كانت مواعيدك .. سراب !!

قوليلي وينِك يا مناي
راجيكي متصبر براي ..

كيفن تجافيني وهواك
عارفاهو جاري معا دماي ..

أنا كنت راجيك فوق جمر
شايل الصبر دايماً معاي ..

لامن نجض فيني الصبر
شيبت بالهم في صباي ..

كانت مواعيدك سراب
باراهو للآخر هواي ..

تهت وقنعت من الأمل
وكتين رجيتو وطال رجاي ..

ساهرتَ عاد شايلَ الهموم
والذكرى قدّامي ووراي ..

معقوله بس تنسي الوعود
ليه يبقى بالحرمان جزاي ..

لو انتي مهتمّه وصحيح
دايراهو قلبِك في ضراي ..

أحسن يكون بينّا الحنان
راجيكي يلا تعالي جاي ..

من يوم فُراقك والحُزُن
طاويني في شعري وغناي ..

مجروح بقاسي من الألم
واللهفة تنتح في حشاي ..

طيفك يَقيد في قلبي نار
والدّمعة بالدّم في بُكاي ..

شِن دايري يا ست الحسان
أرجوكي بحلفلك كفاي ..

لو كان كتبتي لي خطاب
بين الكلام أبديتي راي ..

لو كانو سطرين أو سطُر
أو حتى صفحة نضيفة ساي ..

كان يبقى مرسالك معاي
بلسم يداوي جروح أساي ..

بس يا خسارة بقوله ليك
عكّرتي بي بُعدك صفاي ..

كلَّ الحَصَل بنساهو تَبْ
لو جيتي شايله معاك دواي ..

أنا أكتر إنسان في الوجود
يهواكي رغم انِّك أذاي ..

ما أصلي دايرِك شان مُناي
أسقيكي ريدي وكل هناي ..

شوفتِك أكيد فيها الشِّفا
يا ريت تعجلي بي شفاي ..





الشمالية .. مارس 1997