Post: #1
Title: الأستاذمحمودمحمدطه قال:( الملـيان ما بيـجلبغ)
Author: منصوري
Date: 01-01-2010, 01:35 PM
البيجلبغ في السياسة معناهو ما عندو حل ناجع للناس.. والبيجلبغ في الدين معناهو دينو ناقص.. والبيجلبغ في المديح والإنشاد والذكر معناهو ماعونو موش مليان.. الجمهوريون كعادتهم في الذكر أو الإنشاد أو المديح يسمعون وينصتون ويطربون..ولا يجلبغون والحكاية جابا مرة مجموعة من المريدين جوا حضروا جلسة إنشاد في صالون الأستاذ محمود وبالغوا في الرهزي والنقزي والبرطعة.. هسه أنا شايف نقزي وبرطعة شديدة خلاص في قناة ساهور خاصة من النساء. برطعة تفقد السيطرة تماما.خاصة في مهرجانات المديح.. والمعروف أن الصفيحة أو العلبة لمان تكون مليانة مافيها نفس لاتجلبغ.. لكن مين يقدر يملا ماعونو زي ما يريد لنا الأستاذ محمود
|
Post: #2
Title: Re: الأستاذمحمودمحمدطه قال:( الملـيان ما بيـجلبغ)
Author: منصوري
Date: 01-01-2010, 01:43 PM
Parent: #1
واحد قال لى يامنصوري خليهن يبرطعن.. أحسن يبرطعن في بيت العرس والغنا والله أحسن يبرطعن في المديح؟
|
Post: #3
Title: Re: الأستاذمحمودمحمدطه قال:( الملـيان ما بيـجلبغ)
Author: منصوري
Date: 01-01-2010, 01:54 PM
Parent: #2
واحد زميل آخر قال لى:( يا منصوري البرطعة والجلبغة دي في النبي.. في محبة النبي.. ومحبة النبي غير..)
هل ما ممكن أحب النبي عليه أفضل الصلاة وأتم التسليم بصورة أحسن من كدة وأدق من كدة وأعمق من كدة.. أحبو وأعرف قدرو.. وشريعتو ونبوتو وولايتو في توصيل الخلق لخالقها.طريقاً ممهداً سالكاً خالي من الشوائب والزيادات والمزايدات.. أعرف قدرو وعظمتو وأنتهج طريقه وعلى خطاه أسير كما فعل هو موسلاً وموصلاً
|
Post: #4
Title: Re: الأستاذمحمودمحمدطه قال:( الملـيان ما بيـجلبغ)
Author: منصوري
Date: 01-01-2010, 03:26 PM
Parent: #3
قضينا زمن طويل وكبير نحن السودانيين في جلبغة السياسة، نسأل الله في هذا العام الجديد، أن ينعم كل السودانيين بسياسة مستقرة ، وإن هذا الشعب شعب حقيق بكل وسائل التكريم بما حباه الله من أصايل الطباع، الله وحده هو المرتجى والأمل الكبير
|
Post: #5
Title: Re: الأستاذمحمودمحمدطه قال:( الملـيان ما بيـجلبغ)
Author: منصوري
Date: 01-01-2010, 11:28 PM
Parent: #4
هسه نحن مما طلعوا مننا الإنجليز موش قاعدين نجلبغ في السياسة والخدمة المدنية والحياة كلها.. كم عهد مشى وكم عهد جاء وكم عهد بائد وكم ديكتاتورية وكم أرواح فقدناهم من أجل السلطة..حكموا ديل حجموا ديل وكتلوا ديلاك وحكموا ديل كتلوا ديلاك وهمشوا أولئك... ساقة جحا تسوق وتدي البحر.. وإفراز الخدمة المدنية جيش جرار في المعاشات في مقتبل العمر وخبرات كان ممكن نستفيد منها، لكن لونو السياسي ما بيتوافق معانا.. عاش كدة أبعدوه وغيرو وغيرو...الخدمة المدنية صارت في الحضيض.. خفير في مصلحة يملي رايو على رئيس المصلحة لأنو قريب داك..ولخبطة في الخبرات.. إختلال في قيم الناس واختلال في قيم السوق، وعمارات تقوم أصحابها هامشيين على حافة المجتمع، وقروش مبهولة لى ناس بلا حساب موش شغل توفير راتب على راتب...وسحت في الأكل والشرب... ولخبطة في مفاهيم قيم الديموقراطية والإشتراكية والمساواة الاجتماعية، والقبلية تسمو والجهوية ترتفع والقيم تنزل.. لخبطة شديدة خلاص..وكل واحد عايز يؤدب التاني، وكل واحد عايز يقصى رأى الآخر.. وهكذا...
هل من حل ناجع واحد لنا جميعاً لايتطاول عليه أحد ، ويحقق السلام للجميع؟
|
Post: #6
Title: Re: الأستاذمحمودمحمدطه قال:( الملـيان ما بيـجلبغ)
Author: منصوري
Date: 01-02-2010, 06:34 AM
Parent: #5
الناس البيجلبغوا في السياسة بيجلبغوا ليه؟ ماعندهم الدراسة النظرية التخصصية في ممارسة السياسة
ولاعندهم الخبرة العملية في السياسة
ولاعندهم الرأي المدروس المحدد
ولاعندهم الهمة والصبر على تثوير الواقع.. ولاعندهم النظره في إنو هم جايين في الكراسي كخدام للشعب؟
والناس البي يجلبغوا في الإنشاد والمديح بيجلبغوا ليه؟
يجلبغوا عشان ماعونهم الروحي ناقص عايزين يتموه بالجلبغة دي
والناس البي يجلبغوا في الحياة الزوجية ؟ نفوسهم خاوية،وتقديرهم للمرأة ضحل،
والناس البي يجلبغوا في البحر.... ما بيعرفوا يعوموا ولا أبواتهم علموهم العوم
|
Post: #7
Title: Re: الأستاذمحمودمحمدطه قال:( الملـيان ما بيـجلبغ)
Author: Abureesh
Date: 01-02-2010, 06:43 AM
Parent: #6
وانخلع عنك وعربد طربا وتهتك في الهوى وافتضح
|
Post: #8
Title: Re: الأستاذمحمودمحمدطه قال:( الملـيان ما بيـجلبغ)
Author: منصوري
Date: 01-02-2010, 07:09 AM
Parent: #7
| Quote: وانخلع عنك وعربد طربا وتهتك في الهوى وافتضح |
ابو الريش الغالي سلامات يا رجل...مشتاقين...
بالطبع النقطة الذكرتها دي أنا فاهمها.. ولكنها ليست قمة والأستاذ محمود دائماً يدعو للقمم وسمو الأخلاق والإنضباط بميزان الشريعة والحقيقة
والإنخلاعة أو الإنطلاقة بمفهوم السودانيين ما مشكورة
والعربدة طبعاً من كلمتها غير مشكورة
والتهتك.. والهتك أعوذ بالله منها
والفضيحة(وافتضح) يا ابو الريش... نسأل الله السترة
الفكرة الجمهورية تدعو للسمو بالتصوف وتنظيفه من الشوائب ليأخذ مكانه الطبيعي
.............
والبيت الذي ذكرته أنت هنا قد يتبادر للبعض هنا أنه من شعر شعراء الجمهوريين..
ولكنه قطعاً وقولا واحدا لا.. هو من أشعار المتصوفة
|
|