Post: #1
Title: ما أرخص معدنه
Author: منتصرمحمد زكى
Date: 11-07-2009, 12:58 PM
ما أرخص معدنه
جمعت بيننا دروب الغربة .. تقاسمنا الحلوة والمرة في ذلك الحي الشعبي العريق بمدينة حلب السورية ( حي البستان ) .. وكان نصيبنا من الأيام المرة أكبر مما كنا نتصور .. تحملنا سويا شظف العيش وضنك الحال .. قلة الزاد وقلة الأخوان .. توقف الدعم الذي كان يأتينا من دول النفط عبر الأهل والأقارب .. تقطعت بنا السبل فهمنا على وجوهنا .. غرباء .. متشردان في مدينة لا ترحم .. ضحايا غربة وجحود أهل .. عملنا في مجال البناء كعمال يومية .. جمعنا بعض المال .. عندها وقفنا عند مفترق طرق .. اختار رفيق الغربة الرحيل شرقا صوب أوروبا .. ويممت وجهي صوب الوطن .. وأنقطعت الأخبار بيننا .. ولكن كما تقول كلمات الأغنية ( مصيرو الحي يلاقي ) .. التقيته قبل أيام في شارع الحرية .. ترجل من عربة فارهة ترافقه حسناء أظنها زوجته .. ترتسم على محياها تلك الابتسامة العبيطة الممزوجة بحياء بنت القرية .. ناديته بلقبه القديم ( حريقة ) .. نظر تجاهي باستغراب .. توقعت ان يفلت يد الحسناء ذات الابتسامة العبيطة .. ويهرول نحوي ليتلقاني بالأحضان .. لكنه ولدهشتي الشديدة لم يفعل .. صحت فيه : الم تعرفني ؟ أجابني ببرود لا تنقصه الوقاحة : معليش يا خونا يخلق من الشبه أربعين .. وأختفى هو والحسناء داخل احدى المحال التجارية .. يا الهي أنكرني ذلك المأفون الوضيع .. تغابى فيني العرفة .. ذلك آخر شئ كنت أتصوره منه .. نسي الملح والملاح .. وأيام الغربة العصيبة .. نسي كل ذلك .. يا له من مسكين .. ما أرخص معدنه .
|
Post: #2
Title: Re: ما أرخص معدنه
Author: tmbis
Date: 11-07-2009, 02:19 PM
Parent: #1
والله ما تستاهل يا منتصر ..
|
Post: #3
Title: Re: ما أرخص معدنه
Author: مريم عبد الله
Date: 11-07-2009, 02:26 PM
Parent: #2
الاخ منتصر
موقف بالجد صعب لكن تحمد ربنا انه وقف على كدا ما تهتم لانه تنكر للعشرة البيعيش ياما يشوف
بس تحمد ربنا انه اتكشف ليك تخيل لو كان سلم عليك وما نكرك وفي نفس الوقت قلبه ما كان صافي ليك
اتهيا لي انو تعرف منو صحبك واخوك الحقيقي دي الاهم لانك كنتا ح تعده اخو وهو عكس ذلك
وزي ما بيقولوا نص المصيبه ولا المصيبه الكامله ما مشكله يا اخوي كل واحد بيعكس معدنه
ربنا يعوض عليك في العشرة والخوة والدنيا امامك وما بتقيف عند زول
|
Post: #6
Title: Re: ما أرخص معدنه
Author: منتصرمحمد زكى
Date: 11-07-2009, 02:37 PM
Parent: #3
مريم ياخ شاكر مرورك وكلماتك الطيبة
أتفق معك فيما ذهبت اليه .. فقط ألمني كثيرا ان يتنكر لك
صديق غربة ورفيق محنة بتلك الطريق الفظة ................
صادق الود
|
Post: #4
Title: Re: ما أرخص معدنه
Author: داليا الكباشى
Date: 11-07-2009, 02:27 PM
Parent: #2
الجاتك في (معدنك) سامحتك ..!!
|
Post: #7
Title: Re: ما أرخص معدنه
Author: منتصرمحمد زكى
Date: 11-07-2009, 02:42 PM
Parent: #4
شكرا داليا على المواساة
رغم أنها لم تسامحني فقد تركت فيني جرحا غائرا ........
صادق الود
|
Post: #8
Title: Re: ما أرخص معدنه
Author: heba Elmahi
Date: 11-07-2009, 02:43 PM
Parent: #4
| Quote: والله ما تستاهل يا منتصر |
موقف مشابه حصل مع خالي قبل فترة من الزمن ، حيث ساقت الظروف أحد
الشباب الي العيش في بيت جدنا فترة طويلة من الزمن تقريبا" زي تلاتة
سنوات أو اكتر شوية و كانت سنوات دراسته للثانوي علي ما أذكر ..
و كانوا مستضيفنه بسلام و امان كأنه واحد من الاسرة ، عدًت سنوات دراسته
بي حلوها و مرها و إنتقل الي الجامعة و بعد عدة شهور كان يتواصل فيها مع الاسرة
إنقطعت أخباره و إنقطع التواصل .. بعدة فترة من الزمن سنتين أو تلاتة
قابله واحد من خيلاني في شارع النيل و جاءه مصافحا" و بالاحضان و إذا به الشاب
يتراجع للوراء و كأنه لم يتعرف علي خالي ! و فادحة الامر لما الخال سأله ما عرفتني
ولا شنو ؟ رد عليه ايوااا انت Something قسم السيد ؟ و مد يده للسلام بكل برود !
قادر تتخيل معاي إنه البشرية دي بقت ناكرة للمعروف قدر شنو ؟
تحياتي يا برلوم و بدايات قوية .. واصل
|
Post: #10
Title: Re: ما أرخص معدنه
Author: منتصرمحمد زكى
Date: 11-07-2009, 03:01 PM
Parent: #8
شكر سنير هبة
كلها كم مشاركة وكم رد والكتوف تتلاحق .. صبرك بس
للأسف كلما أوغل الزمان قدما تدنى معدن الانسان وعلقت به الكثير من الشوائب ............
صادق الود
|
Post: #5
Title: Re: ما أرخص معدنه
Author: منتصرمحمد زكى
Date: 11-07-2009, 02:31 PM
Parent: #2
شاكر مرورك تمبس .. رغم اقتضابه وغموضه .........
صادق الود
|
Post: #9
Title: Re: ما أرخص معدنه
Author: tmbis
Date: 11-07-2009, 02:52 PM
Parent: #5
| Quote: شاكر مرورك تمبس .. رغم اقتضابه وغموضه ......... |
.. ما اقتضابه وغمضوه ولا حاجة يا منتصر .. وأنا بقرا في كلامك بعدما انتهيت قعدته اضحك .. لمعدل حساسيتك العالية جدا تجاه صاحبك دا ..
ياخوي عاين ..
لو كان صاحبك دا رطب وقروشو كترت لي اي سبب من الأسباب وقام اتعامل معاك من منطلق إنو الآن ما بتهمو .. فدا مؤشر كويس .. لعدة اسباب أول حاجة إنت ما عايز منو حاجة صاح ؟؟ ما عايز منو غير إنو عاد ليك ذكرى تفاصيل قديمة وتجربة مرت في تاريخ حياتك ..
يللا عندنا درجات احساس عالية ومتفاوته للتعامل في المسالة دي وهي سودانية خااالص .. حساسيتنا عالية تجاه اي حاجة .. أنا القدامك دا قبل كم يوم كنت بتكلم في نقطة الحساسية دي مع زول صاحبي .. قام سلم ليهو على سوداني لاقيناو في الطريق وداك رد ليهو بي برود وحيل ميت زي التقول عايز يشيل منو حاجة صاحبي اتضايق وانفعل وحلف ولو فكيتو كان زي حالتك دي ماشي يدي الزول دا محاضرة عن الاخلاق وعن رد السلام بصورة أجمل .. لكن قلت ليهو انساهو .. ح يضيف ليك شنو ..؟ إنت عملت العليك .. وهو طلع زول لووح ..
موقفك دا ذكرني انا زمان .. كان لما اسلم على زول اي زول وما يرد لي بالطريقة البحلم بيها .. بحلف ستين يمين تاني ما اسلم علي اي زول .. غيرت الاستايل حقي .. بقيت اسلم على الهنود والباكستان .. يللا ديل الله لا وراك والله باردين برووود .. اها يللا ديل اتعلمت فيهم القوة بتاعت اعادة صياغة الحساسية العالية .. حسع بقيت عااادي بس مشكلتي بضحك لما اللقى لي زول متأزم من فكرة مشابهة
|
Post: #11
Title: Re: ما أرخص معدنه
Author: منتصرمحمد زكى
Date: 11-07-2009, 03:19 PM
Parent: #9
شكرا تمبس على التوضيح
أتفق معك أننا نعاني من مشكلة الحساسية الزائدة والتي للأسف الشديد
ألقت بظلالها على الكثير من جوانب حياتنا السياسية والاجتماعية ... الخ
ولكن صدقني هنالك مواقف لا يمكن تجاوزها من واقع تجارب معاشة ومرارات لا يحسها الا من عايشها
فنحن بشر من لحم ودم ومجموعة احاسيس تهزنا بعض المواقف اللا انسانية مهما حاولنا تجاهلها والتقليل
من ردة فعلها ......................
صادق الود
|
Post: #12
Title: Re: ما أرخص معدنه
Author: منتصرمحمد زكى
Date: 11-11-2009, 09:10 PM
Parent: #11
.................
|
Post: #13
Title: Re: ما أرخص معدنه
Author: Ahmed Osman
Date: 11-12-2009, 03:08 AM
Parent: #12
الاخ المنتصر سلام
| Quote: .................جمعت بيننا دروب الغربة .. تقاسمنا الحلوة والمرة في ذلك الحي الشعبي العريق بمدينة حلب السورية ( حي البستان ) .. وكان نصيبنا من الأيام المرة أكبر مما كنا نتصور .. تحملنا سويا شظف العيش وضنك الحال .. قلة الزاد وقلة الأخوان .. توقف الدعم الذي كان يأتينا من دول النفط عبر الأهل والأقارب .. تقطعت بنا السبل فهمنا على وجوهنا .. غرباء .. متشردان في مدينة لا ترحم .. ضحايا غربة وجحود أهل .. عملنا في مجال البناء كعمال يومية .. جمعنا بعض المال .. |
..
يا اخى الزول العاش معاك التفاصيل دى - وما خزلك اكيد بكون زول كويس
والتصرف الحصل منه دة رغم غرابته بكون اكيد ليه اسباب احتمال معقولة
والناس اسرار
عموما اساب زعلك مبررة حتى تعرف السبب
يمكن كان داير يجنبك بعض الاذى كان قد يصيبك حالة تواجدك معه تلك اللحظة
وارد
وشكرا
|
Post: #14
Title: Re: ما أرخص معدنه
Author: منتصرمحمد زكى
Date: 11-12-2009, 12:33 PM
Parent: #13
الأخ
احمد عثمان
ياخ شاكر لك مرورك
اما بخصوص المبرر الذي ذكرته .. أقول لك أنه وارد رغم غرابته
الزمن ده كلو شئ وارد .....................
صادق الود
|
Post: #15
Title: Re: ما أرخص معدنه
Author: Abureesh
Date: 11-12-2009, 01:17 PM
Parent: #14
سلام يا منتصـر،
أولا نصيحة اخوية، كن عاذرا.. وطبيعة الإنسان معقدة بصورة لا تتخيلها.. بعدين ياخ زول عاش فى اوروبا
وربما درس طب هناك، ومعاه سيدة ربما حرمه، فهل من المعقول تناديه بألقاب زمن العذابة؟ أعتقد
لو ناديته بإسمه ربما كان رد الفعل أفضل.. وانت عارف معظم السودانيين الواحد (سايق) زوجته معاه
كأنه شايل بنقو... ما يدى أى أقوال.
بعدين هو عايش فى اوروبا وضاربو الهوا، وأنت تصارع الكتاحة عشان تشوف الشارع لمن عيونك بقن زى
عيون اّفو فى الصين، فهل برضو ما فى إحتمال فعلا شك، خصوصا البلد قالوا ملانة سماسرة عربات.
بعد دا كلو، لو إتأكدت أنو هو هو، وقاصد بدون اى سبب، فبالراحـة طلع الورقة المطبقة من جيبك،
وأنزل تحت اللستـة لحد السطر الفيه إسـم الزول دا وأشطبو... ولا حتى تكتب هنا وتحرق اعصابك
فى الفاضى.. دى طريقتى!
|
Post: #16
Title: Re: ما أرخص معدنه
Author: منتصرمحمد زكى
Date: 11-12-2009, 02:57 PM
Parent: #15
العزيز
أبو ريش
شاكر مداخلتك الرائعة لاحتواءها على الكثير من المنطق
لكن صدقني ما كان بامكاني ان أناديه سوى بلقبه القديم
فقد قفز اللقب الى لساني دون اي تفكير .. ربما هي طبيعة فينا كسودانيين
لاسيما ان اللقب ليس فيه ما يشينه وكان يتقبله من كل من يعرفه داخل السودان
لن أشطبه من اللستة حتى أعرف منه سبب تصرفه الفظ مهما كلفني ذلك من عناء ................
صادق الود
|
Post: #17
Title: Re: ما أرخص معدنه
Author: صلاح عباس فقير
Date: 11-12-2009, 03:20 PM
Parent: #16
| Quote: توقعت ان يفلت يد الحسناء ذات الابتسامة العبيطة .. ويهرول نحوي ليتلقاني بالأحضان .. لكنه ولدهشتي الشديدة لم يفعل .. صحت فيه : الم تعرفني ؟ أجابني ببرود لا تنقصه الوقاحة : معليش يا خونا يخلق من الشبه أربعين .. وأختفى هو والحسناء داخل احدى المحال التجارية .. يا الهي أنكرني ذلك المأفون الوضيع |
شكراً لك يا منتصر،
ورغم تقديري لشعورك تجاه ذلك "المأفون" كما سميته، لكن الحكاية جاتني كأنّها كوميديا أضحكتني من الأعماق!
طيب إنت متين حكمت على ابتسامتها بأنها عبيطة: قبل الموقف أو بعده؟
طيب ياخ يمكن يكون فعلاً من "الأربعين" القالوهم!
على أيّ كما قال لك أبو الريش: الإنسان كائن معقد!
وربما أنّ هذا الأخ بعد ذلك دخل في حالة من الندم وجلد الذات!
وربما أنه في نفس اللحظة كان في حالة بتاعة انسجام عاطفي شديد جداً مع زوجته، ما قدر يطلع منها بسهولة!
وعلى أي حال هو قد يستحق منك الشفقة!
|
Post: #18
Title: Re: ما أرخص معدنه
Author: منتصرمحمد زكى
Date: 11-12-2009, 03:31 PM
Parent: #17
الأخ
صلاح عباس
كيفنك ياخ
حكمت عليها قبل الموقف المخزي منه .. ولكن لم أصفها بذات الابتسامة العبيطة الا بعد الموقف
والله لا أدري أينا يستحق الشفقة .. على كل حال انا لا أعرف له عنوانا .. ربما التقيه صدفة كما حدث
في المرة الأولى .. ربما ...................
صادق الود
|
|