خديجة وقعت من البلكونة .. لبنى ( ملّصت ) الطرحة ..

Post: #1
Title: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 09:56 AM

في الإعلان التلفزيوني البايخ الخاص بأحدى البوهيات ( تشنقلت ) خديجة ( المصرية ) من البلكونة بعد أن كانت تححدق في بوهية زينت حائط بيت الجيران ..
وردولوب دقت خديجة الدلجة فصاح ( أحدهم ) مستغرباً .. أيه دة .. فقال له ( راجلها ) خديجة وئِعت ( وقعت ) مل ( من ) البلكونة و هي بتبوص ـ يا محمد عادل ـ على الجيران ..

ــ
بايخة مش كدة ..

Post: #2
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 09:58 AM
Parent: #1

أكثر بياخة من من مشهد خديجة اللي زعموا أنها وقعت تاني من البلكونة مشهد صحفية (المنطلون ) لبنى أحمد حسين التي وقعت ثم سقطت في نظري كثيراً و أنا أشاهد لها صورة منشورة في جريدة الشرق الأوسط و هي على حل شعرها و قد ملصت الطرحة التي كانت تستر رأسها ..
لبنى ظهرت وهي تسلم على رئيس دار النشر الفرنسية ( بلون ) التي تعتزم نشر كتاب للبنى عن قضيتها التي حوكمت و أدينت بسببها ..

Post: #3
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 10:07 AM
Parent: #2

لبنى و طيلة أيام محاكمتها تعمدت الظهور بالزي ـ غير الفاضح ـ الذي زعمت أنها ترتديه عند القاء القبض عليها من شرطة النظام العام .. و على الرغم من أن الطرحة التي ترتديها كانت في بعض الأحيان تظهر جزءاً من ( قُجتها ) إلا أن لبنى كانت حريصة على الظهور بمظهر المحتشمة غير السافرة ..

Post: #4
Title: Re: خديجة وقعت من البلكونة .. لبنى ( ملّصت ) الطرحة ..
Author: محمد عمر جبريل
Date: 11-22-2009, 10:08 AM
Parent: #2

Quote: هي على حل شعرها و قد ملصت الطرحة التي كانت تستر رأسها ..

على حل شعرها دي ما بالغت فيها شوية ؟؟!!
عارف الكلمة دي معناها شنو ...؟
هل أي بت ما خاتة طرحة في راسها بقت ماشه على حل شعرها

Post: #5
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 10:15 AM
Parent: #4

Quote: على حل شعرها دي ما بالغت فيها شوية ؟؟!!

أنت ماشي بعييييد ليه كدة ..

عارف الكلمة دي معناها شنو ...؟
أكيد عارف معناها شنو .. و عارف أنا قاصد شنو ..
على حل شعرها حسب علمي و ظنوني و نياتي الحسنة بالطبع أنها ( فاكة شعرها ) يعني ( منقوض ) يعني ( ما ممشط ) يعني أفهم البتفهموا ياخي ..
هل أي بت ما خاتة طرحة في راسها بقت ماشه على حل شعرها
على حسب فهمي المجرد أيوة ..

ــ

رووق ..

Post: #6
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 10:26 AM
Parent: #5

لبنى التي زعمت أنها خرجت من الخرتومإلى صنعاء في اليمن متخفية بنقاب أفغاني ( ماركة النينجا ) .. ظهرت سافرة في باريس وهي تقابل رئيس دار النشر التي سوف تقوم بطباعة كتابها المزمع إصداره قريباً ..

لبني و هي ( مكنكشة ) يديها في يد الخواجة ..

Post: #7
Title: Re: خديجة وقعت من البلكونة .. لبنى ( ملّصت ) الطرحة ..
Author: محمد عمر جبريل
Date: 11-22-2009, 10:37 AM
Parent: #6

Quote: أنت ماشي بعييييد ليه كدة ..

أنا ما ماشي بعيد ولا حاجة لكن الجملة دي فيها وعليها
وأظنك عارف كويس ..
بعدين ياخ في ستين ألف كلمة تانية ممكن تعبر بيها عن عدم تغطية رأسها بالطرحة
بخلاف ( ماشة على حل شعرها ) !!
ــــــــ
بوست غير موفق

Post: #8
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 10:38 AM
Parent: #6

و الثابت ـ بحكم المحكمة ـ أن لبنى حينما أُدينت لم تكن إدانتها بسبب إرتدائها بنطلوناً كما روجت .. إنما أدينت بسبب إرتدائها زياً فاضحاً .. لكن يبدو أن لبنى أرادت من تصعيد هذه القضية الوصول لما هي فيه الآن .. في كل مرة تثير الجدل تثبت لبنى أنها زولة شاطرة و تعرف كيف تستغل قضاياها و تسخرها لخدمة مصالحها ..

Post: #9
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 10:52 AM
Parent: #8

Quote: أنا ما ماشي بعيد ولا حاجة لكن الجملة دي فيها وعليها وأظنك عارف كويس ..

يا أخونا قلنا ليك روووق ..
يعني ما تنفعل ساكت و تطلع كضاب كمان و منظرك يكون وحش ..
أنا قلت .. تحديداً
Quote: ثم سقطت في نظري كثيراً و أنا أشاهد لها صورة منشورة في جريدة الشرق الأوسط و هي على حل شعرها و قد ملصت الطرحة التي كانت تستر رأسها

أنت قولتني بقولك .. بخلاف ( ماشة على حل شعرها ) !!

هسع مين اللي قال ماشة على حل شعرها ؟؟
شفت منظرك كيف ؟؟
مش أحسن تروووق ..

وبعدين ..
ياخي لمن لقيت البوست دة غير موفق قاعد مصاقرو مالك .. و كمان بتعمل مداخلات ..
الله ما كتر إلا البوستات الموفقة هنا دة ..
يلا أمشي شوف ليك واحد إنداح فيهو ..
كويس ؟؟

Post: #10
Title: Re: خديجة وقعت من البلكونة .. لبنى ( ملّصت ) الطرحة ..
Author: محمد عمر جبريل
Date: 11-22-2009, 11:04 AM
Parent: #9

يا عصام سلامات ...
إنت داير تتشاكل معاي والسلام ؟؟
هسي المنفعل فينا منو عليك الله ..؟
والله أنا رايق روقة .. يقسّموا منها ..
بس تعال نسألك سؤال ..
وللا أقول ليك السؤال ما ليك إنت .. سؤال مجازي كده
لو جيت قلت فلانة المعانا هنا في المكتب دي (...) على حل شعرها
الناس ها تفهم شنو ..
شفت البين أقواس دي .. ولّف ليها حروف من عندك وختها وأقراها من الزاوية البتشوفها
مريحة ..
أنا الليلة مزاجي عالي جدا وما ها أرد عليك إلا بما يرضي الله ..
وده رأي ..
كان عجبك it's OK وكان ما عجبك برضو OK
ــــ
بوست ما لذيذ

Post: #11
Title: Re: خديجة وقعت من البلكونة .. لبنى ( ملّصت ) الطرحة ..
Author: محمد عمر جبريل
Date: 11-22-2009, 11:07 AM
Parent: #10

الواحد أصلو ما يعرف يعبر عن وجهة نظرو في البلد دي ؟

Post: #14
Title: Re: خديجة وقعت من البلكونة .. لبنى ( ملّصت ) الطرحة ..
Author: زهير الزناتي
Date: 11-22-2009, 11:32 AM
Parent: #11

ود دهب إزيك ...

دائماً بتابع بوستاتك رغم إختلافي البائن مع طرحك نادر ما أتداخل معك لأسباب عديدة أنت أدري بها .. لكن المرة دي غلبني ... عشان موضوعك ده بيهبش مليون زول وزوله كده .. من البداية أعتقد أن تلميحك في هذه الجزئية غير موفق

Quote: و هي على حل شعرها

لأنك أستخدمت مصطلح بالدارجية المصرية يعني أن البت مطلوقة بالعامية السودانية وهو أقسي ما يمكن أن نوصف به بنت في مجتمعاتنا .. وإن غيرت كلمة (ماشة) بـ (هي) وفي إعتقادي أن التمليح واضح .. أما تلميحك الآخر حول :
Quote: لبني و هي ( مكنكشة ) يديها في يد الخواجة

وهو أيضاً تلميح غير موفق .. ولمزيد من الإيضاح لتلميحك وضعت كلمة مكنكش بين قوسين وبالخط الأحمر ... حتي ترسخ ما تريد أن توصله لذهن القارئ ...

اما عن إرتداءها لطرحه من عدمه يبدو أن حديثك لم ينتهي بهذا الخصوص ولديك الكثير لتقوله من أجل أن تصل وجهة نظرك كاملة .. إلا أن مقدمة حديثك تسير في إتجاه إدانة لبني لأنها ملصت الطرحة .. في وجهة نظري المتواضعة بانها لم ترتكب جرماً ... ومن حقها أن ترتدي ما تشاء من ثياب دون أن ننصب أنفسنا اولياء عليها .. فهي إمراءة راشدة ، مثقفة ومتعلمة .. وما تراه أنت غير محتشم يراه الكثيرون غير ذلك ... وهنالك عدد من الأسئلة .. لماذا لبني دون غيرها ... متابعة كل حركاتها وسكناتها ... ولماذا نعارض الإنقاذ طالما أصبحنا نتفق معها في كل كبيرة وصغيرة .. حتي حول رؤيتها لما يجب أن تلبسه النساء ...
البوست غير موفق يا عصام .. وما ترتديه لبني في هذه الصورة ترتدي مثله آلاف النساء في دولة الشريعة وبل أجزم دونه ...

Post: #19
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 12:18 PM
Parent: #14

زهير إزيك و مرحبابك ياخي ..

Quote: من البداية أعتقد أن تلميحك في هذه الجزئية غير موفق
و هي على حل شعرها لأنك أستخدمت مصطلح بالدارجية المصرية يعني أن البت مطلوقة بالعامية السودانية وهو أقسي ما يمكن أن نوصف به بنت في مجتمعاتنا .. وإن غيرت كلمة (ماشة) بـ (هي) وفي إعتقادي أن التمليح واضح ..

أستغربت يا زهير أن تحاول جاهداً أن تقولني ما لم و لن أقله و أنا أعرفك جيداَ ( إنك ما بتتكلم ساي ) .. موضوع البوست كان و لا زال عن لبنى التي كانت في أثناء قضيتها تظهر بمظهر من هي حريصة على الظهور بالزي المحتشم ـ و ليس الإسلامي ـ و أعني تحديداً الطرحة التي تغطي شعر الرأس و عبارة هي على حل شعرها جاءت للحديث عن الصورة التي شاهدت فيها لبنى و شعر رأسها على حله ( يعني منقوض يا زميل و مفرود أو مفرتق ) وهي لا يمكن تجزئتها من سياقها الذي وردت فيه ـ و هو الحديث عن الطرحة و تغطية الرأس و عدم إظهار الشعر ـ و من يفعل ذلك ليقولني ما لم أقصد قوله إلا أن يكون عالم ببواطن النفوس و الأسرار و قادر على أن يسخطني إذا كذبت و لا شيئ يجبرني على أن أكذب ..

Quote: لبني و هي ( مكنكشة ) يديها في يد الخواجة
وهو أيضاً تلميح غير موفق .. ولمزيد من الإيضاح لتلميحك وضعت كلمة مكنكش بين قوسين وبالخط الأحمر ... حتي ترسخ ما تريد أن توصله لذهن القارئ ...

و مكنكشة التي خمنت إسقاطاتها ، لماذا لا تخمن أن المقصود بها ( متشبثة ) بكل تداعياتها.. و لماذا لم تفهم أنني ربما قصدت من إيرادها أن أقول بأنها كالمستجير من الرمضاء بالنار .. هل يبقى لزاماً علي يا زهير أن أوزع ( فهامات ) أو ( جهاز كشف نوايا ) مع كل عبارة أكتبها ؟؟
Quote: اما عن إرتداءها لطرحه من عدمه يبدو أن حديثك لم ينتهي بهذا الخصوص ولديك الكثير لتقوله من أجل أن تصل وجهة نظرك كاملة .. إلا أن مقدمة حديثك تسير في إتجاه إدانة لبني لأنها ملصت الطرحة .. في وجهة نظري المتواضعة بانها لم ترتكب جرماً ... ومن حقها أن ترتدي ما تشاء من ثياب دون أن ننصب أنفسنا اولياء عليها .. فهي إمراءة راشدة ، مثقفة ومتعلمة ..

تعلم جيداً يا زهير أنني لم و لن أنصب نفسي يوما لمثل ذلك ، أنا أتحدث عن تناقضات غير مبررة و عن وسائل تافهة لغايات أرخص و أتفه ..
Quote: وما تراه أنت غير محتشم يراه الكثيرون غير ذلك ... وهنالك عدد من الأسئلة .. لماذا لبني دون غيرها ... متابعة كل حركاتها وسكناتها ...

لا تعنيني لبنى و ملبسها أو سلوكها الشخصي فهناك من تعتبر لبنى متشددة مقارنة بهن و مع ذلك هم لا يعنون لي شيئاً ( مخيرين ) لكن حينما تطرح لبنى نفسها و سلوكياتها كقضية للرأي العام فإن المجتمع حينها هو الوصي و الولي و أنا جزء من هذا المجتمع ..
Quote: ولماذا نعارض الإنقاذ طالما أصبحنا نتفق معها في كل كبيرة وصغيرة .. حتي حول رؤيتها لما يجب أن تلبسه النساء

هذا خلط غير مبرر يا زهير و لا أريد الخوض فيه و معارضة الإنقاذ بأي حال لا تتحقق بالوقوف و الإنسياق وراء كل صاحب مصلحة خاصة يغلفها بسوليفان المعارضة ..

Quote: البوست غير موفق يا عصام .. وما ترتديه لبني في هذه الصورة ترتدي مثله آلاف النساء في دولة الشريعة وبل أجزم دونه ...

هو رأيك الذي أكن له كل إحترام ، و لكن أنا و ربما غيري يرى خلافا لما ترى ، و مع ذلك تبقى بيننا المحبة و الود و أكيد الإحترام ..

Post: #12
Title: Re: خديجة وقعت من البلكونة .. لبنى ( ملّصت ) الطرحة ..
Author: بشير أحمد
Date: 11-22-2009, 11:14 AM
Parent: #10

المستشار ابوالدهب

تحياتي؛؛؛

طيب هي شافت مصلحتها الشخصية بهذا الكتاب

واكيد ما ح يكون ببلاش؛

الناس الكبّت تضامنها هنا في البورد ده خصوصاً المناتلين

حقهم من الهيلمانه دي وينو؟

Post: #13
Title: Re: خديجة وقعت من البلكونة .. لبنى ( ملّصت ) الطرحة ..
Author: Tabaldina
Date: 11-22-2009, 11:31 AM
Parent: #12

..
.
Quote: لبنى ظهرت وهي تسلم على رئيس دار النشر الفرنسية ( بلون ) التي تعتزم نشر
كتاب للبنى عن قضيتها التي حوكمت و أدينت بسببها ..

الطريق الى الشهرة يبدأ بحفل وبنطال ومجموعة اكاذيب..
____

وفى مقولة اخرى
all roads lead to immigration

Post: #16
Title: Re: خديجة وقعت من البلكونة .. لبنى ( ملّصت ) الطرحة ..
Author: Tabaldina
Date: 11-22-2009, 11:46 AM
Parent: #13

..
.
Quote: الناس الكبّت تضامنها هنا في البورد ده خصوصاً المناتلين
حقهم من الهيلمانه دي وينو؟

حقهم مواكب التهليل .. وبس

_________

المشكلة حق حمور _ رغم علمى لعصامية الرجل _
ولكن بسببها ...... !! والله اعلم ..

Post: #18
Title: Re: خديجة وقعت من البلكونة .. لبنى ( ملّصت ) الطرحة ..
Author: مريم بنت الحسين
Date: 11-22-2009, 12:10 PM
Parent: #13

الاخ عصام .. تحية لك ولضيوفك في هذا البوست...
الطرحة في بلدنا معناها الحشمة.. ما معناها الحجاب.. وعدم وجودها ما بعني ان الزي فاضح... صاح؟
غالبية السودانيات ممن يرتدين الطرحة في بلدنا في السودان، يتخلين عنها حينما يسافرن إلى الدول الأوروبية او امريكا او كندا.. صاح؟
في فرق كبير بين الطرحه وبين الحجاب عندنا في السودان... ومسألة إظهار الشعر نفسها لا تدل على سوء الخلق ولا سوء التربية...صاح؟
معظم بناتنا في السودان بكونوا لابسات الطرحة ف السودان، ومعظم الوقت الطرحة قاعده في كتوفهم... هل ديل بصنفوا "على حل شعرهم" ولا "على حل شعرهم أحيانا"؟
لبنى حسي في صورتها دي، لابسه لبس محترم جداً... وبشبه إلى حد كبير لبس وزيرة صحّتنا... هل تستحق هي تتجلد!!؟ ووزيرة الصحة ماشه على "حل شعرها"...؟
ممكن واحده تكون لابسه طرحه، ولبسها "فاضح".. وممكن واحده ما تكون لابسه طرحه، ويكون لبسها محترم.. السؤال الأثارته لبنى بثورتها، هو من ليه الحق يحدد ويعاقب؟

تكسّبها الشخصي... بصراحة انا شايفاها ضربة معلم... واي واحد فيكم لو لقى الفرصة دي واتردد، بكون برفس النعمة.. وهي من قبل ومن بعد، كاتبة.. ولقت دعاية لكتابها قبل ما يتولد...تقول لأ؟

المناضلين الوقفوا معاها اكتر ناس فرحانين ليها... ولبنى وضعت نفسها في خط النار.. واتعرضت لكتير.. من حقها تكسب من وراءه.. احنا وقفنا معاها لأنها على حق... موش لأننا منتظرين جزاء...

وشكرا

Post: #45
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-23-2009, 09:10 AM
Parent: #18

الأخت / مريم
تحية و إحترام
Quote: الطرحة في بلدنا معناها الحشمة.. ما معناها الحجاب.. وعدم وجودها ما بعني ان الزي فاضح... صاح؟ غالبية السودانيات ممن يرتدين الطرحة في بلدنا في السودان، يتخلين عنها حينما يسافرن إلى الدول الأوروبية او امريكا او كندا.. صاح؟

صاحين يا مريم و أنا لم أقل ما يخالف هذا الكلام لم أقل أن عدم وجود الطرحة يعني أن الزي فاضح .. مسألة الزي الفاضح بالنسبة للصحفية لبنى حسمتها المحكمة بإدانة صريحة و واضحة و لو أنك أطلعتي على حكم المحكمة لعرفتي ماذا كانت ترتدي / لبنى و حينها يمكنك تحديد ما إذا كان فاضحاً أم لا.
أما بشأن تخلي العديد من السودانيات من الطرحة أو التوب أو ملابسهن المحتشمة حينما يسافرن إلى خارج السودان فتعليقي عليه أن المحتشمة تبقى محتشمة حتى أن صعدت للقمر طالما هي تريد الإحتشام ، و الإحتشام بالنسبة للمرأة السودانية بشكل عام و المسلمة بوجه خاصة هو الغالب بل حتى بالنسبة للسودانيات غير المسلمات فهن محتشمات و ربما بينهن من هي أكثر إحتشاماً من المسلمات ..
Quote: في فرق كبير بين الطرحه وبين الحجاب عندنا في السودان... ومسألة إظهار الشعر نفسها لا تدل على سوء الخلق ولا سوء التربية...صاح؟

لم أقل أن عدم إرتداء الطرحة في حد ذاته يدل على سوء الخلق و التربية ؟؟ لكن بالنسبة لي حينما أرى أمرأة سودانية مسلمة بالغة و عاقلة و راشدة في مكان عام من غير طرحة أو توب أو ليس على رأسها ما يغطي شعرها فهي عندي مجاهرة بالمعصية و بالبلدي ( ما بتخاف الله ) .
Quote: معظم بناتنا في السودان بكونوا لابسات الطرحة ف السودان، ومعظم الوقت الطرحة قاعده في كتوفهم... هل ديل بصنفوا "على حل شعرهم" ولا "على حل شعرهم أحيانا"؟

حسبما قصدت أنا من عبارة ( على حل شعرها ) فهن كذلك .
Quote: لبنى حسي في صورتها دي، لابسه لبس محترم جداً... وبشبه إلى حد كبير لبس وزيرة صحّتنا... هل تستحق هي تتجلد!!؟ ووزيرة الصحة ماشه على "حل شعرها"...؟

أولاً هذا قياس مع الفارق فلبنى مسلمة و تابيتا مسيحية و مع ذلك حتى بالنسبة لتابيتا و هي إبنة قس تعلم أن تغطية الشعر ليس من تعاليم الإسلام فحسب .
Quote: ممكن واحده تكون لابسه طرحه، ولبسها "فاضح".. وممكن واحده ما تكون لابسه طرحه، ويكون لبسها محترم.. السؤال الأثارته لبنى بثورتها، هو من ليه الحق يحدد ويعاقب؟

لبنى تمت معاقبتها بموجب نص واضح صريح في القانون بعد ثبوت إرتدائها لزي فاضح لحظة القبض عليها .
Quote: تكسّبها الشخصي... بصراحة انا شايفاها ضربة معلم... واي واحد فيكم لو لقى الفرصة دي واتردد، بكون برفس النعمة.. وهي من قبل ومن بعد، كاتبة.. ولقت دعاية لكتابها قبل ما يتولد...تقول لأ؟

و انا أراه بئس التكسب عبر هذه الوسائل غير الشريفة ..
Quote: المناضلين الوقفوا معاها اكتر ناس فرحانين ليها... ولبنى وضعت نفسها في خط النار.. واتعرضت لكتير.. من حقها تكسب من وراءه.. احنا وقفنا معاها لأنها على حق... موش لأننا منتظرين جزاء...

و بكل أسف فإن كثير من هؤلاء المناضلين أستغلوا هذه القضية الخاسرة لإحراج الحكومة فأحرجوا أنفسهم ، في رأيي أن لبنى لم تكن على حق و هي تتزيأ بزي فاضح ، لبنى أدينت و نفذت بشأنها العقوبة و المادة ( 152 ) لا زالت موجودة ..
وشكرا ..

Post: #28
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 01:11 PM
Parent: #13

أووو .. ولدنا ..

Quote: الطريق الى الشهرة يبدأ بحفل وبنطال ومجموعة اكاذيب..

ما كل الناس بتلبس بناطلين أيش معنى ؟؟
هناك فرق يا صاح ..

____

Quote: وفى مقولة اخرى
all roads lead to immigration

أريتها ما immigration الوليدات ..

الكفيل عرفناهو .. اللوتري دة مالو عيبو لي بس ..

Post: #22
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 12:41 PM
Parent: #12

أهلين دكتور بشير ..

Quote: طيب هي شافت مصلحتها الشخصية بهذا الكتاب
واكيد ما ح يكون ببلاش؛

يا ريت لو الحكاية بفت على الكتاب و بس ..

Quote: الناس الكبّت تضامنها هنا في البورد ده خصوصاً المناتلين
حقهم من الهيلمانه دي وينو؟

الخوف يقوموا ينطوا لينا ـ زي الجماعة ـ هي لله .. هي لله .. غايتو وكت يبقى النضال في زي فاضح الواحد مفروض يتوقع أي حاجة ..

ـ
تحياتي يا مختفي ..

Post: #15
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 11:41 AM
Parent: #10

أهلين يا محمد عمر ..

Quote: إنت داير تتشاكل معاي والسلام ؟؟

أشاكلك في شنو يا ود الناس !!
Quote: هسي المنفعل فينا منو عليك الله ..؟

أكيد أنت المنفعل لأنو أنا هسع قايلك سمعت الكلام و مشيت ،.
أهة اقوم أقول أجي أواصل في موضوع ( بوستيني ) العاجبني دة ، ألقاك جيت ناطي لي بي مداخلتين ..
جهجهت لي الموضوع ذاتوو ..
Quote: والله أنا رايق روقة .. يقسّموا منها ..

دة كلو في حالة كونك رايق !! طيب لو كنت ما رايق كان أديتني جوز و اللا شنو ؟؟
Quote: بس تعال نسألك سؤال ..
وللا أقول ليك السؤال ما ليك إنت .. سؤال مجازي كده
لو جيت قلت فلانة المعانا هنا في المكتب دي (...) على حل شعرها
الناس ها تفهم شنو ..

ياخي نقط نقط نقط دي الفي بالك انتا أنا كلامي كان في سياق معين قلت ( شاهدت صورتها على حل شعرها ) و لم أقل ( ماشة أو نقط نقط على حل شعرها ) ما تعمل لي فيها بين أقواس و بين اليقظة و الأحلام ..
Quote: بوست ما لذيذ

يا لذيذ يا رايق أنتا ..
ـــ
انتا في جدة يا محمد ؟؟
عشان الواحد يعمل حسابو وكدة ..

Post: #20
Title: Re: خديجة وقعت من البلكونة .. لبنى ( ملّصت ) الطرحة ..
Author: محمد عمر جبريل
Date: 11-22-2009, 12:20 PM
Parent: #15

عصام ..
شفت اللهجة الخطابية بتختلف كيف أثناء الإنفعال ..
قبيل شابكني أمشي إنداح بعيد وشوف ليك بوست تاني ..
إيييييييييييه .. ما علينا .. عموما يشهد الله أنا ما قاصد أحرف ليك البوست
بالعكس أنا شايف مداخلتي دي في موضوع البوست ذااااتو ..
يا عصام يا عزيزي دي أول مرة أتداخل معاك فيها فما في حاجة يتخليني أستعداك (من العداوة)
وبإختلاف فهمنا لي قضية لبني بس أسمح لي (وأنا زول أصغر منك) أقول ليك إنو التعبير ده
ما كان محل ترحيب بالنسبة لي .. وإحتمال بالنسبة لي ناس تانين برضو
يعني شنو شفتها على حل شعرها ؟؟ هل ده التعبير المستخدم للبت الما مغطية راسها !!
وأزيد ليك حاجة تانية .. كلامك من البداية كان مليان إيحاءات على شاكلة على حل شعرها أو (ملصت الطرحة)
من متين الطرحة (بملصوها) ؟؟!! وحتى الكلمة ذاتها خاتيها بين أقواس عشان توصل حاجة معينة في راسك
فرجاءا لا تفترض فينا الغباء ..
وإنت زول قانوني لا أشك تماما في ضلاعتك
أتمنى تكون وجهة نظري وصلتك ..

Post: #17
Title: Re: خديجة وقعت من البلكونة .. لبنى ( ملّصت ) الطرحة ..
Author: mayada kamal
Date: 11-22-2009, 12:04 PM
Parent: #6

وهي مالها ماسكة فيه قوي كدا
الراجل داير يقلع يده قلع
شوف مستوى مد يد الرجل ولبنى
والفرق كيف

هو وينو الشعر اليفكوه
حالته دخل عشرة عمليات كوفير وكدا

Post: #21
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 12:23 PM
Parent: #17

Quote: هو وينو الشعر اليفكوه
حالته دخل عشرة عمليات كوفير وكدا

مع أكيد إحترامي لك يا ميادة فأنا لا أعني و لا أقصد و لا ألمح لأي مما كتبتيه أعلاه حتى و إن كان على سبيل المزح ..

Post: #23
Title: Re: خديجة وقعت من البلكونة .. لبنى ( ملّصت ) الطرحة ..
Author: Tabaldina
Date: 11-22-2009, 12:45 PM
Parent: #21

..
.
Quote: وأزيد ليك حاجة تانية .. كلامك من البداية كان مليان إيحاءات على شاكلة على حل شعرها
أو (ملصت الطرحة)من متين الطرحة (بملصوها) ؟؟!!
وحتى الكلمة ذاتها خاتيها بين أقواس عشان توصل حاجة معينة في راسك

شنو يا جماعة خليتو الموضوع وحرفتو لينا مسار القضية
من (مبداء ) لبنى فى القضية التى اقامت الاعلام الداخلى
والخارجى ولم تقعده الا بكفاله 500 جنية فقط
اجيب ليكم النجيضة يا عمر وزناتى والمعقبون القادمون...
بالعربي الفصيح وبالدين وبالعادات السودانية والتقاليد الموروثة
وكلام المجتمع السودانى وامهاتنا وما تبقى من موروثات حبوباتنا :
(زولة مالصه الطرحه ) او خرجت من دونها عن قصد ..
يعنى زوله فى نظر المجتمع العايشين فيهو دا فاكه او مطلوقه ساااى ..
او كما وصفها زهير الزناتى
شنو ؟؟ بتلفوا وبتدورا فى الموضوع
لو عصام ما قالها ياهو بقولها ليكم ..
وبالمناسبة دى ما فهمى انا شخصياً دى فهم عشرات الشباب الحايمين العاملين
فيها متعلمين وحضاريين ومتحررين ..
ما تسمعوا النقه والحركات دي .. ممكن يقول ليها والله شعرك رهيب ( للزوله المن غير طرحه)
ويكون برمى للغزل دا لرغبة عميقة .. وهكذا ..

الشرح وقع ولا اجى اعيدو ..

_______

واحد تقليدى مضطر يتماشى
مع العولمه والموضة وثقافة الغرب ..
مجبور والله

Post: #25
Title: Re: خديجة وقعت من البلكونة .. لبنى ( ملّصت ) الطرحة ..
Author: mayada kamal
Date: 11-22-2009, 12:54 PM
Parent: #23

Quote: شنو يا جماعة خليتو الموضوع وحرفتو لينا مسار القضية
من (مبداء ) لبنى فى القضية التى اقامت الاعلام الداخلى
والخارجى ولم تقعده الا بكفاله 500 جنية فقط
اجيب ليكم النجيضة يا عمر وزناتى والمعقبون القادمون...
بالعربي الفصيح وبالدين وبالعادات السودانية والتقاليد الموروثة
وكلام المجتمع السودانى وامهاتنا وما تبقى من موروثات حبوباتنا :
(زولة مالصه الطرحه ) او خرجت من دونها عن قصد ..
يعنى زوله فى نظر المجتمع العايشين فيهو دا فاكه او مطلوقه ساااى ..
او كما وصفها زهير الزناتى
شنو ؟؟ بتلفوا وبتدورا فى الموضوع
لو عصام ما قالها ياهو بقولها ليكم ..
وبالمناسبة دى ما فهمى انا شخصياً دى فهم عشرات الشباب الحايمين العاملين
فيها متعلمين وحضاريين ومتحررين ..
ما تسمعوا النقه والحركات دي .. ممكن يقول ليها والله شعرك رهيب ( للزوله المن غير طرحه)
ويكون برمى للغزل دا لرغبة عميقة .. وهكذا ..

الشرح وقع ولا اجى اعيدو ..

Post: #24
Title: Re: خديجة وقعت من البلكونة .. لبنى ( ملّصت ) الطرحة ..
Author: هويدا شرف الدين
Date: 11-22-2009, 12:46 PM
Parent: #21

الأستاذ/ عصام دهب

بوست موفق جدا

مياده كيفك لكني بالغتي

Post: #31
Title: Re: خديجة وقعت من البلكونة .. لبنى ( ملّصت ) الطرحة ..
Author: mayada kamal
Date: 11-22-2009, 01:19 PM
Parent: #24

Quote: مياده كيفك لكني بالغتي

اهليييييييييييين يا هويدا
والله بالغ الزمن اللي فيه المناضل مناضل حتى لو ................
لاشعار آخر

Post: #46
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-23-2009, 12:18 PM
Parent: #24

الأخت / هويدا
تحية و إحترام
Quote: بوست موفق جدا

وفقك الله دنيا و آخرة .. و ممتن لدعمك ..

Post: #26
Title: Re: خديجة وقعت من البلكونة .. لبنى ( ملّصت ) الطرحة ..
Author: الأمين لعوتة
Date: 11-22-2009, 12:55 PM
Parent: #21

Quote: مع أكيد إحترامي لك يا ميادة فأنا لا أعني و لا أقصد و لا ألمح لأي مما كتبتيه أعلاه حتى و إن كان على سبيل المزح ..

اهو ده الاستاذ عصام دهب القانوني الذي لا يغمض الناس اشياءهم

Quote: مشهد صحفية (المنطلون ) لبنى أحمد حسين

Quote: هي على حل شعرها و قد ملصت الطرحة التي كانت تستر رأسها ..

Quote: لبني و هي ( مكنكشة ) يديها في يد الخواجة ..

Quote: .. إنما أدينت بسبب إرتدائها زياً فاضحاً

ارجو ان نرتفع بمستوي خلافاتنا و ان لا تكون مدخل للإيحاءات او ااغتيال الشخصية

تحياتي لك و اكيد احترامي لضيوفك

Post: #27
Title: Re: خديجة وقعت من البلكونة .. لبنى ( ملّصت ) الطرحة ..
Author: mayada kamal
Date: 11-22-2009, 12:59 PM
Parent: #21

Quote: مع أكيد إحترامي لك يا ميادة فأنا لا أعني و لا أقصد و لا ألمح لأي مما كتبتيه أعلاه حتى و إن كان على سبيل المزح

ومن قال انك تعني او تقصد او تلمح
يا استاذ عصام دهب
المداخلة في اي بوست على مسئولية صاحبه
يعني صاحب المداخلة
ولا شنو

Post: #29
Title: Re: خديجة وقعت من البلكونة .. لبنى ( ملّصت ) الطرحة ..
Author: Tabaldina
Date: 11-22-2009, 01:14 PM
Parent: #27

..
.
Quote: موضوع البوست كان و لا زال عن لبنى التي كانت في أثناء قضيتها تظهر بمظهر
من هي حريصة على الظهور بالزي المحتشم ـ و ليس الإسلامي ـ و أعني تحديداً الطرحة التي تغطي شعر الرأس

تحت مظله حقوق الانسان ..
ووقوانين التحرر .. وحقوق المراة

__________

شكرا عصام دهب مجددا وان كان متأخرا ..
بعدين ختها ليهم عديل لو غلبك
وما مضطر تجامل .. ادينا خبر ..

Post: #30
Title: Re: خديجة وقعت من البلكونة .. لبنى ( ملّصت ) الطرحة ..
Author: Mohamed Doudi
Date: 11-22-2009, 01:14 PM
Parent: #27

معليش ياعصام بوست ما موفق جدا
عيب عليك

Post: #32
Title: Re: خديجة وقعت من البلكونة .. لبنى ( ملّصت ) الطرحة ..
Author: Reader7
Date: 11-22-2009, 01:19 PM
Parent: #21

الاخ عصام دهب

الكتابة امانه..والامانة تكليف ..والتكليف عهد..والعهد ميثاق . حتي كلمة "ميثاق" نشترك كلنا كاعضاء في هذا البورد بان لنا حق الكتابة وعلينا امانة ما نكتب.

وبعد كلمة "ميثاق" يبدا علم القانون والعدل واحسبك درسته واقسمت ضمنا او شفاهة او كتابة بان تلتزم بعهد المهنة وقيمها وادابها وقواعدها واصولها وما اغلظه عهد , وهذا يضاعف مسئوليتك كعضو تكتب :وقانوني" التزم بصون العهد الذي بموجبه منح التقدير والتاهيل ومزاولة المهنة.

بما كتبته في هذا البوست خالفت لوائح البورد
وخالفت ما يجب ان يكون عليه "القانوني" عندما يكتب

سؤالك كيف ؟

اجابتي هي :

تلميحاتك التي يعج بها البوست سطحية وفارغة ولا تحتاج الي الالوان الحمراء التي اصبغت بها الحروف ولا تحتاج الي الاقواس التي احطت بعض الكلمات.

الاخ عصام

مشاركتي هذه لا تعني من قريب او بعيد موضوع الصحفية التي تكتب عنها او قضيتها ولكن ما دفعني للكتابة هو التردي في لغة الكتابة والامعان في الزج بتلميحات وعبارات غاية في الركاكة والبعد عن ادب الكتابة والكلمة.

وان تحكي نساء عن كوافير وغطاء الراس وتسريحات الشعر في فذلك مقبول ولكن ان يكتب عن ذلك من كان الحري به ان يكتب عن "علم القانون وفقهه" ويدبج ما يكتب بتلميحات فارغة وسطيحة موجهة بشكل مباشر او غير مباشر الي سيدة او انسة ما فان ذلك لا يقتصر علي من قصد بل بذلك يوذي الكثير من القارئات لما كتب ولكثير من الاسر التي تتصفح ما يكتب هنا علي مستوي الاسرة اباء وابناء.

هذا راي

ولك التحية

Post: #33
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 01:34 PM
Parent: #32

للتذكير ..

الصحفية / لبنى ، أدينت لإرتدائها زياَ فاضحاً و ليس بنطلون فحسب ..

[
Quote: red]وفي هذه الحالة الماثلة فإن المعيار الذي نأخذ به هو معيار الإسلام الذي تعتنقه المتهمة وأكثرية المجتمع السوداني وهو أن الزي الذي يظهر مفاتن المرأة في جسدها ماعدا الوجه والكفين يعدُّ زياً فاضحاً في معنى المادة 152 من القانون الجنائي لسنة 1991م لقوله عز وجل في سورة النور الآية (31) (( وقل للمؤمنات يغضضن من أبصارهن ويحفظن فروجهن ولا يبدين زينتهن إلا ما ظهر منها وليضربن بخمرهن على جيوبهن ...)).

كما أن جميع الأديان السماوية وقد دعت المرأة إلى العفة والحشمة ونهتها عن التبرج وإظهار المفاتن .

وعلى هذي هذه المبادئ فإن البينات الثابتة قد أوضحت بجلاء أن المتهمة كانت ترتدي زياً فاضحاً ومخلاً بالآداب العامة فقد ذكر الشاكي في أقواله بصفحة (2) من المحضر .

" المتهمة كانت ترتدي بنطلون ضيق وبلوزة ضيقة وأكمامها قصيرة وشفافة وبها فتحتين من الجنبات مع كمر البنطلون وكان رأسها كاشف لأنها ما كانت لابسة طرحة ".

كما جاءت بينة شاهد الاتهام الأول بصفحة (6) من المحضر تقول :ــ

" المتهمة كانت ترتدي بنطلون وبلوزة وأن البنطلون مُخزَّق وضيق وهو يظهر من تحته الفخذين وهيكل شكل الملابس الداخلية فلون النكس رؤيته واضحة وهو لون بيجي وان البلوزة أكمامها قصيرة تصل حتى الكوع وأنها شفافة وخفيفة تعكس كل شئ داخلها كسيور وشكل الستيانة وأن بداية الصدر ظاهرة لأن البلوزة فاتحة كما لها فتحتين من الأطراف بالطول من فوق إلى أسفل ، كما يوجد فارق بين التقاء البلوزة بحيث تظهر فتحة تمكن الرؤية للسُّرَّة والنكس الداخلى للمتهمة "

وذات التفاصيل حكاها شاهد الاتهام الثاني في أقواله بصفحة (12) من المحضر:-

" المتهمة كانت لابسة بلوزة لونها أخضر وكانت قصيرة وشفافة تظهر سُرَّتها كما تظهر الستيانة وأن كُم البلوزة قصير يصل لغاية ما قبل الكوع ببسيط وكان بنطلونها ضيق والنكس الداخلي ظاهر وكانت كاشفة شعرها".

وبناء علي هذه البينات نقرر أن المتهمة كانت تتزيَّا بزي فاضح يظهر من خلاله كل أجزاء الجسم من مفاتن المرأة كما يظهر الملابس الداخلية وكاشفة شعر رأسها وهي تجلس داخل ملهى ليلي يعج بالرقص والغناء المختلط بين النساء والرجال وأن هذا المقهي يعتبر مكانا عاماً حسبما جاء تعريفه في تعليق الدكتور/ محمد محي الدين عوض علي هذه المادة بأن المكان العام هو الذي يغشاه الناس دون تمييز ومن هذا القبيل الطرق العامة والميادين العامة والمحال العامة ومحال الملاهي

Post: #34
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 01:40 PM
Parent: #33

أمسكوا هنا ..

Quote: وكان رأسها كاشف لأنها ما كانت لابسة طرحة ".

وهنا ..

Quote: وكانت كاشفة شعرها".

ـ

و لبنى الآن ملصت الطرحة التي كانت تزعم أنها كانت ترتديها لحظة القبض عليها ..

Post: #35
Title: Re: خديجة وقعت من البلكونة .. لبنى ( ملّصت ) الطرحة ..
Author: الأمين لعوتة
Date: 11-22-2009, 01:54 PM
Parent: #33

Quote: الصحفية / لبنى ، أدينت لإرتدائها زياَ فاضحاً و ليس بنطلون فحسب ..

حقيقي انا آسف يا استاذ عصام

لانو ب دي انت و الانقاذ راكبين سرج واحد

Post: #36
Title: Re: خديجة وقعت من البلكونة .. لبنى ( ملّصت ) الطرحة ..
Author: محمد عمر جبريل
Date: 11-22-2009, 02:10 PM
Parent: #33

Quote: اجيب ليكم النجيضة يا عمر وزناتى والمعقبون القادمون...
بالعربي الفصيح وبالدين وبالعادات السودانية والتقاليد الموروثة
وكلام المجتمع السودانى وامهاتنا وما تبقى من موروثات حبوباتنا :
(زولة مالصه الطرحه ) او خرجت من دونها عن قصد ..
يعنى زوله فى نظر المجتمع العايشين فيهو دا فاكه او مطلوقه ساااى ..
او كما وصفها زهير الزناتى
شنو ؟؟ بتلفوا وبتدورا فى الموضوع
لو عصام ما قالها ياهو بقولها ليكم ..

أول مرة أعرف إنو المجتمع ده مسكين للدرجة دي ..
أي زول داير يجي يتكلم لينا باسم المجتمع .. وفي نظر المجتمع
فاكة ومطلوقة دي كلمات بتّقل ليك الميزان بعدين يا تبلدي ..
بعدين تعال إنت شغال في مركز دراسات المجتمع وللا أي حاجة عندها علاقة بيهو؟؟!!
يعني عرفت الكلام ده من وين مثلا ؟؟ برااااك كده حكيت راسك ووصلت للمعلومة دي وللا الكلام ده مبني على دراسة
بعدين المجتمع ده حق منو .. بالأول كده عشان نعرف نحدد .. المجتمع ده إنت لا تعدو أن تكون مجرد فرد فيهو فقط لا غير
فرجاءا عشان نصل لي نتيجة في كلامنا ده .. ما تتكلم لي بي باسم المجتمع .. إتكلم وفق مفاهيمك إنت .. وحسب رؤيتك الحبوباتية دي
المجتمع ده فيهو المسلم والمسيحي والوثني واللاديني وأنصار السنة والشيوعي وكل الناس ديل .. يللا إنت أفرز لي كومك ..
ياتو كوم منهم.. ؟ عشان تتكلم باسم المجتمع قاطبة ؟؟!!
ومسؤول من الخير وكت إنت شايف الناس دي الما مغطية راسها بي طرح دي مجرد مطاليق وناس فاكين ساي
الجابرك شنو تشتغل في شركة جزء كبير منهم حايمين من غير طرح ؟؟!! ؟؟
إستقيل طيب .. أخد موقف عشان نعرفك صاحب مبدأ ..
أنا شخصيا لو حسيت البنات المعاي في الشركة بنات فاكات أو مطاليق والله بخليها

Post: #37
Title: Re: خديجة وقعت من البلكونة .. لبنى ( ملّصت ) الطرحة ..
Author: Tabaldina
Date: 11-22-2009, 02:21 PM
Parent: #36

..
.
Quote: يعني عرفت الكلام ده من وين مثلا ؟؟ برااااك كده حكيت راسك ووصلت للمعلومة دي وللا الكلام ده مبني على دراسة
بعدين المجتمع ده حق منو .. بالأول كده عشان نعرف نحدد .. المجتمع ده إنت لا تعدو أن تكون مجرد فرد فيهو فقط لا غير
فرجاءا عشان نصل لي نتيجة في كلامنا ده .. ما تتكلم لي بي باسم المجتمع ..

واول مره اعلم ان عدد الشباب _الغير واقعى _ فى ازياد
بالمناسبة هناك لكلمة تسمى فى الاسلام ( منافق ) .. لا اقصدك بها
ولكن احاول لان اوصل المعنى ..

Quote: الجابرك شنو تشتغل في شركة جزء كبير منهم حايمين من غير طرح
إستقيل طيب .. أخد موقف عشان نعرفك صاحب مبدأ ..؟؟!!

بالمناسبة العادة دى ما عندنا.. _ فى شركتنا _ كلهم بطرح ومحجبات وايضا واعيات ومتحضرات
تانى شئ _ لو فرضنا موجودة _ انا قلت مجبور
مش على الشركة براها برضو على المجتمع الدايرين تعملوهو لى حضارى
ومتحرر وشئ عاادى ..وبعاداتكم الدخيله وتقليدكم الاعمى واستلابكم ..
ياخى انتو _ شباب _ و عالم من الدجل بصورة ما طبيعية
Quote: أنا شخصيا لو حسيت البنات المعاي في الشركة بنات فاكات أو مطاليق والله بخليها

والله العظيم كداااااب
والله من حدرتك دى انت لو اختك مرقت من غير طرحه
تهرشها .. سودانى ولا زول تانى

_________

بالمناسبة جاييك تانى
والله مستعجل ..

Post: #38
Title: Re: خديجة وقعت من البلكونة .. لبنى ( ملّصت ) الطرحة ..
Author: شول اشوانق دينق
Date: 11-22-2009, 02:22 PM
Parent: #36

Quote: بالعربي الفصيح وبالدين وبالعادات السودانية والتقاليد الموروثة
وكلام المجتمع السودانى وامهاتنا وما تبقى من موروثات حبوباتنا :
(زولة مالصه الطرحه ) او خرجت من دونها عن قصد ..يعنى زوله فى نظر المجتمع العايشين فيهو دا فاكه او مطلوقه ساااى ..

يا تبلدى تتفق معاى إنو الكلام الـ Bold ده لا يقبل التعميم على المجتمع السودانى ككل؟

سلامات للكل

Post: #39
Title: Re: خديجة وقعت من البلكونة .. لبنى ( ملّصت ) الطرحة ..
Author: Tabaldina
Date: 11-22-2009, 02:26 PM
Parent: #38

..
.
Quote: يا تبلدى تتفق معاى إنو الكلام الـ Bold ده لا يقبل التعميم على المجتمع السودانى ككل؟

سلام يا صديقى
اتفق معاك تماما
ولا على الديانات الحشرها لى البرلوم دا

_________

خلونا ياخى نشوف مصالحنا وبنجيكم

Post: #40
Title: Re: خديجة وقعت من البلكونة .. لبنى ( ملّصت ) الطرحة ..
Author: شول اشوانق دينق
Date: 11-22-2009, 02:36 PM
Parent: #39

Quote: اتفق معاك تماما

يا تبلدينا يا صاحب الله يديك العافية.

-------------
شوف مصالحك على رواقة يا مان البورد ملحوق

Post: #41
Title: Re: خديجة وقعت من البلكونة .. لبنى ( ملّصت ) الطرحة ..
Author: محمد عمر جبريل
Date: 11-22-2009, 02:53 PM
Parent: #38

تبلدينا إزيك ..
شايفك بديت تاخد نفس النهج الخطابي بتاع أخونا عصام ..
كم مرة بقول ليكم الزول ما يكتب تحت تأثير الإنفعال عشان ما يجي بعدين ويلوم نفسو
وأنا والله ما كان قصدي وأنا كنت قايل ... والكلمات المكررة المستخدمة للحس الكلام ..
Quote: واول مره اعلم ان عدد الشباب _الغير واقعى _ فى ازياد
بالمناسبة هناك لكلمة تسمى فى الاسلام ( منافق ) .. لا اقصدك بها
ولكن احاول لان اوصل المعنى ..

إنتو الكلام ده بتلقوهو وين ..
غايتو السناير ديل عليهم حركااااات .. بويزون بس !!
هسي العلاقة شنو بين الواقعية والنفاق ؟؟!! تعرف أنا لو قعدت هنا في المنبر ده
عشرين سنة لي قدام ما ها أقدر أعمل الكونكشن العملتو ده .. (الواقعية والنفاق)!!
عدم واقعية في شنو يا تبلدينا ؟؟ طب صلي عالنبي كده ..
يا شيخنا .. يا شيخنا أنا كلامي واضح .. إذا إنت/و رابطين صلاح وفساد الأخلاق
بي خرقة توضع على الراس .. فالبجد هنا فول استوب ونخلي النقاش لأنو واضح تماما
إنو ده كلام ناس طرشانه ساكت ..

Quote: بالمناسبة العادة دى ما عندنا.. _ فى شركتنا _ كلهم بطرح ومحجبات وايضا واعيات ومتحضرات
تانى شئ _ لو فرضنا موجودة _ انا قلت مجبور
مش على الشركة براها برضو على المجتمع الدايرين تعملوهو لى حضارى
ومتحرر وشئ عاادى ..وبعاداتكم الدخيله وتقليدكم الاعمى واستلابكم ..
ياخى انتو _ شباب _ و عالم من الدجل بصورة ما طبيعية

يا راجل ...؟؟!!
هسي ما عندكم وللا نفرض ؟؟!
يا زول والله عندكم ونص وتلاتة أكتر من زولة وأكثر من بت واحدة ماشة من غير طرحة ..
لكن الشهادة لله من أفضل البنات اللاقيتهم أو احتكيت بيهم
باسم الله يا راجل .. قال ما عندنا قال ..
وتاني جيتني للثنائيات العجيبة بتاعتك دي ... (الشباب والدجل)
إنت يا صلاح عندك مشلكة بتاعت إكسبريشن وللا حاجة ؟؟

Quote: والله العظيم كداااااب
والله من حدرتك دى انت لو اختك مرقت من غير طرحه
تهرشها .. سودانى ولا زول تانى

تطلق أم مازن في ثلاثة ..
خليت آخر شركة قبل الشركة الشغال فيها حاليا لأنو كان فيها كلام فارغ كتير
وكلام كتير وهنا ما مكانو .. لكن ليك أن تعرف إني خليت الشركة ومشيت قعدت في البيت
بكامل إرادتي ..

Quote: سلام يا صديقى
اتفق معاك تماما
ولا على الديانات الحشرها لى البرلوم دا

ما مشكلة يا حبيب أمشي وتعال تلقانا نحن يا نحن
أصلو إنتو كان ما لقيتو ليكم زول تتسنيرو عليهو ما بترتاحو

Post: #42
Title: Re: خديجة وقعت من البلكونة .. لبنى ( ملّصت ) الطرحة ..
Author: Omayma Alfargony
Date: 11-22-2009, 06:06 PM
Parent: #41

تحية طيبة لاستاذ عصام دهب صاحب البوست.

الاخ تبلدينا...

سلام وتحية...

سؤال...

هل نظرة المجتمع التقليدي الاسلامي والذي هو جزء من نسيج المجتمع السوداني ورأيه في أن اي بت بتطلع ما لابسه طرحه معناها بت ما عندها اخلاق وفاكة ساي(لانه فكت غطاء شعرها) من وجهة نظرك الشخصية صحيح وتؤيده؟.

هل بنفس المنطق ترى أن اي بت تلبس الطرحة أو تغطي شعرها هي بت (لابد) وحتما وبلا جدال مافاكه(لانها ما فكت غطاء شعرها) وذات أخلاق؟!.

بس.

ياريت أسمع اجابتك.

ولو ممكن تكون بعيدا من الدين لانه لو دخلنا الدين وليس التقاليد سواء كانت صحيحة أو لا يبقي كل المسيحيات واللا دينيات بنات فاكة(من غير طرحة) ومستلزماتها.

وشكرا.

Post: #43
Title: Re: خديجة وقعت من البلكونة .. لبنى ( ملّصت ) الطرحة ..
Author: مريم بنت الحسين
Date: 11-22-2009, 06:55 PM
Parent: #42

شنو يا استاذ عصام الطناش ده، مداخلتي السابقة ما عجبتك ولا شنو؟

Post: #44
Title: Re: خديجة وقعت من البلكونة .. لبنى ( ملّصت ) الطرحة ..
Author: عصام دهب
Date: 11-22-2009, 09:47 PM
Parent: #43

Quote: شنو يا استاذ عصام الطناش ده، مداخلتي السابقة ما عجبتك ولا شنو؟

تحياتي و إحترامي يا مريم ..
و أرحب جداً بمداخلتك التي كنت قد شرعت في الرد عليها قبل خروجي من العمل ، لكن إنشغال مفاجئ حال دون إكمالها ، الأن مررت على المنبر و البوست سريعاً و أنا في قمة ( النعاس ) بس حبيت أطمنك و أقول ليك سوف آتيك و كل المتداخلين بي رواقة إن شاء الله ..