Post: #1 Title: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: بدر الدين الأمير Date: 12-08-2009, 09:43 PM
هذه الاغنية نبوة بشرى الحاصل اليوم في السودان
Post: #2 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: بدر الدين الأمير Date: 12-08-2009, 09:47 PM Parent: #1
ماطال في بحرك قي مي الكلام لحميد والغناء لمصطفانا: ماطل في بحرك في مي وتمرك مفدع بالجريد وشدرك أمد حد السمى طينك معتق بالطمى نبنيك أكيد نبنيك هوا نبنيك ايوا سوا سوا منو وجديد نبنيك جديد يا إيد ابوى على إيد اخوى عل إيدى انا يا إيد وإيد تجدع بعيد في لجة من راس ميضنة حيكومة الفقر الدمار الكُضبن والصهينة واللي نقاص ايامنا كاس اليالطيف سوس البحر نرجم قفاهو حجر حجر من ها الرصيف الماقدر قدام سريحة الموج يقيف المانستر الأرزقية وناس مو يا نسقيها كاس اسقتنا يا نوريها كيف عشق الحياة سنانا فوق حجر القصاص سوانا ناس ضرب البحر جوانا احر من الرصاص
نواصل باقى النص
Post: #3 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: عزام حسن فرح Date: 12-09-2009, 08:47 AM Parent: #2
Post: #4 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: بدر الدين الأمير Date: 12-09-2009, 09:25 AM Parent: #2
ياضو حبينبن القسا طول ما انت غرقان في الأسى تبت يدين ما ترمي فاس ما تبنى مجدك من جديد تفتح شبابيك الخلاص تدخل نسيمات النشيد بيت القصيد يستقبلا مستقبلا والحاضر الماضى التليد يا بلدى يافردت جناحى التانى وكت الناس تطير لي عالما واوجعة الزول البجيك ما يلقى فيك غير الهجر ناسا تواتى مسالمة كل البشاشات القبيل يلقاها ميتة مسممة والجاتا جاتا من الارض ما جاتامن تالا السما ما اعتى غبنك ياولد واعدل قضيتك واعظما لا ترجع السيف الجفير والدنيا فايرة مصادمة
نواصل باقى الاغنية
Post: #5 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: doma Date: 12-09-2009, 09:33 AM Parent: #4
Quote: يا بلدى يافردت جناحى التانى وكت الناس تطير لي عالما واوجعة الزول البجيك ما يلقى فيك غير الهجر ناسا تواتى مسالمة كل البشاشات القبيل يلقاها ميتة مسممة والجاتا جاتا من الارض ما جاتامن تالا السما ما اعتى غبنك ياولد واعدل قضيتك واعظما لا ترجع السيف الجفير والدنيا فايرة مصادمة
عزام ياخ حرام عليك طالبنا بسحب البوست بعد الكلام البغيض من قاسم ومنك وانت تصر على افساد هذا البوست ايضابنشر الغثاء على الجميع
لو كان هدفك لغت نظر الاخ بدرالدين للبوست للاجابة على تساؤلك ، فواضح انو بدرالين شاف البوست وبرد عليك... يعني متصور انو بدرالدين فجأة كده اتذكر الاغنية دي وجابا بدون مناسبة؟؟
الله يهدي النفوس
Post: #7 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: بدر الدين الأمير Date: 12-09-2009, 09:57 AM Parent: #5
من غير تجيب تار البلد ريح العوارض تهزما وتطرد مع ابليس الاخير دعة الضلال من جنتك يا آدما تاكل من الشجر الحلال يغشاك نعاس في ضل رمي تختاك هضاريب الصعب كربة ليالى المظلمة يا نيل قبل خاطرك يطيب ارضك تفزع باللهيب تكشح تواريب الغضب صعب المراس نوبة وزنوج وبجة وحلب رطانة عربان مو اشو ومولدين تلقانا او نلقاك ضو ضلمة لياليك العجاف رشة نهاراتنا النشاف آمنا بيك وموحدين في ايدنا فاس وقلم رصاص شتلة وكمنجة ومسطرين وطبنجة في خط التماس حراسة من كيد البكيد ضد الرصاص والانتكاس نبنيك جديد واشد باس
Post: #8 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: بدر الدين الأمير Date: 12-09-2009, 11:26 AM Parent: #7
Quote: صعب المراس نوبة وزنوج وبجة وحلب رطانة عربان مو اشو ومولدين تلقانا او نلقاك ضو ضلمة لياليك العجاف رشة نهاراتنا النشاف آمنا بيك وموحدين في ايدنا فاس وقلم رصاص شتلة وكمنجة ومسطرين وطبنجة في خط التماس حراسة من كيد البكيد ضد الرصاص والانتكاس نبنيك جديد واشد باس
زينب يابت الفحل هذه الاغنية هى نشيدى الوطنى ولم تفارق ذهني تلك الجلسة وكانت بمناسبة خطوبة اخونا الجعلى نوح عبدالواحد حين غناها مصطفى بالعود وإيقاع عبدالمنعم ورقص عليها الدنقلاى ودالخير رقيص على ايقاع الدليب لم اشهد له مثيل ادهش مصطفى واضحك الرزيقى مسعود ثم علق مسعود بان حميد شاعر انسانى متفرد
Quote: عزام ياخ حرام عليك طالبنا بسحب البوست بعد الكلام البغيض من قاسم ومنك وانت تصر على افساد هذا البوست ايضابنشر الغثاء على الجميع
يا زول إنت تطالِب ما تطالِب دي شغلة أنا ما بِتْهِمني كتير ... وأنا لو كُنت مُصِر أفسِد البوست ده كُنت نزلت الكلام بِضُبانتو ... وإنت مِن وين عِرفت إني < مُصِر > على إفساد البوست ده ... لأنو كِلمة < مُصِر > دي معناتا أنا جيت في البوست ده أكتر مِن مره ، وقنبت أشاتِر وأشتِت الكورة ... ــــــــ
Quote: لو كان هدفك لغت نظر الاخ بدرالدين للبوست للاجابة على تساؤلك ، فواضح انو بدرالين شاف البوست وبرد عليك... يعني متصور انو بدرالدين فجأة كده اتذكر الاغنية دي وجابا بدون مناسبة؟؟
طَيِب ما تِتَوقع إنو أنا برضو ذكي مِتلك كِده ، وعاوِز القارئ يُربُط بين قصيدة حميدة وكلام قاسم المهداوي كاتِب البوست المُعفِن الأنا جلبت هِنا الرابِط بِتاعو ... ما تَفترِض إني إفترضت إنو بدرالدين الأمير قرا بوست قاسم المهداوي ، وطنش وأنا عاوِز أحتج على طناشو ، قُمت جبت الرابِط ... بس إنت إفترض الحاجة الساهلة ... القريبة مِن الجُواك < عزام عاوِز يِفْسِد البوست ده > ...
وعلي بِالطلاق بِالتلاتة ، هسع بدرالدين الأمير معاي في التلفون وقال لي لولا الرابِط بِتاعي ما كان شاف بوست قاسم .. أها شِنْ قولك؟
وإنت بكري عَينك ألفا ولا شنو؟ أنا بكتِب العاوِز أكتِبو ، ما باخُد رأيك ولا شورتك ... بطِل تقوم بِالدور ده معاي ... ــــــــ وبعدين عِنوان البوست ده الخايِف عليهو مِن الفساد برضو فوقو إعِتِراف بِمُفردة < حلب > ودي ما بِتْنقال في السودان إلا على سبيل السَب وتقليل مِن شأن الفرد ... ده بوست ما عاوزني أفْسِدو ...
... يا عَزّة السودان يمين جوَّاي مُــدّاح الرسول جواي نيل هدّار يعم كل السهول جواي نقارة وطبول جواي نحاس في الليل رزم جواي شوق لا ونَّ لا مرّة انهزم جواي جروف جواي حروف منتظره عِـنْ باب العشم جواي بلد تشكيلـُه بي عدّ الفصول سودان ممدَّد في الأفق عرضـًا وطول جواي صباحات خيرنا أمَّـات العيال جواي حرائر في العقاب وكت الملم ببقن جبال صعبت علي في الغربة أيام الضنى سهرن عيوني محصحصات سهر البعيد ، غربة وعنا لا انحل قيده ولا دنا
>>>>> ياودالأمير دا جزء من قصيدة أهداني إياها الشاعر العوض مصطفى صاحب الحس الوطني العالي الذي يبكي كلما ذكر السودان وقد كتب مرثية ملحمة شالوك ياالولد البحر ... في مصطفى سيد أحمد للأسف ضاعت مني .
Post: #11 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: محمد طه الحبر Date: 12-10-2009, 06:25 AM Parent: #2
ياجماعة شوفوا لي الأبيات الجميلة التالية دي قالها منو: بلدي فيها الأزرق والشنقيطي والحمريطي والعريان ميطي
Post: #13 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: بدر الدين الأمير Date: 12-10-2009, 07:56 AM Parent: #12
Quote: لا انحل قيده ولا دنا
بت الحسن هاهنا يامرحبة وعبرك التحايا للشاعر المجيد العوض مصطفى وارجو ان نسمع منك بعد استماعك للاغنية بصوت مصطفي
Post: #14 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: بدر الدين الأمير Date: 12-10-2009, 08:05 AM Parent: #13
ياسلام يامحمد الحبر شكرا على انزال الاغنية والتسجيل نضيف ولمن يرجع عبدالمنعم حا انزلا ليك بالوعود والايقاع وصقفة ورقيص ودالخير من الجلسة التى حكيت اعنها باعلاه
Post: #15 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: بدر الدين الأمير Date: 12-10-2009, 08:34 AM Parent: #14
Quote: بلدي فيها الأزرق والشنقيطي والحمريطي والعريان ميطي
النذير هذا المقطع ايضا سمعته كثيرا ومن مسيقاه تحس انه عبارة عن مساجلات او مجادعات ياريت العافين يعرفونا
Post: #16 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: doma Date: 12-10-2009, 09:30 AM Parent: #15
الاغنيه نزلتوها وين يا شباب الوطن ؟؟؟!! يجب مراعاه كبار السن لا شايفه لا سامعه لو بقت يو تيوب ما بقدر اسمعها
Post: #17 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: بدر الدين الأمير Date: 12-10-2009, 11:27 AM Parent: #16
Quote: الاغنيه نزلتوها وين يا شباب الوطن ؟؟؟!! يجب مراعاه كبار السن لا شايفه لا سامعه لو بقت يو تيوب ما بقدر اسمعها
يا محمد الحبر ياخى تعال حل لعمتك زيبن مشكلتها وانت يا زينب ياكفي البلا اي بوست تنزل فيهى صورة او اغنية تجكى تشتكى لاسامعة لاشايفة انت كمبيوترك دا صناعة صينية ولا شنو هههههههههههههههههههههها
Post: #18 Title: Re: حُميد و مصطفي: نوبة وزنوج وبجة وحلب رطانة عربان مو اشو ومولدين تلقانااو نلقاك ضو Author: محمد طه الحبر Date: 12-10-2009, 11:36 AM Parent: #17
