Post: #1
Title: يوم بقيت دكتور ...
Author: Khalid Osman Jaafar
Date: 10-22-2009, 09:31 PM
الجمعة ٦ فبراير:
أصبحنا وأصبح الملك لله! الليلة يوم الرجال - زي ما بيقولوا في الأغنية
عاينت برّة البيت لقيت الجليد نازل!! غايتو الليلة يحلنا الله. أشيل وأدعي ... يا رب الممتحن الخارجي يقدر يجي من النمسا وما تتأجّل المناقشة!
|
Post: #2
Title: Re: يوم بقيت دكتور ...
Author: Khalid Osman Jaafar
Date: 10-22-2009, 09:35 PM
Parent: #1
فبراير شهر ليهو تأثير في حياتي ...
والدي رحمة الله عليه توفي في فبراير، وأنا لسّه في تانية جامعة. وأختي الوحيدة وضعت مولودها في فبراير برضو. محمد اللي خلّاني خال، بدل خالد!
ومناقشتي برضو في فبراير ...
|
Post: #3
Title: Re: يوم بقيت دكتور ...
Author: Khalid Osman Jaafar
Date: 10-22-2009, 09:38 PM
Parent: #2
كعادتي كل جمعة، إتصلت بالوالدة اسأل عن أحوالها. كل ما يكون في حاجة مهمّة في حياتي، لازم اسألها الدعاء؛ ولقيت بركة دعائها كتييييير جدّاً
لكن المرّة دي مختلفة
المرّة دي كنت عاوز أفرحها وأعمل ليها مفاجأة
كانت عارفة إنّو مناقشتي حتكون في فبراير. لكن ما قلت ليها اليوم. عشان كده قصدت إنّي أتصل بيها بدري اليوم ده عشان ما تشك في شئ. وبرضو كالعادة طلبت منها الدعاء
|
Post: #5
Title: Re: يوم بقيت دكتور ...
Author: Khalid Osman Jaafar
Date: 10-22-2009, 09:41 PM
Parent: #3
جيت ألبس عشان أمشي الجامعة ...
أهااااا
ألبس بدلة زي ما الغالبيّة العظمي من الناس بيعملوا؟ ياخ الموضوع ما ناقص زنقة، أقوم أكتّف نفسي زيادة بكرفتّة كمان! 
أخترت قميص جديد أهداه لي واحد من أعز أصدقائي لمّا زرتو في الإمارات: أشرف
|
Post: #7
Title: Re: يوم بقيت دكتور ...
Author: Khalid Osman Jaafar
Date: 10-22-2009, 09:54 PM
Parent: #5
في الجامعة بديت أراجع في الحاجات الما متأكّد منها. شغلي أنا عارفو، لكن المشكلة إنهم ممكن يسألوا عن أي شئ ليهو علاقة بمجال تخصصي
المهم
جاء وقت صلاة الجمعة ومشيت المسجد ..
|
Post: #8
Title: Re: يوم بقيت دكتور ...
Author: Khalid Osman Jaafar
Date: 10-22-2009, 09:58 PM
Parent: #7
لمّا كلموني إنّو المناقشة حتكون يوم جمعة، قلت يا رب ما يمنعني وقتها من صلاة الجمعة. والحمد لله، لاحقاً قالوا لي إنها حتكون في وقت بعد الصلاة
دعيت في الصلاة إنو المناقشة ما تتأجّل، وإنّو الممتحن الخارجي يقدر يجي. كنت عاوز أخلص بعد سنين من التعب والإرهاق. كم مرّة ومرّة بيّت فيها في الكليّة أو في مركز الأبحاث الموجود في آخر البلد! لوحدي في مبني طويل عريض! 
بعد الصلاة لقيت مكالمتين من تلفون ثابت، واضح إنّو تبع الجامعة!!
الله يستر ما يكونوا عاوزين يقولوا لي إنّو المناقشة إتأجّلت!!!
|
Post: #4
Title: Re: يوم بقيت دكتور ...
Author: Elawad
Date: 10-22-2009, 09:38 PM
Parent: #2
مباركة الدكتوراة يا خالد و لو إنو شكلها متأخرة شوية... و ربنا يسهل ليك أمورك و ييسرها عليك دنيا و آخرة إن شاء الله.
|
Post: #6
Title: Re: يوم بقيت دكتور ...
Author: Khalid Osman Jaafar
Date: 10-22-2009, 09:50 PM
Parent: #4
الله يبارك فيك يا العوض، وعقبالك إن شاء الله
آميييين. ربنا يوفّقنا كلنا ويسهل جميع أمورنا
|
Post: #9
Title: Re: يوم بقيت دكتور ...
Author: Khalid Osman Jaafar
Date: 10-22-2009, 10:07 PM
Parent: #6
إتصلت بالرقم، وفعلاً ردت علي سكرتيرة الممتحن الداخلي 
مالكم، الحاصل شنو؟
قالت لي إنّو الممتحن الخارجي وصل أبدر من مواعيدو (الحمد لله)، وإنهم عاوزين يعرفوا لو عندي مانع يقدّموا وقت المناقشة. قلت ليها إنّي برّة الجامعة الآن وما في طريقة؛ لكن حأكلمها لمّا أصل الجامعة
المهم. رجعت وواصلت مراجعتي، لكن بتركيز أقل
الموضوع بقي جد الجد!
بعد شويّة كده قلت يا زول هوي، كتلوك، ولا جوك .. جوك! 
لملمت حاجاتي ومشيت عليهم
الله يستر ...
|
Post: #10
Title: Re: يوم بقيت دكتور ...
Author: Khalid Osman Jaafar
Date: 10-22-2009, 10:21 PM
Parent: #9
دخلت، وبدينا الجلسة
نظام المناقشة في جامعتنا هو النظام البريطاني. بيقفلوك إنت والممتحن الداخلي والممتحن الخارجي في غرفة ما معاكم فيها أي زول تاني
الوقت البتاخدو المناقشة بيعتمد علي الرسالة نفسها وعلي الممتحنين. في ناس مناقشتهم بتاخد ساعتين، وفي ناس مناقشتهم أخدت ٨ ساعات، أخدوا خلالها وقت مستقطع للأكل ورجعوا!
كنت متفائل بخصوص وقت المناقشة لأنهم حدّدوا ليها يوم جمعة، يعني قبل عطلة نهاية الأسبوع، والساعة ٣ عصراً كمان
قلت طالما الممتحن الخارجي حيجي من برّة البلد، أكيد حيكون عاوز يخلّص الموضوع ويرجع يقضّي الإجازة في بلدو
|
Post: #11
Title: Re: يوم بقيت دكتور ...
Author: Khalid Osman Jaafar
Date: 10-22-2009, 10:33 PM
Parent: #10
أوّل ما بدينا، الممتحن الخارجي قال عندو أسئلة عامّة. قلت ما مشكلة! من حقّو برضو 
المهم؛ سؤال هنا وسؤال هناك ... حاجات جاوبت عليها صح، وحاجات كان إنتقادهم لي فيها في محلّو ...
وكل ما نمشي أكتر في الرسالة، أقول هانت ... قربنا نصل لنهايتها
ووصلنا النهاية!! 
وصلنا النهاية؟ الممتحن الخارجي قال عندو أسئلة عامّة تانية!!!
كلاااااام ...
هوّه احنا مش هنروّح ولا إيه؟
|
Post: #12
Title: Re: يوم بقيت دكتور ...
Author: عمار عبدالله عبدالرحمن
Date: 10-23-2009, 03:06 AM
Parent: #11
مـــــــــــــــــبروك يا دكتور
لكل مجتهد نصيب ,,,,,,,,,,,,,
اه دي بعد صلاة الفجر , بمواعيدنا ,,,,,,,,,,
|
Post: #13
Title: Re: يوم بقيت دكتور ...
Author: smart_ana2001
Date: 10-23-2009, 03:42 AM
Parent: #12
سلامات يا خالد.....برلومى...
مبروك الدكتوراه...
اها ناوى على شنو. ترجع السودان او لا ح تقعد فى برطانيا؟
______________________________________________________________
سلام شديد لاشرف (الضب الطويل)....و الله يا حليلكم و حليل ايام هندسة
|
Post: #15
Title: Re: يوم بقيت دكتور ...
Author: Khalid Osman Jaafar
Date: 10-26-2009, 01:33 AM
Parent: #13
سلام يا هندسة!
الله يبارك فيك، وعقبالك إن شاء الله
السودان في البال، لكن ما علي المدي القريب إن شاء الله 
أشرف تمام التمام، وكنت بتكلم معاهو الأسبوع الفات. ما شاء الله جابوا ليهو تومات!
لكن يا سمارت إنتي برضك ما عاوزة تورّيني إنتي منو؟ ياخ كتار من دفعتكم سافروا أميركا!
|
Post: #14
Title: Re: يوم بقيت دكتور ...
Author: Khalid Osman Jaafar
Date: 10-26-2009, 01:21 AM
Parent: #12
الله يبارك فيك يا عمّار
عقبال تفرح بأولادك إن شاء الله
|
Post: #16
Title: Re: يوم بقيت دكتور ...
Author: Khalid Osman Jaafar
Date: 10-26-2009, 01:51 AM
Parent: #14
وأخييييراً...
إنتهيت الحكاية!!!
وأخيراً سمعتها منهم: مبروك ...
كلمة خلت تعب السنين الفاتت كلها ما يروح هدر!
الحمد لله!
وطلعت منهم والفرحة ما سايعاني. خلاص ... خلصت الحكاية!
ساعتين ونص شكلت فاصل بين الفات من عمري وبين الجاي
يا ربنا لك الحمد والشكر كما ينبغي لجلال وجهك وعظيم سلطانك
ما بحب عادة إنّي أسرف في التفاؤل، عشان لو لا قدّر الله ما حصل العايزو ما تكون الصدمة كبيرة
لكن المرّة دي كنت واثق إنّو ربنا سبحانه وتعالي ما حيضيّع تعبي هدر
الحمد لله ...
|
Post: #17
Title: Re: يوم بقيت دكتور ...
Author: Khalid Osman Jaafar
Date: 10-26-2009, 02:03 AM
Parent: #16
وكان أول شئ عملتوا إنّي كلمت الوالدة. كانت مع بقيّة خالاتي في بيت حبّوبتي الله يرحمها. وجاني صوتها قلقاً ومستغرباً إنّي كلمتها مرّة تانية
قلت ليها عاوز منّك زغرودة كبييييرة
وقلت ليها إنّي الحمد لله ناقشت ونجحت!
وما سمعت أي كلام بعدها
ولمّا إتصلت مرّة تانية ردوا عليّ خالاتي والكل فرحان. وطمنوني علي الوالدة وكلمتها مرة تانية
لاحقاً لمّا جات تحضر التخريج خليتها تحكي لي الحصل شنو وشعورها كان كيف. قالت لي إنّو كل العملتوا إنها رمت الموبايل من يدها، وجرت علي باقي خالاتي تقول ليهم خالد نجح ... وبدأت تبكي
طبعاً ما كان قصدي إنّي أصدمها. حبيت أعمل ليها مفاجأة مفرحة، وما كنت عايزها تعيش اليوم كلّو في قلق وهي مستنّية تسمع النتيجة
لكن الحمد لله الذي بنعمته تتم الصالحات ...
|
Post: #18
Title: Re: يوم بقيت دكتور ...
Author: عاطف عمر
Date: 10-26-2009, 06:28 AM
Parent: #1
د. خالد
مبارك الدكتوراة
ولك نتمنى أن ( تضوق حلوها )
وجزيل الشكر أن أشركتنا معك رحلة ترقبها بهذه السياحة الجميلة
طفرت مني دمعة عند ردة فعل الوالدة حفظها الله
فقد أعادت ذكرى قديمة متجددة في أعماقي مع الوالدة أطال الله عمرها" بس ما دكتوراة "
|
Post: #19
Title: Re: يوم بقيت دكتور ...
Author: SHIBKA
Date: 10-26-2009, 06:42 AM
Parent: #18
بكيتني ياخ
|
Post: #20
Title: Re: يوم بقيت دكتور ...
Author: عاطف عمر
Date: 10-26-2009, 08:46 AM
Parent: #19
منو فينا ؟؟
|
Post: #21
Title: Re: يوم بقيت دكتور ...
Author: SHIBKA
Date: 10-26-2009, 08:55 AM
Parent: #20
عاطف
بداها لي خالد لما حكي عن رد فعل والدته عند سماعها لخبر نجاحه
وكملتها انت لما شاطرتني الدموع
|
Post: #22
Title: Re: يوم بقيت دكتور ...
Author: Khalid Osman Jaafar
Date: 10-27-2009, 00:35 AM
Parent: #18
آمين، والله يبارك فيك يا عاطف ..
عقبال ما نبارك ليك تفوّق الشبل الفي الصورة ده :)
الله يدّي آباءنا وأمّهاتنا العافيّة ويعيننا علي برّهم وطاعتهم. مهما عملنا ما بنقدر نوفّيهم جزء من حقّهم علينا
|
Post: #23
Title: Re: يوم بقيت دكتور ...
Author: Khalid Osman Jaafar
Date: 10-27-2009, 00:39 AM
Parent: #22
الله يدّيك العافية يا شبكة
ومشكورة علي مرورك الجميل ..
|
Post: #24
Title: Re: يوم بقيت دكتور ...
Author: SHIBKA
Date: 10-27-2009, 05:51 AM
Parent: #23
خالد
رايك شنو انك تواصل الكتابة
لان الاسلوب اعجبني جدا وامتعتني قراءته
|
Post: #25
Title: Re: يوم بقيت دكتور ...
Author: Khalid Osman Jaafar
Date: 10-27-2009, 10:54 PM
Parent: #24
سلام يا شبكة
ياخ رفعتي معنوياتي عديل كده
من مدّة بفكّر أكتب بوست عنوانه "مذكرات ضب ... سابق"
بعد ده وجب!
|
Post: #26
Title: Re: يوم بقيت دكتور ...
Author: Khalid Osman Jaafar
Date: 10-27-2009, 11:04 PM
Parent: #25
الحمد لله لحقت صلّحت صيغة المخاطبة قبل ما تزعلي يا شبكة!
منو البقدر علي الشِبك! 
|
Post: #27
Title: Re: يوم بقيت دكتور ...
Author: SHIBKA
Date: 10-28-2009, 05:56 AM
Parent: #26
خالد
Quote: الحمد لله لحقت صلّحت صيغة المخاطبة قبل ما تزعلي يا شبكة!
منو البقدر علي الشِبك!
|
الله بحبك ومرقك من الشبك
|
Post: #28
Title: Re: يوم بقيت دكتور ...
Author: الفاتح شلبي
Date: 10-28-2009, 06:27 AM
Parent: #27
| Quote: طفرت مني دمعة عند ردة فعل الوالدة حفظها الله |
وأنا نفس الشئ مع عاطف
يا دكتور خالد,
ألف مبروك الدكتوراة وربنا يحقق الاماني
أها ما وريتنا مجال الدكتوراة
|
Post: #30
Title: Re: يوم بقيت دكتور ...
Author: Khalid Osman Jaafar
Date: 10-28-2009, 08:40 AM
Parent: #28
سلام يا الفاتح
ربنا يحفظ والدينا ويرحم من توفّي منهم
الله يبارك فيك، وعقبال نبارك ليك إن شاء الله :)
أخوك مهندس مدني
|
Post: #29
Title: Re: يوم بقيت دكتور ...
Author: Khalid Osman Jaafar
Date: 10-28-2009, 08:36 AM
Parent: #27
| Quote: الله بحبك ومرقك من الشبك |
الحمد لله!
|
|