الجــــنوبيين الــجـــدد مواطنين درجه أولى أم درجه تانيه !

طبعا بعد ما يتم أستقلال جنوب السودان الحالي في الأستفتاء المقرر في 2011 ( ربما قبل ذلك بناء على رغبه و أفعال جداد الخلا ) , فستكون للسودان حدود جنويبه جديده وأقليم جنوبي أو ولايات جنوبيه جديده وجنوبيين جدد .

نظريا حتكون حدودنا الجنوبيه الجديده هي حدود 1956 وحتى الأن هذا الموضوع لم يحسم بصوره واضحه ولجنه ترسيم الحدود نايمه في العسل , ولو ما تم أتفاق واضح في هذه المسأله فالأمر مرشح للأنفجار بين دولتين يا معلم .

اذن أهم المحاذير وأخطرها هو الحدود فأنتبهي يا لجان الحدود قبل ما الفاس تقع و أستغلوا التواصل الطبيعي الموجود بينكم حاليا كبشر وكسودانيين وحلوا المسأله قبل ما الجنوب ينفصل و تقع الكارثه .


وبعد داك بأفتراض أن الأنفصال تم بصوره سلسه وعلاقه الجوار سمن على عسل نجي نشوف الجنوبيين الجدد لما فضل من دوله السودان القديم .


أي أهلنا ناس جبال النوبه والنيل الأزرق وبعض أجزاء من دارفور سسيكونون هم جنوبيي السودان أقصد ما فضل من السودان .


نحن كلنا عارفين أنو الجنوب بتاعنا بتاع السودان القديم أختار أهله الأنفصال بسبب أن أخوانهم وشركائهم في الدوله دايرنهم يكونوا مواطنيين من الدرجه التانية أو التالته ما فرقت . المهم أنهم رفضوا الوضع هذا وحاربوا خمسين سنه , وبحربهم وتضحياتهم فقط حصلوا على نيفاشا التي يعتبر الأستفتاء جزء منها .


طيب ناس الجنوب الجديد ديل هل بيعتقدوا أنهم مواطنيين من الدرجه الأولى ولا من الدرجه التانيه برضو ؟


طبعا أهلي ناس دارفور ديل حتبقي على بعضهم دارفوريين وجنوبيين معا بختكم .


أنتو يا أخوان البلد دي ما فيها زول عاقل !!!