Post: #1
Title: لقد عدت الى البيت حافيا ثكلتك أمك ...
Author: منتصرمحمد زكى
Date: 11-05-2009, 06:02 PM
Parent: #0
الى
اللص الغبي .. متبلد الاحساس والشعور
اللص العوقة.. عديم الخبرة والذوق
اللص التوزة .. اب ريالة سايلة
ثكلتك أمك .. كيف سولت لك نفسك الوضيعة سرقة ( شبطي الجديد )
من داخل المسجد .. ان شاء الله يطسك قندران مافيهو فرامل .. والقندران يخش
فيهو قطر سواقو سكران .. والقطر تقع فيهو طيارة من طراز قديم .. والطيارة
يقع فيها نيزك طاشي ... عشان تبطل العوارة وسرقة الشباطة من الجامع ......
|
Post: #2
Title: Re: لقد عدت الى البيت حافيا ثكلتك أمك ...
Author: اسعد الريفى
Date: 11-05-2009, 06:11 PM
Parent: #1
الاخ منتصر
كفارة و الجاتك فى شبطك سامحتك
..
و الله اكتب لك و الدموع "بتاعت الضحك" ماليه العيون .. من العنوان و انا فهمت الحكاية ..
لك كامل التضامن ..
|
Post: #3
Title: Re: لقد عدت الى البيت حافيا ثكلتك أمك ...
Author: النصرى أمين
Date: 11-05-2009, 06:21 PM
Parent: #2
سلام منتصر
| Quote: اللص العوقة.. عديم الخبرة والذوق |
اختياره لشبطك دون الشباطة هو دليل انو ذوقكم واحد
مالم يكون شبطك كان مطرف
عاده لمن امشى الجوامع بخت الفردة الشمال تحت حيطة
والفردة اليمين تحت الحيطة التانية البعيدة
جهجه اللصوص
جهجهم بلا
|
Post: #4
Title: Re: لقد عدت الى البيت حافيا ثكلتك أمك ...
Author: منتصرمحمد زكى
Date: 11-05-2009, 08:31 PM
Parent: #3
العزيز الريفي
شاكر مرورك وكامل تضامنك .
|
Post: #5
Title: Re: لقد عدت الى البيت حافيا ثكلتك أمك ...
Author: منتصرمحمد زكى
Date: 11-05-2009, 08:39 PM
Parent: #4
عزيزي النصري
طبعا شبطي كان مطرف دي دايرة ليها ذوق
شاكر مرورك وشماتك .............
|
Post: #6
Title: Re: لقد عدت الى البيت حافيا ثكلتك أمك ...
Author: elnawrani margan
Date: 11-05-2009, 08:53 PM
اولا نضامن معاك ضد سرقة شبطك الجديد
وزى ماقال اسعد الجاتك فى شبطك سامحتك
لكن انت زاتك الفلهمة ليك شنو ماشى المسجد بشبط جديد
(التموت تخلى) مالو عيبه لى واذا ماعندك البس سفنجة كل فردة من بلد
واذا قلت لى كنت فى زيارة برضو مابحلك لانه (لازم تشيل كيس نايلون معاك فى الجيب وعند مدخل المسجد تضع الشبط الجديد فى الكيس وتخلى امامك) واذا الحرامى جاك داخل المسجد يبقى ده كلام تانى وهاك يامعركة لانه فى الحتة دى هوشيطان كبير.
طبعا الكلام نصيحة منى لانى والله مابقدر بحسب لي الجزم والشباطة والشباشب والمراكيب والسفنجات التى سٌرقت منى
شفت كيف شفت كيف
اوخوك ملدوغ كتير )
|
Post: #7
Title: Re: لقد عدت الى البيت حافيا ثكلتك أمك ...
Author: منتصرمحمد زكى
Date: 11-05-2009, 09:52 PM
Parent: #6
الملدوغ .. النوراني مرجان
شاكر مواساتك .. وسأعمل بنصيحتك
تخريمة:
فعلا كنت في زيارة تصدق
معقولة ياالنوراني وتموت تخلي ده أجيبو من وين ؟؟
|
Post: #8
Title: Re: لقد عدت الى البيت حافيا ثكلتك أمك ...
Author: elnawrani margan
Date: 11-06-2009, 04:40 AM
Parent: #7
Quote: معقولة ياالنوراني وتموت تخلي ده أجيبو من وين ؟؟
|
كيف تجيبوا من وين انت ساكن وين
لو فى الخرطون امشى السوق الشعبى قسمابالله لو يقطعوه ليك قدامك من اقرب لستك مايخلوك تمشى ساى
لو فى الااقاليم كلم ليك واحد من اهلك يكون فى الخرطوم
اصلو بينى وبينك مافى زول ماعندو اهل فى الخرطوم
وزى ماقالوا السودان كلوا اتحكر فى الخرطوم
تسلم ياعزيز
وربنا يعوضك شبشب كرت كرتونة
|
Post: #9
Title: Re: لقد عدت الى البيت حافيا ثكلتك أمك ...
Author: elnawrani margan
Date: 11-06-2009, 04:46 AM
Parent: #8
بالمناسبة
شفت البروفايل حقك لقيتك من عطبرة
بالله من وين فى عطبرة لان عطبرة عندى فيها زكريات اربع سنين من 94 الى 98 جامعة وادى النيل كلية الهندسة
عمارة عباس محمود وحى الداخلة .
وبالنسة لتموت تخلى امشى المورة ولا حية الوحدة اكيد مية المية حتلقاه.
|
Post: #10
Title: Re: لقد عدت الى البيت حافيا ثكلتك أمك ...
Author: أحمد الصديق
Date: 11-06-2009, 07:36 AM
Parent: #9
الحبيب منتصر
من كلامك دهـ الموضوع حرقك شديد
لما قربت تألف قصيدة في شبطك .
تضامن كامل الدسـم .
-------------
فقدي الليلة في الياقوت
خاتمـي الجنن البنوت
|
Post: #12
Title: Re: لقد عدت الى البيت حافيا ثكلتك أمك ...
Author: منتصرمحمد زكى
Date: 11-06-2009, 09:40 AM
Parent: #10
المتضامن كامل الدسم
احمد الصديق
ياخ شاكر لك مواساتك وتضامنك المغلظ
انا الآن بصدد كتابة قصيدة اذا أسعفني القصيد
صادق الود
|
Post: #11
Title: Re: لقد عدت الى البيت حافيا ثكلتك أمك ...
Author: منتصرمحمد زكى
Date: 11-06-2009, 09:28 AM
Parent: #9
94 - 98
عطبرة 98 لا علاقة لها بعطبرة 2009
للأسف عطبرة تغيرت في الشكل والكثير من المضمون ( جوهر الناس )
كثمن لمرحلة التوسع والا نتعاش الا قتصادي الذي تمر به ..
( الكباري الجديدة - مصانع الاسمنت - طريق بورتسودان البري )
لذلك لا وجود ل ( تموت تخلي ) لا في الموردة ولا في الوحدة .. لا سيما
ان الصين قد احتكرت التجارة في السودان ومن ضمنها بالطبع ( الأحذية )
تخريمة:
أنا من الا متداد الشرقي ويتوزع أهلنا في بقية الأحياء
وصولا الى دامر المجذوب ..............
صادق الود
|
|