Post: #1
Title: عمكـ
Author: محمد يوسف الزين
Date: 12-22-2009, 01:51 PM
Parent: #0
يا اخوانا طولت من الخنق..
كنت كل يوم بخنق لي زول.. في الشارع ، في الحلة ، في المواصلات ، في الاشارة ، في صيوان البكا ، في النت
في أي حتة في زول بستاهل يخنقوهو.
بس للأسف بقيت طيب.
لذلك مطلوب "مرتزق" خنق..وبياخد بالسوداني "الفكة" ، دولار ما معانا
دي قصة عمك الداير أخنقو..
عمكـ..
"عمكـ" الذي تربطنا به صلة دم غير بعيدة فـجدته من أبيه "علوية بت أبو كراع" هي أخت "نفيسة بت أبو ضراع" في الرضاعة ونفيسة هي شقيقة "حُسنة بت أبو رجل" عمة جدة أمي من جهة أمها!
"عمك" الذي لم يأت الى العاصمة الا في ثلاث مناسبات حسب حكايته.. مرة لممارضة أخته التي كانت مريضة بالبلهارسيا فحولهما الباش ممرض حسب توصية الباش مفتش في القرية الى مستشفى الخرطوم أيام عبود.
والثانية عندما سافر عبر مطار الخرطوم الى الحج وجلب معه "البطانية أم صوف ناعم".
والمرة الثالثة عندما حضر الينا هذه الأيام لمقابلة الطبيب حيث يشكو من 73 مرض اجتاحته جميعاً فجأة ، فعندما كان يركب حماره أحس فجأة بمغص في كليته اليمنى "هِني"! وتبعها ألم في الرجول "هِني" ثم ............. "إييك" وكلو.."هني".
"عمكـ" بعد أن جربه أخي الأصغر مجاملاً له ورافقه وأهله لزيارته الأولى للمستشفى ، هرب أخي الهروب الأخير من المنزل ولا أظنه يعود قبل كأس العالم ، فتفرغ لي "عمكـ" في المنزل وأصبح يفتك بي منذ الصباح ، وبعد الظهر ، وبعد العشاء.
"عمكـ" يسألك في الدقيقة الواحدة 41 سؤال بدون ان ينتظر إجابته ،
ويحدثك عن الأنساب بسرعة 54 ريختر في الدقيقة
ويحدثك عن آلام المفاصل والكلى في نفس الوقت
وعن تاريخ القرية في نفس الوقت
و"هِني" في نفس الوقت
وعن لعنة العاصمة في نفس الوقت
ويخرج لك ورق المستشفى وصور الاشعة في نفس الوقت
ومصاريف الدكاترة..في نفس الوقت
وقصة (البقرة المبروكة الولدت تلاتة عجول)..في نفس الوقت
وقصة (البطانية أم صوف ناعم)..في نفس الـ ....أيوة
و(ناس فلان بيتهم بعيد؟ ، وناس علان بيتهم قريب؟ ، وحسين كان في اليمن؟ ، وناس عبدالله قعد يجوكم؟) في نفس..الوقت
كل هذا أثناء "الكحة".
"عمكـ" عبارة عن ملف pdf مضغوط فيه كل هذه الأشياء بسعة 2 قيقا بايت يقوم بعمل "اكتسراكت" له في وجهك 4 مرات يومياً.
لا تظن بي السوء فأنا لا أريد (خنق) "عمكـ" الذي يقربنا من جهة جدته من أبيه "علوية بت أبو كراع" التي هي أخت "نفيسة بت أبو ضراع" في الرضاعة ونفيسة التي هي شقيقة "حُسنة بت أبو رجل" عمة جدة أمي من جهة أمها! لا سمح الله.
ولكن الذي أريد أن أخنقه هو "عمك" الآخر الذي يرقد الآن بجانب "عمكـ" الآن في صالوننا يرافقه مع ابنه الصغير بعد أن قابله في سوق "البلد" أمام موقف الباصات فرأى "عمكـ" الأول "قريبنا ومعه زوجته يهمان بالسفر الى الخرطوم لمقابلة الدكتور. فقال لهما "حرّم أمشي معاكم..أفّو! ، أرح يا ولد أركب"!
و"عمكـ" المرافق..يحمل ملف pdf مضغوط بسعة 300 قيقا بايت.
ملحوظة: "عمكـ" المرافق يقرب لنا أيضاً..ولكن من جهة حام بن نوح عليه السلام.
|
Post: #2
Title: Re: عمكـ
Author: محمد يوسف الزين
Date: 12-22-2009, 02:17 PM
@
|
Post: #3
Title: Re: عمكـ
Author: أيوب خليل
Date: 12-22-2009, 02:27 PM
Parent: #2
ود الصائم
|
Post: #4
Title: Re: عمكـ
Author: HAIDER ALZAIN
Date: 12-22-2009, 02:43 PM
Parent: #3
يا جماعــة معليش والله .. عمكــ دا ما ود الصائـم دا عمكـ واحد تاني .. لانه ود الصائم مشي الخرطوم
كتييير وركب الطيارة زي ستة مرات كدة ..
ــ
عبد مشتاقيــن والله يا ملك وغيبتك طولت . . تحياتي وكمل لينا قصة عمك التاني ابو300 ميقا
|
Post: #5
Title: Re: عمكـ
Author: فدياس نجم الدين
Date: 12-22-2009, 07:21 PM
Parent: #4
.
|
Post: #6
Title: Re: عمكـ
Author: Maawya Hussein
Date: 12-22-2009, 09:50 PM
Parent: #5
يا عمك انت ما عرفت لينا HAIDER ALZAIN دا متخفي بي منو هناك !!
|
Post: #10
Title: Re: عمكـ
Author: محمد يوسف الزين
Date: 12-23-2009, 09:44 AM
Parent: #6
معاوية يا معاوية
غايتو للضمان .. ما ود البطانة
|
Post: #11
Title: Re: عمكـ
Author: HAIDER ALZAIN
Date: 12-23-2009, 09:47 AM
Parent: #6
| Quote: يا عمك انت ما عرفت لينا HAIDER ALZAIN دا متخفي بي منو هناك !! |
مغربينا الوجيـــه .. سلامات ومبروك المكتبة يا حبيب ..
تملاها ان شاء الله بالبرامج والباتشات ومن كلو
الامور .. ما تدخل في بيعة خلوصة دي بالمزاد ونقسمها مع صاحبنا الزمااااااااان ولي ترانسبورتر
أو مين كدة محسن كساب - شايفو طفش يآخ من يوم الصورة
الود والتقدير
|
Post: #12
Title: Re: عمكـ
Author: محمد يوسف الزين
Date: 12-23-2009, 10:14 AM
Parent: #11
ود الزين
Quote: صاحبنا الزمااااااااان ولي ترانسبورتر
أو مين كدة محسن كساب - شايفو طفش يآخ من يوم الصورة |
يا معاوية الزول دا منو 
لا حولااااا
دا بعرف محسن كساب ووليد ترانسبورتر
لووووول
أنا لي زمن مافي زول جهجهني قدر دا
|
Post: #9
Title: Re: عمكـ
Author: محمد يوسف الزين
Date: 12-23-2009, 09:43 AM
Parent: #5
فدياس نجم الدين
نقطتك لكن جميلة ياخخ
واسمك اجمل
|
Post: #7
Title: Re: عمكـ
Author: محمد يوسف الزين
Date: 12-23-2009, 09:38 AM
Parent: #4
Quote:
يا جماعــة معليش والله .. عمكــ دا ما ود الصائـم دا عمكـ واحد تاني .. لانه ود الصائم مشي الخرطوم
كتييير وركب الطيارة زي ستة مرات كدة ..
ــ
عبد مشتاقيــن والله يا ملك وغيبتك طولت .. تحياتي وكمل لينا قصة عمك التاني ابو300 ميقا |
ود الزين
أيها الغتيت ، ياخي في الناس الغتيتين النوع الروحو سلبة داك
مصيري أعرف انك تلبت بياتو شباك قبل كدا في بيتنا
خليك من عمكـ وداير احكي ليك قصة...
ياخي انت سحرت لي خلوصة الجكس بتاعتي
وحاة الله يا حيدر ما قادر اتمها ، ونفسي أتمها ياخخ
لو عندك أي مقترحات قولها ،
رايك شنو نطرح خلوصة في المزاد والداير يتمها يتمها؟
رايك شنو خاصة والدنيا اعياد ، عيد الاستقلال وراس السنة الهجري والكريصماص والربع الجديد وراس السنة ويوم الجمعة والانتخابات و....
|
Post: #8
Title: Re: عمكـ
Author: محمد يوسف الزين
Date: 12-23-2009, 09:42 AM
Parent: #3
أخونا أيوب
ود الصائم مالو؟
سمين وغليد ومعسلو مزبوط وضحكتو مجلجلة (مش بكتبوها كدا؟)
|
|