Post: #1
Title: غايتو يا المريخاب جنس حالة عليكم!!! محنتونا
Author: Hisham Mansour
Date: 10-19-2009, 12:01 PM
معليش تلقوها عند الغافل دي ... جايين كلكم منتظرين الهلال ياخد زي سبعة الوحدات بتاعة المطرة والسقط ديك...
شابكننا تنظير في تنظير (الهلال ما عندو ثقافة الفوز الخارجي.. الهلال حيتفرتق... مافي داعي تسافرو اخيرلكم انسحبوا....)
هوي يا المريخاب أقعدو وروقو في علبكم... الهلال فريق كبير ...ودايماً بكون قدر التحدي ... اتغلبنا هنا وغلبنا هناك...
وبعدين جينا التوالت (ودي فيها 500 ألف دولار) إنتو عماركم شنو؟؟؟
وأقواننا جابها سادومبا .. (قلت لي وين وارغو ؟؟؟)
وكمان بي قوة عين يجو يقولو ليك (صلاح إدريس دافع 3 مليون دولار عشان الهلال يغلب بي قونين) غايتو جنس فهم عليكم... طيب ما يديها ليهم ويغلبهم(5)... قال صفوة قال..
عندي ود عمي (مريخابي) وبنسمع في الكورة في الرادي والكورة المرة الفاتت مرق حفيان مبسوط وحام الثورات دي شارع شارع وحفيان مبسوط لمن اتغلب الهلال.. أمس لما القون التاني جا خشتو الرجفة وقال لي (بشجعكم) ...
أساليب المخارجات كتيرة عند المريخاب وفاهمنها كويس ... لازم يلقو مخرج يغطو بيهو خيبتهم..
هسة عليكم النبي جنس فصاحتهم الفي المنبر دي في زيها مغلوبين وملطشين وطيش المجموعة (حقتنا نحن) .. ومشتتنهم نحن وبعد دة بي قوة عين يجو يقولو ليك(مازمبي)..
والمحلي ذاتو ما عندكم ليهو طريقة والهلال الشفناهو أمبارح دة شيلو شيلتكم معاهو..
تعريجة صغيرة..
قومو لفو.. وشوفو ليكم شغلة غير الكورة دي
|
Post: #2
Title: Re: غايتو يا المريخاب جنس حالة عليكم!!! محنتونا
Author: tmbis
Date: 10-19-2009, 12:12 PM
Parent: #1
| Quote: وحفيان مبسوط لمن اتغلب الهلال.. أمس لما القون التاني جا خشتو الرجفة وقال لي (بشجعكم) ... |
الله يجازيك يا (اساسي) خربت لينـا المريخاب كلهم ..
تعرف يا هشام يا اما اساي زميلنا دا خرب الناس دي .. يا اما المسالة دي (جينتك)
من الفين واتنين كلما الهلال يعصر ليهو فريق .. اساسي يقول والله انا بشجعكم .. نظام زغبير وكدا
مباراة حداشر سبتمبر الاخيرة .. والرش الشديد ..
اتصل على اساسي وكان في رحلة الحوامة الخارجية .. والزوغان من الرش .. بيكون لافي جدة دي شارع شارع ..
رسلت ليهو رسالة دردقة كدا بتاعت جس نبض شان احد دبيها موقعو بعدما فشل القوقل ايرس يلتقطو لي ..
الوكت داك كانت الكورة اتنين واحد يادوبك ..
قال لي الكورة كم كم ..؟
قلت ليهو الكورة اتنين واحد للهلال .. دسيت عليهو قون ايفوسا .. شان اعصابو ما تبوظ ..
قال لي والله مبرووك ليكم .. انا الليلة قاعد اشجع فيكم .. والله حنني .. في اللحظة ديك قلت ليهو الكورة تلاتة زي السم ... قال لي الجاب التالت منو قلت ليهو .. ايفوساااااااا
بعد شوية اسمع ليك التلفون تييت .. تييت .. تييت 
|
Post: #4
Title: Re: غايتو يا المريخاب جنس حالة عليكم!!! محنتونا
Author: وليد محمد المبارك
Date: 10-19-2009, 12:20 PM
Parent: #2
يا جماعة
كورة الهلال وبرشونة بتين ؟
|
Post: #5
Title: Re: غايتو يا المريخاب جنس حالة عليكم!!! محنتونا
Author: عمار يس النور
Date: 10-19-2009, 12:37 PM
Parent: #2
دي حالة مرضية التي تصيب المرخرخين
إسمها متلازمة احداث 11 سبتمبر
شوف العينة دي
حالة متأخرة جدا :
|
Post: #3
Title: Re: غايتو يا المريخاب جنس حالة عليكم!!! محنتونا
Author: عثمان جلال الدين
Date: 10-19-2009, 12:18 PM
Parent: #1
يا هشام إنت في الوصيفاب ديل
ياخ مزمل أبو الفاهم ذاتو قالوا في غيبوبة من الكرة الانفرد بيها كاريكا..
تقولي شنو وتقولي منو..
أمنياتي لك..
|
Post: #6
Title: Re: غايتو يا المريخاب جنس حالة عليكم!!! محنتونا
Author: Hisham Mansour
Date: 10-19-2009, 12:42 PM
Parent: #3
طبعاً الشكل الفيهو المريخاب هسة واضح...
بحاولو يدارو علي خيبتهم الكبيرة السنة دي...
السنة الفاتت جاتهم سكرة كدة وشالو الممتاز وبقو زي الكديس الاتخيل نفسو أسد ... والسنة دي السكرة فكت ورجعو تاني لي ملطشتهم..
منتظرين منهم شنو يعني غير كدة...
فريق ما عندو أمل في الممتاز .. ودي مقتنعين بيها.. وقالو قفلو ملفو..
طيب كاس من (سيكافا) ما بطال.. جو التكاسة وطيروها ليهم في ريسينهم..
قالو يشوفوها في أبطال أفريقيا(طبعاً دي بطولتنا حقت الكبار) .. وقمنا طفشناهم (يعني طيش مجموعتنا ..
تاني يقولو شنو.. يطلعو الشوارع كيف عشان يفرحو
يلقوها وين الفرحة غير (مازمبي غلب الهلال) أخجلو ليكم خجلة ساي يا المريخاب..
|
Post: #7
Title: Re: غايتو يا المريخاب جنس حالة عليكم!!! محنتونا
Author: Hisham Mansour
Date: 10-19-2009, 12:44 PM
Parent: #6
شايفين ..
(حالة وليد الفوق دي نموذج بسيط)
|
Post: #8
Title: Re: غايتو يا المريخاب جنس حالة عليكم!!! محنتونا
Author: Hisham Mansour
Date: 10-19-2009, 12:57 PM
Parent: #7
بعدين يا (تمبس) شنو الحركات البتعملها مع (أساسي) دي..
ذكرتني النكتة بتاعت الحنكوش الفي الأمارات العندو كديسة إسمها (سوزي) ومرتبط بيها جداً وبضرب طوالي يسأل منها.. ولي التعترو يوم الكديسة ماتت وضرب جا ود عمو جديد من البلد ورفع التلفون وبعد السلام قاليهو (كديستي سوزي كيف؟) صاحبك طوالي رد قال ليهو (ماتت) الحنكوش يا الله مرق منها بعد غيبوبة طويلة .. والجماعة بعاتبو في ودعمو بقولو ليهو كان توصل ليهو الخبر براحة براحة .. تقولي ليهو (سوزي) بتلعب .. طلعت السطوح.. وقعت من السطوح ... وديناها المستشفى .. دخلت في غيبوبة .. حتى تجي تقول ليهو ماتت عشان يتقبل الخبر..
بعد أسبوع من الكلام دة أم الحنكوش ماتت .. وفي نفس اليوم ضرب تاني.. ولي التعترو تاني رفع ليهو ود عمو داك.. سألو أها (ماما كيف؟) قال ليهو طوالي(ماما في السطوح)..
......................
دحين يا تمبس قون إيفوسا دة كان تخليهو شوية.. خليهم علي قون النسابة دة كان كفاية...
|
Post: #9
Title: Re: غايتو يا المريخاب جنس حالة عليكم!!! محنتونا
Author: Hisham Mansour
Date: 10-19-2009, 01:13 PM
Parent: #8
في واحد بي غادي إسمو (حمزاوي) ألحقوهو
|
Post: #10
Title: Re: غايتو يا المريخاب جنس حالة عليكم!!! محنتونا
Author: tmbis
Date: 10-19-2009, 01:24 PM
Parent: #8
| Quote: قال ليهو طوالي(ماما في السطوح).. |
يخرب بيتك ياخ ..
هووي يا بتاعين المريخ والله من مصلحتكم اكتبو لي بكري يشطب الزول دا .. الزول دا لي قدام بيغلبكم براهووووو
|
Post: #11
Title: Re: غايتو يا المريخاب جنس حالة عليكم!!! محنتونا
Author: Hisham Mansour
Date: 10-19-2009, 01:38 PM
Parent: #10
يا تمبس أخوي ...
قالو سيد الرايحة بفتش خشم البقرة..
الناس ديل مرقة فرحة للشوارع بي مريخهم الشفناهو دة ما أظن...
عارف انا كنت واقف في شارع الشنقيطي في أمدرمان منتظر قلت يمكن يطلعو فرحانين عشان المريخ غلب فريق عطبرة داك ... إسمو شنو؟؟؟ ياخي الفلقوهم ديك..ما اتذكرتو ...
الغريبة ... ما طلعو.. يكونو خايفين يفلقوهم هنا ولا شنو؟؟؟
|
Post: #12
Title: Re: غايتو يا المريخاب جنس حالة عليكم!!! محنتونا
Author: Hisham Mansour
Date: 10-20-2009, 10:55 AM
Parent: #11
الجماعة لسة حايمين مالهم؟
|
|