مِطرت بيك وغسلت إحساس الوجع ...

لا من عرفت الشوق والريد البجو

دقيت على وتر الرصانة الفيك دو

رتبت الحاني على نغيمات الفرح جواك بدو

ساسقت بي وتر الحنين ..

فوق مراسي النيل وأمواجو الهدو

ولقيت عيونك حاضنة لي صخب الحواضر وكل روعات البدو

ومشيت .. طريقك

سكة الشوق البعيدة وفرحة أنغامي الشدو ...

ومشيت معاك دربي المدوزن ليك ناي

ساقتني خطواتي القبيل سوت غناي

لامِن لقيتك طالعة من روعة النيل المعاي

وأنا في عيونك بحضن النيل الفيهو كم تاهت خطاي

وأنا يا حنيني بكون مسافر ليك في صبحي ومساي

وأنا بيك بغني كل غنوات الحنين يا فاردة لي شوقك جواي

يا حاضنة لي وهج الحنين منك طلع

يا حابسة لي القلب الحزين صابو الهلع

لامِن طلع ..

من بين مساماتك وقع

واتشتت كل الاحاسيس الفي القليب ..

فوق ساحة البت الدلع

وبديت ألقط كل احساسي الرجع

حاملك وجع ..

شفتك مع البرق الشلع

وشميت عبيرك في الولع

ومِطرت بيك ..

وغسلت إحساس الوجع

عروة ،،،

Quote: يا حاضنة لي وهج الحنين منك طلع وبديت ألقط كل احساسي الرجع حاملك وجع .. شفتك مع البرق الشلع وشميت عبيرك في الولع ومِطرت بيك .. وغسلت إحساس الوجع

بلل نداك من سماك
كل المساحات الوطن
عطرو فاح بانشراح
انشرا فوق الدار سكن
اتمدد الكون فى سكون
عريسا مجرتق بالحنن
برشو المفرش ليه سيرة
شالو المطرز بالحريرة
والفنجرية ام ضفيرة
صندلها المكنون ضريرة
وشبالها معطون من عبيرا
وجيت تبشر بالعديل
الفيهو خيرا
طلتك سمحة بالحيل اخوى عروة
النبى فيك كان تخلى بكرى يأرشف القصيده دى
كلمو اليخليها لينا
باقى تحت شديرتها فى غنا كتيير كان رايح
خلينا النلملو بعد الاؤشفة
وليك الامنيات المترفة

Quote: واتشتت كل الاحاسيس الفي القليب .. فوق ساحة البت الدلع

لملم أحاسيسك وهيم....فى لجة البحر البهيم...

وكتر حروفك زى ده النضم...خلينا نغرق فى الجمال إحساس نبيل..

أمطرت جد وجانا الجمال يهدر هدر....كلمات تعبر بأخلاص تفرح تسر..

شكرآ ياعروة...لقد أبدعت تسلم..تكفى أختنا سوما مرور..لك ولها التحية......

أسماء الجنيد يا زولة يا شاعرة وبس ..

ما هذه الحروف التي تضج في دواخلك ... وطناً

لغة تمازج دفقة الإحساس بالشوق العنيد

حبا يكابد لوعة المنفي بقافية القصيد

حياك يا وطنا تميّز باللغات ... هذا النشيد

:
:
ولمناسبة الأرشفة لا شك أن هذه القصيدة في طريقها لخور لأني كنت قد اخترت ( قطفتو نداكي من حرفاً بقالي ضنين )
ولكن هي الآن دعوة ورجاء للعزيز بكري لاستثناء هذه القصيدة من الخورنة
وجزيل الشكر سيدتي على لفت النظر
وتسلمي ليّا يا بت أمي

عروة ،،،

Quote: : ولمناسبة الأرشفة لا شك أن هذه القصيدة في طريقها لخور لأني كنت قد اخترت ( قطفتو نداكي من حرفاً بقالي ضنين ) ولكن هي الآن دعوة ورجاء للعزيز بكري لاستثناء هذه القصيدة من الخورنة وجزيل الشكر سيدتي على لفت النظر وتسلمي ليّا يا بت أمي عروة

تسلم يابا
لكن ياخوى من حقك برضو تطلب اكتر من عمل
وبكرى متأكده ما بقصر معاك
انا كان ممكن اشيل البوست ده وجرى امد قرعتى اشحد بكرى
لكن ما ممكن الا صاحب العمل نفسو
فيا اخى العزيز امشى لى دار بوست سوف نارشف والذى منو
ولصق ليهم القصيدة دى
خلينا النضمن سنتنا الجديده
اما كونك تقول تخاطب سيد الحوش من البكان ده ..
وحاتك لا بخبر ولا حاجة ولو فاضى يحوم بى جاى
الايام دى بكون مزنوووق الف
شكرا يا ود امى وتسلم لى انت يابا

Quote: تسلم يابا لكن ياخوى من حقك برضو تطلب اكتر من عمل وبكرى متأكده ما بقصر معاك

بت أهلي بت الجنيد

الشاعرة اسماء
تحية صباحية
تم إجراء اللازم
وفي انتظار آخر وصيتك
:
:
البسي الحرف المسافر من قصيدي عليك قلادة

وختي بينات المسام سر غناي

من سر كلامي عليك

وهج الحرف إزداد زيادة

نامت بهجة الضحكة البتحلم بي رؤاك

نامت علي حرف الوسادة

معاك رؤاي

بي حنيني البيك مسافر في خطاي

تعبت مشاويري

وانهد حيل حرف الكلام البيك نضم

عروة ،،،

عروة على موسى ...سلام

وحده الشعر هو الواحة التى تصد عنا الهجير

ووحده الشعر هو السحابة التى لا تكذب..

ووحده الشعر هو المطية التى نسافر بها الى

عوالم من ماضيات الزمن...

اكيد انك رجعت ورا

واكيد انك مبحلق

فى عيون ناسن من الزمن الحلو ونديان

لمن كانت الضحكة بتكفى البيت

وتطلع منو بالنفاج على الجيران

وللسابع...تصل مبلولة زى زهرات من الوديان

عليك الشوق:

شنو الفضّل من الزمن الخلى ومليان؟؟؟

===============================

نطمع فى وجودك المستمر مع ناس الزقازيق

لك الود

Quote: تكفى أختنا سوما مرور..لك ولها التحية

العزيز اخوى اسماعيل ود عباس
يعظم شانك يا فخرنا وتاج الراس
يعلا مقامك ان شاء الله وتلقى مرادك
ديمة مخدردروبنا محنة
الله يخدر دربك وين ما تقبل
وشكرا مارقة من الجوف
ولك التحية اضعافها
كل سنة وانت واهلك بخير وعافية

وغسلت إحساس الوجع

الله الله عليك يا عِروة يا مبدع

أنا جيت أفتش في الغناء
ولقيت جمال النم هنا
رتبت فيني الإنسجام
عطرت لحنك بالمنا

Quote: لملم أحاسيسك وهيم....فى لجة البحر البهيم... وكتر حروفك زى ده النضم...خلينا نغرق فى الجمال إحساس نبيل.. أمطرت جد وجانا الجمال يهدر هدر....كلمات تعبر بأخلاص تفرح تسر.. شكرآ ياعروة...لقد أبدعت تسلم..تكفى أختنا سوما مرور..لك ولها التحية......

العزيز اسماعيل عباس
سلام يا ذوق

عشان خاطر إحساسك العالي
اهدي لك هذه القصيدة العاجباني
:
:

مرقتْ ذات التَرَف البادي

من بينات رقراق الشوق الصادي

ومن دقات الوجع الشايفو قُصَادي

مرقتْ بي الليل

مرقتْ عادي

جَن جُنون البحر الشادي

إطَّقش مُوجو وطفح الوادي

إرتعشتْ ومضات البرق الهادي

غَمَّض جُفن القمر الهَجَّد نورو

وصحّى سُهادي

حنَّتْ سواقي الليل بتنادي

بي شوق التَرَف الفجَّ فؤادي

مرقتْ ست الخطو الحادي

مرقتْ عادي

عُيونا بَريق نِجيم الهجعة الضوا بوادي

لي ضيف الليل والساري منادي

خُطواتا ترتب خاطر القلب العادي

سِكَّاتا تشكِّل أبعاد المرسى الفيهو وسادي

ضمِيرا مَدار الحِجل اللّف عقولنا

في وهَج الساق السادي

صِديرها تَساب النيل الطافح غادي

الشايل غيظ دفقات الغيم

والوعد الباكر شادي

لِهيجها حنين وآهة شوق

ورويحها ترد الروح لي نسمة مطر الفجر النادي

مرقتْ عادي

مرقتْ .. وسكنّا الشوق لي خلَجات التَرَف البادي

وأنسلَّ دِريب لهيب الوجعة لي قيف الذكرى الأصبح زادي

مرقتْ عادي

عروة ،،،

تشكر يا عروة على الهدية...الرائعة...

حقيقة..الفضل يرجع لآخى الجميل هاشم..فى لفت نظرى لما تكتب...ووجدتك حقيقة ووجدتك مجاز...

Quote: ورويحها ترد الروح لي نسمة مطر الفجر النادي

للمطر معك حكاية...شميت معاك ريحة الدعاش...خلينا نتلفح حروفك من الرزاز...

شايلين الصبر..لمطر قادم..((((ما مطر قادم زميلنا الجميل الفى المنبر)))

خالص تقديرى ومودتى...

غايتو الواحد لقى ليه واحة
يمشي يخوزق ويعوفر بي هناك
ويجي (جم) يرتاح هنا

Quote: عليك الشوق: شنو الفضّل من الزمن الخلى ومليان؟؟؟

الصديق الحبيب
محمد صديق
سلام وشوق وتقدير

عندما يتمطى الشوق من ثبات الحاضر .. تكون الذكريات بكل شجونها شجرة نستفي إليهاللخلاص من بوح القلب ووجع الحرمان ..
وتصير كل الاسرار بوحاً..
والحرف مفتاح الذكرى..
والصحبة والأيام الخوالي هي الرؤى..
ان جادت..
فتشعل اوار اللحظة..
فيرجع الزمان القهقرى ..
وهتك عالم نعرفه..
وبيت للأحلام شيدناه...
انه بكاء الذكريات يا صديقى..
حين تلفنا الاشواق...وتثقل كواهلناحمولة البين ..
يغشانا الغيم في كل مواجع الاحساس إن احد من الرفاق أطل ...
لك الشوق يا إنسان..

عروة ،،،

Quote: أنا جيت أفتش في الغناء ولقيت جمال النم هنا رتبت فيني الإنسجام عطرت لحنك بالمنا

العزيز هاشم أحمد خلف الله
صباحك ورد
وأكيد جاي محمّل بكل ما هو جميل يا زول يا فنان ..
:
:
وصفت النفوس

وكان حنيني معاك إكوس

وبديت أكوس ...

لي طلة الزول الشموس

لي الراقي بي القول والجلوس

وأنا بي حداك مشدوه علي عطف البراح

يا طاعم القول المباح

لما الصدق ناغمني صاح

بي همسة الصمت الأباح

سِهر الحنين ... والشوق نواح ..

عروة ،،،

Quote: للمطر معك حكاية...شميت معاك ريحة الدعاش...خلينا نتلفح حروفك من الرزاز...

الراقي المرهف اسماعيل عباس
سلام وتقدير

نعم إنه المطر يفعل فينا فعل السحر ...
تجمع السحب
ورحيلها في وقت الضحى
ومضات البرق الهادي
واختفاء القمر خلف السحاب

وبرق القبلي طراني أم جملاً زايد
تضوي لموعو زي سن العزيزة أم قايد
رعدو الحامي إشخر فوق الليالي مقالد
إنزل خيرو سيلاً عم البلود بالفايد
:
:
إنه المطر وزمان البوح ...
:

همست ليك ساعة الصباح

والليل أباح

حزمة الهمس البتمرق من مسام الغيمة

شان تغسل حنينك لي الرجوع

وكتين بقت كل المسافات مسقية بي طعم الهجوع

ومشيت مسافة الهمسة الحنينا معاي

بروق وطلوع

مشيت .. همس الحنين جواي مات مصروع

بكت نجمة الصبح البِتوقد في طريقا شموع

توسّع لي مدارك الهمسة في جواي

بي الشغف الحنينو دموع

إلاّ همسك لي المطر

فاتن سنينو سبوع

بان جواك مسدار الحراز مطبوع

وكان حبوبة بي نضم الحنين جواها

توري صغارا...

ليه سيف الحراز في وجه الخريف مرفوع !!

وكانت عزة النفس الوراها الجوع

صمد الحراز واقف

وطفرت سيرتو تقدل من ربوع لي ربوع


عروة ،،،

Quote: غايتو الواحد لقى ليه واحة يمشي يخوزق ويعوفر بي هناك ويجي (جم) يرتاح هنا

العم زميل المهنة أحمد موسى
سلام يغشاك
خذ راحتك ياحبيب ...
واجعلها استراحة محارب أضناه السعي لوضع الأمور في نصابها ..
:
:
ويمين الله بدأت معافرتنا لهذا النظام من يوم 30/6/1989هـ وحتى الآن وحتى النصر ..
وقد تكون معافرتنا بشكل مختلف لم يألفه البعض ...
لكن لنا موقف ..
تعجبني هنا معافرة بن العم هشام هباني جداً ..
عموماً ألف مرحب بيك يا حبيب ونزلت سهلاً
وهذه واحدة من معافراتي تجدها هنا

متهم يا هذا ...

عروة ،،،

عسل الورد الخامل همسِك

وخدر الصوت المس أوتار العصب الهام بي مسِّك

أراجيف الطبل الدقَّ حنين في نص الليل

والطبع الحاد زي حد السيف

ورقيق كالموية

هداها الخدر الساكن فيك

الليل مسكون بي الوحدة وشوقي إليك

هزيت نصل الحرف المشتاق

ادّفق عِطر النيم رقراق

وكيف إسمح لي زول مشتاق

ومشلول من وخز الهمس الدفّاق

إفوق بي عِطرو

من خَدَرو الشاق

إحساس الفجر جواي وين راح

وبقيت في زمناً ما هو الليل

وما إظنو صباح

وقفت على ناصية وردو الخامل

وإحساس معدوم

غير زمنو الكامل

مولاي ...

الناس نامت وقفلت أبوابا

شالتنني الريح قدام شجر الغابة

والطير النائم في غصنو

مشتاق لي صباح

زقزق فرحان

ولا مِن حس بي الفجر الكاذب

غمض عينيهو ونام ..

وبقيت حيران

خشيت في سح الصوت النعسان

عبِّيت من وجع الخدر الفتّان

دخلتني ملامح المطر الما حقنوه بي ركعات زيف

المطر الرطَّب حرقة صيف

المطر الطيف

المطر الهدّ بويت الطين

بويت حاج أحمد ود الزين

وجات الناس من آخر الحلة

الخير مو جاك آود الزين

وطيبوا خاطرو

ما الخاطر الطيب ما بخبر شين

ولاحقني الصوت .. الرجعو معاي

فجتني جحافل ليل قسّاي

وبقيت مقسوم

ما بين إحساس الخدر النام جواي

وبين ترديد همسات لي صوت لولاي

حاولت أجمّع في لحظة

مقدار الخطوة البرجع بيها

لي أول نقطة من دفق الورد

لي شغف الحس السبق اليد

لي الفجر الطال ميعادو

ومستني خلاص من لُجّة ليل ممتد

ومن وهم الخدر الفات الحد

مستني خلاصو

يا ريق الروح الحاملو الورد

مستني خلاصو

عروة ،،،

أدمنت في ضلك مقيل

ووقفت في الليل البخلاج حسي بي طيفك وإشيل

وإسُوقِد حرفي وإتعذب بدور إلقاك معاه دليل

ولسة شايل خاطري بأملو الكسيح

وعشان أقدر أعيش طيفك

صادقت نجمات الصباح

الواقفة بي تل الأماني بتنتحب

منتظرة لو مطرك إصب

ويمر دعاشك لي القلب

معذورة يا نجمات صباحي

على الوقوف الطال مداه

ما إنت عارفة

زمن الرياح الجاية بي المطر الوفي

الراسمة بي قوس قزح صورة الخل الصفي

وأكيد كمان خبرانة ..

بي قصة حروف منسوجة هم ..

ببراكي يا وجعي القبيل ..

ببراكي في دربك وأقيف ..

تديني منك .. وأديك مني

حرفين حنان .. من آهة الريد الخفي

تمنع فواصلنا المروق ...

عروة ،،،

--وغلست احساس الوجع--
شكراجميلا
على الواحة الظليلة
ولسع الوجع
يغلغل فى الجوف
ومحكر

Quote: --وغلست احساس الوجع-- شكراجميلا على الواحة الظليلة ولسع الوجع يغلغل فى الجوف ومحكر

أناهيد كمال
واسمك المحتشد بكل روائع الجمال
سلام ومحبة

غريبة حكاية الوجع البشب تلويح

إناغم زولو نص الليل

وإتوسد غنا (الكاهلي) الحنين وفصيح :ـ

( برق القبلي طراني أم جمالا زايد

تضوي لموعو زي سن العزيزة أم قايد

رعدو الحامي يزبد فوق الليالي مقايد

ينزل خيرو سيلن عم البلود بي الفايد )

وغريبة حكاية الريدة البقت تجريح

تكوس الهمسة من ذاتاً

بقت مربوطة بي زولاً ضنين وشحيح

نسيمات العتامير الهاجة طول الليل

تجرجر في أساها كسيح

تولول .. صوت بكاها وحيح

مناها تقابل الالرفقة التشد وتريح ..

عروة ،،،