كضـــــاب كضـــــاب .. يا البعيـــــــو يمين كضـــــاب ..

..
..

هذه المساحة محجوزة ليوم الاثنين 07/12/2009 ..

أها يا حبيبنا حميدة ...

بعد الأعلان عن انه يوم غدٍ دا عطلة رسمية يبقي بوست البعيو بتاعك دا عاوز حراسة ،،،،...

وانا من حراسه يافردة ..


** والله يكضب الشينة

Quote: ** والله يكضب الشينة

والشينة منكورة ...

والبيعو ( المؤتمر الوطني ) يتنكر لكل اتفاقياته وتعهداته بالتحول الديمقراطي ويعتقل
المتظاهرين وقادة شريك الحكم من الحركة الشعبية باقان وعرمان بل ووزير الدولة عباس جمعة ..

التحية لشعبنا المعلم.
والمجد والخلود لشهدائنا الأبرار.
والخزي والعار لعصابة الإنقاذ.

صباح الخير .. اليوم الاثنين ..
عنوان الاخبار تتصدرها مسيرة المعارضة التي قالت انها سلمية .. و شددت علي ذلك .. سلمية مية المية ..
السيناريو واضح جدا .. المعارضة تدعو الي مظاهرة سلمية .. و الحكومة تفرتك المظاهرة و تعتقل من تعتقل ..
لتصبح المسيرة السلمية في حد زاتها موضوع .. و تضيع القضية شمار في مرقة ..

..
..

عرمان قبضوه .. لا نطا في البوكس براهو ..
باقان فكوه .. لا ما فكوه .. فكووه .. لا ما فكووه .. فكووه و طار ..
اعتقال طاقم الجزيرة .. فكوا ناس الجزيرة .. مصادرة اشرطة ..

..
..

ســؤال يبحث عن اجابة من كل محللي القنوات الفضائية .. كيف يتظاهر شريك في الحكم علي الحكومة .. و لديه ممثلين في البرلمان ..
لماذا لم تمرر الحكومة قوانين الانتخابات و الاستفتاء بعد موافقتها عليها في اتفاقية السـلام ..
من قتل عنتر ..؟؟!!


الســودان عالم مضحك ..

عندي مشكلة مع الناس الكضابين .. خصوصا كضابين المايكات و الفلاشات ..
من حديثهم المفعم بالكثير من العبارات العنترية .. وفراغ المحتوى لديهم .. وميلهم الي الجانب العنتري الاستعراضي اكثر من مضمون القضية ..
دون كيشوت الحركة الشعبية الجديد الاخ ( باقان أموم ) .. مضحك لدرجة قف تأمل ..
استخدامه للغة يأتي من باب .. ( اذا بلغ الرضيع لنا فطاماً .... تخر له الجبابرة ساجدينا ) .. و كثير من مفردات ( انا الكلس .. انا الشافو خلو .. تمساح جزاير الكرد تقضي الغرض مامتلك ولد ) .. و هكذا ..
في الجانب الآخر .. ناس المؤتمر الوطني .. تستضيفهم القنوات الفضائية تسبقهم دال الدكتور .. و في النهاية ما تفهم اي كلمة من البتقال .. و لا يسعك ألا أن تقول .. ( يا استاذ الموضوع دا ليهو علاقة بالبلح ) .. !!

مريم الصادق المهدي .. ( ترتدي ثوب ابيض انيق ) .. تحدثت ان ( المظاهرة ) السلمية .. حتكون ( مسيرة ) سلمية .. وأكدت علي سلميتها ..
الناطق الرسمي بأسـم المؤتمر الوطني رد عليها بأن هناك فروق لغوية لا جدال فيها بين ( المظاهرة و المسيرة ) .. و الفرق ان دل علي شئ انما يدل علي ( تخبط المعارضة ) .. !!

مين كدا العوض ( لا أذكر اسمه ) .. مراسل قناة الجزيرة .. و بنفسيات السوداني العنترية .. مجهز نفسـه من الصباح لنقل اكبر ملحمة شعبية نضالية فاشستية رومانية علي الاطلاق ربما يتغنى بها ود الامين في مقبل الايام ..
المراسل المحترم .. جدع المهنية و اللغة العربية بعيد .. في جو مسـرحي من الهستيريا ودق الكاروشـة .. ( العوض اخوي اين انتم الآن .. تووووت تووووت توووت .. العوض عووووووك ) ..
نعم نعم معاك ..
و الله هم قالوا لينا نحن استخبارات عسكرية .. بعدين ودونا السلاح الطبي .. ( المذيع مقاطعا السلاح الطبي ..!! هل هناك مصابين ) .. العوض يرد ( لا لا ) .. بعدين ساقونا ناس الامن .. ودونا القسـم الاوسط ..
آي آي .. ادونا الاشرطة و المعدات .. دقونا لكن .. ما دقونا كلنا .. دقوا واحد بس .. ( المذيع : وش منطط عيونه ) .. و تووووشك .. من جانب آخر اجاز البرلمان العراقي البتاع المتشاكلين فيهو ليهم شهر ..

الناطق الرسـمي بأسـم الحركة الشعبية .. ( يرتدي قميص فراشات و بدلة بنية و ظاهر عليهو فاطر و شارب الجبنة ) .. و منجعص في استديو الجزيرة في قلب الخرطوم ..
تحدث عن اعتقال 150 من قيادات الحركة الشعبية قطاع الشمال .. و عن اغلاق مكتب الجزيرة في الخرطوم .. !! وأكد ان المظاهرة سلمية ..

و للمرة التانية .. ينطط المذيع عيونه .. و ينتقل الي اخبار العراق ..

مدير شـرطة ولاية الخرطوم ( فريق ) .. أكد علي الحق الدستوري للتظاهر السلمي .. ( حلو ) .. لكن بس الجماعة ديل ما عندهم ( تصريح مظاهرة ) ..
و للناس الما بتعرف ( تصريح مظاهرة ) .. يعني كدا ذي ( تصريح الحفلة ) .. تتعهد فيه بأنتهاء ( الحفلة ) في الوقت المحدد طبقا للقانون .. و عدم إزعاج الجيران .. و لو كنت ساكن في الخلا ما تزعج الخلا في حد زاته ..
المهم في النهاية تدفع ( 15 ألف ) بالقديم و لا بالجديد ما عارف ..
و عدم استخراج تصريح .. دقسـة تكتيكية من المعارضة .. و من شريك الحكومة كونه ما استعمل علاقاته و معارفه لاستخراج هذا التصريح ..
حاول مذيع قناة الجزيرة حل موضوع التصريح وديا .. لكن الفريق اعتذر و قال دا شغل ناس ( النيابة ) .. و أكد انه الشرطة السودانية ( أطال الله بقائها ) لم تعتقل طاقم الجزيرة .. شنو كدا ربما جهة أمنية آخرى ..

وتاني جاب سيرة العراق .. !!

الصــورة الاولى التي ظهرت للمظاهرة او المسيرة السلمية .. ظهر فيها حوالي 100 شخص مصابين بهستيريا المظاهرة او المسيرة السلمية يتقدم واحد لابس فنيلة سقط بنية اللون ..!!

انت ياحميدة مش في الدوام
ولا ماجز مع ناس السودان عشان التعداد
ولا هو شنو التسجيل نسيت
ود جيرانه قالوا ليها تعال سجل لينا قال ليهم
كرت لسه ما جاء من الفيفا
اها كم كم متابعين
عندكم الجزيرة في المكتب

كنجال ..
اخوك مدير كبير .. مركب لي شاشة بلازما 42 بوصة .. و جايب تسالي من الصباح عشان اتفرج في الفلم الهندي دا ..

الله يسعدك ياحميدة... ياهو ده المضحك المبكي

بالله واصل ستديو التحليل... اها دي الطوبة للقعدة او للفليق ماعارف

تحدث دون كيشوت الحركة الشعبية ( باقان أموم ) لقناة الجزيرة .. مستخدما عبارات ثورية أكد فيها انه يتحدث من داخل ( سجون النظام ) ..
في محاولة لاضفاء نوع من الاثارة علي الموضوع باستخدامه تعبير ( سجون النظام ) .. و لم تمضي اكثر من ثلاثة دقايق يعلن بعدها ان ( باقان ) قد خرج من ( سجون النظام ) ..
ليسجل بذلك ( اقصـر ) فترة اعتقال في الكرة الارضية .. مشابهة لقوون سلمان القرني بتاع الهلال السعودي في مرمي فريق التعاون حيث جاء الهدف بعد ثلاثة ثواني من صافرة الحكم ..
بعده تم الاتصال بالشاعر الجديد ياسـر عرمان .. و كان يلهث و يتفتف في التلفون ما قدرت للامانة افهم منه حاجة غير انه المظاهرة سلمية يا جدعان ..

أها أنا قبيل حضرت ليك لقاء مع الناطق الرسمي للشرطة
منو كدا ماعارف عبدالمجيد الطيب ...فريق شرطة
قال (بعضمة لسانه) ياسر عرمان ما إعتقلوه
ياسر (نط) في البوكس براه ...
المذيعة (بت اللئيمة) ما خلته قالت ليه :
طيب ناسنا بتوع الجزيرة هل سلموا أشرطتهم براهم للسلطات ؟؟؟
قال ليها قصة الجزيرة دي والله (يطرشني) ما سمعتها أرجع لي بعد 10 دقايق
قالت ليه : طيب في صحفيين تانيين إعتقلوهم برضو ماعارفهم
قال ليها قلت ليك ناس الجزيرة ديل ماعارفهم
أها الوكت ده جاء ليك شريط أحمر وعاجل
أعتقال طاقم الجزيرة ... قالت ليه أها ناسنا أعتقلوهم الآن لو ماعارف أدي أنت عرفت
قعد يقول ليها أضربي لي بعد 10 دقايق ولسان حاله بقول ليها عضيني في راسي تاني لو رفعت ليك!!!!

احمــد موسى ..
ما فهمته من عبد الباقي العوض ( الحمد لله اتذكرت اسـمه ) مراسل الجزيرة .. في اتصاله الثاني .. ان من اعتقلهم ( الاستخبارات العسكرية ) .. الناس القاعدين جنب السلاح الطبي .. بتاعين الجيش ..
طبعا الناس دي من الصباح بتكون متحفزة .. و حسها الامني عالي .. و لو جا ماري بيهم ( ود ابرق ) .. بشكلوا ليهو ادارة ..
اها يا عمك .. بعد ما تم إلقاء القبض .. و انتهت النشـوة البوليسية ما عرفوا يودوهم وين .. ( و الله ألا يحشـروهم في الدبابة بتاعتهم دي ) .. قاموا اتذكروا انه في مكتب تابع للامن في السلاح الطبي .. ساقوا الجماعة لهناك ..
الظاهر ناس الامن اسقط في يدهم .. ما عرفوا يتعاملوا مع الموقف دا .. طاااااخ درعوها في ناس الشرطة متمثلة في ( القسـم الاوسط ) .. و ناس القسـم ما فرزوهم مع ناس المظاهرة و لا كشة ناس العرقي بتاعت بالليل ..
قالوا ليهم اتخارجوا .. ( حسب رواية عبد الباقي العوض ) .. بس ( عبد الباقي العوض ) لاحظ بعين المراسل انه في القسـم في الاستاذ عثمان ميرغني .. قبل ما ينهره العسكري و يشيل كفتيرته و يتخارج ..
عبد الباقي لمن لقى المذيع ما متجاوب مع حماسة ما يدلي به .. قال ليهو دقونا .. ايوه و الله دقونا .. دقوكم وين يا راقل .. قال ليهو ما دقونا كلونا .. دقوا واحد بس .. و نحن راجعين ..

تتحدث الاوساط الفنية الآن عن ضرب المناضل الشاعر ( ياسـر عرمان ) .. في قســم الشرطة .. او في ( سجــون النظام ) علي حد زعط ( باقان ) ..
طبعا دي ما بتكون ذي ( دقة ) ناس عبد الباقي العوض .. مراسل الجزيرة .. لكن بتكون اشبه بـ( الشكلة ) يوم العرس و بالتحديد ( وكت الغدا و الصواني طالعة ) .. و بحضور كمية من الجكس و اشباه الجكس .. و الحجازين علي نفس الصعيد ..
كواريك .. و لا بأس ببعض البزاق .. و ألفاظ عنترية من شاكلة ( ادق بيك الواطــة .. اقد بيك السما .. لقد ولدتنا امهاتنا احرارا .. عاش ابو هاشم .. اشخت شخيت و اقيف بعيد ) ..
في الطرف الآخـر لعرمان .. بيكون في عسكري بليد .. زادت عنده جرعة الهاشمية .. و حبا يشارك في الوضع الملتهب دا .. و يعبر عن وجوده كأنسان سوداني يمتلك سلطة عسكري ممكن يقلب الحكومة في اي لحظة ..
بالمقابل بالنسبة لعرمان يحتاج الي الضرب في ( سجون النظام ) .. لانه بالواضح كدا .. مانديلا دا ما احسن منه في حاجة .. و لا هو اقل من جيفارا و عبد المنعم حسن ( الاخير دا صاحبي كان دقوه ناس القسم لانه ادا مرة كف في المواصلات ) ..
سيذهب العسكري اخر اليوم الي بيته الكائن محل كل الكائنات ليحكي لناس الحلة كيف ادا عرمان كف طاااااااااااااااخ .. و ربما يلجأ لاقرب سفارة دولة غربية بناء علي نصيحة كثير من الاخوة المناضلين .. و يستفيد من الوضع ..
و سيذهب عرمان لتأليف كتاب عن التعذيب في ( سجون النظام ) ..

دووول نفخـــوني يا بيه .. !!

Quote: ســؤال يبحث عن اجابة من كل محللي القنوات الفضائية .. كيف يتظاهر شريك في الحكم علي الحكومة .. و لديه ممثلين في البرلمان .. لماذا لم تمرر الحكومة قوانين الانتخابات و الاستفتاء بعد موافقتها عليها في اتفاقية السـلام .. من قتل عنتر ..؟؟!! الســودان عالم مضحك ..

عالم مضحك وبس؟

حميدة أخوي كل عام وأنت بخير ،، دي بلد ميؤس منها : فشلت الحكومة وفشل المعارضة،،
المعارضة بقت زي فريق المريخ : نصها لعيبة الهلال (باقان شريك الحكومة قائد الهجوم)،،
قال سياسة قال!!!

هذا لا يحدث إلا في السودان : شريك في الحكم وقائد في الإنتفاضة!!!!!!

الوضع الأن علي الارض ..
لا وجــود لمسببات الاحتقان الذي ادي الي هذه المســيرة علي طاولة النقاش .. ( و في الحالة دي طاولة النقاش هي طاولة مكتبي حيث اتناول الغداء المكون من سندوتش بتاع بيرغر و بطاطس و بيبسي مكنة ) ..
ما يتداول عبر الميديا .. ضرب ياسـر عرمان .. مظاهرات متفرقة .. احراق مكتب حزب المؤتمر في بحر الغزال .. و عدم ضرب باقان ( حظه كعب ) .. و اتجاه الي احتواء التوتر لكي لا يتحول اليوم الي يوم اسود آخر ..
في رأي الخاص ستتوجه جماهير العاصمة بعد قليل الي الاستماع الي ( عالم الرياضة ) ثم اخذ قيلولة قبل صلاة المغرب .. لكي يتمكنوا من فتح باب النقة و التنظير مع نسمات المساء الباردة ..
وغدا .. يحنسوا عرمان .. و يصرح الصادق ( بعد ان يحنن دقنه مساء هذا اليوم ) .. و يجيبوا سلفاكير بكرة في التلفزيون ويكون عامل فيها رايح ..

لدي صديق ماليزي كان يعيش في الخرطوم .. لا يعرف من العربية ألا كلمة واحدة يرددها كثيرا .. موضوع .. موضوع

من اخبار اخونا زهير الزناتي ( أحد المتحمسين للوضع ) .. ان دون كيشوت الحركة الشعبية السيد ( باقان ) .. قام بالاعتداء علي ضابط برتبة ( لواء ) في الشـرطة ..
كما يبدو لي ان اجـهزة الشرطة السودانية فوتت علي السيد ( باقان ) شرف ضربه في ( سجون النظام ) لتكتمل الدورة الزراعية النضالية لديه بالضرب ..
و بما انه الخبر لم يحدثنا عن رد فعل الضابط الذي برتبة ( لواء ) .. اتوقع انه الضابط يكون طلع ( غتيت ) و فوت علي السيد ( باقان ) فرصـة ضربه في ( سجون النظام ) ..
يعني بالعربي الفصيح ( لقد بالغ الضابط عديل كدا مع باقان ) ..
و اري في الأمـر نوع من العنصرية و التحيز للجزء الشمالي من السودان بإعطاء شرف الضرب الاخ ( عرمان ) و نقله للمستشفى و تصدر ذلك عناوين النشرات .. و تهميش السيد ( باقان ) من هذه الناحية ..
جابت ليها ضرب و خبت و لبع .. نندقا كلنا .. و بطلوا حركات ( الجلابة ) دي ..

بعد تهميش السيد ( باقان ) في مسألة الضرب أرى ان خيار الوحدة اصبح خيار غير جاذب ..

الآن بعد ترديد ولواكة موضوع ( عرمان - باقان ) .. ما بين ( سجون النظام - و الضرب - و الاعتداء ) .. جاء وقت البرقيات النارية من الاقاليم ..
طالعت في الصفحة الاولى بوست بعنوان ( مدني تشتعل ) .. و من باب الشمار اتصلت بصديقي مهند ببنك السودان ( فرع ود مدني - يقع علي شارع النيل ) .. و النتيجة ما في حاجة يا مان عادي ذي الزبادي ..
بس أكد لي انه في بتاع ( محل باسطة ) كان متشاكل مع ناس المحلية شكلة كبيرة الصباح .. و دار النقاش حول كيفية الاستفادة من ( شكلة بتاع الباسطة ) لخدمة الثورة .. و نعتبرها شرارة تولع مدني كلها ..
و لكي تعرف مدني بعدها بمدينة ( ثورة الباسطة ) .. كما هو حال مدينة ( لونغشوط - السويد ) .. التي تعرف بمدينة ( ثورة الطماطم ) ..
وعدني صديقي بمناقشـة الامر مع بتاع الباسطة .. و افادتي عبر ( الحمام الزاجل ) في الايام المقبلة .. و ختم حديثه بأن ارسل ليه موبايل E72 .. فلعنت بعدها الثورة و الشمار الخلاني اضرب ليهو ..

..
..

الكلمات و العبارات المستخدمة منذ صباح اليوم في محيط الشأن السوداني .. تكفي لاندلاع ( الثورة الفرنسـية ) من جديد ..
يمتاز ( الحلقــوم السوداني النضيف ) بزخـم وافر من العبارات الرنانة .. و يشهد لنا التاريخ السياسي و التاريخ الغنائي بكمية من الكلمات التحفة .. التي لم تغير واقع الحال منذ الاستقلال .. بل زادت هذا الشعب ( طرطرةً ) ..
اكثر ما اعجبني من عبارات مختارة بعناية هذا اليوم .. حديث ( باقان ) من القسـم الاوسط .. بأنه موجود الآن في ( سجون النظام ) .. و لاحظ معاي اخي المشاهد ( سجون ) ما سجن واحد ..
و في النهاية طلع قسـم شرطة مسموح ليهو فيهو انه يتصل بقناة فضائية اخبارية ..
السـؤال .. هل ( باقان ) ساذج و عبيط .. و لا بفتكر انه الشعب السوداني دا ساذج و عبيط .. ( المحصلة النهائية انه في سذاجة و عبط في الموضوع ) ..
يبدو لي ان ( باقان ) استفاد كثيرا من فترة اقامته في مصر و اتعلم ( الجرسـة و الهوايل ) من اولاد بمبة .. و اصبح يخدم بها خطه السياسي .. في ظل تخبط المؤتمر الوطني ..

..
..

اخونا ( عادل عبدالعاطي ) .. و كعادته في مثل هذه المواقف .. بشغل الـ Vibration بتاعه .. و يضبط النغمة علي اغنية Hit the road Jack بتاعت راي شارلس ..
بوســت تحفة يعيد له ذكريات ( عضـو فعال ) و بيان من حزب يتبناه بطريقة تنفر الآخرين منه .. و بعض المتفرقات باسماء المعتقلين في الداخل .. لتأكيد انه مازال علي صلة بارض الواقع ..

..
..

للإستماع لي راي شارلس .. اضغط هنا .. http://www.youtube.com/watch?v=Q8Tiz6INF7I

علي الطلاق بالتلاته.....

بوست موفق جنس وفيقة

حميده

يمين الكلام الكتير الماجايب همه ده

المالي المنبر

اخير منو دافوري في الجو الزي الدكوة ده....!!!!

تسلم ياعمك

Quote: و ربما يلجأ لاقرب سفارة دولة غربية بناء علي نصيحة كثير من الاخوة المناضلين

حزف للتكرار

حزف للتكرار

يلا يا جماعة انا واصل دولة ( الكويت ) الشقيقة هنا وراجع .. و ان شاء الله لو قابلت سعاد الصباح ممكن اتباحث ليكم معاها حول الدور الاقليمي الذي تلعبه دول المحور في مباراة كأس السودان القادمة ..
و عليكم الله لو في زول عارف كورة الهلال ممكن ينقلوها اليوم علي التلفزيون القومي .. يكلمنا .. و لا نامت أعين الرشاشة هارون دياب ..

..
..

ساعة كدا و بجيكم .. بس دوب ما الطيارة تقوم و تنزل .. لانه فوق ما في نت .. و كان نزلت و لقيت موضوع .. حقكم راح ..

..
..

شكرا جماهير الشعب السوداني كون انكم جعلتم ذلك ممكنا .. هسع الزول كان يومه دا ألا يقضيهو ( خنق ) ..

..
..

السـودان عالم من ( الترفيه ) ..


..
..

وشكرا ..

اجمل بوست في الوضع الكئيب ده ..

باقان زول عنتريات في الفارغة .... عملوا معاه ناس الجزيرة لقاء بعد اطلاق سراحة جاي يقول ناس المؤتمر الوطني تدخلوا لاطلاق سراحه بضمان شخصي هو و ياسر عرمان ... و طبعا زولك ما بفوت لقاء الا يمارس عنترياته المعهودة قال انه رفضوا ان يطلعوا من الحراسة الا اذا تم اطلاق سراح جميع المعتقلين ...

يا حميدة سؤال فني وين محمد عادل مناضل الامة الاصلاح و التجديد ما ظاهر

جريدة الرأي العام .. ذكرت في صفحاتها اليوم .. ترديد هتاف ( الباقي دقيقة سلفا بجيبا ) .. و هذا ان دل علي شئ انما يدل علي تلاحم جموع الفئات الرياضية مع المسيرة السلمية ..
و علي اتحاد الناشئين بقيادة الاخ ( ابوهريرة ) .. الانتباه لهذا الخلل في تربية النشأ ..

..
..

نشــرب قهوة .. و نجي نلت و نعجن ليكم ..

اختفت من السـودان في السنوات العشـرين الاخيرة ( عادة تبريم الشعر ) او ما يسمى ( بوب استايل ) ..
كانت بشـكل ما مرتبطة بالشيوعية و المظاهرات و تحرير الشعوب و شعب جامايكا المضطهد ..
برودة الاحداث و انشغال الناس في المعايش في السنوات المنصرمة ادي الي انقراض هذا الاستايل .. و اختفت النعرات التحريرية النضالية الفلسفية من خارطة الشارع السوداني ..
لكن كما يبدو لي ان اصحاب ( المسيرة السلمية ) .. ارادوا بعث الامل التحرري في الشعب السوداني .. من خلال ايجاد نماذج ( استايلات ) نضالية من زمن جيفارا ..
لتظهر في هذه المسيرة السلمية مرة آخرى حركات ( بوب استايل ) باعثة فينا روح الاخ و الصديق ( جيفارا ) و بعض من زكريات ( بوب مارلي ) و ربما ذهب بنا الخيال الي ( فالديراما ) لاعب كولمبيا الديمقراطية رمز التحرر من الواقع ..

..
..

نموذج رقم ( واحد ) .. تصوير ( ناجي الملك ) ..

ياخ الله يرضى عليك والله


العالم الفى السودان ديل فقعوا مراراتنا, والعجب السادة المناضلين


الله فى ياالوطن الله فى

لكل فعل ( موجة ) .. و لازم ناس تركب الموجة .. ( نضـرب مثل بمناضلي الكيبورد ) ..
الموجات نوعين .. في منها الـ Frequency modulation .. و دي تخصص اخونا ( انور كنج ) .. و بتشتغل بطريقة ( تضمين إزاحة التردد FSK ) ..
حيث يتم ازاحة الموضوع الرئيسي .. و الدخول في متاهات لقاءات الاخ ( انور كنج ) الصحفية .. و اسهامه عن طريق الفيديو في حركات التحرر السودانية و نيله عدة جوائز في مؤتمرات اليوم الواحد ..
و يدعم هذا الخط بدخول الاخت ( تراجي ) كظهير قشاش .. و محاولة خلق ( اوباما ) سوداني من الاخ ( انور كنج ) .. و لهذا الحد ( البلونة ) بتكون قربت تطرشق .. !!

نمـوذج رقم ( اتنين ) .. مثال على التضمين الترددي ..



يمثل الخط ( الاحمر ) الفعل الرئيسي ( المسيرة السلمية ) .. و يمثل الخط الازرق ( تقاطع الاخ انور كنج ) مع الحدث ..

..
..

Quote: و يمثل الخط الازرق ( تقاطع الاخ انور كنج ) مع الحدث .

حميده
يا ريت تفرد لينا جانب كده مطرف عشان تشرح الحته بتاعت تاثير اليو تيوب علي النشاط السياسي في السودان وامكانيات تغيير نظام الحكم بكلك واحده من ماوس الاخ انور اليوتيباوي

الناحية التانية هي لو ملاحظ معاي التواء الخط الازرق وتعرجه البائن بالعين المجرده ودلائل اللولوه الزرقاء وسط اللولوه الحمرا وابعاده الجغرافية من قضية التهميش الفطري والاحساس بالدقسه


نتابع

يا البعيــو ..

يآخي ما تحرك الكاميرا دي شوية في الاستديو دا وتجيب لينا رؤية تحليلة للجانب التاني كمان

ما يبقي استديو زي عالم الرياضة الزمان دا زمن مامون الطاهـر ...

وابعد لينا بالله من اخبار هوكي الجليد والكريكت .. كفانا صورة جيفارا الفوق دي

اب

Quote: يآخي ما تحرك الكاميرا دي شوية في الاستديو دا وتجيب لينا رؤية تحليلة للجانب التاني كمان

اها يا حيدر هاك B


الي قوي المعارضة، انتبهو للخطة B، او الانسحاب المنظم لنظام القتلة!

Quote: نجي نلت و نعجن ليكم

اكتر من كده



-----------------

لا يعجب حميدة الا حميدة
مثل جديد بدلا عن لا عاجبو العجب ولا الصيام في رجب عاجباوا نفسوا بس هو الوحيد العاقل والعراف و المفتح و الماداقس والمابتغشا و الواضح والصريح وغير مدعي النضال الاسفيري والباقين طير في الباقير فاستمعوا لحميدة يرحمكم الله

حمديدة


تحياتي


والله خليتني اضحك بي البوست دا اكثر من بوستات النكات





وشعارنا من اليوم (بوستات حميدة مش حا قدر تغمض عينيك)





ويا اساسي اقترح ادراج حميدة ضمن المرشحين لاوسكار البورد

ممكن اهدي يا ولدي حميدة

دي بمتسبة البلونة




اكثر حاجة ضحكتني سجون النظام دي
طيب موش انت في النظام دا ودي سجونك برضو؟

Quote: طيب موش انت في النظام دا ودي سجونك برضو؟

الحقيقة دايما حارة يا دكتورة

Quote: لا يعجب حميدة الا حميدة مثل جديد بدلا عن لا عاجبو العجب ولا الصيام في رجب عاجباوا نفسوا بس هو الوحيد العاقل والعراف و المفتح و الماداقس والمابتغشا و الواضح والصريح وغير مدعي النضال الاسفيري والباقين طير في الباقير فاستمعوا لحميدة يرحمكم الله

نازك الطيب ..
كونك تصنفي نفسـك طيرة .. و تحدد مجالك الجوي بالباقير .. دا حق كفله لك الدسـتور .. و انا بعفيك من التصريح ..
يا نازك يا بتي .. لمن الواحد يكتب حاجة ما في داعي الناس كلها تفهم ..
ذي ما فلان عنده رأيه .. بكتبه بلون أحمر .. بتلقي فلان التاني بكتب بقلم اخضـر و بسـطر الكراس ..
ساهل جدا اجي اكتب ذي كلامك الفارغ دا للناس .. بس كدا بتحول من طيرة باقيرية الي جدادة ..
و اظنك بتمري حاليا بالمرحلة دي ..
من ناحية اعجابي بنفسي .. حصل و الحمد لله .. لانه الفهم لو بالمستوى ( الليق ) دا .. ممكن اصنف نفسي احسن منك بكل ارتياح ..

..
..

امشــي يا بتي ناضلي بعيد عني .. شايفك بتنططي ليك في كم بوست كدا .. و ذي ما قال المثل .. المشتهي الحنيطير يطير .. !!

حميدة الــرِمة ..أو..الـرِمة حميدة..بالمناسبة ممكن تختار أى لقب من الاتنين
اها....
شايفك بقيت(محلل خطير فى المظاهرات)
كدى مسعول من الخير(خليت الافلام المصرية)
ولا لسه مواصل,,,
التوقيع/
....(واحد بيئة)...وبالسودانى(واحد معفن)

أنتو بكرى بجيب لينا الرمم دى من ياتو سلخانة...؟

Quote: أنتو بكرى بجيب لينا الرمم دى من ياتو سلخانة...؟

شكرا خالد بحر ..

Quote: و يصرح الصادق ( بعد ان يحنن دقنه مساء هذا اليوم )

ياخي عملت للمناتلين ديل ضغط وسكري.

_______________

تحياتي وكل عام وانت بخير.

حملت اخبار اليوم الاربعاء 09/10/2009 .. خبر تأجيل المظاهرة الرديفة .. الي وقت لاحق .. و في مصادر آخرى الي يوم الاثنين القادم ..
التوجيهات أتت من قيادات ( المعارضة ) .. بعد كمية التحانيس و الوعود التي رعاها الجانب ( الحكومي ) سـراً ..
و على ما اعتقد ستعسي الحكومة في الايام القليلة القادمة الي ( كلفتة ) القوانين في البرلمان و سرعة انجازها .. و كتل ( الدش ) في يد المعارضة ..
و تكون بذلك ( المعارضة ) الغبية .. قد اعطت فرصة ذهبية لحزب ( المؤتمر ) الحاكم ..

..
..

الفشــل في مدة اقل من 10 ايام .. في قيادة مسـيرة حتي النصر .. هو حصاد ( عرمان - باقان ) .. المحتمل ..

هيـئة علماء السـودان .. احســن هيئة او منظمة في العالم تركب ( الموجـة ) ..
الصـورة التخيلية لمثل هذه المنظمات .. عبارة عن اعمامك كبار في السن .. يرتدون جلابيات و ملافح و عبايات .. و يركبون لاندكروزرات فخمة ..
من مهامهم الرئيسية الدعوة الي ( صلاة الاستسقاء ) .. في حالة شح الامطار .. و هلال رمضان .. و هلال العيد .. و تهنئة العالم الاسلامي بيوم عرفة ..
و في بعض الاحيان الدعوة الي ( صلاة الكسـوف و الخسـوف ) .. و مقابلة رئيس الجمهورية عند استضافته لوفد من رابطة العالم الاسلامي .. او رعاية دورة تنشيطية لمنظمة الشباب الاسلامي في الصومال ..
لكن كما يبدو لي ان هيئة علماء السودان .. مددت رجلينها اكتر من لحافها .. و اصبحت تصدر فتاوى علي الموضة .. من باب ( انا افتي اذن انا موجود ) ..

..
..

هيئة علماء السودان .. تحــرم تبادل علوية و نفيسة ( عدة البيت ) .. لما يجلبه ذلك من فتنة بين المسلمين .. و لانه الزمخشـري قال في حديث ضعيف انه عدة البيت دي ممكن تشمل ( الزوج ) ..
هيئة علماء السودان .. تحـرم ارتداء البنات Women Underwear لانتشـار ظاهرة ( كاشف الرقم ) .. و توصي باللباس الوطني من نوع ( كابو ) ..
هيئة علماء السودان .. تدين سلوك القوات البنمية في خليج العقبة .. و تدين الحملة العالمية الصليبية علي المسلمين ..
هيئة علماء السودان .. تهنى الشعب السوداني بفوز الهلال السوداني علي النيل الحصاصيا من دولة موزمبيق الشقيقة ( و سا سا سا سا سا سا سا سا سا سا سادومبا ) ..
وفد من هيئة علماء السودان .. يزور مطعم ( جاد ) بشارع المطار .. ويؤكد علي متانة العلاقات السودانية المصرية .. و خصوصا في مجال ( المحشي و البتنجان ) ..

Quote: و خصوصا في مجال ( المحشي و البتنجان )

المصارى ديل اسوأ طباخين بيعملوا محشي وسلطة اسود ..

طبيخ بقرش ما بيعرفوهو والباميــة يعملوها كلها موية تاكلها بالمعلقة بس ..!

لكن بيظبطوا السمك صاح ..

عايــن صحن الكشري دا يا حميــدة ..

زول كاتب مقال وهو ما عارف كاتب لي شنو !!



السودان بلد المليون أزمة!


طارق الحميد

لا يهم من الذي يحاول إشعال طرف الثوب السوداني بعود الكبريت، الأهم من كل ذلك أن السودان اليوم كله مهدد، وقد يقول البعض إن الخطر الذي يحيق بالسودان ليس بجديد، وهذه هي الأزمة، حيث باتت أزمات السودان تولد أزمات متتالية.

والخوض في تفاصيل مطالب المعارضة السودانية، أو الفرقاء، سواء جنوبا أو شمالا، لن يقدم أو يؤخر في واقع الحال، لكن ما أبرز ما يحدث في السودان مؤخراً هو اتحاد الجميع، داخلياً وخارجياً، ضد الحكومة السودانية، وهذا أمر يشي بصعوبة قادم الأيام في الخرطوم، كما أنه دليل على سوء إدارة الأزمة السودانية من قبل النظام.


خارجياً هناك المحكمة الدولية، وقبل أيام توعد اوكامبو بملاحقة مجرمي الحرب في دارفور، ومن يتستر عليهم، وبالأمس خرج الجنوبيون والشماليون في مظاهرات وصفها النظام بأنها غير شرعية، على اعتبار أنه لم يرخص لها، والغريب أن النظام الذي يطالب بترخيص المظاهرات اليوم كان يقول أيام المسيرات التي عمت السودان بعد قرار المحكمة الدولية بملاحقة الرئيس السوداني بأنها كانت عفوية!

وهذا الحديث بالطبع ليس دعماً للمظاهرات التي خرجت قبل أمس، أو تأييداً لما قيل عن تنظيم مظاهرة مليونية، فمطالب المتظاهرين، أو ما وصف بمذكرة المسيرة المحظورة، أمر تعجيزي الآن، وإن كان مشروعاً، لأن تلك المطالب تعني عقداً سودانياً جديداً.

وما نراه اليوم في السودان، للأسف، ما هو إلا تشبث بالسلطة، والخوف كل الخوف أن ينهار المعبد على من فيه، فالجنوب قطع مشواراً في الانفصال، وهناك من يقول إن الانفصال قد وقع وبقي الإعلان عنه، وهناك أيضاً أزمة دارفور، وما يترتب عليها بحق النظام السوداني خارجياً، ناهيك عن معاناة الأبرياء، كما أن هناك الصراع بين حلفاء الأمس من النظام الحاكم نفسه، وبالطبع فإن ضحية كل ذلك هو السودان، ومواطنوه.

ولذا فعندما نقول إن أزمات السودان باتت تولد أزمات أخرى، فإن السبب يعود إلى سوء الإدارة من قبل النظام السوداني، والتشبث بالسلطة حتى ولو أدى ذلك إلى تقسيم البلاد، وفك لحمتها، وتعريضها إلى خطر ساحق، فحتى لو نجحت المعارضة بكل أشكالها في إسقاط النظام الحاكم في السودان، بحسب ما يقوله بعض مريدي النظام من أن الهدف الحقيقي من تلك المظاهرات والمطالب ليس إنجاز المتفق عليه بقدر ما هو إسقاط النظام الحاكم، فإن ذلك لن يقود إلى تحسن أوضاع السودان؛ فالانقلابات، والإطاحة بالرؤساء، أو الأنظمة لم تأتِ بجديد للسودان، بل زادت في تعقيد الأوضاع فيه.

محصلة الحديث أن السودان أهم من النظام الحاكم، وأمنه واستقراره أهم ممن لديهم أطماع في الحكم، فللأسف أن المتنافسين اليوم في السودان يتنافسون على بقايا دولة، لا على دولة متماسكة قوية، وبالتالي فإن لم تُغلّب لغة العقل، وتراعَ مصالح البلاد، وخصوصاً من قبل نظام البشير، فعلينا أن ننتظر كارثة عربية أخرى في بلد عزيز كان يعتبر في يوم من الأيام سلة الغذاء العربي!
*نقلاً عن "الشرق الاوسط" اللندنية

Quote: وأكد أن اجتماع قادة المعارضة قرر المواصلة في المواكب السلمية وعدم التراجع عنها. وذكر انهم اعتبروا الأحداث التي صاحبت الموكب «اعلاناً مبطناً لحال الطوارئ»، وأشار إلى مقتل شاب وإصابة آخر في التظاهرة.

الحديث اعلاه لـ دون كيشـوت الحركة الشعبية .. المناضل ( باقان ) ..
الشاب الذي قتل في حديث ( باقان ) لا وجود له في كل وسائل الاعلام المتابعة للاحداث حتي الآن ..
لكن كما يبدو لي ان المســيرة خطط لها ان تســير ( علي خطى الشهيد .. علي خطى الشهيد ) ..
تحتاج الي المعارضة الي ( كبش فداء ) .. دعول .. لتحمله علي الاعناق و تطوف به انحاء العاصمة علي طريقة ( القرشــي استايل ) .. مكررة بذلك امجاد هذا الشعب البطل ..
و النتيجة تسـلم قيادات المعارضة لـ ( كرسـي الحكم ) .. و منح ( الخروف ) كشك ناصية و مظلة ..

خرج المناضل الشاعر ( ياسر عرمان ) .. من بيته صبيحة يوم الاثنين 07/12/2009 ..
و يردد سرا .. ثورة حتي النصر .. ثورة حتي النصر .. و يتخيل العربية المرسيدس ذات العلمين .. تقوده الي وزارة ( الخارجية ) وزيرا ان شاء الله ( مفوضاً ) ..
استحضــر بانوراما النضال التي قرأ عنها .. قلب جميع الاحتمالات .. سوف احمل ( شهيد المسيرة ) و اسير في المقدمة ..
سأتلقى الضربات وآكلها في ( حناني ) .. و دقة تفوت و لا حد يموت .. و ما نيل المطالب بالتمني ..
لم يتوقع ( ياسر عرمان ) ان المسـيرة لن تتعدى الـ 25 شخص .. و ان شحنة التشنج التي اتى بها .. اكبر من طاقة المسـيرة السلمية ..
و عند انقضاء الزمن الاصلي .. و هتاف الجماهير ( باقي دقيقة سلفا بجيبا ) .. نطا المناضل ( ياسـر عرمان ) .. في اقرب عربية شرطة .. في حركة ادهشت حتي صديقه ( باقان ) ..
ليمنح المصوريين و الاعلاميين .. و القنوات الفضائية هذه الصورة التذكارية ..

في نص هذه ( المعمعة ) ..
فاز المريخ علي فريق ( ) جوبا .. مباراة تم تأجيلها بسبب الخوف من تفاقم الاوضاع .. كما كسب توقيع عدد من ( المواسـير ) في خانة الشباب ..
كما لعب الهلال ( سيد البلد ) .. مع حي العرب الانيق .. و استمتعت الجماهير بمباراة راقية .. فاز بها الهلال .. و ايضا قام بتحويل لاعب ( ماسورة تايواني ) من تمارين المريخ الي تمارين الهلال ( لاداء التجارب ) ..

من خلال ( مصـادري ) الخاصـة .. تحصلت علي ( فيديو ) نقل الاخ المناضل ( باقان ) الي ( القسـم الأوسـط بامدرمان ) .. او الي ( سـجون النظام ) كما صور لنا خيال الاخ ( باقان ) ..
من الملاحظ في الفلم ..
* هـدوء في الشـارع .. حيث قطعت عربة الشـرطة الطريق بكل سهولة .. ( حاول المصـور تصوير اي شئ ملفت للنظر في الشارع ولم يجد فأتجه الي من هم داخل العربة ) ..
* العدد داخل العربة لا يتجاوز الـ 15 شخص في احسن الاحوال ( حتي لو افترضنا انه في زول خاتي التاني في جيبه ) ..
* تظهر علي ( المعتقلين ) علامات ( الانبسـاط ) ما عارف ليه و الله ..
* يردد من في عربة الشـرطة .. كلمة ( حرية .. حرية ) .. و هي لمن لا يعلم معناها .. ( حاجة باردة كانت بتتباع زمان في قزازة كدا ) ..

المظاهرات .. و الاصطدام مع شـرطة مكافحة الشـغب ( الاحتياطي المركزي ) .. لا يخلو دايما من ( اصابات ) .. و معروف لدى الكثيرين من رواد الاستادات الرياضية العنف غير المبرر الذي تتعامل به هذه القوات ..
في مسـيرة اول امس السلمية .. توقع الجميع حدوث اصابات .. و تمنى البعض سـقوط قتلى ( شهداء ) .. و الترويج لذلك ( كمثال حديث الاخ باقان عن وجود قتيل ) ..
جهز كثير من ( المناتلين ) .. كميراتهم لتصوير الحدث التاريخي .. و باءت محاولات الجميع بتصوير ( اصابة مؤثرة ) بالفشـل الذريع .. فتموها ( موية ) و شوية شعارات ( اكتوبرية ) ..

..
..

اطرف اصابة ( مصـورة ) .. الظاهر كانت بسبب ( عضة ناموسة ) .. او ( بوسـة من حبيبة محوصة ) ..

Quote: كلمة ( حرية .. حرية ) .. و هي لمن لا يعلم معناها .. ( حاجة باردة كانت بتتباع زمان في قزازة كدا ) ..

والله لقيتك قديم قدم اتاريك حجارى ساكت .

النسخة الأصلية لبيان هيئة علماء السودان: تكفير كل من يقوم بمسيرات سلمية!!!

كوستاوي ..
قريت البوسـت بتاعك .. و الكلام محـير جدا .. و لو قدرت تتجاوز ( الكاروشـة ) بتاعت المرحلة دي ( المسيرة السلمية ) .. بتقرأ ما بين السـطور كلام خطير جدا ..
خصوصا حكاية ( حرام موالاة الكفار دي ) .. فيها كلام كتير ..
خلينا نخلص من المســرحية دي .. و نجي للبيان دا واحدة واحدة ..

..
..

شكرا كوستاوي ..

للمشــاركة في هذا البوسـت من خارج المنبر .. الرجاء مراسلتي علي [email protected] .. و المشاركة فقط للـ( منظراتية ) و رواد ( الاعمدة و اللساتك ) في امدرمان و الخرطوم و الخرطوم بحري ..
علي مشاهدينا في الاقاليم .. مراعاة فروق الشمشمرة ..

نرحب الصــور .. و الفيديو ..

!!!!!!!!!!!!!!

شكراً حميدة
شكراً خالد

التوقبع

واحدة بيئة معفنة جدادة
و كمان ما فاهمة حاجة في بوست العباقرة

Quote: واحدة بيئة معفنة جدادة و كمان ما فاهمة حاجة في بوست العباقرة

LooooooooooL

Quote: واحدة بيئة معفنة جدادة

نازيك ازيك ..
انا ما عارف ليه انتي مصــرة تحشــري نفسـك في البوست و تستعدي الناس بالطريقة الغبية دي ..
المنبر دا مفتوح .. تقري البوست عندك رد سلبي او ايجابي تكتبيهو .. بدون الدخول في الصراع النفسي بتاعك دا ..
ما تشتغلي بالحاجات كتير كدا .. اشتغلي بالله احسن ..

..
..

لقمان حسن همام .. التعجب فوق شنو .. اول مرة تشوف ليك زول بسـخر من وضع معين ..

وصلني عبر الايميل ..

Quote: سلام ياحميد اول حاجة شكرا لموضوعك المطروح في سودانيزاونلاين لانو اكتر موضوع ناقش الهرجلة الحاصلة بي نوع من الواقعية المضحكة والمستفزة في نفس الوقت, عارف انا الغايظني شنو انو كل القضية الان بقت عرمان المسكين دقوهو وهو المسكين كان عندو حصانة لكن ما اشتغلو بيهو ولا راعو ليهو , واموم من ديك وعيك لليلة ما ظهر ولا صرح ,, البيضحك بالجد انو الحركة الشعبية كل راس فيها شايت براهو , وناس ياسر عرمان لسا في ثقافة اركان النقاش في الجامعة , امس في تلفزيون النيل الازرق جايبن الصحفين ناس محمد لطيف وراشد ومامتذكرا الباقين بيناقشو في هذه الاحداث والله الكلام الكان داير زي الولدين الصغار الاتشاكلو ليهم في دافوري والناس بتحجز بينم وقال كدا سبدرات عملو معاهو مداخلة والله الراجل قرب يحلف طلاق ويقول ليهم قومو لفو من هنا بلا لمة بلا اتفاقية معاكم.... ودا كلو والناس المساكين الكل يوم زيتم بيطلع عشان يلقو حق العيش ضايعين فيهو ,, زمان في صحفي كدا قال المؤتمر الوطني والحركة الشعبية يختلفان والشعب السوداني شغال حجاز؟؟؟؟؟ كان بودي اكتب كلام افضل من كدا لكن كل الخلاني ارسل ليك هو موضوعك الراقي في نظري شكرا ليك وواصل علي كدا تحياتي سنادة

الثنائي المرح ( عرمان - باقان ) .. اتخارجوا من المســيرة السلمية بطريقة ( فنية ) .. ما برضـو يا جماعة هم اولاد ( شفوت ) و مقرمين ..
قالوا الحاجة ام الاختراع .. و مع ( الزنقة ) .. تحرش ( باقان ) بضابط شرطة برتبة لواء ( مسك التخين فيهم ) .. و طوالي الي القســم .. ( سجون النظام ) ..
و تلب الاخ ( عرمان ) .. لوحده ( ما شاء الله عيني باردة ) في عربة الشرطة ..
وكدا كان الاثنين اخلوا ساحة المسيرة من وجودهم .. و يا عمك نحن ناقصين دق و سك سك من العساكر الحاقدة دي ..
طبعا من الاول ما ظهر في المسيرة السلمية دي اي من ( قادة ) احزاب المعارضة .. الترابي بسبب كبر السن .. و الصادق المهدي بحتاج يحنن دقنه في فترة ما قبل الظهر ( كما اسلفنا ) ..
و الميرغني اساسا ( الزول دا الصحاهو من النوم منو ) .. و بقية الاحزاب الهلامية ( شيوعي - حق - بعث - مؤتمر سوداني ) مثلتها يافطات انيقة تدعو لحاجات ذي الحاجات بتاعت المظاهرات البجيبوها في التلفزيون ..
كانت المسيرة او المظاهرة امام البرلمان .. و عندما فك الثنائي المرح ( البيرك ) تشتت الجمع ..
ليجد أحد المواطنين نفســه وحيدا في مواجهة الشـرطة .. ( لا قادة و لا جماهير و لا عااااااااااااااااااع ) ..

نموذج رقم ( X ) .. المواطن المســـــــــــــــــــيرة ..

كامل التضامن مع المواطن المسيرة.

شكرا بشير .. علي تضامنك ..

القاضي العسكري الذي حكم علي الشهيـد مجـدي بالاعـدام.. ا...ه استلام مال مسروق!!

Quote: و لو جا ماري بيهم ( ود ابرق ) .. بشكلوا ليهو ادارة ..

أها دي ما بعرف يقولها أي زول..
أفصح أبن على قول عادل إمام.

في كثير من المسيرات ( السلمية ) .. يستعين الطرف المنظم للمسيرة بالشخصيات العامة المؤيدة لموقفه ( فنانين - ممثلين - صحفيين - الخ ) ..
في السـودان اصبحت فئة الصحفيين شغالة بقانون ( لكل من هب و دب ) .. احتشد عدد من الصحفيين المؤيدين للمسيرة .. غير من جاء لتغطية المسيرة ( عمل ) ..
لم تظهر فئة الفنانين .. امثال ود الامين .. و اب داوود في المسيرة .. نسبة لكبر سن الاول و وفاة الثاني .. و لم يظهر حتي حمادة بت او علوية جكس او الست غرزة ..
و من هنا نرفع صوت لوم الي اتحاد الفنانيين السودانيين .. و مؤسسة ( دار فلاح ) للغناء الشعبي .. و مركز شباب ( بحري ) .. عن هذا التقصير و التقاعس عن نصرة القضية ..
فئة الممثلين جاء تمثيلهم ( ضعيف ) .. بمشاركة المبدع و زميل المنبر الاخ ( طارق ) .. و كانت المشاركة تحت ظروف معينة تهدف الحفاظ علي الاخ المبدع ( طارق ) كثروة قومية ..
قام منظمي المسيرة بتهيئة بيئة نضالية ( خالية من المخاطر ) .. و احاطة الاستاذ بعدد من مناضلي الحركة الشعبية .. مع ترديد عدد من الاناشيد الحماسية .. و التلويح بالاعلام .. ( منها تلويح و منها يهببو الاستاذ ) ..
لتاتي مشاركة الاستاذ علي قدر الحدث .. و لكي يضيف بعداً آخر للمسيرة .. و لا نامت أعين الجبناء ..

..
..

نموذج رقم ( ما عارف و الله ) .. الاستاذ طارق في مسيرة حتي النصر ..

وكالات الاعلام اليوم .. و في خبر عاجل .. تتحدث عن اتفاق الحكومة و الحركة الشعبية علي تهدئة الوضع .. ( صافية لبن .. حليب يا إشطة ) ..
الاتفاق نتج عنه إلغاء مسيرة يوم الاثنين ( غداً ) .. و تجنيب المعارضة و الحركة الشعبية ( الشريك ) .. من اخفاق قد يؤدي بها الي مذبلة التاريخ ..
وسط تسـريب اخبار عن ( هجرة جماعية لأعضاء من المؤتمر الوطني الي ماليزيا ) انتشـرت وسط ( المغفلين النافعين ) .. لتوحي لمناصري الاحزاب المعارضة انه ( عملنا حاجة ) .. و خوفنا الحكومة ..
الاتفاق نص ايضا علي عودة اعضاء البرلمان ( الحركة الشعبية ) المقاطعين الي مقاعدهم .. و تحريك القوانين تحت قبة البرلمان لإجازتها ..
لم تذكر الاخبار اي مشاورات لشـريك الحكومة اجراها مع الاحزاب التي كانت تدعمه في المسيرة السلمية .. ( رأس برأس ) .. لا صادق و لا ترابي .. و لا نقد ..
سيتفرغ الشعب السوداني غداً الي مشاهدة مباراة القمة .. و ربما تحضرها الوزيرة تابيتا بطرس ( الحركة الشعبية ) .. بجانب نافع علي نافع ..

و ما في شمال بدون جنوب .. و ما في جنوب بدون شمال .. كلنا اخوان .. كلنا اخوان .. ( عبارات تقتضيها المرحلة ) ..

وتوتا توتا خلصت الحدودة

العزيز حميدة - تابعت هذا البوست الجميل من بداياته وكان بحق تعبير عماحدث فى الفترة السابقة فى البلاد.




تقبل تحياتى.

التعرض للاشياء الشخصية للآخرين لايجوز ..كون الصادق يحنن دقنو ام لايحننها
فهذا شأن شخصى يجب عدم التعرض اليه ...

هل يمانع صاحب البوست ان خاض الآخرين فى اموره الشخصيه ؟

Quote: هل يمانع صاحب البوست ان خاض الآخرين فى اموره الشخصيه ؟

لا يمانع صاحب البوسـت في الخوض في اموره الشخصية اذا كان يتحدث بدقنه المحننة في الفضائيات عن ( السودان ) ..
و لا يمانع صاحب البوست ايضا اذا كان شخصية عامة ساهمت بحظ وافر في تدهور الاوضاع في السودان علي طريقة ( بص شوف بيبي بيعمل إيه ) ..
و لا يمانع صاحب البوست اذا كان مكنكشاً في رئاسة حزب .. و متمسكا بأمامة ..
و لا يمانع صاحب البوست اذا كان في الاساس عنده دقنه عشان يحننا ..

Quote: و لا يمانع صاحب البوست اذا كان في الاساس عنده دقنه عشان يحننا ..

المساهمة فى الشأن العام سلبا او ايجابا لاتبيح انتهاك خصوصيات الآخرين
و الحديث بسخرية عن اختياراتهم الشخصية ..وياعزيزى انت ايضا مساهم
فى الشأن العام .فأنت تكتب هنا عن الشأن ا لسودانى فى منبر مبذول للقراء
من مختلف بقاع الدنيا ..مساهمتك سواء كانت ايجابية او سلبية هى مساهمة ..
والفرق بينك وبين اى ممارس للسياسة فرق مقدار ..فطالما انت تكتب هنا
عن امور سياسية فأنت مشارك .. و اذا اجزت انتهاك خصوصيات الاخرين
بدعاوى مشاركتهم فى الشان العام فينبغى ان لاتغضب اذا مر احد باى بوست
من بوستاتك وكال لك بنفس المكيال ...

Quote: فينبغى ان لاتغضب اذا مر احد باى بوست من بوستاتك وكال لك بنفس المكيال

حاضر .. ان شاء الله ما اغضب .. و سأتقبل الامر علي اني شخصية عامة .. و ربما لمساعدتي في تقبل ذلك سأقوم بإنشاء حزب سياسي ..
فكرتك وصلت .. شكرا جزيلا ..

Quote: وكالات الاعلام اليوم .. و في خبر عاجل .. تتحدث عن اتفاق الحكومة و الحركة الشعبية علي تهدئة الوضع .. ( صافية لبن .. حليب يا إشطة ) .. الاتفاق نتج عنه إلغاء مسيرة يوم الاثنين ( غداً ) .. و تجنيب المعارضة و الحركة الشعبية ( الشريك ) .. من اخفاق قد يؤدي بها الي مذبلة التاريخ ..

يعني الباندويدث المدفق في البورد ده

طلع ساي شمار في حلة ولاّ كيف ياحميده؟


وانطلق قشة الكبريت
وياخرطوم ثوري ثوري


_____________

كامل التضامن مع البان جديد.

Quote: لا يمانع صاحب البوسـت في الخوض في اموره الشخصية اذا كان يتحدث بدقنه المحننة في الفضائيات عن ( السودان ) .. و لا يمانع صاحب البوست ايضا اذا كان شخصية عامة ساهمت بحظ وافر في تدهور الاوضاع في السودان علي طريقة ( بص شوف بيبي بيعمل إيه ) .. و لا يمانع صاحب البوست اذا كان مكنكشاً في رئاسة حزب .. و متمسكا بأمامة .. و لا يمانع صاحب البوست اذا كان في الاساس عنده دقنه عشان يحننا ..

ايها البائس الحقير احترم نفسك وتحدث وانتقد من تشاء دون الخوض في امور شخصية .

Quote: حيث يتم ازاحة الموضوع الرئيسي .. و الدخول في متاهات لقاءات الاخ ( انور كنج ) الصحفية .. و اسهامه عن طريق الفيديو في حركات التحرر السودانية و نيله عدة جوائز في مؤتمرات اليوم الواحد .. و يدعم هذا الخط بدخول الاخت ( تراجي ) كظهير قشاش .. و محاولة خلق ( اوباما ) سوداني من الاخ ( انور كنج ) .. و لهذا الحد ( البلونة ) بتكون قربت تطرشق .. !! نمـوذج رقم ( اتنين ) .. مثال على التضمين الترددي ..

!!!
والله شر البلية ما 0يُضحِك!
سودان عجيب!
مرة باقان لبس 0كرفتة 0ومشى 0يحرش 0أصحابو 0في 0واشنطن
ومرة 0لبس0 أخدر 0خداري0 وبيرقص 0مع 0الأزرق0 الطيب0 شديد 0-على 0قولة 0المصريين-
ومرة0 يقود0 مسيرة0 التغيير من جامعة0 الخرطوم لينتقل 0من(الثورية الميدانية)!
إلى 0"ميدان"السياسة"الثورية"! وا"الشأن0 العام"!!
واتفرج يا سلام!
هذه مؤامرة دبّرت ب"نهار"!

على ما اعتقد ستعسي الحكومة في الايام القليلة القادمة الي ( كلفتة ) القوانين في البرلمان و سرعة انجازها .. و كتل ( الدش ) في يد المعارضة ..
و تكون بذلك ( المعارضة ) الغبية .. قد اعطت فرصة ذهبية لحزب ( المؤتمر ) الحاكم ..
حميدة
سلام
الاقتباس أعلاه يوم 9ديسمبر

تحليل عميق وقراءة حصيفة للواقع السياسي الان
0

يا حميده البلد ساطوها وعاسوها الكيزان
عاوزين إكبوا الزوغة وبفتشوا في المخارجة
والحركة بتلعب دورين شريك ومعارض مثل لاعب الارتكاز الأيسر
في طريقة اللعب 4-4-2 الذي يكلف بمهامين الهجوم والدفاع
وتجده في أغلب الأحيان مهاجم رغم أن واجبه دفاعي
دقي يا مزيكة حسب الله

يا حميده البلد ساطوها وعاسوها الكيزان
عاوزين إكبوا الزوغة وبفتشوا في المخارجة
والحركة بتلعب دورين شريك ومعارض مثل لاعب الارتكاز الأيسر
في طريقة اللعب 4-4-2 الذي يكلف بمهامين الهجوم والدفاع
وتجده في أغلب الأحيان مهاجم رغم أن واجبه دفاعي
أما تعديل القوانين نفس نهج شداد الذي يمارسه مع أندية الممتاز
بلد بقت الراكوبة في الخريف
دقي يا مزيكة حسب الله

**

Quote: ايها البائس الحقير احترم نفسك وتحدث وانتقد من تشاء دون الخوض في امور شخصية .

البائس الحقير ..
و الله يا جماعة انا ما عارف انتوا بتجيبوا الالفاظ دي من وين .. كمية كدا من الحنك البيش و العوارة ..
عليك الله اتخيل معانا اتشاكلت مع زول ( واقعيا ) .. قمت قلت ايها البائس الحقير .. مفروض الزول دا يعمل شنو ..
غايتو انا لو في محله مفروض اكون شايل معاي سيف و درقة .. يا اقطع ليك رأسك يا اسبيك ..
كان قطعت ليك رأسك نكون ارتحنا منك .. كان سبيناك عندك حل من اتنين ..
يا تكوتو يا تموتو ..

..
..

عليك الله لمن تجي تنبذ نبذني بطريقة واقعية .. النبذ بتاع مسلسل لا إله ألا الله دا ما قاعد استوعبه ..

حدد اليوم الاثنين لإنطلاق المسيرة ( العودة ) .. اذا اعتبرنا المسـيرة الاولى هي مباراة ( الذهاب ) ..
في المسـيرة الاولى قدمت الحكومة ( شكوى ) بعد استيفاء الدمغات الرسمية .. مضمونها عدم قانونية المسيرة .. مرتكزين الي قانون ولاية الخرطوم الذي يتطلب استخراج ( تصريح ) ..
و شكت المعارضة من سـوء ارضية الملعب ..
اجتمعت الرؤؤس الكبيرة .. و اتفقت علي قبول الشكوى شكلا و رفضها مضمونا من قبل المعارضة .. و اتفقت علي احتساب نتيجة صفر صفر للمباراة الاولي ( الذهاب ) ..
و منع جمهور المعارضة من مشاهدة المباراة الثانية ( العودة ) من الملعب .. و على الحكومة المصاريف الادارية و قروش الحكام ..
مع استبعاد لاعبين غير اساسين من تشكيلة المعارضة و التأكيد علي شعار الفريق القديم .. ( الشــريك ) ..

الي الآن .. و الساعة الواحدة ألا ربع ظهراً .. ما ســخنت ( المسيرة السلمية ) لحدي هسع .. و لمن تأتينا الكاميرات الرقمية بصـور اصابات ( الحمد لله ) ..
و لا تتعدى الاخبار عدد من البوستات تتحدث عن ( حملة اعتقال ) .. لم تتأكد بعد من مصـدر محايد ..
و كما يبدو لي ان درجة حرارة ( المسـيرة ) مرتفعة في منبر سودانيزاونلاين .. اكثر من ارتفاعها علي ارض الواقع ..
و الحديث لمصـدري الخاص من الخرطوم ( الاخ منصور أفيكو ) ..
ما في حاجة ياخي ما في حاجة ياخي .. انت الايام دي مالك معانا قديتنا تلفونات .. انت بتجيب الكلام دا من وين .. بالمناسبة ريم عرسـوها .. قرقرقرقرقرقرقر ..

إنتهى الزمن الرسمى للمسيرة بالتعادل السلمى !
ولا توجد إى إصابات ولا ضربات جزاء ..!!
والآن الكل يتحرك صوب إستاد الخرطوم لمشاهدة مباراة كاس السودان ..
بين الشريكين اللدودين الهلال والمريخ !
والتى لن تنتهى أبدا إلا بفائز يحمل الكأس ويطوف به حول الإستاد !!
ـــــ
تابيتا جاية الكورة !!

Quote: بالمناسبة ريم عرسـوها ..

فيصل حبيبنا ..
انت بتحاول تســخن نفسك و لا شـنو .. 120% من جيل الشباب لم يسـمع عن الملحمة .. و لا يعجبه هذا النوع من الفن النضالي ..
خصوصا بعد اعتذار السيد محجوب شـريف للشعب السـوداني عن اشعاره في مايو .. و ان الشغلانة كانت هوجـة ساي .. او كما يقول اهل الخليج ( شيلوها شيلة ) ..
و لو الغناء الحماسـي يلهب مشاعر الجمهور هذه الايام .. لكانت حكومة الانقاذ معشوقة الجماهير .. فما قدمه فناني الحكومة من حماسة و عرضة يفوق كثيرا تجليات الشيوعيين بالاوكسترا ..
و لك في عمر البشـير نفســه مثال يذكر ..
عندما غنى الفنان الكبير ( كمال ترباس ) .. هبت ثورة الانقاذ .. هبت ثورة الانقاذ .. لما الجيش للشعب انحاز .. رددها الكثيرين .. قبل ان يفقدوا الثقة في الفن النضالي .. و باعوا القضية ..
تســيطر علي الساحة الآن اغاني خالدة كأغنية ( حســن ساتي وآآآي فكني ) .. و اغنية ( الما عندها شعر تعمل ليها قعر ) .. و اغاني الراب السودانية مثل اغنية ( زرطة ) و ( الجكس الشين ) ..

..
..

مثال لجلسة فنية نضالية .. لحزب البهجة و الســرور .. ( الملحة موديل 2009 )

حأتوقف عند الاخ فيصل شـوية ..
لانه بمثل تيار يشـبه ما يحدث الآن بثورة اكتوبر .. و يستدعي حاجات النضـال القديمة ..
و السـلوك دا بمثل واحـدة من اكبر مشاكلنا .. و اكبر نقطة اختلاف بين جيل الشباب و جيل الديناصورات ..
اغلب جيل الشباب لا يؤمن اطلاقا بتاتا بهذه الشعارات الاكتوبرية او الابريلية .. و يعتبرها نوع من العوارة .. كون حال السـودان سئ في سئ .. بعد او قبل هذه الثورات ..
و تنطبق عليه نكتة المسـطول و الطيرة .. لمن الطيرة دخلت من الباب و مرقت من الشباك .. المسطول قال ليها يعني عملتي شنو ..!!
لو دايرين نتحدث عن عظمة الشعب السودان من خلال اكتوبر و ابريل فقط .. حنقول عليهو شعب ثوري نضالي ليبرالي متقدم .. و لو اخدنا كامل شئون .. حيطلع شعب ( خرنق ) ..
ثورة اكتوبر .. اختلف عليها الناس .. ناس الترابي قالوا نحن قومناها من الميدان الشرقي .. و ناس الشيوعيين قالوا نحن عندنا شهيدين .. و العساكر قالوا نحن حاصرنا القصـر .. ( و الي اليوم الخلاف دا موجود ) ..
مسيرة الاثنين ( الذهاب و العودة ) .. اراد باقان و عرمان اخراجها مسرحيا كمسـرحية اكتوبر .. و لكن فشل التخطيط في ايجاد شهيد .. و لم تحرك ندوة جامعة الخرطوم الجمع كما ينبغي .. و حاصر العساكر الشعب بدل من القصر ..
مخططي المظاهرة السلمية .. ما حسبوها صاح .. و ما عارفين انه الجيل الحالي ما عنده ذاكرة غير ذاكرة الانقاذ .. و للمعلومية حكومة الانقاذ ليها 20 سنة .. يعني الزول العمره 30 سنة الآن .. كان عمره لمن جات الانقاذ 10 سنوات ..
دا مفروض كيف تستفزه الملحمة عشان يطلع الشارع ..

نموذج يمثل ( ثورة اكتوبر موديل 2009 ) ..
اخراج باقان اموم و ياســر عرمان ..

Quote: تســيطر علي الساحة الآن اغاني خالدة كأغنية ( حســن ساتي وآآآي فكني )

لو وأأأي فكني بتلهب مشاعرك

نجيب ليك وأأأي فكني


بس انت اتلهب

Quote: بس انت اتلهب

شكلك يا فيصل امكانياتك العقلية محدودة في فهم الكلام ..
والحكاية عندك نوع من المناتلة و المكاواة ..
صدقني المعارضة الحالية غير مرغوب فيها بسبب داء العوارة .. انت بتمثل جزء منه .. و كثير من الناس الرأيها انه العوارة ممكن تحل قضية ..
في مثل مصـري بقول .. اقيف معووج و اتكلم عديل .. و دي الحاجة البنطلبها منكم .. ما دايرينكم تقيفوا عديل و تتكلموا معووج ..

..
..

الاخ فيصل .. بطل العوارة .. بليييييييز ..

كما حدث في المسـيرة الماضية .. و في نفس التوقيت .. و بعد فشــل مخطط ايجاد ( شهيد ) للمسـيرة .. او اصابات ممكن الناس تقشر بيها في القنوات الفضائية ..
يتحدث المناضلين الآن .. عن برقيات الاقاليم ..
و ذي ما حدثنا الاخ ( كيكي ) من قبل و تحت عنوان ثوري موجز و جامع بعنوان .. ( مدني تشتعل ) .. يتحدث البعض الآن عن خروج ( جماهير ) عطبرة للشارع ..
اتمني ألا يكون هذا الخروج ذي اشتعال مدني الذي أكدت لي مصادري الخاصة انه ( شكلة ) بين بتاع باسـطة و سلطات المجلس البلدي في المدينة ..

وصلني عبر الايميل ..

Quote: العزيــــــــــــــــز حميــــــــــدة أولا السلام عليكم ورحمة الله وبركاته تحياتى لك والى الاسرة الكريمة جدا اخى حقيقة بوست ممتع جدا ويحكى واقعا ساخرا لما آل اليه حال الشعب الذى كبل تكبيلا بالمعارضة قبل الحكومة لن تفلح اى معارضة فى زحزحت الحكم الا ان تترك ده جلابى وده مابعرفو الشنو.... يا حميدة رئاسة معارضة تدعو الى طرد قبائل بعينها فى اتجاه وتفرق الناس على اساس قبلى وتدعوهم الى الخروج فى اتجاه آخر وتحمل قبائل مسئولية وغالبية افراد تلك القبائل لايعرفون من هو وزير الغابات زاااتو بس لانهم جلابة وتدعو الى طردهم وتطردهم من مناطق سكن اهلهم سواء ان كانت النية تجارة او اى شى لا لشى الا لانه شمالى او ودعرب وفى جهة تانية تطلب دعمهم وفى جهة رابعة تقول انهم ما مواطنين زاتو وفى جهة خامسة .......................... حتى اننى كمواطن بقيت ماعارف هل المعارضة ضد القبائل ام ضد الحكومة وكذا حال المواطنيين من الجلابة والله الما جلابة ولكن الحق اقول فى مثل هذه الحالة هذا البوست موفق جدا واتمنى ان يكون اكثر سخرية من هذا واصل اخى حميدة الجميه هنا متابع هذا البوست اخوك محمد السيالى تخريمة:- وتحياتى الى دكتورة نجاة محمود وكل الذين زاملتهم بمنبر نيو سودان وافترقنا وكذلك تحياتى الى تراجى وبحر وجبريل وبشارى والى بريمة وودالصائم وعمر الفاروق

تحياتي للسيالي
وليه وخشة والله رغم انه غتيت داسين المورتانين والصومالين والطوارق يعلمو فيهم لهجة اولاد جعل

ويجو هنا يعملو رايحين.

Quote: عليك الله لمن تجي تنبذ نبذني بطريقة واقعية .. النبذ بتاع مسلسل لا إله ألا الله دا ما قاعد استوعبه

والله يامحمد لسانك دا مابتلحق

Quote: في مثل مصـري بقول .. اقيف معووج و اتكلم عديل .. و دي الحاجة البنطلبها منكم .. ما دايرينكم تقيفوا عديل و تتكلموا معووج ..

المشكلة وقوفكم معوج و كلامكم معوج







اديك طماطم بقرشين و اقفجو ليك ?

الاخ فيصل .. خلاص اخدت فرصتك في البوست دا .. ادي فرصة لغيرك .. فكرتك وصلت .. شكرا

الاخت و الزميلة نجلاء سيد أحمد .. قامت بمجهود مقدر .. لنقل الصورة لمسيرة الاثنين الاخير .. في بوست بعنوان .. مسيرة اليوم 14 /12 و الدماء التى سالت فى ام درمان لن تروح هدر صور كميات
الصـورة دايما معبرة عن حال معين .. لكن كما يبدو لي ان الاخت نجلاء حبت تعلق علي الصور .. فأتت التعليقات ثورية نارية لا تناسب حجم اغلب الصور ..
اغلب الاصابات .. اصابات خفيفة مع صور البمبان ( هو في مظاهرة بدون بمبان ) .. مع انتشار فوضى و حالات اغماء ..
في واحدة من الصور ( صورة لعساكر الاحتياط المركزي ) .. كتبت الاخت نجلاء تعليق طريف ( من أين أتى هؤلاء ) .. في سري رديت عليها ديل ناس ( البوليس ) .. موجدين في كل زمان و مكان ..
ما بستنكر وجود البوليس ألا الزول الداير يعمل فوضى ..
لحدي هسع و بعد 20 سنة من حكم الانقاذ .. المناضلين ما قادرين يفرقوا بين ( عسكري البوليس و عسكري جهاز الامن ) ..
العساكر الشايلة الدرقات دي .. بكرة ممكن نشوفهم في ( ماتش كورة ) .. بعد بكرة في ( السوق ) .. لانه دا شغلهم .. ( الشرطة في خدمة الشعب ) ..
العسكري ( محمد أحمد ) .. بيأخد تعليمات معينة امشي هنا و تعال من هنا .. و بقبض مرتب ضئيل جدا لا يسد الرمق نهاية الشهر و صرفة سكر ..
التوجيهات دي بتجي من وين و ليه .. امشـوا فتشـوا يا مناضلين عنها .. بس لازم نحترم العسكري .. عشان الحكاية ما فوضى ساي ..

دا احسن بوست مر على المنبر هذا الفصل
يجب نقله الى الفصل القادم

شكرا يا حميدة

حميده تربت يداك...

يا زول الجماعة ديل زي ما بيقول الخليجون ما عندهم سالفة....

هسع عليك الله الناس دي قايلة نحن عندنا قنابير....

بالله في واحد عمل في السودان ما عمله الترابي؟؟؟

طيب كيف يصطفوا معاه؟؟؟ معتمدين زي ما قلت

على جيل الثورة أنطلقت... وقايلين الناس قصيري ذاكرة!!!

بعدين زي ما قال الأخ الرسل ليك الرسالة...الجماعة ديل

أكان ما خلو تكريس العنصرية والجهوية.. وده جلابي

وده ما عارف أيه... ما أظن يصطف وراءهم إلا من أصطف وراءهم...

بعدين عليك الله هم فكرتهم إنو يحظوا بشهيد ويقلبوها يعني؟؟!!!!

والله ده تفكير بائس وساذج جدا.. ونتاج عقول على مقاس عام 1964

لأنو في الوقت الحاضر شفنا ما يسمى بالثورة المخملية في إيران..

لغاية هسع كم شهيد (حسب تصنيف الجهة الثائرة) سقط؟؟؟

ماذا حدث؟؟؟؟

يا أخي والله الناس ديل حتى لو أتفقنا على تغيير الوضع الحالي

ليسوا بالبديل المرتجى,,, ناس أقصى أمانيهم أن يصلوا

لكراسي الحكم على أكفان الغلابى والبسطاء...

تبا لمن آثر مصالحه الشخصية على المصلحةالوطنية...

وعشت وعاش كل العقلاء والأحرار في وطني

بعض أحباب "الثورة المخملية"! السودان "الجديقيم"! هذه الايام
لا يهدأ لهم بال..فقائد"المسيرة" المباركة!!.باقان التعبان..صار"يمارس"
ممارسات قادة"السودان القديم"!.فجاءت تراجي في هذا الشريط..ل"تهمس في أذنه"
التي امتلأت بأنغام"الطار" ف"طارت" كل "الثوابت" عند الإفطار..خاصة وقد قال أحد
الصحفيين إن"شيخ باقان"صار من الصوامين!..بس ما قال القوامين..!بسم الله ماشاء الله!
هذا جزء من شر البلية-الذي ربما يبكي...إذا جاء الباقان في أمر دبر بنهار..فقلت لها "مواسيا"!:-

Quote: أرثى لحال المسكينة تراجي! لا تستطيع حروفي أن "تلخّص" "حالة" التلميذة/المنظرة المخلصة في الغلط:-/تراجي! وأخطر وأشد أنواع المصيبة وقعا على النفس عندما تقع حين القِطاف! فحينما حان وقت"القِطاف"-أو ولادة "الثمرة"للثورة -السودان الجديد!-فإذا ب"جبل" الباقان يتمخّض-بعد سنين عددا من الدماء/الدموع/الغابة/ فيِلد فأرا سمينا! لكنه هاهنا فأر "هجين" توّلد قبل دخول القوات الهجين! ولسان حال الفأر يقول: "شيوصوسوجديدانقاذوحجاذانفصال"!!!! وإذا فككنا هذه الشفرة-شفرة السوداني /الجديد-أعلاه- سنجدها تُقرأ كما يلي:- شيوعي.. صوفي ..سودان جديد ..إنقاذي.. وحدة جاذبة.. إنفصال! وماذا فيها يا تراجي؟! تناقض؟! وهل أنا كباقان أمارس عبادة محددة؟! أليست هي "مشتركة" كعبادة أبوقرون؟! الذي قال :من آمن بالتوراة والإنجيل مع تحريفهما سواء مع من آمن بالقرآن.نعم .هما سواء! هي نفس عبارة ابن الفارض..يطبقها باقان/النيل/أزرق لكن كلٌّ على هواه..:- أنا من أهوى...ومن أهوى أنا.../نحن روحان حللنا بدنا! ف"كلو عند العرب صابون"! ألم تسمعي بأن السياسة: ؟DIRTY GAME أم أنك سمعتي شعاراتنا فظننتي أننا "سنقضي على الأخضر واليابس"؟!نقضي على القديم؟!السما قريب! أما "الأخضر"فقدتوشحنا به! ورقصنا-ولن نقضي على شئ-فنحن هو..وهو نحن!إذ"نحن روحان حللنا بدنا"! -لكني نثرت لهم بالمقابل"أخضر" آخر..لدعم مشاريع الذكر التصفوية!وما الحرج أن نتبادل المنافع في ظل "سودان متنوّع"..المنافع؟! مشورة؟! من أعطاني المشورة؟ لا...كما قال شيخ آخر "لقد كنت في كامل صحوي"! فأنا في بدايات التصوف وحتى -الآن أنا أدري ما أقول! وكمان ما أفعل! فكيف تهربين من "الفيل" وتطعنين في ظله؟! وتقولين: (من يعطيه المشورة..)! أنا المشورة نفسها... أها يا"الراجيانا" نحن "وصلنا"! قبل "الوصول"! وعند"الوصول" س"نركل" كل ذلك-حسب الأصول! وأظنك تعلمين ما فعلناه بزملاء"النضال" معارضة أبناء "الشمال"..وكذلك"احزاب جوبا".. سنحاول أن نلقاهم في"حولية الشيخ "الطاير ديمة" لوضع "أطُر" للمرحلة القادمة!!! فائدة: لأن شر البلية ما يُضحِك..ففضلنا يا تراجي..أن نصور هذا البلاء بهذا الأسلوب الساخر لكنه الواقع.. وحاولي "ثورة" أخرى..مرة أخرى!

اليوم السبت 19/12/2009 .. و الوضع ( كما كنت ) ..
لا انهدا كتف المقصلة .. ولا السجن ترباسو انخلع تحت انفجار الزلزلة .. ولا الشعب بي اسرو اندلع حرر مساجينو وطلع قررختام المهزلة ..
رجع ( إستيف ) الي طبلية السجاير امام قصـر الشباب و الاطفال .. و عبر عن امتعاضه من وقف الحال في الايام الفاتت .. ( باقان دا زاتو يا مألم هو شلكاوي .. و الله ما يدقها مع دينكا دا كلو كلو ) .. تحليل الوضع من إستيف ..  
حاجة علوية أدانت سلوك ناس البوليس .. ( هو يعني في شنو يدقوا الجنون ديل كدا و يسكوهم في الشارع .. و البنات ديل البمرقن من اهلن في يوم ذي دا شنو ) .. حاجة علوية تنتقد انطلاقات البنات في مظاهرات بصورة عامة و الاغماء ورقاد الواطـة لبت صغيرة ما شافت البهدلة .. و العناية بها من قبل شخص مجهول .. ( رأي خاص بحاجة علوية ) ..
الاستاذ علي فرنيب .. امتنع عن التعليق علي الموضوع .. و قال ( سـافي ياخي ) ..
بنات الحلة في استطلاع راي سريع .. اجمعن .. ( هووووي جنس دا ما في داعي ليهو ) .. و أشاروا الي فلانة الفلانة بأنها ما شيوعية و لا حاجة .. بس دايرة تمرق مع ايمن .. !!

..
..

المناضل باقان أموم الشــهير بـ( بيبسي ) .. لم يصـرح خلال الخميس و الجمعة .. فكانت اجازة سعيدة بالنسبة لي ..
في العموم قمت بمسح قناة السودان .. و النيل الازرق .. و ساهور .. و الشروق .. من الرسيفر .. في الاطار الحملة القومية للتخلص من ( كاروشة الثورة ) التي صاحبتنا في الاسبوعين الاخيرين ..

حميدا..

كيفنك يا تسفاي..

Quote: ( باقان دا زاتو يا مألم هو شلكاوي .. و الله ما يدقها مع دينكا دا كلو كلو ) .. تحليل الوضع من إستيف ..

يا صحبي الشلك قالوا ليك هينين ولا لينين هم أصحاب أرض ونظارة وحضارة..

القاسي الوافدين الجدد الدايرين أمثال عبدالرحيم حمدي وغيرهم الكثيرين الدايرين يدكوها بالحنبكة..





ياخي خليك واعي..

ود العرب .. أب رزقـة ..
بركة الجيت .. بركة الجيت .. سمح انت و بســكويت ..
و الله يا اب رزقة ما طالبني حليفة .. لكن الشـوق جركانات .. كيف بالله انت و كيف ناس ايدعوت احرنوت و جميع الاخوة اليهود و الصهاينة ..

ســـمع هس .. ســـــــــمع هس
ســـامع حاجة ..
شنـو ..
شنــ
الثورة .. الثورة ..
سامع ..

..
..

كت كت .. شكرا يا جماعة ..

Quote: ( من أين أتى هؤلاء )

من القسم

Quote: العساكر الشايلة الدرقات دي .. بكرة ممكن نشوفهم في ( ماتش كورة ) .. بعد بكرة في ( السوق ) .. لانه دا شغلهم .. ( الشرطة في خدمة الشعب ) .. العسكري ( محمد أحمد ) .. بيأخد تعليمات معينة امشي هنا و تعال من هنا .. و بقبض مرتب ضئيل جدا لا يسد الرمق نهاية الشهر و صرفة سكر .. التوجيهات دي بتجي من وين و ليه .. امشـوا فتشـوا يا مناضلين عنها .. بس لازم نحترم العسكري .. عشان الحكاية ما فوضى ساي ..

الناس دي يا حميدة زي القاعدين في كوكب تاني غايتو ،،،
شكرا حميدة .....

مرات لمن تكون عندي مشاكل غير قابلة للحل .. يقفز بالزمن ستة شهور لقدام .. بلقاها انتهت ..
ذي القضايا البقفلوها في المحاكم بموت أحد الطرفين ..
بعد مدة قصيرة جدا من انطلاق شرارة ما سـُمي استعباطا بثورة .. انتهى كل شي .. و ذهب ياسر عرمان لزواج اختنا عزة .. و أخد ليهو صورة من وهبة ..

تاني ..