Post: #1
Title: حِـكـاية الشايقي اللاقـيتو فـي القـطـر ...
Author: معاوية المدير
Date: 10-13-2009, 08:06 AM
Parent: #0
{font size=4}
توطئة...
كان رجل لطيف وظريف جداً. صورة طبق الأصل لشخصية بت ميدوب في رواية
المرحوم الطيّب صالح (موسم الهجرة إلى الشمال). عليه، الرجاء عدم المؤاخذة في
إيراد العبارات التى جرت على لِسانه مع بعض التحفظ...
بداية شتاء العام 1984 ، رصيف محطة اتبرا يعج بالمسافرين والمودعين، وبابور
قطر كريمة يستعد للتوجه للخرتوم. بوفية المحطة مزدحم بالمسافرين، عشان الباسطة
طبعاً بالسمنة وكده في بوفية محطة عطبرة. في هذه الأثناء، كنا أنا وصديقي نجوب
الرصيف جيئةً وذهاباً في محاولة لتحديد مكان في إحدى عربات القطر نتسلل إليهِ
عند ساعة الصفر.
كنا كِلآنا يفضل السفر على (السطح)، نحب التسطيح لأنه مُريح ومجان، يعنى لاغلبة
مسافرين، لا غلبة كماسرة، لاغلبة عساكر، لكنه في ظروف الشتاء صعب جداً نسبة
لأنّ سقط صحراء العتمور ولفح زمهريره لايُحتمل...
|
Post: #2
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-13-2009, 08:08 AM
Parent: #1
{font size=4}
اتبرا جميلة، وحلوة، وناسها طيبين...
ونحن نتسكع فوق الرصيف أذكر الكثير من ناس اتبرا يعرفوننا ونعرفهم، الواحد فينا
زي السيّد علي الناس تنادى فينا يمين وشمال، ونحن مستمتعين بالونسة معهم وكذلك كنا
نستمتع بمغازلة الحسناوات المطلات من خلال نوافذ القطر.
حددنا عربية ونمرنا عليها مظبوط جداً. خالية من الإضاءة كحال جميع عربات القطر
الأُخرى وسطح يعنى ما فيها كنب ولا كراسي. بمجرد إطلاق الصافرة وتحرك القطر
قفزنا إلى داخل العربة التى كانت مليئة بالركاب.
تحرك القطر. الناس في العربة فى حالة صمت والظلام يتسكع في فضاءها إلا من بعض
بصيص الضوء يأتي وميضاً من خلال نوافذ العربة عندما يمر القطر بالقرب من عِمدان الكهرباء
في المحطات. هذا البصيص لايعطيك فرصة كافية لِتميّز ملامح الركاب داخل العربة.
حِليل القطر...
القطر جميل وبيفتح مجال للتعارف والتآلف والونسة، السبب الذى يجعل الرحلة نوع من
المتعة رغم مشقة السفر في ذلك الزمان.
المُهم، عمنا الشايقي ده هو البدا الونسة وكمان إستلمها يا قول أهلنا. شايقى ذو نسب في
الشايقية عميق وغريق، يعنى شايقى صِرف. لكنة شايقية عميقة وإنبهال فى الونسة لأبعد
حد ومفردات، جعلتنى والله العظيم أكون فى قمة المتعةالسبب الخلانى أشاركو الونسة لى
شقاوتى...
|
Post: #3
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-13-2009, 08:12 AM
Parent: #2
{font size=4}
أها، عمنا دا بداء يتكلم عن العِرِس فى زمنو (زي أخونا أنور التكينة) وما يصحبه من
إستعدادات، وتحضيرات، وهوايل.
قال مبتداءً حديثه بقسم غليظ لِيثبت أنّ كلامه حقائق: وحات سيدي، العرس فى الزمن
العلينا دا لغاويس ساكت. عِلِى زمنا أكان زمن زين، الزِرِيعىِ دى يقعدِن الحريم يسوّن
فيها قبل شهر.
وأحد سالوا: يا حاج الزريعة بتسوبيها شنو؟
ردَّ عليهو:هى عان نفر ده كمان، ضيفان الرماد بتدور تخلى خشُمُن ناشف. مِيا بيدوروا
يشربو. وواصل، ودق الرِيحِى دا كمان نضمو برا! بيجيبو الضفرة، وبِت السودان، وبِت
القِسيس ويلُخُو الدِلكِى والخُمرة. وحات سيدى، يومو اليجيبوها ليك، يجيبوها تريانىِ تنقط
من الدِهِن والكركار والرِيحِىِ، وبتدور لك عنقريب نصيح وكرابو شديد ويفُرشولك فوقو
العتنيبىِ الملونىِ وتقول كدى........
أنا على شقاوتي قلت ليهو: يا حاج عليك الله هسع ده كلام ده؟. ده عذاب. يا عمنا هسع
الريحة بقت بخاخ( عمنا طبعاً راخى أضانو وبيسمع والواطه ضلام)، عندك توليت، ومرايات،
وتجيك لابسة فستان النوم، والسرير دبُل نضيف ومفروش مليان مخدات والمرتبة إسفنج
( عمنا راخى أضانو ويصنّت) على اليمين يا عمنا المرتبة شِدة ما ليّنة تغتس فيها إنت
والمراة التقلعكن ما تتعرف. طوالى فى الحتة دى عمنا قاطعنى بصوت عالٍ شقَّ الضلام:
نان شِن الفايدىِ ما ودَر صُلُبا. إنفجرت الضحكات فى الضلام من من جميع أنحاء العربة.
وأنا سكتَ ساااااكت، وتانى أصلى ما فتحتَ خشمى معاهو، رغم إنه واصل ونستو، وكان
كل مرّة فى أثناء كلامو بيتعرض لى وهو ما قادر يشوفنى في الضلام: قُتَ لِى كيفِن المرتبة
يا المطموس، شغلتكُن دىِ شغلة طرطشِىِ ساكت. ويواصل: أها عارفين، تروح السوق،
تجيبلها توبين بنقالي، وتجيبلك كمان طِرقِىِ اللت زراق لى أُمها، النسابىِ كمان ليها مكانىِ،
المِطيميس قالىِ العنقريب كيفنو؟ والله حِكايِ! وِلادة الزمن ده اصليِ وِلادِيِ مبشتنىِ ساكت.
أنا ماسك خشمي على، وصاحبي الضحك كاتلو عدييييل كده. قلت له هامساً: أسمع يا فردة،
أنا الواطة قبل تفتح حا أزوغ بالرااااحة للسطح، إن شاء الله البرد يكتُلنى، بس عمك الشايقي
ده أصلو ما بخليهو الصباح يشوفنى...
|
Post: #4
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-13-2009, 08:14 AM
Parent: #3
{font size=4}
قبل الشمس تشرق إتسللتَ بالرااااحة، وكان الناس في حالة هجعة في تلك اللحظات، وعمنا
أتاريهو صااااحى وشاعر بحركتى وّل ما مشيت على باب العربة طوالى قال لي: بتدور
تِنسرِق منى يا الأغلـ..... أمانِىِ ماك ممسوخ، قُتلىِ المرتبة كيفنها؟ عِرِفتنىِ بدور ازُرك
وِكتين الواطة تصبح، مُو كدى؟.
الناس في العربية إنبهلوا بالضحك، وأنا بسرعة إتخارجتَ للسطح، وإضطريت أقطع
المسافة المتبقية للخرتوم في برد لا يعلمه إلا الله...
|
Post: #5
Title: Re: حِـكـاية الشايقي اللاقـيتو فـي القـطـر ...
Author: SHIBKA
Date: 10-13-2009, 08:19 AM
Parent: #4
في انتظار المواصلة
|
Post: #6
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-13-2009, 08:25 AM
Parent: #5
| Quote: في انتظار المواصلة |
مواصلة شنو يا شبكة؟
على اليمين عمك ده أنا أكان
وأصلته معاهو كان بقيت ضحكة
وسط الخرتوم. أقولك زغتَ مشيت
رأس القطر...
|
Post: #7
Title: Re: حِـكـاية الشايقي اللاقـيتو فـي القـطـر ...
Author: SHIBKA
Date: 10-13-2009, 08:48 AM
Parent: #6
| Quote: مواصلة شنو يا شبكة؟ |
عمي دا ما عرف ليك
كان حريف كان من وصلتوالخرتوم ينتظرك تحت لامن تجي ناطي وينط في رقبتك وتبقى لي هسة في التحلك منو
|
Post: #8
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-13-2009, 09:06 AM
Parent: #7
Quote: عمي دا ما عرف ليك
كان حريف كان من وصلتوالخرتوم ينتظرك تحت لامن تجي ناطي وينط في رقبتك وتبقى لي هسة في التحلك منو |
يا شبكة، أكان بينط في رقبتي
كان إنتظرتو أنا.
أقولك زي بت ميدوب في رواية
موسم الهجرة إلى الشمال. عشان
كده ما كان في حل غير إتخارج...
|
Post: #9
Title: Re: حِـكـاية الشايقي اللاقـيتو فـي القـطـر ...
Author: حسين محي الدين
Date: 10-13-2009, 09:44 AM
Parent: #8
مبالغة ياعمك
بس ما كان تطلع فوق
عشان تتم الحكي
سرد ممتع
|
Post: #10
Title: Re: حِـكـاية الشايقي اللاقـيتو فـي القـطـر ...
Author: المسافر
Date: 10-13-2009, 10:43 AM
Parent: #9
الله يهديك
جبت سيرة القطر..!
وناس الحكي..
تعرف مرة متردمين في التيرسو... مردومة ومضلمة
ولا نفس...
وعمك ... حكاي ... حكاي....منكي على طرف في الأرضي.. ما سكت
كل الردوم داك بالوا معاهو...
وفي محلك شباب جنس شلاقة ... ومجاضمة... ولا شافت ليها أدب .. قاعدين ليه في حلقو
ولا في زول نام لا حاجة
تعرف لما صبح الصباح الزول الحكاي ده طلع منو
حاج الفنوب
أغنى أغنياء عطبرة
واحد قال ليه ....
ده شنو ياحاج؟؟؟
الجابك هنا شنو؟؟؟
رد عليه.. براك شفت ونسة البارح دي
أدفع ليها تمن القطر زاتو
|
Post: #11
Title: Re: حِـكـاية الشايقي اللاقـيتو فـي القـطـر ...
Author: ياسر بيناوي
Date: 10-13-2009, 10:51 AM
Parent: #10
ياسلااااااااااااام يافردة
Quote: عشان الباسطة
طبعاً بالسمنة وكده في بوفية محطة عطبرة |
.
ما منعونا وكدة
يللا واصل ونحن متحكرين
والله مشتاقين
خالص الود
|
Post: #12
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-13-2009, 12:11 PM
Parent: #11
Quote: مبالغة ياعمك
بس ما كان تطلع فوق
عشان تتم الحكي
سرد ممتع |
والله يا حسين أخوي طلعتَ
مجبور في السقط، عمّك ما بيصاقع...
شكراً على الإطراء البيخلى الزول
راسو يطق الحيطة...
|
Post: #13
Title: Re: حِـكـاية الشايقي اللاقـيتو فـي القـطـر ...
Author: الفاتح شلبي
Date: 10-13-2009, 12:20 PM
Parent: #10
يا معاوية المدير, دحين المحيرني إنك بتحكي اللكنة الشايقية "كما انزل"
الجزء اللى انا ما فهمته ... لو ما زوغت للسطح الكان متوقع شنو ؟ موش الكلام ونسة ونوع من المقارنة ما بين جيله وجيلكم ؟
|
Post: #14
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-13-2009, 12:55 PM
Parent: #13
Quote: رد عليه.. براك شفت ونسة البارح دي
أدفع ليها تمن القطر زاتو |
سِرِى المسافر...
ســــلامـ...
ندفع نفوسنا زاتها حتى تعود
السكة حديد إلى ما كانت عليه.
كانت أروع مؤسسة إجتماعية في بلدنا...
|
Post: #15
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-13-2009, 02:13 PM
Parent: #14
Quote: ياسلااااااااااااام يافردة
.
ما منعونا وكدة
يللا واصل ونحن متحكرين
والله مشتاقين
خالص الود |
الشوق بحر يا كظـ ...
بس وحاتك عمك (في الليلة ديك)
ما خلالنا مُصران...
يا حليل الباسطة بالسمنة، ناس
الحيكومات منعونا وكده. الله يازاهم...
|
Post: #16
Title: Re: حِـكـاية الشايقي اللاقـيتو فـي القـطـر ...
Author: محمد أبوالعزائم أبوالريش
Date: 10-13-2009, 02:27 PM
Parent: #15
والله يا ود المدير عمّك (بت ميدوب) ده ما خاتي عليك.
ياخ الراجل يقول ليك عنقريب كرّابو مشدود، تقول ليهو أسفنجة وتواليت وحرير؟
كان رجيتو للصباح كان عمل ليك (كشف هيئة) عشان يشوفك بتتصرف كيف مع الأسفنجة.
|
Post: #17
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-13-2009, 09:49 PM
Parent: #16
Quote: يا معاوية المدير, دحين المحيرني إنك بتحكي اللكنة الشايقية "كما انزل"
الجزء اللى انا ما فهمته ... لو ما زوغت للسطح الكان متوقع شنو ؟ موش الكلام ونسة ونوع من المقارنة ما بين جيله وجيلكم ؟ |
وحاتك يا الفاتح كمان مانى شايقي...
أيوة مقارنة يا شلبي، لكن عمك بيستعمل مفردات مبالغة،
يعني ما بتقدر تتونس معاهو إلا في الضلام. يعني دكاكيني
وكده، عياناً بياناً بيبهدلك عشان كده أنا خارجت رقبتي...
|
Post: #18
Title: Re: حِـكـاية الشايقي اللاقـيتو فـي القـطـر ...
Author: سلمى الشيخ سلامة
Date: 10-14-2009, 00:00 AM
Parent: #17
الجميل معاوية
النحكى ليك حكاية جدى فى القطر
قال
ـ كنا ماشين عزاء فى بربر من الخرطوم ركبنا القطر
فى زول كل ماارفع عينى القاهو يعاين لى ويتكشم
وانا عامل متل التكنى ما شايفو
خلاس وكتين الكلام حرقو قال لى
ـ انت ياحاج بابكر مالك ما بتعرفنى ؟ ولا نسيتنى
قال ابوى عليه الرحمة
ـ اول كيفن بنساك ولا بنسى دقتى ليك عامن اول ؟
وحكى القصة حقت الدقة
قال ابوى بابكر
ـ زمان كنت "الكلام دا قبل خمسين سنة " ـ حينها ـ سايق بهايمى من بربر لاتبرا
ماشى براى الله وراسى ، فجاة طلع لى زول وقال لى
ـ جيب العندك
ما كضبت ورفعتو فوق وختيتو فى الواطة سولبتو ماخليت ليهو الا سروالو اللابسو
حتى حماره اخدتو ومشيت
زولكن من حكيت القصة دى تانى لمن وصلنا اتبرا عينى دى ما شافتو
على فكرة يا معاوية عندى نص طويل عن جدى دا لكين مابقدر انزله لانه المقام ما بسمح
لكنه كان راجلا طويل وكفته ان لحق "لفخ بيها زول " الله معاهو
بياكل ربع التمر قزقزه ساكت وبشرب ارطال من اللين صباح ومساء
الله على ابوى بابكر
رحمه الله كان زول سمح بلحيل
تسلم يا الحبيب
|
Post: #19
Title: Re: حِـكـاية الشايقي اللاقـيتو فـي القـطـر ...
Author: سيف الدولة كامل
Date: 10-14-2009, 02:39 AM
Parent: #18
نديديس الظريف,,, كيفينك يا ملك
والله كان انتظرت عمك للصباح كان واطاتك اصبحت ضلام
الحمد لله انك اتخارجت,, بس عليك الله اتخيل نفسك لسه
في القطر والدنيا ضلام واطلق العنان لخيالك الخصب
وكمل القصة لي الخرتوم.
|
Post: #20
Title: Re: حِـكـاية الشايقي اللاقـيتو فـي القـطـر ...
Author: Osman Musa
Date: 10-14-2009, 03:21 AM
Parent: #19
العزيز المدير
سلامات
وكيفك مع برد البرتا ؟
والله يا مدير صاح الزمن دوار .
لاقيت واحد من جماعتك بتاعين
البوفيه . حق محطة عطبرة
بتاعين بالسمنة وكده .
لاقيت زولك المسكين فارش جركانات عسل نحل
قدام دكان فى السوق العربى .
زمن .
كتير سلامى
|
Post: #21
Title: Re: حِـكـاية الشايقي اللاقـيتو فـي القـطـر ...
Author: الحارث سرالختم عبد الله
Date: 10-14-2009, 05:31 AM
Parent: #20
ود المدير تحيه طيبه ورجعتنا للزمن الجميل ايام كنا نعد الأيام لركوب القطر والسفر لى اتبرا
وحكاوى القطر التى لاتنضب لك التحيه
ابو ختم
|
Post: #22
Title: Re: حِـكـاية الشايقي اللاقـيتو فـي القـطـر ...
Author: الكباشى البكرى
Date: 10-14-2009, 05:47 AM
Parent: #21
معاويه المدير
مشتاقين والله
كم يوم كابي الزوغه اتاريك في راس القطر
حكي جميل واصل....
كل الود.
|
Post: #23
Title: Re: حِـكـاية الشايقي اللاقـيتو فـي القـطـر ...
Author: haroon diyab
Date: 10-14-2009, 06:23 AM
Parent: #22
انت عارف يامعاوية
عمك ده اكان رجيتو
للصباح.....؟
كان عمل ليك ( الصمرقع......!!!!)
ياخي ده راجل تحفة....!!!
شكرا علي السرد الجميلة
وابقي واصل يابتاع السطوح
بالمناسبة ....
انا متاكد باننا بتسطيحنا في القطارات
كنا من اسباب تدهور السكة حديد....!!!!!
|
Post: #24
Title: Re: حِـكـاية الشايقي اللاقـيتو فـي القـطـر ...
Author: Nasr
Date: 10-14-2009, 07:07 AM
Parent: #23
غايتو تسطيحتك دي حرمتنا من متعة وحكاوي
تعرف في أجيال في السودان دي شقية شقاوة اللقي عظم في الفشفاش
من صغار وقفوهم في صف الرغيف
وبعدين جندوهم في الدفاع الشعبي ودخلوا بيهم حقول الألغام
وحرموهم من التعليم المجاني والباسطة والبيرسوري
وفي واحدين رجعوهم من دول العالم التي هاجروا لها إبتغاء العلم
ودا كلوا كوم وحرمانهم من متعة ركوب القطر والتسطيح كوم تاني
المهم يا زول
عشان بريد القطر وحكاويه قمت قبل أسبوعين برحلة يوم ونص بالقطر عبر ساحل الباسفيكي من أول كاليفورنيا إلي آخر واشنطن
ولم ليك فيني جلكين من نيوزلندا ونسني ونسة شديدةغايتو لو كان بيتكلم شايقي كنت أحلف أقول ليك ياهو زولك زاتو
في القطر ولأسباب لا أعلمها الناس ظريفين وحبوبين تجمع بينهم المخاطرة والإرتياد والرحلة، لا هم الوصول
|
Post: #25
Title: Re: حِـكـاية الشايقي اللاقـيتو فـي القـطـر ...
Author: ابو عثمان
Date: 10-14-2009, 07:31 AM
Parent: #24
سرد جميل
اعدتنا عشرات السنين الي الزمن الجميل
تحياتي
|
Post: #26
Title: Re: حِـكـاية الشايقي اللاقـيتو فـي القـطـر ...
Author: طارق جبريل
Date: 10-14-2009, 08:26 AM
Parent: #25
احمد الله ما حبوبتي براها اللسانها فاكي
اتاريه الشوايقة كلهم لسانهم منطلق
ود المدير
وحات الله لو كانت قاعد جنب حبوبتي نفيسي بت بغداد
يمين كان نطيت من القطر
انا خايف اكتب حكاويها هني يطردوني من المنبر دة
لمن جات من الحج قمت اتشالقت وسالتها:
- انت يا حبوبتي السنة الجاية لو وديناك تحجي بتمشي
- والله يا ولدي ان بقى جنب الكرقي دي ماني ماشي
|
Post: #27
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-14-2009, 10:04 AM
Parent: #26
| Quote: كان رجيتو للصباح كان عمل ليك (كشف هيئة) عشان يشوفك بتتصرف كيف مع الأسفنجة |
وحاتك يا أبو الريش، ومعاهو علناً
كان يعمل ليَّ كشف حال الناس يِتخاتُوبو
ليوم القيامة...
|
Post: #28
Title: Re: حِـكـاية الشايقي اللاقـيتو فـي القـطـر ...
Author: naeem ali
Date: 10-14-2009, 10:16 AM
Parent: #27
المدير
تحياتي يا حبيب
________________
القطر بجيك ليه بمهله
عامنه ابوي سواق قطر
|
Post: #29
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-14-2009, 10:56 AM
Parent: #28
Quote:
على فكرة يا معاوية عندى نص طويل عن جدى دا لكين مابقدر انزله لانه المقام ما بسمح |
يا ريت يا سلمى تفردي بوست
لحكاوي جدك عليه رحمة الله،
وإنت عارفة الونسة النفر
دى أنا بتعجبنى شديد...
|
Post: #30
Title: Re: حِـكـاية الشايقي اللاقـيتو فـي القـطـر ...
Author: dardiri satti
Date: 10-14-2009, 11:01 AM
Parent: #29
| Quote: كان عمل ليك (كشف هيئة) |
قصدك كا حيطلعوا
""كافر آديييييييييل""؟؟؟؟
تحياتي
|
Post: #31
Title: Re: حِـكـاية الشايقي اللاقـيتو فـي القـطـر ...
Author: dardiri satti
Date: 10-14-2009, 11:07 AM
Parent: #30
Quote:
من صغار وقفوهم في صف الرغيف
وبعدين جندوهم في الدفاع الشعبي ودخلوا بيهم حقول الألغام
وحرموهم من التعليم المجاني والباسطة والبيرسوري
وفي واحدين رجعوهم من دول العالم التي هاجروا لها إبتغاء العلم
ودا كلوا كوم وحرمانهم من متعة ركوب القطر والتسطيح كوم تاني
|
الأراذل!!!
وسيعلم الذين ظلموا أي منقلب ينقلبون.
تحياتي
|
Post: #33
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-14-2009, 11:10 AM
Parent: #30
| Quote: والله كان انتظرت عمك للصباح كان واطاتك اصبحت ضلام |
وحاتك يا نديدي أنا نقشتَ الحكاية،
وعمك كان لحوح شابكني ليك طول اليل
كل مرة يقطع شريط الحكي، قُتَ لىِ شنو
يا المِطيميس؟ المرتبة مالا؟، على
اليمين كان صبحتها معاهو خرتوم
الرماد دى كلها كان إتفرجت فينى...
|
Post: #32
Title: Re: حِـكـاية الشايقي اللاقـيتو فـي القـطـر ...
Author: dardiri satti
Date: 10-14-2009, 11:10 AM
Parent: #24
| Quote: رحلة يوم ونص بالقطر عبر ساحل الباسفيكي من أول كاليفورنيا إلي آخر واشنطن |
دي الرحلة الأنا متمنيها.
بتكلف كم بالله؟؟
تحياتي
|
Post: #34
Title: Re: حِـكـاية الشايقي اللاقـيتو فـي القـطـر ...
Author: dardiri satti
Date: 10-14-2009, 11:15 AM
Parent: #32
| Quote: والله يا ولدي ان بقى جنب الكرقي دي ماني ماشي |
طالما هي بت بغداد،
أكيد أبونواس قريباً ليها،
موش هو القال :
لاتأتين ديار مكة محرماً
وإن تك مكة عند باب الدار؟؟
وتيٍب!!!
تحياتي
|
Post: #35
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-14-2009, 11:32 AM
Parent: #34
Quote: العزيز المدير
سلامات
وكيفك مع برد البرتا ؟
والله يا مدير صاح الزمن دوار .
لاقيت واحد من جماعتك بتاعين
البوفيه . حق محطة عطبرة
بتاعين بالسمنة وكده .
لاقيت زولك المسكين فارش جركانات عسل نحل
قدام دكان فى السوق العربى .
زمن .
كتير سلامى |
عثمان يا صديق،
البرتا بدات تنزل تحت الصفر الأيام ديل.
مأساة يا عثمان، عطبرة مدينة ما تستاهل
الحصل ليها، لكن شن نسوى؟
يا ريت تمدني برقم تلفونك، وأكون
شاكر ليك...
|
Post: #36
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-15-2009, 00:36 AM
Parent: #35
Quote: ود المدير تحيه طيبه ورجعتنا للزمن الجميل ايام كنا نعد الأيام لركوب القطر والسفر لى اتبرا
وحكاوى القطر التى لاتنضب لك التحيه
ابو ختم |
أبو ختم، حبابك الف...
أجمل ذكريات أيامنا كانت في القطر
ينتابنا حنين جارف لعودة تلك الأيام
لكن هيهات...
واتبرا دى كمان نضمها براهو...
تشكر يا جميل.
فيك ريحة الحديد
والنار، والله شنو؟
|
Post: #37
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-15-2009, 00:41 AM
Parent: #36
Quote: معاويه المدير
مشتاقين والله
كم يوم كابي الزوغه اتاريك في راس القطر
حكي جميل واصل....
كل الود |
الكباشي، يا حبيبنا من الضفة الحمراء
يأخي زمان ما تشلق فوق راس القطر
إلا تلقى ود المدير مصنقر. لكن طشّت
يا الكباشي، طشّت، يا حليلها...
|
Post: #38
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-15-2009, 00:50 AM
Parent: #37
Quote: انت عارف يامعاوية
عمك ده اكان رجيتو
للصباح.....؟
كان عمل ليك ( الصمرقع......!!!!)
ياخي ده راجل تحفة....!!!
شكرا علي السرد الجميلة
وابقي واصل يابتاع السطوح
بالمناسبة ....
انا متاكد باننا بتسطيحنا في القطارات
كنا من اسباب تدهور السكة حديد....!!!!! |
هارون أخي،
يأخي عمك راجل منقة عدييييل كده.
لكن أنا نقشتو ليك، عشان كده إتخارجت
قبل الصباح يا كظـ،
بالله إنت كنت بتجي مسطح من بورت سودان؟
يأخي في أتبرا المسطحين ديل كنا بنعمل
فيهم عمايل! خاسة لمان نكون جايين من
السينما ونحن فوق رأس الكبري والقطر
ماري من تحتنا. أوعّك تكون أخدت حمّام
قبل كده؟؟؟
|
Post: #39
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-15-2009, 01:03 AM
Parent: #38
Quote: غايتو تسطيحتك دي حرمتنا من متعة وحكاوي
تعرف في أجيال في السودان دي شقية شقاوة اللقي عظم في الفشفاش
من صغار وقفوهم في صف الرغيف
وبعدين جندوهم في الدفاع الشعبي ودخلوا بيهم حقول الألغام
وحرموهم من التعليم المجاني والباسطة والبيرسوري
وفي واحدين رجعوهم من دول العالم التي هاجروا لها إبتغاء العلم
ودا كلوا كوم وحرمانهم من متعة ركوب القطر والتسطيح كوم تاني
المهم يا زول
عشان بريد القطر وحكاويه قمت قبل أسبوعين برحلة يوم ونص بالقطر عبر ساحل الباسفيكي من أول كاليفورنيا إلي آخر واشنطن
ولم ليك فيني جلكين من نيوزلندا ونسني ونسة شديدةغايتو لو كان بيتكلم شايقي كنت أحلف أقول ليك ياهو زولك زاتو
ifeel sorry for them والله يجازي الكان السبب...
تعرف يا نصر، مرّة ركبنا القطر من نيويورك لتورنتو
في كندا. أولاد بورتسودان ضحكو فينا قالوا:
ناس اتبرا لو ودوهم الجنّة، يقولوا دايرين قطر...
يعلم الله ريدتنا ليهو مخالفة...
في القطر ولأسباب لا أعلمها الناس ظريفين وحبوبين تجمع بينهم المخاطرة والإرتياد والرحلة، لا هم الوصول |
|
Post: #40
Title: Re: حِـكـاية الشايقي اللاقـيتو فـي القـطـر ...
Author: Nasr
Date: 10-15-2009, 06:20 AM
Parent: #39
يا درديري الشغلانية معقولة جدا
تذكرة من لوس أنجلس إلي سياتل ب 98 دولار
مصاريف ما تزيد من ثلاثين دولار
بس تقطع التذكرة قبل يومين تلاتة
نشوفك قريب إن شاء الله
|
Post: #41
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-15-2009, 09:25 AM
Parent: #40
Quote: سرد جميل
اعدتنا عشرات السنين الي الزمن الجميل
تحياتي |
تشكر يا أبو عثمان.
يا حليل أيام زمان وكت الزمن زين
ويا حليل أيام زمان والناس حنينين...
حياك الغمام...
|
Post: #42
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-15-2009, 10:31 AM
Parent: #41
Quote: لمن جات من الحج قمت اتشالقت وسالتها:
- انت يا حبوبتي السنة الجاية لو وديناك تحجي بتمشي
- والله يا ولدي ان بقى جنب الكرقي دي ماني ماشي |
ود جبرين يا صاحب،
ذكرتني نكتة بسيرة حبوبتك دى:
قالوا في حبوبة قدُر ما تشُم ريحة حاجة
تقعد تهاتي بيها، أكان ما جابوها ليها أصلها ما تسكت.
أكان شمّت ريحة شيّة تقعد تهاتي: الشيّة، جيبو لي الشيّة،
الشيّة ما جابوها؟ يا ناس وين الشية.
ما تسكت لحدما الشيّة تصلها. أكان شمّت ريحة جوافة تقوم:
الجوافة، الحقوني بالجوافة بسراع، يا ناس الجوافة دي
ما دايرين تجيبوها؟. ما تسكت إلا يجيبولها الجوافة. وهكذا...
وأحد مسطول قال ليهم: أدعكولها نخرتها بى خُمرة، عشان تاني
ما تشُم اي ريحة غيرها!
الجماعة دعكولها نخرتها بي خُمرة، بس قامت تكورك: العريس،
جيبوهو لى، بدور العريس، يا ناس العريس ما جبتوهو؟ يا ناس
الحقوني بالعريس......الخ
|
Post: #43
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-15-2009, 11:40 AM
Parent: #42
Quote: القطر بجيك ليه بمهله
عامنه ابوي سواق قطر |
نعيم يا حنين، خلينى أجيك
ببوست كامل للقطر. يأخي عالمه
جميل لدرجة لاتوصف...
بس شيل الصبُر...
|
Post: #45
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-15-2009, 11:04 PM
Parent: #44
Quote: قصدك كا حيطلعوا
""كافر آديييييييييل""؟؟؟؟
تحياتي |
حيّاك الله يا درديري...
عمك كان حايطلعني برّه
الشبكة أديييييل كده...
|
Post: #46
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-15-2009, 11:07 PM
Parent: #45
ود البرعي يا كظـ...
شاحد المولى يرفع مقامك في الدارين...
|
Post: #47
Title: Re: حِـكـاية الشايقي اللاقـيتو فـي القـطـر ...
Author: osman righeem
Date: 10-16-2009, 06:56 AM
Parent: #46
ود المدير سلام كتير
ياخ عمك و ما في طريقة لتكملة النضم
اها قولينا رأيك انت المرتبة السفنجة
واللاه العنقريب المكرب بالبرش و الفركة
ممكن تستعين بي صديق خاض التجربتين
|
Post: #48
Title: Re: حِـكـاية الشايقي اللاقـيتو فـي القـطـر ...
Author: naeem ali
Date: 10-16-2009, 09:07 AM
Parent: #43
Quote: خلينى أجيك
ببوست كامل للقطر. يأخي عالمه
جميل لدرجة لاتوصف...
|
راجنك يا الحبيب..
مع عظيم الحب
|
Post: #49
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-16-2009, 10:54 AM
Parent: #48
Quote: ياخ عمك و ما في طريقة لتكملة النضم
اها قولينا رأيك انت المرتبة السفنجة
واللاه العنقريب المكرب بالبرش و الفركة
ممكن تستعين بي صديق خاض التجربتين |
رغيم، ســـلام...
عليك الله تلفون بشير صاحبي سريع،
ده الزول الوحيد البيكون خاض غمار
التجربتين بدون منازع...
|
Post: #50
Title: Re: حِـكـاية الشايقي اللاقـيتو فـي القـطـر ...
Author: haroon diyab
Date: 10-16-2009, 10:57 AM
Parent: #49
الحبيب / معاوية
وجمعة مباركة عليك
وعلي كل من يعز عليك
|
Post: #51
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-16-2009, 11:08 AM
Parent: #50
Quote: الحبيب / معاوية
وجمعة مباركة عليك
وعلي كل من يعز عليك |
هارون أخي...
تطيب لك العافية إنت ووِليداتك،
سلّم لى عليهن كتييير...
جمعتك مباركة، ولا تنسى أن
تكثر من الصلاة على الحبيب المصطفى (ص)...
|
Post: #52
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-16-2009, 11:51 AM
Parent: #51
Quote: راجنك يا الحبيب..
مع عظيم الحب |
نعيم يا حنين...
ياأخي، حا نتونس ونسة
أصلها ما حصلت، بس لوك
الصبر...
|
Post: #53
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-17-2009, 11:24 AM
Parent: #52
Quote: دي الرحلة الأنا متمنيها.
بتكلف كم بالله؟؟
تحياتي |
يا الدرديري أخوي، نحن ناس
سطح ساااااكت...
|
Post: #54
Title: Re: حِـكـاية الشايقي اللاقـيتو فـي القـطـر ...
Author: عبد الله الشيخ
Date: 10-17-2009, 01:52 PM
Parent: #53
معاوية المدير ..
والله انت
زول فنان..
لكن برضو ما كان مفروض تسطح !..
وكدى ...
زى ما بيقول ود المرتضى
( شتت افكارك شوية )
اكيد تلاقى واحدة تانية زي دى ...
انت تتكلم الشايقى ( كما أُنزل)!!
|
Post: #55
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-18-2009, 10:43 AM
Parent: #54
Quote: معاوية المدير ..
والله انت
زول فنان..
لكن برضو ما كان مفروض تسطح !..
وكدى ...
زى ما بيقول ود المرتضى
( شتت افكارك شوية )
اكيد تلاقى واحدة تانية زي دى ...
انت تتكلم الشايقى ( كما أُنزل)!! |
ود الشيخ، ســــلام...
والله خليتنى إضرّع ساااكت
بكلامك السمح ده.
الناس هروبي للسطح ده
تب ما داروهو، لكن عندي
مقالة مع بتاع حافلة بحكيها ليك
المرّة الجآية...
تشكر على المرور، والتغطية...
|
Post: #56
Title: Re: حِـكـاية الشايقي اللاقـيتو فـي القـطـر ...
Author: osman righeem
Date: 10-18-2009, 02:13 PM
Parent: #49
Quote: عليك الله تلفون بشير صاحبي سريع،
ده الزول الوحيد البيكون خاض غمار
التجربتين بدون منازع... |
غايتو يا معاوية
بشير الانا بعرفو
غير محصن وكان جا فكا خشمو بي كلمة هنا
( حدو قضارف)
|
Post: #57
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-19-2009, 01:08 AM
Parent: #56
Quote: غايتو يا معاوية
بشير الانا بعرفو
غير محصن وكان جا فكا خشمو بي كلمة هنا
( حدو قضارف) |
ما قُت لك، أنا خالت بينك وبين القرضابي!
القرضابي صاحبك بيعرف بشير حسن يوسف، الرجل
صاحب التجربتين الوحيد بلا مُنازع خليهو يكلمك عنو.
ده الصديق الوحيد الممكن إستعينبو في مثل
هذه الظروف...
أما الآخر فلا تقم عليه الحد...
|
Post: #58
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-19-2009, 12:55 PM
Parent: #57
كان رجل لطيف وظريف جداً. صورة طبق الأصل لشخصية بت ميدوب في رواية
المرحوم الطيّب صالح (موسم الهجرة إلى الشمال).
|
Post: #59
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-20-2009, 02:53 PM
Parent: #58
فووووق عشان الشايقي الهرشني ده...
|
Post: #60
Title: Re: حِـكـاية الشايقي اللاقـيتو فـي القـطـر ...
Author: سيف اليزل برعي البدوي
Date: 10-24-2009, 08:50 PM
Parent: #59
so interesting dear mawia, up
seif
|
Post: #61
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 10-25-2009, 11:29 AM
Parent: #60
so interesting dear mawia, up
seif
Thank you Seif
|
Post: #62
Title: Re: حِـكـاية الشايقي اللاقـيتو فـي القـطـر ...
Author: سيف اليزل برعي البدوي
Date: 10-31-2009, 10:19 PM
Parent: #61
العنوان: بعيدا عن زقاقات السياسة... حكاية قرنتية كريمة...
الكاتب: معاوية المدير
التاريخ: 13-04-2009, 00:27 ص
زقاقات السياسة مثل زقاقات الأنادي... إذا دخلت تتفرج لاتسلم,
وإذا دخلت تسمع نمة نمتين لاتسلم, وإذا دخلت إنتكيت علي عصآتك,
وخلفت كرآعك فوق الثانية, وحشرته أصبعك في أضآنك ودوبيت لاتسلم,
وكان مريت مرور الكرآم بالزقاقات برضك لاتسلم, وكان شفطت لك عبار
عبارين, إيآك المطين ومسجم ومرمد...
عموما... الحديث الذي أريد أن أصيغه هنا, بعيد عن هذه الزقاقآ...
قالوا:... الله يكفينا شر قلنا, وقالوا...
في كريمة, ظهرت قرنتية, محنت الناس محنة شديدة. كملت الجروف, وسدرت
لافوق كملت المزروع في الحيضان, وكان في جرايد نخل مهدلات أكلتن, قش
الواطة لحستو, البروس عدمتو نفااخة النار, التقاعدمتهاأسم الحبة,
الفي بطن المطآمير برضو لحقتو...
الناس حاولوا المستحيل للقبض عليها أو قتلها, كل المحآولآت بآءت
بالفشل... أعيان البلد عقدوا إجتماع طارئ وقرروا إرسال برقية لشـرطة
أتـبـرا...
وصلت البرقية, وردت عليها شرطة أتبرا بإرسال إثنين شاويشية لكريمة...
نحآف زي المساويك, قدآم من زمن الأردية والعمم, كل وآحد دآرع في
كتفو بندقية أبوعشرة, كان علقها في كتفو اليمين يميل معاها يمين,
وكان علقها في كتفو الشمال يميل معاها شمال. يآالله شايلين روحهم
وقالين البنادق...
وصلوا كريمة مواعيد الفطور. ناس البلد كلهم مرقوا لإستقبالهم
فوق المشرع. ركبوهم فوق الحمير وزفوهم علي المضيفة...
حليل المضيفة. ( المضيفة عبارة عن غرفة كبيرة, تبني في مكان
منعزل غير بعيد عن المنازل, وغالبا يبنيها ناس البلد عن طريق
النفير. وهي مأوي لكل عابر سبيل, يتفقدها ناس البلد في مواعيد
الطعام عسي أن يكون لجأ إليها عابر سبيل. )
بعد فاصلوهم, وأخدوا خبارهم, الفطور وصل. الجاي بملاح دمعة
بقراصة, والقراصتو مملحة بملاح ورق, والجاي بعمود, ووأحد بصحن
كبير مغطي بكبديق, ووأحد كسرتو بايته مملحها بلسان طير. إنكسروا
فوقهم ناس البلد من كل صوب وحدب, بأصناف متعددة من الطعام. الجماعة
أكلوا تمام, ومصمصوا أصابعينهم. بعد دآك وصل الشاى. كل وآحد
شرب تسعي. وحقبوا بنادقهم, وبقو مندلين علي البحر...
الوقت منتصف النهار, والسخآنة تقلي الحبة. النسوان قامن
علي(التكلة) شدن الحلل فوق النار. الحلل يجقجقن, والبلد,
صآآآنة, وصوت الفنان الكاشف منبعث من راديو قديم حجارته قديمة,
يحاول بصعوبة أن يوصل صوت الكاشف للسآمعين وهو يردد (حبيبي آه
وقلبي تآه يوم الزيارة). الصاجات مولعة, والقراريص مردومة في
الطبآقة. القرية صآآآنة, الدخآخين منبعثة من التكلة ورواكيب
العوآسة. قطع هذا الصمت صوت حمار بدأ ينهق, أزعج قمريتين في
رأس التمرة, طارن وركن فوق شدرة سنط, قوقن لفترة بسيطة, وسكتن,
وعاد الهدؤ يعم المكان, وبدأ صوت المذياع يظهر من جديد, ضعيف
متقطع, والنعام آدم يردد(يقولوا لي يا مسكين عليك ظلم الحسن
وحسين, يا دآب قل نوم العين).
الجماعة مصنقرين فوق البحر والقرنتية ما منها خبر...
حان موعد الغداء...
نادوهم للمضيفة, وناس البلد يعجبوك, ردموا قرآريص, وملحآت
تكفي يأجوج ومأجوج. الجماعة دفسوا تمآآآم, وشربوا الشاي, تآني
كل واحد تسعى, وقاموا علي البحر...
الجو أصبح معتدل نوعا ما. لحظات العصاري جميلة. النيل هادئ,
وساكن, لايعكر صفوه إلا مركب حوآتة تعبث بمجاديفها خالقة فوضي
في وسط السكون الممتد يين الضفاف.
الجماعة حاقبين بنادقهم وقاعدين, البيناولهن سيجارة,
البيناولهن سفة, واحد يديهم تمرآت, ترمس كبكبيق... الخ...
وكت الواطة بقت المغيرب, نادوهم للشاى. شاي المغرب طبعا
شئ أساسي في البلد, وبلبن طبيعي. البرآريد, والكبابي, وقداحة
اللقيمآت ما تديك الدرب, وكل زول يحلف عليهم لآزم يضوقوا
شاهيهو وزلابيتو, وهم طبعا أسكت كب...
ضربوا تمآآآم وبقو مندلين علي البحر...
بدأت حالة الرباط من جديد تحت ضوء القمر الذي أطل في تلك
الساعة من خلف النخيل, جاعلا جزء من ظلالها ممتد علي الرمال البيضاء,
والجزء الآخر منعكس علي صفحة النهر. القمر متسلل للأمام, والظلآل
متراجعة للخلف, والقرنتية لم تظهر بعد. حتي تناقصت الظلآل وإختفت,
وأصبح القمر بلونه الفضي منعكس علي صفحة النهر...
حان موعد العشاء...
الجماعة حقبوا بنادقهم وبقوا سادرين. كمية غير عادية من الفطير
باللبن, والقرآصة بالسمن والسكر, وقرآصة التمر كانت في إنتظارهم.
ضربوا تمآآآم, وكل وآحد كتحلوا كورية لبن, ورقدوا ناموا...
الصباح, عيونهم فتحن فوق براريد الشاي وقدآحة الزلآبية, لهطو تمآآآم,
ما قصروا, وبقوا مندلين علي البحر...
ثلاثة أيام بالتمام والكمال وهم علي هذه الحالة, والقرنتية كأنها
ما وجدت ولا خلقت...
يوم في ساعة الغداء, البروش مفروشة, وعليها كمية من صواني الأكل
لاتجد كميتها في أجعص دكان عدة في البلد, والجماعة عرقانين وشغالين
لهط نضيييف.
واحد من ظرفاء البلد علق قائلا: والله يا جماعة الأكل الأكلوهو
الجماعة ديل القرنتية زآآآتها ما أكلتو...
<a href="http://www.sudaneseonline.com/cgi-bin/sdb/2bb.cgi?seq=print&board=200&msg=1239582448&rn=" target=_self>بعيدا عن زقاقات السياسة... حكاية قرنتية كريمة...
|
Post: #64
Title: Re: حِـكـاية الشايقي اللاقـيتو فـي القـطـر ...
Author: يحي ابن عوف
Date: 10-31-2009, 10:30 PM
Parent: #59
معاوية المدير
تحيه قلبيه معطرة بالورد أهديها لك
فووووق عشان الشايقي الهرشك ده يامعاوية...
|
Post: #66
Title: Re: حِـكـاية الشايقي اللاقـيتو فـي القـطـر ...
Author: معاوية المدير
Date: 11-01-2009, 01:36 PM
Parent: #64
Quote: معاوية المدير
تحيه قلبيه معطرة بالورد أهديها لك
فووووق عشان الشايقي الهرشك ده يامعاوية... |
أخي يحي أبنعوف،
الشوق ليك وابل، فإن لم
يكن وابل فطل...
يعني عاجباك هرشة قريبك ده لي؟!
أصبر سااااكت لمان أجي كالقري...
|
Post: #67
Title: Re: حِـكـاية الشايقي اللاقـيتو فـي القـطـر ...
Author: سيف اليزل برعي البدوي
Date: 11-02-2009, 10:25 PM
Parent: #66
...up
|
|