اخــوكم متورط جدا في ( شراط) مع اثيوبي!

قبل كم يوم تسامرنا بمناسبة مقدم عيد الاضحية والمائدة السودانية واصنافها والاكل وما ادراك ما الاكل واختتمناالحديث حول الاكل الاثيوبي مع محدثي وصديقي (افرايم) التكاسي من اثيوبيا الشقيقة وكان يتباهي جدا بوطنية عالية بان الاكل الاثيوبي افضل من السوداني... وعندها غلى الدم في عروقي وبجاهلية سودانية تهكمت علي اكلهم وتحديدا طبق ( الكتفو) وهي لحمة البقر ( الفخدة) الحمراء التي ياكلونها طازجة من غير طبخ وسبق ان اكلتها في اثيوبيا ذات مرة مطبوخة حسب اشتراطي على صاحبة المطعم ومنذ ذلكم اليوم صرت اشمئز من منظرها نيئة ولذلك عندما اتى ذكرها وهي من الاطباق المفضلة جدا عند اهلنا الاثيوبيين في الحال اغتنمتها سانحة للرد على صديقي اذ هاجمت طبق
(الكتفو) هجوما ضاريا بل شفعت هجومي بعبارة امهرية وهي مفردة( بس بس) بكسر الباء وتسكين السين في الكلمتين اي بمعني ( قذر..عفن) وهنا غضب صديقي غضبا شديدا ورد على بعربية مكسرة تعلمها اثناء عبوره في طريق هجرته من بلاده بالسودان وقد قطن منطقة الجريف واركويت بالخرطوم لاكثر من ثلاثة اعوام ( كتفو اهسن من مرارة) وقد نطق كلمة (مراره) بلكنة اعجمية خفف فيها نطق الراء وهنا وقف حمار الشيخ هباني في العقبة ولكنى ظللت اكابر وادافع عن ( مرارتي) والتي صارت عندى في تلك اللحظة اقيم من ( حلايب والفشقة) المحتلتين وظللت اغالط الرجل حتى كدت من ( الغلاط )ان ( افقع مرارة) صديقي وانا في حالة اهلى السودانيين اذ جلنا مكابرون لا نعترف بالغلط ولا نقبل الحجة من الاخر حتى لو كانت حقاابلج لاننا لو تقبلناها كحق وحقيقة كانما اعلنا انهزامنا وانكسارنا ولذلك ينبغي ان نكون مبدئيين حتى في الدفاع عن موقفنا المغلوط مثل صديقي الشيوعي (الجعلي) الذي اخى بين شيوعيته وجعليته وظل متمسكا بشيوعيته بجعلية منقطعة النظير حتى اليوم رغم اقتناعه بطوباوية فكرته الايديولوجية وانها فكرة غير قابلةالتحقق ولكنه يرى انه من العيب وعدم الاخلاق ان تترك فكرتك حتى لو كانت خطا لان جعليته تحول دون التراجع عن مبدئه حتى لو اتضح له انه خطا!! وهكذا كنت ادافع عن ( المرارة بت اللزينة) مكابرا جدا مثل صديقي الشيوعي الجعلي وانا في قرارة نفسي مقتنع بانها اقبح واقذر من ( الكتفو) لانه مجرد لحمة حمراء وكفى المؤمنين شر مرارتنا المكونة من بعض امعاء البهيمة فشفاشها وكبدتها وكرشتها وطوحالها وعصارة المصران ابو غازي وضنب الخروف و( العتي) او( البول) ان صح التعبير مشفوعة بطريقة اعدادها واكلها المخيفة والتي لو راتها جماعات الرفق بالحيوان لصنفت السودانيين بالوحوش الضارية وقطعا سيصدرون قرارا دوليا لمقاطعة السودان باعتباره في قائمة الارهاب بسبب هذه المرارة الملعونة!
اخيرا انتهى السجال بيننا لا هازم ولا مهزوم فينا ولكن احتكمنا الى حل وسطي اقترحه بعض الاخوة الافارقة من الحضور وهم الذين عرضوا علينا ان نصور الطبقين ( الكتفو الحبشي والمرارة السودانية) وطرق اعدادهما واكلهما على فيديو يرفع عبر الانترنت علي ( يوتيوب) وهو شريط يصور الوجبتين وطرق اعدادهما واكلهما والفيصل بيننا حينها سيكون تعليقات الجمهور المشاهد للفيديو و بسودانية ( جعولية) انتفخت امام الجميع وقبلت الرهان الصعب... فما رايكم بالله في هذه الزنقة..حيث اول مرة في التاريخ تدخل( مرارتنا) الحبيبة منافسة كبرى لاثبات ذاتها السودانية الحصرية فهل بالفعل ستكسب (مرارتنا) الرهان ام ستنهزم امام ( الكتفو) الحبشي و( تفقع مرارتنا) مثل عمر البشير وعصبته و( ابو كبيرة) الذين لا زالوا يفقعون مرارة شعبهم!؟

Quote: ستنهزم امام ( الكتفو) الحبشي و( تفقع مرارتنا) مثل عمر البشير وعصبته و( ابو كبيرة) الذين لا زالوا يفقعون مرارة شعبهم!؟

تلك هي الإجابة....

صديقي الكوشي شاعر الوطن القادم بقوة (زمراوي)


انت بتفتكر لسع فضلت فينا مرارة شان تنفقع بعد عشرين سنة
انا اشك في ذلك بل تلكم الكائنات اشك ان بها كبــــــــــــــــدة!

.

هباني إزيك

إنت وقت عارف مرارتنا مفقوعة زي ما قلت ... مالك بتنافس بيها

شوف ليك ملوحة ونافس بيها أضمن من المرارة المفقوعة

-----------------
المرة الجاية سوق معاك خالد المحسي, يا وداك السماء يا وداك التوج وانا أرجح الاحتمال التاني

يا هشام كل عام وأنتم بخير،

يازول معركتك بالمرارة ضد الكتفو خسرانة خسرانة أمام جماعتنا ديل..
لاحظت الكثير من الخواجات يأكلون الكتفو مع (الإنجيرا و المتمتا)..
لكن لو قدمنا صحن مرارة سوداني لواحد خواجة تفتكر حيقبل يدخل إيده؟!

إيه رأيك يوم العيد عازمك كتفو وحأحجز ليك (العفشة) حقت الخروف
وإنت حر تعملها مرارة أو تطبخها كمونية!
بالله شوف الكتفو أو (Kitfo) مقدم مع الإنجيرا والشطة الحارة (المتمتا)
بطريقة حضارية كيف؟

العزيز عزيز عيسى



والله بصورتك الفظيعة للكتفو دخلتني في جحر ضب مع صاحبي افرايم
و(مرارتنا) حتفقع مرارتنا زي الهلال حتاخد عشرة صفر و بقت في امرا ضيق وانا متاكد اخوانا الافارقة حيتحالفوا مع الكتفو الحبشي وبالجد بقيت خايف اقوولوا علينا نحن ربما الشعب
الذي كان ياكل لحوم البشر!

اللهم انصر مرارتنا واحفظها من كيد الحاقدين و لا تتركها تفقع مرارتنا في هذا السجال
التاريخي حيث اصبحنا مهزومين في كل شيء حتى في الاكل!

الكرمبا

بالله عليك لم الفضايح دي!
قبل ما نبقى في تولا....هازول شكلو الكتفو فايز فايز مش اكان ختيتها في صحن والله لو ختيتها
مع القشير في القصري الجمهوري مستشار عديل ياها الداقة الدلجـــــــــــــــة!

الفاتح شلبي
كيفنك

والله التركين بتاعكم ده اخير منو الكتفو الحبشي
ده يعنى لو اكلتو في امريكا قدام امريكان
غايتو من ريحتو ساكت امريكا ستستنفر كل
وحدات صحتهـــــــا في مواجهة هذا الشيء العجيب!

أها رأيك شنو في
فخدة الكعونج دي ?



ناقصة الشربوت بس

اقلعـــــــوا فورا عن اكل المرارة ايها السودانيون كاول خطوة في نبذ ثقافة العنف فانها عملية وحشية ترسخ ثقافة العنف وهي لا تقل عنفــــــا عن هذا الفيديو المخـــــــيف والمقرف جدا ادناه!

.

العزيز ود هباني - لك التحية

Quote: .مثل عمر البشير وعصبته و( ابو كبيرة) الذين لا زالوا يفقعون مرارة شعبهم!؟

عشان كدة نقول ليك أحسن تتنازل عن الشراط
ده لأنو مرارتنا ما بتتحمل فقع أكثر من كده

اقترح وحتي تنال المرارة بتاعتنا الكاس في الديربي ده
انها تقدم ومعها مريسة ضبانها ضكر بالجنبة كده..
وحتما سيخش الكفتو في امر ضيق حتي وان تمت تقديمه بتلك الطريقة الحنكوشة اعلاه..

ام مرارة ان لم يتم مجاوزتها بمريسة
لن تقوي علي المنافسة قيد انملة

Quote: اقترح وحتي تنال المرارة بتاعتنا الكاس في الديربي ده انها تقدم ومعها مريسة ضبانها ضكر بالجنبة كده.. وحتما سيخش الكفتو في امر ضيق حتي وان تمت تقديمه بتلك الطريقة الحنكوشة اعلاه.. ام مرارة ان لم يتم مجاوزتها بمريسة لن تقوي علي المنافسة قيد انملة

كيكي العزيز

انت من زمن الضبان الضكر في السودان
ده يا خلي هاجر من زمــــــــان لمن عرف القصة بايظة
ولا حتى فحول البصل التي كانت تقدم ( مزة المريسة)
ما عادت فحولا كما عهدناها!
ولكن الى الان الكتفو ضاربنا عشرة صفر
مادام ( مرارتنا) مفقوعة من مرارات البشير وصحبه!

العزيز دكتور يوسف

كل عام وانت بخير


والله يا اخووي بقينا مغلوبين في اي حاجة
اخر حاجة بقت فاضلة لينا المرارة دي غايتو اكان انغلبت من الكتفو الحبشي
والله الا بعد ده تشوفوا ليكم بلد تانية تكون البلد دي راكبها شيطان
عاوزة ليها فكي نزورها ليهو شان افك عارضها!

شغلك ده زومبي سااااااكت
ما مرارة

الرائع: ود هباني - لك الود
كل سنة وإنت طيب مجدداً

Quote: انت من زمن الضبان الضكر في السودان ده يا خلي هاجر من زمــــــــان لمن عرف القصة بايظة ولا حتى فحول البصل التي كانت تقدم ( مزة المريسة) ما عادت فحولا كما عهدناها!

طيب ماذا بقي لنا إذا هاجر عننا
وتركنا ما نفاخر به العالم أجمع .
الضكورة والفحولة هي مفخرتنا بين خلق الله
فلا أدري كيف يكون حالنا ونحن بدونها.

* يا سبحان الله كل شيء في بلدي تبدل حتى
الضكورة والفحولة!!!

اخونا اشرف

كل عام وانت بخير

بالفعل شغل مرارة و(زومبي) ليشهدوا منافع لهم
اجتماعية وغذائية وسياسية !

.

.