تمبس ...... اسماعيل عباس ...... شكرا جزيلا ...!!!!

Post: #1
Title: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 12:13 PM
Parent: #0

والله ما كنت قايلاهو كده ....

انتوا يا اخوانا الكيبوردات دي بتجنن الناس ولا شنو؟؟؟

بالجد شكرا علاء الدين ... معروف كبير لن ننساهو ما حيينا

اما اسماعيل عباس .. فهو كما تخيلته ... شكرا اسماعيل ..وافر الامتنان

Post: #2
Title: Re: تمبس ...... اسماعيل عباس ...... شكرا جزيلا ...!!!!
Author: tmbis
Date: 10-14-2009, 12:18 PM
Parent: #1

Post: #3
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 12:18 PM
Parent: #1

اتصل بي ابي من السعوديه في ذات يوم , قال لي : داليا , احمد ولد جارنا الطاهر عندو حمى شديده , عندو ملاريا لانو جا مع امو من السودان قريب ...

ولان والدي طبيب فقد اجرى للطفل الفحوصات اللازمه وصدق توقعه .. فهو يعاني من ملاريا .. والاعراض تشتد عليه ...

بحث والدي في كل الصيدليات عن حبوب او حقن antimalaria ولكن للاسف , لا تتوفر في السعوديه سوى حبوب الفانسيدار .. وهي غير مناسبه لعمره الذي يبلغ سنتين كما ان المقاومه

منها اصبحت عاليه ... لا بد من احضارها من السودان على وجه السرعه ...

Post: #4
Title: Re: تمبس ...... اسماعيل عباس ...... شكرا جزيلا ...!!!!
Author: tmbis
Date: 10-14-2009, 12:25 PM
Parent: #3

تتخيلي يا داليـا من شدة ما مشتاق لي حبوب الملاريــا
قررربت احيركم فيها ...

بلاي اسماعيل دا ركزي عليهو شديد .. قال لي حبوب داليـا كباشي دي أخرو ليها الطيارة ..

Post: #6
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 12:32 PM
Parent: #4

Quote: بلاي اسماعيل دا ركزي عليهو شديد .. قال لي حبوب داليـا كباشي دي أخرو ليها الطيارة ..

غايتو في ناس في الدنيا دي بس متعودين على المشاكل والمهاترات .. لوووووول .. عليك الله مهاترات ما سمحه ؟؟؟ كان نفسي من زمان اكتبها في اي حته , يعني مثلا اقول ليك

زميل المنبر تمبس .. الرجاء البعد عن( المهاترات ) لانو انا ما بحب (اهاتر) هنا وانا اصلا (المهاترات) دي ما (خطي) في (الكتابه الاسفيريه) فلو سمحت ما (تعوج) البوست ...

لووووووووول ... والله الكلام دا سمح شديد خلاس .. لوووووول ...

لو سمحت يا تمبس ما تخرب القصه الناس ديل قاعدين يسمعوا ...

Post: #7
Title: Re: تمبس ...... اسماعيل عباس ...... شكرا جزيلا ...!!!!
Author: tmbis
Date: 10-14-2009, 12:40 PM
Parent: #6

Quote: لو سمحت يا تمبس ما تخرب القصه الناس ديل قاعدين يسمعوا ...

بالمناسبة:
كنت عايز اكتب ليك ..
الزميلة داليـا كباشي
أشكرك على هذا البوست .. دي أول مرة اتداخل فيها معاك
لكن اتذكرت إني قبل كدا اتداخلت معاك ..
اسمعي ..
أنا حقو تكتبي لي بوست براي والله .. اسماعيل ما تعب زي تعبي دا .. اسماعيل موقفين ليهو طيارة وساعة وتلت بس من الخرطوم للرياض ..
إنت عارفه انا حصل لي شنـو واللا ساااكت كدا بس ..؟

Post: #9
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 12:45 PM
Parent: #7

اسمع يا ولدنا ... انت داير تحكي القصه دي براك ؟؟؟؟ ارح ... قو اهيد ...

انا البوست دا زااااااااااتو بخليهو ليك ... اها رايك شنو؟؟؟؟

بس تدفع لي اسماعيل باقي قروشو .. لانو عندو حق في البوست دا طبعا .. ولا شنو ؟؟؟؟

Post: #5
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 12:26 PM
Parent: #3

ولانني اثق كثيرا ان هذا المنبر فيه الكثير من الاخوه , ممن هم على استعداد لتقديم ارواحهم لك ... فقد استفسرت عن اي من البورداب المسافرين الى السعوديه وفعلا .. عرفت من

علاء الدين (تمبس ) ان البوردابي العزيز (اسماعيل عباس ) سيتوجه الى الرياض تاني يوم الصباح ... كان الوقت ضيقا جدا , وقد اجتهد (تمبس) ليوفر لي رقم هاتف اسماعيل عباس

في السودان , وفعلا , اتصلت به عصرا , وقد ابدى كل ترحيب لحمل الدواء وطلب مني ملاقاته في المطار تاني يوم الصباح ...

كانت مهمه (تمبس) هي ايصال الدواء لابي في منطقه تبعد عن الرياض 8 ساعات تقريبا ... وكانت بالفعل مشكله حقيقيه ...

حضرت الى المطار صباحا .. ولاااااااااااااااااقيت ليكم اسماعيل عباس شخشيا .....!!!

Post: #8
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 12:41 PM
Parent: #5

اسماعيل عباس ...

يا سلااااااااااام ... الزول دا زول سمح شديد خلاص ... اصر انو (يغشى) يشيل مني الدواء في المستشفى عشان ما يكلفني مشوار المطار .. لكن انا كنت وصلت المطار فعلا ...

رجل هميم ...انيق... شهم .. ابتسامته تسبقه .. يخيل اليك انك تعرفه منذ زمن بعيد ....

اخذ مني لفه الدواء بعد ان عملنا (عشره ونسه) سرييييييعه امام الصاله ... وكما يقول بكري : ما التقى( بوردابيان) الا كان( المنبر) ثالثهما ...!!!

كانت مهمه الاستاذ اسماعيل , ايصال الدواء الى (تمبس) كي يرسله على جناح السرعه ...

ودعت الاستاذ اسماعيل .. وودعني بي بشاشته .. وافترقنا .. وقد طبع في نفسي احساسا جميلا وطمأنينه لا حدود لها ...

شكرا يا أستاذ اسماعيل ...

ملحوظه : كان عندي مشكله رهيبه , هي انو , انادي اسماعيل عباس دا اقول ليهو شنو...؟؟؟ يا عمو ؟؟ ما جايه .. الزول دا صغير عدييييييل , يا اسماعيل ساي ؟؟ ما جايه برضو ..
غايتو يا استاذ اسماعيل لك من العتبى والعفو .. تحياتي اليك .. ولي المدام .. ولي ولدك وبنتك ... شفع موووبالغه .. حلوين حلاه ..

Post: #10
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 12:53 PM
Parent: #8

المهم يا اخوانا ...

ما نطول في الحكي ... لانو تمبس دا كرهنا الحته دي وكرهنا البوست دا زااااتو ..

وصلت الحبوب الى يد زميل المنبر تمبس , بعد ان تأخرت الطائره قريب الساعتين ....

تفضل تمبس بأخذ (اللفه) من منزل الاستاذ اسماعيل تاني يوم الصباح ( غايتو جنس كسل ) لوووووول ...

Post: #11
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 01:02 PM
Parent: #10

قام تمبس بالاتصال بي والدي في المنطقه الشماليه , واوصاهو ان يرسل الدواء عن طريق النقل الجماعي في نفس اليوم ...

بعد الكثير من المحاولات مع اصحاب (البصات) والمشرفين ...

واللذين رفضوا اخذ (دواء) على متن باصاتهم ...

لم يجد تمبس بدا من ايصال الدواء بي ......؟؟؟؟؟؟؟؟؟

Post: #12
Title: Re: تمبس ...... اسماعيل عباس ...... شكرا جزيلا ...!!!!
Author: خدر
Date: 10-14-2009, 01:05 PM
Parent: #11

Quote: بي ......؟؟؟؟؟؟؟؟؟

الله يستر

___
عارفو انا تامبا لمن يتجلي يشوتها ضفاري

Post: #13
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 01:15 PM
Parent: #12

Quote: عارفو انا تامبا لمن يتجلي يشوتها ضفاري

خدر صاحبي ازيك ... تصدق كلامك دا اقرب لي (عين ) الحغيغه , لانو صاحبك (تامبا) عمل فيها خلااااااااس الا يوصولو هاند تو هاند !!!!

قوووووووم يا تامبا اركب الطياره , وامشي وصل الدواء بي نفسك لحددددددددي هناك ... ياخ دي عمله تعملها ؟؟؟؟

نقول ليك بس رسلو .. بي النقل الجماعي , بي فيديكس , بي الحمام الزاجل .. بأي حاجه .. تقوم تركب تمشي عديييييل .. عليك الله ما بالغت يا تامبا ؟؟؟؟

Post: #14
Title: Re: تمبس ...... اسماعيل عباس ...... شكرا جزيلا ...!!!!
Author: خدر
Date: 10-14-2009, 01:26 PM
Parent: #13

Quote: قوووووووم يا تامبا اركب الطياره , وامشي وصل الدواء بي نفسك لحددددددددي هناك

بركة الجات علي كدي .. كنت متخيلو حا يودي الدواء السودان

Quote: بي فيديكس

ركز يا تمبس .. فيدكس موش فِيكس (بتاع الزُكام داكـ)

داليا صاحبي الجديد
تمبس ده كبيرو الـ DHL براحة عليكـ الله

Post: #17
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 01:34 PM
Parent: #14

خدر ... صاحبي ...

اول حاجه تعال هنا ..ليه تكتب لي .
Quote: داليا صاحبي الجديد
؟؟؟؟؟؟؟؟؟؟

انت قايلني انا د... ...لد ولا شنو ؟؟؟ لوووول .. عليك الله يا طارق بعد الخطوط الانثويه دي كلها تقول لي صاحبي ؟؟؟ يا زول ما مشكله بتجيني في بوست تاني وبقول لي صاحبتي .. لوووووول

اها .. بالمناسبه تمبس دا كان جا حايضربك في مقتل , لانو (فيديكس ) دي اقترحها هو ..؟؟؟؟ تصدق؟؟؟ والله الولد دا اتطور عدييييييل مش كدي ؟؟؟ لووول

بعدين موضوع الدي اتش ال دا بقى نقرشه بسكويت سااااي , انت قايل شنو ؟؟ يا عمك اسي الولد دا مركب مكنه عجيبه .. سي فووود وما عارف شنو كده ..لوووول

طارق تسلم والله الونسه معاك موبااااااالغه ...

Post: #21
Title: Re: تمبس ...... اسماعيل عباس ...... شكرا جزيلا ...!!!!
Author: Awadallah Bashir
Date: 10-14-2009, 01:42 PM
Parent: #14

سلام ياقوم..

اهاوالوليد حصل ليهو شنو؟
انشاالله قام.؟؟؟

Post: #24
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 02:15 PM
Parent: #21

استااااااااااااذ عوض الله بشيييير شخشيا ... هلا والله , اسفرت وامطرت واستهلت ثم امطرت ....

الود كويس اسي والحمد لله , وضرب لي هسسسسسسه , قال لي داير (مثدث) زي حق عمو عوض الله الفي الصوره دا ؟؟

موووش دا كلاشنكوف ؟؟؟ اها الولد طلباتو بسيطه ياخ , داير مسدس بس ... ممكن يا استاذ ؟؟؟

تحياتي ... مودتي الاكيده ..

Post: #15
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 01:28 PM
Parent: #13

شكرا اساعيل عباس .. (الاستاذ) ..

شكرا تمبس ....

شكرا بورداب الرياض عموما ...

شكرا بكري ابو بكر ..

Post: #16
Title: Re: تمبس ...... اسماعيل عباس ...... شكرا جزيلا ...!!!!
Author: Faisal Elrasheed
Date: 10-14-2009, 01:30 PM
Parent: #13

Quote: قوووووووم يا تامبا اركب الطياره , وامشي وصل الدواء بي نفسك لحددددددددي هناك ... ياخ دي عمله تعملها ؟؟؟؟

جنس خفه لوووووووووووووووووووولز

Post: #18
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 01:38 PM
Parent: #16

Quote: جنس خفه لوووووووووووووووووووولز

انا قلت يا فيصل الود دا بيساعدنا وكده ... لكن شكلو انفعل شدييييد موش ؟؟؟ لووووووووول

Post: #20
Title: Re: تمبس ...... اسماعيل عباس ...... شكرا جزيلا ...!!!!
Author: Faisal Elrasheed
Date: 10-14-2009, 01:42 PM
Parent: #18

Quote: انا قلت يا فيصل الود دا بيساعدنا وكده ... لكن شكلو انفعل شدييييد موش ؟؟؟

هوانفعال نصاح لووووووووووووووولز

لكن طلع (نجيب) بالجد يا علاء يا استاذ تمبس لووووووووووول

Post: #30
Title: Re: تمبس ...... اسماعيل عباس ...... شكرا جزيلا ...!!!!
Author: علاء الدين صالح
Date: 10-14-2009, 08:00 PM
Parent: #20

Quote: لكن طلع (نجيب) بالجد يا علاء يا استاذ تمبس

الحديث بيقول علِّموا أولادكم السباحة والرماية وركوب الخيل.. الخيييييل
ركوب الطيارات دي لا كانت في المُقرَّر ولا علَّمناها ليهم
دي تمبس قطعا من راسو ساكِت
لوووووووول

Post: #31
Title: Re: تمبس ...... اسماعيل عباس ...... شكرا جزيلا ...!!!!
Author: Faisal Elrasheed
Date: 10-14-2009, 08:24 PM
Parent: #30

Quote: لحديث بيقول علِّموا أولادكم السباحة والرماية وركوب الخيل.. الخيييييل

والله لكن يا علاء الدين استاذ تمبس طلعته وزن الريشه لوووووووولز

يعني الكيس ده كان ادوك ليه اظنك كان عملته البدع ووصلتو .. ياخ انت بكون عندك بساط الريح حق سندباد تتذكره . كااااااااااااااااااااااااااك

هو ناس الموردة ديل كلهم وصالين للحاجات كده ... ياخ لقيتكم فلزات عدييييييييييل

لول

Post: #37
Title: Re: تمبس ...... اسماعيل عباس ...... شكرا جزيلا ...!!!!
Author: علاء الدين صالح
Date: 10-15-2009, 07:55 AM
Parent: #31

Quote: والله لكن يا علاء الدين استاذ تمبس طلعته وزن الريشه لوووووووولز

يعني الكيس ده كان ادوك ليه اظنك كان عملته البدع ووصلتو

أبداً يا فيصل..
مستحيل طبعاً أشيل الدوا واركب طيّارة امشي أوصِّلو
انا صاح كنت حأمشي مطار الرياض أسلِّم الكيس للكابتن في يدو وأوصيو
ومن هناك جري على الصالة الدولية تذكرة 24 ساعة مخفَّضة الرياض الخرطوم الرياض
وبعدين....
- الو.. أنا بتكلَّم معاكم من الإمدادات الطبية.. بس عايز أتأكَّد إنو الكابتن السعودي وصَّل ليكم كيس الدوا..
عشان لو ما استلمتوهو.. انا 5 ساعات كدة وبجيب ليكم كيس تاني.
لووووووول

Post: #19
Title: Re: تمبس ...... اسماعيل عباس ...... شكرا جزيلا ...!!!!
Author: فيصل نوبي
Date: 10-14-2009, 01:39 PM
Parent: #16

Quote: قوووووووم يا تامبا اركب الطياره , وامشي وصل الدواء بي نفسك لحددددددددي هناك ... ياخ دي عمله تعملها ؟؟؟؟
و ما رسل حميدة ولا ساقو معاهو ؟

_
نسيت ما حميدة بيوضب في (بُره)

Post: #22
Title: Re: تمبس ...... اسماعيل عباس ...... شكرا جزيلا ...!!!!
Author: محمد عبد الماجد الصايم
Date: 10-14-2009, 01:48 PM
Parent: #19

باللاي يا تمبس عارفني عاطل اليومين ديل
ما كان نمش سوا ونكسب الأجـر (قصدي قروش الطيارة)

غايتو .. تمبس دا ياها الراكوبة

سمعة دا ما عندنا فيهو كلام
وجه بورداب الرياض المشرق
ياخ تلج زي التلج زاتو!

وين يا؟

Post: #25
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 02:25 PM
Parent: #22

Quote: باللاي يا تمبس عارفني عاطل اليومين ديل
ما كان نمش سوا ونكسب الأجـر (قصدي قروش الطيارة)

انت ما عارفو صاحبك دا ؟؟؟ حااااااااااااسد .. بس فلاحتو (يردم في الترع) .. لوووووووول ..

Quote: وين يا؟

مبالغه !

Post: #23
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-14-2009, 02:10 PM
Parent: #19

هي يا نوبي ازيك ... عليك الله شفت الود الشفت دا ؟؟؟ مبالغه مووووش ؟؟؟

Quote: نسيت ما حميدة بيوضب في (بُره)

لو سمحت الناس ديل اصحابي , وامبارح حاولت اصلح بيناتهم لكن للاسف , عمك اتسلط على الفيلم وداهو منتزه ابو عنجه الترفيهي طوالي ...

تحياتي نوبي ... وين انت ما (ظاهر) ؟؟

Post: #26
Title: Re: تمبس ...... اسماعيل عباس ...... شكرا جزيلا ...!!!!
Author: tmbis
Date: 10-14-2009, 03:03 PM
Parent: #23

خدر
ومحمد الصايم ..
وفيصلين ..

إنتو يا وهــم .. أخوكم ليهو تلاتة ايام يزرزرو فوقو .. زرزرة قبورة .. ماف واحد فيكم جاب لي عمود .. ولا في واحد فيكم يجي يدق لي شنكل يخارجني من براثن ( جاك طويلة) حسع لقيتو البوست دا ساقط كدا .. وعايزين تنكرشوا ..
اتخارجو ياخ ..

قالو اسماعيل عباس وتمبس .. يعني قانونياً بعدما اسماعيل عباس يجي بعداك تعالو نحلووو لينا هنا دا

عمران .. حتى إنت زاتك بقيت زيم ..؟

Post: #27
Title: Re: تمبس ...... اسماعيل عباس ...... شكرا جزيلا ...!!!!
Author: Faisal Elrasheed
Date: 10-14-2009, 07:22 PM
Parent: #26

Quote: إنتو يا وهــم .. أخوكم ليهو تلاتة ايام يزرزرو فوقو .. زرزرة قبورة .. ماف واحد فيكم جاب لي عمود .. ولا في واحد فيكم يجي يدق لي شنكل يخارجني من براثن ( جاك طويلة) حسع لقيتو البوست دا ساقط كدا .. وعايزين تنكرشوا ..
اتخارجو ياخ ..

الله يسألني جيت شايل عمودي بي سمكه وشيته وشوربتو
وسلطة الفواكه والمخللات والذي منه ... جيت والله من الصباح افتش للصيوان لقيت ناس النظام العام شالو زولك بي عدته لووووووولز

ــــــــــــــــــــــــــــــــــــــــــــــــــــــــــــــــــــــــــــــ
قلته لي لفحته الكيس والطيارة جاك زول لووووولز امكانيات يا عمك

Post: #28
Title: Re: تمبس ...... اسماعيل عباس ...... شكرا جزيلا ...!!!!
Author: عمران حسن صالح
Date: 10-14-2009, 07:34 PM
Parent: #26

Quote: عمران .. حتى إنت زاتك بقيت زيم ..؟
لووووووووووووووووووووووول !!!
كنت نايم والله .. دابي شفتها !!

_________
يا وغد أنا فاقد أرقامي كلها !!
عليكـ اللعنة

Post: #29
Title: Re: تمبس ...... اسماعيل عباس ...... شكرا جزيلا ...!!!!
Author: طارق جبريل
Date: 10-14-2009, 07:39 PM
Parent: #28

غايتو البوست دة فيهو جنس لفحي

Post: #32
Title: Re: تمبس ...... اسماعيل عباس ...... شكرا جزيلا ...!!!!
Author: علاء الدين صالح
Date: 10-14-2009, 08:33 PM
Parent: #23

Quote: لو سمحت الناس ديل اصحابي , وامبارح حاولت اصلح بيناتهم لكن للاسف , عمك اتسلط على الفيلم وداهو منتزه ابو عنجه الترفيهي طوالي ...

أوكييييي
آي سيييي
انا يادوب فهمت الشغلانية
يا دكتورة كان تقولي كدا من الصباح

تمبس باللاي تاني لمن تفتح بوست ذو مضامين ودلالات مطاطية.. أكتب تحت:
"للشرح والحواشي يُرجى الإطلاع على تفسير بت الكباشي"

Post: #33
Title: Re: تمبس ...... اسماعيل عباس ...... شكرا جزيلا ...!!!!
Author: ودرملية
Date: 10-14-2009, 11:16 PM
Parent: #32

عفوا

Post: #34
Title: Re: تمبس ...... اسماعيل عباس ...... شكرا جزيلا ...!!!!
Author: وجن
Date: 10-15-2009, 00:52 AM
Parent: #33

لالالالا
مبوووبالغاااات عديل
والله ضحكتوني وانا تعبانه
يجازي محنكم
ازيكم ومشتاقون

Post: #35
Title: Re: تمبس ...... اسماعيل عباس ...... شكرا جزيلا ...!!!!
Author: Awadallah Bashir
Date: 10-15-2009, 04:57 AM
Parent: #34

كان الجنا دا ما كمل الكورس باقي الحبوب دي ما بتبوظ....

حقو ترجع تاااااني...

Post: #36
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-15-2009, 06:59 AM
Parent: #32

Quote: "للشرح والحواشي يُرجى الإطلاع على تفسير بت الكباشي"

بالجد بالجد , ما عندك اي حل غير انك تكون استاذ تمبس ...!!!!! لووووووووول ..

Post: #38
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-15-2009, 10:21 AM
Parent: #36

Quote: غايتو البوست دة فيهو جنس لفحي

طارق ود عمي ... نورت البوست ... عليك الله شفت جنس الحاله دي ؟؟؟

الواحد ما يشكرلو زول في البلد دي علي يجوهو ناطين في حلقو .. لوووووووول ..

بعدين اهلي الشوايقه ديل ما بيقصروا مع زول وبيريدوا الزول الما بيقصر معاهم ... تسلم يا طارق على المرور ..

Post: #39
Title: Re: تمبس ...... اسماعيل عباس ...... شكرا جزيلا ...!!!!
Author: وليد محمد المبارك
Date: 10-15-2009, 10:28 AM
Parent: #38

بوست انصرافي

ثم مط شفتي باتجاه اليمين وصدر صوتا (جيشيييييييييييييييييييت)

Post: #40
Title: Re: تمبس ...... اسماعيل عباس ...... شكرا جزيلا ...!!!!
Author: Faisal Elrasheed
Date: 10-15-2009, 10:36 AM
Parent: #39

Quote: ثم مط شفتي

الصواب : مططت شفتي بضم التاء والتشديد علي اليا والشتات بعد ذلك حيث ان اومديت بوزي عشان تريح نفسك

Quote: (جيشيييييييييييييييييييت)
جشيت هو صوت المسطرين حين خمه للمونه او الطين او الرمل المخلوط بالاسمنت والماء

معليش يا علاء الدين استاذ تمبس.. وليد ده حالته من مستكشفي امدرمان جا بعد كولمبوس طوالي

وليد ما تحرجنا مع الاجانب مية مرة قلته ليك غير الكيبورد حقك ده لووووووووووولز

Post: #41
Title: Re: تمبس ...... اسماعيل عباس ...... شكرا جزيلا ...!!!!
Author: وليد محمد المبارك
Date: 10-15-2009, 10:42 AM
Parent: #40

يا فيصل والله انادي ليك ود البشرى هسع

Post: #42
Title: Re: تمبس ...... اسماعيل عباس ...... شكرا جزيلا ...!!!!
Author: HAIDER ALZAIN
Date: 10-15-2009, 10:50 AM
Parent: #41

Quote: يا فيصل والله انادي ليك ود البشرى هسع

ـــــــــــــــ

Post: #43
Title: Re: تمبس ...... اسماعيل عباس ...... شكرا جزيلا ...!!!!
Author: وليد محمد المبارك
Date: 10-15-2009, 11:02 AM
Parent: #42

شفتو لبت كيف يا ود الزين

حي انااااااااااااااااا

Post: #44
Title: Re: تمبس ...... اسماعيل عباس ...... شكرا جزيلا ...!!!!
Author: lana mahdi
Date: 10-15-2009, 11:11 AM
Parent: #43

إسماعيل عباس ماعندي تجربة معه لكن كلامك يثبت أنه جدع
أما تمبس (فبالتجربة) زول تثقي فيهو وتعتمدي عليهو وإنتي مغعمضة..
زول نضيف يا داليا

Post: #46
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-15-2009, 11:16 AM
Parent: #44

اوووووو لنا مهدي .. ازيك يا عزيزه , وبركه في الشوفه ...

Quote: أما تمبس (فبالتجربة) زول تثقي فيهو وتعتمدي عليهو وإنتي مغعمضة..
زول نضيف يا داليا

مافي شك ... تسلمي على المرور ...

Post: #53
Title: Re: تمبس ...... اسماعيل عباس ...... شكرا جزيلا ...!!!!
Author: Faisal Elrasheed
Date: 10-15-2009, 01:11 PM
Parent: #44

Quote: وإنتي مغعمضة.

Post: #45
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-15-2009, 11:12 AM
Parent: #43

لو سمحت يا وليد , فيصل دا صديغي الصدوغ , ما تتعامل معاهو بالشكل دا ,,,

بعدين لو عندك اي التواث ثقافي ضد الزول دا , ممكن تقولو عديييييييل , عشان نشارك معاك بالرؤى وكده ,, لووووووووول

Post: #47
Title: Re: تمبس ...... اسماعيل عباس ...... شكرا جزيلا ...!!!!
Author: وليد محمد المبارك
Date: 10-15-2009, 11:25 AM
Parent: #45

انت مالك اصحابك كلهم عاملين كده ؟

تمبس
وحميده
وفيصل

والله مصيبتك مصيبة

Post: #48
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-15-2009, 11:36 AM
Parent: #47

Quote: تمبس
وحميده
وفيصل

و وليد ...!!!

فعلا مصيبه !!!

Post: #49
Title: Re: تمبس ...... اسماعيل عباس ...... شكرا جزيلا ...!!!!
Author: ismeil abbas
Date: 10-15-2009, 12:45 PM
Parent: #48

العزيزة..داليا...

بصراحة..كما تصورتك..

خلينى أسرد القصة من جهتى كاملة مع إتصال تمبس بالتلفون لى..وأول إنجاز له مفيد فى هذا الشهر من جهتى..

لك التحية وراجع ليك برواقة إن شاء الله..مع المستندات..

Post: #50
Title: Re: تمبس ...... اسماعيل عباس ...... شكرا جزيلا ...!!!!
Author: Faisal Elrasheed
Date: 10-15-2009, 01:03 PM
Parent: #48

Quote: و وليد ...!!!

ككككككككككك كبكبه لووووووووولز

شوفو لي وش ملون مجخمس حرجلي

Post: #51
Title: Re: تمبس ...... اسماعيل عباس ...... شكرا جزيلا ...!!!!
Author: وليد محمد المبارك
Date: 10-15-2009, 01:08 PM
Parent: #50

يا زول ما صاحبها ولا اي حاجة

Post: #52
Title: Re: تمبس ...... اسماعيل عباس ...... شكرا جزيلا ...!!!!
Author: Faisal Elrasheed
Date: 10-15-2009, 01:08 PM
Parent: #41

Quote: يا فيصل والله انادي ليك ود البشرى هسع

الم ترا كيف ان ظهره اصبح يقمر عيش بعد تلك المعركه التي جاء فيها متخففا يحمله هوا المروحه فردم حتي امن ؟؟ ده شرح لمعلقه ملاسي في وصف سالف الذكر صاحبك اب ورقه

لووووووووووووووووووولز

Post: #54
Title: Re: تمبس ...... اسماعيل عباس ...... شكرا جزيلا ...!!!!
Author: علاء الدين صالح
Date: 10-15-2009, 01:42 PM
Parent: #52

ٍSorry

Post: #55
Title: Re: تمبس ...... اسماعيل عباس ...... شكرا جزيلا ...!!!!
Author: JAD
Date: 10-15-2009, 02:14 PM
Parent: #54

Quote: والله ما كنت قايلاهو كده ....

أحياناً الأسماء تكون سبباً في تضليل الانطباع ..

تمبس رجل حلو الشمائل .. وشهم وأخو أخوان لا يشق له غبار ..

أما إسماعيل عباس فهو بشر غير عادي ..

شكراً يا دكتورة .. وشكراً للوالد الدكتور الهميم .. وأثمن حرصه على مساعدة مرضاه ..

Post: #56
Title: Re: تمبس ...... اسماعيل عباس ...... شكرا جزيلا ...!!!!
Author: ismeil abbas
Date: 10-15-2009, 05:13 PM
Parent: #55

أولآ شكرآ ألأخت/لنا مهدى..

شكرآ اخى جاد..وكل المتداخلين..

تعرفى ياداليا.:

Quote: ولانني اثق كثيرا ان هذا المنبر فيه الكثير من الاخوه , ممن هم على استعداد لتقديم ارواحهم لك

ثقتك فى محلها..فى ناس عرفتهم فى المنبر ده من أخوات واخوان يخجلوك والله..أقرب إليك من اهلك احيانآ..ومن المؤكد كلهم فى عمل الخير مابقصروا..

وبعدين إنت جيتى تسألى عن طريق زول شيخ عديل.((تمبس))ده ممكن يعمل حاجات خارقة عشان يسعد زول...ربنا يحفظو يارب...يركب طيارة..يركب حمار يقلب الهوبة المهم موضوع حاجة الناس ينقضى..بيسعى على قضاء حوائج الناس بصورة جيدة وربنا بوفقو فى الحتة دى حسب نيتو..

طبعآ ضرب لى تلفون قال لى يازول كيفك بعد التحية والسلام وسلم على ألأولاد...قال لى بدى تلفونك ده لداليا زميلتنا فى المنبر قلت ليهو المريخابية..ده مكسب..

طبعآ تم التنسيق وألأولاد كانو سعيدين بيك وبأتصالك..وزوجتى
قبل ماتشوفك قالت لى داليا دى طيبة خلاص..قلت ليها إنت شفتيها؟؟؟؟أنا ما شفتها...

طبعآ حبيبنا شبكنى تلفونات..أها قمت..أها ما إتحركت..أها.أها..طبعآ كرهنى البلى زى ما بقول..

الله يديهو العافية حريص حرص..حاجة حريصة بس...نسقنا وإستلم ألأمانة.وشكلو..طار...عشان يوصل المشوار..تانى يويمن لا حس ولا اثر..وياريت الناس لو وزن الريشة زى مابقولوا فى عمل الخير..

الحمدالله إنو الدواء وصل وربنا يحفظك ويحفظ ابوك ويهنيكم يارب....تقديرى وتحياتى الشديدة..

Post: #57
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-16-2009, 06:12 AM
Parent: #55

جااااااااااااااااد ... صباح الخير صديقي الذي احترم ...

فعلا زي ما قلت , والله تمبس واسماعيل اخوان لا يشق لهم غبار ... اخوان الحاره بالجد ...

تحياتي اليك .... وافر شكري ومودتي الاكيده ...

Post: #58
Title: Re: تمبس ...... اسماعيل عباس ...... شكرا جزيلا ...!!!!
Author: محمد طه الحبر
Date: 10-16-2009, 06:50 AM
Parent: #57

العزيزه داليا الكباشي

ثقتك في محلها وهنالك الكثير بعد اسماعيل عباس

اسماعيل عباس ما عارف اشكرك كيف وانت عارف براك

تحياتي

Post: #59
Title: Re: تمبس ...... اسماعيل عباس ...... شكرا جزيلا ...!!!!
Author: Yassir Tayfour
Date: 10-16-2009, 07:13 AM
Parent: #57

مرة يجيك أستاذ علاء الدين يقول ليك: النجيب تمبس الذي فعّل وترك ونصب الشرك وما قتل الأسد، ومرة تجيك دكتورة داليا تقول ليك: ما نصب الشرّك ولكن قتل الأسد، ويجوك ناس خضر وكاروشة يقولو ليك: لا كان في أسد ولا كان في شرّك، وتمبس ذاتو اليوم داك ما كن في، كان بيلعّب باسكِت بوول، حيرتونا معاكم، يعني هسي كتلو ولا ما كتلو؟
____
تمبس ده أنا شهادتي فيهو "مزبوحة" بالزين، عشان كده ما حا أقول فيهو أي حاجة

Post: #60
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-16-2009, 07:48 AM
Parent: #59

ياسر طيفور ... ازيك ...

Quote: النجيب تمبس الذي فعّل وترك ونصب الشرك وما قتل الأسد

Quote: ما نصب الشرّك ولكن قتل الأسد

Quote: لا كان في أسد ولا كان في شرّك

شرك ؟؟؟؟ اسد ؟؟؟؟؟

الواحد راسو لف عديل ... منو الاسد ومنو الشرك ؟؟؟ سرييييييع ..

Post: #61
Title: Re: تمبس ...... اسماعيل عباس ...... شكرا جزيلا ...!!!!
Author: أحمد الصديق
Date: 10-16-2009, 08:36 AM
Parent: #60

شكراً داليا
نعم ما ذكرت من الأخوان
وإن كان تمبس ده زودتي ليهو العيار شوية.(بدون لوول)
أول مقابلتي لهذا التمبس , ما صدقت.
زول رقيق وحميم وأخو أخوان , وفي المنبر
رابط واحد في عمود ومدخل واحد في صفيحة.
التحية للجميع.

Post: #62
Title: Re: تمبس ...... اسماعيل عباس ...... شكرا جزيلا ...!!!!
Author: داليا الكباشى
Date: 10-17-2009, 10:23 AM
Parent: #61

Quote: وإن كان تمبس ده زودتي ليهو العيار شوية.(بدون لوول)

تمبس ؟؟؟ العيار ؟؟؟ زوتو ؟؟؟ شويه ؟؟؟؟؟

وكماااان بدون لوووول ..؟؟؟

طيب اقول ليك حاجه ... (شكرا لمرورك الجميل) (بدون لوووول برضو) ..

Post: #63
Title: Re: تمبس ...... اسماعيل عباس ...... شكرا جزيلا ...!!!!
Author: ismeil abbas
Date: 10-17-2009, 10:35 AM
Parent: #62

Quote: العزيزه داليا الكباشي

ثقتك في محلها وهنالك الكثير بعد اسماعيل عباس

اسماعيل عباس ما عارف اشكرك كيف وانت عارف براك

تحياتي

داليا ..شكلك إنت بت شيوخ....الحمدالله الجا محمد طه الحبر الكباشى ومر من خلال بوسطك ده انا كده ممكن اتنفس الصعداء..وتاكدت من إعطاءه كلمة المرور...الف مبروك يازول من خلال الزولة المبروكة دى....