إبليس ينوى الرحيل عن السودان..

شوفوا حالنا أصبح كيف...الله يحفظنا برعايته ..



كان في غرفته، يلملم ملابسه في حقيبة إلى جانبه , وباقي متعلّقاته على المنضدة القريبة.

كانت استقالته موقّعة ومختومة حسب الأصول، وبجوارها تقبع ون-وى تيكت إلى جزيرة مالطة
كانت ملامح وجهه في تلك اللحظات تنطق بالحزن والكآبة والإحباط واليأس وقلّة الحيلة..

مع دهشة مزمنة ارتسمت عليه منذ فترة ليست بالقريبة مع الإعترافٍ بالعجز والفشل....
إبليس راحلٌ عن بلادنا إلى غير رجعة... فليفرح المؤمنون...

وين يا زول؟ ليه بتلم حاجاتك؟

ياراجل مالي ومالكم
قاعد عندكم، لي سنين لا شغله لا مشغله وقرّبت أموت من الجوع.. الاقي معاك سيجارة

ياخوي؟
لا نافع معاكم لا وسواس ولا خنّاس!!!ـ
كنت زمان بوسوس للواحدة تسيب ولدا يبكي لمن يتشرط وهي شغاله قطيعه مع جاراتها،
هسّة بقو برااااااااهم يرموا اولادهم في الكوشه أوّل مايتولدو
كنت أوسوس للواحد ينسى يسمّي الله قبل ماياكل، هسّة مافي زول لاقي شي ياكلو
ياراجل إذا أنا إبليس وتسمّمت ب البوش
كنت برضو بوسوس للعجوز يرمي ليهو كلمة على البنت وهي ماشية في الشارع،
بقو البنات يرمو الشباب بكلام أنا نفسي اخجل أقولو
إنتو عايزين ابليس انتو ؟! ـ
خلوني أبعد عنكم وارتاح !ـ
بقا عندكم فايض في الفساد يكفّي 30 سنة لقدّام، بقيت أخاف على نفسي منكم !!ـ
ياراجل مرّات بضطرّ أوسوس بالشقلوب
وأقول للمسؤول إرحم، وللحرامي كفايه خلّي شويّة للحراميّة اللي جايين بعدك
يعني إذا إنتو براكم بتعملوا كل البلاوي،
أنا إبليس اعمل شنو؟؟؟؟
أشتغل سواق ركشه يعني ولاّ أفتح محل حلاقة؟؟
ما باقي عليً غير أ بقي واعظ أو إمام جامع !ـ
ثمّ فتح إبليس الباب وانطلق خارجاً إلى غير رجعة

وصلتنى بالبريد ألألكترونى..من عزيز..عجبتنى وفردتها هنا للمشاركة وتعميم الفائدة....يجب علينا أن نرجع نعود لديننا وصلاتنا وتعوذنا من هذا اللعين...وان لا ننداح مع الملهيات والمسلسلات الغير هادفة التى هى بداية الضياع....

إسماعيل الحبيب ..

خلينا نقعد مع أنفسنا شويه ونعاين للضفة الثانية من واقعنا ..
ح نلقى أنفسنا في واقع مرير وها نحن ندفع ثمن سكوتنا ..
لابد أن تتشابك الأيادي الوطنية الشريفة من أجل هذا الوطن الحبيب ..
ولأجل أن لا نلقى أنفسنا مضطرين نقرأ مثل هذا الكلام ..

دمت ودام الوطن ..

Quote: لابد أن تتشابك الأيادي الوطنية الشريفة من أجل هذا الوطن الحبيب ..

أخى الحبيب معتصم......نعم هذا هو الحل الناجع..الوطن عندما يكون معافا يتعافى مواطنيه....نسأل الله ان يصلح حال البلاد من الفساد..

حيرنا إبليس.....ذاتو...

تقديرى يا أبو عمر...

*** يا سمعة شايفو جانا بى جاي لابس ليهو شال ( تمكنا ) قال أدو ليهو الجماعه هدية وداع .


شكرا يا سمعه على البوست .

حبينا الطيب الراجل الطيب...

Quote: يا سمعة شايفو جانا بى جاي لابس ليهو شال ( تمكنا ) قال أدو ليهو الجماعه هدية وداع .

ما تخلو...الجاكم ده جاى ترانزيت..لمالطا...أقروا المعوذتين...وادوهوا صوت...الله يهدو..

الشكر الجميل ليك..

Quote: إبليس ينوى الرحيل عن السودان..

صديق الموج دا ماشي فين

ذكرتني النكتة المسموعة ، البتقول إن إبليس سمع احد الجماعة يلعن فيه

بعد أن فعل منكر عظيم فرد عليه إبليس " والله العملتوا دا انا إبليس ما سويتوا"

نسأل الله أن يستر علينا أجمعين ويحفظنا وزريتنا وأهلنا وأحبابنا وأصحابنا من كل شر امين

ودي المقيم لسماعين

وتحياتي للجميع

الجميل..أخونا حمزاوى.....لك التحية....وشكرآ على المرور...

Quote: Quote: إبليس ينوى الرحيل عن السودان.. صديق الموج دا ماشي فين

ما تدخل فى السياسة لو سمحت...

Quote: نسأل الله أن يستر علينا أجمعين ويحفظنا وزريتنا وأهلنا وأحبابنا وأصحابنا من كل شر امين

اللهك آمين أخى العزيز سيف.......

شياطين ألأنس حيروا شياطين الجن وشاركوهم فى معايشهم....وديل اخطر...أخير داك بنتعوذ منه..ده تدقو وللا تقتلو.....
عندى أحترامك خاص...