شنو كسير التلج المالي المنبر اليومين ديل ...النابغة فلان والرائعة علانة يا حليلكم يا........

جنس كسير تلج في المنبر

واحيانا جايبة ليها صور

ما عارفة دا دليل عافية و لا مرض

ودا بودي البلد لقدام ولا لي ما قدام

ودا بفتح عيوننا علي نوابغ صحي صحي و لا بيع وشراء في العواطف والمعاطف

الغريبة في ناس لا اعضاء في البورد ولا معمول ليهم شنة ورنة ولا سمعنا بيهم اصلا

لكن لما تقعد مع الواحد او الواحدة منهن تجد نفسك تتحدث الي انبياء

لكنهم لا يعشقون الضوضاء

خاصة لمان جرد مؤسسة

بل طنين

صباح الخير يا صباح ..

كسير التلج واجب وطني .. عايني زي ده .. " بكري أبوبكر ده أحسن زول في العالم" ..

..

..


وبعدين إنتي قصدك ياتو موضوع بالظبطـ .. !! .. وليه موضوعك ده كتبتيهو في الوقت ده .. ما المنبر ده من زمااان شغالين فيهو كسير تلج لمن التلج بقى فتفات ساااي ..


..

* التعديل لإدخال تاء التأنيث .. والعتبى للأخت صباح .. انا برلوم في البورد ده ..

Quote: ما عارفة دا دليل عافية و لا مرض

العزيزة صباح
ثقافتنا السودانية لم تعهد كيل التشكيرات إلا عند الموت "حفظكم الله"
أنا أقرأها كغرض
والغرض مرض

سلامات


عشان أكسر ليك شوية تلج.. كدا فسروا لينا..

الجماعة مرة يذكروا ومرة يؤنثوا اسم صباح!!

التلج جاهز..

الشتا جا ..والتلج رخص ...

الإنسانة الرائعة ومبدعتنا صباح،
تحية طيبة وكل عام وأنتم بألف خير

والله يا صباح كسير التلج دا خشم بيوت، وأنا من النوع المتخصص فقط فى كسير التلج للجنس اللطيف لوول، وزمان كان
عندنا مثل مشهور فى البالتوك بقول:"معرفة الضكير للضكير النوم أخير"

وتحياتي لضيوفك الرائعين

شكرا لجميع من تداخل ولو بغرض تكسير تلج برضو

الحكاية بقت صعبة

Quote: النابغة فلان والرائعة علانة

أختنا صباح،
كل العام وأنت طيبة،
رغم أني من المسنين لكني أعرف أن عبارة (كسير التلج) تعني الثناء على الغير
وأود أن أشير إلى أنني كثيرا ما أثني على أعضاء في هذا المنبر وأعتقد صادقا
أنهم يستحقون ، أناس عرفوا بسماحة النفس وجمال الكلم ، والكلمة هي النافذة
الوحيدة التي من خلالها نرى الغير في هذه المساحة ، لا أظن من الحكمة أن
نثني على الغير فقط حين مماتهم نسجا على منوال ( إنشالله يوم شكرك ما يجي)
لماذا بعد الموت ، على العكس تماما يا صباح ، نفر عديد هنا يبدعون ومنهم
من يتعرض لمثبطات ومحبطات قد تدفع به إلى الإنزواء وهنا يتوجب علينا أن
نمنحهم بعض رصيدهم المخزون في وجداننا كمؤونة شتاء وسنابل لأيام عجاف حتى
ينهضوا أكثر قوة وإيمانا بأن هناك من يقيِّم وجودهم كبشر .
يا صباح أرى أن الثناء على الغير ظاهرة صحية سيما إذا عرفنا أن الدنيا تعج
بأهل الشتائم والبذاءات وأعداء النجاح وقبائل الغرض والأمراض النفسية والذين
ينتشرون في كثير من الوسائط المقروءة والمرئية والمسموعة ، فإذا كان الخيار
بين بذل الشتيمة والثناء فلا أظن ثمة تردد في تبني الأخيرة شريطة أن تكون في
موضعها وإلا كانت مسخا شائها.
لا أتفق مع من يقول أن ثمة (غرض) في أي ثناء يتم في المنبر ، فأعضاء هذا المنبر
لايرجون (مصلحة) حين يبذلون الثناء ، وبنظرة عميقة إلى العلاقات الإسفيرية لن
تجدي في المدى المنظور أي مصلحة (مادية) حين نثني على إنسان ما ، كما أننا
نثني على أناس نعلم أننا ربما لانلتقيهم في الحياة فأين المصلحة والغرض؟
عارفه يا صباح ، إفشاء السلام والود والثناء يجعل من أي مكان في العالم
بقعة معقمة والكلمة الطيبة لها سحر هاروت ، فهي تعدِّل المسار المعوَج إن
حدّثت به النفس وتصحح كيمياء النفس وتصفي الأدرينالين العكر ، ولو أننا
تبنيناها بيننا لما أشعلت حروب وخربت بيوت ولعل كل الديانات السماوية
نادت بذلك لذا كانت النفس البشرية تهفو إلى الثناء وتنشده وتكره الشتم
والبذاءة وساقط القول وتحقير الغير وكل السلوكيات السالبة قولا وفعلا.
أفشوا السلام ،
تبسمك في وجه أخيك صدقة،
طوَلت عليك؟ معليش ،
أها ، هسه أقول ليك إنشالله يوم شكرك ما يجي؟
تسلمي يا صباح.

صباح .. كل سنة وإنتي طيبة
القابلة على امنياتكـ إن شاء الله

تعرفي .. قبل كمين شهر كــدا
واحد من الضحكونجية جاتو الفكرة دي..
وقام كــدا كباها في المنبر دا! التـلـج بـقـى رخــيـس ولا شــنو؟

شكراً أخي محمد المرتضي وأنا معاك المجاملات شيئ طيب والشهادة بالحق في صالح مبدع حقيقي برضو طيب

لكن البزعل كتير جدا جدا بقي في البوستات وصف من يطفون علي سطح البورد بصفات ما كانت قبل كدا رخيصة للدرجة دي

يعني حتي مفردة مبدع وعبقري ومفكر كنت بتخيل انه قليلين البستحقوها واقلبهم من المقلين في كتاباتهم

أخي ود الصايم

ذي ما بقولوا المولانات أضحك الله سنك

الاخت الكريمة صباح تحياتي وعيدك عيد\

المهم والله أجمل كلام انا بتقع عليه عيوني في المنبر دا كان كسر تلج وانفعالات زعل المهم انت عندك اللي برضو بكسر ليك تلج ولا دي غيرة نسوان من بعض لك كل الود

Quote: المهم انت عندك اللي برضو بكسر ليك تلج ولا دي غيرة نسوان

ماأروع تجليات علم نفس الأدب الذكوري الاسفيري في القرن الاربعين

والله كان كدا أحسن الكتابة في هلال مريخ من عواسة الكسرة

ولا اقول ليك ما تجي تعوس معاي

ولا ماك عوسسنجي

النابغة صباح ( علي بالطلاق ده ما كسير تلج )

وافر الصحة


ياخ الناس رويحتها محرقاها .. ومواقفهم متذبذبة .. وآراءهم متقلبة

خليهم عليك الله يكسروا التلج ده ويطلعوا عينو مالك عليهم .. ما أصلوا التلج اتعمل شان يتكسر ........
كوني كما عهدناك

التلج إتعمل للكسير في نجايلوا يا منتصر ياأخوي


الخرابة لو رحلوا النجايل لسودانيز

ديل يكونوا الكيزان

بعملوها أولاد ال.......

الذين

الأخت صباح

يسعد صباحاتك

كتب الأخ محمد المرتضى

Quote: يا صباح أرى أن الثناء على الغير ظاهرة صحية سيما إذا عرفنا أن الدنيا تعج بأهل الشتائم والبذاءات وأعداء النجاح وقبائل الغرض والأمراض النفسية والذين ينتشرون في كثير من الوسائط المقروءة والمرئية والمسموعة ، فإذا كان الخيار بين بذل الشتيمة والثناء فلا أظن ثمة تردد في تبني الأخيرة شريطة أن تكون في موضعها وإلا كانت مسخا شائها. لا أتفق مع من يقول أن ثمة (غرض) في أي ثناء يتم في المنبر ، فأعضاء هذا المنبر لايرجون (مصلحة) حين يبذلون الثناء ، وبنظرة عميقة إلى العلاقات الإسفيرية لن تجدي في المدى المنظور أي مصلحة (مادية) حين نثني على إنسان ما ، كما أننا نثني على أناس نعلم أننا ربما لانلتقيهم في الحياة فأين المصلحة والغرض؟ عارفه يا صباح ، إفشاء السلام والود والثناء يجعل من أي مكان في العالم بقعة معقمة والكلمة الطيبة لها سحر هاروت ، فهي تعدِّل المسار المعوَج إن حدّثت به النفس وتصحح كيمياء النفس وتصفي الأدرينالين العكر ، ولو أننا تبنيناها بيننا لما أشعلت حروب وخربت بيوت ولعل كل الديانات السماوية نادت بذلك لذا كانت النفس البشرية تهفو إلى الثناء وتنشده وتكره الشتم والبذاءة وساقط القول وتحقير الغير وكل السلوكيات السالبة قولا وفعلا. أفشوا السلام ،

تعرفى يا صباح يا أختى أنا هسع يا دوب لى هنا 3 شهور تقريباً

وفى هذه الفترة القصيرة تعرفت على بعض الأخوة والأخوات وأشعر بسعادة وفخر بمعرفتهم

وكثيراً ما يطرح الأخوة والأخوات مواضيع حيوية جداً وتناقش بعمق

ولكن أحياناً بيكون النفس شوية حار والبعض لا يستحمل الاختلاف فى الرأى

ففى مثل الحالات دى تكسير التلج بيرطب الجو شوية ويهدئ المشاعر الملتهبة

ويساعد فى الفائدة

ونحن كسودانيين ما أجمل أن نتلاقى ونتعارف ونجامل بعضنا البعض

هناك الكثيرون يعيشون فى بعض العواصم والمدن الصاخبة والسريعة ومحرومين من التواصل

مع أبناء جنسهم وتكتنفهم الوحشة والوحدة ويحتاجون للدعم المعنوى والمساندة حتى ولو

كانت عبر العالم الاسفيرى هنا

وبعدين هنا فى ناس حلوين شديد وظريفين لدرجة قف ويستاهلو كسير التلج زى الحلو ود الصايم

وفى ناس يستاهلو كسير الراس عديل كدة

ويا ود المرتضى يكفينا الله شر سحر هاروت وماروت ومالك ياخوى علينا

ازيك يا صباح كل سنة وانت طيبة
القصة من بدرى مخّير الله علينا وعليكم
بس زادت حبتين اليومين ديل البرالمة كتروا وكدا
هههههههههههه