Post: #1
Title: عربـــــــــــــــــــــــى جوبا!!
Author: jini
Date: 11-30-2009, 11:45 AM
Parent: #0
احد المذيعين من اشقاءنا فى جنوب الوطن الحبيب يذيع خبرا عن والى بحر الغزال الذى استقبل رئيس الجمهورية المشير البشير والذى شرف مأدبة عشاء اقيمت على شرف البشير
ولكن اخونا المذيع طارت منه كلمة عشاء فمضى يردد مأدبة مأدبة مأدبة وفى الاخر توكل على الحى الذى لا ينام واكمل قائلا:
مأدبة غداء بس أكلوه بالليل!
محبتى واعزازى لكل اشقاءونا فى الجنوب الذين لا يعشقون الا الحياة بكل مباهجها دون تعد على احد!
جنى
|
Post: #2
Title: Re: عربـــــــــــــــــــــــى جوبا!!
Author: Zakaria Joseph
Date: 11-30-2009, 07:10 PM
جنى,
إزيك و كل سنة و انت و الوليدات بخير,
حكاية عربى جوبا دى جننتنى خلاص. اهلنا فى الشمال لا يفرقوا اللكنة العربية المستعملة فى الجنوب مع عربى جوبا. عربى جوبا يتحدث به اهل الاستوائية الوسطى و بالتحديد اهل جوبا و ما حولها. الجنوبين فى اعالى النيل و بحرالغزال يتحدثون نفس العربى البتكلم به اهل الشمال مع إختلاف فى اللهجة. انا دى ما بعرف عربى جوبا و لا بفهمو. ملاحظة:
الجنوبين يتحدثون بلغاتهم الخاصة فيما بينهم و يستخدمون العربية للحديث مع من لا يفهم لغاتهم. و بالمناسبة, لو بتشهد SSTV فسوف تلاحظ الفرق بين عربى جوبا و عربى جنوب.
و بالمناسبة, انا شاهدت كونسرت للبلابل امس الاول فى SSTV حيث قدمن فيه كلاسيكياتهن و ما شاء الله, انا كنت بشاهدهم و انا صغير منذا اواخر السبعينات و لمن شوفتهن فى تلفزيون اول امس ما صدقت عيونى انهن ما زلن شابات و "شديدات" شدة البقد عيون ود الموج. و المناسبة كانت احتفال باعيادى السلام.
برفو جوبا, فالفن هو الصلة الوحيدة الذى لم يتاثر بعد بين الجنوب و الشمال.
|
Post: #3
Title: Re: عربـــــــــــــــــــــــى جوبا!!
Author: عبدالكريم الامين احمد
Date: 11-30-2009, 07:20 PM
Parent: #2
هلا يا جني
وحبابك زكريا..
ويا جني عربي جوبا ده انا لمن اسمع سيرتو طوالي بجيب الكانجي مورو بتاعي وبجي.
ياخي لهجة فصيحة ومرنة وفيها مساحات لغوية وبراااح..
وحكاية غداء بياكلو بليل دي لذيذة واعادتني الي زمن جميل في ربوع جوبا
حيث تصنع هذه اللغة في كتور وفي ملكية وفي اطلع بره
وفي صالة تا ناكرو...
وسلام تاكم يا جني وزكريا
(اي السلام عليكم)
|
Post: #4
Title: Re: عربـــــــــــــــــــــــى جوبا!!
Author: Zakaria Joseph
Date: 11-30-2009, 07:48 PM
Parent: #3
كيكى,
كل سنة و انت بخير,
قبل سنتين, حضرت احتفال ايمانى فى كنيسة مثدويست فى رويال اوك فى ديرويت فى مشيغان و كان فى واحد عامل فيه سودانى من الجنوب و قسيس كمان من ضمن من ادرجوا اسماءهم لمخاطبة عباد الله. قدم لى صديق اميركى صاحبنا السودانى. صاحبنا كان بيجيد شوية عربى جوبا و طلب منى مساعدته فى الترجمة. مصيبة!!! يعنى عايزنى اساعدو فى ترجمة واعظة من الانجيل بعربى جوبا!!! اها, اخوك توكل على نيالج و بدا النضم و حلت الكارثة. صاحبنا كان يبنضم بلينغالا بتاع زائير مع شوية عربى جوبا. قطعت الخطبة من راسى و بعد المناسبة قربت اقتل ود الحرام النصاب. زولك كان زائيرى و مرة ابوه كمان زئيرية.
|
Post: #5
Title: Re: عربـــــــــــــــــــــــى جوبا!!
Author: عبدالكريم الامين احمد
Date: 11-30-2009, 07:55 PM
Parent: #4
| Quote: اها, اخوك توكل على نيالج و بدا النضم و حلت الكارثة. صاحبنا كان يبنضم بلينغالا بتاع زائير مع شوية عربى جوبا. قطعت الخطبة من راسى و بعد المناسبة قربت اقتل ود الحرام النصاب. زولك كان زائيرى و مرة ابوه كمان زئيرية. |
هههههههههه
وتحياتي يا زكريا
ودي كماراتي دنجر يا جك (او كما يردد اهل جوبا في تلك الحالات)..
وعربي جوبا لغة ورغم مرونتها العالية الا التعود علي سماعه والتحدث به هو الامر الوحيد القادر علي فهمه..
لانو مرات بكون في جمل يمكن تكون هنالك زي ثلاثة سكة لتوصيلها..
والعجب يا زكريا لو سمعت جالوه او جاز يغني بعربي جوبا
هناك فرقة شهيرة كانت في جوبا اسمها (جاز رجاف) لها الحان شجية وكلمات رهيبة بعربي جوبا
مستعد ادفع دم قلبي عشان الم في هذه الاغاني
|
Post: #6
Title: Re: عربـــــــــــــــــــــــى جوبا!!
Author: Zakaria Joseph
Date: 11-30-2009, 08:07 PM
Parent: #5
العم جيمس وانى إيقا يكاد يكون السياسى الوحيد الذى يجيد فنيات عربى جوبا لدرجة انه قادر على مخاطبة الجنوبين و الشمالين معا و ايصال الفكرة بسهولة. طبعا بعدالزعيم الراحل الخالد قرنق. قبل شهور زار العم وانى كادقلى و بدا فى مخاطبة التشريعين و الحاكم و نائب الحاكم و بدا البروتكولات:
الاك,
الاكوة;
سلام تاكم.
و اضاف: سلام تاكم دى معناه سلام عليكم تاكم.
و ضحك الجميع.
|
Post: #7
Title: Re: عربـــــــــــــــــــــــى جوبا!!
Author: عبدالكريم الامين احمد
Date: 12-01-2009, 07:46 AM
Parent: #6
| Quote: اضاف: سلام تاكم دى معناه سلام عليكم تاكم |
ويابا جميس واني دي جوبا جاااتو..!!
والراحل جون قرنق كان برضو متحدث بارع لعربي جوبا..
ولعربي جوبا كلمة جملة مرحة وفصيحة لو عاوز تقول لزول جيب لي موية حيث يقال
قتا لانا موية (اي اقطع لي موية)
|
Post: #8
Title: Re: عربـــــــــــــــــــــــى جوبا!!
Author: Gaafar Ismail
Date: 12-01-2009, 08:00 AM
Parent: #7
الحبيب جني وضيوفه
أيام حكومة عبود كان هناك برنامج خاص موجه للجنوب يستخدم فيه المذيع عربي جوبا... وفي احد الأيام كان المذيع يريد نقل خبر عن وزير الرياضة الذي كان آنذاك اللواء المرحوم طلعت فريد.......الأخ المذيع اجتهد ليجد كلمة تعادل وزير الرياضة ...ثم توكل علي الحي الدائم وقال ( وزير بتاع لعب )....يقال أن المذيع فقد وظيفته بهذا الاجتهاد الضار .
|
Post: #9
Title: Re: عربـــــــــــــــــــــــى جوبا!!
Author: Abdulbagi Mohammed
Date: 12-01-2009, 08:46 AM
Parent: #8
سلام جني، زكريا وكيكي
وكل عام و أنتم بخير
كلام أبو الزييك صاح عربي جوبا بيختلف عن العربي في باقي المناطق الأخري
في الجنوب او خارج الإستوائية، وهو افرب لعربي النوبي في كينيا و يوغندا وهو
انا شخصيا أطرب للإستماع لها او إستخدامها...
فالعربي في المناطق الأخري من الجنوب ،أي،غير الإستوائية ، ما بيختلف عن العربي
في دارفور او عند البحة او عند النوبيين من حيث تأثرو بلغات المنطقة المحلية...
فعربي جوبا مكون من مجموعة من اللغات المحليةو الوافدة بحكم مركزية جوبا..
| Quote: الأخ المذيع اجتهد ليجد كلمة تعادل وزير الرياضة ...ثم توكل علي الحي الدائم وقال ( وزير بتاع لعب )....يقال أن المذيع فقد وظيفته بهذا الاجتهاد الضار . |
في السواحيلي أخبار الرياضة (هباري يا شيزا) يعني أخبار اللعب
|
Post: #10
Title: Re: عربـــــــــــــــــــــــى جوبا!!
Author: عبدالكريم الامين احمد
Date: 12-01-2009, 08:57 AM
Parent: #9
اووووه..
نهار دي بوست دي جي عملو بلنق بلنق
عبدالباقي جييييي
(يعني الليلة البوست ده اصبح يلمع بحضور عبدالباقي)
عيد سعيد يا عبدالباقي ومشتاقين ياخي
بتفق معاكم انت وزكريا في تفرد عربي جوبا وفرزه لعيشته من باقي العربيات زي عربي واو وعربي راجا
والعربي في كل الهامش..
طبعا بالمناسبة هنالك خلاف كبير مابين عربي واو وعربي راجا رغم قرب المسافة الا ان عربي راجا تحديدا له لهجة واستايل نطق مختلف لتنازعه ما بين لسان دارفور والالسن في الجنوب..
وميمي ناكو بندا جوبا
يا عبدالباقي
اي انا احب جوبا كما تقول السواحلية
|
|