Post: #1
Title: مع الاعتذار لكل الشعب السوداني
Author: علوبه
Date: 10-31-2009, 02:24 PM
بسم الله نبدأ
عمرك بين ال18 و الستين؟
سوداني او مولود لأب سوداني داخل او خارج السودان؟
يجب ان تخضع للجنة الاختيار العامة و بعد ذلك للجنات فرعية متخصصة
و التصنيف سيكون كالاتي
عندك شهادات و واسطة: حبابك ألف
ماعندك شهادات وعندك واسطة: برضو حبابك ألف
عندك شهادات و خبرة و ماعندك واسطة: سيب رقم تلفونك في الاستقبال و اكيد حاتسمع مننا
ماعندك شهادات و لا واسطة: امشي انتحر
شين و صوتك حلو: تبقى فنان
شين و صوتك ماحلو: برضو فنان
سمج و دمك يلطش و تجيد فن مصمصة الشلاليف و غرويد العيون و الأاااااأآآآآآت: اذن انت مذيع سوداني
سمحة و غبية:- نوعين الاول سمحة و نحيييفة: مذيعة في النيل الازرق
التاني سمحة و سمينة: هارموني او الشروق
شينة و سمينة: تلفزيون السودان
شينة و مسيخة: مضيفة جوية
شينة و قليلة ادب: طالبة جامعة
عدم احساس جلد تمساح: ناس سودانير
قنعان من روحك و عايز تدعم المنتج المحلي: تركب سودانير
سبع صنايع و البخت ضايع: موظف حكومة، مدرس، سواق تكسي
سبع صنايع و البخت الرائع: موظف اتصالات
امك داعية ليك: ياخدوك في دال
رجل المستحيل: كستمر كير
المستحيل بي عينو: خدمة سودانية ترقى لمستوى لا بأس
عزيز قوم ذل: طبيب
مصاص دماء: تشتغل في جهاز المغتربين
سياسي عمرك فوق المية (ديناصور): معارضة
خالي مؤهلات و مستهبل: سفير للسودان بالخارج
خالي مؤهلات و أهبل: مسؤول
كترتا و مسختا: مستشار
عايز تشتهر: اخترع ليك حركة خزعبلاوية لتحرير السودان
حمار شغل: الفئة دي مافي عندنا
مدهوك معجون معفوص ممغوس موجع مقطع مرقع جيعان وسخان قرفان تلفان سجمان رمدان غالبك التسوي: مبروك انت مواطن سوداني
مع الاعتذار لكل من الشعب السوداني و اخواني و اخواتي ممن مسته النوت دي من قريب أو من بعيد اعفو لينا يا جماعة
|
Post: #2
Title: Re: مع الاعتذار لكل الشعب السوداني
Author: محمد سنى دفع الله
Date: 10-31-2009, 02:27 PM
Parent: #1
العزيز الغالي علوب
التحيات النضرة
بعد كملت ضحكي
وانعدل مزاجي
لقيت انو
في
خاجة غلط
|
Post: #3
Title: Re: مع الاعتذار لكل الشعب السوداني
Author: علوبه
Date: 10-31-2009, 02:35 PM
Parent: #2
الحبيب
محمد سنى دفع الله
والله مشتاقين
سيناريو بيتكرر يوميا
اللـــــــــه يستر
الغـــــــلط وين؟؟؟
|
Post: #4
Title: Re: مع الاعتذار لكل الشعب السوداني
Author: الفاتح شلبي
Date: 10-31-2009, 02:59 PM
Parent: #3
| Quote: مصاص دماء: تشتغل في جهاز المغتربين |
علوب ... المقتبس دهـ قلبت فوقه هوبة عدييييييييل
تسلم
|
Post: #5
Title: Re: مع الاعتذار لكل الشعب السوداني
Author: علوبه
Date: 11-01-2009, 09:58 AM
Parent: #4
تعرف يا الفاتح شلبي
الززززززززززز حاجة تقلب هوبة وتغير طريقك
يعنى انت لمن تكون عايز تقلب هوبة بتكون مقبل شمال وبعدين بتلقى روحك قبلت يمين
والزززززززززززززززز حاجة انك بتواصل
مش كده ؟
|
|