الى الصديق
( م. ح ) المتواجد بأستراليا
فشل تجربة عاطفية لا يعني نهاية الحياة .. ولا يعني ترك الوطن
والانزواء بعيدا .. عد لبلدك وأهلك وأصدقائك .. فالحياة قصيرة
لن تمهلك طويلا .. لتندب حظك وتتمادى في هروبك .
ماحرام تهجر ديارك
السنين تسلب نضارك
العمر يتلاشى منك
وانت في قمة ودارك
ايه حصل
شان انت ترحل
وفجأة يتبدل مسارك
السفر ماكان مناك
والهروب ماكان خيارك
ياتو غربة
وياتو هجرة
بتطفي نارك
وياتو دارا
غير ديارك
فيها تلقى
رضاك وعزك
وفيها تتملك قرارك
ليه تسافر
والبريك زي عيونو
لسه واقف في انتظارك
ليه تسافر
الضياع يصبح مصيرك
والمنافي تصير ديارك
الوطن العشت فيهو
لو سلاك أو جفاك
ياهو أمك وياهو دارك
صديقك
منتصرمحمد زكى
عطبرة - 2005