ظرفاء ود نوباوي.. قصص وحكاوى.. كمال عبد الجليل المشهور بكمال سينا (11) نكتة وموقف..

منقول من صحيفة الرأي العام عدد اليوم 5 ديسمبر 2009م
كتب أحمد دولة:-
يعد المرحوم كمال عبد الجليل الشهير بكمال سينا من أظرف ظرفاء ود نوباوي - اشتهر بتميزه في كرة القدم وموهبته الكروية أوصلته للعب بالمريخ العظيم. زامل العمالقة إبراهومة الكبير وماجد عبدالله عباس والمعلم بشرى وهبة وبشارة وسليمان عبد القادر وجقدول وكل عمالقة العهد الذهبي، بالرغم من أن شطبه تم من المجموعة التي قام بشطبها المرحوم الإمبراطور حسن أبو العائلة إلا أن حبه للمريخ وللرياضيين خصوصاً الهلالاب كان كبيراً.
كان كمال سينا يرحمه الله أميز ظرفاء مدينة أم درمان وود نوباوي على وجه الخصوص- كان محبوباً في كل المجتمعات وله صداقات وعلاقات مع وجهاء البلد - يحكي النكات الجديدة وأحياناً يؤلفها كما أن مواقفه وردوده اللاذعة يرويها الرواة وأحياناً ينسبون إليه النكات خفيفة الدم حتى إن لم يكن طرفاً فيها.
فيما يلي نروي عنه هذه الحكاوى:-
1/ كانوا لاعبين تمرين حار في الحلة ومعهم ابن ام درمان حسن بتي وكان لعبه خشناً جداً عوق لاعبين في التمرين واحد بي «فصل» وواحد بي «فكك» بعد «داك» هجم على سينا وعايز «يطفيه» قام سينا قال لي حسن بتي «إنت قريبتك بت بتي موصياك تجيب ليها الزباين واللاّ شنو»؟
2/ في تمرين المريخ اتعوق هو وود الشايقي - بعد التمرين جابوهم لي بت بتي علشان تجبرهم ومعهم بقية لاعبي الفريق، وود الشايقي علشان يرجعوا ليهو الفصل «إتجرس» قدام اللاعبين وما انستر لما جاء دور سينا كان ثابتاً جداً ولم يتحرك ولم يتجرس- بعد طلعوا الجماعة هنوه على هذا الثبات قام قال ليهم «انتو عوره أنا أديتا الرجل السليمة».
3/ كانت له صداقة مع السيد أنيس حجار وكان بيحبه لأنه خفيف الدم ويحكي النكات الجديدة، وأنيس يتذوق النكات وراوٍ جيد لها- مرة سينا قال لأنيس تعرف يا سيد أنيس أنا عكسك في ثلاثة أشياء فقال له أنيس باستغراب ما هي؟ فقال:
أ- أنا إسمي ذي اسمك بس «بالقلبة».
ب- أنا مفلس وانت مقرش.
ج- انتو في المصنع بتلفوا السجائر ونحنا بنفرتقا.
4/ عندما سرقت عربته التعبانة ومشى يبلغ - المتحري بعد دون مواصفات العربة والمكان الذي سُرقت منه سأله: هل بتتهم أي شخص؟ بسرعة رد عليه «أيوه بتهم صلاح إدريس» وللأسف لم يهنأ بهذا الإتهام لأن عربته وجدت سريعاً.
5/ مرة في حدائق «6 أبريل» واحد إقليمي سأله قال ليه: «بالله يا أخينا حدائق 6 أبريل وين؟ قام سينا سأله أيضاً: «ما قالوا ليك سنة كم؟».
6/ في المحطة الوسطى أم درمان اشترى هو وكابتن برعي أحمد البشير بطيخة ووقفا في انتظار صديق ثالث لهما ذهب لإحضار عربته، فقال لهما بائع البطيخ عندما شاف وقفتهم طالت «البطيخة دي عايزين تاكلوها هنا» وهنا قال له سينا: «ليه يا عم عايز الفاضي»؟.
7/ ذهب لجزارة المرحوم عثمان كايرو بالسوق الجديد بود نوباوي وطلب شراء «2» كيلو لحمة ضأن وضع عثمان كايرو قطعة لحم في الميزان وعندما لم يرجح الميزان بدأ كايرو في قطع صغيرة من اللحمة ووضعها في الميزان، والميزان لا يتحرك، فقال له سينا: «بالدوات دي الميزان ما بنزل».
8/ يوم جمعة لاعبين كونكان وكان معاهم ضيف «إيدو ناشفة» شبك ليك سينا دوات وترايس «ويجليهو» بالكرت الراميهو لما جا الغداء الضيف كان «بكد» ليهو في عضم لا من بقى أبيض حتة لحمة ما فيهو، واحد من الجماعة قال ليه: «العضم دا ما كفاهو» نط سينا وقال له بي زعل: «خليهو إمكن عايز يجلي بيهو كلب».
9/ أسرة سينا واخوانو كلهم رياضيون - المرحوم عابدين وكابتن حداد والهادي وطارق وكانوا كلهم بيلعبوا في نادي الإخلاص ويطلقون على بعضهم لقب «خواجة» إشارة الى لعبهم وحرفنتهم شبيهة بالخواجات فقال لهم سينا: «ثلاثة خواجات والإخلاص في الدرجة الثانية».
01/ كان المريخ لاعب مباراة تجريبية مع نادي ديم سلمان، وفي الشوط الثاني وفي استبدال الاحتياطي استبدل فريق ديم سلمان لاعباً له صلعة ومشيب وشكلو كبير جداً ولما وقف في «اللاين» للإستبدال سأل ود الشايقي اللاعب الظريف سينا: «ده منو يا سينا؟» قام سينا قال ليهو «كيف ده ما عم سلمان».
11/ كان كمال سينا يرحمه الله حتى أيام مرضه بالمستشفى دائم الإبتسام والنكتة ورابط الجأش كل من يسأله في المستشفى بعد العملية يقول له: «الدكاترة فتحوا البطن خلوا الكويس ورموا البايظ».
ألا رحم الله كمال سينا وجعل البركة في أهله وذريته، فقد كان فاكهة مجتمع أم درمان الرياضي، الإنسان الذي يعشق أم درمان وود نوباوي ويعتز بالإنتماء إليهم.

رابط الموضوع بالصحيفة
http://www.rayaam.info/News_view.aspx?pid=458&id=33945

خالد اخوى شديد .....سلام
ياخى فعلا سينا يستحق ان يوثق له
نقول ليك ديل من حاجاته
ايم الديمقراطية الثانية وفى بيت بكاء فى ودنوباوى جاء الامام
السيد الصادق المهدى لاداء واجب العزاء ،فالجماعة قالوا للسيد الصادق سينا
ده قال ما رضيان عن التشكيل الوزارى الجديد
فساله السيد الصادق:
ليه يا كمال
فرد سينا:
يا سيد الصادق نحن شعب كونكانى بنحب الكونكان وحكومتك دى
فيها وزير نزولو ناقص.
قال ليه منو ده؟
فرد سينا:جبر الله خمسين ده
وكان السيد جبر الله خمسين وزيرا للتربية والتعليم...

مرة لاقاهو يسن عمر الامام قبل ان يصنف شعبى
وقال سينا ليسن بالله انقاذكم دى جات تنقذنا من شنو؟؟ والحاله شايفه براك.
فرد يسن والله كان ما الانقاذ دى جات جون قرنق ده كان جاكم فى ودنوباوى دى!
فرد عليه سينا والله جون قرنق ده يجينا الايام دى نستقبلوا بطلع البدر علينا..

مرة فى عيد الاضحى فاطرين معاه فى منزله وكان لحم الخروف
طريا شهيا.
فقال له احد الجالسين لكن ياكمال الخروف ده ما بكون عزلو زول من امدرمان
فقال له سينا والله لا بعرف اعزل الخرفان ولاعارف بمسوكهن من ضهرن
والا حلقن ليه.لكن الخروف ده جاب لى عبد الهادى الدابى(الله يرحمه هو ايضا من ظرفاء امدرمان)
فرد احد الجالسين لكن الضحية لاتجوز اذا كانت هدية الا تكون من
حر مال المضحى؟
فرد كمال سينا: وسيدنا ابراهيم زاتو كان مشى ليه الزريبه؟

رحم الله كمال سينا بقدر ما اضحك وبقدر ما اسعد الناس
لى عودة بطائفة اخرى يا ود قلبا،،،

خالد الجزولي

تحياتي ليك ليك ولصديقي جد محمد حامد الموردابي

وكل عام وانتم بخير

صديق خسمتك بالنبي كان تفارق البوست ده

وعايزك تستغلو في توثيق ظرفاء امدرمان
وما تنسي عمك بين

معروف عن كمال سينا انه كان موظف فى وزارة الماليه ففى احد المرات
جاءهم خطاب من ديوان شئؤن الخدمه بان وزارة الرى تطلب فيه وظائف
عدد ثلاثه وظائف غطاسين وثلاثة وظائف مساعدى غطاسين للوزارة بمدنى.
وجاء الخطاب الى كمال سينا وعلق عليه ووافق على تعيين الغطاسين ورفض
تعيين المساعدين وكان كمال شمينا مدير الديوان فاستفسر عن رفض طلب
مساعدى الغطاسين فاجاب كمال سينا:
ياسعادتك غطاسين وافقنا عليهم لكن دى الوظيفه الوحيده التى لا تقبل مساعد
فلو الجماعه ديل بعرفوا يغطسوا يبقوا غطاسين ما بعرفوا معناها لامكان لهم واضاف
لكن بكون ديل ناس الكورة ديل دايرين ليهم وظائف للعيبة كورة
وفعلا كان القصد من الوظائف هو ايجاد فرص عمل للعيبه تم تسجليهم للاهلى
والاتحاد..

كمال سينا يوم قابل ولد من اولاد ودنوباوى لابس (على الله )لبسة الانصار المشهورة
بطاقيتها العالية والمركوب الفاشرى وبلوك فى لبانه فقال له كمال:
ياولدى الرجال الكان بلبسوا لبستك دى اكل الدوم بشوفوه عيب،تاكل ليك فى لبانه؟؟

يوم فى حفله فيها فنان من فنانين الزمن الكعب ده وبغنى فى اغنية الكاشف
الشال منام عينى وفؤادى جارحو فلما وصل للمقطع الذى يقول والعين تلاقى العين
والاييد تصافحو،قلب البيت راسا على عقب وقال:
والاييد تلاقى العين والعين تصابحو.
فكان سينا حضورا وقال للحاضرين والله الاييد المحل العين دى الا فى شعار الشرطه.

يوم برضو فى حفلة عرس فى منتصف السبعينات وكانت الموضه مغتربين
ففى زواج احدهم وكان الزواج شهر ثلاثة والدنيا صيف وحر يفسخ
جاء مع العريس ثلاثة من اصحابه مغتربين مقشطين بدل فل سوت بالسديرى
كمال سينا عاين ليهم وقال شوف المواهيم ديل...
السودان ده البلد الوحيد فى العالم الببيعوا فيه التلج فى الشارع
ده بلد يلبسوا فيه بدلة؟؟؟

المرحوم سعيد خير الله الشهير بسعيد بلبوط «وعوك» ولد في حي القلعة - قلعة صالح جبريل في شارع «اللولوي»، شقيق كل من عبد الحليم وسعيد خير الله الذي لعب حارس مرمى للهلال وحسن خير الله - لعب لفريقي الاخلاص وود نوباوي، واخلص في ذلك خصوصا لنادي الاخلاص، اول من اهتم بالاشبال والناشئين وكان يدربهم بنفسه، اتحادي موت - كان فكره متقدما جدا واول من وقف ضد الاستعانة «بالفقرة» - اسرع من لعب الكرة وهو يلعب في خانة الجناح الايمن- يقال وللمبالغة انه اسرع من الكرة اذا كان يرفع الكورنر ويجري تحت ظلها ويحصل يضربها «هد» كان رحمة الله مثقفا- تعلم قوانين الكرة من الاداري الفذ عبد الرحيم شداد - توفي عام 98م رحمه الله، نحكي عنه هذه القصص والحكاوي:
1) كان في الاخلاص هو المدرب وسكرتير الالعاب واللاعب اذا اقتضي الامر، في الخمسينيات كانت صناعة الكور صعبة ولا يعرف سرها الا عوض سالم في الهلال - وشخص اخر اسمه «نكلس» واحمد حسين الذي كان يملك دكان عرض بالخرطوم. واذا الكورة تمزقت كانوا يرسلوها لعوض سالم لتفويرها زي لستك العربة اي فتحها وعمل رقعة واعادة خياطتها، كلفوه في الاخلاص بتفويرالكور وتأخر ولم يحضرها للتمرين ولما ذهبوا اليه في المنزل لقوه خاتي الكور في حلة كبيرة وشاديهم في النار ولما احرجوه قال ليهم والله فوروهم دي قايلها زي ما بفوروا اللبن.
2) قلنا انه اسرع من عرفته الميادين في الطرف اليمين، وكان في الاخلاص لاعب سريع ايضا اسمه ادم ابو فرار، في ماتش في ميدان الخليفة كان لاعب فيه عثمان الديم قبل انتقاله للهلال، واللاعب ود البحر - الاخلاص، بدأ اللعب قبل اللاعبين ما يخرجوا من دائرة السنتر كان سعيد بلبوط وأبو فرار وصلوا قون الفريق الخصم ولم يجدوا اي لاعب من المهاجمين، ود البحر قال لي عثمان الديم خلي العبوها للمرحوم صالح جبريل - ديل يحصلوهم كيف؟
3) في القلعة كان عندهم جيران عزابة 4 ولهم كلب خطير جدا. وكان المرحوم بلبوط بلاوز منه، وهو لا يستلطف العزابة والعزابة لا يستلطفونه. وكلما احسوا به يطلقون الكلب. سأله احد الجيران العزابة جيرانك ديل عددهم كم فقال له بثقافته القرآنية «اربعة وخامسهم كلبهم».
4) الاخلاص كانت له لعبة مهمة والفريق اعمدته الاساسية كانت غائبة، في نفس اليوم سجل نفسه في الكشف ولعب مدافع، زملاؤه يقولوا ليه اطلع من خط 6 يقول ليهم بثقة الواثق من نفسه «اقيف في خط ستة وامسك بهم السبعة».
5) الاخلاص كانت عنده مباراة مهمة، قاموا ادوهم عجلة وهو واللاعب عبد الله ود آدم علشان يجو بها لي دار الرياضة ام درمان، واتضح انهما لا يعرفان ركوب العجلة واضطروا لقيادتها وكان وقتها القانون لا يسمح بلعب الاحتياطي، ووصلا متأخرين ووجدوا الاخلاص مغلوبا فقالا للجماعة لو خليتونا جينا بي كرعينا كان اسرع.
6) كان سريع لانه يلعب حفيان بدون جزمة او كدارة، في مباراة بعد تعديل القانون ارغم على لبس الكدارة فاعاقته الكدارة في السرعة واتقان التمرير، ولما اوشكت المباراة على الانتهاء ملص الكدارة وبسرعته الفائقة وصل وسدد واحرز هدفاً دفاع الخصم كله يكورك للحكم والله حفيان والله حفيان.
7) كان بلبوط لطيفا وراجل نكتة حكي ان صديقه ود ارسد سائق تاكسي في المحطة الوسطى، اخرج ود ارسد الفلوس التي تحصل عليها ورتبها، وحوالي الساعة 12 ليلا ظهر له 4 فتوات مفتولو العضلات وقالوا ليه عايزين مشوار لام بدة بالسبيل، فقال لهم بالله ما احسن تدقوني وتشيلوا قروشي هنا لزومو شنو امبدة والتلتلة.
8) سعيد بلبوط مرة جاي من الخرطوم بالطراحة ام شلن، فاخرج شلن مسهوك ونوي ان يعطيه لصاحب التاكسي، وعندما نزل بدل ان يعطيه الشلن اعطى صاحب التاكسي الجزلان - صاحب التاكسي يكورك ليه يا خينا يا خينا وهو يقول ليه اعمل ليك شنو مسهوك مسهوك انا دقيته، ولما لحق به صاحب التاكسي وعلم بامر الجزلان اعتذر له في ادب واداه شلن جديد.
9) الاخلاص لاعب مع الموردة - وهو طرف يمين وابو فرار طرف شمال، سنترهاف الموردة الصافي جهجهوه جدا ما عرف يمسك منو فيهم، طلب من المدرب اخراجه وقال ليه «معقول العب مع حرامية ديل عايزين ليهم سواري عشان يمسكهم».
10) سعيد بلبوط قال ان المرحومين فار وكديس يعملان في دار الرياضة ام درمان. وحدث ان مرض فار وذهب كديس لزيارته ولم يجده بالمنزل، فقال لزوجته «قولي لي فار كديس جاء ما لقاك» فردت عليه «الحمد لله الما لقيتو كنت اكلته».
11) الاخلاص وود نوباوي المنافسة بينهما زي الهلال والمريخ، هجوم الاخلاص كان مكونا من نتشة والسر دوليب ويوسف محمد يوسف ماجوا التمرين الختامي، وكانوا مساهرين في حفلة جوا منها 5 صباحاً فوجدوا سعيد بلبوط منتظرهم امام البيت، يوسف كان احمق اخرج كدارته من الدولاب وساق سعيد بلبوط ورمى الكدارة في الحمام وقال ليه جايني 5 صباحاً بتاع لبن انت؟ الكورة دي خلاص بطلناها والكدارة رميناها.
مرة لم يدخلوه مجلس الإخلاص ولم يمسكوه سكرتير العاب، قعد يغني في النادي اوصيه «بالاخلاص» وما يحفظ وصيتي واغنية:
خلاص يا قلبي جافوك
نسوا «الاخلاص» ونسيوك
فحاول انت انساهم
ولا تحفل لذكراهم
وقول للماشي يغشاهم
امانة تقول لمن هجروا
فراقكم لينا امره مريب
ولما نالوا مرامهم
جفوني وقالوا «زول» مجنون.
توفى عام 1998م وعمل العزاء بالحارة الخامسة بمنزل اخيه حسن.. رحمه الله واسكنه فسيح جناته مع الصديقين الشهداء والصالحين وحسن اولئك رفيقا ...


http://www.alsahafa.info/index.php?type=3&id=2147499262

Quote: الاخلاص وود نوباوي المنافسة بينهما زي الهلال والمريخ، هجوم الاخلاص كان مكونا من نتشة والسر دوليب ويوسف محمد يوسف ماجوا التمرين الختامي، وكانوا مساهرين في حفلة جوا منها 5 صباحاً فوجدوا سعيد بلبوط منتظرهم امام البيت، يوسف كان احمق اخرج كدارته من الدولاب وساق سعيد بلبوط ورمى الكدارة في الحمام وقال ليه جايني 5 صباحاً بتاع لبن انت؟ الكورة دي خلاص بطلناها والكدارة رميناها.

الأخوان صديق الموج
رضا
طابت أوقاتكم
إضافية حقيقة وثرة للبوست
ماتفضلتم به من مواقف
ود الموج
كما وعدتني بالمحادثة الهاتفية
بالعديد من المواقف للراحل سينا
رضا
يا سلام عليك ارجو أن تستمر ، خاصة
هذه المواقف الرياضية لها مكانة خاصة
وما ذكرته عن عمنا الصافي ليس بغريب عليه
فهو صاحب نكتة وطرفة وسرعة بديهة
وأذكر عنه هذا الموقف
وهو في مباراة بين الموردة والهلال بدار الرياضة
بام درمان وكان للهلال لاعب طويل القامة اسمه معني
والكورة كانت كورنر لصالح الهلال فتم تحذير الصافي
من هذا اللاعب وإجادته للضربات الرأسية وطول قامته
فأوكل إليه مهمة الوقوف جواره ومراقبته ، فكان
أن لعبت تلك الركنية وبالفعل قفز لها معني واحرز منها
هدفاً ، فتمت معاتبة الصافي على ذلك التفريط فقال لهم
يا جماعة أنني قفزت عالياً حتى رأيت الترماج في الشارع
فماذا أفعل أكثر من ذلك
رحم الله المتوفين منهم وأطال عمر من تبقى منهم
تحياتي

اللواء شرطة دنقلاوي محمد علي ودكتور دقش
وكمال سيناومحمد سليمان (دنيا دبنقا)
تم استضافتهم اذكر في إحدى أيام الأعياد الماضية وقد
كان نجم تلك السهرة سينا دون منازع بحكاويه الكثيرة
ومواقفة المتعددة وحلاوة لسانه
بعد يومين تطرق لذلك دقش في صحيفة الخرطوم وقال كمال سينا
اقترحته أنا على مقدم البرنامج باعتبار انه صاحب طرفة
وكانت الحلقة عن النكات ولكنه اصبح (سيد الحلقة) ونجمها وسحب
البساط من تحت اقدامناجميعاً.
رحم الله سينا رحمة واسعة
آمييييييييين

خالد اخوي

انا جني وجن البفطني

يعني محمد القطع نفسو عشان يسلم عليك وعلى اخوك
كان جدعته بي سلام كنت حتفلس يعني
والله غايتو جنس غايتو

بس
معليش

قالوا جدة سيول ومطار

احتمال المطرة تكون شالت العدة خلت راسك ضارب

برضو سلم على محمد
قوليه صاحبك بسلم عليك

يا دكتور/محمد حسن ياخي لك العتبى حتى ترضى
ما ذهبت إليه عين الحقيقة

Quote: بس معليش قالوا جدة سيول ومطار احتمال المطرة تكون شالت العدة خلت راسك ضارب

وحاجات تانية
حجاج وكدة
وحقيقة لم اتعمد ذلك
وعشان ترضى كمان
هاك موبايل محمد بالسودان طبعاً
00249912620206

تحياتي
واعتذاري ثانية
أخوك خالد

دكتور محمد
الظاهر عليك
زعلت بالجد
لك العتبى حتى
ترضى
ياااااخييي
تحياتي

رحم الله كمال سينا


زاملت ابناءه خالد ونورا بالجامعه

وكان منزلهم مفتوحا لنا خصوصا نحن ابناء امدرمان

وكان كثيرا ما ياتي ليداعبنا ويكسر عنا رهق المذاكره

مثلا يجي داخل يلقي علبه السجائر في التربيزه يشيل واحده منها

وخالد ولده احتراما يدس سجارته في الطفايه ورا الكرسي

طوالي يقول ليه ( يا ود بتحرق الستاره امك بتجي تشاكلك)

ايام الديمقراطيه زمن الصادق المهدي

لاقاه السيد الصادق وساله الحاله كيف

قال ليه والله الحاله صعبه

الدفتر اغلي من جزء عم

القصه الاتيه عن المرحوم كمال وله الرحمه فقد كان تعامله معنا كابناءه

وبعرف اشياء كثيره عن تفاصيل امورنا


بعض التعديل والاضافات مني ولكن الخاتمه الجميله من كمال سينا

الحـــــــــــــــــــــــــــــــج

القصه الاتيه عن المرحوم كمال وله الرحمه فقد كان تعامله معنا كابناءه

وبعرف اشياء كثيره عن تفاصيل امورنا


بعض التعديل والاضافات مني ولكن الخاتمه الجميله من كمال سينا

الحـــــــــــــــــــــــــــــــج

مكرر

سلامات يا حلوين


يحكى عنه ايضا
في صباه ابوه اختلف معا فقام طرده من البيت
وصادف انو عمه كان موجود

عمنا كمال مرق مرق من البيت شوية
بعد شوية دق الباب

فتح ابوه

سينا قال ليه عاوز عمي في كلمتين بس
ابوه نادا ليبه عمه في خشم الباب

عمه جاه قال ليه نعم وابو سينا كان واقف جمبه

قام سينا قال لي عمه انا عاوز اسال ابوي ده سوال واحد قدامك يجوابني عليه وتاني ما بشوفني

قالوا ليه اسال

قال لي ابوه : البيت ده موش بيت ابوي ؟

ابوه قال ليه : ده بيتي انا

سينا قال ليه : انا سالتك رد قدر السوال ده موش بيت ابوي ؟

ابوه بامتعاض قال : نعم

سينا قال ليه : طيب طاردني منو ليه ما تمشي تشوف بيت ابوك انا جيتم في بيت ابوك !!!!

فما كان من ابو الا ان انفجر بالضحك وفتح ليه الدرب عشان يدخل

أخي ود الخليفة
شكراً على المداخلات القيمة

Quote: رحم الله كمال سينا زاملت ابناءه خالد ونورا بالجامعه وكان منزلهم مفتوحا لنا خصوصا نحن ابناء امدرمان وكان كثيرا ما ياتي ليداعبنا ويكسر عنا رهق المذاكره مثلا يجي داخل يلقي علبه السجائر في التربيزه يشيل واحده منها وخالد ولده احتراما يدس سجارته في الطفايه ورا الكرسي طوالي يقول ليه ( يا ود بتحرق الستاره امك بتجي تشاكلك) ايام الديمقراطيه زمن الصادق المهدي لاقاه السيد الصادق وساله الحاله كيف قال ليه والله الحاله صعبه الدفتر اغلي من جزء عم

رحم الله أبو الظرفاء سينا

شكري أخي وليد على المرور
وعلى اثراء البوست
تحياتي

والله امدرمان ثرة بالقصص والحكاوي .. ومن كتاب حكاوي أمدرمان .. لشوقي بدري حبيت أنقل ليكم دي ::

يُذكر أن كمال سينا مشى مرة للدكان وقال لصاحب الدكان أديني دفتر .. صاحب الدكان شكلو مافهم أداهو كراس .. ولمن أداه ليه عاين ليهو سينا وقال ليه عندك اقلام أديني قلم .. جاب ليه القلم .. بعد ما إستلم سين القلم عاين ليه وقال ليه " بعد ده أديني إملاء " ..
ندعو ونسأل الله له الرحمة والمغفرة ..

أخي هيثم لبيب
شكراً على المرور
وعلى المشاركة الثرة
رحم الله الفقيد سينا
تحياتي