Post: #1
Title: شكراً د. نافع علي نافع ...!!!
Author: Ahmed musa
Date: 10-17-2009, 10:50 AM
بالواضح كدا وبعيدا عن أي مزايدات سياسية أنا بحب الراجل ده
ولمان يقول {الأحزاب تلحس كوعها} تجد مساماتي الروحية كلها بتردد
كوعها
كوعها
كوعها
ولمن يقول {يشوفوا حلمة أضانهم} ... ذات المسامات تردد وراه بفرح طفولي
أضانهم
أضانهم
أضانهم
بعيد عن مزايدات السياسة ... يمكن بمنطق عقلاني كدا الواحد بتفق مع الناس البقولوا
ماصاح يقول كدا ...عشان دي أحزاب كبيرة ... وأحزاب كانت حاكمة بالديمقراطية
مشوهة ما مشوهة ياها ديمقراطية
إنشاء الله تبقى ديمقراطية أكلوا توركم وأدوا زولكم ...
علينا إحترامها ... وحزب المؤتمر الوطني بصراحة غلبتوا الديمقراطية عمل إنقلاب
غلبوا الإنقلاب عمل ديمقراطية
أها دي السياقات السياسية على قول زولنا النضام بتاع المنبر
بجيب إسمه بعد شوية
لكن زي ماقالو {القلب وما يهوى} ... أي ممكن أطلع مظاهرات مع المتظاهرين
ممكن أصرخ بعلوا صوتي تسقط تسقط يا إنقاذ!!!
وأفلق أي عربية أفتكرها بتاعة واحد من الجماعة
لكن لحظة يطلع {نافع} تلقاني ...شحححححح زي الصبت فيني مطرة أو (نطرة) بالمصري الصعيدي
وده ما موضوع الشكر .... موضوع الشكر جاي قادم شوية
|
Post: #2
Title: Re: شكراً د. نافع علي نافع ...!!!
Author: Ahmed musa
Date: 10-17-2009, 05:09 PM
Parent: #1
أها جيت راجع
...
...
...
ناس كتار عندهم رأي في دكتور نافع ...
كل واحد عندوا سببوا
وفيهم السبب الوجيه وفيهم المغرض وفيهم اللي الله سااااي ما بدوروا
وده من حقهم طبيعي أي زول الناس تختلف فيه وحوله
وكتتير قاعد أسمع البقول ليك ماعارف عذب منوا
وماعارف سوا شنو لمنو
وماعارف ليك شنو في شنو
إلخ
أها من حقكم ... لكن ياخوانا الريدة دي ... يعني ريدة الله ورسوله دي بيد زول ؟؟؟!!!
...
...
...
هو طبعا بصلي معانا الصبح في السيدة سنهوري جنبنا (نظام جدعة وكدا) ...
ده طبعا أيام الإيمانيات الفُل (full imaniat days) ...
لمان خفت
قلت ياجنا ...أوعاك تكون بتجي الصبح عشان زولك
(طبعا زولك دي إستنادا لأغنية ما تجيب إسمه الهواء بقسمه)
فبجي ألقاه ليك قااااعد قبلي وقلبي بقول ليك
شححححححح
(دي شحححححح غير الشححححح القبيل ديك)
وصدقوا أو لا تصدقوا مرة قلت الا أجي ليك يوم قبالوا
فشلت في كتيرمن المرات
لكن الرفاق ناس الحركة الشعبية ما قصروا ....
برجع ليكم أوريكم خدموني في القصة دي كيف ؟؟؟؟؟
|
Post: #3
Title: Re: شكراً د. نافع علي نافع ...!!!
Author: Ahmed musa
Date: 10-17-2009, 08:59 PM
Parent: #2
رجعت ...!!!
أها ...
بديت أفكر
وأفكر
وأفكر
ووصلت لفكرة خطيرة هي ضرورة متابعة أخبار الصحف السياسية
وتحليلها
وقراءة ماوراء سطورها
تابعت خلافات المؤتمر الوطني
قريت كل ماكتب ــ تقريبا ــ وحللته
قريت خلافات الشريك 2 (الحركة الشعبية)
من تيار أولاد قرنق
وتيار أولاد المؤتمر الوطني فرع الحركة
والتغيير الديمقراطي
من قبل ما يبقى ديمقراطي
وقبل حتى مايبقى تغيير
قريت خلافات الشريكين بفرح
وتوقعت كثير من النتائج بحكم الخبرة الإكتسبتها
وتحققت
وفجأة حدث ما كنت أتوقعه
أو أحلم به ...
حدثت المعجزة ...أو المفاجأة عشان ما نبالغ ...!!!!
|
Post: #4
Title: Re: شكراً د. نافع علي نافع ...!!!
Author: أحمد عبدالوهاب الأحمدى
Date: 10-17-2009, 09:08 PM
Parent: #1
| Quote: وده ما موضوع الشكر .... موضوع الشكر جاي قادم شوية |
الله يجيبو يوم الشكر ده
|
Post: #5
Title: Re: شكراً د. نافع علي نافع ...!!!
Author: Ahmed musa
Date: 10-18-2009, 04:24 PM
Parent: #4
| Quote: الله يجيبو يوم الشكر ده |
يوم الشكر جاي يا أحمدي ياخوي
شكرا جزيلا
...
...
...
أها أكيد كلنا بنتذكر زنقة المؤتمر الوطني
في طاحونة الحركة الشعبية بتاعة (حكومتك وخليناها)
و(حردت) الحركة الحكومة
شالت شنطها ومشت جوبا
أها المؤتمر الوطني أعصابوا باظت
وقعد يقول
ولاشغالين بيهم
ولاشغالين بيهم
ولا ...
لمان الناس قالوا ياخوانا الجماعة ديل مالهم بكرروا في ولا شغالين بيهم كدا ؟؟!!!
قلت يابوحميد دي فرصتك تاني إلا بعد سقوط المؤتمر الوطني في الإنتخابات
وفي الشايفوا في أحزابنا القاعدة دي ...اليوم بتاع السقوط ده بعيد شوية
يبدوا الكلام في الرياض
يشيلوا شنطهم وهوووووب جوبا
يكملوا يشيلو شنطهم ويجوا قاعة الصداقة
ياعمك أنتهز الفرصة دي ...المؤتمر الوطني ده بالشكل ده فايز فايز
أها أقوم ليك الواطة ضلام
وفللي على صحن الجامع
إلا أعاين يمين وأعاين شمال
والله لا نافع ولا عويناته!!!
|
Post: #6
Title: Re: شكراً د. نافع علي نافع ...!!!
Author: Ahmed musa
Date: 10-20-2009, 06:40 AM
Parent: #5
معليش إنقطعت يومين لأني كنت في زنقة يسارية
يسارية من اليسار السوداني
عندي صاحبي ماعنده علاقة بالنت أصلا
من وين ماعارف عرف شكري لد. نافع
وشكري سببوا شنو زاتو لسه ما إتعرف بشكل رسمي
أها جاني (وللعلم هو ما يساري منظم) يعني يساري ساي كدا
ودخلني ليك في حيص بيص سياسي
إتكلم لي عن جدلية الهزل في مواضع الوطن
وعن الصراع الدراماتيكي في ظل صراع الحضارات
وعن التطور التاريخي للحركة العمالية
وعن
وعن
وعن
لحدي ماحسيت إني خاين موش للوطن
بل للإنسانية
وخاين حتى لناس مابعرفهم
ومابعرفوني
وفي دول تانية حتى
قلت يا أبوحميد كدي وقف الكتابة وراجع مسائل الجدليات دي
أها ده الوقفني ...
وراجع ليكم
...
...
...
لكن وليس دفاعا عن نفسي
مسائل الحب دي خارج السياقات السياسية على قول زميلنا المإتذكرت إسمه لسه
مثلا أنا مكسر عدييييييل كدا في سوزان رايس
يعني لمان أوباما يقول في إبادة جماعية في السودان :
تلقاني بقول ليه بصوت عالي بيسمعوه أولادي حتى
إبادة جماعية بتاعة حبوبتك
ومرات بتاعة فنلتك
لكن لمان سوزان رايس لمان تقول في إيادة جماعية تلقاني بصرخ بصوت يسمعوه الجيران
جدا
إبادة جماعية جدا جدا
أها ده موقف سياسي ممكن زول يحاسبني بيه ؟؟!!!
|
Post: #7
Title: Re: شكراً د. نافع علي نافع ...!!!
Author: طارق أحمد عثمان
Date: 10-20-2009, 07:03 AM
Parent: #6
أحمد موسى سلام يا راجل يا كتاب
ياخي إنت ذاتك بتتحب
وده حب برضو خارج السياسة
|
Post: #8
Title: Re: شكراً د. نافع علي نافع ...!!!
Author: Ahmed musa
Date: 10-20-2009, 08:37 PM
Parent: #7
Quote: ياخي إنت ذاتك بتتحب
وده حب برضو خارج السياسة |
شكرا يا طارق ياخوي
والله لي كم بكتب زي المجنون
ماجاني غيرك والأحمدي
مافي زول يقول ليك (أجرك وصللي)
غايتو ده منبر يا تنبذ يا تتنبذ فيه
الله المستعان
...
...
...
لكن ولا يهمك ياطارق نواصل قصتنا انا وانت واحمدي
أها نرجع لقصتنا الفرعية المتفرعة من قصتنا الأصلية
قلت دخلت ليك الجامع
أفتش يمين افتش شمال
عمك د.نافع مافي !!!!
ياربي ده ما الجامع ؟؟!!!
أطلع أعاين ليك ياهو الجامع زااااتو
نفس الجامع
نفس شارع الستين
لافتة عصام الخواض زاتها بتاعة دريم لاند
الجنب الجامع
قطعة:
قطعة دي بفتح القاف وسكون الطاء وفتح العين على وزن كسرة ..
ياربي عصام الخواض عملت شركته دي هنا صدفة ؟؟؟!!!
سؤال برئ وبعيد عن نيران ود مدني المولعة بي هناك
نواصل :
قلت يووهوووووو
رجعت ليك يوهووووو دي ما بتنسجم والمسجد
ولقيت راجل دقنه دقن آل بدر حسب ما متخيلهم انا
عاين لي
تبسمل
تحوقل
تـ ... عمل حاجة تالتة ما متذكرها
خفت ... مرقت ... مشيت الوضاية أعدت الوضوء
قلت شرطا وضوئي بطل ...
ونواصل ....
|
Post: #9
Title: Re: شكراً د. نافع علي نافع ...!!!
Author: hassan gadein
Date: 10-21-2009, 06:09 AM
Parent: #8
سرد سلس فى انتظارك واصل
|
Post: #15
Title: Re: شكراً د. نافع علي نافع ...!!!
Author: Ahmed musa
Date: 10-21-2009, 05:39 PM
Parent: #9
| Quote: سرد سلس فى انتظارك واصل |
شكرا حسن أخوي ...
وحأواصل بإذن واحد واحد
ربك يستر ...
|
Post: #10
Title: Re: شكراً د. نافع علي نافع ...!!!
Author: hassan gadein
Date: 10-21-2009, 06:10 AM
Parent: #8
سرد سلس فى انتظارك واصل
|
Post: #11
Title: Re: شكراً د. نافع علي نافع ...!!!
Author: ibrahim alnimma
Date: 10-21-2009, 07:28 AM
Parent: #10
Quote: شكرا يا طارق ياخوي
والله لي كم بكتب زي المجنون
ماجاني غيرك والأحمدي
مافي زول يقول ليك (أجرك وصللي)
غايتو ده منبر يا تنبذ يا تتنبذ فيه
الله المستعان |
السيد احمد موسي تحياتي :
نتابع صامتين ، ننفع؟؟؟؟؟؟؟؟
اعتقد الزيارة ممكن تتم بالقرأة فقط اليس كذلك؟؟؟؟؟؟
المهم قلنا نوري كيبوردنا
|
Post: #12
Title: Re: شكراً د. نافع علي نافع ...!!!
Author: ابوبكر يوسف إبراهيم
Date: 10-21-2009, 10:06 AM
Parent: #11
[red] هذه أمثلة من مهد الديمقراطيات الحديثة:
بريطانيا: أربعة أحزاب
أمريكا : ثلاث أحزاب على الأكثر
في بعض دول أوروبا الشرقية ( وهي جزء من الإتحاد السوفيتي السابق ): 11 حزب على الأكثر ( لحداثة التجربة)
من عشق أهل السودان للديمقراطية:
السودان تفوق في عدد الأحزاب على أعرق الديمقراطيات ( فبعد ثلاث تجارب ديمقراطية منذ الإستقلال عام 1956 وحتى الآن ؛علماً بأن كل فترة ديمقراطية تعقبها إنقلابات)
عدد الأحزاب السودانية حتى اليوم بسم الله ما شاء الله :
( 51 ) حزب حتى الآن والمسبحة ما زالت تكر ومرشح العدد ليصل إلى (58) قبل نهايةالعام
يتصف الغالب الأعم من هذه الأحزاب السودانية بأن(98%)ا إما طائفية أو جهوية أو إثنية أو دينية!!! .. الفرق ما بين الديمقراطية والفوضى شعرة ، مثل هذا العدد من الأحزاب الذي لم تشهد مثله أعرق الديمقراطيات ليس له مسمى غير " فوضى " أي أننا تخصصنا في قطع الشعرة، شعرة معاوية) !!
برافو .. برافو .. ومرحب ديمقراطية .. نحن دائماً نعشق الكثرة لأننا كرماء!!!!!
|
Post: #13
Title: Re: شكراً د. نافع علي نافع ...!!!
Author: Ahmed musa
Date: 10-21-2009, 05:35 PM
Parent: #12
Quote: بريطانيا: أربعة أحزاب
أمريكا : ثلاث أحزاب على الأكثر
في بعض دول أوروبا الشرقية ( وهي جزء من الإتحاد السوفيتي السابق ): 11 حزب على الأكثر ( لحداثة التجربة)
من عشق أهل السودان للديمقراطية:
السودان تفوق في عدد الأحزاب على أعرق الديمقراطيات ( فبعد ثلاث تجارب ديمقراطية منذ الإستقلال عام 1956 وحتى الآن ؛علماً بأن كل فترة ديمقراطية تعقبها إنقلابات)
|
أبوبكر يوسف أبراهيم ...
إنت قاصد البوست ده ؟؟؟!!!
أخوك ضعيف في الرمزيات شوية ...
|
Post: #27
Title: Re: شكراً د. نافع علي نافع ...!!!
Author: ابوبكر يوسف إبراهيم
Date: 10-26-2009, 08:28 AM
Parent: #13
[red]
الأخ موسي
بالعربي عاوز أقوليك إستعد لكل هذا العدد الهائل من أهل الكلام الذين سيشنون عليك هجوماً فاتوا بعددأحزابهم أعرق الديمقراطيات والسبب الريدة الكاتلاك وخلتك تقول كلمة حق وصدق .. ناس ديل لسه بتألف في أحزاب جديدة وعندهم كلام وراي في الناس وطبعاً كل حوب حيأسس صحيفة وكأن العندنا ما كفى وطيعاً كلهم ليهم راي في زولك البتريدو .. الله يحميك ويحميهو .. أها فكيت ليك الشقرة .. أشكرك
|
Post: #28
Title: Re: شكراً د. نافع علي نافع ...!!!
Author: Ahmed musa
Date: 10-26-2009, 01:19 PM
Parent: #27
Quote: الأخ موسي
بالعربي عاوز أقوليك إستعد لكل هذا العدد الهائل من أهل الكلام الذين سيشنون عليك هجوماً فاتوا بعددأحزابهم أعرق الديمقراطيات والسبب الريدة الكاتلاك وخلتك تقول كلمة حق وصدق .. ناس ديل لسه بتألف في أحزاب جديدة وعندهم كلام وراي في الناس وطبعاً كل حوب حيأسس صحيفة وكأن العندنا ما كفى وطيعاً كلهم ليهم راي في زولك البتريدو .. الله يحميك ويحميهو .. أها فكيت ليك الشقرة .. أشكرك |
فكيت الشفرة
لكن قطعت قلبي
بإحتمال الهجمة السياسية برغم الحجاب الخاتيه فوق
حجاب (بعيد عن السياسية)
قديما ... وكنا صبية بعض الشئ
كنت أجالس الصديق (الصادق الرضي)
والذي أعتبره وشقيقه (عاطف خيري)
من أشعر شعراء هذا الجيل
ولست مرجعا في الشعر
كنت أجالس صديقي (الصادق) وقلت له
ـ الصادق أخوي كدا تعال نناقش علاقتنا دي بشكل علمي
فاجاب بسرعة معروف بها :
ـ نناقشها بشكل (علمي) كيف وهي علاقة (أدبية) !!!
فلم أنس التعليق برغم مرور السنوات
شكرا صديقي ونواصل برغم الكتاحة اللافة حول البوست ...
|
Post: #14
Title: Re: شكراً د. نافع علي نافع ...!!!
Author: Ahmed musa
Date: 10-21-2009, 05:37 PM
Parent: #11
Quote: السيد احمد موسي تحياتي :
نتابع صامتين ، ننفع؟؟؟؟؟؟؟؟ |
أبراهيم ...
تنفع ونص وخمسة ...
أنا بس إستغربت ...
زي ماقال الممثل المصري ...
وديتوا الشعب المصري وين
70.000.000 مصري ولا ألاقيش ولا واحد ؟؟؟!!!
شكرأ أبراهيم للمتابعة وسأتابع ...
|
Post: #16
Title: Re: شكراً د. نافع علي نافع ...!!!
Author: Ahmed musa
Date: 10-21-2009, 06:04 PM
Parent: #14
يوهوووووو
كانت صيحة أعجاب بنجاح خطتي
أن أصل قبل د. نافع علي نافع...
ويوهوووووو
هي في الأصل مقتبسة مع التحوير من أفلام الغرب الامريكي
على ذمة الأخوان الهنود الحمر
عاين يمين شمال
وقعدت ومديت صدري زي متر ونصف فخر لقدام
ونظرت نظرة إلى الشيخ البدراوي
الذي رمقني سابقا ببسملة واخواتها
فأنا الآن في الصفوف الامامية
وغمك لا ستي ولا عويناتها
والرفاق بتوع الحركة قالوا والله السماء ده قريب
آدي حردة
المؤتمر الوطني ملأ أيامها الإعلام
ماهامينا
ماينسجبوا كان إنسحبوا
بي جازهم (على قول نقابة سائقين المؤتمر الوطني)
اليشتتوا ... (الحرفيين .. فرع ميكانيكا السيارات مؤتمر وطني وكدا!!!)
وأنا والله كل الكان بهمني جية قبل عمك ...
إلا بعد شوية أسمع ليك
شحححححححح
الله!!!
دي شحححححح؟؟؟
من وين الـ شحححححححح دي ؟؟!!!
وبدون ما أحس أشوف ليك عمك قعد وراي طواااالي
وشححححححح +شحححححححح + شحححححححح تربيع ...
ياهو عمك زااااااااتو ...!!!
|
Post: #17
Title: Re: شكراً د. نافع علي نافع ...!!!
Author: mayada kamal
Date: 10-21-2009, 06:23 PM
Parent: #16
Quote: بالواضح كدا وبعيدا عن أي مزايدات سياسية أنا بحب الراجل ده
|
يادوووب لقيت زول زيييي في دكتور نافع .....
الزول دا اكتر زول صادق وامين في الحكومة
عقله يوزن دهب
تعرف لمن مسكوه ملف دارفور
انا قلت يادوووب الحركات المسلحة الدافورية حتهمد في علبها
الله لا جاب يوم شكره
سلامات يا استاذ احمد موسى
|
Post: #18
Title: Re: شكراً د. نافع علي نافع ...!!!
Author: معاوية عوض الكريم
Date: 10-21-2009, 06:28 PM
Parent: #17
| Quote: الزول دا اكتر زول صادق وامين في الحكومة |
ميادة كيفك
|
Post: #19
Title: Re: شكراً د. نافع علي نافع ...!!!
Author: Ahmed musa
Date: 10-21-2009, 07:52 PM
Parent: #17
Quote: تعرف لمن مسكوه ملف دارفور
انا قلت يادوووب الحركات المسلحة الدافورية حتهمد في علبها
|
لاحول الله !!!
هسع الجاب علبها في شعور إنساني غير معلب شنو ؟؟؟
ميادة بت حلتنا
حبابك
...
...
...
غايتو الجابك لا يجيب عقابك
هههههه
بهظر والله ماتاخدي فيها حاجة
أخوك اليومين ديل فارق الجد فراق الطريفي
...
...
...
شفتي معاوية جابها ليك (إسكرو) كيف ؟؟؟
ميادة كيفك ؟؟؟!!!
كلمتين وخمسمية معني ...
غايتو البوست ده لو باظ حأتنقل لبوست {شكرا د. نافع علي نافع...!!!} في نسخته المحصنة
|
Post: #20
Title: Re: شكراً د. نافع علي نافع ...!!!
Author: د.نجاة محمود
Date: 10-21-2009, 09:14 PM
Parent: #19
يا مكفولي
الله يديك العافية
كتابة منشار في الراس بس
بالجد اعجبت بغورها
حيجوك ناس السطوح اسع و يخلو ريختك طير طير
|
Post: #21
Title: Re: شكراً د. نافع علي نافع ...!!!
Author: Ahmed musa
Date: 10-21-2009, 09:47 PM
Parent: #20
Quote: كتابة منشار في الراس بس
بالجد اعجبت بغورها
حيجوك ناس السطوح اسع و يخلو ريختك طير طير |
د. بيان البيان كفيلي في الفضاء الواسع ده
ناس السطوح راجعت ليك بوستاتهم لقيتهم غرقانين ليك للحلقوم
شئ سياسة
وشئ سياسة
وشئ سياسة
وبعدين منهم الختيت بيني وبينه شخيط
لا يجيني
وإن جاني لا يسألني
وإن سألني
لا ينتظر مني رد
أها شنو ليك في الإستراتيجية الفطيرة دي ؟؟!!!
...
...
...
معاوية ...
صدقني منتظر دعم من ساسة قدام
يفسروا
وأنا مابقصر
لكن في المبتدأ كدا
حبابك
إن ما شالك البوست
بشبلك ما بين حروفه
تسلم ياوجيه الحرف ...
|
Post: #22
Title: Re: شكراً د. نافع علي نافع ...!!!
Author: ود محجوب
Date: 10-21-2009, 10:11 PM
Parent: #21
عارف يا استاذ أحمد موسى انا بعجبنى الزول الدغرى
زيك كدا ((البقول للزول الكويس انت كويس فى عينو))
|
Post: #23
Title: Re: شكراً د. نافع علي نافع ...!!!
Author: Ahmed musa
Date: 10-22-2009, 07:21 PM
Parent: #22
Quote: عارف يا استاذ أحمد موسى انا بعجبنى الزول الدغرى
زيك كدا ((البقول للزول الكويس انت كويس فى عينو)) |
دغري منو يا ود محجوب
ده كسير تلج لزوم الإنتخابات وكدا ...
ما تركز معاه شديد
عموما تشكراتنا لكم للمرور الجميل
...
...
...
أها بعد الـ شحححححححح
قلبي وجعني ... يازول أرجع لعمك ده خلي يقعد مكانه
وهنا نحنحة الإمام...
نحنحة نعودها دوما بصلاة الصبح
لا أعلم لها سبب ولكن ستكون لازمتي لو توليت الإمامة يوما ما
ثم همهمة عدد من الشيوخ
وعلى رأسهم الشيخ البدرابي
ورجعت خطوتين قلت أقدم عمك
أكبر مني سنا
ومستشار رئيس
ومعاه جماعة من الأمن
قلت يمكن صلاتي قدام الدكتور تدخل بشكل متهور في الخيانة الصغرى
مالك ومال التعقيدات
وأنا راجع ...
والبدرابي بربع إبتسامة رضا
وقلبي بقوى حبتين
إلا يقوم عمك الدكتور يدفرني ليك دفرة شديدة خلاص
لحدي ما ضلوعي طقطقت
(الزول ده عمروا كم ؟؟؟)
دفرة ماعرفت سببها
ياربي زعلان من ناس الحركة ؟؟؟
زعلان من إنشقاقات ؟؟؟؟
زعلان مني شخصيا
ششششششححححححح
بخلاف الـ شححححححح الملازمانا هنا
ياعمك إنت خلاص أندر فوكس
رحت في شوربة ركعتين
ونحنحة مامفهومة
وهمهمة ...!!!!!
|
Post: #24
Title: Re: شكراً د. نافع علي نافع ...!!!
Author: Ahmed musa
Date: 10-23-2009, 09:08 AM
Parent: #23
بسم الله الرحمن الرحيم
{هل أتي على الإنسان حين من الدهر لم يكن شيئا مذكورا ...}
صورة الإنسان هذه السورة تحاصرني دوما في المواقف
وصوت الإمام {شيخ الزين} والدنيا تودع الظلام وتستقبل الفجر بتناغم تام
{...إن الأبرار يشربون من كأس كان مزاجُها كافورا (5) ...عينا يشرب بها عبادالله يفجرونها تفجيرا}
وتتفجر مشاعر أخشاها
وأتفجر علوا
وأنسى د.نافع
والمعارضة
وأهلي
وأجدني أحاول الوقوف على أطراف أصابعي
إلى أين أريد الوصول ؟؟!!!
وصوت {شيخ الزين} يعلو في مواضع
فتعلو النفوس
وينخفض في مواقع
فتعلو النفوس أكثر
{إن هؤلا يحبون يحبون العاجلة ويذرون وراءهم يوما ثقيلا}
ودميعات تتساقط لتزيد غشاوتي غشاوة
فأرى ولا أرى
وأسمع ولا أسمع
وأخاف حتى أرجل الجارين اللتان تلتصقان بأرجلي بحكم سد (الفُرج)
وأبحث لنفسي عن فرج
وأتمنى لوقرأ الشيخ
{ياليتني كنت ترابا}
فأنهار في مناطقي الداخلية
|
Post: #25
Title: Re: شكراً د. نافع علي نافع ...!!!
Author: Ahmed musa
Date: 10-24-2009, 05:01 PM
Parent: #24
*
|
Post: #26
Title: Re: شكراً د. نافع علي نافع ...!!!
Author: Ahmed musa
Date: 10-25-2009, 07:07 PM
Parent: #25
واصلنا الصلاة
وصوت الحبيب المصطفى يحيطني بسياج من الأمن
{أرحنا بها يابلال}
والطمانينية تغسلني حتى أخمص قدمي
وتنتهي الصلاة
فأنظر إلى الدكتور
والدكتور يرمقني بنظرة غضب وعتاب
ويوصيني
ألا أتخلف لشخص أبدا عن مكاني
فأفرح
وأخرج إلى الطرقات متظاهرا
صائحا بالفرح
منددا بلحظات قد مرت
وكيف مرت
...
...
...
وتمر الأيام
وتفوتني صلاة الفجر يوما ما
فأهرع على ألحق ولو شيئا ما
فأدخل
والجميع خارجون
ويواجهني د.نافع
فينظر لي نظرة
ليس لها من قالب
ويمد لي وعاءا من ألمونيوم
فأنظر بداخله
لأجده مليئا
باللبن !!!!
وصوت الآذان يوقظني
لألحق بصلاة الفجر
وكان هو هناك
في مكانه المعتاد
يصلي بخشوع
ليس بينه وبينه خالقثه من حجاب ...
|
Post: #29
Title: Re: شكراً د. نافع علي نافع ...!!!
Author: Ahmed musa
Date: 10-27-2009, 04:14 PM
Parent: #26
هذا ماحدث كشئ عارض أحببت أن أقصه
ولكنه ليس سبب الشكر
...
...
...
ذات الجامع
وذات مساء وانا ذاهب للصلاة
وجدت خور كبببببييييير
وعربات كُتتتتااار
شئ لودرات
شئ كرينات
شئ قلابات
وشئ شئ
خور بجد جد
الاحول ولاقوة إلا بالله !!!!
الحاصل شنو ؟؟؟؟
|
|