Post: #1
Title: إنتى لسة ما دخلتي يا "حيوانة"
Author: سامى عبد الوهاب مكى
Date: 12-29-2009, 03:51 PM
يا شباب الجملة الفوق دي سمعتها في عيادة دكتور وتقريباً هي الأسوأ على الاطلاق مما سمعت من (قلة أدب)
الأسبوع الماضي ونحن في عيادة طبيب والمكان مكتظ بالمرضي في انتظار الدكتور يدخل شاب(للاسف) ويخاطب زوجته الجالسة في وسط الناس وكانت وقتها تتجاذب اطراف الحديث مع زوجتى وبعض الحاضرات وفي قمة السعادة!
يدخل هذا المنفصم وبأعلى صوته يوجه الكلام القبيح للمسكينة...إنتي لسة ما دخلتي يا حيوانة!!
والله لم أحس بغضب مثلما احسست في ذلك اليوم...ببساطة يلغي هذا الغبي إنسانيتها ويصفها بالحيوانة ويسبب لها كل هذا الضيق وفي حضور أكثر من ثلاثين شخص!
ويتمادي البليد بعدما يعلم بأن الدكتور لم يأتي ونحن جموع الحيوانات كلنا في الانتظار ويوجه هرائه للمسئول عن التسجيل...يا أخي والله جايين من بعيد ممكن تدخلنا الاول!
وبعد رفض الرجل المستاء اصلاً يواصل في قلة الادب والله لو داير اخش اخش جوة عينك!
بالله نوع دا يقولو عليه شنو؟
المهم بعد مقابلة الطبيب يخرج (الفحل) الما حيوان وتتأخر زوجته لتهمس وأنا شاهد بصوت خفيض للمسجل "معليش أمسحا لي في وشي"
فيرد عليها بلا تردد والله إنتي ارجل من راجلك واشهم منو!
|
Post: #2
Title: Re: إنتى لسة ما دخلتي يا "حيوانة"
Author: مزمل خيرى
Date: 12-29-2009, 03:59 PM
Parent: #1
غايتو دا لو انا كنت طيرت ليهو جوز وكسرت ليهو كرعينو .!
دة راجل متخلف ولً شنو ؟
|
Post: #3
Title: Re: إنتى لسة ما دخلتي يا "حيوانة"
Author: عبد اللطيف بكري أحمد
Date: 12-29-2009, 04:00 PM
Parent: #1
ذاك أنتهى من آدميتها
وهذا إنتهى من أنوثتها،،
| Quote: والله إنتي ارجل من راجلك |
====
موقف عادي ياحبيب في السودان ،، بالأمس وأنا أستقبل زوجتي في المطار
لاقيت واحد بينهر في (زوجته / أخته) بشكل تصطك له الأسنان،،
المطار مليان جنسيات الدنيا وهي ترتعد من هول ما أصابها،،
الله لنا جميعنا ، فطبعنا فيهو شيء فظ موروث ،،
|
Post: #4
Title: Re: إنتى لسة ما دخلتي يا "حيوانة"
Author: سامى عبد الوهاب مكى
Date: 12-29-2009, 04:25 PM
Parent: #3
تحياتي يا مزمل!
يا عبد اللطيف...على الأقل دا خانه التعبير لكن داك خانته ادميته!
السؤال النوع دا حا ينقرض متين؟؟
|
Post: #5
Title: Re: إنتى لسة ما دخلتي يا "حيوانة"
Author: BAKTASH
Date: 12-29-2009, 04:35 PM
Parent: #4
| Quote: الله لنا جميعنا ، فطبعنا فيهو شيء فظ موروث ،، |
يعني يا عبداللطيف يا خوي ما في طريقة نتصلح شوية!!
|
Post: #6
Title: Re: إنتى لسة ما دخلتي يا "حيوانة"
Author: سامى عبد الوهاب مكى
Date: 12-29-2009, 05:31 PM
Parent: #5
لا استغرب لتعليق الأخ عبد اللطيف فنحن للأسف لا زال أكثرنا يعتبر الزوجة من ضمن المقتنيات والأمتعة..وينعكس هذا الفهم العجيب على شكل التعامل والتصرفات غير الكريمة وما شاهدته وسردته قد يكون مثال بسيط لا يعكس كل الواقع بقدر ما يعكس جزء بسيط قبيح منه!
لمن يظن أن هذه المفاهيم في طريقها للإنقراض عليه أن يعلم بأن هذاالشخص المقصود (شاب في منتصف الثلاثينات) شاب للأسف يعتبر نفسه "إنسان" له حق إمتهان كرامة زوجته وإنسانيتها أمام مرأى ومسمع من الجميع في نوع من التباهي البليد!
بل يعتبر نفسه أولى من باقي البشر بأن تتم معاملاته قبلهم!
|
Post: #7
Title: Re: إنتى لسة ما دخلتي يا "حيوانة"
Author: الصادق صديق سلمان
Date: 12-29-2009, 05:48 PM
Parent: #6
أستاذ سامي
لك التحايا والود
دا مفروض تقوم وترشو كف لمن يقع في الواطة - لكن تلقاهو عسكري يا استاذ سامي
أستاذ عبداللطيف
| Quote: الله لنا جميعنا ، فطبعنا فيهو شيء فظ موروث ،، |
نعم الله لنا جميعاً
لكن يارجل تصدق انت لمن تكتب اخوك بيقعد يقرأ ليك بي مزاج
كأنك تكتب ما أريد أن أكتب.
أبومجتبى
|
Post: #8
Title: Re: إنتى لسة ما دخلتي يا "حيوانة"
Author: سامى عبد الوهاب مكى
Date: 12-29-2009, 06:17 PM
Parent: #7
لكن يالصادق تفتكر الكف علاج للحالة دي!
ما أظن!
|
Post: #9
Title: Re: إنتى لسة ما دخلتي يا "حيوانة"
Author: عبد اللطيف بكري أحمد
Date: 12-29-2009, 06:35 PM
Parent: #8
حبيبنا باكتاش : أكيد دايما في أمل بإذن الله ، وأول المؤشرات لهذه الأمل
هو إمتعاض اخي سامي على هذا السلوك ، وأكيد الكثيرون داخل العيادة
إستهجن هذا السلوك ، ونحن أيضا ، ولم نستثني أنفسنا من هذا النهج
في حياتنا،، ثاني الخطوات أن نواجه أنفسنا علانية بهذا العيب الكبير فينا
وعدم الإستجابة لذوي الأصوات العالية ، ووضع شروط إحترام الزوجة
وتقديس حياتنا الزوجية وصون كرامة أم العيال ضمن بنود القسيمة،،
It is never too late, Baktash, we only need 2 start.
حبيبنا أبو مجتبى،،
أشكر لك حفزك همتي أن أكتب مايسعدك ، خصوصا وخيطنا
يتلاقي في البرنابيو, وقد آتيك منه بما يجمل هذا المكان،،
أشكرك ثانية للتعبير ببوح جميل عن صدق أحساس تحسه،
وهذا أيضا أحد نقاطنا التي تحتاج جرأة سامي في التناول و
تنادينا للمؤازرة والإعتراف بالنقص علانية،،
شكرا سامي والجميع،،
|
Post: #10
Title: Re: إنتى لسة ما دخلتي يا "حيوانة"
Author: hassan gadein
Date: 12-30-2009, 07:34 AM
Parent: #9
السؤال النوع دا حا ينقرض متين؟؟
|
Post: #11
Title: Re: إنتى لسة ما دخلتي يا "حيوانة"
Author: نجلاء سيد أحمد
Date: 12-30-2009, 09:09 AM
Parent: #8
التحيات والتشكرات
سامى عبد الوهاب مكى
لفتح هذا البوست الهام جدا لواقعيته وفى نفس الوقت يقطع الحشا
فى نماذج كتيرة ذي النموذج الديناصوري
الغير منغرض وفى نماذج مشرفة امثالك وامثال كل من خط وامثال حرف عبد اللطيف بكري أحمد
احنى هامتى لكم اجلالا
Quote: [حبيبنا باكتاش : أكيد دايما في أمل بإذن الله ، وأول المؤشرات لهذه الأمل
هو إمتعاض اخي سامي على هذا السلوك ، وأكيد الكثيرون داخل العيادة
إستهجن هذا السلوك ، ونحن أيضا ، ولم نستثني أنفسنا من هذا النهج
في حياتنا،، ثاني الخطوات أن نواجه أنفسنا علانية بهذا العيب الكبير فينا
وعدم الإستجابة لذوي الأصوات العالية ، ووضع شروط إحترام الزوجة
وتقديس حياتنا الزوجية وصون كرامة أم العيال ضمن بنود القسيمة،، |
وكانت حملة ال16 يوم ضد العنف من المجتمع المدنى شعارها
التزم
اعمل
طالب
وانت جيت فى نفس الشعار تحياتى
دى الورشة الاولى ليوم الافتتاح
|
Post: #12
Title: Re: إنتى لسة ما دخلتي يا "حيوانة"
Author: انس التوم احمد
Date: 12-30-2009, 10:50 AM
Parent: #1
سبحان الله
الزوجه هي الحنان
هي الام ،الاخت ، المودة و الرحمة
انت عارف يا سامي ياخوي
الدنيا بقت ماشه بالمقلوب
|
Post: #13
Title: Re: إنتى لسة ما دخلتي يا "حيوانة"
Author: داليا حافظ
Date: 12-30-2009, 11:05 AM
Parent: #12
سامي
تحياتي
والله وجعتني العبارة شديد ..للأسف العنف اللفظي موجود بشكل كبير ..
والحقيقة هو برجع لنقص في الشخصية ..وفي رجال ما بطيب ليهم "النهير "إلا قدام الناس على طريقة
شوفوني ..وعبارات زي .."إتحركي "...وما "تمشي بسرعة" .ويلا ياخ "ومعاها كلام باليدين وإصطناع لزهجة
ما مبررة تكاد تكون صورة مألوفة في الواقع بتعانا للأسف ..
ربنا يعدل الحال
|
Post: #14
Title: Re: إنتى لسة ما دخلتي يا "حيوانة"
Author: الرشيد البصيلى
Date: 12-30-2009, 06:50 PM
Parent: #13
............
الأرواح جنود مجندة ما تشابه منها إئتلف وما تنافر منها إختلف .... لكن المادة لعبت دور كبير فى إزالة مكونات التنافر والتشابة والإئتلاف والإختلاف .... الراجل الكل يعرفه بسوء خلقه ... يدوهو مرة متل الدهب عشان عندو قروش ......والله فى نسوان يعادلن مئات الرجال الرجال ....وراجلها (( زوجها)) ما تشتريهو بمليمة ... ضفرها ساى يوزن ملايين متلو .... البحيا فى الدينا دى بشوف حاجات ومواقف تقتل ود القبايل واقف .....المرة هى الأم أولا والصديقة ثانيا والحبيبة ثالثا والزوجة رابعا ... ومواقف كتيرة تلقاها معاك ....لما العالمين كلهم يكونو ضدك ....
تستحضرنى قصة لراجل تزوج بت عمه وبعد فترة القريشات كترو صاحبك لقو ليهو واحدة تانية تزوجا ورحل معاها وفتح للزوجة بت العم وبعد سنتين تدهسو ليك عربية تكسر ليك رجلينوغلبا موضوع شيلو وجيبو رحلت خلتو فى بيتو ... بت عمو مشت جابتو ....ليس من أجل رغبة فى راجل ((مكركع)) .... لكن رغبة فى أخد الأجر فى زوج لا يعرف للجميل قدر او رد .... قصص وحكاوى توجع القلب
............
|
Post: #15
Title: Re: إنتى لسة ما دخلتي يا "حيوانة"
Author: mayada kamal
Date: 12-31-2009, 01:10 PM
Parent: #14
نحن عشان جنس الحاجات دي
دا طرفنا من العرس
ناس تتطفش النفس من العرس
شكرا على البوست
عشان البنات يعملن حسابهن
|
Post: #16
Title: Re: إنتى لسة ما دخلتي يا "حيوانة"
Author: طلال جبير جابر
Date: 12-31-2009, 01:44 PM
Parent: #13
Quote:
والحقيقة هو برجع لنقص في الشخصية ..وفي رجال ما بطيب ليهم "النهير "إلا قدام الناس على طريقة
شوفوني ..وعبارات زي .."إتحركي "...وما "تمشي بسرعة" .ويلا ياخ "ومعاها كلام باليدين وإصطناع لزهجة
|
والله يا داليا علي قول ود االصايم جبتي النجيضة ،،،
الزي دة بيكون عندوعقدة ومركب نقص بتم شخصيتو بالحركات دي .......
بوست هادف نتمني ان يجد الموضوع حظه من النقاش...
|
Post: #17
Title: Re: إنتى لسة ما دخلتي يا "حيوانة"
Author: مريم بنت الحسين
Date: 12-31-2009, 03:09 PM
Parent: #16
التحية لصاحب البوست وزملاؤه...
انا اعتقد برضه العيب على تربية المرأة البتقبل كلام بالشكل ده... يعني انا لو نهّرني في الشارع قال لي امشي بسرعة، بقيف ليه عديل كده... هو مشعلق في كعب عالي زيي!
البقبل القليل بقبل الكتير، واعتقد انه المرأة جواها خوف موروث او مكتسب يجعلها ما بتقدر تحدد أطر التعامل مع الراجل.. والمسألة بتبدأ معاها من البيت.. اخوها يجي ما عنده غيار لبكره، يجدعه ليها ويقول ليها غسّلي واكوي.. رغم انهم الاتنين جو داخلين من الجامعة حسي.. .! المرأة البتسمع كلام بالشكل ده، من هي صغيرة أو في بيت ابوها، ممكن تصبر على اكتر منّه في بيت زوجها.. في نساء بستحملوا كلام وإهانة زي دي، خوفاً من الطلاق أو انه يعرّس فيها.. أو خايفة على العيال أو خايفه تحرد أو تتخذ موقف، يقوموا أهلها يرجّعها "بباركوها"، وامشي بيت راجلك.. وما تكون اخدت لا حق لا باطل...
الشاب ده بكون في بيتهم كده، او شاف ابوه بعامل امّه كده.. وجا اتزوج بت سمحت ليه بي كده.. لانه ما بعرف طريقة تانية للتعامل غيرها... وبفتكر انه الكلام البراحه زي انه خايف من مرته أو انها حاكماه! عليك الله ده موش فهم بالقلبه!
بنت الحسين
|
Post: #20
Title: Re: إنتى لسة ما دخلتي يا "حيوانة"
Author: سامى عبد الوهاب مكى
Date: 12-31-2009, 11:05 PM
Parent: #19
التحية لكل من قرأ وتألم وعزم على تغير الواقع.
التحية لكل زوار البوست الذين عبروا عن رفضهم لإمتهان الأم والزوجة والأخت والبنت.
كل عام وانتي طيبة يا أمي الحنونة ...يا زوجتي المحبة... يا أختي العزيزة و يا بنتي الغالية.
أتمنى أن يكون 2010 عام نقدس فيه الأم كما يجب والزوجة كما امرنا.
|
Post: #21
Title: Re: إنتى لسة ما دخلتي يا "حيوانة"
Author: بكري عباس علي
Date: 01-01-2010, 04:12 PM
Parent: #20
| Quote: بالله نوع دا يقولو عليه شنو؟ |
يقولوا عليه عديم الادب ولئيم لانه ما اهانهن الا لئيم
راجل ناقص وللاسف موجود منهم كثيرين بسبب الفهم الخاطيء للرجولة
|
Post: #22
Title: Re: إنتى لسة ما دخلتي يا "حيوانة"
Author: سامى عبد الوهاب مكى
Date: 01-01-2010, 08:29 PM
Parent: #21
لماذا لا نجعل من 2010 عاما للمرأة السودانية!
|
Post: #23
Title: Re: إنتى لسة ما دخلتي يا "حيوانة"
Author: PLAYER
Date: 01-01-2010, 08:51 PM
Parent: #22
حكمة اليوم
سكوت الزوجة لاول أهانة من زوجها تشجيع للمذيد
|
Post: #24
Title: Re: إنتى لسة ما دخلتي يا "حيوانة"
Author: انتصار محمد صالخ بشير
Date: 01-02-2010, 00:38 AM
Parent: #23
سلام للجميع وكل سنة طيبين
هذا رجل مريض وتصرفه يعكس تربيته والبيت الذى خرج منه
والعيب الاكبر ان تقبل المراة اهانة الرجل لها
وللاسف الامثلة كثيرة
|
Post: #25
Title: Re: إنتى لسة ما دخلتي يا "حيوانة"
Author: Huda AbdelMoniem
Date: 01-02-2010, 01:31 AM
Parent: #20
سامي
سبحان الله
الزوجه هي الحنان
هي الام ،الاخت ، المودة و الرحمة
لو ضمنا عشرة رجال بؤمنوا بهذا القول ح نضمن سعادةالزوجةوسعادة الابناء
|
Post: #26
Title: Re: إنتى لسة ما دخلتي يا "حيوانة"
Author: سامى عبد الوهاب مكى
Date: 01-02-2010, 02:58 PM
Parent: #1
لا لقهر المرأة.
|
Post: #27
Title: Re: إنتى لسة ما دخلتي يا "حيوانة"
Author: محمد السليمانى
Date: 01-02-2010, 03:12 PM
Parent: #26
تحياتى
ده اسمو الراجل الجعجاع لسان فقط والله لو فى زول اتصدى ليهو ببقى زى مرتو
لكن مرتو بت ناس واجدع منو 100 مره
وهو الحيوان الحقيقى
|
|