Post: #1 Title: الهتاف السياسي المعني والمضمون توجد نماذج Author: خـالد سـوميت Date: 11-29-2009, 08:50 AM Parent: #0
التاريخ السياسي للشعب السودانى مليئ بالثورات والتظاهرات علي اختلافها مؤيدة ومعارضة لحكم او حزب اوطائفة او مسؤل حكومى وعلى مر هذا التاريخ المليئ بالأحداث ظهرت الكثير من الشعارات او الهتافات الرنانة التى مازال الكثير من الشعب السودانى يزكرها ويزكر من هتفو بها والمناسبه التى ادت الى هذا الهتاف ومما لا شك فيه ان تلكم الهتافات قد لعبت دورا شديد الاثر في ايصال رسائل لا تسعها مقالات تكتب في صحف اوكتب اذ ان الهتاف كان يلخص لب الموضوع في جملة مستساقة ذات رنين وايقاع وهذا لعمري هو نفس الدور الذي يلعبه فن الكاركاتير وما يفرق بينهما ان الاول يخلد في الذاكرة ويكون شديد التاثير حين وقوع الحدث. الكاركتير يناقش قضايا متنوعة والهتاف في الغالب يناقش قضية الساعة ويلهب الجماهير التي في الغالب تتحصن به في المظاهرات وعوالم السياسة ...
Post: #2 Title: Re: الهتاف السياسي المعني والمضمون توجد نماذج Author: خـالد سـوميت Date: 11-29-2009, 08:53 AM
موضوع الهتاف او الشعارات السياسية بدات من قبل الاستقلال حيث انحصرت غالبية الشعارات والهتافات السياسية ضد المستعمر ومنها ما نحى نحو تمجيد الطائفية الدينية او احزاب الاستقلال.... بعد الاستقلال ومرورا بعدد من الانقلابات والديمقراطيات تعتبر هذه الفترة هى الفترة الذهبية للهتاف السياسي حيث امتلات الساحة السياسية فى السودان بالهتاف مع اوضد الحدث حتى صار الناس يتندرون فى احاديثهم بتلك الهتافات والسؤال الذى يطرح نفسه هنا من هو او ما هي الجهة التي تقوم بتاليف ذلك الهتاف ؟؟ هل يخرج هكذا عفوي ام تتدارس فكرة اخراجه جهة معينة وترمي به لجماهيرها المتحمسة لتردده في الشوارع وتلهب به حماسها؟؟ حتى تصل رسالتها للمسؤلين فكره البوست توثيق للهتاف او للشعارات السياسية فى السودان .....على مر الحكومات العسكرية او المنتخبة وسنبداء من هتافات الانقاذ الحاضره اليوم فى عالم السياسة السودانية ورجوعا للوراء لهتافات الماضى و سنحاول ذكر الهتاف والتاريخ والمناسب والجة التى رددته هل هى حزب او طائفة ام نقابة ...ام جماهير الشارع السودانى
Post: #3 Title: Re: الهتاف السياسي المعني والمضمون توجد نماذج Author: عبداللطيف حسن علي Date: 11-29-2009, 09:06 AM Parent: #2
داون داون يونس بيه
Post: #4 Title: Re: الهتاف السياسي المعني والمضمون توجد نماذج Author: الخير محمد عوض Date: 11-29-2009, 09:15 AM Parent: #3
Quote: داون داون يونس بيه
حيييلوي و ملعـوووبي
اها خدك دي بالفي بالمافي نحن معاك يا قذافي
هههههههههههههه
البوست دا سيأتي باشراقات عديده .... او هكذا نتوقع
Post: #5 Title: Re: الهتاف السياسي المعني والمضمون توجد نماذج Author: خـالد سـوميت Date: 11-29-2009, 09:16 AM Parent: #2
الانقاذ مثلت التطرف منذ بدايتها الاولى التى تزامنت مع حرب الخليج الاولى فخرجت جماهير الانقاذ تتوعد الحكومات التى وقفت ضد صدام وانحازت للامبرياليه هتافات تلك الفترة افسدت علاقات السودان الخارجية بسبب سياسات الانقاذ الخرقاء
من امثلة تلك الفترة
يهود يهود ال سعود
واخر مثل الهوس الدينى والتطرف
مصير بن علي مصير بوضياف
Post: #6 Title: Re: الهتاف السياسي المعني والمضمون توجد نماذج Author: خـالد سـوميت Date: 11-29-2009, 09:30 AM Parent: #5
شكل العلاقات المصرية السودانية فى تلك الفترة ... هتاف هتف به الانقاذيون
حسنى مبارك الله لا بارك و أضرب اضرب ياصدام من الدمام الى الاهرام
Post: #7 Title: Re: الهتاف السياسي المعني والمضمون توجد نماذج Author: د.نجاة محمود Date: 11-29-2009, 09:31 AM Parent: #5
هتاف الشماشة
تكتل طالب نكتل امك
Post: #8 Title: Re: الهتاف السياسي المعني والمضمون توجد نماذج Author: د.نجاة محمود Date: 11-29-2009, 09:33 AM Parent: #7
Quote: داون داون يونس بيه
دا واحد من الهتافات الان اتلحس من الجماعة
كولهم اسع في احضان يونس بيه يرفلون
كل سنة ووانتم بخير يا جماعة ما سلمنا وكدا
Post: #9 Title: Re: الهتاف السياسي المعني والمضمون توجد نماذج Author: الخير محمد عوض Date: 11-30-2009, 02:18 AM Parent: #8
* لا زيتون لا جبنة الصادق ما عاجبنا
* اتنين عقر غلو السكر
* تجار الدين ضربوا التموين
* لا نور لا موية الصادق الككوية هههههههه
وسنأتي لاحقا بالمذيد
Post: #10 Title: Re: الهتاف السياسي المعني والمضمون توجد نماذج Author: خـالد سـوميت Date: 11-30-2009, 02:32 AM Parent: #9
Quote: داون داون يونس بيه
الاخ عبدالرحيم شكرا على المرور
هذا الهتاف ابتكار كيزاني من قبل الانقاذ رددوه كل ماحلت بهم مصيبة من فعل ايديهم
فهتفو بسقوط امريكا وتوابعها فهتفو.....
لن يحكمنا البنك الدولى
Post: #11 Title: Re: الهتاف السياسي المعني والمضمون توجد نماذج Author: د.نجاة محمود Date: 11-30-2009, 02:39 AM Parent: #10
Quote: هذا الهتاف ابتكار كيزاني من قبل الانقاذ
ياخي امريكا دي اصلها ما عندها مكلة مع الكيزان قبل حكومة الانقاذ
دا هتاف آل شيوع البشجعو المعسكر الاشتراكي ايام الحرب الباردة انا شخصيا زحفت لي في تلاتة مظاهرات دا الهتاف الاصلي من آل شيوع
Post: #12 Title: Re: الهتاف السياسي المعني والمضمون توجد نماذج Author: خـالد سـوميت Date: 11-30-2009, 02:40 AM Parent: #10
Quote: بالفي بالمافي نحن معاك يا قذافي
الاخ - الخير كل سنه وانته طيب
هتافات القذافي - ظهرت بعد ان اشتد على الرجل الحصار وجاء للسودان لى افتتاح طريق العيلفون الذى تبرع بتكلفته
فهتفت الجماهير
وافي وافي يا قذافي
Post: #13 Title: Re: الهتاف السياسي المعني والمضمون توجد نماذج Author: خـالد سـوميت Date: 11-30-2009, 02:56 AM Parent: #12
Quote: دا هتاف آل شيوع البشجعو المعسكر الاشتراكي ايام الحرب الباردة انا شخصيا زحفت لي في تلاتة مظاهرات دا الهتاف الاصلي من آل شيوع
الاخت -د نجاة محمود تحية طيبة لك الشكر على المرور
الشيوعيون والكيزان فى مرتبة واحده فى العداء لى امريكا باعتبار حسابات الماضى
فأن كان هذا الهتاف هتاف ال شيوع فقد استلفه منهم بنى كوز طالما العدو واحد وان
اختلفت الاجنده السياسية لكل حزب
Post: #14 Title: Re: الهتاف السياسي المعني والمضمون توجد نماذج Author: خـالد سـوميت Date: 11-30-2009, 03:14 AM Parent: #13
فى سبيل الله قمنا نبتغى رفع اللواء لالدنيا قدعملنا نحن للدين فداء فليعد للدين مجده اوترق منا الدماء
شريعة شريعة وله نموت الاسلام قبل القوت
القران دستور الامة
هتافات استخدم فيها الدين للوصول لعهد التمكين
Post: #15 Title: Re: الهتاف السياسي المعني والمضمون توجد نماذج Author: خـالد سـوميت Date: 11-30-2009, 07:41 AM Parent: #14
Quote: * لا زيتون لا جبنة الصادق ما عاجبنا
* اتنين عقر غلو السكر
* تجار الدين ضربوا التموين
* لا نور لا موية الصادق الككوية هههههههه
حبيبنا ابو الخيرات هتفاتك التى ذكرت نموذج واضح لمطالب الجماهير
للحكومات لتوفير السلع والخدمات والتى ظهر جليا ان السكر كان اهمها
يابوليس اقلع طاقيتك رطل السكر بيقى ماهيتك
لا سكر ولا عيش دايرين حكومة الجيش
قول ليهم يا ابو الخيرات اه جاتكم حكومة الجيش خمو وصرو
Post: #16 Title: Re: الهتاف السياسي المعني والمضمون توجد نماذج Author: Ahmed Alim Date: 11-30-2009, 07:58 AM Parent: #15
العزيز سوميت،
وين الحي بيك يا راجل والعيد مبارك عليك.. من كترت ما اختفيت قربنا ان نهتف انا وابوالخيرات:
عـائد عـائد يا سـوميت
فطالما عدت للمنبر سالماً سنقول لك:
سـير سـير يا سـوميت
متابعين للبوست...
Post: #17 Title: Re: الهتاف السياسي المعني والمضمون توجد نماذج Author: خـالد سـوميت Date: 11-30-2009, 08:33 AM Parent: #16
حبيبنا - الاستاذ احمد عالم كل سنة وانت طيب يارجل
طالما ان الحديث عن الهتافات السياسية ياريت يا احمد
لو اتحفتنا بماهتفت به الجماهير النوبية دفاعا عن قضيتها
ضد من قاموا بالتهجير القسري لاهلنا فى الشمال ومازالو
حتى الان يسعون لى اقتلاع ما تبقى من جذور بتزيفهم للحقائق
وللتاريخ مرددين
السد السد الرد الرد
فبماذا ترد على هؤلاء يارجل
Post: #18 Title: Re: الهتاف السياسي المعني والمضمون توجد نماذج Author: Ahmed Alim Date: 12-01-2009, 02:05 AM Parent: #17
Quote: طالما ان الحديث عن الهتافات السياسية ياريت يا احمد لو اتحفتنا بماهتفت به الجماهير النوبية دفاعا عن قضيتها ضد من قاموا بالتهجير القسري لاهلنا فى الشمال
إلاَ غايتوا بالنوبية لانوا الهتافات ضد عبود بالعربي بتجيب لينا هوا ساكت يقوم يجينا ليك إرهابي من النوع دا
لكن نديك وحدة خفيفة كدة:
لا دال ولا كجبار في أرض النوبة نحنا أحرار
Post: #19 Title: Re: الهتاف السياسي المعني والمضمون توجد نماذج Author: د.نجاة محمود Date: 12-01-2009, 02:22 AM Parent: #18
سيخ سيخ شاينا مسيخ
يا بثينة حمارك عينة
لن تحكمنا حكومة الجوع
Post: #20 Title: Re: الهتاف السياسي المعني والمضمون توجد نماذج Author: خـالد سـوميت Date: 12-01-2009, 03:42 AM Parent: #19
Quote:
سيخ سيخ شاينا مسيخ
ياريت لو وريتينا الهتاف ده القالو منو؟
اوتبع ياتو شريحة من المجتمع السودانى
شكلو كده بتاع طلبه من فيهو السيخ ده
Post: #21 Title: Re: الهتاف السياسي المعني والمضمون توجد نماذج Author: خـالد سـوميت Date: 12-01-2009, 03:49 AM Parent: #18
Quote:
يقوم يجينا ليك إرهابي من النوع دا
ياراجل مادام القصه بتجيب ليها مشاكل احسن ما تقول
سلامتك بالدنيا ...
Post: #22 Title: Re: الهتاف السياسي المعني والمضمون توجد نماذج Author: خـالد سـوميت Date: 12-01-2009, 04:13 AM Parent: #21
Quote:
يا بثينة حمارك عينة
الرئيس الراحل نميري هتفت الجماهير ضده
رأس نميري مطلب شعب
ياخرطوم اشتعلي اشتعلي خلي حكومة السدنه تولى
وهتفت مرة اخرى مؤايدة له
عائد عائد يانميري
حبيبكم مين نميري رئيسكم مين نميري
السؤال هل هم نفس الجماهير؟؟
Post: #23 Title: Re: الهتاف السياسي المعني والمضمون توجد نماذج Author: الخير محمد عوض Date: 12-01-2009, 05:49 AM Parent: #22
في هتاف كدا يا ابو الخلد لييييي هسي ما قادر اعرف مناسبتو شنو وقالوهو متين وربطو حاجاتو دي كيف...هههههه يعني الهتاف دا فيهو الاتية اسماءهم (1) ادم سفير ............... يا اااا قوم اتعرفون من هو ادم سفير (2) عسكري (3) مرض السكري
الهتاف كان بقول:
يا عسكري... ما تذدري...ادم سفير... مسكو سكري قر قر قر قر قر قر قر قر
لكني والحق يقال كنت من اكثر الهتافات التي اطرب لها ايام ما كنا في الابتدائية.... في اي مظاهرة معاي صحباني بنقولو سااااااااا ي مرات كدا بيلفق والحدث ومرات كدا بسكتونا منو..!!!!
Post: #24 Title: Re: الهتاف السياسي المعني والمضمون توجد نماذج Author: خـالد سـوميت Date: 12-02-2009, 06:37 AM Parent: #23
Quote: لا نور لا موية الصادق الككوية
لن نصادق غير الصادق
حزب الامة أمل الامة
حزب الامة جاب الغمة
الختمية والانصار صفا واحد لن ينهار
عاش أبو هاشم عاش أبو هاشم
Post: #25 Title: Re: الهتاف السياسي المعني والمضمون توجد نماذج Author: زهرة حيدر ادريس Date: 12-02-2009, 07:14 AM Parent: #24
بعد قرار المحكمة الجنائية الدولية عرض التلفزيون السوداني وعدد من القنوات الفضائية المسيرة ((المليونية)) التي سيرتها((جماهير الشعب السوداني)) .. ومن ضمن ما عرض لافته بتوقيع هيئة من هيئات الانقاذ ما متذكرة اسمها بالضبط لكن مضمونها انها للتكنولوجيا و البحث العلمي .. وحملت الشعار الاتي:
العار العار ... اوكامبو حمار
!!!!!!!!!!!!
Post: #26 Title: Re: الهتاف السياسي المعني والمضمون توجد نماذج Author: خـالد سـوميت Date: 12-02-2009, 08:06 AM Parent: #25
Quote:
العار العار ... اوكامبو حمار
الاخت الكريمة زهرة
انا برضو شفت لافته مكتوب فيها
أم ضريوه تحذر امريكا للمرة الاخيرة
الناس ديل لو ده منطقهم كان اعملو شي واحد بس
ناس ام ضريوه اشيلو لافته اكامبو.... وناس التكنولوجيا و البحث العلمي هم من يحذر امريكا
وله شنو؟؟؟
Post: #27 Title: Re: الهتاف السياسي المعني والمضمون توجد نماذج Author: الخير محمد عوض Date: 12-02-2009, 08:20 AM Parent: #26
Quote: سيخ سيخ شاينا مسيخ
جنك سيخ.... ظلامية دامسة...هههههههههه
Post: #28 Title: Re: الهتاف السياسي المعني والمضمون توجد نماذج Author: ريهان الريح الشاذلي Date: 12-02-2009, 09:01 AM Parent: #27
سلامات سوميت وكل سنة والجميع بخير
Quote: والسؤال الذى يطرح نفسه هنا من هو او ما هي الجهة التي تقوم بتاليف ذلك الهتاف ؟؟ هل يخرج هكذا عفوي ام تتدارس فكرة اخراجه جهة معينة وترمي به لجماهيرها المتحمسة لتردده في الشوارع وتلهب به حماسها؟؟
مرات كتيرة بيتم (نجر) الهتاف في ساعة حماس مفاجاة وبيكون وقعو شديد علي السامعين ، افتكر القصة عندها علاقة بحجم الغصة والقضية وبتداخل معاهو شوية الهام وموهبة وسرعة بديهة ..انا غايتو حضرت لي زي كم هتاف منجور بالسرعة دي ححاول لو اسعفتني الذاكرة اكتبهم ...
ومنهم
فكوا دربنا وجعتو قلبنا ...
وده اتقال في شان قوانين النظام العام المكبلة لحريات المراة
Post: #29 Title: Re: الهتاف السياسي المعني والمضمون توجد نماذج Author: خـالد سـوميت Date: 12-04-2009, 04:06 AM Parent: #28
Quote:
مرات كتيرة بيتم (نجر) الهتاف في ساعة حماس مفاجاة وبيكون وقعو شديد علي السامعين
الاخت ريهان لك التحية والشكر على المرور
من أمثلة الهتافات المنجورة اذكر عندما ترشح رجل الاعمال عبدالرحمن السلاوي صاحب
حلويات سلا الشهيرة ضد حسن الترابي في اخر انتخابات برلمانية مفبركة في دائرة أركويت و
التى تضم الصحافة شرق وحي الانقاذ... أنحاز معظم الناس لرجل الاعمال عبدالرحمن السلاوي
مما أحرج الشيخ الترابي فماكان من الجماعة الا أن هددو مواطني حي الانقاذ بعدم توصيل خدمات
المياه والكهرباء لحي الانقاذ أن هم صوتو للسلاوي عقابا لهم فأنحازو وهم مجبرين للشيخ مرددين
هتافا فى أثناء ندوة أقيمت للمرشحين بالصحافة شرق لا لا بتاع الباسطه لا
فتبسم الشيخ ضاحكا بسخريته المعهوده
Post: #30 Title: Re: الهتاف السياسي المعني والمضمون توجد نماذج Author: حسين نوباتيا Date: 12-04-2009, 06:05 AM Parent: #29
ولدنا الموسوعة مشتاقيين ..
اضحكني هذا الهتاف شديد اللهجة - والذي اظن انه سبب مرونة امريكا المفاجئة مع ام ضريوة..
Quote: أم ضريوه تحذر امريكا للمرة الاخيرة
_____
عام 1994 قام عمر البشير بافتتاح شارع الردمية بعد رصفه " احد الشوارع الرئيسة في الحاج يوسف" و تغير اسمه للقدس او القادسية لا ادري مازال المواطنون يطلقون عليه اسم الردمية - بعد ما قص طويل العمر الشريط الاحمر هاج الجمع وماج وبانفعال شديد قاموا يرددون امريكا لازم تدمر وسودانا لازم يتعمر
وانا كنت قاعد امام صيدلية في نفس الشاعر اذا في واحد قال ليهم الزول دا جاي من امريكا كان اكلوني بي سفنجتي - ربك ستر..
القيام بكرة يا حبيب..
Post: #31 Title: Re: الهتاف السياسي المعني والمضمون توجد نماذج Author: خـالد سـوميت Date: 12-04-2009, 06:38 AM Parent: #30
Quote:
امريكا لازم تدمر وسودانا لازم يتعمر
حبيبنا سلامات
والله ربنا مرقك ساااى من الناس العندها امكانيات تدمر بيها امريكا
هتفو الطاغية الامريكان ليكم تسلحنا
ياراجل لمن الامريكان قصفو مصنع الشفاء وزير الدفاع عبدالرحيم
قال الصواريخ شافوها أهالي مدينة بربر الراجل الله اسامحو
بدل ما اقول مضاداتنا الارضية تصدت أو اللادارات رصدت
الصواريخ الامريكية انشاء الله بالكضب ربنا مافتح عليهو بشي
الا أنو اقول الصواريخ شافوها ناس بربر ده كلام ده......
القيام بكرة بالسلامة ياحبيب بس ماتطول عشان الجماهير
ما تهتف عائد عائد يامدير نحنا معاك للتعمير
Post: #32 Title: Re: الهتاف السياسي المعني والمضمون توجد نماذج Author: مدثر قرجاج Date: 12-04-2009, 07:57 AM Parent: #31
ياسلام ياخالد رجعتنا للزمن الجميل كل سنه وانت طيب ................ هسه يا اخوى من الجوع الواحد اسمو مابقدر يقولوا باقى ليك تانى حايكون فى هتاف ......................... محبتى
Post: #33 Title: Re: الهتاف السياسي المعني والمضمون توجد نماذج Author: خـالد سـوميت Date: 12-04-2009, 06:51 PM Parent: #32
