هل يمكن في جمهوريه السودان رفع دعوه قضائيه علي وزاره او وزير ؟؟

اتمني ان اجد ردا قانونيا علي هذا السؤال .
ولكم الشكر الجزيل

هل يقف الدستور حائلا امام مقاضاتهم ؟؟
ام لماذا لا يحاسبون ؟؟الرجاء تنويري

الاستاذة دومة
صباح الخير
الحقيقة هو نظرياً ممكن ...
وبس ...!

Quote: الاستاذة دومة صباح الخير الحقيقة هو نظرياً ممكن ... وبس ...!

صباحك نور يا عثمان دغيس
وطيب ما العمل عشان ما يكون نظريا وبس
نعمل شنو عشان تكون في محاسبه وعشان يسود العدل ؟؟؟؟
دي ما امانه ربنا حملنا ليها ولا شنو ؟؟؟

Quote: هل يقف الدستور حائلا امام مقاضاتهم ؟؟ ام لماذا لا يحاسبون ؟؟الرجاء تنويري

الدستور لايمنع ذلك ....... والقوانين تنظم مثل هذه الدعاوي يعني عندها اجراءات خاصة يمكن واحد من الاخوان المحامين اعضاء

المنبر يزودنا بتفاصيل اكثر ........ وللحكومة واجهزتها محامي يتبع لوزارة العدل .............

هناك كثير من السوابق القضائية في هذا الشأن ، التقصير يقع في كثير من الاحيان على المتضرر الذي يستسلم ويعتقد انه لاسبيل له

لمقاضاة الحكومة ، لذا نشر الوعي القانوني بين المواطنين هو السبيل لحثهم على التمسك بحقوقهم القانونية في مواجهة الحكومة

واجهزتها.

Quote: لذا نشر الوعي القانوني بين المواطنين هو السبيل لحثهم على التمسك بحقوقهم القانونية في مواجهة الحكومة

طبعاً دي الشماعة الجاهزة، ياخوي المواطنين واعين بي حقهم، إنتو المحتاجين توعو إنو الأمر تكليف وامانة، لمن الواحد يجي يشتكي وتختو ليهو ألف عقبة قدامو، والقضة الباتخد في الدنيا كلها أسبوعين بتاخد عندكم سنتين يبقى منو المحتاج وعي قانوني وإنساني وأخلاقي؟ قضاء بيحتاج خمسة سنة وعشرة سنة عشان يبت في قضية دا أخير عدمو، لأنو ببساطة عنصر الزمن في التقاضي أهما من التقاضي نفسو، الفايدة شنو أرفع لي قضية وأكسبا بعد ما سيد الأمانة يشيل امانتو؟ والأسوأ من دا كلو، إن الحكومة بتنشر في المعلومة دي بكل ما أوتيت من قوة، يعني كان رفعتا نملة من الشارع، حتقول ليك الكلام القلتو ليك فوق دا. يبقى قصة نشر الوعي القانوني بين المواطنين دي ذريعة وهمية ما عندها أساس من الصحة، الموطنين واعين، بس إنتو أصلحوا المؤسسات القانونية وعينكم ما تشوف إلا النور.

نظرياً ... ممكن. عملياً مستحيل. الحكومة بتلعب على وتر الزمن، يعني عاوز تشتكي ممكن مافي مشكلة اتفضل طوالي، لكن لمن الكلام يصل الجد، تبقى في أمشي وتعال، بكرة وبعيدن، شيل وخت، هات وجيب، تلقى خمسة سنة من عمرك راحت. مرة أتذكر عاوز أفتح بلاغ في عسكري، سنة 2005، أخدت شهر من أمشي وتعال، جيب الشهود، خت الورق، الخميس يوم إداري، السبت صفرجت، الأحد دس دس، الإتنين يوم الرواتب، وكيل النيابة مشغول، في النهاية قنعتا، ورفعت الشكوى لي رب العالمين.

دوما
إن شاء الله خير
زي ما قالوا الجماعة نظريا ممكن ..
عمليا أحسن ترفعي أمرك إلى الله ..

ما معقول يا جماعه الموضوع حقوق طبقه عريضه من المساكين والفقراء واليتامي حقهم في التعليم المجاني وحقهم في العنايه الصحيه الاساسيه .

أختي دوما
مسكاقمي
تشتكي مين لي مين
إذا كان هو الخصم والحكم
أرفعي أمرك لله
فهو العدل ولا يظلم أحداً

]

Quote: أختي دوما مسكاقمي تشتكي مين لي مين إذا كان هو الخصم والحكم أرفعي أمرك لله فهو العدل ولا يظلم أحداً

حبابك يا حمزاوي يا اخوي هي لكين كيف يسقيم الامر دا ؟؟؟!!!
مش القضاء مستقل ؟؟؟
وهناك فصل تام بين السلطه القضائيه والتنفيذيه والتشريعيه ؟؟؟

الفاضلة دوما... حسب خبرتي القانونية أقول لكي بإمكانك أن ترفعي دعوى ضد وزارة الرياضة أو التجارة الصينية! في المحكمة الابتدائية بأمبدة مثلا، وسنرد عليك بعدم الاختصاص! عدا ذلك فنحن لا نحبذ شيل الحال والجرجرة في المحاكم!!!

Quote: وهناك فصل تام بين السلطه القضائيه والتنفيذيه والتشريعيه ؟؟؟

دومة نهارك سعيد

لا يوجد فصل في الواقع وهذه النصوص الجميلة الموضوعة في ما يسمى الدستور ليس المقصود بها نحن هذه الدساتير تتجمل وتنظر للخارج ولا تنظر للمواطن فهي لم تخلق من اجل المواطن وليس لاجله وضعت

تقدمي ببلاغ ضد احد التنفيذيين وستجدين المتاريس تبدأ من رسوم التقاضي يعني لو ما عندك قروش (ادينا عجاج كرعيك ) ثم تبدأ متاريس الحصانات ومن يقوم برفع الحصانة هو الدولة وهناك تضامن لاعضاء الحكومة مع بعضهم البعض لن يوافقوا على رفع الحصانة عن زميلهم

اذا ترفعي شكواك لرب العالمين فطريقها سالك ومفروش بالقبول وسرعة البت وان تأخر طبعا دا كلام قليل الحيلة اما العندو حيلة فيشوف صاحب نفوذ اعلى من صاحبو و ياخد حقو غمتي
واصحي يا بريش انت في السودان بلد الشريعة (ما شريعة رب العالمين طبعا شريعة مقاسات مختلفة والوان اكثر اختلافا)

فتك بعافية

الاخت دومة
سلامات
كونه القضاء يكون بالصورة المرجوة هذه
دا لسع مشروع حلم
حتى لم يصل مرحلة الحلم بعد.
المشوار لسة طويل
من رايى انه الناس تعمل العليها وترفع قضايها
وتحفظ بصورة من البلاغ
ارضاء للضمير وبس
وبعدين فوضى امرك لله
يعنى اعقليها وتوكلى
مين عارف!
عسى ولعل

سلام يادومة


المفروض يشتكوهم لتقاعسهم في حق المواطنين

وزير التربية وزيرة الصحة ووزيرة الشؤون الاجتماعية

وامين ديوان الزكاء

يشتكوهم في المحاكم ويشتكوهم لرب العالمين الجبار القوي

يخيزهم الله في الدارين على تهاونهم في حق العباد



ما يهم انه محاكمتم تجيب حاجة فقط العيار الما يصيب يدوش
لازم نشوف طريقة تصلهم وجهة نظرنا فبما بحدث
للفقراء والمساكين احباب الله

ولليتامي والارامل

جنابو عمر
ممكن تمدنا بسابقة قضائية واحدة حدثت خلال ال 20 سنة الماضية ؟؟
سلامي الأخت دوما ...
المعروف خلال ال 20 سنة الماضية شعار استراحة محارب ... وتولية مناصب رغم أنف وكيد الحاسدين ..
الشفيع ابراهيم

المفروض امكان رفعها ضد وزير او وزارة
ولكن في الحقيقة لايمكنك رفعها في ظل الحكم
الساري الآن في السودان لانه لاتوجد دولة قانون
بل هي دولة خرابة المؤتمر الوطني
بعدين دولة وزير عدلها سبدرات وين خيرا فيها

دومة سلامات
في بلد زي السودان يُقرأ سؤالكـ ده مقرون بمن هم في موضع الاتهام من المسئولين
إذا كان المسئول اكسبيردز بالنسبة للمؤتمر الوطني , من السهل جدا إعلاء قيمة القانون
ولا كبير علي المحاسبة و القوي الامين و لو سرقت فاطمة و ..الخ
اما إن كان المسئول لسه فيهو رقشة , فـ طـــز كبير في القانون .. المؤتمر الوطني هوا الاعلي و هو القانون.

العزيزة دومة
لك وللاسرة عميق المودة

أتخيلي بلد القاضي فيها ممكن يرتشي
الحكومة ممكن تقتل زول وتلبس القضية لخصم سياسي ماعندو اي علاقة بالمكتول
الحكومة ممكن تجيب الحكم للقاضي جاهز وعليه يتلوا الحكم ويوقع عليه
اتخيلي زول يتقتل والقاتل الحكومة
وبرضوا ممكن يكون في امل في دولة قانون

وتسلمي من كل بلاء

بس رب العالمين بعاين وهو شايف الظلم الحاصل لعبادوا
نسأله الرحمة

_________

عماد قبل كده ما قايل بلد بايظة

دوما
هذه شكوى :


شــــــــــــــكوى إلى الله

Quote: مش القضاء مستقل ؟؟؟ وهناك فصل تام بين السلطه القضائيه والتنفيذيه والتشريعيه ؟؟؟

التومة دومـة،

داية تتمردى واللا شنو؟


المحامين قايدين الفسـاد فى السـودان (معذرة من الأخوة فلم أقل كل المحامين)

صديق قال أن محاميا أتفق مع قريبه فباعا سيارته بدون توكيل ولا تسجيل ولا نمر وبدون رقم مسلسل ولا أى شئ.
طبعا المحامى عرف أنو الزول قريب الزول وما ممكن يشتكيه، وقرط على كدا.

Quote: وهناك فصل تام بين السلطه القضائيه والتنفيذيه والتشريعيه ؟؟؟

دوما صباح الخير ..
الفصل بين السلطات بيكون كالآتى : المؤتمر الوطنى فرع السلطة القضائية : المؤتمر الوطنى فرع السلطة التنفيذية : المؤتمر الوطنى فرع السلطة التشريعية .

ممكن جدا ترفعى قضية على ياسر عرمان وبكرة يرفعوا ليكى عنه الحصانة ويطلبوا محاكمته .. غير كدة مافى ..

الصحفية لبنى تعرضت للظلم دا عينك عينك وحاولت ترفع قضايا على ناس متنفذين لكن تم تهديدها بالقتل .. اها لو دايرة ترفعى قضية على وزير خليكى بعيد وارفعيها بالتلفون ..

الاعزاء
قرأت كل اجاباتكم قطر قلبي دما
وامتلات نفسي غضبا
ضاق صدري حتي كاد ان ينفجر
انه قانون الغابه القوي ياكل الضعيف
يقتلني الاسي يا صحاب
سنظل عالم رابعا لقرون آتيه
وربما الي ان تطوي الارض .