( الرندوق ) مصطلحات متداوله بين الشباب ومعانيها ( توجد أمثلة ورندوق كثير ).

..
.

في كمية من المصطلحات متداوله بين الشباب, بما يسمي بألرندوق او الكلمات الشبابية المتداوله , او بما يسمي بتشفير الحديث بمصطلح شبابي قد لا بفهمه جيل ما تحت الستينات, وعشان العالمين دي ما تكون مسطحة حننزل ليها مجموعة من الكلمات ومعانيها المقصوده, يعني عشان الناس دي ما تكون مغمده ساااكت... ودايريين أنو اكبر قدر من ناس المنبر العام ديل يكونو مواكبيين للحاصل, يعني لو في شباب قاعدين يتونسو معاكم و سمعتو كلمة ( شفير ليهو ) تأكدوا انو الشباب ديل دايرين يستغبوكم في الحديث و تأكدوا أنهم دايرين يجيبو مصطلحات وكلمات لا يفهما الا هم.

لذا يا أحباب دايريين نخليكم مواكبيين و مفتحيين... والعندو شفره جديده او كلمة جديده يختها لينا هنا, عشان أعمامكم ينقشو الحاصل شنو.

وانشاء الله يعجبكم.
...







ء

اول شي و دي موديل 2009

** يقول ليك ما تعمل لي ( شرحبيل ) ومعناها اذا واعدت انسان وما جاك في التايم و الموعد بتاعك, في الحاله دي طوالي تقول الزول دا عمل لي شرحبيل وشتت ما جاااني تاني.

** ممكن تقول الزول دا عمل ( تلللل ) أو ( زوغ بير ).

حقيقة موضوع جدير بالاهتمام والمتابعة
بالرغم من انو اتناولوه كتير هنا لكن مالو نشوف العندكم
وشكرا مرة تانية للاخ الذي ..........





___
الليلقو غلطات املائية دامو احمد بشير آقمو

Quote: الليلقو غلطات املائية دامو احمد بشير آقمو

التقيل جاااي يا عمك.

بعدين انت داير تعمل لي جيك بالرطانه البتكتبها دي ولا شنو...

يا عمك انا يا هو زاتوو, وخليك متوقع كمان انو حأغلط في الاملاء قريب.





_______
الكلام المقتبس من عمكم دا ما رندو ولا أي حاجة...
الرندوق جاااااي.

Quote: الكلام المقتبس من عمكم دا ما رندو ولا أي حاجة... الرندوق جاااااي.

___
ما تشتغل بكلامي واصل متابعك والله

ودي موديل 2009
( سطالايت ) أو ( راكب فيل ) لانو الفيل بيتطوطح شمال ويمين لمن يكون ماشي : دي بيقولوها لي زول سكران أو ملطط او الطاشم أو ولفظ ( السطلايت ) دا للمسطول بي صوره أصح.
.
.
يقول ليك...
الزول دا ياخي جلينا منو دا.. ( هواء قااايم ): يعني مفلس ومقحط وماعندو ابو النوم.
.
.
يقول ليك برضوا...
الحاجة دي ديش حجر عديل و دسيسة.. وكاسرة فيني ضلع... وقاطعة للديش ( الكلام دا كلو بيقال للبنت الحلوه اللي في بالك سواء أن كانت في حلتكم او الجامعة او شغاله جمبكم )

( الشفت )
( المفتح )
( المقديدا )
ودي بيقولوها للزول البيعرف اي شي , يعني زي زي ناذر الخليفة مشاء الله بيعرف أي شي, غني و صحافة و كمبيوتر و عزف علي ألالات الموسيقي... يعني يستحق لقب سيد ( الشي زاتا ) بي كل جداره.

أما لفظ ( الكــبسور ) حقيقي اول مره أسمع بيهو وفي المنبر دا بالتحديد والظاهر انو كان لفظ قديم من زمن الستينات وعمكم ود الصايم دا نشرو ليكم في الفتره الاخيره... الان لفظ الكبسور قاعد يلقي رواج كبير في الشارع العام بفضل المنبر.

ويقول ليك الزول دا
( عشاوائي ) وبتاع ( دخاخين ) ساااكت ودي بي نفس معني كلمة كبسور تماما..

وديل قدام شوية من سنة 2004
( الككو, الديشين, او الــعرص ) ودي بيقولوها للزول الشين وليس الزوله, يعني ما ممكن تصف البنت بالشفرات و المصطلحات ديييك.

** أما ( الدامه ) او( الحاجة ) او( القٍيطعة ) وكل السابق يعني ( لفظ البت ),,, والبنت الغير جميله لديها مصطلحات خاصة بين جماعة الرندوق سننشرها فيما بعد.

( المسطح الفارة الطيرة الدريع الما ناقش الكيسو فاضي ) دي للزول الما بيفهم اي شي.

ديل قدام خااالص احتمال من التسعينات....
ركب ماسوره ركبه التونسية دقستا يا حبه : يعني اتغشي او اتخدع في أمر ما مثلا اشتري قطعة أرض من السماسره ولقاها مبيوعه لمغترب من ناس المنبر ديل... أو أشتري ( حديده ) بمعني عربة ولقا المكينة بتاعتها ( مخستكة ) بمعني منتهية
.
.
( الربة )أو ( الطربانه ) بمعني الحفلة, يقول ليك الطربانه بتاعت ناس صديق الموج الليلة حتكون ( راااابه للطيش ) لانو جايبين الفنانة ( زبيده الانقــاذ ).

زبيده الانقاذ دي فنانه يا د. مصطفي محمود
, عشان ما تفهمني غلط.

( الانقاذ ) دي بتعني حي من أحياء الخرطوم التعيسه جدا والغير صالحة للعيش الكريم بأفعال جماعة الكيزان و المنافقين لعنهم الله

الباقي كتيير ونخليهو لي بكره... عشان ما نكوب الشغلة دي كلها هنا مره واحده... ونترك الفرصة لي بورداب أمريكا اولاد العز ديل, أظــن الواطه عندهم صباح ناس أمريكا ديل , نحنا خلاص النوم عندنا وجوب.

و أنشاء الله نلقي منكم بعض المصطلحات الرندوقية القديمة أو الجديده..

وأترككم في أمان الله.


****

نجاة أم باروكة ( عربية شرطة النجدة)

فرده تطلق للصديق

الجلك والجلكينه بضم الجيم للوالد والوالده

دقس واتلحس يعني راح شمار في مرقه

شتات خالي محطات يعني مشي طوالي


الشرتيت معناها النقود


وناتيكم بالمزيد

قاموس الرنوك ولغة قاع المدينة


شوف البوست الفوق دة مكتوب من متين
بعدين شنو شابكنا شرحبيل موديل 2009
إنت قايل في راسنا دة في قنابير
شرحبيل دي من زمن ناس وهبة لابسين الرِّدة

Quote: فرده تطلق للصديق الجلك والجلكينه بضم الجيم للوالد والوالده دقس واتلحس يعني راح شمار في مرق شتات خالي محطات يعني مشي طوالي الشرتيت معناها النقود وناتيكم بالمزيد

هويدا شرف الدين النجيضة زي ما بيقولو هنا في المنبر

شكر علي الاضافة الرائعة, وسعد جدا بأضافة القيمة,,

ونعشم في المذيد اذا تكرمتي.

الأخ أحمد ..
لغة الشباب موجودة من أجيال سبقتنا واستمرت مع أجيال جات بعدنا، وهي متطوّرة ومتجددة.
أتفق معاك في أهمية مواكبة هذه المسطلحات، وشخصياً فاتني كتير متابعة هذه اللغة، وبقى عادي الشباب (بسطّحوا) بينا، عشان كده أتمنى الإستفادة منها، بس عندي ملاحظة صغيرة:
إنت أوردت عدد من المسطلحات، لكن بعضها من المسطلحات القديمة واللي إستعملناها من زمان مثل:
الربة - الدامه - زوغ بير - شرحبيل، دي مسطلحات أجيال قبل جيل اليوم.

تحياتي ... ومتابع.

سلام يا الشفت

( جبت الرساجات يا رفدة )

معناها جبت السجاير يا صديق

* واحد شاف بت حلتهم طالعة مشوار قال عاوز أنتظرها في المحطة بعد ما تجي راجعة عشان أدق معاها الحنك أها البت أتأخرت شديد قال
( الجاحة دي عملت بيبيتو هناك ولا شنو )

يا عمك الفردة مشى يعمل بولندا

بولنا يعني ماشي يبول

Quote: يا عمك الفردة مشى يعمل بولندا بولندا يعني ماشي يبول

ود باء يا معلم
أخبارك,,

بولندا دي سبقتني فيها يا قريبي.

** المهم مدنا بالجديد يا زول
وانت ساكن في امدرمان
في محل الرندوق زاتووو زي ما بيقولو

Quote: ( جبت الرساجات يا رفدة ) معناها جبت السجاير يا صديق * واحد شاف بت حلتهم طالعة مشوار قال عاوز أنتظرها في المحطة بعد ما تجي راجعة عشان أدق معاها الحنك أها البت أتأخرت شديد قال ( الجاحة دي عملت بيبيتو هناك ولا شنو )

اللخوا حسن مضوي,,,
سلام يا أصلي,,,,

يالا يا حجاج وجلاكيم و أعمام خليكم مفتحيين
أخوكم حسن مضوي كشف ليكم الشفر بتاع السجائر
عشان الوليدات البيدخنو و يسجروا ديل ما يدقسوكم



يا ماااان الف شكر علي المشارك القيمة,,,
راجنك يا حبة ..
انت الظاهر عليك قانيش الحنك الدقاق دقاق دا.

الاستاذ محمد أبوالعزائم أبوالريش

كيف يا ابو الريش,,

ما عندك أي قشة مره يا ود ابو العزايم,,
الجديد جاي,, الشباب وعدونا بالكتير,,

شاكر لك مرورك الكريم..
وراجنك بالشفرات والمصطلحات القديمة

الاخ مهند أشكرك علي المرور...

وألف شكر لاضافة الجديده.
أم باروكة أو التلاتة تسعات دي عجبتني شديد.

لو قال لك أحدهم وهو يشير لطالبة تتبختر في مشيها : ( شوف سلوى دي بتاعت عدسات كيف ) ، لا تذهب بعيداً وتظن إن ( عيون سلوى ) أو عدساتها لها علاقة بالجمال والسماحة ، فإن ظننت ذلك سيلاحقونك بالضحكات والإستهزاء فالعبارة المذكورة تعني في قاموس الشباب هذه الأيام أن سلوى تبدل حبيباً بآخر كل ( يوم والتاني ) .. أما إذا وصفك بأنك زول ( فيسبا ) – ماركة دراجة بخارية – فلا تغضب ، فهو يعني أنك لا تعود في كلمتك للوراء تماماً مثل ( موتر الفيسبا ) .. إستماع مشوب بالحذر حيال جلسات تجمع بين شباب في ربيع العمر وآخرين يكبرونهم فكل كلمة ترد من أفواهم تحتمل أكثر من معنى ، وأن كنت في وجهة المعني الخطأ فسينعتونك بكلمات تقلل من شخصيتك دون أن تدري كما قالوا لأحدهم يوماً ، ( يا زول إنت ساكن في جذمتك ) .. والمسكين دون أن يدري غرق في إبتسامة عريضة لأنه ظن أن حذائه جميل كما وصفه الشباب ، وغادر دون أن يعلم انهم قالوا عنه : ( الزول ده حايم طول اليوم تقول ساكن في جزمتو ) ، أبناء الدفعة فقط هم من يفهمون لغة بعضهم في نهارات الخرطوم ، وربما فارق عمري لا يزيد عن عام بينك وبين من يجالسونك في أحدى الجامعات السودانية ، يوازي مئات الكلمات التي لن يفهمها أحد سواهم لدرجة انك تشعر بالعزلة لجهلك بالقاموس الجديد ومعاني مفرداته ، القاموس الخاص بالشباب في السودان واغلبهن من طلاب الجامعات – لم يغادر اية مفردة يومية دون ان يضع لها مقابلاً يستخدمه مع الاصدقاء بدءا بالعلاقات العاطفية وانتهاء بالفنون والسياسية ، فالقاموس العاطفي في حياة الشباب يحتشد بعبارات متجددة ومتمددة لا يفهمها سواهم ، فمثلا هم يطلقون مفردة ( الطيارة ) على من لا حبيبة له وان كانت الحبيبة تشعر بالخجل يطلقون ( خوجلي عثمان ) ولوصف عدم الوفاء بموعد مضروب بين الحبيين يقولون عن المشرور : ( شرحبيل أحمد ) .
و أزياء الفتيات ايضا تحظى بكلمات من القاموس الخاص وتتداخل فيه روح الدعابة بالموقف السياسية كما يتم في بعض الحالات توظيف اسماء رموز سياسية في قاموس اللغة البديلة ، كحالة اطلاق اسم السياسي الجنوبي المعروف لاقو ، ليستخدم أسمه مقابل مفردة المجازفة كأن تقول : ( شوف الزول ده عمل جوزيف لاقو كيف وقطع الزلط ) ، ويتبدى تأثير الموقف السياسي للشباب والطلاب في منتوج لغتهم الخاصة في حالات عديدة من بينها إطلاقهم مفردة ( غواصة ) و ( رادار ) على من يشكون في حقيقته

اخونا المُقرْررم
عامر باضاوي

الف شكر علي الاضافة القيمة
واوعك تعمل نوال الزغبي:
معناها ماتكوب الزوغه.

وجيب لي اعمامك المفيد.

Quote: عامر باضاوي الف شكر علي الاضافة القيمة واوعك تعمل نوال الزغبي: معناها ماتكوب الزوغه.

شكرا يا الحبيب
لا الزغببي
ولا
طه حسين

يا جوك

الزول دا ركب التونسية

اها يا جلك

عندي (حمراء من الشرتيت)

يعني خمسة جنيهات من المبلغ

عمل معاي (سباق القوافي) لكن هي عملت ليهو (الفاتح عوض) يعني حاول ينافسوا في الحبيبه بس هي (فتحت ليهو) يعني ما اشتغلت بيهو


فلان دا (داقي جرس) يعني بنق حول الموضوع


البت دي (ناجحه عربي) يعني رجلينها سمحات