النجمة أم ضنب- قصيدة هجائية رائعة لاتفوت الهلالاب

وصلتني هذه القصيدة من زميلي وصديقي محمد أحمد لبن من بنك الجزيرة في جدة له حق النشر وناقل الهجاء ليس بهاجي


النجمة ام ضنيب

شعر/د.عبدالرحمن ابوعثمان



النجمة ام ضنب فاضحانة في كل حتة
ملطشة الفرق ان كان نمور كان قطة
في دو ري العرب بالسبعه ماهن ستة
وفي سيكافة فصلو رويسها من الجتة
*******
النجمة ام ضنيب مشوارها كلو هزيمة
ملطشة الرجال في الصف مطيشة ديمة
يوم ساكواها سواها التقول بن زيمة
خلي العرضة مرتاعة وحزينة اليمة
*******
في ام درمان خبر موثوق دقيقة وثانية
يوم امبيلي جاب قون في الدقيقة الثانية
تموها المغاربة ,في العرضة مافي المانيا
وفي اسبوع رباعتين بتبقي تمانية
*******
بقت العقدة عاصمة الحديد والنار
امل العطبراوي للرقاب بتار
فضيحتكم مع العربان كبار وصغار
يوم شلتوها بالايدين وبالتحكيم حساب وكوار
*******
في الشرق الحبيب بركة البخلف الكي
ناس احمد سعد عوسهم نجيض مو ني
شالوها التلات نقاط وزادو الري
وخلو وصيفنا يتحسر ويقول ووب حي
*******
ها ناس نسيتو الموقعة المشهورة
يوم سيد البلد درس وصيفنا الكورة
تلاتة اهداف تمام مرسومة بالسبورة
تاشيرة الخروج يوم جمعتن محضورة
*******
قايد الفرقة جاتو الكورة من امبلي
يوم عمر البخيت ختاها فوق بالملي
ناس ايفوسا تنشينم تمام ما بجلي
صغرتونا في الاردن لعبتو البلي
*******
سا سادومبا جاتو الكورة لعب الباص
لي ايفوسه الخير مرعب الحراس
ديمبا الباري ختة الكورة فوق بالراس
وكان دي الحالة ماظنيت تشوفو الكاس
******
هلال العز منور في المحافل زينة
ومن مازمبي حالف ما بتبيتلو غبينة
استعجلتو بالفرحة وعملتو الشينة
وضبناه في الكنغو وعدلنا مشينا
********
وزعتو الورود في فرحة ماليكم
طلعتو مسيرة تقول مازمبي لاعب ليكم
وكت سادومبا جاب القون يمين اتنططت عينيكم
ميزناه في داره.. وحارات التلاتة عليكم
*******

فضائحكم كتار كل يوم تطل متبعة
فرقتكم موسمة بي شنات الطبعة
في الاردن فضحتونا واخدتو السبعة
تسافرو وترجعو لا وليد كديس لا ضبعة
******
يوم النجمة قامت نظمت سيكافا
ما خلوها فرحت قصو ليها اطرافها
طوعتو النظام بكل بدعة خرافة
مقامك ياام ضنيب محل ما تمشي حدو وصافة
*******
سيكافة البقت نفخة وكضب واعلان
ماخشاها جمهور وان كان بقت مجان
التكسي البكربج زولنا في ام درمان
طار بيه الكويس وخلي الوصيف حيران
*******
ناقصكم كتير .. مافيصل الراكوبة
ناقصكم هجوم صاحي وبقلب الهوبة
ماوارغو وكلتشي اب صفقة مضروبة
******

ناقصكم دفاع ماريتشارد الحبوبة
ماالدومة وعيالا همتم مغلوبة
سفاري الليه عاملين حوبة
شيخ امبيلي قالو الليلة قول التوبة

******
هجومكم في المحافل ديمة صايم صوم
دفاعكم بي حراسة المرمي نايم نوم
وسطكم حالو مامفهوم
وكل هزيمة تدريبكم بشيل اللوم
وكان فتشتو لي علة نجيمة الشوم
مواسيرن تصرف مطرة الخرطوم

ابو عثمان

هجاء الهلال لا يفوتكم يا مريخاب