Post: #1
Title: فاطمة يابا و ضحكتها الحلوة الصَبوحة
Author: محمد الفاتح خالد حسون
Date: 12-18-2009, 07:16 PM
Parent: #0
فاطمة يابا
فاطمة يابا
و ضحكتها الحلوة الصبوحة
لما تقعد
و تحكي للناس عن طموحها
في عيونها قدرتا يابا
أسامح الدنيا و جروحها
ـــــــــــــــ
فاطمة قامت للعشاء
والنار تلهلب في الحشاء
يا يابا لو كان بي مرادها
الشمس نص الليل حا تشرق
مهما طال يا ليل رقادها .. مكلبشة
ولييكي تسجد يا بلادي
يا يابا لو كان بي مرادي
ــــــــــــــــ
زقاق مقبل للعواصم
حافلة شاقة الامسيات
فراشة ركت للبراعم
كان تلاقي الضحكة مدخل
كان يكون يا فاطنة طاعم
جلدك الدبقوهو ناعم
خلي طعم الببسي حنضل
ببسي كولات المطاعم
ــــــــــــ
لو أخو الطورية منجل
ياني خيك
لو اخو السكينة خنجر
ياني خيك
إنتي ما فد سمسمايا
وردة نبتت للتركتر
تف علي الدنيا أم بنايا
الاسد في عرينو زمجر
اتكفرن السماء من سحابو
سلي صوتك سيف وبرجل
ـــــــــــــــــ
لو مطرت أحزان سمانا
بتشدي اوتار الكمنجة
يا طلقة في أخر الطبنجة
طبنجة في ايدنا الجبانة
ماني غامض ماني حامض
لو انتي في التربة اندفنتي
حي كلامك ولسي صامد
وانتي يا فرحة ضنايا
انتي ما فد سمسمايا
فيني ضيك وانتمايا
و شوكة تتطعن في العضوم
وتنزف الاييد الشديدة
الليلة ما غطي الجراح قدح العشم
ولا لحس عسلك مديدة
ولا لسع ... نحل الغرام قبلك لحم
وصحي وجدانا بقصيدة
ـــــــــــ
خشمك ملح
موتك صبح
فرح اندياح عود الطلح
راكوبة عارشاها الكتابة
ومن غوناء القول السمح
راكوبة السكنوا الكابة
تفاحة في حقل القمح
انتظرنا المجد عشرة سنين وثورة
وفي قلبك النازف رمح
يا وطن ما قدرو نيل
ولا بحيط ساحتو ضول
ولا بئن ساعت الضبح
ـــــــــــــ
نحنا صدقنا النصيحة
جهزنا سكين الضبيحة
جينا بي المركب نكركب
نمسح اثار الفضيحة
ــــــــــــــ
لقينا في القاع البنية
جثة في الموج مستريحة
جثة في الاعماق تحدق
للسماء الحرة الفسيحة
ـــــــــــ
في الحظة ديك قررتا يابا
لما تقسي الدنيا اضحك
وابتسم رغم الكابة
إلا بس لي الراقدة ديا
تاني راجع للكتابة
راقدة في الموج مونكفية
العيون الميتة تحلم
بي الاماني السرمدية
ــــــــــــــ
فطومة حردانة العشاء
عرقانة رغم الكندشة
يا دنيا اه لو ب مرادها
يا دنيا اخ لو بي مرادي
الشمس نص الليل حاتشرق
وليكي تسجد يا بلادي
مهما طال يا ليل رقادها
مكلبشة
|
Post: #2
Title: Re: فاطمة يابا و ضحكتها الحلوة الصَبوحة
Author: omar altom
Date: 12-18-2009, 08:10 PM
Parent: #1
Quote: الشمس نص الليل حاتشرق
وليكي تسجد يا بلادي
|
شاعرنا الفذ محمد الفاتح
والله لقد مسني طرب شفيف وانا اقرأ سطور ـ ومابين سطور ـ هذا النص الجميل....
لاول مرة اعرف ان القصيدة لها رائحة...
رائحة الارض....
الناس...
الوطن...
الاحلام...
.
.
.
.
.
.
.
داوم علي الكتابة ياصديق
وكن بالف الف خير
|
Post: #3
Title: Re: فاطمة يابا و ضحكتها الحلوة الصَبوحة
Author: محمد الفاتح خالد حسون
Date: 12-18-2009, 09:00 PM
Parent: #2
أخ عمر التوم
أخو فاطمة و لا خالها
و ما مهم صلة القرابة
دا من دواخلك المرهفة
و تشكر علي السندة
تحياتنا لفطومة التي علمتنا ان الكلمة سلطان لا يحكمها غير ضمير صاحي ..
|
Post: #4
Title: Re: فاطمة يابا و ضحكتها الحلوة الصَبوحة
Author: سيف اليزل برعي البدوي
Date: 12-19-2009, 02:02 AM
Parent: #3
Quote: فطومة حردانة العشاء
عرقانة رغم الكندشة |
صديقي محمد
ما أروعك وأنت تغني للغلابة والغبش
الناس الجارية وشقيانة
الناس الفي الشوارع الخلفية
ومافي زول حاسي بيها
لكن صدق الكلمة يطعن السيف بوردة
فتظن الهمس رعدة
لك خالص الود
سيف
|
Post: #5
Title: Re: فاطمة يابا و ضحكتها الحلوة الصَبوحة
Author: محمد الفاتح خالد حسون
Date: 12-19-2009, 02:34 AM
Parent: #4
الاخ سيف اليزل البرعي
السلام يا منتهي الود
Quote:
الناس الجارية وشقيانة
|
يـــــــــــاكا المكابرني
و عارفك في حق الناس دي لا تخشي لوم او كبير قوم غير الحق و الورد في وش السيف
عامل كيف مع البرد العردلي ...
عسي ان تكون بردا و سلاما.... فاطمة و ضحكتها الحلوة الصبوحة .. ما كان بتملك غيرها..
|
Post: #6
Title: Re: فاطمة يابا و ضحكتها الحلوة الصَبوحة
Author: محمد الفاتح خالد حسون
Date: 12-19-2009, 04:09 PM
Parent: #5
[
لمحتك يابسة وسط الموج
وهودج بي الفرح مسروج
لمحتك بين حوارى الريف
مغيبه عن عيونى قصد
ورغما عن هموم لوقياك
وقصبا عن همومى بسط
اعيش وسجل حياتى نظيف
عفيف
ورغما عن حوافر الريح
ما هدا شتلي خريف
تحت راكوبة فارشو قنا
ولا ساجور زمان الزيف
قدر يا خاله عودنا تنى
وجنس الحالة ما تخريف
نسامح الدنيا بي محنها
سماحة الدنيا ليكي تقيف
لمحتك انا
لمحتك يابسه وسط الموج
درب معوج
و سكة زول رحيلو دنا
معاك الدنيا ما ناقصة
معاك افراحي فايتة الحد
رموش عينيك شموس بي نظرتك تشتد
وفي بر الامان راجيك
عليك كان بجرف التيار
وكان لى ضفتك برتد
و ذي ضلك انا مباريك
و شايل الورد
تدلى النجمة للموجة
وتعدلى خطوة معوجة
عترة تصلح المشية
جيتك لى ما غشيا
جيتى وكنت متاكد
عيونك شوفتى مشتهيه
جيتى وشائلة فى الاكتاف
نجم بنشاف
بنعبر والشراع مكسور
ايادى مشابكم مجداف
مصيروم سكه ما حا تطول
رابط بينهم المجهول
إسمك في الطريق عنوان
/center]center]
|
Post: #7
Title: Re: فاطمة يابا و ضحكتها الحلوة الصَبوحة
Author: بشير خلف الله علي
Date: 12-20-2009, 06:02 AM
Parent: #1
الاخ / محمد الفاح
دي فاطمه السمحه يامحمد
بعد فراق
وضحكتها الحلوه الصبوحه
رغم الماسي
ما حكت للناس عن ظروفه
في طريق اللبن ولم الفحم
ما كان الاقتراب فكره
ده الواقع عشناه بالفطره
والليله اخير من بكر
وياخوفي من بكره
لما البعاد طال
وصورتك اتمحت من الزكري
واتحطم طموحه
ودرب الوصال اصبح محال
|
Post: #8
Title: Re: فاطمة يابا و ضحكتها الحلوة الصَبوحة
Author: محمد الفاتح خالد حسون
Date: 12-20-2009, 05:49 PM
الاخ بشير
Quote: دي فاطمه السمحه يامحمد
بعد فراق
وضحكتها الحلوه الصبوحه
رغم الماسي
ما حكت للناس عن ظروفه
في طريق اللبن ولم الفحم
ما كان الاقتراب فكره
ده الواقع عشناه بالفطره
والليله اخير من بكر
وياخوفي من بكره
لما البعاد طال
وصورتك اتمحت من الزكري
واتحطم طموحه
ودرب الوصال اصبح محال |
مالك داير تَقوم عليناالمفردات تاني ياخي ..
ما شايف الجليد البرا دا .. جهز و استعد لي استقبال الاخ بابكر حسان ..سريع
وانا علي ب المكان ... انشاء الله
يا خال ... فاطمة .. تسلم علي المرور و رهافة حسك ..
|
Post: #9
Title: Re: فاطمة يابا و ضحكتها الحلوة الصَبوحة
Author: إخلاص محمد أحمد
Date: 12-20-2009, 09:30 PM
Parent: #8
كل التحايا و تسلم استاذ محمد الفاتح ,احببت الدقة والبساطة مع السلاسة في الوصف
يالها من كلمات جميلة صادقة من القلب , تدخل قلوبنا بلا استئذان فتصحي روح المحبة والتعاطف لفاطمة وابوها وكل اهلنا الطيبين .
|
Post: #10
Title: Re: فاطمة يابا و ضحكتها الحلوة الصَبوحة
Author: محمد الفاتح خالد حسون
Date: 12-20-2009, 10:36 PM
Parent: #9
السلام
الاخت اخلاص محمد أحمد
شكرا علي المرور و المداخلة
لو ما الكلمة امانة في عنق زول ما كان كتب جملة بعد حميد ومحجوب و درويش و الباقين
و الطيبات يا بت محمد أحمد شكرا علي همتك .. و دي كلمات اعتزا بيها.. و نابعة من دواخل مرهفة
كان تلاقي الضحكة مدخل !!!
|
Post: #11
Title: Re: فاطمة يابا و ضحكتها الحلوة الصَبوحة
Author: محمد الفاتح خالد حسون
Date: 12-24-2009, 00:45 AM
Parent: #10
بَحا صـــــــــــوتي عليـكـ بنادي ...
يا العيونكـ هن بــــــــــــلادي ...
|
|