Post: #1 Title: الليلة الجليد حدو الركب Author: Osman Musa Date: 12-20-2009, 00:40 AM Parent: #0
بياض . الدنيا بياض . فى كل مكان . زى ده ماحصل .
Post: #2 Title: Re: الليلة الجليد حدو الركب Author: Tragie Mustafa Date: 12-20-2009, 00:51 AM Parent: #1
ياعثمان يا امريكاني يا جرسه وين الحي بيك؟؟؟
بنضحك فيكم يا الاتزلحقتوا في 10 سنتمرات جليد! تعال....شوف ناس ثروت في البرتا قاعدين في 50 سنتمتر يوميا!!
Post: #3 Title: Re: الليلة الجليد حدو الركب Author: Osman Musa Date: 12-20-2009, 01:00 AM Parent: #2
الليلة يا تراجى الاخبار كلها عن الجو . من شويتين كدى كان فى واحد من المعهد الأمريكى للأرصاد يتكلم عن وصول ارتفاع الجليد الى 15 سنتيمتر . وقال فى احتمال كبير درجة الحرارة تقيف فى الصفر . وبرضو حاكم فرجينيا أعلن حالة الطوارى . وباكر الدنيا كلها VOLUNTEER عشان الجليد .
Post: #4 Title: Re: الليلة الجليد حدو الركب Author: سيف الدولة كامل Date: 12-20-2009, 01:07 AM Parent: #3
عثمان,,, سلامات
الحالة مستقرة عندنا,, والجليد لم يتعدي سنتميترات حتي الان, في بروكلين .
Post: #5 Title: Re: الليلة الجليد حدو الركب Author: Osman Musa Date: 12-20-2009, 01:33 AM Parent: #4
عارف يا سيف الدولة عندنا زول عندو جرافة وعندو كراكة . بنوم طول السنة . بس ينتظر الجليد . زولك الليلة ساعتو الواحدة 100 دولار يعنى يجيب فرق السنة كلو فى أسبوع . اسمع لو عندك كراكة سكند هاند قول عوووك .
Post: #6 Title: Re: الليلة الجليد حدو الركب Author: Osman Musa Date: 12-20-2009, 02:09 AM Parent: #5
هسع ده كلام ده ؟ الحر الحر مالو ؟
Post: #7 Title: Re: الليلة الجليد حدو الركب Author: Tragie Mustafa Date: 12-20-2009, 02:15 AM Parent: #6
عثمان موسى وكل الامريكان الجرسه
نحن زي ده عادي طوال الشتاء نغرف يوميا
عشان عيالنا يمشوا المدرسه
ونغرف ثاني عشان لما يرجعوا الساعه اثنين من المدرسه
درجة الحرارة الآن ، في مدينة كالقري ، سبعة تحت الصفر.. و العالم ( المجتمع السوداني في المدينة) فرحان غاية الفرح لأنو الجو دافي شوية و ممكن الناس تحضر حفلة الأستاذ عمر احساس بمزاااااااج..!! هنا يا عثمان ، في اللحظة دي بالذات ، ماشي بكرعينك ح تدق الدلجة (تنزلق).. سايق عربية برضها ح تنزلق..!! و لمن تبقى درجة الحرارة صفر.. فهو العيد بعينه..!!
نسأل الله أن يصبكم دفئ..!
كبر
Post: #11 Title: Re: الليلة الجليد حدو الركب Author: Osman Musa Date: 12-20-2009, 02:46 AM Parent: #10
هسع بس الشارع بس كراكات . تانى .. كو
Post: #13 Title: Re: الليلة الجليد حدو الركب Author: Osman Musa Date: 12-20-2009, 03:18 AM Parent: #10
يا كبر كيفك ياأخوى . وناس كالقرى اصحابى كيف الليلة ؟ مشيت اجيب لبن من دكان جمبى من هنا لى هنا انزلقت لاحدد ما داير اكسر سنى . ربك يستر
Post: #12 Title: Re: الليلة الجليد حدو الركب Author: Osman Musa Date: 12-20-2009, 02:54 AM Parent: #8
يا حنوفى جبل الجليد ده لو اتقلب لى فاصوليا طوالى برج السودان . يازول اردب الفاصوليا الليلة بى كم ؟؟؟
Post: #14 Title: Re: الليلة الجليد حدو الركب Author: Osman Musa Date: 12-20-2009, 04:01 AM Parent: #12
.. مقتل 5 في "أسوأ" عاصفة تضرب شرقي الولايات المتحدة خلال 10 أعوام
اعلنت سلطات الملاحة الجوية في واشنطن التي غطتها طبقة كثيفة من الثلوج البيضاء ان "معظم الرحلات الغيت"
قتل خمسة اشخاص وتعطلت وسائل المواصلات في الساحل الشرقي للولايات المتحدة السبت وذلك بعد أن ضربت المنطقة عاصفة ثلجية قد تكون الأسوأ منذ عشر سنوات.
وارتفع مستوى سقوط الثلج إلى أكثر من 30 سنتمترا فيما تحذر الأرصاد الجوية من هبوب رياح عاصفة تبلغ سرعتها 64 كيلومترا في الساعة.
ويتوقع أن يبلغ منسوب الثلج في منطقة واشنطن دي سي ـ بالتيمور إلى 55 سنتمترا ليكون الأعلى منذ عام 2003.
وتتحرك العاصفة شمالا باتجاه مدينتي نيويورك وبوسطن، اللتين يتوقع أن يبلغ علو الثلوج فيهما 35 سنتمترا.
وكانت حالة الطوارئ قد أعلنت في العاصمة واشنطن وأغلق مطار ريجان الوطني خلال الليل.
كما ألغيت معظم الرحلات من وإلى مطار بالتيمور في حين يواجه المسافرون عبر مطاري فيلادلفيا ونيويورك ساعات انتظار طويلة.
وأعلن مطار جون اف كينيدي الدولي، أكبر مطارات نيويورك، تأخر العديد من الرحلات وناشد المسافرين التحقق مقدما من حالة الملاحة مع الشركات.
غطاء من الثلوج واستيقط سكان واشنطن صباحا ليجدوا غطاء من الثلوج بارتفاع 20 سم. وتتوقع أجهزة الأرصاد الجوية أن تصل كثافة طبقة الجليد إلى 60 سم ليلة السبت الاحد.
وقال رئيس بلدية واشنطن، ادريان فينتي، التي بدأت الثلوج تتساقط عليها مساء الجمعة "كل المؤشرات تدل على أننا نواجه عاصفة غير عادية بل وربما تكون الأسوأ منذ سنوات".
واضاف متوجها الى السكان "اذا لم تكن هناك ضرورة ملحة فمن الافضل لكم البقاء في المنازل "مشيرا إلى أن تساقط الثلوج سيتوقف صباح الاحد.
من جانبه أوصى بريان جاكسون الخبير الجوي في الجهاز القومي للأرصاد الجوية السكان بـ "الاحتفاظ بحقيبة اسعافات أولية شتائية. واذا حصرتم في الطريق لا تخرجوا من السيارة".
وصباح السبت كان عدد السيارات والمارة الذين جازفوا بالخروج نادرا في شوارع العاصمة الواسعة.
صعوبة كبيرة واعترفت الأجهزة البلدية بانها تواجه صعوبة كبيرة جدا في العثور على كاسحات ثلوج وعلى مواد تذويب اضافية.
ووجهت التحذيرات من العاصفة الثلجية منذ مساء الجمعة على طول ساحل الاطلسي من كاليفورنيا الشمالية الى فيرجينيا.
وفي هذه الولاية الواقعة جنوب ولاية واشنطن اعلن الحاكم تيم كاين حالة الطوارىء. واستنادا الى جهاز الارصاد الجوية يمكن ان تبلغ كثافة الثلوج 65 سم.
وقد تحولت العواصف القادمة من جنوب البلاد الى عواصف ثلجية مع اقترابها من مناطق الشمال الشرقي حيث كانت درجات الحرارة منخفضة منذ أيام. واستنادا إلى الارصاد الوطنية فان تساقط الثلوج سيستمر حتى صباح الأحد على الاقل.
Post: #15 Title: Re: الليلة الجليد حدو الركب Author: Osman Musa Date: 12-20-2009, 04:28 AM
ركب شنو ؟؟ القصة وصلت الحلقوم عديل ؟ الحمدلله جميع السودانيين فى الساحل الشرقى بخير .
غايتو الضهر وصل لنصي كده. من سنه سته و تسعين ما شفت زي ده فيك يا فرجينيا. المشكله وقعت و ما قدرت اقوم عشان مافي حاجه امسك فيها و اتكل على التلج اغطس لجوه, بيني و بينكم كده فكرت احبى لمن اصل عربيتي امسك فيها لكن الله سهل القومه :)
التلفونات شغالة.. القاطعيين نحنا زاتنا فى ميرلاند!!!
غايتو الشى دا لو ماوقف للصباح نشوف لينا بلد!
Post: #18 Title: Re: الليلة الجليد حدو الركب Author: Osman Musa Date: 12-20-2009, 04:54 AM Parent: #16
كويس عربيتك جمبك الناس قدام مستشفى ال alexandria فرجينيا بتفتش للعربات بالفتاشات . يعنى لازم يكون عندك محجان بتعرفى المحجان ؟. المحجان يستعمل لحت البرم والعليف والتمرهندى . لو ما عندك محجان نجيب ليكم محاجين ماركة جديدة للعربات . جد يا أخت دينا الواحد شايل هم باكر . ربك يستر من الجبص .
في لحظة من اللحظات كنا أبرد بقعة في العلم الاسبوع الفات حيث وصلت 50 تحت الصفر و اخوك كان حايم و شعال ذاك اليوم
الليلة اخر ارتفاع وصلت صفر قربت امشي بالمايوه
طبعا خبر سيئ ارتفاع درجات الحرارة فهي ترتفع ليهطل الجليد فتبرد مرة ثانية لتعمق من صعوبة الحياة الموجود في الشوارع الان من هطلتين ماكنات نحو 40 سم
و لا زال الشتاء يحبو.
تحاياي يا تراجي
Post: #23 Title: Re: الليلة الجليد حدو الركب Author: سلمى الشيخ سلامة Date: 12-20-2009, 07:50 AM Parent: #21
عثمان ازيك ياحبيب انتو يا داب جاكم ؟ انى امنت بالله منو هنا اجزو لينا عديل يا عمك والعجب لمن يجى المطر الاسود انا لله الله لا وراك انشا الله دايما دافى وقلبك دافى يااجمل زول
Post: #25 Title: Re: الليلة الجليد حدو الركب Author: Osman Musa Date: 12-20-2009, 02:45 PM Parent: #23
يا سلمى ربنا يتمم للجماعة بخير . قصة العاصفة تحير الليلة . الجليد رقد جبال .. يا حليل زمن الحمير . الحمار الحر ماعندو مانع يمشى فى حر فى برد فى طين ولا محتاج تامين ولا وجع رأس . تنهر حمارك كلها ساعة وأنت فى قلب السوق . ربك يهون .
Post: #24 Title: Re: الليلة الجليد حدو الركب Author: Osman Musa Date: 12-20-2009, 02:17 PM Parent: #21
غايتو يا ثروت بس الصبر . هناك ملاريا وهنا جليد وأزمة اقتصادية . يحلها الحلال . لو وصلت عندنا 50 تحت الصفر يكون ده اخر بوستاتى فى الدنيا . الحر حبابو يازول .
Post: #26 Title: Re: الليلة الجليد حدو الركب Author: Osman Musa Date: 12-20-2009, 04:17 PM Parent: #24
العاصفة الجليدية تتحول جهات نيويورك بعد ضرب مناطق واشنطن وفرجينيا وMD
Post: #27 Title: Re: الليلة الجليد حدو الركب Author: Ahmed al Qurashi Date: 12-20-2009, 04:17 PM Parent: #24
عثمان موسى ازيك
اسه انا بردت من بوستك دا
بكتب ليك فى الرد من تحت بطانية
ربنا يحفظكم من القره دى
مودتى
Post: #28 Title: Re: الليلة الجليد حدو الركب Author: سيف الدولة كامل Date: 12-20-2009, 06:22 PM Parent: #27
حصلني يا عثمان مغرز في smith and 4 pls في زول بصدق الكلام ده والله يا عثمان جرتني كراكة
الستي لي بره الشارع , بعد حفر ساعة لامن وصلوا الجماعة عشان ينظفوا الشارع لقوا اخوك مستكي,
ادبه والله.
Post: #29 Title: Re: الليلة الجليد حدو الركب Author: Osman Musa Date: 12-20-2009, 07:02 PM Parent: #27
يا أحمد القرشى غايتو الليلة والليلة ودار ام بادر ياحليله . لاحدد سنة 1989 كنا مرتاحين لاجليد لا سفر ولا كراكات . شايف وصلنا وين ؟ فات الركب عديل .. ربك يهون يا أحمد
Post: #30 Title: Re: الليلة الجليد حدو الركب Author: Osman Musa Date: 12-20-2009, 07:13 PM Parent: #29
ياسيف الدولة يازول أنت كويس عندك سيارة . انا خايف على اهلنا المساكين هناك . ناس شرق بروكلن . ناس الجخانيين البعيدة . ناس الضهارى . ربك يستر على الجميع
Post: #31 Title: Re: الليلة الجليد حدو الركب Author: سيف الدولة كامل Date: 12-20-2009, 07:20 PM Parent: #30
والله يا عثمان كلامك صاح الله يكون في عونهم ما دام نحن ناس غرب بوكلين واحياء اليهود
دي حالها ما بالك ناس قريعتي راحت ما في زول بجيب خبرهم الي بكرة ربنا يكون في العون.
بس طمنا عليك انت وين في الميمعة ده يا عثمان؟
Post: #32 Title: Re: الليلة الجليد حدو الركب Author: Osman Musa Date: 12-20-2009, 07:31 PM Parent: #31
انا من زمن دقيت اوتاد خيمتى هنا . فى أحد مضارب فرجينيا . نتجول حسب المراعى . والحلال وبعد أن هرب المال . المراعى يا سيف فى نيويورك ولا بلاش . دهسير جد . والعلف جد . والدجاج دجاج .. لابد من الستى وأن طال السفر . يازول هنا جليد وفلس .
Quote: وبرضو حاكم فرجينيا أعلن حالة الطوارى . وباكر الدنيا كلها VOLUNTEER عشان الجليد .
عثمان سلامات غايتو من أمبارح أميركا ورتنا وشها التاني..ده الشتاء الأول اللي أحضرو هنا..(سبرينغفيلد - فيرجينيا)، أمبارح ما هوبت برة البيت، لكن اليوم كان لازم أمشي الشغل..وعلى الرجلين..مشوار 5 دقايق أخد معاي 40 دقيقة بالضبط خوف الزحلقة - على كبر - وده كوم وهمّ الرجعة كوم تاني..وده كلووو كوم وهم المشي للشغل بكرة الساعة 5 صباحا كوم براهو..
Post: #35 Title: Re: الليلة الجليد حدو الركب Author: Osman Musa Date: 12-20-2009, 08:49 PM Parent: #33
خالد عويس سلامات يازول شيشك شيشك . اعمل حسابك . لا قدر الله لو حصل شىء الوصول للمستشفيات صعب . ربك يستر .
Post: #34 Title: Re: الليلة الجليد حدو الركب Author: محمد الفاتح خالد حسون Date: 12-20-2009, 08:14 PM Parent: #30
الاخ عتمان موسي
السلام عليكم تشكر علي البوست البارد دا
انتا قلتا الجليد و صل حد الركب .. انتا قاعد وين في ام ضريوة ؟
نحنا هنا شمالكم شوية و دقا في عرش الراكوبة عديل كدا .. و ما قايم من النت دا الليلة
اليقولوا عليهو ضرتهم ..
و بعدين مش نضافة التلج دي ليها كورليشن ب السكتة القلبية .. يا جماعة ما تمرقوا و لو في مسيرة .
و سلام للمتداخلين عليكم بشوربت السمك و زيتو
Post: #36 Title: Re: الليلة الجليد حدو الركب Author: Osman Musa Date: 12-20-2009, 08:57 PM Parent: #34
الأخ محمد الفاتح سلامات ياريت لو كنت ساكن فى ام ضريوة يا محمد . زمان كان عندى فيها قطعة أرض 1800 متر . بعتها ماكنت فاكر فى يوم ام ضريوة بتتمدد قدر كدى . .. بوسطن كيف ؟ وانشاءالله الناس كلها بخير ؟
Quote: عندنا زول عندو جرافة وعندو كراكة . بنوم طول السنة . بس ينتظر الجليد . زولك الليلة ساعتو الواحدة 100 دولار يعنى يجيب فرق السنة كلو فى أسبوع . اسمع لو عندك كراكة سكند هاند قول عوووك .
عثمان الله يجازي محنك ذكرتنى والدى بجي بسكن معاى في اخر عشرة ايام من اجازتي السنوية وصادف اخر عام ود اختو اسمو حسان كان بيشتغل ببيع موية باردة بالصفيحة في السوق الشعبي بتاع امدرمان - اها في يوم السخانة ولعت ووالدى في الديوان يقول طلعونى ومرة دخلوني وهكذا من شدة الحر اها في اثناء ما نحن شايلين عنقريبو برة اتلفت يمين وشمال وقال لينا الليلة حسان ود اختى بجيب المال بالشوالات
Post: #38 Title: Re: الليلة الجليد حدو الركب Author: محمد الفاتح خالد حسون Date: 12-20-2009, 11:40 PM Parent: #37
محمد عثمان
بوسطن طالباك جية انشاء الله
سيف اليزل برعي و باقي الجماعة زعلانين لانو العاصفة جات يوم الاحد
Quote: .. بوسطن كيف ؟ وانشاءالله الناس كلها بخير ؟
وأنا علي قولك فكيت الجبس و لابس اللوكينق بوت .. اهو .. داهمني الجليد
و الضاق الجبس براو .. برجع للحبس
كلهم تمام و متخندقين في امان الله
انشاء انتوا بخير و عافية ..
Post: #39 Title: Re: الليلة الجليد حدو الركب Author: Osman Musa Date: 12-21-2009, 00:20 AM Parent: #37
ودشيقوق سلامات والله حسان ود عمتك الليلة لو عندو كراكة كان جاب الدولارات بالشوالات . ما عارف فاتت علينا دى كيف . مرقنا لا ذهب السودان ولا كراكات أمريكا . يا الطيب خبر ود حامد شنو ؟
Post: #47 Title: Re: الليلة الجليد حدو الركب Author: Osman Musa Date: 12-21-2009, 04:03 AM Parent: #41
سيف اليزل انشاءالله الحال زين . والله خايف على أخوى محمد النيل . الزول ده ضارب وين مع الجليد العجيب ده .
Post: #46 Title: Re: الليلة الجليد حدو الركب Author: Osman Musa Date: 12-21-2009, 03:59 AM Parent: #40
سامى عتبانى يازول أنت وين ؟ ما شايفك فى الجهات ديك . .. اعمل حسابك بعد اسبوع تانى نازل الا تلبس كعب عالى مترين . ربك يهون
Post: #48 Title: Re: الليلة الجليد حدو الركب Author: Osman Musa Date: 12-21-2009, 04:09 AM Parent: #46
كوستاوى والله خايف على ناس عمك عبدالله . حتى التلفون قاطع . معقول ميرلاند وصلت كدى ؟؟
Post: #49 Title: Re: الليلة الجليد حدو الركب Author: سيف عبد العزيز Date: 12-21-2009, 05:50 AM Parent: #48
عثمان أخوى
أنحنا هنا فى كونيكتيكيت الحكاية وصلت قدمين والدنيا باردة نخرة كلب بس وانحنا فى جنس الحالة العلينا دى طبعا البنيه عاوزه تلعب بره فى التلج وبديت ألبسها فى ملابس البرد أكتشفنا أنو البوت بتاعها بتاع الجليد بقى أصغر منها (قول ماشاء الله باقى عيال البلد دى رجليهم بتكبر كل يوم رجلين حراميه بس)
أها عشان اطلع العربية وامشى اشترى بوت انا بحفر لاكثر من ساعة اتذكرت ايام الثانوى وكنا شغالين طلبة مع عمك الاسطى الطعيمة فى الابيض. بعد خراج روح طلعنا العربية ومشيت رجالة ساكت وعينى فى راسى اشتريت البوت بالشئ الفلانى وجيت راجع عشان ألبسها واوديها برة تلعب يعنى ميته وخراب ديار تعب جلد وخسارة جيب وبرد يذكرنى شاهى الحاجة فى السودان باللقيمات
غايتو ربنا يصبركم يا ناس فرجينيا انحنا لو قدرنا نحفر لينا قد يطلعنا من الحفرة دى بنحاول نفزعكم
Post: #53 Title: Re: الليلة الجليد حدو الركب Author: Osman Musa Date: 12-21-2009, 05:33 PM Parent: #50
يا سامى عتبانى عاين عربيتك دى جكنت كلوكلو . ولا بتطلع ولا حاجتيين . شوف بس تمشى تجيب المضرب بتاع تايغر وودز وتقع فيها خبت . أخبت يازول . دشدش ابوها زاتو يمكن يطلع ليك تعويض . يازول ما كنت مرتاح هناك ولا جليد ولا حسكنيت مالك ومال التلاتل دى .
الاخ المكرم عثمان تحية طيبة لك منظره مهيب جداً تخاله ثقامه شيخ هرم قد مل الدنيا وإشتهى الرحيل يبعث على الإكتئاب ، يتغلغل فى الأعصاب يزكرك بالإياب لدار الدفء وبلد الأحباب ... من غيره !! الجليد وصل إلى 30 سم هنا فى Rosedale .
Post: #56 Title: Re: الليلة الجليد حدو الركب Author: Osman Musa Date: 12-21-2009, 06:47 PM Parent: #51
يا فضل الصادق معقول وصل 30 سم فى جهاتكم ؟؟ يازول Bosedale دى ما بعيدة من ال J F K ترجع طوالى . تعال فى الصيف بس .. ده حال احسن منو الملاريا عديل .
Post: #52 Title: Re: الليلة الجليد حدو الركب Author: Osman Musa Date: 12-21-2009, 05:14 PM Parent: #49
سيف عبدالعزيز حولا Connecticut يازول . يا سيف جهات كونيكتيكيت ونيوهافين ديل ابرد حتات فى البلد دى . غايتو بس تعبى جيوب الجاكت لقيمات . وفى البيت يكون عندك 3 كفتيرات النوع الكبير .
Post: #54 Title: Re: الليلة الجليد حدو الركب Author: Osman Musa Date: 12-21-2009, 05:40 PM Parent: #52
الولايات المتحدة يومي السبت والاحد تحت الثلوج مما أدى الى إحداث اضطرابات في وسائل النقل العام والملاحة الجوية وعطل المتسوقين في الفترة التي تسبق عيد الميلاد.
وكان من المتوقع أن يصل سمك الجليد نحو 56 سنتيمترا حتى يوم السبت في منطقة بالتيمور وواشنطن وهي كميات تزيد عن الثلوج التي تسببت فيها أي عاصفة ثلجية في المنطقة منذ فبراير شباط 2003 مع انتقال الرياح شمالا الى نيويورك ونيو انجلاند.
وكانت الثلوج تسقط بمعدل خمسة سنتيمترات في الساعة مما أدى الى إلغاء أغلب الرحلات الجوية في ثلاثة مطارات رئيسية بمنطقة واشنطن قبل اغلاق اثنين منها وهما ريجان وبي.دبليو اي حتى صباح يوم الأحد. كما أضر تعطل الرحلات الجوية وإلغاؤها بمطار فيلادلفيا الدولي.
وربما تؤثر هذه العاصفة بشدة على مبيعات التجزئة في واحدة من أكثر الفترات رواجا.
وأعلن ادريان فنتي رئيس بلدية واشنطن حالة الطواريء بسبب الثلوج وطلب من سكان العاصمة الامريكية الابتعاد عن الشوارع في الوقت الذي تواجه فيه واشنطن ما أسمته احدى المحطات التلفزيونية "العاصفة المانعة للتسوق".
وألغت واشنطن خدمة مترو الانفاق في المناطق التي تسير فيها القطارات فوق الارض وأوقفت كل خدمات الحافلات بحلول بعد ظهيرة يوم السبت لان الشوارع غير صالحة للسير.
وظل هناك تحذير قائم من هبوب عاصفة شديدة حتى وقت متأخر من صباح يوم الأحد.
واستمرت الملاحة الجوية في المطارات الرئيسية الثلاثة ولم تبلغ سوى عن عمليات تأخير محدودة لكن شركات الطيران ألغت مئات الرحلات الجوية وكانت الرحلات التي انطلقت بالفعل محدودة.
كما أن خدمات مترو الانفاق ظلت قائمة لكن المسؤولين حذروا الركاب من احتمال تعرضهم للتعطيل.
ومن المقرر أن يبلغ المسؤولون المواطنين بالأثر الذي أحدثته العاصفة وخططهم لمواجهة تلك الآثار خلال مؤتمر صحفي صباح يوم الأحد.
وتضررت القطارات أيضا بسبب الثلوج. وقالت فارناي جراهام المتحدثة باسم شركة امتراك للقطارات ان رحلات القطارات بامتداد الممر بين بوسطن وواشنطن تأخرت بما بين 30 و60 دقيقة. كما أنه كان هناك تأخير ما بين ساعتين وثلاثة في المسافات الطويلة.
وأعلنت حالة الطواريء في كل من ولاية فرجينيا وولاية ماريلاند وتم استدعاء قوة الحرس الوطني لمواجهة العاصفة.
وأسفرت هذه العاصفة عن مقتل امرأة واحدة. وقالت ادارة مواجهة الطواريء في فرجينيا ان امرأة عمرها 68 عاما لقيت حتفها في حادث سيارة بجنوب الولاية ليل الجمعة.
وأسفرت الأمطار التي تسببت فيها عواصف الاطلسي القوية عن فيضانات في فلوريدا وجورجيا وساوث كارولاينا في وقت سابق هذا الاسبوع.
Post: #55 Title: Re: الليلة الجليد حدو الركب Author: بكري عباس علي Date: 12-21-2009, 06:12 PM Parent: #54
شباب امريكا
الله يعينكم ياخ
واحدة من امنياتي منذ الصغر انو امشي حتة فيها جليد عشان اتزحلق وكدة ولكن
بعد صوركم وكلامكم دا غيرتا رايي عديل كدة ياخ لمن بردتا معاكم رغم انو درجة الحرارة عندنا 30 مئوية
الله يعينكم
Post: #57 Title: Re: الليلة الجليد حدو الركب Author: Osman Musa Date: 12-21-2009, 08:08 PM Parent: #55
والله أنت محظوظ يا بكرى عباس . محظوظ انك ما جيت البلد ام جليد دى . يازول هسع انا اسنانى تطاقش اسبوع كامل . وبفتش فى فرامل اسنان .
Post: #58 Title: Re: الليلة الجليد حدو الركب Author: Osman Musa Date: 12-22-2009, 01:13 AM Parent: #1
Post: #59 Title: Re: الليلة الجليد حدو الركب Author: Osman Musa Date: 12-22-2009, 02:47 AM Parent: #58
حتى الان التحذيرات شديدة من أن السفر قد يكون بالغ الخطورة . ربنا يحفظ الجميع
الجـليد عـندنا فـى شـادى قـروف ارتفاعـه قـدمين ,ودرجـه الحـراره انخفضت الـى حـوالى 10 درجات تحت الصفر ومـن اليوم داك مكرفسـين فـى اخـر كورنه.
Post: #61 Title: Re: الليلة الجليد حدو الركب Author: محمد النيل Date: 12-22-2009, 04:49 AM Parent: #60
حد الركب بس؟ انت كان كدى ماشفت الجليد تعال بوسطن وقت الجليد الجد ما ح تعرف عربيتك الا بالأريَل بتاع الراديو تعمل فى قطعة دلقانة ملونة اعلى الاريل عشان تفرز سيارتك من باقى العربات المدفونة
تحياتى ياود موسى
قول جليد حدو النخرة عشان تلفت انتباه بورداب بوسطن انا دخلت بوستك دا بعد وساطة قام ليك بيها اخونا سيف اليزل ماتنسى تشكرو كِوَيِّسْ؟
Post: #64 Title: Re: الليلة الجليد حدو الركب Author: Osman Musa Date: 12-22-2009, 05:29 AM Parent: #61
عزيزنا محمد النيل ها زول ها ياتو قطعة دلقانة ملونة على الاريل ؟ انا هسع شغال تفتيش عن عربات الجيران بالجهاز بتاع كاشف الذهب . التلفزيون يا محمد يوم الجمعة قال كلام والحصل ده كلام تانى . جد . القصة كبيرة . ربك يستر على الناس .
Post: #62 Title: Re: الليلة الجليد حدو الركب Author: Osman Musa Date: 12-22-2009, 05:07 AM Parent: #60
كيف حال العم عبدالله والأسرة الكريمة . والله يا عم عبدالله بس البركة فى ال Metro ده . لو لا المترو كان يكون احسن ليك تشتغل فى واشنطن وتسكن فى الجريف شرق . وايهاب يكون شغال فى TAKOMA وساكن فى العيلفون مربع 8 . سلامات
Post: #63 Title: Re: الليلة الجليد حدو الركب Author: Tragie Mustafa Date: 12-22-2009, 05:29 AM Parent: #62
غايتو كتلتونا بالضحك يا ناس امريكا الجرسه يا اخي ما تجوا تشوفا الردوم النحنا فيه ده؟؟ بالله امشوا طلوا لابوست بتاع عمر احساس وشوف (كبر) صمرو الثلج كيف وقال عادي في كلجري!!
يا اخي ناس ثروت وكبر ومنثور المفتاح ديل من قبل شهر هم وصلوا -50 وناس وينبك ديل ناس ابنوس ديل خلوهم ساي حاجه غريبه وعجيبه خلاص قالوا!
اها نحن ناس اونتاريو ديل قال الكندين بيضحطوا علينا ومسمينا (شريط الموز) يعني بلادنا حاره شديد ونحن ابد منكم مليون مره!!اها لكم ان تتخيلوا باقي كندا!!
Post: #65 Title: Re: الليلة الجليد حدو الركب Author: محمد النيل Date: 12-22-2009, 05:58 AM Parent: #63
العربية اللى ماناسين فيها خاتم دهب ول اى ذهب ما ح تلقاها لانو الجهاز ما ح يصفر والامريكان ما شغالين بالدهب حفِّر حفيرك ساكت
فى الاسنو الجاى اتسلف غويشة من زوجتك خليها فى الطبلون ولو ما متزوج انتظر الصيف ح تلقى عربيتك ول اقول لو متزوج واحدة فى السودان دبِّل واحدة تانية هنا عشان تراجى تتغاظ ههههههههههه نحنا قعد نفتش عرباتنا هنا بالكلب البوليسى
سمعنا انو الزول مابكون بردان شدييييد , البرد الناشف , البعمل القشف داك والا البرد الطري الناعم زي الجليد في حكايات اليس في بلاد العجايب البخلينا نشتهي التلج , الجليد المربوط عندنا باحتفالات الميلاد والشمبانيا , كلمونا عن احاسيسكم هل هي نفس الاحاسيس لمن تكون في مطرة شكشاكة كدة والجو لذيذ يخلي الزول مبتهج وضاحك والا زي هبوب السودان المزعج داك وبخلي الزول صاري وشو وزهجان من الدنيا , كلمونا عن بتستحملوا البرد الزي دة كيف وانتو الجايين من بلاد عقاربها بتطلع برة من الحر وابلها بتنهك من السموم , خلونا نعيش احاسيسكم فقبل هذا البوست كنت احسدكم على التلوج
Post: #75 Title: Re: الليلة الجليد حدو الركب Author: Osman Musa Date: 12-22-2009, 06:10 PM Parent: #69
يا عوض هارون يا أخوى سموم السودان دى أحلى شىء . والحر ؟ الحر يا حليلو . مشتهين يا عوض الهبوب ديك والعقارب والحمير . يا عوض ده جو يخليك مدبرس اسبوع وصارى وشك شهرين . والله حظك يا عوض ضارب الفيافى وحليب المراعى حظك .
Post: #73 Title: Re: الليلة الجليد حدو الركب Author: Osman Musa Date: 12-22-2009, 05:39 PM Parent: #67
ود شيقوق هى شمس الجن دى تفقع متين ؟ وكت يسوح يا الطيب بروح المجارى طوالى . المجارى هنا دنيا . عالم تانى . يعنى مافى مرانع . والوزين يا الطيب هنا شحمان شحم السنين وجميل جمال عجيب . يا حليل النعام ادم . البلد دى يا الطيب بلد عظيمة شديد . بس الاسنو يدبرس . ويخليك تسرح وترجع للبلد حقتنا .
Post: #72 Title: Re: الليلة الجليد حدو الركب Author: Osman Musa Date: 12-22-2009, 05:23 PM Parent: #66
ياثروت ناس عمك حامد سليمان محتاجين لى كم كونتينر ثلج كونتينر النوع الكبير تسليم جمارك الجيلى . ربحك مضمون يا ثروت . والبضاعة عندك مجان . بس تكاليف الشحن والكونتينر . 100 ألف لوح فى 4 دولار مش بطالين . وتكون أول سودانى عمل IMPORT _ EXPORT فى الثلج من كندا . اسمع لو عم كمال موافق على الموضوع انا ما عندى ما نع أمسك التوزيع وكمان عندى بوكس 81 ههههههههه هو عليك الله الواحد يقدر يضحك فى البرد ده ؟
على كل حال عمك كمال عنده راي في البزنيس بشكل أيدولوجي فحقو ما تستشيروه في امور زي دي مجرد نصيحة
لازال التلج عندنا مدور الشوارع حالتها صعبة
تحاياي يا كبانية
Post: #71 Title: Re: الليلة الجليد حدو الركب Author: Osman Musa Date: 12-22-2009, 05:09 PM Parent: #65
يا محمد النيل يا أخوى كلب بوليسى فى الاسنو ده ؟ والبحلنى من ناس حقوق الحيوان تانى شنو ؟ يازول الحل بس 6 شهور فى السودان 6 شهور هنا . وكمان لو عندك كراكة يكون شهرين هنا و10 هناك فى جبل الذهب .
Post: #70 Title: Re: الليلة الجليد حدو الركب Author: Osman Musa Date: 12-22-2009, 04:53 PM Parent: #63
ياتراجى قولى لى منصور المفتاح ود عمو قاسم ود الشيخ باع الدكان حقو . قال فتر . والجليد جابلو وجع بلابيط .. الزول كسح . بلا دولارات بلا وجع ركب .
عثمان اخوى احسن ليكم ترجعوا بلد العزاز والبادوب والباشندى
هسع دحين بتقدر تفرز الواطة الماشي فيها اكان عزازة او باشندية ؟
اها يا اخوى المقابر عندكم كيف ؟ اوع الناس بتقلم الالواح ويدفسوا المرحوم جواها وتقوم تفقع الشمس تسوح التلوج ويبقى المرحوم برة في الصقيعة.
Post: #76 Title: Re: الليلة الجليد حدو الركب Author: Osman Musa Date: 12-22-2009, 08:12 PM Parent: #74
يا الطيب شيقوق انا ما فى وأحد فى أهلى الهناك شاف الثلج الا فى كوارى الكركدى . الواطة كلها عندنا عزازة وباشندى وقريره . كرد مافى يا الطيب . السودان ده أجمل واطة وأسمح جو . بس السياسيين حقننا رهو ساكت وما عارفين . كلام فى كلام والعمر كاسح والجليد عامل فى المهاجرين عمايل . المقابر ؟؟ هههههههههه . المقابر يا الطيب هنا مقابر خمسة نجوم وفى مقابر نجمتين ونجمة وبعدين شواهد المقابر يا الطيب اسكت ساكت .
عارف يا ود شيقوق الولايات الفوق دى كلها صبحت جليد . طبعن القصة دى بتصلح الأقتصاد الذى قد تهكع . يعنى بعد 6 شهور الوظايف هبطرش . يا سبحان الله
Post: #79 Title: Re: الليلة الجليد حدو الركب Author: Osman Musa Date: 12-22-2009, 10:22 PM Parent: #78
يا محمد النيل انا خايف جليد الولايات الفوق ديل بعد يسيح يقوم الاطلسى يدق فى كسلا . والله شايل هم ناس بوسطن . السبت الفات يكون الفرى ماركت كو .
Post: #80 Title: Re: الليلة الجليد حدو الركب Author: محمد النيل Date: 12-23-2009, 00:44 AM Parent: #79
يا عثمان دا كلب بوليسى بشم من مركز البوليس وبرسل ليك إيميل!! ههههههههههه خيال واسع
Post: #81 Title: Re: الليلة الجليد حدو الركب Author: Osman Musa Date: 12-23-2009, 04:33 AM Parent: #80
إجتاحت عاصفة ثلجية كبرى شرق الولايات المتحدة أمس مما تسبب في الدعوة لإعلان حالة الطوارئ في بعض الولايات وحالة من الفوضى في المطارات وانقطاع الكهرباء عن آلاف المنازل وتقطع السبل بمئات من قائدي السيارات. وأصدرت الإدارة الوطنية لشؤون المحيطات والغلاف الجوي تحذيرات من وقوع عواصف شتوية شديدة وفيضانات ساحلية عبر ولايات وسط الأطلسي حيث تراكمت الثلوج بارتفاع ما بين 33 و66 سنتيمترا.
( من اخبار الصحف )
Post: #83 Title: Re: الليلة الجليد حدو الركب Author: Osman Musa Date: 12-23-2009, 05:21 PM Parent: #81
يا شيقوق الحمدلله الليلة اليوم شمس . والجليد المسنوح قاعد لاساح لا ماع .
Post: #84 Title: Re: الليلة الجليد حدو الركب Author: Osman Musa Date: 12-23-2009, 07:30 PM Parent: #83
واشنطن: قتل خمسة أشخاص في الساحل الشرقي للولايات المتحدة السبت جراء العاصفة الثلجية التي تعد الأسوأ منذ ست سنوات التي ضربت السواحل الشرقية الأمريكية وتسببت في إلغاء مئات الرحلات الجوية وحصول حالة فوضى على الطرقات مع تراكم الثلوج.
وذكرت هيئة الاذاعة البريطانية " بي بي سي" ان مستوى سقوط الثلج ارتفع إلى أكثر من 30 سنتمترًا فيما تحذر الأرصاد الجوية من هبوب رياح عاصفة تبلغ سرعتها 64 كيلومترا في الساعة.
ويتوقع أن يبلغ منسوب الثلج في منطقة واشنطن دي سي ـ بالتيمور إلى 55 سنتمترا ليكون الأعلى منذ عام 2003.
وتتحرك العاصفة شمالا باتجاه مدينتي نيويورك وبوسطن، اللتين يتوقع أن يبلغ علو الثلوج فيهما 35 سنتمترا. وكانت حالة الطوارئ قد أعلنت في العاصمة واشنطن وأغلق مطار ريجان الوطني خلال الليل.
وذكر راديو " سوا" الأمريكي ان سلطات الملاحة الجوية في العاصمة الفدرالية التي غطتها طبقة كثيفة من الثلوج اعلنت أن معظم الرحلات ألغيت في مطار واشنطن الدولي، نقطة انطلاق ووصول الرحلات الجوية الدولية وفي مطار ريغان ناشيونال الذي يستخدم للرحلات الداخلية.
من جانبه، أعلن مطار جون إف كينيدي الدولي، أكبر مطارات نيويورك، تأخر العديد من الرحلات وناشد المسافرين التحقق مقدما من حالة الملاحة مع الشركات.
وتوقعت أجهزة الأرصاد الجوية أن تصل كثافة طبقة الجليد إلى 60 سنتمر ليلة السبت الأحد. وفي فرجينيا، أعلن حاكم الولاية تيم كاين حالة الطوارئ.
وحثت إدارة النقل بالولاية سائقي السيارات على الابتعاد عن الطرق الطويلة، قائلة إن طرقا كثيرة في المناطق الغربية تعتبر خطيرة.
وقال ادريان فينتي رئيس بلدية واشنطن التي بدأت الثلوج تتساقط عليها منذ مساء الجمعة "كل المؤشرات تدل على إننا نواجه عاصفة غير عادية بل وربما تكون الأسوأ منذ سنوات."
وأضاف متوجها إلى السكان "إذا لم تكن هناك ضرورة ملحة فمن الأفضل لكم البقاء في المنازل"، مشيرا إلى أن تساقط الثلوج سيتوقف صباح الأحد.
واعترفت الأجهزة البلدية بأنها تواجه صعوبة كبيرة جدا في العثور على كاسحات ثلوج وعلى مواد تذويب إضافية.ويتوقع أن تصل العاصفة إلى مدينة نيويورك التي أعلنت بدورها حالة التأهب مع انتظار تساقط من 20 إلى 30 سنتمر من الثلوج.
Post: #85 Title: Re: الليلة الجليد حدو الركب Author: Osman Musa Date: 12-24-2009, 00:46 AM Parent: #84
يا دوبك فقعت شويتين
Post: #86 Title: Re: الليلة الجليد حدو الركب Author: Osman Musa Date: 12-24-2009, 05:40 PM Parent: #85
