يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها

مجانًا سااااي ... مِلِح يعني ... معقول كِده أكون بينكُم وما إكْتشفتو إمْكانِياتي ... مواهبي ... إسْتفيدو مِن الحاجات -السمحه- الحَواليكُم ... لا سِيما أنها " مجانِية " وكِده ... بِت إبراهيم قالت : عليها " الجبنه " وسندوِتشات " التونا " وعلشان ما دايِر أي تأويلات بِشأن عِلاقتي مع " عادِل التيجاني " ما حأطلُب مِنو صالة مركز أصدِقاء البيئة ... حأعملا في صالة " غير " حاجة كِده ما حتِتْوقعوها ... يعني مُفاجأة ... مُش الدُنيا عيد؟

المذكورين أدناه ما يِجو حفلتي بتاتًا :
(1) عادِل التيجاني ...
(2) هشام درماس (مُش لأنو شايقي ... أبدًا والله ... بس ما يِجي ... وإن شاءالله يِكون ظاتوو سافر)
(3) الزول الغنا لينا في رحلة "مزرعة الدوسري-الشحانِية" زول غياظ بِشكل ياخ صوتو جميل لامِن غلط .. النوع ده أصلو لا بيني لا بينو ..
(4) صلاح عبدالله ...
(5) أحمد عبدالمُنعم (بقيت بِتظهر في الجرايِد كمان ... شكيتك على الله ... مالك ما حدثتني) ...

يا جماعة أنا جاد جِدًا ... عاوِز أخلي ليكُم العيد ده " مُخْتلِف " " مُبْتهِج " ... محمد السُني بِكون مشغول في العيد عفيتو مِن الجيه ... ما تجي ... أنا بِصراحة كِده ما عاوِز أي " زميل " يجي حفلتي دي ... أنا في مرحلة الإنْتِشار ما عاوِز لي كلام يجيبلو إعْتِذار ...

جيبو معاكُم أي زول أي زول ياخ ... جيبو الشُفع ... بِالمُناسبة عندي ليهُم أُغنِية خاصة جِدًا (عطِشو لي الجيم وحياة أبوكُم) ماف زوله تتحجج بِأي عُذر ... يا زوله أقولِك قوله أكان دايره تَورِقي خُضرتِك تعالي ورِقيها في حفلتي ... حتُوزع التذاكِر ظاتا بِشكل مُخْتلِف ... حأرسِل " رِسالة " في جوال كُل زول/زوله مدعو فوقا بكان الحفل وميعادو ...

Quote: عاوِز أعمِل حفلة أغني ليكُم فيها

Quote: هشام درماس (مُش لأنو شايقي

عمرنا ما سمعنا بي رطاني غناي ..... عدا وردي ...

بنمزح ياعزام .......

بس شنبك ده ما شنب غناء حاول اتصرف فيهو ......

Quote: يا زوله أقولِك قوله أكان دايره تَورِقي خُضرتِك تعالي ورِقيها في حفلتي ..

جنس سناحة لكن


قلت تحب الجيم المعطشة ؟

هههههههههههههههههههههههههها

omer osman

Quote: عمرنا ما سمعنا بي رطاني غناي ..... عدا وردي ...

الخليل (صاي) ... مُبارك حسن بركات (محس العيلفون) ... أحمد المُصطفى (محس العيلفون) ... إبراهيم عَوض (كنزي) ... سَيِد خليفة (محس العيلفون) ... حمد الرَيح (محس توتي) ... زكي عبدالكريم (ما تشوفو مَشلخ H تقول مِن عِندُكُم) ... البلابِل (حلفا) ... أمير حلفا ... محمد زمراوي ... علو ديل خواجات ... وهسِع في عصرِنا هذا عزام حسن فرح (عبري) ... شوفو الإمْبريالي ... الشِيوعي ... البعثي ... ده

Quote: ... سَيِد خليفة (محس العيلفون)

ما تتلبط في زولنا

سيد خليفة ( رفاعي - عسيلاتي) من العسيلات يا مسنوح

omer osman

Quote: بس شنبك ده ما شنب غناء حاول اتصرف فيهو ......

أمانةً عليك ... و" النِعام آدم " كان شغال حواتي

ود شيقوق ...

Quote: سيد خليفة ( رفاعي - عسيلاتي) من العسيلات يا مسنوح

يا زول الزول مِن الدِبيبة الجنب العيلفون وناس الدِبيبة والعيلفون أهل ساي ... نحنا أخير نمشي البوليس يا زول
ـــــــــــ

Quote: قلت تحب الجيم المعطشة ؟

والله في قناة " الشُروق " في مُذيع سوداني ، دايمًا بِيقرا الأخبار ... بِعطِش ليك " الجيم " دي تقول دايِرا " تيراب " والله ساعة يِقول ليك " جججججججوبا " والله أنا بِجاي تِلقائِيًا كِده ... والله ما بقصُد ... بقولا " ماااااالِك علينا " ... عطِشا عطِشا الله يِرضى عليك ... عاد الغُربة دي ما نمرُق حتو مِنا بِجيم مُعطشة ... عطِشا عطِشا

كلامك صاح هو من الدبيبة ورفاعي

Quote: والله في قناة " الشُروق " في مُذيع سوداني ، دايمًا بِيقرا الأخبار ... بِعطِش ليك " الجيم " دي تقول دايِرا " تيراب " والله ساعة يِقول ليك " جججججججوبا " والله أنا بِجاي تِلقائِيًا كِده ... والله ما بقصُد ... بقولا " ماااااالِك علينا " ... عطِشا عطِشا الله يِرضى عليك ... عاد الغُربة دي ما نمرُق حتو مِنا بِجيم مُعطشة ... عطِشا عطِشا

يجازي محنك ضحكتني

تقول دايرا شنوووووووووووووو؟ تيراب

مسنووووووح

ود شيقوق ...

Quote: ورفاعي

دايِر يِخُش الجنة سكن مع المحس هلا هلا ... عربي ونجح ... طالما إنو بِقى مُش مِن إندِنا ... يبقى تحدِث ولدو قول ليهو أكان لازِم ولابُد يِغني اليِزِح غادي غادي مِن غُنا أبوهو ... ما يِبشْتِنو لينا ...

رسلوا لينا التزاكر يا جماعه إن شاء الل شيرنق دي ما بنفوتها تب وبالعدم كدا اعملوا لينا تسجيل إن شاء الله يقبضوك ناس النظام العام

يكفينا تنزل لينا صور الحفلة يا عزام
أو تسجيل لأننا ما بنقدر نجيك , وما عاوزين
نكلف عليك بإرسال التذاكر, مع إنك
قرررررررررررريب مننا.

Quote: أنا بِصراحة كِده ما عاوِز أي " زميل " يجي حفلتي

زميل و بالأحمر كمان ؟!

والله ايامك يا عزام

خايف ينتقدوك
ويوضحوا النشاز والخرمجة للجماهير ؟

غايتو لو غلبتك ، تعال حفلة الهلالاب ب ايمان لندن

بس أديني فرصة آخد أذنها

حكم في إحتمال أن تخرطها وتفوقها وسامة

أها ، هاك التحرش ده

وعيد مبارك سعيد

صديقي عزام

كل سنه وانت طيب

من ناحية الكلام صحي ما في زول بيقدرك

لكن حتة الغنا كدي الننتظر نشوف البوست بعد الحفل

ونتمني من الاخوان ان يسعفونا بالصور

اما من ناحيتي وعملا ب"احتضان" المواهب

بعد العيد ان شاء الله جاي قطر

حاديك اغنيتين من الحاني الخاصه

اها قصرت معاك ؟؟

Quote: (3) الزول الغنا لينا في رحلة "مزرعة الدوسري-الشحانِية" زول غياظ بِشكل ياخ صوتو جميل لامِن غلط .. النوع ده أصلو لا بيني لا بينو ..

خَايف من المُنافسة ولا شُنو يا ابو العزائم....
كان كِده درماس لازم يجيكم, وانشاء الله ما يكون
سَافر, عشان المنافسة تبقي جَد جَد ....

بعدين يا عزام لو الحكاية عَصلجت معاك اَقلِب
ليهم غُناء بالرُطانه وخُـومهم كده عشان ما يجيبو خبرك بالشين .

Quote: وهسِع في عصرِنا هذا عزام حسن فرح (عبري)

يا قريبي حيرتني عدييل..قول شاعر ..معلم ..عالم..محاسب..مراجع ..محامي .. شيخ دين(عشان ما تتلخبط مع شيوخ تانين) ..مفتي .مولانا ... من "عبري" ؟؟.... انت بتلخبط لينا النظام بتاعنا انا غايتو فنان من عبري غير رفيق الصبا المرحوم عصفور ما بعرف .....؟؟ غايتو بختهم ناس الدوحة حفلة سوارييه والتصقيق ممنوع عشان ما تجلدو ...

يا عزام عمر عثمان قال ليك

Quote: عمرنا ما سمعنا بي رطاني غناي ..... عدا وردي ...

قول ليه رايك شنو في التحت ده

هويدا بِتْ شرف الدين ...

يا زوله عليك الله إنتي كيفِنك ... كُل عام وإنتي بِخير ... تزوري النبي وتمْسِكي شُباكو إن شاءالله ... قولي آمين

Quote: رسلوا لينا التزاكر يا جماعه إن شاء الل شيرنق دي ما بنفوتها تب وبالعدم كدا اعملوا لينا تسجيل إن شاء الله يقبضوك ناس النظام العام

لو ناس الدَوحة ديل ختو الرحمن في قُلوبُم الحفلة بِتنجح ... ما فوقا تذاكِر ... حفلة مِلِح ساااي ... ما الدُنيا قبايِل عيد ... وبعدين أنا دايِر أديهُم حاجة جديدة جميلة (مُمْكِن تعطِشي لي الجيم لو سمحتي ... شُكرًا) ... بس طوااااالي في كورة ... طوالي في زول/زوله جاي يِغني في قطر ... الناس ديل بِقو يِسوو بُروفاتُم في قطر ولا شنو ... الحفلات القامت في قطر صدِقيني في دِيوم بحري أيام ما كُنا " نِحنا " ما حِضِرنا قدُرا ... هسِع " ايمان لندن " ما كانت في الدَوحة ومسخت علينا الفِجه ومشت ... الواحِد ما قِدِر أصلو يِركِز في صوتا ... جهرتنا شكيتا على الله ... الجابا شنو صادا؟ عِندي أُغنِية مِن كلِماتي وألحاني وتَوزيعي -ما شغال بِالموصِلي شغله- مُمكِن أرسِلا ليك ... أرسِلا ... طَيِب ... وبعدين نِحنا ظاتووو ناس " النِظام العام "

د. يوسُف محمد طاهِر ...

Quote: يكفينا تنزل لينا صور الحفلة يا عزام أو تسجيل لأننا ما بنقدر نجيك , وما عاوزين نكلف عليك بإرسال التذاكر, مع إنك قرررررررررررريب مننا.

يعني حتكون أقرب مِن حبل الوريد ... الناس في الدَوحة حاقدة ما تعرِف ... بغرانا ما تعرِف ... بقدر أفهم حِقد وبغر زُملاء المِهنة ... مساكين خايفين على عداداتُم ... وسط قريب (بِالقاف وحياة أبوك) ... أها حأغني ومجانًا وفي فُندُق 3 نُجوم وبِعشاهو ... النشوف إيمان لندن حتعمِل شنو؟ شكيتا على الله السماحا مِدَفِقة مِنا ... شرقتنا ... فلقتنا ...

حزف لانني وجدت انه من غير صالح بت ابراهيم ولا انا اي تعليق او اعتراض علي غناء

عزام لانو بعد العيد ناوي اديهو بعض الالحان

أبو ساندرا ...

Quote: بس أديني فرصة آخد أذنها

إذِن منو يا زول؟ يا زول حفلتي حفلة رُجال والغُنا الفوقا غُنا رُجال ... غُنا البنات شِنْ غرضْكُم بيهو ... إنتو ما بِتِختشو ليه؟

- ماشي وين يا بابا؟
- لإيمان لندن يا ساندرا
- وحفلة عزام يا بابا ما ماشي ليها؟
- 6ففق5478تت88976فاىه99ودين ×÷8987اع8أبوكي،،خ0لقث6788خ98تت7هة6547عزام ظاتووو
- بابا قال شنو يا ماما؟
- ما عارفة زي تقول سِمعت : < ... أبوكي و... عزام >

أمشي ياخ ... شيوعي ... شابِكنا < إتْحِدو إتْحِدو > إنت ما < تِتحِد > معاي

عزام يا اخوي من ناحية الجمهور

ما عليك نحنا جاهزين نجيب ليك باص باصين

بس انت فول الحفلة وين والجمهور الدايرو نوعه شنو

ولا نشكل ليك ونكتر من اشكال ناس جماعة لندن

اها بدرالدين الامير نجيبوا معانا شايف اسمه ما مكتوب

مشتاقين اكيد حنتفابل في العيد

تحياتي واحترامي

عزام كل سنة وانت طيب

سيبك من ناس الدوحة ديل اصلهم مابعرفوا الغنا

اها انا كيتن على الناس العاملين فيها فنانين

انا حاجزاك لى عرس طارق وفى الحنة كمان عشان

الناس تسمعك بى مزاج اها قصرت معاك.

عزام حسن فرح

كل عام وانت بخير

هل تعلم ان مصطفي سيد احمد

في اول ايام عيد الاضحي المبارك عام 1995م

كان عندو حفل في فندق شيراتون

ياسلالالالام حاجه جميله

طارِق ميرغني ...

Quote: بعد العيد ان شاء الله جاي قطر

معقول الله يِكرِمنا قدُر ده ... هسِع يِشْكُرو كيف؟ ده أحسن خبر سِمِعتو في الخمسة سنوات الفاتت

أحمد محمد بشير ...

Quote: بعدين يا عزام لو الحكاية عَصلجت معاك اَقلِب ليهم غُناء بالرُطانه وخُـومهم كده عشان ما يجيبو خبرك بالشين .

وحاتك أغني ليهُم بِالنوبين عِلا يِملِصو عراريقُم ... بغني بِتلاته لُغات (1) بِالنوبين (2) بِالإنكِليزي لِـKenny Rogers و بِالعربي ...

تاني شنو؟ علشان تشوف حِقد الناس الأنا عايِش معاهُم ... أنا بقيت أظُن إنو الحِكاية فيها " مؤامرة " دُبِرت بِلَيل لِوأد الإبْداعات النوبِية ...

الاخ عزام

Quote: عاوِز أعمِل حفلة أغني ليكُم فيها

واللة اسمك زاتة اسـم فنان عالمى

سيبك منهم رايك شنوا عقد عمل باقامة حفلات بجميع الملايات المتحدة الامريكية
و لمدة عام
و اللة ابوسـاندرا يفتش ليك تغنى فى عرس سـاندرة مايلم فيك
دستور يالامريكان

الملايات المتحدة الامريكية
اسال منها سمعة

معليش دخلت لي صوره متحركه ابت تتحرك ... اعمل شنو ؟

أعرِش على كِده

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه



عندك خيال مساطيل يا عزام

abubakr

كُل عام وأنت بِخير ... القابلا على أمانيك إن شاءالله

Quote: يا قريبي حيرتني عدييل..قول شاعر ..معلم ..عالم..محاسب..مراجع ..محامي .. شيخ دين(عشان ما تتلخبط مع شيوخ تانين) ..مفتي .مولانا ... من "عبري" ؟؟.... انت بتلخبط لينا النظام بتاعنا انا غايتو فنان من عبري غير رفيق الصبا المرحوم عصفور ما بعرف .....؟؟ غايتو بختهم ناس الدوحة حفلة سوارييه والتصقيق ممنوع عشان ما تجلدو ...

شُفت كِمِية المؤامرات التي تُحاك ضِدي يا قريبي ... قاعِد حولهُم ... يا عزام الإنتِخابات ... يا عزام ناس السِفارة ماشين الشحانِية ... يا عزام ما تنسى ندَوة القانونِيين ... يا عزام في كبسيبا في المدرسة السودانِية ... يا عزام تعال إجتِماع الجالية ... عزام تطير عيشتو ... والفنانين البِرِكو في الدَوحة أكتر مِن المُغْترِبين فوقا ... التقول إتِحاد فن الغِناء رحلوهو بِجاي ... ما لاقي لي فُرصة مع العالم دي كلو كلو ... والسنة جت في دَوري ... هِلال الخرطوم ضِد هلال بورتسودان ... مِريخ الخرطوم ضِد مريخ الحصاحيصا -شعب ما عِندو إبداع ، حتى في أُسمو النوادي ما قِدرو يِنْجِرو أُسوم جديد ... يعني وِكتين إكْتشفو إنو كُبري < الحُرِية > بِنزِل على < السجانة > ما كانو يِغَيِرو إسِم واحِد فيهُم ... شعب ما مُبدِع ... يِقول ليك لِلكِبريتا < الزهرة > ولِلريحة هيل الخُمْره < الصاروخ > ... يِسْكُنو في الكلاكلة ويِدْفِنو موتاهُم على الكورنيش في < حله حمد > و< حله خوجلي > ... أنا آلَيت على نفسي أن أخرج هؤلاء القَوم مِن وهْدتِهِم هذِهِ ... حأقدِم " فن " يِتْذوقوهو قُبال ما " يِسْمعوهو " أصلو ماف زول يِقول لي أي حاجة بِخصوص صوتي الفي حلقي ده لأن ما مُمكِن أصدِق إنو بِت إبراهيم تكون " مُنافقة " لأنها بِتسمعني ليها (18) سنة
- الرسول أكان تغني لي " خضاري البِحالي ماهو داري جافاني "
عاوزين تقولو إنو (18) سنة بِت إبراهيم بِتْنافِق فوقي < ما بصدِقكم > ده حسد نِحنا النوبِيين مُتَعَوِدين عليهو مِنكُم ... قريبي < الخليل > لامِن كتب وغنى < مِن فِتيح لِلخور لِلمزالِق ... قدله يا مولاي حافي حالِق > شُعراء أُم دُرمان حقدو عليهو وقالو : < بِالله شوفو الرطاني الأمِس جا ده ... يِسوي أُم دُرمان مِتْل < الكعبة > ونحنا قاعدين فوق < لي في المسالما غزال نافِر بغني عليهو > حقدو عليهو يا قريبي ...

طارِق ميرغني ...

Quote: حزف لانني وجدت انه من غير صالح بت ابراهيم ولا انا اي تعليق او اعتراض علي غناء عزام لانو بعد العيد ناوي اديهو بعض الالحان

بِت إبراهيم أريتو عِندي عُمرين عُمر أديهو ليها والعُمر التاني < فُلانه > تلبسو مداس ... أنا بتْصرف ما مُشكِلة .. بلقى لي حل ... أها النبشِرك كمان يا خوي ... بمدح ... بمدح سيدي الرسول ... مو حسب التوجه العام في سودان عُمر البِسير ... لا لا ... تيلاد قديم وحاتك إتْ ... شوف بِالله عدم الإعتِبار ده ... ودالحاوي في قطر وعزام في قطر = خطر عديل كَدي ... وبِرغم ذلِك ما لاقيتو ... ده بقدر أسموهو شنو غير مؤامرة دُبِرت بِلَيل ... حتى المُستشار حسن طه ما نفعني في إنْتِشاري الغِنائي ... وحالتنا يوماتي على الله بِنغني < زي ما بِتريدني بريدك >

أحمد الدسكو ...

كُل عام وإنت بِخير ... القابلا على أمانيك إن شاءالله

< شول منوت > إتجدع جِنِس تِجِدِع غايتو ... والله قربت " أتعاور " وأنجلِد قِدام الكاهلِية " بِت إبراهيم " لكِن الحمدلله آثرت أحترِم روحي لا سيما إنو بتي كبيرة معنا اليومين ديل في زِيارة مُمكِن تمشي تحدِث أُمها المحسِية :
- شُفتي يا ماما ، بابا بِقى بِنْجلِد في ضهرو عاااادي
- طول عُمرو حُمار
- لا يا ماما ما تقولي على بابا كِده
- خلاص .. تور

عِماد الدين عبدالله

كُل عام وإنت بِخير ... القابلا على أمانيك إن شاءالله

Quote: ولا نشكل ليك ونكتر من اشكال ناس جماعة لندن

والله حقو الواحِد يِكْتِب جواب مُسجل لِعم " لندن " يِقوليهو فيهو ياخ بِتْك مسخت علينا الفِجه يا تلِمها عليك يا تلِمنا نحنا ونخلص ياخ
ــــــــــــــ

Quote: اها بدرالدين الامير نجيبوا معانا

أكان حدثتو إنت زاتك ما تجي ... بدرالدين شنو كمان الحيِستَوعب كلِماتي وألحاني وتَوزيعي ... إنت ما شُفتو قال فوق " نانسي عجاج " شنو قال بشتنت الأُغنِية بشتنه ... المَبشتن إنت يا خوي ... " نانسي عجاج " دي أكان جات وقفت فوق المسرح ساي بِنصفِق ليها ، ياخ دي بِتثبِت إنو في " الزير " الحايِمين بيهو ده " قلب " أكان حدثتو يا زول إنت زاتك ما تجي حفلتي ...

ناجية مصطفى ...

كل عام وأنتم بخير وعافية ... القابلا على أمانيك ... توصلي شُباك النبي ... قولي آمين

Quote: عزام كل سنة وانت طيب سيبك من ناس الدوحة ديل اصلهم مابعرفوا الغنا

صدقتي والله ... الناس ديل ما بعرفو الغُنا ... في رحلة الشحانِية ... عبدالمنعِم يادوب بِصلِح في طبلتو والفنان المايِك ما مسكو ... أشوف ليك أبو ساندرا بِهناك بِهوزِز فوق راسو ، يعني الود إنْدمج ... وفي واحِد أكان بِوراي أسمعو يِكورِك < يا سلالالالالام > قلت ليهو يا سلام في شنو يا زول والغُنا لِسع ما بدا ... قال لي أصلو أنا مُستعجِل شوية ما حأقدر أحضر الغُنا ، فقلت أعبِر عن مَكْنوناتي مُقدمًا ، علشان البِرِسْتيج وكِده ... أُمه مِتِل دي أغني ليها كيف يا ناجية؟
ــــــــــــــــــــــ

Quote: اها انا كيتن على الناس العاملين فيها فنانين انا حاجزاك لى عرس طارق وفى الحنة كمان عشان الناس تسمعك بى مزاج اها قصرت معاك.

شوفو الأصل لامِن يِسوي عوايدو ... العِرِس مُمكن أجيب فوقو بِت إبراهيم ... عِلا الحِنه دي أصلو ما تباريني كلو كلو ... دايِر أتحنن ... معقول الزول ما يِجَلْبِطلو حِنه عِلا في عِرسو ... والله أنا بريدكُم ساي لله ... معقول الواحِد يريد الأبو والأُم وأولادُم وجيرانُم (آل النور عُثمان أبكر) والله لقيتكُم إنتو وجيرانكُم أهل جد جد

أسمعي يا ناجية ... بدرالدين الأمير حتعْزِموهو في عِرِس طارِق ... عِندي إقْتِراح شاوري فوقو سعادتو ... أعمِلو العِرِس مُتزامِن مع أي فعالِية حيِشترِك فوقا مكتب الترجمة هيل بدرالدين ... كده أحسن ... يعني حيِنقُصكُم شنو ... علو سيكارو والنضارة! كدي فكِري في المَوضوع ده

***
**
*

عزام حسن فرح
طبعا انا جاى داخل ساى
كده توش بلا احم ولا دستور
بالرغم من العنوان الموجهه
اول بالتبادى
اسمك جميل
ذى طلعتك
وواضح انو بتاع
حفلات ..
لربما يصير بتاع مغنواتيه فيما بعد
والحمدللة لم يصير محجوزا بعد
فلم نسمع بواحد اسمه عزام بعد..
ولاحتى من نجوم الغد..
هذا من فضل ربى
وإلا صار اسمك مقرونا
بمدينة ما
او بغرزة ما
او بجريرة غيرك
عزام...
عزام
وهو من يقوم بعزومه الناس للمناسبات
الاعراس السمايات وحتى الطهور بشقيه
والعزام هذا بيكون حافظ الاسماء تلاتية ولربما
ان فاكى الخط بيكون عندو دفتر ..
لربما ظهر واحد جديد بيقولوا لية
عزام كمبيوتر ...
واحد عزام جدا كلما يقابل زول بيقول ليه يا فلان
نسيت اقول ليك فلان موصينى اكلمك بكرة ,...... عشاء
ويعزم ويعزم حتى سمى عند الناس عزاما..
وتطور العزائم بعد دخول التكنولوجيا الحديثة..
وعالم الايميلات ..
واقلاهاالمسجات فى الموبايل
فكثرت بها العزومات وتقلصت الكروت
ولربما تصحبها اشارة نحن رسلنا ليكم الكرت
وفى حالة انو اتاخر شويه
ياخى بعد الشر عليك
نرجو ان تقبلوا هذه المسج كدعوة
وطبعا انتو عارفين انو نحن اهل وما بينا
دعوات وكروت والبيت ما بيتكم
كدعوة مبرئه للذمه.
ولكن بالبسبه لحالتى
لو عزمتونا بنجى ..
ونمشى معاكم الخطوه الاولى
نواصل حكاية الاسم.

*
**
***


*
**
***

Quote: أكون بينكُم وما إكْتشفتو إمْكانِياتي ... مواهبي

عزام
ياخوى اكان غالبك خروف الضحية قول بنسوى ليك كشف




تنهدات:عزام جنت

Quote: ياخوى اكان غالبك خروف الضحية قول بنسوى ليك كشف

كل عام وانتم جميعا بالف خير

معقولة يالامير كشف لنوبي وكمان فنان ؟؟ انت اوكسنت دي بس توجه كل طاقاتها لاخراج حفل قريبي دة وتدفعو ليهو كمان ....عجيبة ..

Quote: حفل قريبي

شيخ الرطانة ابوبكر
قريبك جنة والبلد دى مافيها شعب نربطو فيها
دحين يا اخوى السترة والفضيحة متباريات
تعلو لمو زلكم عليكم وبت ابراهم وولداتها
نحنا اخوالهم بنبقى عليهم عشرة

أحمد الدسكو ...

Quote: عندك خيال مساطيل يا عزام

ومنو القاليك " خيال " ... إنت بِتألِف براك كِده مِن راسك لِكراسك ... لا خوي مو " خيال " واقِع واِقِع يا خوي

Quote: واقِع واِقِع يا خوي

تقع فيك الحيطة التكسر راسك المجنون دا



تنهدات: ومن نكد الدنيا على العربى ان يجد
رطانى مجنون مامن صداقته بُد

بدرالدين الأمير ...

Quote: ياخوى اكان غالبك خروف الضحية قول بنسوى ليك كشف

كُنت نِفسي أجاملك ، عِلا نِحنا ما بِتْجوز لينا " الصدقة "
ــــــــــــ

Quote: تنهدات:عزام جنت

شوف يابدرالدين ، حتى لُغتنا النوبِية ما بِتفرِق بين الجِنسين ... الكُل " جن " الذكورة المُطلِعا عينكُم دي الله حمانا مِنها ، فكانت " الكنداكات " و" الملِكات " ولِيوم الليلة الرُجال بِنادوها بِأسماء أُمهاتُم ... خباري داسي أُمي الملِكة " أماني ريناس " البِتِتدس " هاجِر " يا خوي

Quote: omer osman Quote: بس شنبك ده ما شنب غناء حاول اتصرف فيهو ...... أمانةً عليك ... و" النِعام آدم " كان شغال حواتي

نجى نشـوف غنا الرباطاب...


على الأقل نكون شربنا جبنة.




عيد مبارك يا عزام وكل عام انتم بخير.

Quote: قريبك جنة والبلد دى مافيها شعب نربطو فيها

يالامير قريبنا ود فقرا وكان دايريين يعزم ليكم البحر القدام الدوحة دي بيسويها . باقي لي كلكم جنيتو وقريبنا ياهو البفك جنكم ..امسكو فيهو قوي قبل ما تروحو الخانكة( دي قالو في حلب الشهباء .. جنس برد !)

Quote: ليكم البحر القدام الدوحة دي بيسويها

ابوبكر
قريبك ماتمسكو في الكلام الجنس دا هسي يجى يقوليك خليت الغنا
وداير عمل لي قبة على ضاف الخليج المهم ياسيدى نحن كونا لجنة
لدراسة الحالة على ارض الواقع براسة اسماعيل محمد الحسن وعضوية
عماد الشبلى وبدرالدين الامير وحا نجيكم بالخبر اليقين لكن والى
حينه انا كان شفت قريبك عزام وافق قرب مكرفون ببلغ الشرطة

Quote: وداير عمل لي قبة على ضاف الخليج المهم ياسيدى نحن كونا لجنة

ما انتو زارعيين لينا البلد كلها قبب واضرحة يعني بقت في قريبي؟؟ . هسع يقوم يشيل القبة الفوق راسو في صورة البروفايل يختها ليكم في راس شيراتون الدوحة وتلقاكم واقفيين صفوف ولجنتكم تجمع في النذور ...

هلا ياعزام وضيوفه وعيدكم سعيد

وياعزام مالك ياخي عاوز تجننا ..؟؟
نقوم نجي حفلتك دي والخوف نلقاك فنان مدهش وله ابعاد صوتية متوهجة
واها نقوم احنا نسكك من حفلة لحفلة.. ونقعد نسكك ونسك وتاني نسسسسسك ههههههههه

ياخي يعلم الله ببوستك ده كده انا غنيت تييب
وحضرنا الحفلة وهججنا كمان

abubakr


دي قُبه جدي سيدي / شيخ إدريس علي المرضي (أنجب) سيدي / محمد عُثمان (أنجب) حرم سيدي (أنجبت) سيدي / حسن فرح محمد (أنجب) سيدي / عزام
(أنجب) سيدي / رشاد (السَكود المحس - قرية كويكة)

وأغلب القُبب مِن سوبا إلى خزان سِنار مِن ذُرِية سيدي / شيخ إدريس ود الأرباب المحسي الما كضاب

أنا في الحقيقة بحاوِل أكون زول عادي ... يعني ... علشان أقرِب مِن الآخرين المُسْتهدفين بِالنسبة لي أنا ... لأن مِن ضِمن واجِباتي ، على ضوء تاريخ أُسرتي الديني أن أُحبِب الآخرين في الطريق المفروض يِمْشوهو ، ودي بِتكون بِالسُبُل المشروعة ... في الحقيقة ماف زول تعبي زي بدرالدين ده ... شيطانو قوي ... مِن شِده ما هو قوي ، بِقيت أضهب ، ده بدرالدين ولا ده الشيطان في رقبتو ... على كُل حال شغال في الإتنين ... وكُل البرجوهو أنو واحِد فيهُم يِنقل مِن وهدتو ... < بس أنا خايِف > إنو الشيطان يِتهدي ويِغْتِس بدرالدين ...

بركاتك يا قريبي عزام ود الفقرا انت بس اعزم بدرالدين في العيد واسقيهو محاية شربوت وهو وشبطانو بروحو مع دخان السيجار بتاعو