هل هي فتاة سيئة السمعه ( يوجد استفتاء )

أتت الام الى ابنتها ووجها يتهلل بالبشر تكاد اساريره ان تنطق فرحا وقالت بنيتي لقد جاء فلان وابنه لخطبتك
الجم الفرح الفتاة واخرس لسانها ونطقت عيناها ببريق السرور : الان سيتحقق حلمي ابني بيتا من السعادة واربي جيلاً يكون قطعة مني اربيه على ناظري يكون عونا لي في الدنيا وذخرا لي في الاخرة لم تبت تلك الليلة فهي لاتحتاج النوم بعد ان تحولت احلام نومها الى حقائق تداعب يقظتها
وافق ابوها على الخطبة وتمت الرؤيه الشرعية سر بها العريس وسرت به وابتدى الجميع يوزعون خطابات الدعوة لليلة الفرح الموعودة
ذهب العريس الى عملة اخبر بعض اصحابه بأنه سيتزوج ابنة فلان بارك له الجميع وفي اليوم التالي جاءاحد زملائه وقال له الله الله انت اذن ستتزوج الكاتبة الفلانية التي تكتب في المنتدى الفلاني نظر العريس الى زميله متعجباً عن من تتحدث وماهذا الكلام ؟
قال زميله خطيبتك كاتبه في منتدى بالاسم الفلاني ؟
قال وما ادراك ومن اعلمك ؟
قال اختي تعرفها واسرت لها بذلك ؟
وهي تكتب باسم مستعار
اتريد ان نفتح المنتدى لنشاهد مواضيع خطيبتك ؟
قال العريس والعرق يتصبب ولما لا ؟
فتح الزميل المنتدى استخرج بالبحث جميع مواضيعها
ثم بدأ الاثنان في التصفح
فهاهي ترد على فلان وتشكر فلان وتتناقش مع فلان وتضحك من طرفة فلان
وهذا فلان يمدح ماتكتب ويثني على ماتقدم وهي ترد عليه بالثناء والشكر
احمر وجه الخطيب وخرج من المكتب واتصل ببيت خطيبته وقال لامها هل تسمحين لي ان اكلم خطيبتي ؟
قالت امها لامانع .. اخذت البنت الهاتف وقلبها يخفق ويداها ترتجفان تخشى من سماع الكلام المعسول او ان لاتملك القدرة على الرد وهو يحدثها عن بيت المستقبل ؟
لكنه فاجاءها بسؤال واحد
هل انتي الكاتبة الفلانية في المنتدى الفلاني ؟
قالت نعم انا هي
قاطع حديثها وقال اسف انا لا اتزوج فتاة نت
وأطبق السماعة
حالة قد تمر يوما ما على فتى او فتاة
فما موقفكم ؟
- 1 -
ماهي نظرتكم الى بت النت ( كما يطلق عليها ) واقصد بها الفتاة التي تستخدم الانترنت؟
- 2 -
هل يعني دخول الفتاة الى الانترنت ،،، والمنتديات خاصة ومخاطبة الجنس الاخر من خلال المواضيع والمشاركات ،،،، انها فتاة سيئة ؟
- 3 -
بنظركم ،، هل كل فتاة تستخدم النت لابد أن يكون لها صديق ؟
- 4 -
ترى ماهي بنظركم الحدود التي يجب أن تقف عندها الفتاة ،، حتى لايسيء استخدامها للنت اخلاقها ؟
- 5 -
ماهو الخط الاحمر الذي يجب ان تقف عنده الفتاة وتقول للانترنت
وداعاً ؟
- 6 -
انت كشاب تستخدم النت وتكتب بمنتديات ،، هل تسمح بمن تعولهم من زوجة او اخت او ابنة ان يستخدموا النت تحت اشرافك او بدون اشراف او تمنعهم ؟
_7_
هل ينطبق هذا الكلام ايضا على ولد النت يعني لو عكسنا المشهد هل ترتضي الفتاه ان تتزوج ولد النت ؟

الرجاء المشاركة والتفاعل من الكل
ولكم الشكر من قبل ومن بعد

الموضوع منقول من الفيس بوك مع بعض التصرف بعد الاستئذان من كاتبه ( صديق )

الموضوع ده لو اتفرتق حيبقي زي السبحة الاتقطعت في الضلمة.
لو جوك المختصين ابشرك شهرين ما تمرقي من جوا البوست ده
الكلام لو كتر اعملي رايحة...نصيحة اسفيرية
تحياتي

أها ابشرك واطمنك انا من هسه رايحه
انا قلت استفتاء يعني استطلاعات وكده زي البنشروها فى الجرائد والمجلات
كل زول عاوز يرد يتخيل نفسهفي مقابلة شخصيه وكده
أنا ماقلت تعالوا ناقشوني ( وش برجف من الخوف )

الاخ العزيزقمر
مشكور بالجد على نصيحتك بس ماوريتنا رائك في الموضوع شنو
في انتظارك

Quote: هل يعني دخول الفتاة الى الانترنت ،،، والمنتديات خاصة ومخاطبة الجنس الاخر من خلال المواضيع والمشاركات ،،،، انها فتاة سيئة ؟ - 3 - بنظركم ،، هل كل فتاة تستخدم النت لابد أن يكون لها صديق ؟ - 4 - ترى ماهي بنظركم الحدود التي يجب أن تقف عندها الفتاة ،، حتى لايسيء استخدامها للنت اخلاقها ؟ - 5 - ماهو الخط الاحمر الذي يجب ان تقف عنده الفتاة وتقول للانترنت وداعاً ؟ - 6 - انت كشاب تستخدم النت وتكتب بمنتديات ،، هل تسمح بمن تعولهم من زوجة او اخت او ابنة ان يستخدموا النت تحت اشرافك او بدون اشراف او تمنعهم ؟ _7_ هل ينطبق هذا الكلام ايضا على ولد النت يعني لو عكسنا المشهد هل ترتضي الفتاه ان تتزوج ولد النت ؟

اولا اسمحي لي أن اهنئك على هذا الاختيار الموفق
ولك مني تحيه خالصه
اما عن تساؤلاتك:-
وهل نعيب الفتاة التي تخالط الجنس الاخر وتحاوره وتناقشه مباشرة؟
وهل يحق لنا أن نضع خط احمر لاخواتنا اللائ تربينا معنا؟
اذا كان النت يعيب الفتاة يجب أن يعيب الشاب ايضا لأن الاوضاع متبادله
وعيب الفتاة إن وجد فهو من عيب الشاب الاصلا موجود
لاننكر أن هنالك مخالفات إن جاز لنا تسميتها هكذا ولكن هذه الاشياء لاتعمم
كما أن هذه المخالفان موجوده بالنت وعدمو

مودتي

العزيز احمد العربي تصدق قبل ماترد بدقائق كنت بتفرج في فطوركم صور جميله بالجد
شكرا على كلماتك ولطفك وذوقك
كلامك فيه واقعيه ومنطق مقبول
فعلا فلماذا في المجتمع نخليها تخالط وتناقش وتحاور ونجي نقول ليها النت عيب او حتى نستغرب مساجلاتها الانترنتيه او عندما تقدم لك صديق او صديقه عرفتهم من خلاله
وتاتي الطامه الكبرى لو تقدم صديق لخطبتها وحين التعارف يتضح لهم ان الفتاه تعرفت عليه من خلال الانترنت فهنا تبدأ القيل والقال
دمت على الطله

v nice


good night

وجن

تحياتي

إستوقفتني الكلمات : بنت النت و ولد النت
و تبادرت إلى ذهني مباشرة كلمات أخرى ترتبط بالولد و البنت تصب في خانة إلصاق التهم و النعوت السيئة التي يتبرأ منها المجتمع.

و لكن

في إعتقادي الجازم بأن ولوج البنت عالم النت و الرد على هذا و الإستمتاع بكتابة فلان و المزح مع علان لا ينتقص من قدرها مثقال خردل من سمعة أو أخلاق.

للأسف يا وجن معظم الرجال يجيزون لأنفسهم ما يحرمونه على الإناث ، فقد لا يرضى الرجل ( بفتاة نت ) في حين أن الماسنجر يئن من رسائله و إيميله يرزح تحت وابل من الرسائل .

إنها المعايير المزدوجة

لا أظن أن فتاة محترمة قد تستغل النت فيما يخدش الحياء أو ينتقص من قدرها لذا يجب أن لا يخشى الرجال من فتيات النت ، إن كانت تكتب بإسم مستعار أو بإسمها الحقيقي فليس هناك فتاة مستعدة أن تلوث سمعتها عبر وسيلة يمكن أن يتم إكتشاف شخصيتها فيها بسهولة

دمت

Quote: إستوقفتني الكلمات : بنت النت و ولد النت

العزيز / أبا جهينة

ومن قبله (وجن) , البت والولد ما ولدهم النت عشان ينسبوا ليهو
البت والولد أولاد بيتهم وبيئتهم ومجتمعهم , النت أصلاً ماخرب ولا أصلح زول

ده جزء من ملتقيات الحياة زي المدارس والجامعات والمواصلات
ذات البشر بخيرهم وشرهم تلاقوا عنده
بس القضية إنو فيه بعد غير مرئي ممكن يجمل القبيح ويفسد الجميل
وده نتاج البعد الإفتراضي غير المرئي ,..

يعني كجزء من عوامل التفاعل في الحياة إمكانية التزييف فيه أكبر
عشان كده بنشكو من فلان في الحقيقة زول كويس , بس ماعارفينو في النت مالو
وفلان ده بالله في النت عامل لينا فيها أبو الأخلاق مع إنو في الحقيقة يااه

أها ده البعد الإسفيري المرتكز على :
تكلم حتى أراك

والإعتماد عليهو مجحف ومزيف للحقيقة ..

سمعة الفتاة لا تسوء لمجرد التفاعل مع الآخرين والتحاور معهم
عبر الأسافير , إلا أننا كمجتمع (يتوهم) أن العفة في الإنغلاق

(ماحامت على جيرانا)
و(مافي راجل شافا )

يعني زيارة الجار وشوفة الناس ليها ساي (سبة)
وتقليل منها ..

والسودانيون ليسوا كغيرهم في التعاطي مع النت
لأنهم (إختزلوا) فيه الحياة وجعلوه (مقياساً) وأداة حكم من خلال
التفاعل الإسفيري , ..
وده تفاعل لا يعتد به , لأنه جعل همهم الأكبر تجميل صورتهم بداخله
حتى ولو على حساب صورتهم الحقيقية خارجه ..

ونسوا أن الدنيا أوسع من هذه الشاشة التي تجمعهم ببضعة آلاف في
محيط مليوني في الحقيقة..

عشان كده من الخطر تثبيت المفهوم ده
(بت النت) أو (ود النت)
أو جعله مرجعية للتقييم ..

الأستاذ كمال

Quote: البت والولد ما ولدهم النت عشان ينسبوا ليهو البت والولد أولاد بيتهم وبيئتهم ومجتمعهم , النت أصلاً ماخرب ولا أصلح زول

لا فض فوك

و هذا ما جعلني أقف طويلا عند التسمية التي أتت بها الأخت وجن و جعلتني أرجع لتسميات مشابهة

و بالفعل :

Quote: عشان كده من الخطر تثبيت المفهوم ده (بت النت) أو (ود النت) أو جعله مرجعية للتقييم ..

دمتم

من الآخر كده يا وجن
أنا زوجتي وبنتي تدخلان النت وأشهد الله العلي العظيم أنني لم أفكر ولو لحظة أن اتعقبها
أو حتى أسألهن مجرد سؤال عن ماذا يفعلان في النت

ـــــــــــــــــــــــــــــــــــــ
أخاف على ابني ذي الاثني عشر عاما أكثر منهما

دا من اصلك الطيب ومعدنك الأصيل يا جعفر دا من حسن اختيارك لزوجتك ومن حسن تأديبك لرعيتك
تصدق انت ذكرتني الوالد ما كان في يوم الايام بخاف علينا ولا شغال بينا انا واختي كتير
لكن زيك كده جام قلقه على هذا الوحيد أخي قول لي ليه مش لانهم _ اخوي وولدك _ محتاجين وصايه لا ابدا بس لانكم بتعشموا فيهم زياده عن اللزوم
لانكم عاوزين تشوفوا فيهم أحلامكم الما إتحققت عاوزين تشوفوا فيهم نفسكم بإختصار شديد عاوزين تشوفوهم أحسن منكم فمن هنا خوفكم عليهم بزيد
نصيحه منى صاحبو ..... صاحبو شديد رسل ليو ايميلات تشجعوا بيهن عشان يراسلك قول ليو والله الفيس بوك دا عالم جميل بالله أضيفني ياولد خلينا نشاغلك شويه
حاول تستميلو وتكسبه من غير ما تحسسه بخوفك الزائد عليه اوعى من محاولة الوصايه والكلام الكتير معاه بتخلي الشاب اما يتمرد أو تضعف شخصيته
شكرا على رائك يا فاضل

القسيمة حا بكتبوا فيها اسم العرسان كالتالي

العروس البكر الرشيد وصال النت سيرفر Sudan IT Inc. سودانيزاولاين ؟
العريس البكر الرشيد صلاح النت سيرفر Sudanese Home سودان هوم ؟


؟؟

اعتقد انه السيناريو شويه كده ما بشبهنا يا أم لمار.. في المجتمع السوداني، المواضيع اسهل وابسط من كده بكتير...

Quote: - 1 - ماهي نظرتكم الى بت النت ( كما يطلق عليها ) واقصد بها الفتاة التي تستخدم الانترنت؟ - 2 - هل يعني دخول الفتاة الى الانترنت ،،، والمنتديات خاصة ومخاطبة الجنس الاخر من خلال المواضيع والمشاركات ،،،، انها فتاة سيئة ؟ - 3 - بنظركم ،، هل كل فتاة تستخدم النت لابد أن يكون لها صديق ؟ - 4 - ترى ماهي بنظركم الحدود التي يجب أن تقف عندها الفتاة ،، حتى لايسيء استخدامها للنت اخلاقها ؟ - 5 - ماهو الخط الاحمر الذي يجب ان تقف عنده الفتاة وتقول للانترنت وداعاً ؟ - 6 - انت كشاب تستخدم النت وتكتب بمنتديات ،، هل تسمح بمن تعولهم من زوجة او اخت او ابنة ان يستخدموا النت تحت اشرافك او بدون اشراف او تمنعهم ؟ _7_ هل ينطبق هذا الكلام ايضا على ولد النت يعني لو عكسنا المشهد هل ترتضي الفتاه ان تتزوج ولد النت ؟

سلامات وجن

كل بناتى يستعملن النت .. و بكثرة فى الاجازة ..
وأعرف تماما انهن يقابلن هناك شباب زز وترفت على بعضهم
لا أعرف المواقع التى يكتبن فيها و لا أدخلها ( ربيناهن و فكيناهن) ..
فهل صارت بناتى بنات النت بدلا عن بنات معتصم الطاهر ؟
من يأتى بذكر ذلك لا أتشرف بنسبه ولا مصاهرته ..

2- تعرفت على بنات و نساء و زرتهن فى بيوتهن و صرن أخواتى و بناتى .. صلات دم قلمى ويراع .. أقوى من دم عروق ..

3- و لماذا لا يكون لفتاة أو امرأة صديق فى النت أو غيره .. السؤال تجريمى اولا ..

4- النت لا يفسد الأخلاق .. التربية ما تفسد .. النت كالكتاب و لكنه أسهل فقط ..

5- لا يجب ان تقول الفتاة للانترنت وداعا .. ولكن لبعض البشر و بعض المواقع وبعض المواضيع والا حبسناها و أتينا بالزنك ..

6- كل أهلى ( زوحة أبناء و بنات) يشاركون فى النت دون رقابة ....... خطأ أم صاح ..لن أراقبهم .. والحقيقة لن أستطيع ولا أريد ..

7- يمكن أن ترفض البنت الولد أو الولد البنت من كتاباته .. و يمكن أن تعرف أى شخص خلال كتاباته .. فيوما ما سينضح بمافيه مهما توارى ...

القصة دي ممكن تكون سعودية ما أظن ممكن تحصل عندنا

عفراء ظني .....ظني يا ختي نحن فينا بعض من هذا المجتمع السعودي بعض عقليه متحجره عفى عليها الدهر
اقول ليك حاجه انا بعرف زول بتلصص على خطيبته هي في السودان وهو في السعوديه يعني معناها بمشي وراها ناس دا قبل كده سمعتي بيه يختي
اها يتصل عليها الليله ليه لما مرقتي من بيتكم طرحتك كانت واقعه
داك منو اللاقاك اول مادخلتي الجامعه وسلم عليك
دا منو الوقف ليك بسيارتو واعتذرتي عن الركوب معاو
دا منو الجاكم الساعه كده في البيت وقعد معاكم للساعه كده
اها دا بالله ما مؤجر ليها بودي قارد عديل كده
اها وابشرك ربك نجده وفسخت الخطوبه وامثاله موجودين وان اختلفت اللونيه
دمت يا غاليه

العزيزة وجن,,,

رمضان كريم,,,تقبل الله منا,,,



بصراحة المفروض العروس تكون فرحت انه الزول ده طلع من حياتها

لانه اي شاب بفكر بالطريقة المتخلفة دي مخه متجمد وذو افق ضيق ومحتاج انسانه تشبه كده يتزوجها ,,,

لكم دينكم ولي دين.

وفي النهاية رجاحة العقل هي الفيصل,,,

أي زول ذو عقل راجح مسئول عن تصرفاته سواء في النت ولا في الواقع.

والرشيد من يستطيع الموازنة.

أما المراهقون والاطفال اكيد مفروض يكون عليهم مراقبة من الاهل,,,وده لحمايتم,,ولانهم لسه في طور النمو,,,نمو الشخصية,,,ونمو الهرمونات.:).

وانا شخصيا شايفة المابرضى يقول كلام بلسانه في الواقع.
مفروض ما يرضي يقولوا في النت.

يعني لا يعقل تقول لي معليش يابتي ده كلام ما بقدر اقوله قدامك.
لكن تكون قادر تكتبوا لي اقراه.


في النهاية,,,
أن تمنح شخص حق العبور الي خصوصياتك باختيارك سواء على النت أو الواقع هو حريةمكفولة مع
تحمل كافة الاسقاطات والنتائج.


لك ودي ومحبتي.

بت اختي وجن
تحياتي

يا جماعة الخير
برااحه على الزوله دي !!

برجع بعد ساعتين لي الموضوع

حاشاهن يا ختي من سؤ السمعة ؛ انا كأم يغيظني النت في حالة واحدة انو يشغل هم/ن من الدراسة والامتحانات عشان كدا
بعمل مشكلة غير كدا بالعكس اذا حسن استعماله بوسع المدارك وبخلي الشباب احصلوا مواضيع ما بقدرو اناقشوها مع الاهل
بس يفترض يكون في رقابة من بعيد لبعيد عشان ما يتغشوا !!! خاصة العصابات والغير مسؤولين ؟ يفترض نوعي اولادنا
وبناتنا !! اما بنات النت اريتن بنات السرور الفاهمات ..وبس

الاخت وجن شكرا علي الموضوع ماتمشي بعيد انا بعرف سوداني متخلف ورجعي ودلوكة كمان طلق زوجتة بعد 6 اشهر في اروبا والسبب انها بتاعد نت شوفوا في جهل اكثر من ذلك

سلام يا وجن
وتحايا ليك وللاسرة
العالم اليوم نوافذ يطل بعضها على بعض
ومن لايجيد استخدام الانترنت يعتبر اميا
ما قام به هذا الشاب بانهاء علاقته
يعتبر قمة التخلف والجهل
اما البنت فهي سعيدة ومحظوظة بان عرفت
ان هذا الجاهل لا يستحقها

Quote: ماهي نظرتكم الى بت النت

بت النت دي السمكة يا وجن.
معليش العكسة دي لقيتهاظريفة
قلت ما أفوتها...

شوفي والله نحن هنا تعرفنا على
أخوان وأخوات يسدو عين الشمس
ويكفي إننا عرفناك يا وجن...
دخول النت ليس باالأمر الذي يشين
السمعة لكن الحماقة كما يقولون
أعيت من يداويها...

سلامات يا وجـن

لا اتـوقـع ان يمـر اي شخـص عـبر هـذه النافـذة
ليدلو بدلو مخـالف لما اتفـق عـليه الجـميع هـنا

لا اتـوقـع ان يمـر اي شخـص عـبر هـذه النافـذة ليدلو بدلو مخـالف لما اتفـق عـليه الجـميع هـنا
اهلين يا الخير
بس كلامك دا ما بيأكد عدم وجودهم ( المعقدين ) في الارض كتير وان قلو وان تظاهروا بالديموقراطيه واعطاء الحريه لاهاليهم
فمنهم من يتلصص على زوجته وابنته واخته ليرى ماذا تفعل واين تدخل ومن تقابل
فليت من يأنس في نفسه الجرأه أن يأتي ويخبرنا مسوغات افعاله
أشكر كل من شارك في هذا الخيط وسا أعود اليكم بالمهله

وجن
السمح سمح ان زرعو قرض بيقوم قمح
عمرو الدهب ما بيصداء

مودتي

اها يا حاتم ما حامشي بعيد عندي قريبي في الفيس بوك يتكشم للماشه وللغاشيه ويتونس ويجدع في البسمات
ومحرم على اخواته الونسه وخت الصور وهو متجدع بصوروا مره بتكلم معي قال لي فلانه ديك لواحده قريبتنا فضحتنا فضيحه
قلت ليه كيف قال لي ماشفتي صوره ماليه الدنيا كيف اها شوف جنس دا بالله ما بزعل الزول
انت ماله زي ما بتمنع البنوت ديل خليك قدوه ليهن عشان ما يكون في تناقض لكن كمان تحجر على حريتن وانت محرر نفسك على الآخر دا مازاتو أس البلاوي ولا شنو
اهازولتك دي ربنا فكاها وهو بلقى شبهو
اها بالله الخواجيه كيف بالله ما مرتاحين من عقليتنا العربيه دي
تسلم على المرور

العزيزه اميمه تقبل الله منا ومنك صالح الاعمال وجعلنا واياك والسامعين من المقبولين
عزيزتي لقد قلت ووفيتى وكفيتى
وصح لسانك
وسلم يراعك الذي خط الدرر

وانا شخصيا شايفة المابرضى يقول كلام بلسانه في الواقع. مفروض ما يرضي يقولوا في النت
كلامك دا بالذات عجبني شديد وان كانت فكرته ايضا تصب في معظم كتابات الاخوه هنا يعني ياريت طالما الناس بتتعاف وتتلاقى ما اجي اسي لزول هنا
وبكره الاقيو بره واعتذر ليه عما بدر منى ونتصافى طيب ليه تقول لي كلام قدام الاف الخلائق وتجي تتراجع عنه لما نلتقى وجها لوجه
معليش انا طلعت بره الموضوع بس لان كلامك دا حرك فيني بعض الحاجات
سلمتى يا ست العقل

استاذي
اولا بناتك بنات معتصم الطاهر ربنا يخليهم ليكم ويخليك ليهم
ثانيا خليني اشكرك جدا لانك جاوبت على الاستفتاء بردود مستوفيه وجميله بارك الله فيك
وتسلم ويسلموا معارفك من الاذى
بالنسبه لكلامك انك ماتستطيع تراقب دخول وخروج المواقع تستطيع بشتى السبل والبرامج لكن ستقلب حياتهم وحياتك الى جحيم ولن تسلم من الاستغفال فجيد انك الحقتها بلا اريد
دمت لهذه الطله الجميله

تصدقي يا مريم لما نقلت الموضوع كنت عاوزه اشيل السيناريو دا عشان التعليق دا ما أسمعوا لكن اقول ليك شي بشبهنا ونص وخمسه انت ماعارفه حاجه ساي مش لان ابوك وزوجك ديموقراطيين ماشاء الله عيني بارده
معناها كل الناس زيهم امكن لو أديتك نماذج تقولي لي ديل حالات شاذه لكن لا والله طيب خليك من النت
هل تصدقي ان في اسر سودانيه لحدي الآن بتحرم على بناته تشيل موبايلات وماتقولي لي يمكن عشان البنات صغار بالعكس
واحده زميلتي في الجامعه عاقله وراشده ومتزنه جدا لدرجة العبط لكن تخيلي اخوها محرم عليها تشيل جوال مما أضطرها بعد خطوبته تشيلو بالدس عشان تقدر تكلم خطيبه وماقدرت تشيلو علنا الا بعد تزوجت
اخرى جارتي ابوها محرم عليها حتى الرد على تلفون المنزل الا بعد يرد هو وهي معلمة تحفيظ ملتزمه جدا والأب إمام مسجد وأبشرك عندها ثلاثة خطوط بعيد عن مرأى الوالد
أخرى من أسره معروفه في السودان لازلت أذكرها تماما كنا جلوس في الجامعه وهي من دفعه اصغر في نفس الكليه دق هاتفها تلفتت يمنه ويسرى واقفلت الهاتف بسرعه دون أن تنظر اليه حتى لاحقا
عرفت ان خطيبها اعطاها اياه حتى تتكلم معه لان الاسره محرمه عليها التلفون طيب الحالات الزي دي كان دخلو نت في بيوتم البحصل شنو القيامه حتقوم أكيد
مريم لو جلست أسرد لك مثل هذه القصص والتي مرت على شخصيا ستتعجبي جدا لكن من الصعب ان يعترف شخص في هذا المنبر بمثل تلك الافعال والا سوف تلصق له العديد من التهم وتنظر له الناس بمنظور آخر
دمت يا غاليه

بس بعد كده يا خدر نمشي نوثق القسيمه دي ونوريها ناس الحله الشمشارين ديل
كرهو البنات النت زاتو
القسمه ماعندك لكن طبعا رائك وصل اصلي لماحه وكده تسلم يا ملك

سمعة الفتاة لا تسوء لمجرد التفاعل مع الآخرين والتحاور معهم عبر الأسافير
, إلا أننا كمجتمع (يتوهم) أن العفة في الإنغلاق
عفارم عليك يا ود يا زين
صدقت والله نحن بتوهم بس
لكن شفتك زعلت شديد من بت النت تصدق كنت عاوزه اكتب عنوان البوست ( بت النت ) لكن تذكرت قبل فتره كان واحد منزل نفس العنوان دا
قال انه سافر من امريكا وجات واحده من معارفوا الانترنتيه تزوره في البيت وبعد داك مالقته وصت امه اول ماجاء امه قالت ليو جاتك بت النت هنا مالقتك
اها السبب التاني خفت من جنس هيجتك دي وبدلت العنوان عموما سعيك مشكور
ورائك مقدر باذن الله

Quote: صدقت والله نحن بتوهم بس لكن شفتك زعلت شديد من بت النت تصدق كنت عاوزه اكتب عنوان البوست ( بت النت )

عارفة بت النت ده مصطلح ماغريب لأنو بناتنا ذاتهم مرات بنقول عليهم :
بنات الداخليات ..!!

صفاتهم كذا وكدا ..

لما تستشري أي ظاهرة حتى لو واحد في المية نتبرى منهم وننسبهم للداخليات

أو مثلاً بنات الجامعات ..
ديل والله صفتهم كذا وكذا ..

وكتير من الحالات المشابهة والتسميات البنطلقا عشان نبرأ بنفسنا عن أي ظاهرة
إرتبطت بمكان أو وسيلة

يعني أنا أختي بتدخل النت _ لما أتكلم عن بت النت (أختي) معنية ولا لا ؟
وأختي بتقرأ في الجامعة وقاعدة في داخلية _ لما أخلف رجلي وأبدا أنظر في سوء
أخلاق بنات الداخليات - بكون بتكلم عن بنات الداخليات كلهم _ماعدا أختي
ليه ؟
(لأانو دي أختي بت أمي وأبوي - ماولدتها الداخلية ولا النت _ لكن الباقيات
بنات نت وداخليات وهكذا ) ..

U]للأسف يا وجن معظم الرجال يجيزون لأنفسهم ما يحرمونه على الإناث ، فقد لا يرضى الرجل ( بفتاة نت )
في حين أن الماسنجر يئن من رسائله و إيميله يرزح تحت وابل من الرسائل
بس يا ابو جهينه دا مربط الفرس من غير الرجل الذي يطلق نعوت مثل هذه
من غير الرجل الذي يجذب فتاة النت ويجعلها سيئه ان ساءت او هو من يسئ لها بتعامله معها بتلك النظره
لماذا تلك الازدواجيه كما قلت لماذا يحلل لنفسه ما يحرمها على اخته او امه او بنته او زوجته
وبعدين ليه اصلا تكون نظرة الرجل او المجتمع للفتاه نظره سيئة السمعه ليه يضع الف خط تحت دي بت بتكتب في المنتديات او تجلس على النت كثيرا
. أنا أجيبك ببساطه ومن وجهة نظري الشخصيه والتى على ثقه منها تماما _ كل إناء بمافيه ينضح _الفيك بدربو _ كلاً يرى الناس بعين طبعو.
يعني ببساطه كدا لو الزول ما بعمل الأعوج ما حيشوف من يعول ديل أبدا عوج
ولو هو انسان يثق في نفسه ويثق فيمن يعول ويثق في اسرته وتربيته فلن يخون تلك الثقه باطلاق مثل تلك النعوت وسوء الظنون ودمت يا فاضل

ميرسي حبيب نوره
اها بالله مادام ماعاوز تدينا رائك قول لينا بالله رائك في جيل النت شنو بالإشاره للبت لمارفي البرفائل
والتي أصبحت منافس قوي لامها وبصراحه كده بقيت مابقدر امسك الجهاز الا بعد تنوم

يا سلام يا وجن ...بالله فى احسن من معرفتك ده...
لكن الزول ده مسكين... ظلم نفسه وما اداها فرصه ....
نحن نرحب بيهو ...ونقول ليهو تعال بى وجهت نظرك ده ونقنعك بى كلامنا...
بس يكون هو ايجابى وبالوا طويل شويه....



*****
لكن......اكيييييد سعودى!!!
ولا شنو؟؟؟

زمان ياوجن البنات كانوا بلبسوا فساتين فوق الركبة
وباكمام كط
وتوب خفيف يظهر تفاصيل كل الجسد
وكان شى عادى ومافى زول بستنكر ولا بشنف ولا بقول البت دى ما كويسه
لكن الليلة حتى البت المحتشمة ما بتسلم من الانتقاد ممكن يقولوا عليها ياما تحت السواهى دواهى
بمعنى ان الانتقاد بهدف الانتقاص اصبح هو السمة السائدة فى مجتمعنا فى الزمن الحاضر
العلة فينا كمجتمع اصبح ينقاد للاقاويل والهمهمات والغمز واللمز
فى حين ان المسالة يجب الا تتعدى القناعة شخصية فى المقام الاول
حتى لو اجمع الكل على غير ماترى وتعتقد انت

الاخت وجن
من هم اولاد وبنات النت
هم نحنا واخوانا واخواتنا
واولادنا وبناتنا هذا الشخص
وللاسف به مركب نقص
يعني البنت التي تقابل الزملاء في
الجامعة وفي مكان العمل وفي الحلة هي الشريفة
والتي تقابلهم من خلال النت غير ذلك
انه المنطق الاعوج
اشكرك اختي على هذا الاختيار الرائع

دا بوست متزمزق جدا

يعني نحن قبال كدي طلبنا بتك دي لي ولدا لينا..بالرغم من انو ما شافها الا في النت

اها قصدك شنو بالكلام دا




إنتي راجية زول يأيد ليك الزول الفسخ خطوبتو هنا

دي صعبة شوية...

قصدي طلبكم مرفوض مرفوض مرفوض
التوقيع ام متعسفه ورجعيه وما بتخش النت نهائي

دي صعبة شوية...
ممكن أعرف صعبه ليه ماتقول لي عشان مافي بالعكس في وفي جدا
يا جماعه زول يطرح نفسه شهيد للبوست دا ما يخاف ما ح نسلخوا شديد ح نسلخوا بالدور واحد واحد ما حانتلمى عليه كلنا

المحترمة وجن
لي يوم شايف البوست وما دخلتوا الا حسي....بصراحة كدة انا ودالنت(زي بت النت)..انا هوايتي التعارف ومارستها في النت بصورة ما عادية(حبيت في النت وأتشوكشت برضوا, سعد قلبي في النت واتجرح برضو,فرحت في النت وبكيت برضو....الشي الوحيد ما عملتوا في النت هو الزواج....بالرغم ما عندي مانع}.............خلينا في المهم

Quote: - 1 -ماهي نظرتكم الى بت النت ( كما يطلق عليها ) واقصد بها الفتاة التي تستخدم الانترنت؟

ما حاجة اسمها بت الانترنت...هناك بت اتعرفت بيها في الأنترنت(زي بت اتعرفت بيها في حفلة ما بنسميها ببت الحفلة او بت اتعرفت بيها في الشارع ما بنسميها بت الشارع او بت اتعرفت بيها في بيت الجيران ما نسميها بت الجيران, او في محطة او سوق ........الخ...لذلك فالنظرة يجب ان لا تختلف.

Quote: - 2 -هل يعني دخول الفتاة الى الانترنت ،،، والمنتديات خاصة ومخاطبة الجنس الاخر من خلال المواضيع والمشاركات ،،،، انها فتاة سيئة ؟

من خلال تجاربي الشحصية...مشاركات المنتديات ليس مقياس عادل لتحديد فتاة سيئة من دونها.

Quote: - 3 -بنظركم ،، هل كل فتاة تستخدم النت لابد أن يكون لها صديق ؟

قصدك بالصديق حبيب ولا مجرد صديق..في الحالة الاولي لا ..والثانية نعم.

Quote: - 4 -ترى ماهي بنظركم الحدود التي يجب أن تقف عندها الفتاة ،، حتى لايسيء استخدامها للنت اخلاقها ؟ - 5 -ماهو الخط الاحمر الذي يجب ان تقف عنده الفتاة وتقول للانترنت وداعاً ؟

البنت هي التي تحدد خطوطها الحمراء وحدودها لانها ادري بنفسها.
نصيحة:لا تنجرفي بتيار الكلام الحلو فتمنحي الثقة الكاملة لقائلها:يجب ان تتعرفي جيدآ في الأول.

Quote: - 6 -انت كشاب تستخدم النت وتكتب بمنتديات ،، هل تسمح بمن تعولهم من زوجة او اخت او ابنة ان يستخدموا النت تحت اشرافك او بدون اشراف او تمنعهم ؟

نعم أسمح...الثقةأفضل أفضل وأقوي من المنع والمراقبة.

Quote: _7_هل ينطبق هذا الكلام ايضا على ولد النت يعني لو عكسنا المشهد هل ترتضي الفتاه ان تتزوج ولد النت ؟

نترك الأجابة لبنات البورد....وياريت نشوف أجابتك .
حكمة اليوم
النت ليس بالسوء الذي يعتبره البعض

العزيز ياسر
تحياتي

Quote: نحن قبال كدي طلبنا بتك دي لي ولدا لينا

اول بالتبادي بتنا دايره تقرا
نمرة اتنين لمار جاية استراليا!
اخيرا ما بنديكم ياخ شعيريتكم شوي !!

وجن

عمرة مقبولة وماتنسينا من الدعاء في الايام دي

Quote: قصدي طلبكم مرفوض مرفوض مرفوض التوقيع ام متعسفه ورجعيه وما بتخش النت نهائي

المازون الاسفيري جاهز ...حنعقد ليهم في الفيس بوك و الحفلة في البالتوك....ناس سودانيزاونلاين يمكن نتكرم عليهم بالجرتق.....أها وأم العروس ذاتها مامعزومة...غايتو كان عايزة تبارك لي بتها ...غايتو إلا تفتح بوست

Quote: ممكن أعرف صعبه ليه ماتقول لي عشان مافي بالعكس في وفي جدا يا جماعه زول يطرح نفسه شهيد للبوست دا ما يخاف ما ح نسلخوا شديد ح نسلخوا بالدور واحد واحد ما حانتلمى عليه كلنا

د عارفة زي واحد سكران جاء داخل البار (الانداية بي لغة زمان) وقام خطب ف الجماعة وقال ليهم يا جماعة الخمرة دي حرام




عزيزي خالد العبيد:

Quote: اول بالتبادي بتنا دايره تقرا

ونحن ولدنا ذاتو بعد ما شاف البت...قال داير يقرا

Quote: نمرة اتنين لمار جاية استراليا!

ولدنا ذاتو أمريكي و سوقو حااار...إنت قايلو باير ليكم

الله عليك يا خي اخجلتم تواضعنا
الله يخليك وتسلم ونحن اللى لينا عظيم الشرف بمعرفتك
لكن تصدق انا لسه مصره انه الزول دا سوداني ما سعودي

Quote: البت والولد أولاد بيتهم وبيئتهم ومجتمعهم , النت أصلاً ماخرب ولا أصلح زول ده جزء من ملتقيات الحياة زي المدارس والجامعات والمواصلات ذات البشر بخيرهم وشرهم تلاقوا عنده بس القضية إنو فيه بعد غير مرئي ممكن يجمل القبيح ويفسد الجميل وده نتاج البعد الإفتراضي غير المرئي ,.. يعني كجزء من عوامل التفاعل في الحياة إمكانية التزييف فيه أكبر عشان كده بنشكو من فلان في الحقيقة زول كويس , بس ماعارفينو في النت مالو وفلان ده بالله في النت عامل لينا فيها أبو الأخلاق مع إنو في الحقيقة يااه أها ده البعد الإسفيري المرتكز على : تكلم حتى أراك والإعتماد عليهو مجحف ومزيف للحقيقة .. سمعة الفتاة لا تسوء لمجرد التفاعل مع الآخرين والتحاور معهم عبر الأسافير , إلا أننا كمجتمع (يتوهم) أن العفة في الإنغلاق (ماحامت على جيرانا) و(مافي راجل شافا ) يعني زيارة الجار وشوفة الناس ليها ساي (سبة) وتقليل منها .. والسودانيون ليسوا كغيرهم في التعاطي مع النت لأنهم (إختزلوا) فيه الحياة وجعلوه (مقياساً) وأداة حكم من خلال التفاعل الإسفيري , .. وده تفاعل لا يعتد به , لأنه جعل همهم الأكبر تجميل صورتهم بداخله حتى ولو على حساب صورتهم الحقيقية خارجه .. ونسوا أن الدنيا أوسع من هذه الشاشة التي تجمعهم ببضعة آلاف في محيط مليوني في الحقيقة.. عشان كده من الخطر تثبيت المفهوم ده (بت النت) أو (ود النت) أو جعله مرجعية للتقييم ..

أبصم علي كلام الأخ كمال علي الزين بالعشرة.....كل سنة وإنتي وضيوفك طيبين يا وجن...وعيد سعيد..

راشد

..
.
سلام يا ام لمار

صديقك الكتب الموضوع اعتقد انه خيالى حبتين
ما ممكن يكون دا منطق واسلوب شخص يود الارتباط
فى جيل اليوم ..
او ان بطل القصة جاهل غير متعلم لا يعرف حتى النت
وواركان الحوار فى المنتديات ..


___________

فى عدم واقعية للظرف
وعيد سعيد ؛

أحبتي فردا فردا يؤسفني جدا ان اؤجل الرد عليكم قليلا نظرا لظروف سفر الى مكه المكرمه
التقيكم بعدها من هناك بإذن الله وادعو للجميع بتقبل القيام والصيام وان يجعلنا الله عنده من المقبولين والمغفور لهم بإذن الله
وعيدكم سعيد ومبارك مقدما للجميع
اترككم في حفظ الله ورعايته والى لقاء قريب بإذنه وتعالى دمتم ودامت ايامك بخير

اختى وجن
الموضوع القصد منو شنو
تتطيب خاطرها ومواساتها
انا شايف غلطها اكبر منه
يعنى هي قاعدة في البيت حارسة يعرسوها تقبل باي زول ما عندها راي
ما باقي لي علبة الصلصة بتزعل لمن يرجعوها لسيد الدكان بتتخت في الرف تاني بانتظار مشتري اخر
اما اخينا العريس مادام هي قبلت بيه بمجرد ماعارف سميتيها شنو حاجة شرعية كده اصبح هو مشتري فقط
والزبون دائما علي حق
وما بلوموا
وبعدين الحاجة البتسالي منها دي حاجة نسبية
بتعتمد علي عوامل كتيرة
وانا مامتخيل ناس قاعدين في اندايه وموضوع القعده
القعاد في الانداية حاجه كعبة ولا كويسة
اكيد الغالبية رايها حتكون احسن حته والما قعد في انداية ده زول متخلف
وربما يسرف البعض ويحلف انه اتربي في انداية وربما امه فاتحه اندايه
ويمكن تلقي نفس الزول يستعيذ من ناس الاندايه بكرة في مجلس اخر
يا اختي دايرة ناس النت يقولو ليك في النت انها سيئة اي هم ذاتهم سيئين
بتبالغي
ونرجع لصاحبتك دائما العرس بيحصل فيه صراع ارادات عندنا في السودان
ام العروس مع ام العريس و....و.......
وبيتفرتك باقل من كده
لو لاحظت اكيد زميله او صاحبه ده عنده تاثير كبير
وبعدين صاحبتها اللي افشت بسرها دي وصلته لاخوها باي معنى
بانها بت كويسة ولا بت سيئة وفي نظري هي الحدد نتيجة الاستطلاع بتاعك 100%
اذا غرضك نسبه مئوية
واذا عايزة تعرفي رائى
انا من عينة البيقولو اتربيت في بيت اندايه
ما ممكن اسمي اي حد عنده علاقة باندايه بالسوء
ودمتي يالاخت في النت

بالله لاتنسينا من صالح دعواتك يا وجن...
وكل سنه وانت بالف خير

الاخت وجن..
الزول ممكن يكون سودانى...جدا.
لكن مشكلتو مع النت عموما والالمام بيها؟
و لا..
فى تفكير ومواضيع خطيبته ال فى النت؟
كل سؤال ليهو معنى اكيد!!!

عليك نووووور يابت الحسين

Quote: اعتقد انه السيناريو شويه كده ما بشبهنا يا أم لمار.. في المجتمع السوداني، المواضيع اسهل وابسط من كده بكتير...

لا أعتقد أن لمثل هذه القصة وجود ... ولو حصلت حالة نادرة .....


شكرا وجن

Quote: تصدقي يا مريم لما نقلت الموضوع كنت عاوزه اشيل السيناريو دا عشان التعليق دا ما أسمعوا لكن اقول ليك شي بشبهنا ونص وخمسه انت ماعارفه حاجه ساي مش لان ابوك وزوجك ديموقراطيين ماشاء الله عيني بارده معناها كل الناس زيهم امكن لو أديتك نماذج تقولي لي ديل حالات شاذه لكن لا والله طيب خليك من النت هل تصدقي ان في اسر سودانيه لحدي الآن بتحرم على بناته تشيل موبايلات وماتقولي لي يمكن عشان البنات صغار بالعكس واحده زميلتي في الجامعه عاقله وراشده ومتزنه جدا لدرجة العبط لكن تخيلي اخوها محرم عليها تشيل جوال مما أضطرها بعد خطوبته تشيلو بالدس عشان تقدر تكلم خطيبه وماقدرت تشيلو علنا الا بعد تزوجت اخرى جارتي ابوها محرم عليها حتى الرد على تلفون المنزل الا بعد يرد هو وهي معلمة تحفيظ ملتزمه جدا والأب إمام مسجد وأبشرك عندها ثلاثة خطوط بعيد عن مرأى الوالد أخرى من أسره معروفه في السودان لازلت أذكرها تماما كنا جلوس في الجامعه وهي من دفعه اصغر في نفس الكليه دق هاتفها تلفتت يمنه ويسرى واقفلت الهاتف بسرعه دون أن تنظر اليه حتى لاحقا عرفت ان خطيبها اعطاها اياه حتى تتكلم معه لان الاسره محرمه عليها التلفون طيب الحالات الزي دي كان دخلو نت في بيوتم البحصل شنو القيامه حتقوم أكيد مريم لو جلست أسرد لك مثل هذه القصص والتي مرت على شخصيا ستتعجبي جدا لكن من الصعب ان يعترف شخص في هذا المنبر بمثل تلك الافعال والا سوف تلصق له العديد من التهم وتنظر له الناس بمنظور آخر دمت يا غاليه

والله يا وجن الكلام ده فعلا كلام ما طبيعي! معقول يكون في ناس كده في السودان... ! يمكن فعلا ما عارفه الامور كيف هناك.. شكرا ليك يا عزيزة، واتمنى ليك إقامة طيبة مع الاسرة..

وجن

والله بعض المرات النت يفسد اذا اساءت استخدامه

استعمال الماسنقر وبعد شوية قبلات بالماسنقر وبعد شوية ويب كاميرا


وبعد كدا تطبيق عملي في الواقع

المهم القصة تعتمد علي الشخصية ولد ام بنت ام خمس ضكر

Quote: بنت النت و ولد النت

يعنى يا وجن النت بقى بدل "الشوارع" بتاعتنا الزمان

تعرفى الموضوع زى ما قالت بت الحسين .. بعد النظرية "الشرعية" الشافوها بيها بعض .. حوامتها فى النت صعلكة عديل .. يعنى كان لقاها فى فطور البورداب بقطع رقبتا

كل سنة وإنتى طيبة

كل سنة وانتو طيبين
والعيد مبارك عليكم
وربنا يحقق أمانيكم
ودعيت ليكم في الحرم كلكم يعلم الله بس ربنا يتقبل

حمدا لله على السلامه
وربنا يقبل...
ومرحب بيك يا ست البيت..

.

قريبتي ام لمار
تحياتي

لي ابو لمار وكل الاهل بمكه

موضوع مفيد واكيد ساعود






حاولت الماسنجر ابي ما يفتح

وجن ازيك,

على فكره اسم لمار جميل جدا

اعتقد الفكره ده للمجتمع الخليجي المعقد و المنغلق و ليس مجتمعنا السوداني. البنت عندنا زي ما بتكلم ولد في النت بتكلم ولد في الجامعه و زي ما بتتناقش و ترد في النت برضه بتناقش في الندوات و حلقات النقاش يعني ما فرقت, اما البيحرموا النت على البنات و يبيحوه لنفسهم فزي ما قال ابو جهينه ديل ناس المعايير المزدوجه, تخريمه كده زمان اول ما النت و الايميل ظهروا بنت عمي مشت تدرس في لندن زميلها سالها من ايميلها قالت ليه ما عندي, قال ليها معقوله في زول ما عنده ايميل قالت ليه انا اهلي رسلوني ادرس ما رسلوني اعمل ايميلات, قالت لي كنت شايفه الايميل ده زي مشي الدسكو... :)

الأخت وجن ،، لك التحية

لم إستغرب كثيراَ من هذه القصة لأنها جزماَ حصلت فى السعودية وإستدللت على ذلك
من هذه الجزئية من القصة ( وبعد الرؤية الشرعية ) ،، فهذه ثقافتهم ونظرة
رجالهم على النساء ليس على النت فقط ولكن فى كل شىء ،، وقد تكونى قرأت مؤخراَ
عن الرجل الذى طلق زوجته لأنها أجرت عملية زائدة دودية بدون علمه ( وكانت تقيم
لدى أهلها )

فمن هذه الأوجه فإن أفعالهم لا يمكن أبداَ قياسها مع أى مجمتع فى جميع أنحاء العالم
فهم فى ذلك متفردون تماماَ ،، لذا تكثر عندهم الطلاقات والعنوسة والجرائم الجنسية
الغريبة جداَ وكذلك خذى فى إعتبارك بأن السعودية الدولة الوحيدة فى العالم التى
لا تسمح لنسائها سياقة السيارات .

وبعد ذلك ،،

أعتقد بأن إسئلة الإستفتاء الواردة هنا تصلح بتوجيهها إلى السعوديين فقط ،، رغم
علمى بأن هنالك إستثناءآت لا يمكن الإعتداد بها فى بقية المجتمعات .

مع التحية ،،

ماهر

وجن والمتداخلون الكرام

نعم يوجد بنات نت


دائما ما احاول ان اضع نفسي في مكان الطرف الاخر وظروفه لكي اعرف مصدر تصرفه وسلوكه ومن ثم يمكن لي ايجاد المبرر لهذا السلوك

كما اسلف بعض المتداخلون ترجيح ان الواقعة حصلت بالسعودية وما ادراك ما السعودية حيث الفصل التام بين الجنسين واستحالة قبول الصداقة بينهم او التحاور حتي
ولما جاءت هجمة الانترنت بكل عولمتها وسهولة الاتصال وجد الطرفين ضالتهم في التنفيس عن كبتهم بتلك الوسيلة كالاتي
كل شاب وفتاة يملك جهاز بغرفته ويدور الهمس وتبادل الصور والكلام بل والجنس عن بعد (ماتضحكوا )
وحدث خلل اخلاقي كبير في المجتمع واصبح الكل يخاف من تلك الافة

لذلك لا تستغربوا تصرف ذلك الشاب في ياتي من منطلق بيئته وعاداته


اماعندنا في السودان فهذه الظاهرة اعتقد انها لا تتجاوز فئات قليلة من المجتمع المتحفظ زيادة عن اللزوم