Post: #1
Title: للتوثيق:المبدع الراحل العميري ومبدعنا عبدالحكيم الطاهر يتنبأآن بثورة الهاتف النقال والمرئي
Author: أبوعبيدة محمد الأمين
Date: 12-02-2009, 08:58 AM
Parent: #0
تابعت مساء البارحة وعبر راديو FM 104 جزء من سهرة عيدية مع أسرة المبدع الراحل عبدالعزيز العميري هذا الذي رحل وترك في حلوقنا غصة تطل كلما ذكر، ضمت السهرة بعض أخواته وإبن أخته وتطرق الحديث الى محطات مختلفة من حياة الراحل العزيز عبدالعزيز العميري – يجب السعي لتوثيق مانشر عبرها فهي إفادات هامة عن هذا المبدع عليه رحمة الله - وما أريد الإشارة اليه هو وبحسب ما ذكرت شقيقته:
في الثمانينات كان العميري يتحدث عبر الهاتف من أمدرمان مع والده – الذي يعمل حينها تاجر بمدينة الأبيض - وأثناء حديثه قال العميري: والله يا أبوي أنا من شدة مامشتاق ليك متمني هسع أشوفك وأنا بتكلم معاك بالتلفون ده، بعدين يا أبوي مابعيد يجينا إختراع قريب ده والواحد يكون بشاهد في الزول البتكلم معاهو.
وكان هذا هو الخيال الواسع المبدع للراحل العميري يخترق حجب العلم والمعرفة .
أما مبدعنا عبدالحكيم الطاهر فقد ذكر في لقاء تلفزيوني خلال الشهور الماضية أنه قدم من الشمالية الى الخرطوم طفلاً برفقة عمه ليستقر بالسجانة ويوم مغادرته لبلدته أوصاهم والده بضرورة إفادته بوصولهم للخرطوم.
وذكر الاستاذ عبدالحكيم أنهم وصلوا الخرطوم منهكين وكانت المعضلة التى واجهت عمه هي الحصول على تلفون لإبلاغ والده في الشمال فقال في تلك اللحظة فكرت وقلت: ليه مايكون كل زول عنده تلفون شايلو في يدو؟ وكنت مقتنع بالفكرة لكن كانت المشكلة في إنه كيف يتم التعامل مع السلك بتاع التلفون أثناء الحركة من منطقة لأخرى.
البوست متاح للجميع للتوثيق للراحل العميري
|
Post: #2
Title: Re: للتوثيق:المبدع الراحل العميري ومبدعنا عبدالحكيم الطاهر يتنبأآن بثورة الهاتف النقال والمرئي
Author: بكري عباس علي
Date: 12-02-2009, 03:44 PM
Parent: #1
ابو عبيدة
هولاء الاثنين مبدعين حتي النخاع توقع منهم كل شي
تاني يوم في العيد قناة الشروق اتحفتنا بمسرحية نقابة المنتحرين واعطتنا فرصة لنشاهد هذا الكم الفريد من المبدعين
تحياتي
|
Post: #3
Title: Re: للتوثيق:المبدع الراحل العميري ومبدعنا عبدالحكيم الطاهر يتنبأآن بثورة الهاتف النقال والمرئي
Author: أبوعبيدة محمد الأمين
Date: 12-03-2009, 12:44 PM
Parent: #2
الأخ بكري عباس
تحياتي
الإبداع هو الأتيان بالجديد النافع
وقد كان العميري مبدعاً نافعاً له الرحمة والغفران
قلت لي الشروق عرضت المسرحية دي؟ والله انت عيدك تمام طالما
حضرت هذه المسرحية الرائعة
شفت كابو كيف بيتجلى؟ ده زول بمثل بالفطرة
بتحس انه فعلاً دي شخصيتو الحقيقية
|
Post: #4
Title: Re: للتوثيق:المبدع الراحل العميري ومبدعنا عبدالحكيم الطاهر يتنبأآن بثورة الهاتف النقال والمرئي
Author: أبوعبيدة محمد الأمين
Date: 12-09-2009, 03:05 PM
Parent: #3
لمزيد من الإطلاع والإضافات
|
Post: #5
Title: Re: للتوثيق:المبدع الراحل العميري ومبدعنا عبدالحكيم الطاهر يتنبأآن بثورة الهاتف النقال والمرئي
Author: أبوعبيدة محمد الأمين
Date: 12-10-2009, 02:42 PM
Parent: #4
للإطلاع
|
Post: #6
Title: Re: للتوثيق:المبدع الراحل العميري ومبدعنا عبدالحكيم الطاهر يتنبأآن بثورة الهاتف النقال والمرئي
Author: سلمى الشيخ سلامة
Date: 12-10-2009, 03:41 PM
Parent: #5
ابو عبيدة ازيك
عميرى كان زول مفارق
اخر تمثيلية اشتغلناها سوا كانت عن الغاز
الغاز البجيبوه بالانابيب
كتب النص واشتغلته معاهو فى الاذاعة يوم وقفة العيد العام"1989"ما متذكرة التاريخ الهجرى
تنبا باكتشاف الغاز فى السودان والبترول الممكن يكون خير على كل الناس
ورسم اجمل صورة للانسانية من خلال الحوار
وبالمناسبة برضو تنبا انه الجنيه السودانى حيكون بدون قيمة
برضو فى سياق درامى
قال انه ساندوتش الفول حيصل لميتين جنيه ودا حصل
وانه التكسى من المطار لابوروف حيكون بعشرين الف ودا برضو حصل وبالزيادة كمان
رحم الله عبدالعزيز العميرى رحمة تتسع
|
Post: #8
Title: Re: للتوثيق:المبدع الراحل العميري ومبدعنا عبدالحكيم الطاهر يتنبأآن بثورة الهاتف النقال والمرئي
Author: أبوعبيدة محمد الأمين
Date: 12-14-2009, 05:11 PM
Parent: #6
أستاذة سلمى والله إني ما أفترعت هذا الخيط إلا وكنت أنت في الخاطر
لأنك جزء أصيل من جزء أصيل من وجدان هذا الشعب: عبدالعزيز العميرى
فيا أستاذة سلمى ورفقاء درب العميري الدعوة لكم أجمعين لتوثقوا لهذا الهرم
فنحن فقط جمهرة تلاميذ في حضرتكم أيها الأساتذة.
فهل من مزيد؟
ياريت والله.
|
|