دينق / تراجي والآخرون عفو الله ورسوله فأنا ذاهب لربي سيهدين

أخوي دينق الإنفصالي
أختي تراجي الشوبارة معجم الأخطاء اللغوية
أخواتي البوردابيات
إخواني البورداب
عفو الله ورسولة ...
أعفوا عني لو غلطت معاكم
بكلمة
أوبهمزة
أو لمزة
فهذا الإسفير (يجمعنا) وهذا يكفي
فنحن وعكس ما يظهر (مجتمعون) في هذا الفضاء
بفضل الله
ثُم بفضل الباشمهندسبكري أبوبكر
دينق إنفصالي هذه هنا
لغرض المزاح
فأنا أعلم حُبك للخير لأهلك
وإن إختلفنا فنحن مختلفون في كثير من القضايا
ولكننا ننظر إلى اللوحة من زوايا مختلفة
أطلب منك العفو أخوي دينق
عن كل كلمة رك العام
عن كل تعبير خاطئ خرج بلحظة غضب
أو ضيق
وأقول لك وبفم مليان ولغة واضحة
أنا شخصياً في لحظات كثيرة أتمنى (إنفصـال) الجنوب
لسبب شعوري بأن الشمال مازال يظلم الجنوب
وحق للجنوب التمتع بخيراته
أقول أحياناً لأني أحب السودان موحداً على قيم العدل والمساواة والحرية

حسه ده حال زول عايز عفو؟؟؟

Quote: أختي تراجي الشوبارة معجم الأخطاء اللغوية

غايتو غيرة الرجال ابيخ حاجه!!(وجه غمز)

Quote: أعفوا عني لو غلطت معاكم بكلمة أوبهمزة أو لمزة

يعلم الله
انك من القلة الجنها غمز ولمز
وهذا لم نعهده برجالنا السودانين ولا نساءنا المتعلمات بحق!


اها ذكوريتك دي خليها
عفصت لي في فت سطر وقاطرني في العنوان مع دينق!!(هههههه)
ماشي وين؟؟ولا الحاصل شنو؟؟
العفو ليه؟؟!!


ماشي الحج ونسيت تقول؟؟

Quote: ماشي الحج ونسيت تقول؟؟

الصبُر أم حازم
لو لقيت حبّة صبُر كان غطستي حجر أخوانا الحاكمننا عشرومية سنة ديل
لكن دحولك (الفللي) ده وكترة الغلطات الطباعية
طولت فترة حكمهم !!!!
أم حازم بعكس كثيرين
أحياناً أتمتع بطريقتك في طرح الموضوعات
أو للدقة بعكس (البعض)
فانا في الأساس مسرحي وفنان بشعوري الداخلي ومثقف
ومؤمن بوجود (فكرة) و (طريقة)
فللجميع (قكرتهم)
ولكل منا (طريقته) في طرح تلك الفكرة
قد يتفق معها البعض أو يختلف
ولكنها تظل طريقته الخاصة
وأنا كثيراً ما أحب طريقتك
وهشام هباني
و مصطفى محمود
فهذه طُرق لها حدائتها في الطرح مع الإحتفاظ للكل بالإتفاق أو الإختلاف مع (الفكرة)
ولكننا نظل (إخوة) في هذا الإسفير
برضاعة تجربته فالعفو عن الهمز واللمز وما شابههم

Quote: ولكننا نظل (إخوة) في هذا الإسفير برضاعة تجربته فالعفو عن الهمز واللمز وما شابههم

اها عجبني لك جبت سيرة الاخطاء الطباعيه!!


ما قلت لي ماشي وين؟؟؟
شكلك مشيت تتابع المباراه!!

Quote: ما قلت لي ماشي وين؟؟؟ شكلك مشيت تتابع المباراه!!

أنا أختي أُم حازم
بإذن الله يوم الجمعة 2009/11/20
سأتوجه إلى الأراضي المقدسة
إن لم يجد في الأمر جديد
(فحكومتكم) دي ما مضمونة !!!!
لذا فأنا ذاهبَ إلى ربي سيهدين
وأريد التوجه إلى المناسك وأنا خالي من أي لحظة ضيق عليّ من أحد
ولأني وأخوي دينق إتشبكنا كتير هنا
في السودان الجديدوالقديم
فلذا جاء بالإسم
فنحن (إخوة) في الوطن والإنسانية والبورد
وإن أختلفنا في (بعض) المسائل
وإنتي لأنك أكيد حتجي حتجي
فلصقتك معاه
أها شنو ليك ؟؟؟؟

غايتو بالغت عديل كده يا أحمد موسى
والله شفقتنا
قلت الحكاية شنو الناس الحلويين اليومين ديل ماشين.
بي هنا عمر عثمان وقبضوه في آخر لحظة
انا كنت مجهز رد اقول لو مشيت انا ح أمش معاك
يا زول العفو والعافية
وحجاً مبروراً ان شاء الله
وتحج وترجع بالسلامة
وحاسب من H1N1

Quote: وحاسب من H1N1

ما تقول لي دي البتاعة بتاعة البتاع يا الشفيع أخوي

يا اخوي
كان الموضوع حج
فالعفو و العافيه
وحجا مبرورا وذنبا مغفورا باذن الله.


اها يا ابو حميد العفو ده يا اخوي ما ساي
ادعي لينا هنالك وبالذات لحازم ولدي بالشفاء.

وربنا يقبل منك
سايق المدام ولا ماشي براك؟؟؟



وقلت لي قطرتني مع دينق اخوي
عافيه عنك كويس العرفتنا تيمان برقو(هههه) الما بتفرقوا.

Quote: اها يا ابو حميد العفو ده يا اخوي ما ساي ادعي لينا هنالك وبالذات لحازم ولدي بالشفاء.

إنشاء الله
وربنا يشفيه ويحفظه من كل شر

Quote: وربنا يقبل منك سايق المدام ولا ماشي براك؟؟؟

أم حازم
أنا ماشي الحج
يعني أتنضف من الذنوب
أسوقها معاي تعرف الذنوب كلها ؟؟؟؟
أم حازم
إنتي أظنك ماعرستي قبل كدا !!!!

Quote: وقلت لي قطرتني مع دينق اخوي عافيه عنك كويس العرفتنا تيمان برقو(هههه) الما بتفرقوا.

الله يديم المحبة
والإتفاق
آمين

Quote: أخوي دينق الإنفصالي أختي تراجي الشوبارة معجم الأخطاء اللغوية أخواتي البوردابيات إخواني البورداب عفو الله ورسولة ... أعفوا عني لو غلطت معاكم بكلمة أوبهمزة أو لمزة فهذا الإسفير (يجمعنا) وهذا يكفي فنحن وعكس ما يظهر (مجتمعون) في هذا الفضاء بفضل الله ثُم بفضل الباشمهندسبكري أبوبكر دينق إنفصالي هذه هنا لغرض المزاح فأنا أعلم حُبك للخير لأهلك وإن إختلفنا فنحن مختلفون في كثير من القضايا ولكننا ننظر إلى اللوحة من زوايا مختلفة أطلب منك العفو أخوي دينق عن كل كلمة رك العام عن كل تعبير خاطئ خرج بلحظة غضب أو ضيق وأقول لك وبفم مليان ولغة واضحة أنا شخصياً في لحظات كثيرة أتمنى (إنفصـال) الجنوب لسبب شعوري بأن الشمال مازال يظلم الجنوب وحق للجنوب التمتع بخيراته أقول أحياناً لأني أحب السودان موحداً على قيم العدل والمساواة والحرية

الأخ أحمد موسى.

أنا لا أحمل أي غبينة تجاهك أو تجاه أي شخص أختلف معه هنا.

شكرا لكلماتك الطيبة تجاهي والعفو والعافة يا حبيب، أتمنى لك حجة مباركة.

وتمشي وتجي بسلامة. أما إذا كنت تؤمن بأن الجنوب مازال مظلوما ومن حقه الانفصال، فهذا هو نفس رأي أنا "الانفصالي"

Quote: أما إذا كنت تؤمن بأن الجنوب مازال مظلوما ومن حقه الانفصال، فهذا هو نفس رأي أنا "الانفصالي"

أنا بالمناسبة دي إيماني ده من قبل نيفاشا
كنت دايماً بتسائل في مسألة بسيطة
ليه الجنوبي دايماً بكون وزير ثروة حيوانية ؟؟؟
أنا يا صديقي إتربيت في حي شعبي
في بري إسمه (أبوحشيش) كان بسكنو النوبة (النجمنق) و(شلك) و(ديناك) و(فور)
أي والله ...
وعمري ماشعرت بفرق بيني وبين (كوكو أسوم ) أو (أبوالقاسم) أو (تريزا)
ومرة وأنا طفل صغير جات (كشة) وانا واقف زعلان شديد كيف يشيلو عدة (المريسة) حقت (تريزا)
العسكري قال لي أمشي من هنا ياولد !!!
بقيت واقف أعاين ليه شديد في عيونه وحاسي إنه بشيل في عِدة حقتي
لمان زهج عاين لي وقال لي : لو إنت ود ناس ما كنت سكنت هنا
من يومها كان سؤال (ليه السودان ده ظالم كدا؟؟؟؟) بينمو معاي
في المساء كنا و أطفال (تريزا) نلعب معاً
وكانت تضحك وهي تحكي للآخرين كيف خبئت من البوليس بعض من متاعها
صديقي (هذا البلد مازال ظالماً) فمازال (قبل نيفاشا) حتى جنوبيي المؤتمر الوطني
وزراء ثروة حيوانية
ولكن مازال الأمل باقياً فينا حتى يلعب أطفالي وأطفال طفلة (تريزا) في المساء
وهم لا يتسائلون عن شئ إلا كيف يذهبون صباحاً إلى الدرس سوياً
شكراً صديقي فأنت كما يُقال عنك تتمتع بقلب طفل وعقل ثائر