أهديك حروف

عشرين سنة مرن وأنا
في حبي ليك زي ما أنا
لا خف نبضه ولا ونى
لا جف عوده ولا انحنى
مرّ السنين عتق سماحتك وزينها
زادك نضار هيبة ووقار زادك سناء
عمق مشاعر الإلفة ليك و دوزنها
كم يحلى فيك طعم الغناء
بي طلتك نورتي كل الأمكنة
عطرك يفوق السوسنة
نور بسمتك بدد غيوم كل العناء
فرّح نفوسنا و طمئنها
يا حانية يا بحر المودة ومسكنها
يا وارفة زي شجرة مقيلنا وضلنا
يا كل أسباب السعادة الممكنة
عشرين سنة والليلة مولد حبنا
أهديك حروف منسوجة بي عطر الثناء