من تقيمه مرجعاً لك في إختيارك

تسلم

ومنتظر إختيارك

انا قبيل جاوبته سريع وبوضح عارف الناس بيجو وينظرو وآخر البوست بيبقى ما عندو علاقة بأولواناعملته اكاونت هنا ما تمليت لي أسبوع عرفته الناس ديل بتاعين لولوه ما حيجاوبو ليك دغري
بالجمبة كدا يا حاتم بطلب غنية ميل وعرج وبهديها للشباب (وش مألوف)

السلام عليكم


متدين طبعا بتفرق كتير

متدين من سيد الدكان
سيد اللبن
ست الاتصالات



لكن في كلمه كلما اسمعها من من يدعون نهج السلف

كلمة ملتزم

بغلي الدم في عروقي

كانما هم ورثوا الجنه

والبقيه يدخلونها بعد التفضل منهم

Quote: متدين طبعا بتفرق كتير متدين من سيد الدكان سيد اللبن ست الاتصالات

والله يا ود الخليفة يا اخوي

كلها (ديون) و (ديون)

بس أختا البنك

لانه ما مضمون

--------------------------------

Quote: لكن في كلمه كلما اسمعها من من يدعون نهج السلف كلمة ملتزم بغلي الدم في عروقي كانما هم ورثوا الجنه والبقيه يدخلونها بعد التفضل منهم

طيب إنطباعك - الاولي - شنو لمن تسمعها عن طرق طرف خارجي ليس لديك به سابق معرفة او خلفية ما ؟

كدي حاول الحصول على إجابة من بين خياراتي دي :

Quote: 1. مهذب. 2. متشدد. 3. أهل للثقة. 4. منفر.

تحياتي و شكرا لك

سلام يا حاتم

Quote: ماهو إنطباعك الأولي عندما تسمع عبارة (فلان متدين) عن شخص لم تره و لم تقابله من قبل ؟ ____________________________________________________ هل ستعتقد أنه : 1. مهذب. 2. متشدد. 3. أهل للثقة. 4. منفر.

أول إنطباع بجيني يا حاتم إنت ما كاتبو هنا ، و اللي هو إنو الزول ده ملتزم بالعبادات الظاهريه ، يعني بصلي في وقتو و بصوم في رمضان ....الخ ، معني التدين عندنا بقي ما مرتبط بحسن الخلق ، مرتبط باداء العبادات !

Quote: أول إنطباع بجيني يا حاتم إنت ما كاتبو هنا ، و اللي هو إنو الزول ده ملتزم بالعبادات الظاهريه ، يعني بصلي في وقتو و بصوم في رمضان ....الخ ، معني التدين عندنا بقي ما مرتبط بحسن الخلق ، مرتبط باداء العبادات !

سلام يا امين

دا انطباع وعي جمعي عن مفهوم التدين ام انطباع شخصي عن فلان المتدين ؟

انا يا امين داير اشوف نتائج الاستطلاع حاتصل لشنو ؟

بعداك النشوف (السبب) شنو

حاكون سعيد لو اخترتا واحد من الخيارات الفوق دي

وزي ما قلتا ليك هي كدا مقصودة

لك ودي

في الإستبيانات في أستبيان اولي بيعملوهو إسمو الإختبار التجريبي (pilot test) دا بيتعمل قبل الأستبيان الأساسي بيكون فيهو نفس الأسئله بيتوزع على عينه صغيرة من المجتمع وبتتجمع الداتاوبيتحلل وبيدي نتائج والفايده منو بتعرف الأخطاء الفي الإستبيان بتاعك قبل ما تبدا وتعدله وتكون متاكد انو الإستبيان حيأدي أغراضو اسي يا حاتم يا أخوي انت إستعوض الله في بوستك دا وإعتبرو(pilot test) وبهدي الغنية للخال عباس (وش ساي كدا بس)

أنا تقريباً مع أمين الإنطباع الأول البصلني أن الزول دا صلاَّي قرَّاي
أها ممكن تضيف لينا الخيار دا مدام اتنين قالوا ليك رأسك مافي اهبشه ولا ماكده
بعد داك عندي العباطه واللياقة والشمار بسأل طوالي بصافح جلابته لحدي وين
التدين دا من ماقام ولا طلع جديد
المهم
ان شاء الله نكون فدناك بحاجه وماتكوُّن فينا رأي زي مرتضى الطبيعة جبل أخوي أعفي لينا

لووووووووووووووووووووول صحيح كل زول في همه
تصدق لما قريت العباره (فلان متدين )اول شئ خطر ببالي انه ما ح يحل الدين ويعوض الزول الدينو صاحب العوض .
اوف بوينت عديل كدا لوووووووووووووووول

3. أهل للثقة.

Quote: 3. أهل للثقة.

شكرا يا د. نجاة

على الاجابة الواضحة

سرني بيانك هذا

شكراً

Quote: لووووووووووووووووووووول صحيح كل زول في همه تصدق لما قريت العباره (فلان متدين )اول شئ خطر ببالي انه ما ح يحل الدين ويعوض الزول الدينو صاحب العوض . اوف بوينت عديل كدا لوووووووووووووووول

لوووووووووووووول

صدقيني انا ذاتي ضحكتا يا دومة

الدين (دين الاموال) صعب بالجد مشكلة


لكن منتظرين اجابتك

عن فلان المتدين

بعد ما قريتي البوست

بقيتي اون بوينت

لووووووول

1- فى ناس بتنظر للزول المتدين بانو متخلف ودقة قديمة حتى لو عارفينوا مخلص فى تدينو.
2- وفى ناس مكملين الصعلقة (عذرا للكلمة دى) لما يجى يتزوج بيبحث عن المتحجبة المتدينة.
3- فى ناس ساذجة ما بتفرق بين الصادق والمستهبل فى التدين
4- وفى ناس اذكياء جدا مابنكشفوا الا فى المواقف الصعبة انهم منافقين غير متدينين.
لكن لو فلان من الناس قال ليك انو زيد متدين وانت عارف زيد غير ذلك فمن التدين انك تستر زيد وتخلى فلان محتفظ بالصورة الجميلة دى عن زيد الا عند الضرورة القصوى أى فى حالة انو فلان هذا سيقع عليه ضرر من مفهومو الخاطئ عن زيد المنافق

الإختيار : متشدِّد

التسبيب :
عرف السودان الدين الإسلامى عبر الدعوة لسبيل الله بالتى هى أحسن وانتشرت الخلاوى تعلم الناس علوم القرآن وفقه المعاملات ، وأعتنق أهل السودان بطبعهم المتسامح الإسلام وأكاد أجزم انهم فهموا مقاصد التدين دون الوقوف على حرفية النصوص ، فتمازج ما هو دينى مع ما هو إجتماعى فكان التصوف وأدب المدائح الذى ميزنا عن سوانا ، وفى تقديرى أن الدين يرتبط إرتباط وثيق بالنظم الإجتماعية السائدة وبمجموعة القيم ، تجد لدينا فى السودان غوث الملهوف والفزعة ، بينما فى دول مجاورة لا يؤتمن المرء على إبنة أخيه ، وهنالك نقطة لابد من ذكرها لتبيان ما رميت إليه ، فقبل سنوات خلت كنت أتامل آيات القرآن الكريم وهالنى الكم الهائل للآيات التى تنهى عن اكل أموال الناس بالباطل ، المتأمل الآن لبيئة الحجاز حيث مهبط الوحى يعى تماماً مغزى هذه الآيات وسلوكيات المعنيين بالتوجيه القرآنى بعدم اكل أموال الناس بالباطل وبكتابة الدين ولو كان مبلغاً زهيداً .
عليه ولما سبق لم نعرف فى السودان مفردة متدين هذى ، وأغلب الظن انها من إنتاج جماعات الإسلام السياسى أو الجماعات السلفية التى عادت من مهاجرها بجلابيب قصيرة ومسواك يمضغه أحدهم وسط مدينة الخرطوم فى مشهد مقزز ينبى عن ردة حضارية ، فغاية ما نادى به القرآن تمثله أهل السودان سلوكاً ، فالتدين لدينا سلوك وخلق قويم وقيم نبيلة ، فكان تدين السودانى يشبه بعض الخصائص الإضافية داخل منتج ما ، حين يشير الصانع لذلك بعبارة ( Built- in)، فجهاز الكمبيوتر المحمول يحوى كاميرا بداخله ، فلم يسمى المنتج كاميرا ، بل هو كمبيوتر محمول والكاميرا بداخله.
آسف على الإطالة وأرجو ان أكون قد وفقت فى تسبيب إختيارى بما لايقدح فى تقديرى بأى وجهة نظر مغايرة.

كمل الراتب

Quote: الإختيار : متشدِّد

قال الرسول (ص) فأظفر بذات الدين
هل يعنى ذلك المتشددة؟
هنالك الغلو فى التدين وهو ممقوت
وهناك التوسط فى التدين وذاك هو الشيئ المحمود
التدين كلمة جميلة ومحل احترام.
الشهامة والمروءة والكرم كانت صفات اصلا موجودة فى بلاد النوبة والجزيرة العربية قبل الاسلام (بعثتُ لاتتم مكارم الاخلاق)
وكون هذه الصفات الجميلة مجرد عادات دون ان تكون خالصة لوجه الله ففائدتها بتنفع صاحبها فى الدنيا فقط.
عندما تتحول العبادة الى مجرد عادة الموضوع بيكون بالطريقة دى خارج شبكة التدين.
المتدين هو من يعى امور دينه ويطبقها على نفسه بحكمة دون غلو ومبالغة او نفاق قاصدا بذلك رضا المولى سبحانه وتعالى

حاتم ازيّك:

الأجابه:

Quote: . مهذب.

الايه: (وانك لعلى خلق عظيم) عندما سئلت السيده عائشه (رضي),
عن خلق الرسول (ص), قالت:(كان خلقه القران)..

والرسول (ص) نفسه قال:(انما بعثت لأتمم مكارم الأخلاق)

يبقي التدين والأخلاق الطبيعي انهم مقترنات,
وماعدا ذلك فشواذ, أو عدم فهم للدين ..

بمعني القاعده هي الأخلاق وخلافها شذوذ ..

اهلين يا اماني و كيفنك

Quote: . مهذب.

شكراً يا أماني على الإجابة الواضحة

Quote: كمل الراتب

looooooooool @ nazar hussien

هو الشهر متين بدا

لمن راتبو يكمل ؟


_____________

كدي شارك معانا

Quote: الإختيار : متشدِّد.

الاخ أبوبكر حامد الأمين

شكرا لك على إجابتك الواضحة

تعليق بسيط هنا

Quote: آسف على الإطالة وأرجو ان أكون قد وفقت فى تسبيب إختيارى بما لايقدح فى تقديرى بأى وجهة نظر مغايرة.

انت تمارس - هنا - حرية الإختيار و هو حق مكفول بالطبع (بالإستفتاء على الاقل)

الباقي التاني غايتو ما بطمنك

Quote: لكن لو فلان من الناس قال ليك انو زيد متدين وانت عارف زيد غير ذلك فمن التدين انك تستر زيد وتخلى فلان محتفظ بالصورة الجميلة دى عن زيد الا عند الضرورة القصوى أى فى حالة انو فلان هذا سيقع عليه ضرر من مفهومو الخاطئ عن زيد المنافق

الاستاذ محمد النيل

1. لنفترض ان فلان الذي قيل انه (متدين) ليس لك به سابق معرفة.

2. من اوصل لك معلومة ان (فلان متدين) هو شخص محايد مجرد (مصدر للمعلومة) و لا تربطك به علاقة سابقة تجعل من تقيمه مرجعاً لك في إختيارك.

3. لا يقصد هذا الإستطلاع تكوين رأي (سالب أو موجب) عن التدين بقدر ما يهدف إلى معرفة ردود الأفعال الأولية عند سماع عبارة (فلان متدين) عن شخص لا تربطك به سابق معرفة.

أشكرك جزيل الشكر على التوضيح و التبيان و استفيد منك كثيراً

وانتظر المزيد منك عبر مشاركتك بإختيار أي من الخيارات السابقة

لك ودي

Quote: أنا تقريباً مع أمين الإنطباع الأول البصلني أن الزول دا صلاَّي قرَّاي أها ممكن تضيف لينا الخيار دا مدام اتنين قالوا ليك رأسك مافي اهبشه ولا ماكده بعد داك عندي العباطه واللياقة والشمار بسأل طوالي بصافح جلابته لحدي وين التدين دا من ماقام ولا طلع جديد المهم ان شاء الله نكون فدناك بحاجه وماتكوُّن فينا رأي زي مرتضى الطبيعة جبل أخوي أعفي لينا

يا وجن يا اختي مافي اي تكوين اراء بالعكس ، و الفائدة متبادلة

قلت يا وجن :

Quote: الإنطباع الأول البصلني أن الزول دا صلاَّي قرَّاي

طيب يا وجن في الخيارات دي الانطباع البتحسي بيهو اقرب ليك بعد الانطباع الفوق شنو في الخيارات التالية :-

Quote: 1. مهذب. 2. متشدد. 3. أهل للثقة. 4. منفر.

ملحوظة : يمكنك حذف إجابتين (وش مبتسم)

Quote: بعد داك عندي العباطه واللياقة والشمار بسأل طوالي بصافح جلابته لحدي وين التدين دا من ماقام ولا طلع جديد

همممم اسئلة (مهمة) خلينا نشوفها في النهاية

لكن عموماً الاسئلة هي محاولة لعمل مقارنة مع صورة سائدة


تحياتي يا وجن

وصدقيني فدتيني كتير

شكرا ليك

3. أهل للثقة.

وصدقيني فدتيني كتير شكرا ليك

طيب الحمد لله ولا شكر بين الأخوان ياحاتم

Quote: في الإستبيانات في أستبيان اولي بيعملوهو إسمو الإختبار التجريبي (pilot test) دا بيتعمل قبل الأستبيان الأساسي بيكون فيهو نفس الأسئله بيتوزع على عينه صغيرة من المجتمع وبتتجمع الداتاوبيتحلل وبيدي نتائج والفايده منو بتعرف الأخطاء الفي الإستبيان بتاعك قبل ما تبدا وتعدله وتكون متاكد انو الإستبيان حيأدي أغراضو اسي يا حاتم يا أخوي انت إستعوض الله في بوستك دا وإعتبرو(pilot test) وبهدي الغنية للخال عباس (وش ساي كدا بس)

ما عارف يا مرتضى يا اخوي بتديني احساس كدا انك متخصص في الاحصاء statistics

للضمان كدا (pilot test) انا عملتو و مستمر فيهو و التعديل بينهم كان (كلمة) واحدة ، و نفس النتائج قاعد اصل ليها برضو فيهو، لكن لمن تكون تلح بتصل الى اجابة قطعية الدلالة

في مواقع كتيرة بتيح انو الاستبيان يكون في اول البوست يعني لازم تصوت اول حاجة حتى يتاح لك الكتابة

بالجنبة : حكايتك مع الوشوش شنو ؟

كل يوم يزداد توجسي من كلمة "فلان متدين"

وكل يوم يترسخ انطباعي الأولي: "إما أنه مخدوع" أو "ذو غرض"

اخ حاتم
انت لم تعطنا خيارات كافية
لكن حسب فهمى من استطلاعك
غايتو اقرب شيئ لرد فعلى او المفروض يكون انه:
محل ثقة
لكن بالانا شفتو فى السودان فى الآونة الاخيرة من استغلال الكثيرين للدين
انا فقدت الثقة فى اى زول شكله متدين, لحدما اتعامل معاه شخصيا بعد داك اصدر فيه رأيى.
او يكون ناقل الخبر انا عارفه كويس وبثق فيه
وكونه ناقل الخبر ما عندى بيه معرفة ح اكون شاكى فى مصداقيته
وعلى العموم كلمة متدين دى بتفرح.

Quote: كل يوم يزداد توجسي من كلمة "فلان متدين"

كلامك صحيح يا هانى
واصبح هناك شعور عام فى كدا
ودى مصيبة والله كبيرة
واللى كانوا السبب ربنا ح يوقع عليهم شر عذاب
لانهم عكسوا الصورة
انا يظهر لى دا آخر الزمان وقد اختلط الحابل بالنابل
الله يستر

Quote: كلامك صحيح يا هانى واصبح هناك شعور عام فى كدا ودى مصيبة والله كبيرة واللى كانوا السبب ربنا ح يوقع عليهم شر عذاب لانهم عكسوا الصورة انا يظهر لى دا آخر الزمان وقد اختلط الحابل بالنابل الله يستر

سلامات

شوفتا لما الزول بتوجس من كلمة متدين معنها الكيزان هزموه في معتقده وفتنوه
معناها لازم يفتش نفسو ليه يخلي تجار الدين يغيرو صورة ناصعة للانسان المتدين الذي يخاف الله


لازم تحافظ على فكرتك الاولى مهما الليل طول عنده آخر
خلى النهار يطلع على نفس مازلت تظن الخير في المتدين.

الاخت د. نجاة
وعليك السلام ورحمة الله
فى البلد الذى اقيم فيه
انا اظن فى كل المتدينين خيرا شرق صباح يومهم ام غاب مساءه
لانه لا داعى لتدينهم هنا الا التدين نفسه
فى بلد فيه اظهار التدين شجاعة وجرأ
وإن لم يخسروا بتدينهم شيئاوقد يحدث, فلن يكسبوا مصلحة دنيوية الا مرضاة الله.
لكن البلد الذى يكون فيه المظهر الدينى كسبا دنيويا عليه تجدى كل متسلق قد لبث قناع التدين حبا للدنيا وتقربا للسلطان.
وانا اعتقد الاخ هانى قد عكس ظاهرة ظنية تتبادر فى اذهان الكثير من الناس عن المتدينين هناك
وانا قد غشانى نفس احساسهم وانا صادق لله متألما غيرة على اهل التدين الحقيقيين الذين صاروا قلة وسط لابسى الاقنعة فى لك الوطن المكلوم. فالمداراة لذلك لا تلغى الحقيقة المرة.
وإنما اقول ذلك بالتجربة.
فالعبء اصبح كبيرا على شرفاء الاسلاميين الصادقين المستنيرين فى مجهوديهم لتصحيح الصورة وازاحة ما ساور نفس الاخ هانى والكثيرين مثله من تصور عن المتدينين الحقيقيين بسبب أُلَى الاقنعة.
شكرا لغيرتك وحسن الظن على قدر اهل الدين.

بتحسَس غدارتي

'( انطوائي )
ده اول انطباع بجيني
ومن قائمتك
( منفر )
بس اول سؤوال بخطر ببالي عندما اسمع فلان متدين
ياربي متدين كم ومن منو , وكاتب شيك ولا لا ؟

Quote: ( منفر )

شكراً لك أخي امادو

على الاجابة الواضحة

Quote: بس اول سؤوال بخطر ببالي عندما اسمع فلان متدين ياربي متدين كم ومن منو , وكاتب شيك ولا لا ؟

لووووووول

واضح انو الدين - من الديون - فارض نفسه على الواقع و الخيال

اكتر من الدين - التدين -

لانو اكثر من شخص قالوا لي لمن نسمع كلمة (متدين) بالنا بيمشي لي (دين القروش)

شكرا لك و كن بالف خير

حذف للتكرار

Quote: بتحسَس غدارتي

عزام معليش على غير ما جرت - العادة - في الاستفتاء دا حاخرج من دوري المرسوم

و أسألك ليه جاوبتا بي :

Quote: بتحسَس غدارتي

لانه رد فعل - يعد - مبالغاً فيه نوعياً


__________

بالطبع سيسعدني لو قمت بإختيار احد الخيارات المطروحة أعلاه

لك ودي

Quote: محل ثقة

شكرا على الإجابة الواضحة استاذ محمد النيل

Quote: انت لم تعطنا خيارات كافية

ما بيدي و الله عشان مصلحة الاستفتاء و النتيجة المنتظرة


اشكرك كتير على مناقشاتك المستمرة خلال الموضوع و ابداء رأيك و اهتمامك به

و لمن نصل لنتيجة الاستفتاء بعد فرز الاصوات

اكيد حايكون عندك دور كبير في دراستها و تحليلها

لانه من الواضح ان هذا الموضوع - كما الكثيرين -

يمس اوتاراً مهمة عندك

Quote: وعلى العموم كلمة متدين دى بتفرح.

كن بالف خير

ولك كامل شكري و تقديري

Quote: كل يوم يزداد توجسي من كلمة "فلان متدين" وكل يوم يترسخ انطباعي الأولي: "إما أنه مخدوع" أو "ذو غرض"

هاني سلامات

قلت توجس اي إحساس سالب ... هل يمكنك المقاربة مع اي من الخيارات اعلاه ؟


لك ودي

Quote: 3. أهل للثقة.

شكرا ليك يا وجن على الاجابة الواضحة

و سعيد باخوتك جدا تسلمي كتير

Quote: حاكون سعيد لو اخترتا واحد من الخيارات الفوق دي وزي ما قلتا ليك هي كدا مقصودة

في الحاله دي بختار :
١- مهذب

معليش يا حاتم ما ح اقدر اشارك فى الاستطلاع
احتمال لانى شفت ناس كتار فى الدنيا دى...
شفت اللى فاكر روحو متدين و بيصلى و يصوم و يتهجد كمان (و ما كوز) لكن كمان كذاب و ممكن ياكل اموال الناس (او الحكومة بالباطل). و شفت انصار السنة اللى ما بيصافح لكن هاشى و باشى و بيلاقيك و بكل الكرم و اللطف اللى فى الدنيا. و لاقانى برضو المتدين الصارى وشو و يحرج فى خلق الله يمين و شمال.
عشان كده كلمة "متدين" ما بتعنى لى اى شئ....نهائى.
_____________________________
احب اقول انى قاعده اوصف نفسى بانى متدينه!!!!!

Quote: معليش يا حاتم ما ح اقدر اشارك فى الاستطلاع

من حقك يا smart_ana2001

و لو كنت اتمنى مشاركتك

Quote: عشان كده كلمة "متدين" ما بتعنى لى اى شئ....نهائى.

عندما نقارنها مع :

Quote: احب اقول انى قاعده اوصف نفسى بانى متدينه!!!!!

تناقض مبرر لمن نشوف مداخلتك ككل :

Quote: احتمال لانى شفت ناس كتار فى الدنيا دى... شفت اللى فاكر روحو متدين و بيصلى و يصوم و يتهجد كمان (و ما كوز) لكن كمان كذاب و ممكن ياكل اموال الناس (او الحكومة بالباطل). و شفت انصار السنة اللى ما بيصافح لكن هاشى و باشى و بيلاقيك و بكل الكرم و اللطف اللى فى الدنيا. و لاقانى برضو المتدين الصارى وشو و يحرج فى خلق الله يمين و شمال.

بس المهم ما تفتكري نفسك

عينة متحيزة (بي فهم ناس الإحصاء)*




انتي طبعاً عارفة :


* يهدف هذا الإستطلاع الى معرفة الوعي الجمعي لمفهوم (التدين) في الأيام الحالية ووسط الظروف الراهنة محلياٌ و عالمياٌ.

* لا يقصد هذا الإستطلاع تكوين رأي (سالب أو موجب) عن التدين بقدر ما يهدف إلى معرفة ردود الأفعال الأولية عند سماع عبارة (فلان متدين) عن شخص لا تربطك به سابق معرفة.





















___________________________
* بي بركة لكاشر الاحصاء

Quote: ١- مهذب

شكراً امين

يا ريت تستمر معانا







_______________
بي بركة بوست الياسمين

بفترض إنو زي صلاح أخوي

صلاح أخوي متدين بفهم

أهل للثقة

غير متشدد

مهذب

جميل الروح

ولين الحديث في غير غلظة وفرض للرأي !

وسياسته أنك لا تهدي من أحببت ولكن الله يهدي من يشاء !

وبرضو سياسته الدين النصيحة في غير إملاء وتسلط !


ينفع؟!


تحياتي حاتم أخوي العزيز

سلام يا نادية يا اختي العزيزة

و تحياتي لصلاح اخوك

Quote: أهل للثقة

Quote: مهذب

صفات جميلة و من الواضح انها مستمدة

من انطباعك الجميل عن صلاح اخوك

بالتالي عندما تسمعي عبارة (فلان متدين) عن شخص لا تعرفينه مجرد سمع ساكت (معلومة)

هل سيكون لديك نفس الانطباعات السابقة ؟

Quote: أهل للثقة

Quote: مهذب

لو الاجابة بنعم ممكن تختاري واحد منهم ، عشان الاستطلاع محتاجين فيهو لي جواب واحد

وليك مني كل الشكر

أهل للثقة

Quote: أهل للثقة

شكراً نادية

سلام يا حاتم يا حبيب وشكراً على جهودك المستمرة...
إجابتي:

- أهل ثقة

3. أهل للثقة.

حاتم علي

Quote: و أسألك ليه جاوبتا بي : بتحسَس غدارتي

مِن دَولة سَيِدُنا مُعاوية إبن أبي سُفيان (المُلْك العضوض) إلى حركة الشباب الصومالِية هؤلاء يِعْرفون بِالتدَيُن ، هل ترى نموذج يُقتدى بِهِ (معاوية/الشباب) ؟

أنا أعني " بِتحسُس غدارتي " لِمَن إتخذ الدين سُلُم ووسيلة لِحُكم الناس ... فإن إسْتطلاعُك في شأن كلِمة " مُتدَيِن " التي أصبحت مُصطلح ، بِهِ سِعه وغير محدود ...

كُنت أُعْتقل مِن قِبل " مُتدِيِني " أمريكا روسيا قد دنا عذابِهِما وأنا خارِج مِن صلاة الجُمعة بِمسجِد سَيِدي وحبيبي الشيخ / زين العابِدين (راجِل شمبات) علَيِهِ الرحمة

Quote: كُنت أُعْتقل مِن قِبل " مُتدِيِني " أمريكا روسيا قد دنا عذابِهِما وأنا خارِج مِن صلاة الجُمعة بِمسجِد سَيِدي وحبيبي الشيخ / زين العابِدين (راجِل شمبات) علَيِهِ الرحمة

الله!
لو كنت مكاني حا تقول شنو؟ الجميع مدعو (كل السودانيين بم...عارضة\ وختّاف لونين)

ما قلتا الزول ما يقول فعلتا وسويت...ولا دي "هفوة" ساي (بعد 3 تعديلات قابلة للزيادة)!


المهم..

AnwarKing

Quote: ما قلتا الزول ما يقول فعلتا وسويت...ولا دي "هفوة" ساي (بعد 3 تعديلات قابلة للزيادة)!

لا يا أنَور دي ما زي ديك ... هِنا أنا سألوني سؤال مُباشِر وبررت فوقو ليه كِلمة " مُتدَيِن " بِتخليني " أتْحسس غدارتي " لكِن إت في أعمدتك بِتَسَوِق فوق رقبتك بِتعالو شوفوني ... أنا ماف زول مُهتم بإنجازاتي ... أنا لامِن قابلت فُلان قال لي ... أنا حصلت على الجائِزة الفُلانِية ... أنا إسمي مكتوب في المَوقِع الفُلاني ... أنا مِن ضِمن إتنين كرمتنا المُنظمة الفُلانِية ... الروابِط مَوجودة لو حبيت الدليل ... بعضها جلبتو ليك في الرابِط التِحِت ده :
لو كنت مكاني حا تقول شنو؟ الجميع مدعو (كل السودانيين بم...عارضة\ وختّاف لونين)

هُناك فرق يا حبيب

Quote: أنا أعني " بِتحسُس غدارتي " لِمَن إتخذ الدين سُلُم ووسيلة لِحُكم الناس ... فإن إسْتطلاعُك في شأن كلِمة " مُتدَيِن " التي أصبحت مُصطلح ، بِهِ سِعه وغير محدود ...

شكرا ليك يا عزام على التوضيح

هل يمكنك الاجابة على سؤال الاستطلاع من واقع انطباعك الاولي - و تجربتك الشخصية التي ترسخت في اللاوعي لديك - عن كلمة (متدين) خلال هذه الخيارات :

Quote: 1. مهذب. 2. متشدد. 3. أهل للثقة. 4. منفر.

حتى استطيع الاستعانة بإجابتك في الاستطلاع

تسلم

Quote: 3. أهل للثقة.

شكراً على اجابتك الواضحة اخي Faisal Habiballa

كن بالف خير

Quote: - أهل ثقة

شكرا لك انور

تحياتي

لك التحية أخي : حاتم علي
إلى عهد قريب كان لكلمة ( متدين ) سحر خاص . فبمجرد سماع هذه الكلمة
يذهب خيالك إلى الطيبة , والنظافة , وطيب الرائحة , وحسن المعشر , والكرم
والشجاعة , ونصرة المظلوم , والصدق , والتواضع , وفوق كل ذلك عدم الخشية
في قول الحق لومة لائم ... ولا غرابة في الأمر إذ كل هذه الصفات من مكارم الأخلاق
التي صدع بها نبينا الكريم محمد صلى الله عليه وسلم عند بعثته...
فالمتدين المخلص في تدينه هو الذي يتمسك بالصفات سالفة الذكر علاوةً على أخرى
لم أذكرها , بشرط أن يكون هذا التعلق ظاهراً وباطناً...
أما قياس هذه الصفات في الشخص المتدين , ومعرفة مدى تعمقها في نفسه , فهو أمر
أرى أنه من الصعوبة بمكان قياسه قياساً دقيقياً , حيث أنه عمل قلبي ...
مفهوم ( التدين ) من المفاهيم التي اختلطت على الناس في هذه المرحلة الحرجة
من عمر الإسلام وذلك لارتباط هذا المفهوم بالتفجير وقتل الأبرياء , و ممارسة
السلطة بعنف وقمع وقتل وتشريد المعارضين , والنفاق والتودد , والتقرب لأصحاب
الجاه , والسلطان لأجل مكاسب دنيوية , أو الغطرسة والتكبر بغير وجه حق على
خلق الله , وغير ذلك كثير من الصفات والممارسات السالبة التي ارتبطت ارتباطاً
مباشراً بهذا المفهوم وهو منها برئ كبراءة الذئب من دم يوسف ...
فحسب ما هو مألوف ومفهوم وسائد بين الناس , وحسب تاريخ السلف من أمة محمد صلى
الله عليه وسلم فإن هذا الشخص محل ( ثقة )بدون تحفظ
أما بحسب الواقع الحالي , وبالنظر إلى ممارسات من يدعون التدين , ويقتلون
الأبرياء بغير جريرة جنوها , ويأكلون أموال اليتامى ظلماً ويتخذون ( التدين )
وسيلة للكسب وتحقيق المصالح الذاتية ,و , و, و.... إلخ . لا أقول كما قلت في
الأول ( محل ثقة ) ولكن أقول وبكل أسف ( منّفر )

Quote: ماهو إنطباعك الأولي عندما تسمع عبارة (فلان متدين) عن شخص لم تره و لم تقابله من قبل ؟

اول انطباع بقول متدين منى قروش.

Quote: اول انطباع بقول متدين منى قروش..

looooooool @ فاضلابي

شكلك مجننك الناس الزايغين منك و رافضين يدفعوا ديونهم

Quote: واضح انو الدين - من الديون - فارض نفسه على الواقع و الخيال اكتر من الدين - التدين - لانو اكثر من شخص قالوا لي لمن نسمع كلمة (متدين) بالنا بيمشي لي (دين القروش)

كدي شارك معانا و اختار اجابة عن فلان المتدين من (الدين) و ليس من الديون

تحياتي و ربنا يجمع ليك اموالك من المدينين

Quote: بكل أسف ( منّفر )

شكراً لك د.يوسف محمد طاهر على الاجابة الواضحة

ولك مني كامل التحية و التقدير على المداخلة المعمقة المفصلة و الاجابة الواضحة مع الشرح
كن بالف خير

Quote: ماهو إنطباعك الأولي عندما تسمع عبارة (فلان متدين) عن شخص لم تره و لم تقابله من قبل ؟ ____________________________________________________ هل ستعتقد أنه : 1. مهذب. 2. متشدد. 3. أهل للثقة. 4. منفر. إختار\ي الإجابة التي تمثل إنطباعك الأولي عندما تسمع عبارة (فلان متدين) من شخص آخر على علاقة ما ب(فلان المتدين) و يعرفه حق المعرفة. لنفترض ان ناقل المعلومة : (فلان متدين) هو شخص محايد مجرد (مصدر للمعلومة) و لا تربطك به علاقة سابقة تجعل من تقيمه مرجعاً لك في إختيارك الرجاء إختيار إجابة واحدة. _____________________________________ * هذا الإستطلاع للرأي إختياري. * يهدف هذا الإستطلاع الى معرفة الوعي الجمعي لمفهوم (التدين) في الأيام الحالية ووسط الظروف الراهنة محلياٌ و عالمياٌ. * لا يقصد هذا الإستطلاع تكوين رأي (سالب أو موجب) عن التدين بقدر ما يهدف إلى معرفة ردود الأفعال الأولية عند سماع عبارة (فلان متدين) عن شخص لا تربطك به سابق معرفة. * صيغة السؤال (التعميمية) مقصودة و كذلك (الخيارات). أرجو المشاركة شكراً

Quote: منفر.

اخوانى السلام عليكم
المتداخلين هنا ليس كلهم فى مكان واحد بل من انحاء متفرقة من الكرة الارضية. وظروف كل دولة بتحدد نظرة المتداخل بناء على غالب التجربة فى البلد
وانا اعتقد ان محصلة هذا الاستطلاع لن تكون امينة.
للوصول لنتيجة اقرب للحقيقة يجب ان تكون الشريحة المجتمعية واحدة
كأن يكون الذين يجيبون على الاستطلاع جميعهم من السودان او كانوا قبل وقت قصير هناك.
فانا مثلا رأيى فى المتدين السودانى يختلف عن رايى فى المتدين فى البلد الذى اقيم
تجربتى مع المتدين فى السودان تخلف من نظرتى للمتدين هنا.
فى السودان دواعى النفاق من اجل مكتسبات دنيوية كثيرة ينعدم مثلها هنا.
والكل يعلم مقولة (دقينة لاكل العيش)
الدقينة فى البلد الذى اقيم لا تأكل عيش.
واحتمال تصعب عليك اكل العيش.
المتدين هنا يحتاج لإيمان حقيقى وشجاعة ليظهر بمظهر التدين. واحيانا يجد مضايقات واستهزاء من غير المسلمين.
حتى فى كثير من الاحيان لو اسمك محمد يعامولنك بفرز ومضايقة, مثل اجراءات السفر بالمطار.
فالمتدين هنا: حسب نظرى شجاع امين محل ثقة وكل الصفات المتوقعة الحميدة, لانو مافى شيئ بيجبره على ذلك الا انه متدين لوجه الله.
اما المتدين فى السودان امره مشكوك فيه الا بالتجربة الشخصية لان هناك فوائد دنوية كثيرة قد تجنى من وراءه ومن هنا جاء الشك.
عشان كدا كان ح يكون الامر ناجح لو اخونا سؤاله:
ماهو انطباعك عن المتدين فى السودان ؟ بالاسم
مافى داعى لحكاية لو قال ليك فلان وفلان دا محايد وانت ما عندك معرفة بيه وكدا.
انا بعتقد النتيجة ما ح تكون موفقة بالاسلوب المطروح دا.

يفترض ان يكون مهذب وأهل للثقة


- أهل للثقة .


تحياتي حاتم ..........

Quote: 3. أهل للثقة.

Quote: يفترض ان يكون مهذب وأهل للثقة

صح لسانك منتصرمحمد زكى ..
كنت احتار بين اي منهم اختار ..
فعلا جمع الاثنين كخيار اصح ..
شكرا حاتم علي على مواضيعك ..
بس وين موضوع التعليم ..

الأخ حاتم
السلام عليكم ورحمة الله


3. أهل للثقة
____________________________________

Quote: هذا الإستطلاع للرأي إختياري. * يهدف هذا الإستطلاع الى معرفة الوعي الجمعي لمفهوم (التدين) في الأيام الحالية ووسط الظروف الراهنة محلياٌ و عالمياٌ.

فكرة البوست واضحة وربما يحتاج الاستطلاع إلى تعديل طفيف
لكن معظم المداخلات التي وردت تعكس
مشكلة في التعامل مع الاستطلاع كأداة

تقريبا 10 مداخلات كانت إجابة على الاستطلاع مقابل على الأقل 16 من غير المكرر
خارجة عن موضوع الاستطلاع

منفـــر !

الإجابة دهـ ما بنقدر نفصلها من واقع التدين الحالي
برغم انه توجد نمازج للتدين جدا رائعة .. وغير متعارضه مع المعاني الإنسانية المتوافق عليها..

من واقع بعض المعايشات .. المتدين = مزعج للأخرين + مشككك في نواياهم + اقصائي لابعد حد

كلم أخيرة

انا من مؤيدي التدين المتمدن الإنساني .. نموزج الاسلام التركي (مش علي وزن المسلسل التركي) مدرسة اردوغان .. وكذلك النموزج الماليزي المتمثل في مهاتير محمد .. و أنور ابراهيم

حاتم علي والذين معه

تحياتي،،
خياراتك ضيقة جدا ، اذا كنت تصبو لنتائج علمية ، ضف الي ذلك ، ان نوع الاسئلة هذه لا تحتمل الاجابات المغلقة ، يعني لازم من توضيح

بالنسبة للخيار الاول (مهذب) كان من الافضل ان تستبدل بـ (ملتزم) فهي انسب لان التهذيب لا علاقة له بالتدين والدين ، ثم ان التدين خشم بيوت ، فهناك التدين السياسي ، وهناك التدين على جهالة وهناك التدين الـ بفهم...........الخ




سمارت قالت كلام مليان ، فه تبني رايها على حسب ناقل المعلومة،،،،،على اي انا انطباعي سلبي ، فعند سماعي لمتدين بحس بوجع بطن


تحياتي

الاخوة و الأخوات الأعزاء:-

عمار عبدالله عبدالرحمن

محمد النيل

منتصرمحمد زكى

Mohammed Ibrahim Othman

Mohamed E. Seliaman

طارق عمر مكاوي

شمائل النور

ود الخليفه


المعذرة على التأخر في الرد عليكم لظروف خارجة عن الإرادة و سأعود بالرد المفصل عليكم فرداُ فرداٌ

سعدت بمشاركتكم

وأتمنى مشاركة المزيد من الأعضاء في الإستفتاء إذا أمكن

تحياتي لكم جميعاٌ

التدين السياسي "منفر" خاصة هذه الحقبة!
الدين حسن الخلق.. الدين المعاملة.. الدين النصيحة ..

Quote: التدين السياسي "منفر" خاصة هذه الحقبة!

الاخ : Ali bas

هل اعتبر إجابتك لسؤال : ماهو إنطباعك الأولي عندما تسمع عبارة (فلان متدين) ؟

هي : "منفر" ؟

لأنك قلت في إجابتك التدين ((السياسي))

أرجو التوضيح


تحياتي

Quote: '( انطوائي ) ده اول انطباع بجيني ومن قائمتك ( منفر )

بالضبط كدا .. دا انطباعي .. الاول !


حاتم علي ...

بوست ممتاز

حاتم,,,,سلاااام,,,,

قبل دين الانقاذ دا كان طوالى حتجيك المقابل مهذب,,

لو بعدت من ناس سياسةوثقافة ثقافة وضربت خلا السودان الواسع دا بتلقى كلمة متدين هى نفسها قبل دين الانقاذ

Quote: خياراتك ضيقة جدا ، اذا كنت تصبو لنتائج علمية ، ضف الي ذلك ، ان نوع الاسئلة هذه لا تحتمل الاجابات المغلقة ، يعني لازم من توضيح

الاخت شمائل النور تحياتي

الاجابات هي مقصد الإستطلاع ... و التوضيح سيؤثر على دقة الإستطلاع نفسه لأن الرؤية (الشخصية) لمن يجريه ستدخل في تفاصيل (الشرح) في حين أن المقصود بالإستطلاع هو (الإنطباع الأولي) للمستطلع - بفتح اللام -

Quote: سمارت قالت كلام مليان ، فه تبني رايها على حسب ناقل المعلومة،،،،،على اي انا انطباعي سلبي ، فعند سماعي لمتدين بحس بوجع بطن

راجعي ردي على الاخت سمارت عاليه

وهل يمكنك الحصول لمقابل لما أسميته (وجع بطن) في خياراتي عاليه

كوني بخير ووقاك الله و الجميع
شرور اوجاع البطن

Quote: منفـــر !

الاخ طارق عمر مكاوي

شكراً على وضوح إجابتك

كما انني المح في تحليلك بعد مهم إحتاجه عند تحليل النتائج :

Quote: الإجابة دهـ ما بنقدر نفصلها من واقع التدين الحالي برغم انه توجد نمازج للتدين جدا رائعة .. وغير متعارضه مع المعاني الإنسانية المتوافق عليها.. من واقع بعض المعايشات .. المتدين = مزعج للأخرين + مشككك في نواياهم + اقصائي لابعد حد

شكراً لك

تحياتي

Quote: 3. أهل للثقة

الاخ : Mohamed E. Seliaman

شكرا لك على الاجابة المباشرة


اتمنى منك شاكراً المزيد من التوضيح هنا :

Quote: وربما يحتاج الاستطلاع إلى تعديل طفيف

فالفائدة تكون مشتركة ... و نصف رأيك عند اخيك

تسلم و شكرا لك

Quote: أهل للثقة.

شكراٌ لك أخي محمد عثمان ابراهيم على وضوح الإجابة




موضوع التعليم موجود لكن لا إقبال عليه هذه الايام و أنا مشغول

هنا الرابط

التعليم فقط التعليم هو (الحل) لأوضاعنا البائسة - حملة ل...عم التعليم في بلادنا

مودتي

Quote: - أهل للثقة .

سلامات يا منتصر

شكراُ لك على الإجابة الواضحة

تسلم

Quote: اخوانى السلام عليكم المتداخلين هنا ليس كلهم فى مكان واحد بل من انحاء متفرقة من الكرة الارضية. وظروف كل دولة بتحدد نظرة المتداخل بناء على غالب التجربة فى البلد وانا اعتقد ان محصلة هذا الاستطلاع لن تكون امينة. للوصول لنتيجة اقرب للحقيقة يجب ان تكون الشريحة المجتمعية واحدة كأن يكون الذين يجيبون على الاستطلاع جميعهم من السودان او كانوا قبل وقت قصير هناك. فانا مثلا رأيى فى المتدين السودانى يختلف عن رايى فى المتدين فى البلد الذى اقيم تجربتى مع المتدين فى السودان تخلف من نظرتى للمتدين هنا. فى السودان دواعى النفاق من اجل مكتسبات دنيوية كثيرة ينعدم مثلها هنا. والكل يعلم مقولة (دقينة لاكل العيش) الدقينة فى البلد الذى اقيم لا تأكل عيش. واحتمال تصعب عليك اكل العيش. المتدين هنا يحتاج لإيمان حقيقى وشجاعة ليظهر بمظهر التدين. واحيانا يجد مضايقات واستهزاء من غير المسلمين. حتى فى كثير من الاحيان لو اسمك محمد يعامولنك بفرز ومضايقة, مثل اجراءات السفر بالمطار. فالمتدين هنا: حسب نظرى شجاع امين محل ثقة وكل الصفات المتوقعة الحميدة, لانو مافى شيئ بيجبره على ذلك الا انه متدين لوجه الله. اما المتدين فى السودان امره مشكوك فيه الا بالتجربة الشخصية لان هناك فوائد دنوية كثيرة قد تجنى من وراءه ومن هنا جاء الشك. عشان كدا كان ح يكون الامر ناجح لو اخونا سؤاله: ماهو انطباعك عن المتدين فى السودان ؟ بالاسم مافى داعى لحكاية لو قال ليك فلان وفلان دا محايد وانت ما عندك معرفة بيه وكدا. انا بعتقد النتيجة ما ح تكون موفقة بالاسلوب المطروح دا.

الاستاذ محمد النيل

كل يوم يزداد إحترامي لك و لآرائك و طريقة نقدك و تحليلك ، أتفق معك في تحليلك عن المكان الذي تقيم فيه و أظنه الولايات المتحدة أليس كذلك ؟

ولكن يا عزيزي محمد النيل هذا الإستفتاء في موقع سوداني الاعضاء فيه سودانيون نعم و الهدف منه رؤية التصور العام لعبارة (فلان متدين) في ظل المتغيرات المحلية و ((العالمية)) و ما احداث 11 سبتمبر و ما تبعها من تبعات بخافية عنك .... انا تركت المكان مفتوحاٌ - عامداً - و لم احدد السودان (بالاسم) ، لأن الهدف هو معرفة (الوعي الجمعي) للسودانيين عن (التدين) و ليس رأيهم في المتدينين السودانيين
لك ودي

Quote: منفر.

شكراً أخي عمار عبدالله عبدالرحمن

على الإجابة الواضحة

كن بخير

الأستاذ حاتم سلامات

لو كنت ما بعرف الزول ناقل المعلومه بتحفظ عليها
وبحاول أستقرأ معلومات إضافيه من إنطباعى عن الزول وطريقة لبسو
وإحساسى الداخلى بيهو...
وإذا دا ما إتوفر...يمكن أخت منفر...

ولو كنت بعرف الناقل...وكان ما إسلاموى...ممكن أعتبر المتدين أهل ثقه

إنشاء الله أكون أديتك إجابه

إقبال

Quote: ( منفر )

شكراً سمرية

تحياتي لك يا صديقة

Quote: قبل دين الانقاذ دا كان طوالى حتجيك المقابل مهذب,, لو بعدت من ناس سياسةوثقافة ثقافة وضربت خلا السودان الواسع دا بتلقى كلمة متدين هى نفسها قبل دين الانقاذ

اميرة ازيك

كدي حسة خليني من دين الانقاذ و ما قبله و ناس سياسة و ثقافة و خلا السودان

انتي (شخصياً) إنطباعك (حالياً) وفق الخيارات أعلاه عن عبارة (فلان متدين) شنو ؟

تحياتي

الاستاذة إقبال تحياتي

فرضية السؤال تقوم على توفر معلومة (فلان متدين) بدون أي خلفية عنه او عن ناقل المعلومة

Quote: وإذا دا ما إتوفر...يمكن أخت منفر...

فهل هذا جوابك النهائي كما يقولون في المسابقات ؟

Quote: إنشاء الله أكون أديتك إجابه

الحقيقة اكاد اقول حصلت على إجابة - بإنتظار تأكيدك لها -

وحصلت أيضاً على معلومات اعتبرها مفيدة :

Quote: لو كنت ما بعرف الزول ناقل المعلومه بتحفظ عليها وبحاول أستقرأ معلومات إضافيه من إنطباعى عن الزول وطريقة لبسو

Quote: وإحساسى الداخلى بيهو...

Quote: ولو كنت بعرف الناقل...وكان ما إسلاموى...ممكن أعتبر المتدين أهل ثقه

تقبلي شكري و تحياتي

منفر


تحياتي حاتم

Quote: منفر

شكراً امير عمر

على الاجابة الواضحة

تحياتي

في اجاباتك دي بختار
منفر
بس حقو تضيف واحده زياده وهي
مضطرب نفسيا
وهذا من واقع تجابي مع البعض
وشكرا

Quote: منفر

شكرا لك على الاجابة استاذة احسان

Quote: بس حقو تضيف واحده زياده وهي مضطرب نفسيا وهذا من واقع تجابي مع البعض

يمكن استصحاب هذا الخيار عند تحليل نتيجة الاستطلاع

شكرا لك و تحياتي

up

ماهو إنطباعك الأولي عندما تسمع عبارة (فلان متدين) عن شخص لم تره و لم تقابله من قبل ؟
____________________________________________________

هل ستعتقد أنه :

1. مهذب.

2. متشدد.

3. أهل للثقة.

4. منفر.

إختار\ي الإجابة التي تمثل إنطباعك الأولي عندما تسمع عبارة (فلان متدين) من شخص آخر على علاقة ما ب(فلان المتدين) و يعرفه حق المعرفة.

لنفترض ان ناقل المعلومة : (فلان متدين) هو شخص محايد مجرد (مصدر للمعلومة) و لا تربطك به علاقة سابقة تجعل من تقيمه مرجعاً لك في إختيارك


الرجاء إختيار إجابة واحدة.












_____________________________________

* هذا الإستطلاع للرأي إختياري.

* يهدف هذا الإستطلاع الى معرفة الوعي الجمعي لمفهوم (التدين) في الأيام الحالية ووسط الظروف الراهنة محلياٌ و عالمياٌ.

* لا يقصد هذا الإستطلاع تكوين رأي (سالب أو موجب) عن التدين بقدر ما يهدف إلى معرفة ردود الأفعال الأولية عند سماع عبارة (فلان متدين) عن شخص لا تربطك به سابق معرفة.

* صيغة السؤال (التعميمية) مقصودة و كذلك (الخيارات).


أرجو المشاركة


شكراً

إنطباعي عند سماع عبارة فلان(متدين) بقول:

2. متشدد

طبعا إذا إلتقيت به ولاحظت إسلوبه في طريقة اللبس من حيث المظهر
العام والتحدث.. لكن لا يمكن أحكم عليه وأقول إنسان مهذب أو أهل للثقة أو منفر
بمجرد سماع فقط وليس لدي علاقة أو معرفة سابقه به.
أيضا لا أدري كثيرا من الناس دائما ترتبط في أذهانهم عند سماع عبارة
فلان (متدين) بأنه (كوز)!!.

Quote: 2. متشدد

شكرا لك اخي عزيز عيسى

على الاجابة

ولديك ملاحظة هنا جديرة بالاهتمام :

Quote: أيضا لا أدري كثيرا من الناس دائما ترتبط في أذهانهم عند سماع عبارة فلان (متدين) بأنه (كوز)!!.

تحياتي و شكراً لك