ورد علي لسان قادة المعارضة خلال مخاطبتهم المؤتمر العام الخامس لتحالف مزارعي الجزيرة والمناقل الذي تزامن مع يوم الاحتفال بثورة اكتوبر الشعبية بمنطقة طيبة الشيخ عبد الباقي، انهم يريدونها ثورة سياسية سلمية لهزيمة حزب المؤتمر الوطني الحاكم في الانتخابات المرتقبة وليس تكرارا لسيناريو ثورة اكتوبر التي اطاحت بحكم الفريق الراحل ابراهيم عبود عام .. عندما قامت ثورة اكتوبر وانتفاضة ابريل لم يكن الوضع اكثر سؤا من ماوصلنا اليه من حال..بل نحن نتمنى ان يعود بنا الحال لما كنا عليه في عهد النميري و تكون ليلة القدر نزلت علي السودان لو رجع بينا الزمن لعهد عبود..
نميري لما فات السودان كان في حركة واحدة مسلحة تحارب ضده ونميري فات والدولار مافات التلاتة جنيهات ونميرى راح والناس ماكله وشاربه
الآن عدد الحركات المسلحة يفوق التلاتين حركة والحرب مدورة في معظم انحاء البلاد والدولار وصل لقرابة التلاتة الف بجنيه نميري.. والناس كاتله الجوع والعطش.. والفساد في البلد ريحتو طاقة.
لماذا تتحاشي قيادتنا الميمونة الصدام مع الحكومة وتخشي من مواجهتها بالعنف من ماذا يخشون وعلي ماذا الخوف
التغير قادم لا محال .. نعم نتفق او نختلف فى بعض الاشياء ان المعارضة لم تكن بالصورة المطلوبة وتحيد الحركات اصبح امر صعب .. ولكن بتضافر الجهود يبقى الامل فى ازالة هذه العصابة المكونة من الرماد التى تحكم البلاد اصبحت وشيكة...
ياخوى ظلينا معلقين نفسنا بالأمل دا عشريييين سنة وكلو مره نحن بنوم علي احلام الزيف وتطمينات الوهم من سنة 90 الصادق قال لينا الديمقراطية عائدة وراجحة ولا عادت ولاكفته رجحت نقد ادسه لمن فتر وجماعتو قالو مابيطلع الا يغير النظام او يتغير اها في النهاية جاء منسل والله سلوه المهم الحال في حالو مولانا الميرغنى شبكنا إقتلاع النظام من جزوره هسه بقو يدفنو للانقاذ في جزوره كلما اصابته حالة تعرية.. ياخى عشرين سنة .. كان مفترض الصادق يكون مسك الحكومة دى مرتين تلاته وقلبوها عليه.. المهدي الامام من ما اعلن ثورتو لحدى ماطرد آخر مستعمر وحرر الخرطوم ما اتعدى الاربعه سنين و بضعة شهور..
انا تانى مابتعشم في خيرا فيهم لقد كفرت بالتلاتة بهذه المعارضة
اما السلع الغذائية الاساسية في زيادة مستمره فقط من فترة رمضان لي دا الوكت شوال السكر من 95 الف الي 190 الف ليستقر الآن في 140 الف بعد ان تم استيراد كميات كبيرة من (السعودية) وناس السودان قاعدين يقولواالسكر الجاي من بره (مسيخ) وعايز ليك رطلين عشان تطعم ليك كفتيرة شاي
ناس الصادق المهدى ذاتم البقولو ماعايزين يكرروا سيناريو اكتوبر64 لما كان عايز الصادق يذيد سعر السكر بخمسة ريالات او خمسين قرش بتاعت زمان قامت الدنيا وماقعدت والمظاهرات مش في العاصمة بس بل في كل انحاء البلاد كلو عشان (طرادتين) هسع شوفوا كم طراده اتختت في سعر رطل السكر
بل انا متأكد كتير من جيل هسه ماسمع بالطراده من اساسو
دي قائمة لبعض اسعار السلع الاستهلاكية والزيادات الحصلت فيها خلال اسابيع
اسعار :العدس سعر الجوال (125) جنيهاً بدلاً من (105) جنيهات فيما قفزت سعر الفاصوليا ليصل الى (126) جنيهاً بدلاً من 110) جنيهاً في الفترات السابقة فيما بلغ ربع الفول ليصل الى (30) جنيهاً مقارنة بـ (20) جنيها ووصل سعر ربع الويكة الى (32) جنيهاً بدلاً من (24) جنيهاً في الاسابيع الماضية
بتزكر ايام نميري كنا بنشتري الكيلو ب 2 او تلاتة جنية من جزارة سوق نيالا و كان دا في اواخر ايامو ولما حصل الجفاف والتصحر والمجاعة في85 اسعار اللحمه غلت غلاء فاحش ووصلت 5 جنيهات ..
الواجعنى حتى العدس والفول غذاء البلوتاريا اسعاره في ارتفاع
أنا متأكد معارضتنا المؤقرة ماجايبة خبر للحاصل لانه موائدهم لاتري مثل هذه الاصناف ..لكنى موجوع لي امهاتنا الفي الريف حليمة وعشةوام الحسن وحاجة آمنة التى تجابد في حق الملاح وفي حق الكسره وعشان لقمه للعيال الطفش ابوهم هربا من المسئولية بحجة الاغتراب وكسب العيش لا لمن في قرشو ولا اتهنو بي قربو..
في آخر مره مشيت السودان من 4 سنين وقلت تانى منعول البجيكى راجع لو بي دا الحال ..قابلت احد الاخوه من ابناء الاوسط في شباك الزكاه مقوم حجة وجوطه فسالت مالك يازول قال الناس ديل دايرنى ادفع ليهم زكاه لقروش انا ما اكتسبتها فقلت ليه ادفعه الناس ديل بحلفوك فعشان تتحل من الحليفة ادفعه واتوكل قال للحليفة بحلف والله انا قاعد بدون شغل في السعودية والتمست في كلامه الصدق لكن لاستفسار طيب انت لو ماشغال في السعودية البرجعك ليها تانى شنو قال لي:والله طفشان من المسئولية ومن هات وجيب وانا ماعندي شئ قعادى مع الاولاد ومانى قادر اعمل ليهم حاجه بياكل لحم وشي فاحسن لي اكون بعيد منهم.. هذه حالة متكرره لكن السؤال من الذي سيتولي مسئولية العيال طالما رب الاسره شرد منهم .. منو غير الام البتقطع من لحمه عشان تقدي اولاده وماتبيتم القوه بالليل لكن معارضتنا الكريمة ماجايبة خبر والكيزان سارحين في البلد جنينة من غير خفير
انا بالي في خالاتنا المن دقش الرحمن في زريبة الغنم تحلبلها لبينه وفي الطاحونه شايلة ملوة فتريتا وتفزع في الغابة لي حطب الواقود..
اتصبرن فسيخرج من رحمكم مهدى هذا الزمن فهكذا علمنا التاريخ فمن بين صانعى المراكب خرج محرر السودان ومن الشرق اتانا عثمان دقنه حافيا ومن بيوت القران كان الازهرى ومن الريف جانا المحجوب وكان قرنق من بور.. لم يكن من بينهم ساكن قصور
الخرطوم: عبدالرحمن حنين كشفت جولة استطلاعية واسعة قامت بها «الوطن» في ولاية سنار والقضارف ومدني عن ارتفاع كبير في اسعار الذرة، حيث بلغ سعر جوال الذرة في منطقة الدندر «120» جنيهاً بينما ارتفع الجوال بالقضارف الي 150 جنيهاً ومدني إلى 110-120 جنيهاً، وعزا التجار ارتفاع الذرة إلى فشل الموسم الزراعي . في العديد من المناطق خاصة مناطق الدندر وبعض المناطق بولاية النيل الأزرق والقضارف، ورجح خبراء اقتصاديون ان يرتفع سعر الجوال في مارس الى 200-250 جنيه، مشيرين إلى ان اسعار الذرة سوف تزيد من ارتفاعها مع مرور الوقت مما يحتم على السلطات ان تسعى إلى تدبير الموقف مبكرا.
