Post: #1
Title: بقيت تتصنع الاسباب - او سفر الحنين
Author: عبدالله وداعه الامين
Date: 11-11-2009, 03:23 AM
بقيت تتصنع الاسباب - او سفر الحنين
بقيت تتصنع الاسباب
وسر المك لبستو حجاب
فردتا الريح علي موطاك
وما هماك رضا الاحباب
تشيل ليلك دموع واسف
اريت اسفك بيبقى جواب
وترجع تاني من اول
ويبقى البينا كلو عتاب
***
بقيت تتصنع الاسباب
وفيك طبع الولف غلاب
تعاند الروح علي كيفك
وما هماك سهر و عذاب
ودادك شلتو في روحي
ومن عيني سقيتو شباب
اريت قلبي القبيل رادك
ودر واريتو بيك ما طاب
***
بقيت تتصنع الاسباب
وبي سببك كما الاغراب
بقينا نخاف من الخطوة
بعد ما كنا ببها قراب
خلاص اخترت درب الخوف
وما هماك دربنا الجاب
اريت سفر الحنين بعدك
اسف نقضيهو نمشي سراب
عبدالله وداعه الامين
لندن 06.11.2009
|
Post: #2
Title: Re: بقيت تتصنع الاسباب - او سفر الحنين
Author: Mahassin Ibrahim
Date: 11-11-2009, 08:16 AM
Parent: #1
عبدالله وداعه : لك الاف التحايا واعطرها.
اعجبتني هذه الابيات وشدتني الي حد بعيد.
اشهد لك بالاعجاز والبلاغه الشعريه .
كسره صغيره : من غير تحيز قبلي يحدثني فلبي انك من قبيلة الشايقيه....ان صح حدسي ..لك تحايا عباقرة الشعر اسلافك والمحدثين كمان.
|
Post: #3
Title: Re: بقيت تتصنع الاسباب - او سفر الحنين
Author: عبدالله وداعه الامين
Date: 11-11-2009, 12:09 PM
Parent: #2
Quote: عبدالله وداعه : لك الاف التحايا واعطرها.
اعجبتني هذه الابيات وشدتني الي حد بعيد.
اشهد لك بالاعجاز والبلاغه الشعريه .
كسره صغيره : من غير تحيز قبلي يحدثني فلبي انك من قبيلة الشايقيه....ان صح حدسي ..لك تحايا عباقرة الشعر اسلافك والمحدثين كمان. |
الاخت العزيزة محاسن
سلام وتحية يا عزيزة
شكرا لكي اختي الفاضلة وشكرا لحسن الظن الجميل
وشكرا لملامسة حرفي صدق احساسك وممتن جدا لك هذا الشرف
وثقتك في حرفي تاج اعتز به وافخر
انا يا عزيزتي لست بشايقي ولي الشرف ان اكون واحدا منهم
انا جعلي ولكن ما يدهشني اناس غيرك يبادلوك نفس الاحساس
ما سر ذلك؟
ليتني اعلم ان كنت تعلمين
شكرا لك محاسن وممتن جدا عزيزتي
مودتي والمحبة
|
|