Post: #1
Title: ضهّوبي .... نوارة فريقنا (لا تنتمي إلى الواقع)
Author: Hani Arabi Mohamed
Date: 12-15-2009, 12:56 PM
ضهوبي .... راجل مسكين .... رحل لحلتنا ليه فترة طويلة.
قبل أكتر من 22 سنة ... ظهر ضهوبي في الحلة مع عم سيد السمسار وكان بتفرج في البيوت المعروضة للبيع.
واختفى بعدها فترة سنتين ما في زول شافوا
بعد فترة أصبحنا الصباح لقينا ضهوبي خاتي كرسيه قدام بيت عم صديق اللي في الناصية
رحل متين ؟ جاب عفشه متين ؟ وقبل دا كله اشترى البيت دا متين ؟
ما في زول عارف إجابة .
لكن نحن ما دايماً ناس طيبين .
رحبنا بالجار الجديد ، أكرمناه ، ضبحنا ليه .
وكان دايماً زول مضيوف ....ضيوف من الأقاليم وضيوف من برا البلد .
***************
صحينا بليل على هوهوة كلاب الحلة
في زول غريب دخل الحلّة والكلاب ما عرفته
طلعوا ليه ناس الحلة كلهم
لكن ضهوبي جانا طالع قال الزول دا عم حسين ضيفي وما في زول يجي جنبه وكتر خيركم يا جماعة
الناس رجعت في ليلها نامت في بيوتها
****************
وبقى عم حسين سيرة في كل لسان ,,,, ضهوبي بقول الزول دا ضيف ،،، لكن الزول دا ما بشبه الضيوف
خمس سنين والسؤال دا هو هو بتكرر
ضهوبي برجع بأكد إنو عم حسين مجرد ضيف وحيمشي
*****************
صحينا الصباح على مفاجأة :
عم حسين قال بيت ضهوبي دا بيته وداير يطرد ضهوبي ...
عم حسين اتكلم مع ناس الحلة واحد واحد وأثبت ليهم إنو البيت دا بيته هو وضهوبي هو الضيف
وأدى ضهوبي مهلة ليوم الجمعة وإلا ...
******************
الناس كلها انتظرت الجمعة
لكن الجمعة ما جات
يوم الخميس ما في زول شاف عم حسين وضهوبي عزم ناس الحلة كلهم ووراهم شهادة البحث بتاعة البيت وأثبت ليهم إنو البيت بيتو ووراهم برضو عقد البيع وجاب شهود البيع.
*******************
ما في زول شاف عم حسين بعدها
لكن في إشاعات كانت بتجي من بعيد عن ناس شافوا عم حسين ووصاهم يبلغوا ناس الحلة بإنو البيت دا مشترى بقروش عم حسين لكن الورق كان باسم ضهوبي
|
Post: #2
Title: Re: ضهّوبي .... نوارة فريقنا (لا تنتمي إلى الواقع)
Author: Hani Arabi Mohamed
Date: 12-15-2009, 01:00 PM
Parent: #1
كان يوم ما بتنسي .... بيت ضهوبي اتفلع بالطوب
ضهوبي جا جاري ومعاه واحد تاني لبرا البيت وكان بكورك ... فلعونا بالنبلة فلعونا بالحجار ... البتاع وقع في الهناي.
الناس كلها بتقول إنه البيت اتفلع بطوب
وضهوبي بحلف إنه البيت اتفلع بحجار
ما شفنا الناس الفلعو البيت
بس سمعنا إنه ناس الحلة البعيدة ديك أعلنوا مسئوليتهم عن الفلّيع بسبب مشاكل بينهم وبين ضهوبي
|
Post: #3
Title: Re: ضهّوبي .... نوارة فريقنا (لا تنتمي إلى الواقع)
Author: Hani Arabi Mohamed
Date: 12-15-2009, 01:06 PM
Parent: #2
مشاكلنا مع المناطق الجنبنا والمناطق البعيدة كترت في الفترة الأخيرة
رغم إنو كلنا في الحلة ناس طيبين ومساكين ومسالمين
لكن أي حِلّة تانية بتتهمنا إنو المشاكل كلها جاية من عندنا وتحديداً من بيت ضهوبي.
وسمعة حلتنا اتشوهت بعدما كان كل الناس بيحبوا حلتنا وحريصين على زيارتها وفرحانين بزياراتنا ليهم
***************************
ناس الحلة بقوا يتعبوا لمن يطلعوا لأي حلة تانية
نظرات الناس ... الشكوك ... طريقة التعامل
خلت مجرد التفكير في مغادرة الحلة عذاب
وبقينا نتحسر على أيام زمان
كنا بنفخر بحلتنا والناس كلهم بفرحو بينا لمن يعرفو إننا من الحلة دي
|
Post: #4
Title: Re: ضهّوبي .... نوارة فريقنا (لا تنتمي إلى الواقع)
Author: Hani Arabi Mohamed
Date: 12-15-2009, 01:10 PM
Parent: #3
خلال الفترة اللي قعدها ضهوبي وسطنا
الناس كانت بتستمع جداً بمشاركتو في الحفلات و الطرب
لأنو ربنا أداه موهبة "تعبير حركي إيقاعي" جميلة جداً
والناس بجو من آخر الحلة عشان يحضرو العرس
رغم إنهم ما بحبو ضهوبي
لكن "تعبيرو الإيقاعي" ما بتفوت
|
Post: #5
Title: Re: ضهّوبي .... نوارة فريقنا (لا تنتمي إلى الواقع)
Author: Hani Arabi Mohamed
Date: 12-15-2009, 01:16 PM
Parent: #4
ضهوبي بقى يشتري بيوت الحلة بتراب القروش
ويرمي أهلها يبيتو في الشارع
وبعد دا كله بيخلي البيوت دي فاضية
ما في زول فاهمه هو بعمل كدا لشنو ؟
ناس بقولو جايب أولاد عمو يسكنو في الحلة
لكن ما في زول شايف أولاد عمو ديل
البيوت فضلت فاضية
وسكنتها طيور صغيرة
وأهلها الأصليين لسع في الشارع
والاشاعات بقت تقول إنو عم ضهوبي اشترى البيوت دي عشان الطيور دي
طيب الطيور دي ما محتاجة البيوت دي كلها كان يبني ليها أعشاش في الميدان داك وخلاص ويخلي الناس في بيوتها
لا لا الزول دا ما اشترى البيوت دي للطيور وقرايبه جايين
ومرت عشرين سنة
لا الطيور قدرت تملأ مكان ناس البيوت
ولا شفنا أهله القالوا جايين
وأصحاب البيوت - عفوا السابقين - بقو شماشة ملو الحلة وبقو جزء مهم جداً منها
|
Post: #6
Title: Re: ضهّوبي .... نوارة فريقنا (لا تنتمي إلى الواقع)
Author: Hani Arabi Mohamed
Date: 12-15-2009, 01:19 PM
Parent: #5
كل سنة
بنشوف ضهوبي واقف قدام البيوت الاشتراها ومعاه ناس
بجو بصينوا البيوت دي ويجملوها بالألمونيوم والقزاز
ويمشوا
وفي الخريف كل اللي عملوه بقع
ونرجع نشوف نفس المنظر السنة الجاية
|
Post: #7
Title: Re: ضهّوبي .... نوارة فريقنا (لا تنتمي إلى الواقع)
Author: Hani Arabi Mohamed
Date: 12-15-2009, 01:23 PM
Parent: #6
الكلام على ضهوبي من الأحياء المجاورة كتر
حتى الحي اللي في آخر المدينة داك هددوا لو إنو مرق من الحلة ما حيشوف خير
ضهوبي سمع الكلام دا كويس وعمل الحكاية تحدي
بقى كل يوم طالع من الحلة لابس جلابيته وعمتو وشايل عصايته
يمشي أي حلة جنبنابالحيطة يشرب شاي مع ست الشاي
ويرجع الحلة تاني
ويقول لناس الحلة شوفو الجبانين ديلاك ... طلعت وما عملو لي حاجة
|
Post: #8
Title: Re: ضهّوبي .... نوارة فريقنا (لا تنتمي إلى الواقع)
Author: Hani Arabi Mohamed
Date: 12-15-2009, 01:27 PM
Parent: #7
ضهوبي لقى حكاية المرقة برا الحلة دي حلوة
والحكاية اتطورت من قعدات ست الشاي لحفلات الأعراس
بقى ناطي في أي عرس في أي حلة جنبنا
معزوم ما معزوم بتلقاه من الساعة 3 في بيت العرس
**********************
ناس الأعراس بقوا يتضايروا منه
لأنهم ما عايزين مشاكل مع نسابتهم اللي في الحي البعيد داك
*********************
آخر حاجة كل ألأحياء الجنبنا بقت تعمل حفلاتها في النادي في الحي البعيد داك
عارفين ليه ؟
عشان ضهوبي ما يمشي ينط ليهم
|
|