الحقيني.. ياااا... عواااااطف

القراية ام دق.... ولي الامر يقود ولدو من ايدو ويوديهو المدرسة ويقول لناظر المدرسة" اديناكم اللحم
وادونا العضم"...يعني دقوهو دق العيش وكملو لحمو وبعد داك رسلو لينا العضم حقو في قُفة...في ذلك العهد كان شعار التعليم" الضرب ينفعهم... والعلم يرفعهم"... تأمل الشعار جيدا يعني الضرب من اجل الضرب وليس له علاقة بالعلم...كنا ونحن اطفال نعيش في رهبة من تشرق شمش اليوم الدراسي لحدي ما تغيب...وبالليل نشيل هم ليوم باكر...لحدي ما تجي الاجازة فنحس بالامان ولو لبعض حين...ثم يبداء عام دراسي جديد والدق في انتظارنا قلما ينجو منه احد ..كان عصام جاري في الفصل... خواف من الدق جدا يبكي قبال ما يلمسوهو.... ولما يبدو يدقو فيهو يقعد يكورك باعلى صوتو لامو عواطف" الحقيني يا عوااااطف"...كان بيتهم قريب من المدرسة ... ودائما ما تجي عواطف جارية خامة توبا... فعواطف انتاية تزن فوق المائة كيلو.. ودائما ماشة حفيانة...كنت انا شخصيا اهاب عصام جدا ليس خوفا منه ولكن رهبة من عواطف.... وقد اكتشف عصام فيني نقطة الضعف دي فاخذ يبتزني بها...وكل ما يختلف معاي في حاجة كان يهددني" اصبر ان ما كلمت ليك عواطف.... والله نجي تخنقك جنس خنقة"...فاتخيل نفسي وانا مخنوق ورقبتي بين ايدين عواطف وخصوصا كان لي رقبة فيحجم اصبع يد عواطف الكبير او قل في حجم عجورة صغيرة...فكيف لهذه الرقيبة ان تقاوم خنقة من ايدين عواطف....كان عصام عندما يستنجد بامو عواطف كان المدرس يخليهو من الدق... وقد كنت اغبطه واحسده علي هذه النعمة الكبيرة... وفي ذات يوم فكرت ان استنجد بي عواطف زي ما بيسوي عصام .. وبالفعل كان يوم ذي دقة...وكوركت كما يكورك عصام " الحقيني يا عواطف"...ونجحت الفكرة خلاني المدرس... لكن عصام ما خلاني ... ناداني بعيد في الفسحة... و وهو يهددني بانه سوف يشكوني لعواطف قال لي" شيل شيلتك مع عواطف .. بتكورك لها ليه؟... ليه ما بتكورك لي امك؟"....واخذت اتحايل عليه حتى انه وافق ان يسحب الشكوى مقابل خُمشة يد من فول الحاجّات...فكرت ان ابرم معه عقدا ان استغل سلاح الكواريك لعواطف ام عصام عند اللزوم مقابل خُمشة يد فول حاجّات .... بالفعل اتفقنا وكان العقد كالاتي:-

عقد كواريك لام تلميذ في حالة الدقة من مدرس

ابرم كل من عصام ود عواطف والمشار اليه بالطرف الاول
و
سجيمان المشار اليه بالطرف الثاني

هذا العقد والخائن الله يخونو

*ان يتازل الطرف الاول(عصام) للطرف التاني( شخصي الضيعف) على ان يكورك الطرف التاني لام الطرف الاول عواطف في حالة تعرضه لدقه من أي مدرس

* ان يستعمل الطرف التاني( شخصي الضعيف) الكواريك لعواطف ام الطرف الاول فيما يرضي الله

*ان لايستعمل الطرف التاني( شخصي الضعيف) الكواريك لي عواطف في اي حالة اخرى غير دق المدرس ليهو.. يعني لو اتعرض لي دقة من تلميذ معاهو ما يكورك لي عواطف...ولو صدف وكورك الطرف التاني في حالة تعرضه لغفسة من تلميذ ان يقوم الطرف التاني بتشفيف الطرف الاول في امتحان الحساب او الدين ايهما اول

*يقوم الطرف الثاني( شخصي الضعيف) بدفع خُمشة يد من فول الحاجّات للطرف الاول عند نهاية الحصص.......

* اذا لم يدفع الطرف التاني ( شخصي الضعيف) خُمشة فول الحاجّات للطرف الاول فان للطرف الاول كامل الحق في ان يكلم امو عواطف وتخنق الطرف التاني..

* يسري هذا العقد لمدة عام دراسي كامل....ويمكن تجديدو لو عواطف ما ماتت او رحلو من جنب المدرسة

والله ولي التوفيق


الطرف الاول
عصام الامو عواطف

الطرف التاني

شخصي الضعيف


الشهود:
التلميذ امحمد ود ابريدة( الملقب بشيطان القطن)

التلميذ صديق الموج( الملقب بود الصول)

كلامك حلو ياسجيمان قريتو بمتعه
بـس همى كلو كان مع والد عصام !






ياربى إتعذب قدر شنو فى الدنيا دى ؟

..
.
ووين يا دكتور ..
ليك طولا ..

والله قصتك الساخرة ممتعة
ولكننى احس ان وراء الاكمه ما وراها ..


________

عموما عقدك دا قانونى وصحيح
بس غير كلمة ام لوالدة ..

قرقر قرقر قرقر

تبلدينا

Quote: ووين يا دكتور .. ليك طولا ..

قاااعد يا تبلدينا.... بس انتو ما بتسعلو مني

كمال سالم قال:-

Quote: بـس همى كلو كان مع والد عصام !

يا كمال....
نعل انت ماك قوّال؟

عصام قال لي ما تحدس زول... وانت اوعك تجيب طاري النضم الداير اقولو ليك دا فوق خشمك لي زول...احفر لو وادفنو في البوسطي دا.... سمح؟

عصام قال لي: ابوهو .... كل يوم في الليل قاعد يكورك لي امو " ام الابو".... ويقول لها الحقيني يا التومة... وبعد شوية ييسمعو يقول آححح الحمد لله غُمة واتزالت .هم ونزل !!!
باقي ليك يا كمال الراجل دا مالو؟.... غايتو انا قدر ما صوطا في النضم دا ما عرفت شي!

Quote: التلميذ صديق الموج

فتح الرحم محمد

انت كنتا دفعتنا يا جنا؟؟؟؟

فوق يا حمزاوي

فوق

فوق

أنا غايتو سمعت ان صديق الموج كان مجكس عواطف
ويزوغ من الحصص وتووووووش جوا بيت عواطف



يا سجيمان اخوي
انت دستة الكبابي فيها كم كباية ؟؟؟؟؟؟

فوووق

هلا وغلا
يا سي جي

شكرا ليك للكلام السمح دا

تعرف ابونا زعلان من ولدنا البمشي المدرسة آخر فرح
وعلق قال بالله زمان المدرسة دي ذي الجارينك من نخرتك محلة فيها كبد وتعب
اسع يمشو فرحانين ويقوليك فن وكول

يا حليل الخرطوش وجريد النخل

وزاة التربية من قالت الدق ما قانوني الشفع قلو ادبهم..

بادت حضارة ليكم اللحم ولينا العضم

عاد عواطف دي لا تموت لا تفوت


عفارم عليها
علي اليمين أتخيلتها
قدر عمتي التاية

كااااااااااك

حبيب نورة.... ازيك

ناسك الفوق ديل مالم يشبهو عربات الاتوس الفي الكرين؟؟؟

فوق لحين عقد جديد

شكرا مجدي
للحضور

د.نجاة محمود

Quote: وعلق قال بالله زمان المدرسة دي ذي الجارينك من نخرتك محلة فيها كبد وتعب

والله يا دكتورة كلنا زعلانين .... والواحد متحسر انو ما رجع شافع اللليمات دي...


( هوي الله يكسرني داك الليلة شفتكم في قناة الجزيرة... ما جايين تاني؟)

تسجيل حضور ومتابعه

حضور ومتابعة با سى جى ممزوج بى ضحك للطيش..يااخ والله انت زول مكسب عديييييييييييييييييييييييييييييل كده.

علي سرالختم

Quote: حضور ومتابعة با سى جى ممزوج بى ضحك للطيش..يااخ والله انت زول مكسب عديييييييييييييييييييييييييييييل كده.

وانت مكسب لي كقارئ

شكرا يا علي

شكرا هويدا

تيمننا بحاجة التومة
نرفع عواطف

سى جى مان
C .G.MAN
يا اخى مشتاقون ..
مبروك ..
شايف القك عاد بدون خربشة ..
يا ربى ده يكون من شيلة التيار ؟؟؟

التكينة يا حبيب

وين الحي بيك؟

التيار اريتو يشيلك انت معاي قول امين

تك تك

كل سنو وانت طيب

المبدع سجيمان - لك التحية

Quote: كان شعار التعليم" الضرب ينفعهم... والعلم يرفعهم"

طبعاً الضرب ما نفعنا في شيء , لأنو أغلب
المعانا ماواصلوا تعليمهم , أما العلم
فقد رفعنا بالفعل , والحمدلله
بس بصراحة تشكر على القصة الجميلة وقد
أرجعتنا إلى سنوات خلت . والله ما ذكرته
يا سجيمان كانت وقائع حقيقية عشناها مع
المدرسين , وحسب الشخوص والأحداث , فالمدرسة
كانت في قرية .
كل عام وأنتم بخير

د. يوسف

كل سنة وانت طيب

المدرسة الللتي كانت في كينة اقرب منها الي القرية..... وياما ادقينا دق... بسبب وبدون سبب

كدي نشوف خبر عواطف دي شنو؟