Post: #1
Title: خريجي الجيلي الثانوية .. اجتمعوا
Author: محمد عبدالقادر سبيل
Date: 12-29-2009, 02:09 PM
Parent: #0
ذكريات
اساتذة
داخليات
اضرابات
السيكو
محمود الحاج
اولاد الكباش
باصات ابورجيلة
الخ
انا من دفعة 1978 - 1981
داخلية النيل الازرق عنبر الراس
اولى متنبي
تانية الرازي
تالتة معري
_________________
اللهم ارنا والزمنا مراشد الهدى
|
Post: #2
Title: Re: خريجي الجيلي الثانوية .. اجتمعوا
Author: Elwaleed M. Ahmed
Date: 12-29-2009, 09:55 PM
Parent: #1
الاخ محمد عبدالقادر سبيل
الف مرحب بكل الزملاء خريجي الجيلي الثانوية
انتقلت الي مدرسة الجيلي الثانوية من مدرسة الضعين الثانوية
دفعة 89-90
قريبي الاستاذ الفاضل عيسي احمد عثمان استاذ الرياضيات والفيزياء
كانت ايام جمبلة
الوليد محمد احمد- المحامي-بروكلن-نيويورك
|
Post: #3
Title: Re: خريجي الجيلي الثانوية .. اجتمعوا
Author: Elwaleed M. Ahmed
Date: 12-30-2009, 00:14 AM
Parent: #2
Quote: الاخ الوليد سلامات
حاولت ارسل اميل للاخ محمد ع القادرللمداخلة في الموضوع اعلاه
لانوانا خريج الجيلي برضك كمان ذي ما بقول المصريين
بس للاسف شكلو ما منذل الاميل بتاعو
عشان كدا حاولت ارسلها علي بتاعك
المهم انا شكلي سبت المدرسه قبل 89 يعني ما اتلاقينا للاسف
بس اكيد لينا ذكريات جميلة مشتركة في الجيلي الثانوية
والله الواحد بيحن للايام ديك بعد ما دخلنا في بحر وهموم الحياة المقرفه
والله بالجد تجمع خريجي الجيلي دا من المواضيع التي ظلت تشغل بالي وما ذالت
بس للاسف ما عندي باسويرد رغم اني من المداوميين علي التواجد وتصفح سودانيزاونلاين
المهم اتمني لكم التوفيق في لم شمل اكبر عدد ممكن من الخريجين
ومعرفة اخبار الزملاء الاماجد بعد ان تفرقت بنا السبل .
لك والاخ محمد وكل خريجي الجيلي الثانويه كل الود والتقدير وخالص التحايا العطرة
اخوكم د.أسامة ع الرحمن جمهورية مصر العربية الاسكندرية |
|
Post: #4
Title: Re: خريجي الجيلي الثانوية .. اجتمعوا
Author: Elkheir Eltayeb
Date: 12-30-2009, 02:57 AM
Parent: #3
لى ذكريات كثيرة في الجيلي الثانوية ...يا الوليد انا الدفعة القدامكم
لى عودة باذن الله .
|
Post: #5
Title: Re: خريجي الجيلي الثانوية .. اجتمعوا
Author: محمد عبدالقادر سبيل
Date: 12-30-2009, 10:00 AM
Parent: #4
استاذ وليد
السلام عليكم ورحمة الله وبركاته
شكرا جزيلا
والظاهر عليكم اولاد سغار
سنة 89 بتاعتك دي انا جابو لي جنا ياخ
كدي شوفو لينا دفعات قديمة شوية
داير ناس اتعلموا على يد مدرسين انجليز
ناس مستر آيدن السايكوتيك ومستر دوجلاس الاسكوت بتاع الانجليش سوسياتي ومستر منو داك الاشولنجي بتاخ اوليفر تويست!!!
والمدرسين المصريين ناس صفوت بتاع الكيميا وادولف بتاع الرياضيات وادوارد مسعد بتاع الفرنساوي
ياحليلكم ياخ
وليد تتذكر شنو اكتر شي في ثانوية الجيلي ؟ غير الجسر ومزارع البرسيم الورا ؟
اين من عيني هاتيك المجالي
_________________
رب اغفر لي وللمؤمنين والمؤمنات
|
Post: #6
Title: Re: خريجي الجيلي الثانوية .. اجتمعوا
Author: العوض المسلمي
Date: 12-30-2009, 10:12 AM
Parent: #5
دفعة 84_ 1987
يلا معاكم البرنامج شنو ؟؟؟
|
Post: #7
Title: Re: خريجي الجيلي الثانوية .. اجتمعوا
Author: محمد عبدالقادر سبيل
Date: 12-30-2009, 01:24 PM
Parent: #6
| Quote: يلا معاكم البرنامج شنو ؟؟؟ |
العوض المسلمي
بصفتك شيخ بورداب البلد
عايزينك تبدا انت
تتصل بادارة المدرسة هسع
وتفكروا في استضافة لمدة تلاتة ايام في الداخليات ديك ( تااااني ) وبنفس ملاح البراطيش والقرع واللبن البودرة فور دوقز اند ليتل هورسيس !!
برنامج ثقافي ورياضي واكاديمي برضو
والله فكرة جديدة لنج وما مسبوقة تفاصيلها كالتالي :
تعلن ادارة المدرسة عن مهرجان لمدة ثلاثة ايام مثلا يعقد داخل المدرسة خلال اجازة نصف السنة ويستضيف خريجي المدرسة من الدفعات المختلفة منذ الستينات برسوم محددة ( مائة دولار للفرد مثلا )
يقيم الخريج في دخليته وعنبره ان امكن وفي سريره ذاته ويأكل في السفرة ذاتها ومن انواع الاطعمة التي كانت ( مقررة عليه سابقا ) دون اي تعديل
ويتلقى حصصا كاملة في صفه ( ايا من السنوات الثلاث أو كل يوم في فصل ! ) ويذهب الى الطابور الصباحي والكديت وتعليمات الصول ( بس جلد ما معانا)!! ويستجيب للجرس ويعيش كل تفاصيل الحياة اليومية في مدرسته
اعتقد ان هذه ستكون سنة جميلة يحبذها الناس
بشرط ان يعرفوا البرنامج كاملا والموعد المحدد للبرنامج ( برنامج ايام مدرستنا !!) وموعد التسجيل والرسوم قبل مدة كافية وان يتكرر هذا سنويا بغرض حصول المدرسة على الدعم المقدر من ابنائها الابرار
وقد يسمح للطلاب ( كبار السن!! ) من المدارس الأخرى الالتحاق بالبرنامج ( ابو تلاتة ايام بدلا من تلاتة سنوات ) طلبا للاستمتاع باجواء مدارسهم السابقة ولاستعادة ذكرياتهم النضرة ( لعل وليت الشباب يعود يوما )
يتضمن البرنامج منافسات رياضية وثقافية ترفيهية وجلسة في كافتريا السيكو واذاعة ومجلة حائط واستحمام بصابون فنيك وزيارة للبحر وجولة داخل الجيلي وجناينها الخ
لماذا لا تتبنى هذه الفكرة وتطرحها على ادارة المدرسة لتكون سباقة اليها فتكون مبادرة وسبق يحتذى؟
بالجد هذه الفكرة قد تروق للناس وقد يجري تعميمها حتى خارج السودان
بس انت قل بسم الله
ارجو ان اسمع منك
______________
اللهم اجعلنا مفاتيح للخير مغاليق للشر
|
Post: #8
Title: Re: خريجي الجيلي الثانوية .. اجتمعوا
Author: محمد عبدالقادر سبيل
Date: 12-31-2009, 10:02 AM
Parent: #3
اخي اسامة عبد الرحمن
السلام عليكم ورحمة الله وبركاته
شكرا جزيلا
اولا عنواني [email protected]
ثانيا ما رأيك في المبادرة التي طرحتها على الاخ المسلمي
فكرة جديدة هل تؤيدها
ام تضيف اليها ام تقترح بديلا
سؤالي ايضا موجه الى استاذ وليد
________________
رب اشرح لي صدري ويسر لي امري
|
Post: #9
Title: Re: خريجي الجيلي الثانوية .. اجتمعوا
Author: خالد المحرب
Date: 12-31-2009, 10:51 AM
Parent: #8
http://www.youtube.com/watch?v=DRgzqnAhsGI
حضرت الى مدرسة الجيلى من ابودليق المتوسطه عام 78 كانت احلى الايام قهوة السيكو بص ابرجيله
انا كنت ساكن فى عنبر دجله كانت ايام لها ايقاع مدرس الفرنساوى كان مصرى ومدرس الانجليزى كان
خواجه ومصطفى سيد احمد يترنم الصباح فى اذاعة المدرسه غدار دموعك
شكرا ياسيدى
|
Post: #10
Title: Re: خريجي الجيلي الثانوية .. اجتمعوا
Author: محمد عبدالقادر سبيل
Date: 12-31-2009, 01:03 PM
Parent: #9
دا شنو يا خالد
نحن دفعة يعني ؟
اقصد هل اتخرجب وللا التحقت 78 ؟
معاك منو من اولاد ابو دليق : عكاشة ومنو ومنو ؟ كتار طبعا
من ابو دليق اب زليق وام ضوا بان وحجر العسل والعسيلات والنية ود الكباشي والفكي هاشم الحلفاية والكدرو وبحري وود رملي ووو
ومن غرب البحر اولاد الكوداب والسروراب وام درمان الخ
طيب بتتذكر اضرابنا الشهير ضد المدير محمود صالح الحاج ؟
انا كنت في مكتب شعبة الطلاب مع ناس امام البشير ( من جبل اولياء ) ومحمد عوض الله وحافظ
قمنا كونا اتحاد ظل في مزارع البرسيم بالليل ونظمنا الاضراب ضد الادارة في ضوء القمرة ونجحنا
وفصلونا ليك من المدرسة كللللنا رمونا في شارع الله اكبر
ثم اعادونا بقرار من محافظ الخرطوم مهدي مصطفى الهادي بدون اي امتحان نقل وسمحوا لينا نختار كمان اي تخصص في تالتة : دايرين اديشنال ماث او بايولوجي او ادبي ببلاش كدا
والمدير محمود رفدوه !!!
ياخ حكاية والله
_______________
استغفر الله العظيم من كل ذنب عظيم
|
Post: #11
Title: Re: خريجي الجيلي الثانوية .. اجتمعوا
Author: salah almaleeh
Date: 12-31-2009, 02:19 PM
Parent: #10
الأخ / محمد عبدالقادر سبيل
لك التحية والتقدير وانت تفتح هذا البوست المهم والجميل
والذي أعاد الى ذاكرتي ذكريات جميلة وحلوة في مدرسة الجيلي
الثانوية القومية للبنين حيث أنني من دفعة 1989م - 1992م
وكنت أقيم في داخلية دجلة في السنة الأولى ثم إنتقلت الى
داخلية النيل في السنة الثانية .. وكنت قائداً لشعبة التدريب
العسكري (الكديد).
مرة أخرى لك التحية ولكل الزملاء خريجي مدرسة الجيلي الثانوية
وكل عام والجميع بألف خير وصحة وعافية
صلاح المليح
|
Post: #12
Title: Re: خريجي الجيلي الثانوية .. اجتمعوا
Author: خالد المحرب
Date: 12-31-2009, 05:28 PM
Parent: #11
Quote: دا شنو يا خالد
نحن دفعة يعني ؟
اقصد هل اتخرجب وللا التحقت 78 ؟
معاك منو من اولاد ابو دليق : عكاشة ومنو ومنو ؟ كتار طبعا
من ابو دليق اب زليق وام ضوا بان وحجر العسل والعسيلات والنية ود الكباشي والفكي هاشم الحلفاية والكدرو وبحري وود رملي ووو
ومن غرب البحر اولاد الكوداب والسروراب وام درمان الخ
طيب بتتذكر اضرابنا الشهير ضد المدير محمود صالح الحاج ؟
انا كنت في مكتب شعبة الطلاب مع ناس امام البشير ( من جبل اولياء ) ومحمد عوض الله وحافظ
قمنا كونا اتحاد ظل في مزارع البرسيم بالليل ونظمنا الاضراب ضد الادارة في ضوء القمرة ونجحنا
وفصلونا ليك من المدرسة كللللنا رمونا في شارع الله اكبر
ثم اعادونا بقرار من محافظ الخرطوم مهدي مصطفى الهادي بدون اي امتحان نقل وسمحوا لينا نختار كمان اي تخصص في تالتة : دايرين اديشنال ماث او بايولوجي او ادبي ببلاش كدا
والمدير محمود رفدوه !!!
ياخ حكاية والله
|
الاخ محمد ناس ابودليق كتار منهم على سبيل المثال بابكر عمر بابكر
عمر السراج ابزليق
ودالزنبعوب الله يرحمه الحاث الشهير فى لفة ابوحليمه
بابكر فضل الله الله يرحمه مات فى نفس الحادث ام ضوا بان
المدير كان محمود
استاذ الامين الكباشى
اسامه على مساعد اخوه الرشيد الان ضابط كبير
|
Post: #13
Title: Re: خريجي الجيلي الثانوية .. اجتمعوا
Author: محمد عبدالقادر سبيل
Date: 01-02-2010, 09:31 AM
Parent: #12
وصلتني الرسالة التالية من دكتور اسامة عبد الرحمن
له التحية
Quote: الاخ محمد عبد القادر ...سلامات
اولا مشكور جدا للاهتمام والرد وتنزيل الاميل
ثانيا دا ماغريب لانو انا بفتكر جميع خريجي الجيلي راقيين ومن الصفوة
بالنسبة للفكرة بتاعتك جميلة جدا وحالمة
وانا اثني عليها وبشدة رغم ان لي عليها بعض الملاحظات
بس دي ما المشكلة
متين اخر مرة شفت فيها المدرسة ؟ قلت لي 81
انا سبتهاحوالى 88 لانو مشيت بركات الثانوية
000
اصدمك كتير ولا شوية
انا من السروراب غرب النيل
قبل فترة سنتين ثلاثة كنت في اجازة في السودان
وكانت هناك مناسبة اجتماعية ودتني الجيلي
اول ما وصلت كانت تختلج علي المشاعر القديمة والزكريات الحلوة
وصدقني عندما مررت بجوارها بدات دقات قلبي في التسارع
ومر امامي شريط الزكريات العجيبة ديك
الترس...الداخليات....السفره ب عدسها وفولها براطيشها وساردينها
السيكو وازيار السيكو ...فاكر الزير الكبير داك.اكبر زير لاقاني في حياتي
وشاي اللبن واللبن عند المغارب يوميا بالكباية المقق ديك
محطة القطر والبياعين السريحة للجوافة بصفة اساسية
وانتظار القطر لما يدخل المحطة ودا كان سينمتنا الوحيدة
رغم اني لم اركب اي قطر في السودان بس كانت زكريات جميلة
نرجع للمدرسة والدافوري والسلة الكانت حكر لاخوانا الجنوبيين
والله لحد دلوقت ماعارف ليه..امكن عشان طوال ؟تخيل والله انا اطول من غالبيتهم
والمزاكرة الله يقطع ايامها..والله دي اكتر حاجه كنت بكرها
والصول الفاضل له الرحمة والمغفرة والكديت
وعمك جابر وعمك رحمة لهم الرحمة
والداخليات وكل يتعصب بكل رقة لداخليته
والعنابر والجميع جنب لجنب مع بعض بكل حب ووئام من الغرب او من الشمال
من الجنوب من الوسط من ابودليق العيلفون امضوابان وودالفادني
المحس وكترانج و ود حسونة والسروراب الشهيناب امكتي
والوادي الابيض والعسيلات وجبل اوليا بكل مناطقها والكباشي والفكي هاشم
الحلفايا الخوجلاب الكدرو والدروشاب وحتي داخل بحري
قري والتكينة واوسي والدوم وودرملي والسقاي والانصار والتمانيات
وكثير من المناطق التي فاتني ذكرها
والله كن عبارة عن سودان موحد لانعرف التفرقة
نعيش وناكل من نفس الماعون وننام جنب لجنب بكل طمأنينة وسلام
ويكفي ان اقول لك والله علي مدار سنتين كان علي يميني وشمالي
اثنان من الاخوة الجنوبيين الاخ مارك والاخ مرتن
لم افكر ولو للحظة ان اغير موقع سريري او اجاور غيرهم
الشي الغريب لم التقي باي من الاخوة الجنوبيين بعد التخرج
المهم سرحت في الزكريات ونسيت اصل الموضوع
ارجع تاني للموضوع وهو زيارة الجيلي
عند مروري بالمدرسة قلت ياولد ادخل شوف الحاصل شنو واسترجع زكرياتك شوية
فدخلت بعربيتي وصرت اتجول في ارجا المدرسه بكل حريه
ويا للصدمة الموجعة والمؤلمة
والله لم اكد اتعرف علي اي شي مما تركت الا القليل من المعالم البارزة من مباني و حيطان
فوجدت كميه كبيرة من الناس ذهابا وايابا وكل في همه
فتوقفت وسالت احدهم بكل استحياء من جهلي بما حل بالمدرسة التي تركتها في ابها حللها
فاجابني بما صدمني وافزعني اي والله
اولا الداخليات تم تجفيفها لاكثر من ستة عشر سنة خلت
واصبحت المدرسة خارجية فقط
وبالكاد تخدم منطقة الجيلي بنهر واحد من الفصول
بعد ما كانت تخدم كل السودان
اما بقية الفصول فتم تحويلها لمراحل دراسية اخري
والداخليات فتم تحويلها لمكاتب حكومية وادارية وشعبية
اي والله
والغريب وجدو حل لاي مبني ووجدو له وظيفة
حتي السفرة تصدق...عليك الله دي اسع تبقي شنو غير مخازن
فلم يبقي من مدرستك وداخليتك الا زكريات في خيالك ومخيلتنا
لك حبي وتقديري وعاطر التحايا
ولكل خريجي الجيلي ارق التحايا
ودام الود بيننا
اخوكم ...دكتور .اسامه عبدالرحمن
جمهورية مصر الاسكندرية
|
|
Post: #14
Title: Re: خريجي الجيلي الثانوية .. اجتمعوا
Author: محمد عبدالقادر سبيل
Date: 01-03-2010, 07:15 AM
Parent: #11
مرحبا اخي الخير الطيب
نريد رأيك في صيغة تجمعنا لصالح الوفاء لمدرستنا
فان لها دينا علينا
* اخي العوض المسلمي
اين انت وماذا فعلت ؟
نريد منك الاتصال بادارة المدرسة وتنسق معها وتطلع على رؤيتها من اجل استثمار خريجيها باتجاه اعادة سيرتها الأولى كمدرسة قومية داخلية لها دور وطني
________________
رب اغفر لي وارحمني
|
Post: #15
Title: Re: خريجي الجيلي الثانوية .. اجتمعوا
Author: Elwaleed M. Ahmed
Date: 01-05-2010, 11:32 PM
Quote: فلم يبقي من مدرستك وداخليتك الا زكريات في خيالك ومخيلتنا
لك حبي وتقديري وعاطر التحايا
ولكل خريجي الجيلي ارق التحايا |
كانت لنا زكريات جميلة بمدرسة الجيلي حيث تعرفنا علي اخوة من جنوب السودان ومن شرق النيل ابودليق وغبرها
الجيلي كانت مدينه هادئه
الوليد محمد احمد-المحامي-بروكلن-نيويورك
|
Post: #16
Title: Re: خريجي الجيلي الثانوية .. اجتمعوا
Author: محمد عبدالقادر سبيل
Date: 01-06-2010, 07:25 AM
Parent: #11
صلاح المليح
السلام عليكم ورحمة الله وبركاته
اخي هل لديك صور تحكي ذكريات واركان المدرسة والزملاء ؟
كل من لديه صور يا جماعة فليرفعها بغرض التوثيق واثارة الذاكرة والذكريات
لكم محبتي
_______________
رب اقل عثراتي وآمن روعاتي واهدني واغفر لي وللمسلمين
|
Post: #17
Title: Re: خريجي الجيلي الثانوية .. اجتمعوا
Author: Elwaleed M. Ahmed
Date: 01-10-2010, 06:05 PM
Parent: #16
Quote:
كانت لنا زكريات جميلة بمدرسة الجيلي حيث تعرفنا علي اخوة من جنوب السودان ومن شرق النيل ابودليق وغبرها
الجيلي كانت مدينه هادئه
الوليد محمد احمد-المحامي-بروكلن-نيويورك |
|
Post: #18
Title: Re: خريجي الجيلي الثانوية .. اجتمعوا
Author: محمد عبدالقادر سبيل
Date: 01-13-2010, 10:59 AM
Parent: #17
Quote: اخي العوض المسلمي
اين انت وماذا فعلت ؟
نريد منك الاتصال بادارة المدرسة وتنسق معها وتطلع على رؤيتها من اجل استثمار خريجيها باتجاه اعادة سيرتها الأولى كمدرسة قومية داخلية لها دور وطني
|
________________
رب اغفر لي وارحمني
|
|