كيف صارت امي عضوا في المؤتمر الوطني !!!

في واحد من نهارات يوليو الفائت و درجة الحرارة تقارب الخمسين درجة و بينما كنت عائدا
نحو منزلنا في الكلاكلة شاهدت احدى جاراتنا و هي صديقة لوالدتي تقف مع جارة اخرى امام
منزلها و بيدها مجموعة من الاوراق و كانت تقول لتلك الجارة :ادي ورقة لامك و واحدة لاختك
فلانة و دي حقتك انتي" القيت عليهن بالسلام و واصلت متعجبا و متسائلا عن هذه الاوراق و اقنعت
نفسي بعد اقل من دقيقة استغرقتها في التفكير حول الموضوع انها ربما كانت دعوة لحضور
مناسبة ما في الحي.
عند دخولي المنزل لم اجد امي و لكني وجدت على السرير ورقة كتلك التي كانت بيد الجارة
العزيزة , اخذت الورقة و قرأتها : السيدة فاطمة.ا عضو المؤتمر الوطني بالكلاكلة القبة مربع
كذا الرجاء الحرص على حضور الاجتماع..الخ, قلت لنفسي :ده شنو الحاجة دي بقت مع الجماعة ديل
من متين؟ و السبب شنو ؟ تأمين صحي و عندها..قروش ما اظنها محتاجة..تكون مضربة على منصب في
جهاز الدولة؟؟ و دي ذاتها مستبعدة لأنها ما كان عندها طموح زي ده و لا اصلا بتحب الظهور
و الاضواء! طيب يكون وفاة الوالد اثرت عليها للحد اليدخلها المؤتمر الوطني؟؟.
في غمرة الهواجس دخلت امي فعاجلتها بالسؤال:انتي بقيتي عضو في المؤتمر الوطني من متين؟
ردت قائلة: عضو في شنو ؟ القال كده منو؟
قلت لها: اهو دي دعوة لحضور اجتماع مكتوب فيها اسمك كعضو في المؤتمر الوطني.
قالت : دي الورقة الجابتها فلانة..دي ادوها لنسوان الحلة كلهن .
سألتها كيف حدث أن كل نساء الحي قد صرن عضوات في هذا الحزب..قالت انها ليست عضوا
و انها لا تعرف كيف اعتبروها عضوا .و لكن الذي حدث هو انها و بعض النساء المداومات على
دروس القرآن في دار التحفيظ قد دعين لحضور احتفال لتكريم الحافظات على مستوى المحلية
و منذ ذلك اليوم تم اعتبارهن عضوات بالمؤتمر الوطني و اصبحن هدفا لملاحقة هذا التنظيم
يتم دعوتهن لحضور اجتماعات و فعاليات لا يذهبن اليها و لكن هذا لا يؤثر على الجماعة و لا
يفت في عضدهم فلا زالوا مثابرين على التعامل معهن كعضوات رغما عنهن. هذا الأمر شاهدته
ايضا في بحري و شاهده غيري في مناطق أخرى . يضم هذا الحزب اناسا لعضويته لا يلزمهم باية
التزامات من دفع للأشتراكات و حضور نسبة معينة من الاجتماعات , بل و لا حتى موافقتهم الصريحة
على الانضمام للحزب فالهدف هو تكبير الكوم باي شكل من الاشكال.
قلت لأمي :طيب ليه ما تقولي ليهم انا ما معاكم و ما ترسلوا لي تاني اي دعوة.
قالت : يا زول خليهم يرسلوا انا لا بمشي ليهم و لا عندي معاهم شغلة.

مررت للتحـية للمـجاملة والتحـايا....

***- من يوم ماناس الانقاذ وتـحـديدآ صلاح كرار كتلو الشـهيد مـجدي مـحجوب ونهـبو فلوس العائلة، واي أم او ست اوفتاة او بنت (من اندينا) وبكرهو حاجة اسـمها العسكر والاسلاميين ليوم الدين...

الأخ د. سيف
تحياتي
يبدو أن هذا الأسلوب متبع بصورة واسعة... الوالدة حفظها الله أيضا تحضر بعض الدروس... الغريبة أنها و جاراتها يقمن بتنظيم هذه الدروس بصورة ذاتية و لم تنظمها أي جهة و لكن على الرغم من ذلك حاول الجبهجية استغلال هذه الدروس و بنفس صورة العضوية القسرية هذه.... المهم حكت لي الوالدة أنهن تجاهلن هذا الأمر و في بعض الأحيان كن يقمن بحضور بعض الاجتماعات التي تعقد تحت غطاء القيام ببعض الأنشطة العامة المفيدة في الحي... إلى أن جاءت القاصمة و كانت سببا في مقاطعة الوالدة لجميع أنشطة المؤتمر الوطني بحمد الله عندما حاولوا توزيع بعض المواد التموينية في رمضان على هذه العضوية القسرية مما أثار حنق الوالدة و واجهتهم بأن هناك من هو أولى و أحوج لهذه المواد إذا كانت نيتهم فعلا سليمة.

دا بدل ما تقول ليها تغلغل في التنظيم و تشوف ليك وزارة الصحة..لوول

انا من دربي دا ماشي اقطع تذكرة للوالدة تجي تحصل المولد دا..
_____________

نفس السيناريو مطبق بحزافيروا في الحاج يوسف city !

الناس ديل يا دكتور بعملوا اي حاجة عشان يكبروا الكوم..

Quote: انا من دربي دا ماشي اقطع تذكرة للوالدة تجي تحصل المولد دا..

والله ياحسين انا كنت فاهم انها لاعبة في الدوري الامريكي!

الأخ بكري الصائغ
شكرا على التعليق..الكراهية مشتركة ممن هم من اندينا و برضو من هم ليسو من اندينا.

الأخ العوض
الحمد لله أن لاقت بيننا الامهات و اتفقنا اخيرا..يا خي و الله عيب ما يفعله هؤلاء الناس
باستغلالهم لحلقات التحفيظ و الدروس الدينية في خم الناس و الترويج لبضاعتهم البايرة
و المشكلة أن رهانهم على عدم وعي امهاتنا رهان خاسر..فهن اكثر وعيا بكثير مما يعتقد
ناس المؤتمر الوطني و لا يمكن أن تمرر عليهم مثل هذه الالاعيب..امد الله في عمر الوالدة و حفظها
لكم.

Quote: يا خي و الله عيب ما يفعله هؤلاء الناس باستغلالهم لحلقات التحفيظ و الدروس الدينية في خم الناس و الترويج لبضاعتهم البايرة

وهل يعرف هؤلاء العيب يا دكتور؟

العيوب بكل أنواعها ماركات مسجلة لديهم !!!!!!!!!!!!

سلام سيف

Quote: لكن الذي حدث هو انها و بعض النساء المداومات على دروس القرآن في دار التحفيظ قد دعين لحضور احتفال لتكريم الحافظات على مستوى المحلية

لو تركوا النساء ديل فى حالن ربما تحسنت حالة البلد وانصلح حال
المجتمع ..


لكن ...


هم..اى الكيزان.. لايرون اى شئ جميل الا ويريدون عائد من ورائه..

Quote: دا بدل ما تقول ليها تغلغل في التنظيم و تشوف ليك وزارة الصحة..لوول

تتغلغل وين يا حسين يا اخوي ؟ ما بتقدر لانها ما بتدور الناس ديل بالله واحد..
تعرف مرة في التسعينيات كان سبدرات وزيرا للتعليم و كان بيتكلم في الاذاعة و انا و الحاجة
قاعدين في المطبخ الصباح..صاحبك قال انو الوزارة مجتهدة في توفير الكتب المدرسية و الكراسات
و تجاوز النقص الحاصل و قال انو الناس مفروض يساعدوا الحكومة يعني الطلاب يحتفظوا بالكتب بحالة
جيدة حتى يستخدمها غيرهم و مشى اكتر و قال ان الكراسات ذاتها ممكن الاستفادة منها يعني ممكن
نشيل الصفحات الفاضية من اي كراس و نلمهم مع بعض و نخيطهم ممكن نعمل كراس جديد و قال انو
هو زوجته قضوا ليلة امس كلها و هم بيقطعوا الصفحات الفاضية من كراسات اولادهم القديمة
و يخيطوها مع بعض عشان يوفروا على نفسهم!! لحدي هنا الحاجة ما قدرت تستحمل و انفجرت
تخاطب الراديو:شكيتوا على الله الراجل الكضاب ده..الراجل ده قايلنا عندنا قنابير و للا شنو
قال هو مرتو بيخيطوا الكراسات القديمة!! شكيتك على الله .

سلامات يا دكتور
مرور لتحية الوالدة العظيمة ام خالد وعمار وسارة ..
حفظها الله ومتعها بالصحة والعافية

الأخ احمد عالم
تكبير الكوم بالحق و الباطل يبدو انها ضمن الاسترتيجية القومية الشاملة .

عاطف مكاوي
سلامات و شكرا على التعليق .

Quote: هم..اى الكيزان.. لايرون اى شئ جميل الا ويريدون عائد من ورائه..

النصري سلامات: صدقت و رب الكعبة.

عمار الياس يا هندسة:

Quote: مرور لتحية الوالدة العظيمة ام خالد وعمار وسارة ..

لك من التحية اضعافها.

سلام يا سيف
يبدو أن هذا الأسلوب متبع بصورة واسعة

والله يا سيف بختك . من هنا ونحن علي الكلاكلة علي الحجة تشوف لينا أمورنا البايظة دي . وكمان لو الجماعة رشحوها في الانتخابات الجاية خلاص كملت . . في الثورة واحدة عندها مشكلة ولدها في المدرسة عايز يحول من علمي لأدبي قالوا ليها مافي طريقة إلا يلقي ليهو زول يحول من أدبي لعلمي ، جارتها مؤتمر وطني حلت ليها الموضوع في دقائق ومن ديك أم الولد من دعاة المؤتمر الوطني في الحارة . يعني أي زول يجي المؤتمر الوطني مشاكله بتتحلا .. طيب الشعب السوداني كله يبقي مؤتمر وطني زي ما قال عنكبة وتتحلا المشاكل بالجملة .. بس للاسف حا يلقوا مناصب للناس دي كلها وين .... لله في خلقه شئون .

سلامات

الحاجة دي ما فقط للامهات..

نحنا كان عندنا جمعية خيرية هنا
ذات نشاط اجتماعي حبت
نعمل حفلات استقبال وداع جمع تبرعات اشتراك في الاعياد
مساعدة زولة والدة ومشي مستشفى لطالب الخ الخ من النشاط الاجتماعي
لاني كنت شغالة في الجامعة في ذلك الزمن بجمع القروش
حيث كل الازواج شغالين في الجامعة اا الزوجات برسلولي القروش من خلال الازواج ديل
والزولة المسؤولة من الاسرة زولة لا توجه لها خالص
بس بتحب عمل الخير والشغل كلو طوعي بلا انتخابات لا بتيخ
فجأة نلقى الموضوع ونشاطنا الاجتماعي البحت دا بقى
موضوع اجتماع عريض وطويل وشمل ضمن نشاطات الناس دي
ومن ديك وعيك ىخر حفلة استقبال كانت سنة 1996

ومن يومها صرت ابوذر عمل فردي خيري
لو استطعت اليه سبيلا

وحركة كرتنة الناس دي بيجيدوها اخوات نسيبة ديل شديد
ما بهمهم السن ولا الوعي ولا الفهم.

تلقى اسمك مكتوب لا يدك لكراعك..

Quote: Re: كيف صارت امي عضوا في المؤتمر الوطني !!!

سيف النصر وضيوفه الكرام
تحياتي ,,,

يا سيف خليتنا نشفق على امهاتنا ... قلت لي دعوة مكتوبة لحضور اجتماع والسلام؟ الله يحفظ امهاتنا

Quote: نفس السيناريو مطبق بحزافيروا في الحاج يوسف city !

اولاً يا حسين يا نوباتياالحاج يوسف, دهـ متين بقيتوهو مدينة؟ ثانياً قول مثلاً نفس السيناريو فى منتجع الكلاكلات

Quote: في واحد من نهارات يوليو الفائت و درجة الحرارة تقارب الخمسين درجة و بينما كنت عائدا نحو منزلنا في الكلاكلة شاهدت احدى جاراتنا و هي صديقة لوالدتي تقف مع جارة اخرى امام منزلها و بيدها مجموعة من الاوراق و كانت تقول لتلك الجارة :ادي ورقة لامك و واحدة لاختك فلانة و دي حقتك انتي" القيت عليهن بالسلام و واصلت متعجبا و متسائلا عن هذه الاوراق و اقنعت

الاخ سيف تحياتي:
المرأة التي دخلت عليكم هذه هي سر اللعبة،كيف؟؟؟؟؟؟هؤلاء الناس بيبعوا الناس في سوق الرقيق السياسي وستأخذ هذه الزائرة عن كل رأس حقها ممن هو اكبر منها تكليفاً ونصيب في الكيكة....في طريقة اشبهة بمناديب المبيعات وهي تعرف عندي ببزنسة العمل السياسي ...والحلقة في عمومياتها يكون فيها المشتري مشتري (بضم الميم في الثانية)وبعبارة اكثر دقة المسترق فيها (بفتح الراء) مسترق وهكذا
تدار اللعبة حتي بلوغ الضحية الاخيرة ويؤسفني ان تكون امك او امي حاجة فاطمة
لذلك فهم محقين في عدم الثقة في كل من يسجل .....لانهم غير واثقون علي مستوي القيادات في هذه الاستايل من العمل السياسي ، ولكن ما حيلتهم ...وكل اساليب الاحتيال السياسي استنفذت واستهلكت ولم تعد جذوة الشريعة والوعد بالحور العين متقدة وفعالة في خداع الناس....
وساحاول ان احكي عن قصة خداع اخي الصغير فيما بعد

سيف النصر
سلام وتحية للوالدة

يا اخي هي الوالدة دي زاتها راجعة من امريكا ليه؟

مش كان احسن ليها تبقى عضوة في الحزب الديمقراطي .


تتدكر لماانا قلت لياسر عرمان
يا اخي امي سافرت خليتا كويسة جيت لقيتا بقت حركة شعبية .


عموما لو امك بقت وزيرة عليك الله وصيها على صاحبك زهير الزناتي المسكين
ان شاءالله تعينوا رئيس لجنة شعبية .


وطبعا فارح حيعمل صاحبك .

تحياتي للاسرة في امريكا والسعودية والسودان .

د.سيف سلامات

Quote: كان سبدرات وزيرا للتعليم و كان بيتكلم في الاذاعة و انا و الحاجة قاعدين في المطبخ الصباح..صاحبك قال انو الوزارة مجتهدة في توفير الكتب المدرسية و الكراسات و تجاوز النقص الحاصل و قال انو الناس مفروض يساعدوا الحكومة يعني الطلاب يحتفظوا بالكتب بحالة جيدة حتى يستخدمها غيرهم و مشى اكتر و قال ان الكراسات ذاتها ممكن الاستفادة منها يعني ممكن نشيل الصفحات الفاضية من اي كراس و نلمهم مع بعض و نخيطهم ممكن نعمل كراس جديد و قال انو هو زوجته قضوا ليلة امس كلها و هم بيقطعوا الصفحات الفاضية من كراسات اولادهم القديمة و يخيطوها مع بعض عشان يوفروا على نفسهم!! لحدي هنا الحاجة ما قدرت تستحمل و انفجرت تخاطب الراديو:شكيتوا على الله الراجل الكضاب ده..الراجل ده قايلنا عندنا قنابير و للا شنو قال هو مرتو بيخيطوا الكراسات القديمة!! شكيتك على الله .

ده حالتو الجاي من أقصي اليسار ولو من اليمين المتطرف كان ال شنو ! عجبي والصحة والعافية للحاجة أم سيف .

،،،،أبوقصي،،،،

أخي الحبيب سيف النصر سلامات لك ولأُمك المؤتمرجية بفهلوة نفيسة جارتها!!!

تعرف يا الحبيب الناس ديل إستغلو بساطة الناس وبإعلامهم الضخم حاولوا إستقطاب الناس على بساطتهم...

قبل فترة يحكي لي أخ كريم بلدياتنا قال لي نزلت إجازة في البلد لقيت خالتي زينب عندها بطاقة مؤتمر وطني... (يعني دي ما بالغتاتة مسجلة عدييييييييل)... أها قال لي قلت ليها يا خالتي البيسويكي جبهجية شنو وتفارقي ناس سيدي؟؟؟ قال ليهو قول بسم الله يا ولدي إنت ناس المؤتمر الوطني ديل ياهُن الجبهجية قال ليها أيوة ياهُن بي ذاااااااااااتُن وصفاتُن... قالت ليهو بَرِي يا ولدي والله ماني عارفاهُن بس جونا هني وقالو لينا نديكم البطاقات دي تبقوا معانا والبطاقة دي تدخلكم المستشفى بالمجان وتسهلكُن أي شي عاوزنو!!! وقالو لينا نحن عملنا ليكم كُوبري مروي وطريق الظلط بتاع الشريان!!!!

قال لي بكل بساطة حولت إتجاهها مية وتمانين درجة من جبهجية لي إتحادية زي ما كانت بس بالحوار دا:

ـ إنتي آ خالتي زينب تمُرْكُن دا زمان كان قاعد يجيب كم شوال؟؟؟

ـ أخدت ليها نحنحة كدي حقت تحسُّر وقالت ليهو 120 شوال...

ـ وهسع قاعد يجيب كم؟؟

ـ مرات خمستاشر ومرات عشرين!!!

ـ نان السبب شنو يا خالتي؟؟

ـ يا ولدي مِي الجاز بقى غااااااالي... ومافِي قُدُرةً عليهو... وكمان الطلب ما حدَّثتك بيهو... بقى بالشي الفلاني...

ـ قال ليها نان يا خالتي الجاز دا زمان دحِين ما كان قاعد يجيكُن بالتناكِر قدّاااااام بيتكُن دا؟؟؟

ـ قال ليهو بالحيل يا ولدي...

ـ أها هنا بادرها بالسؤال الخلاها تطلق الجماعة لا جنا الجنا... نان هسع مالُو بقى ما قاعد يجكُن وبقى غالي؟؟؟!!! وأدَّى تمُرْكُن العطش ؟؟؟

ـ يا ولدي دي مي حكومة السجم دي!!!... أها هنا إستغل كلمة السجم دي... وسجم المؤتمر الوطني من راسها لا جنا الجنا!!! وقال ليها عليك الله يا خالتي تتذكري زمان التموين يجيكُن في الدكان... والجاز قدام بيوتكُن... والمدارس هسع عليك الله قاعدة تدفعي لي بناتك في الزومة كم كل شهر؟؟؟!!! شوفي زمان كانت مجان...

فما كان من الخالة زينب إلا التحَسُّر على أيام زمان الجميلة وتدعُو الله يزوِّل ديل من فوقها ويعيد ليها ذلك الزمن الجميل...

الناس ديل يا عزيزي سيف ماكْلِين أهلنا الطيبين أعلام بس!!!

نسأل الله يولي من يصلح...

قواسيب مودتي...


أبو الحُسين...

Quote: والبطاقة دي تدخلكم المستشفى بالمجان وتسهلكُن أي شي عاوزنو!!

الشي ياود الحسين حجاب هي ولا بطاقة؟؟؟؟؟؟

انشاء الله يكون تسجيل ساكت وما يكون بقبضوا الكوتات بتاعاتهم!
جنى

Quote: الشي ياود الحسين حجاب هي ولا بطاقة؟؟؟؟؟؟

مي ياهُو الشي القَالُو ليهم يا ابراهيم يا اخوي!!!

أغرب ما سمعته قبل قليل في (الجزيرة)

دكتور نافع علي نافع في مؤتمره الصحفي يقول :


الحركة الشعبية ....عندها حق يا جماعة تكون ما عايزة انتخابات

لأنو ماعندها ...(ولا واحد يؤيدها في الجنوب فضلا عن بقية أجزاء السودان

الا تحت ارغام السلاح).....نعم قالها كذلك أى والله ...قالها كذلك (ولا واحد)

وطبعا الكثيرون منكم حا يكونوا سمعوا هذا الكلام

فهل يعقل أن يكون هذا قائدا لحزب يدعو لمكارم الأخلاق التي يدعو لها (الاسلام)!

مكارم الأخلاق التي تبدأ وتنتهي (بالصدق)!

سلامات ياسيف ... كيفكم جميعا ...

الاخوان كيف - هل فيهم مؤتمر وطنى ?


انا قابلت واحد منهم في بالتيمور - بعد اكتر من عقد من الزمان - في نهاية اللقاء سألته ياخي انت قلبت ولا شنو الحكاية :)


العوض دا من عندنا - بالاضافه لماذكرتم

القواسم المشتركه متاحة دوما في الجانب الا جتماعي ... بقليل من البحث

دكتور سيف النصر سلامات وتحايا نواضر للوالدة الكريمة وكل أمهاتنا الشايلات حمل الوطن
متى ستنهض أحزابنا السياسية من ثباتها العميق وتقف حائط صد لمثل هذه الممارسات التكويشية لمؤتمر الجن دا

وبالحساب دا يا سيف قال د. كمال عبيد أن عضويتهم بلغت أكثر من خمسة مليون وثمانمائة.. كان كدي حساباتهم مطرشقة.

..
..

البوست ده اسمو (اضبط) يا سيف


شكرا ياخي
بوست جميل

خالد العبيد
سلامات ...باقي ليك العضوية الوصلت خمسة ملايين دي اتعملت كيف....ما ياهو زي ده .

الزناتي
كيف الاحوال

Quote: بس للاسف حا يلقوا مناصب للناس دي كلها وين .... لله في خلقه شئون .

المشكلة مناصب الجن دي ذاتها مجهجهة و كل تلاتة انفار يوقعوا اتفاقبة سلام لازم ياخدوا كوتتهم منها فعلى قولك من وين يكفوا الحالمين ديل ..غايتو الحاجة زاهدة في المناصب دي .

سلامات يا بيان و شكرا على المساهمة الجميلة

Quote: وحركة كرتنة الناس دي بيجيدوها اخوات نسيبة ديل شديد ما بهمهم السن ولا الوعي ولا الفهم. تلقى اسمك مكتوب لا يدك لكراعك..

قالوا اسأل مجرب و لا تسأل طبيب .

سيف النصر
يا اخ مالك كشفت الكادر السري بتاعنا ؟

الاخ سيف النصر تحية طيبة المشكلة بسيطة

دي سمسرة من فوق لتحت تحت مسمي انو انا عملت كم نفر عضو في الموتمر الوطني الفورمات دي بتكون في نصيبك ورصيدك في العائد المادى وانك انت زول كويس وشغال للموتمر اللاوطني

دي عضوية ما حقيقية .

لكن في الموتمر اللاوطني كلوا بسرق من كلوا وبغش كلوا لمن صدقوا انهم عندهم عضوية حقيقية .

في اقرب ملف تلقاهم قاعدين في الصقيعة ما في زول جمبهم

المتمر اللاوطني الان عضويته اقل بكثير من الديمقراطية الثالثة بتعاعت الجبهة الاسلامية

الباقي دا رتوش .

الفاتح شلبي

Quote: يا سيف خليتنا نشفق على امهاتنا ... قلت لي دعوة مكتوبة لحضور اجتماع والسلام؟ الله يحفظ امهاتنا

امين يا الفاتح .

ابراهيم عنكبة
تحليلك سليم و الدليل أنو الناس المجتهدين في تصدير الاسماء لسجلات المؤتمر الوطني بما فيهم
جارتنا طيبة الذكر هم محترفين في مثل هذه الاعمال و عمل معظمهم مع الاتحاد الاشتراكي زمان
و مع من يدفع اكثر ايام الاحزاب. المسألة هي تماما كما وصفتها انت

Quote: ببزنسة العمل السياسي

يا سيف شكرا على هذا البوست
وهنا المزيد من الاساليب الفاسده

السنه الماضيه اعلنت معتمديه امدرمان عن كورس كومبيوتر (مجان) لرفع قدرات الشباب والشابات فى منطقة العباسيه والعرضه. لحدى هنا كل شئ تمام.
عند ذهاب البعض للتسجيل فى الكورس (المجان) تفاجاوا بان المطلوب منهم بالاضافه الى تعبئة استمارة الالتحاق بالكورس ان هناك استمارة اخرى، وهى استماره عضوية للمؤتمر الوطنى.
امتنع البعض ورفضوا التسجيل فى الكورس، بنت اختى شكلها (برجماتيه خالص) ملات الاستماره اكملت الكورس واستلمت الشهادة وجدعت البطاقه فى الزباله (بطاقة المؤتمر الوطنى).

توقعت أن يقول أحدكم
الناس دي بتشتغل وبقوة، وجادة جداً في الفوز بالانتخابات

والجماعة ديك نايمييييييييييين في العسل
والكويس فيهم شغال من الكيبورد ده تزوير وأوكامبو قال ولبنى سافرت والبشير ما سافر و....و....

للمعلومية التسجيل بدأ
تحياتي

هههههههههههههههههههه

بضحك اتذكرت ..امي الله يطراها بالخير .....

عارف عندناناس في احد المناطق وهم مجموعة واحد ..لقيت عندهم البطاقات ..قلت ليهم دي جاتكم كيف ..؟؟

ضحك احدهم وافادني بان احد الاخوان اداهم الاستمارات وطلب منهم على كل استمارة 20 ريال ..كلهم

متخيلين انو الزول محتاج لي مساعدة واعتبروها مساعدة منهم ...ليس الا ..

صلاح الامين..مشتاقين

Quote: تتدكر لماانا قلت لياسر عرمان يا اخي امي سافرت خليتا كويسة جيت لقيتا بقت حركة شعبية .

بقت حركة شعبية باقتناعها لكن ممكن تلقى نفسها مؤتمر وطني غصبا عنها..و شوفة عينك
التسجيل و الانتخابات الجايات ديل الخم حيكون بالجملة و المشكلة انو ناس الشفيع وراق
ديل يقولوا ليك المؤتمر شغال بقوة و بقية الاحزاب قاعدة ساكت يعني التلفيق ده بيعتبروه
شغل و بقوة كمان!!

مجدي عبد الرحيم فضل
شكرا على المرور و المشاركة و يا ابو قصي الجايي من اقصى اليسار لاقصى اليمين
اكيد بوصلتو ضربت في السكة..بعدين حكاية يسار سبدرات دي و انو كان سياسي بارز
و قيادي شيوعي اظنها من باب اضفاء ميزات شخصية على الرجل حتى و إن شاب ذلك
الكثير من المبالغة.

ابو الحسين..سلامات
و مشكور على المشاركة اللطيفة

Quote: قال لي بكل بساطة حولت إتجاهها مية وتمانين درجة من جبهجية لي إتحادية زي ما كانت

زي قريبك ده مطلوب بشدة اليومين ديل يا ابو الحسين .