تأخر العريس فقام والد الفتاة بعقد قرانها على أحد أقاربها

تهجم أربعة شباب على عريس ليلة زفافه ، وأطلقوا أعيرة نارية في الحفل أصابت أحد أقارب ( العريس) بالأذى الجسيم . وذكر شهود عيان ان الشباب الاربعة وبينهم نظاميين دخلوا الحفل يحملون أسلحتهم لإيقاف المناسبة مؤازرة لأحد أصدقائهم كان يرغب في زواج (العروسة) . وأضافت مصادر بشرطة محلية شرق النيل أنها تلقت بلاغاً من مواطن بإطلاق رصاص في حفل زفافه ، وتبعاً للبلاغ استطاعت الشرطة القبض على المتهمين وبحوزتهم مسدس من نوع (بي ان اس) ووجهت لهم إتهامات بالأذى الجسيم . وبحسب صحيفة حكايات كشفت التحريات ان صديق المتهمين كان تقدم للزواج من الفتاة بيد أنه لم يأت لعقد القران المحدد مسبقاً على الرغم من تجمع أهل (الفتاة) ما دعا والدها لعقد قران إبنته من أحد أقاربها كان ضمن المدعوين للمناسبة وإكمال زواجه منها في ذات الليلة .


نقلا عن النيلين

عفيت عليه ابو العروس

قطع شك جعلي

Quote: عفيت عليه ابو العروس قطع شك جعلي

وليه ما يكون بطحانى ؟

وليه ما يكون بطحانى ؟

الا خ علي بشير


وهو كذلك ولاتزعل ياسيدى

سلام يا معتصم,,

Quote: عفيت عليه ابو العروس قطع شك جعلي

إنت فى أبو العروس ولا قريبهم المسكين لا يدو لا كراعو جا يحضر العقد طلع هو العريس !!!


تحياتى,,

الاخ ايمن

حكايتو بقت زي القمرية القالت(جيت اتفرج فرجو بي قطعو راسياتحيرو بي)
في قصة فاطمة السمحة..

بس انا غايظنى العريس هو وكت رسل اصحابو عشان يفرتكو الحفلة ماكان يجي هو يعقد,,
بس القصة دي زكرتنى قصة زواج جدنا لحبوبتنا ام امنا ربنا يرحمهم
فكان جدنا(احمد دقه) في رفقة احد اقاربه لاتمام العقدوالزواج متوجهين
من قرية الجبلاب الي قرية المكنية بلد الشيخ حامد اب عصا والمسافة
مابين القريتين حوالي 25 كيلو . وطبعا في الزمن داك العربات نادره
فقطعوا المسافة بالحمير (اكرمكم الله) وبعد طول عنا وصلو اهلنا من الجبلاب
المكنية قاموا بضيافتهم احسن ضيافة وضبائح واخر كرم فلما جات لحظة العقد
العريس نطه قال والله انا الزوله دي ماعائزه رغم انها بنت عمته
فقام جدنا احمد دقه بزجره وقال ليه جايبنا المسافة دي كلها وتقول ماعايز
تعقد فقالهم يمين مانرجع منكم ساي اكان تعقدو لي عليها.

فتم الزواج والعريس اخد عروسه ورجع بيها الحله في ليلته

ودا كلو عشان نجي للتلاتل دي

مع ودى

Quote: ودا كلو عشان نجي للتلاتل دي

وش ضاحك

ازيك يا قريبي

د.محمد حسن
شكرا للوش الضاحك وشكرا علي المرور

الحبيب معتصم


السلام عليك و رحمة الله و بركاته

Quote: عفيت عليه ابو العروس قطع شك جعلي

كان ينبغى عليك ان تربو بنفسك و تأتى بتعليق شامل و كامل بدلا من ان تحصر نفسك فى إطار

فبلى ضيق و فهم لم يعد له مكان فى وجدان الناس ......!!!!!!!!!

الاشكال في الفتاة المسكينة دي
كأنها كأس معروض في سباق ماراثون
لا مشورة لا يحزنون
كان الله في عونها

_
الطيب كلامك في محله

1. أطلقوا أعيرة نارية في الحفل
2. أصابت أحد أقارب ( العريس) بالأذى الجسيم .
3. الشباب الاربعة وبينهم نظاميين دخلوا الحفل يحملون أسلحتهم لإيقاف المناسبة
4. القبض على المتهمين وبحوزتهم مسدس من نوع (بي ان اس)
5. ووجهت لهم إتهامات بالأذى الجسيم

الاغرب هو الاتهام
ترويع .. و تهديد حفل كامل من مدعوين و مهنئين
حمل سلاح نارى و استخدامه باطلاق النار
إصابة أحد المواطنين بطلق نار .. و كان من الممكن لولا لطف الله أن يقتل
_____________
كل هذا .. يعتبر فقط أذى جسيم !!!

الاخ الريفي سلامات

انتشار السلاح بين المواطنين بشكل غير قانونى مهدد خطر لامن وسلامة الموطن
وحتى حيازةالسلاح لدي بعض افراد القوات النظامية قد يكون مصدر فوضي
لغياب التوعية والوعي عند بعض النظاميين ..

نتمنى ان توضع ضوابط مشددة في حيازة واستخدام السلاح الرسمى والمصرح

و ماذ لو كان السلاح .. كلاشنكوف أو دوشكا !!

الاخ الريفي سلامات

انتشار السلاح بين المواطنين بشكل غير قانونى مهدد خطر لامن وسلامة الموطن
وحتى حيازةالسلاح لدي بعض افراد القوات النظامية قد يكون مصدر فوضي
لغياب التوعية والوعي عند بعض النظاميين ..

نتمنى ان توضع ضوابط مشددة في حيازة واستخدام السلاح الرسمى والمصرح

الحبيب معتصم

Quote: السلام عليك و رحمة الله و بركاته Quote: عفيت عليه ابو العروس قطع شك جعلي

Quote: كان ينبغى عليك ان تربو بنفسك و تأتى بتعليق شامل و كامل بدلا من ان تحصر نفسك فى إطار فبلى ضيق و فهم لم يعد له مكان فى وجدان الناس ......!!!!!!!!!

أخى العزيز معتصم مصطفى الجبلابى ..... لك كل مودتى .....يأخى فى حقيقة انت لو طفت السودان دا تستغرب فيها ..... أنت عارف السودان
دا مليان قبايل واى سودانى انا قابلتو فى اى بقعة من جهات السودان الأربع لما يكون على حق .... مافى اى زول فى الدينا دى بكون ارجل منو..... وعلى بالأيمان يموت معاك وااااااااااااااااقف لا تقول لى فلان دا بنتمى للقبيلة الفلانية ولا العلانية .... اى سودانى شفت الحقيقة دى كيف ....... واقول ليك حاجة الشجاعة مرتبطة بالأيمان بالله تعالى الرجل الذى قوى ايمانه لا يخاف إلا الله ولا يهاب ألا الله والموت دا بكون شئ عادى زى شراب الموية ....وفى ناس لما تموت واقفة بتكون راضية عن نفسها .... تموت وانت مبتسم .... والحماقة شى من الشيطان
لأن الحليم الشخص الذى يتملك نفسه عن الغضب ولا يتهور .... والذى لا يتملك نفسه عند الغضب سيكون للشيطان نصيب من نفخة من نار تؤجج من نار الغضب... عشان كدا يا خوى الرجالة ما مرتبطة بقبيلة ..... ولو مكضب الكلام دا شوف ليك اى قبيلة انتا بتعتبرا اقل مرتبة فى الشجاعة واهبش ليك زول فيها ...... قطع شك يخلى ريحتك طير طير ...... الرجالة طولة بال ....وأخوك ان سوى ليك الشينة سويلو السمحة وخليهو والعوير ما تباريهو ... لكن درجو ... وكون راسى لما تبقى العكة اثبت واتفرج فى الخلق دى بتجغلب كيف ... وفكر مأية مرة فى اى خطوة تخطوها ..... دى الرجالة ..... يعنى انتا بتفتكر العملة العملا الراجل دا دى رجالة ... دا جهل واضرار بحقوق الأخرين... وأولهم بتو العروسة دى ..... تحياتى اخى العزيز واسف للإنشاء الكتيرة دى.... لكن اعمل شنو اصلى من ناس حركة محايد ضد القبلية والجهوية .... وكلنا معا من اجل سودان معافى ومتطور....

Quote: الاشكال في الفتاة المسكينة دي

عجيب الضيق الحاصل علي ابوها..

الاخوه الاعزاء
هناك بعض المداخلات متشابهة اومتقاربة في مضمونها ورأيت ان اجمعهم في رد واحد ليس تقليلا من قدر أحد بس كسبا للزمن وحرصا من عدم التكرار..
اولا أحترم راي الإخوة الذين تحدثوا عن نقطة إدخال اسم قبيلة بععينها في هذا البوست ..
العائز اقوله قبل كل شئ انه هنالك اشياء قد يرمى اليها كاتب ما بتعبير
معين قد يسئ.فهمه او يحرف الي غير مقاصده..
فعندما كتبت ماكتبت كنت اعنى ما اقول واعئ به تماما فإيرادي لقبيلة
معينة لم يكن من باب الاستخفاف بهذه القبيلة او التقليل من شأن القبائل
الاخريات فحديثي لم يكن فيه إساءة..
اما موقفى من القضية الاساسية في البوست فإنى متعاطف مع ابو العروسة تماما
وانا بشوف دا استهتار من الود( العريس الزائق) وعندما اوردته
هذا الخبر انا ماكان قصدي انقل الخبر كشمار وخلاص.بل كان قصدى من الداخالين
والمتداخلين ان يتطرقو لهذه القضية بعمق وان يتناولوا لب
الموضوع وليس هوامشه

واواصل

حكاية انو زول يمشيليهو زواج معزوم ويطلع منه عريس كتيرة وبتحصل في

باعرف شخصيا زواج تم بالشكل قريب للقصه دي ايام الجامعه زميله لينا عزمتنا عرس بت خالتها

في شرق النيل واتفقنا نمشي وكان مفروض البيودينا خال زميله تانيه لينا لكنه اعتذر

وقامت زميلتنا الخالها اعتذر دي ضربت لي ود عمتها وجا يودينا العرس يعني موصلنا بس

وشرطه معانا تخشوا تباركوا وتطلعوا عشان هو عنده ارتباط شغل وما فاضي


لما وصلنا هناك حلفوا عليه ناس العرس الا اخش ويحضر العقد

و في اخر لحظة اتفركش العقد عشان حصل خلاف بين الاعمام العريس والعروس اولاد عم

وسبحان الله قريب زميلتنا الموصلنا يقوم يطلب يد العروس وهي واهلها يوافقوا

والحمد لله عايشين في امان الله وعندهم الان ذرية ربنا يغتي عليهم

اكيد دا ما مقياس ولا ح اعمم تجربتهم على كل الناس لكن فعلا القسمه والنصيب بيلعبوا دور كبير

والكاتبه الله هو البيمشي

معتصم سلامات و الله البوست بما فيهو من مأسي خفية ضحكني جدا ... و شر البلية ما يضحك

Quote: إنت فى أبو العروس ولا قريبهم المسكين لا يدو لا كراعو جا يحضر العقد طلع هو العريس

أجمل تعليق عجبني بتاع أيمن .... هسي قريبهم المسكين عادي ممكن يضرب لناس الشغل الصباح يقول ليهم يا اخوانا انا داير إجازة أسبوع من الليل لاني أمس بالليل عرستا....

القريب المسكين المورط دا يعني عادي يتصل عليهو اصحابو يا فردة الليله البرنامج معانا و لا نجيك نحنا؟
يقول ليهم لا هذا و لا ذاك انا عريس من أمس؟

تضربي ليهو حبيبتو تقول ليهو يا خي عليك بكرة نتغدي سوي حسب الإتفاق يقول ليها شنو؟

الله يجازي محنك يا معتصم و أقعد عافية لجنس دا

مودتي يا مضحك المكتئبين.... انا الليله عندي إكتئاب من الساعة عشرة صباحاً

دى واحدة من الخوازيق

الاخ اشرف الموضوع دا خوازيقو كتيرة وزى ماقال حميد خوازيق البلد ذادت
بس الخازوق الاكبر هو إنتشار السلاح بدون رقيب وبلا رادع

مع ودى

مودتي يا مضحك المكتئبين.... انا الليله عندي إكتئاب من الساعة عشرة صباحاً

الاخ حافظ ابراهيم


بس ياخوى الدنيا دي اديها بالطربوش وماتدبرس ليهاوتكتئب ,,,



ادام الله الفرح والإنبساطة فيكم


مع ودى

الاخت مريم سلامات

مناسبات الزواج مرات بتحصل فيها احداث مفرحة وظريفة ومرات بتكون مصدر للحزن والتخاصم مابين الاسر وحوادث زى دي متكررة كتير في سودانا
فاحكي ليك حادثة حصلت في نادى الضباط :العريس رمي يمين الطلاق علي العروسة
وهي في كوشته والحفلة شغالة ولسبب بسيط وممكن نقول عليه تافه مقارنة بقرار
الطلاق.فالعريس كان قاعد مبسوط مع زوجته اثناء الحفلة قامت عراكة في جانب
النسوان فالعريس لما مشي شاف الحاصل شنو لقي انه بت او شافعة من اهل العروس رفضت تقوم لسيدة من قريبات العريس..فاعتبر هذا عدم احترام وتقدير
لاهله فطلق ليهم بتهم..
وفي هذه طريفة حدثت في ستينات القرن الماضي :فاحد رجالات ام درمان المشهورين
كان عاقد علي واحده لي بها صلة قرابة فتوفت اختها المتزوجة من رجل آخر تاركة وراءها مجموعة من الصغار فما كان من اهل البت الا ان طلبوا من صاحبنا ذاك بتطليق بنتهم ليزوجوها لزوج بنتهم التى توفت حتى تربي له عياله وقام الراجل بكل شهامة بتنفيذ ماطلب منه مراعاة للحالة الانسانية
للصغار وهذه حادثة قد تتكرر في مجتمعنا زمان..
وهنا استحضر قصة ظريفة في اعتقادى انها مجرد نكتة..
في واحد كان يعمل في احدى القري اوجدته فيها ظروف العمل فهو ليس منها
ويقال انه انسان بسيط في تعامله ويرمى الكلام من دون ادراك..
المهم الزول دا لما طول في الحلة تقدم لاحدى حسناوات القرية وتم تزويجه لها وقضي معها فترة وانجبت منه ولكن اتى القدر المحتوم وترحل زوجته من الدنيا
وبعد انقضاء ايام العزاء اجتمع به اهل المرحومة وقالو ليه والله نحن عاشرناك فترة وعرفنا خصالك وبقيت واحد مننا وكنت شائل بتنا فوق راسك
فعشان كده دايرين نديك العوض فقال ليهم بدون ما يتلفت (شاورتو)
ويقال انه للمرحومة اخ يسمى العوض...





ولكن في النهاية اختم حديثي ليك اخت مريم
انه القسمة والنصيب تلعب دور في الازواج
التى تتم والواحد مابكون عارف القدر حيسوقو
لوين وزى مابقولو اهلنا القسمة تضحك علي الصفاح

مع تحياتى

نواصل ما انقطع من حديث الإخوة الأعزاء:
ان الموضوع يتطرق لقضية يجب أن نعطيعا مساحة اوسع للنقاش والحوار

فمثل هذه الواقعة كثيرا ماتتكرر في مجتمعاتنا وإن إختلفت السيناريهوات
وفي الغالب تكون الفتاة ضحية للاستهتار وعدم الجدية من قبل بعض شبابنا..
فكثيرا ماتجد الواحد منا يرتبط بالفتاة لفترة طويلة من الزمن وبعد ان يعشمها
بالزواج وامل العرس يجي في النهاية يفكها عكس الهواء زي مابقولوا من دون
اي مقدمات او باعذار واهية دون مراعاة لاحاسيس ومشاعر
هذه الإنسانة..وفي بعض الاحيان يكون هذا سببا لبقاء البنت بدون زواج طيلة
عمرها ..إما لإنه (قطره فات) بعد ان ظلت عائشة علي ذاك الوهم السراب سنين عدده
او لانه الناس اخدت انطباع بانه البت دي ليها كم سنة طالعه ونازله مع
الولد الفلانى فلاتسلم من الشائعات التى تحاك فيها وإن كذبت
تصدق بعضها فيكون سبب نفور العرسان او الراغبين في الزواج منها..
وقد وضعت نفسي في موقف هذا الرجل (ابو العروسة) المغلوب علي امره
فبعد ان وزع رقاع الدعوة للاهل والمعارف لتشريف زواج بنته الميمون
إضافة للخسائر المادية التى تكلفها وضبائح وصيوان واصوات مهنين تدعو
ان يتم الله الزواج علي خير وبيت مال وعيال ووو كثيرا من عبارات التهاني..
فبعد كل ذلك العريس يديهم(صابونة)علي قول اخوانه المصريين فموقفه يكون
شنو قدام الناس ويودى وشه وين والاهم من ذلك شعور واحاسيس بنته المسكينة
ومايصيبهامن آثار نفسية سالبة دي ممكن تنج او تروح فيها..
فما كان علي ابو العروس الا ان يتخذ موقفا سريعا وشجاعا كالذي فعله
حتى يتحاشي عواقب وخيمة يمكن ان تنزل علي بيته وبنته


ونواصل

القبض على المتهمين وبحوزتهم مسدس من نوع (بي ان اس
وليه المسدس ده ما كولت ولا ماغنوم ولا ريفولفا
بتجوبوالأسامبي دي من وين
قال شنو
مسدس ( بي ان سي )
انشاء الله يكون ام بي سي
الناس اتبدلت
وبقينا في امر ضيق جدا
ورجعنا للقبيلة وشنو ما عارف
في حاجة غلط

Quote: وليه ما يكون بطحانى ؟ الا خ علي بشير وهو كذلك ولاتزعل ياسيدى

انا ما زعلان يا معتصم
لانى ما بطحانى وهذا شرف لا ادعيه
ولكن جاء فى صدر الخبر فى مداخلتك الاولى

Quote: وأضافت مصادر بشرطة محلية شرق النيل أنها تلقت بلاغاً من مواطن بإطلاق رصاص في حفل زفافه

لذلك رجحت انا ان يكون بطحانى
لانو معلوم ان غالبية سكان شرق النيل من البطاحين
اضافه لى انو الشهامه والفراسه دى عندهم راقده بالكوم
لذلك لم استبعد ان يأتى هكذا تصرف منهم

الاخ الاستاْْذالسنى
سلامات
طبعا نحن جاهلين لثقافة السلاح الناري وحدنا بالكتير السيف والسكين
لكن بقولوا في السودان الاسلحة بقت زى الموبايلات اشكال وانواع مرخص
وغير مرخص..يعنى الواحد لما ينزل السودان لازم يشيل معاه اربجي...

اما بخصوص القبيلة لما اوردتها ما قصدتها بالمفهوم الضيق للقبلية
وليس استخفافا من قبيلة او رفع لشان واحدة دون الاخريات ...
والقبيلة ماحاجة شينه او منكوره وقد اوجدها المولى عز وجل واقراها
في كتابه الكريم حين قال :اناخلقناكم شعوبا وقبائل لتعارفوا وهذا
المبدأ الذى اوجدت به القبائل بس الناس بقت تتشدد لانتماءاتها
ورفض الاخر(القبلي )مع محاولة اقصائه وهذا ما اقف ضده..
اما زكري لقبيلة الجعلية دون غيرهم ليس يعنى ان القبائل الاخري ليس عندهم الحمية
او الشهامة او القيم الفاضلة ..لكن اهلنا الجعليين اشتهروا عندنا
في السودان (بالجعولية) او مايطلق عليها البعض حماقة الجعليين
وانا بعتبرها فنجره وشهامة وقيم جميلة يتشبع بها كل اطياف الشعب السودانى
وما اردت ان اقوله هنا لاهلنا الجعليين اذا كان الحماقة البينسبوها ليهم
متل دي فافخروا بها..
القبيلة اخ السنى امر واقع بس علينا ان نتعامل معه بمسئولية وفهم واعي
دون التكريس للخلافات والنزعات الضيقة..ومرات ذكر القبيلة والجهة التى تنتمى
لها ياتى للتمييز وليس للتمايز..فحتي هنا في (امريكا والدول المتقدمة )عندما
تقدم لطلب التحاق بوظيفة او خلافة فهناك سؤال اساسي موجود في الطلب عن
العنصر اذا كنت ابيض او اسود او اسبنش او...
فالمسألة في نظري مافيها حاجة لكن بس لانونحن الجو في السودان شوية
مشحون والله لايجازيهم خير الغرسو مفاهيم الجاهلية الاولى فينا من جديد
اولاد الهرمه الكيزان
مع خالص تحياتى
وشكرا لطلتك