Post: #1
Title: وداعا كرة القدم السودانية على جميع الأصعدة
Author: كمال حسن
Date: 10-11-2009, 09:08 PM
Parent: #0
غايتو لمتين المغصة دي حانبارينا؟
ياخي
أنا لو الأمر بيدي
أمتنع من المشاركة أربعة سنين في جميع المنافسات ماعدا الفرق تحت العشرين عاما
وبعد داك أشارك لم يكون كمال شداد حن علينا وإستقال
أو أقالو من هو أكثر منه تجبرا ودكتاتورية
|
Post: #2
Title: Re: وداعا كرة القدم السودانية على جميع الأصعدة
Author: Mohamad Shamseldin
Date: 10-11-2009, 09:13 PM
Parent: #1
| Quote: أو أقالو من هو أكثر منه تجبرا ودكتاتورية |
او الله يفتكروا.....
...
ياخي نحنا شعب طيش
...
غنائنا لا يطرب له احد الا شوية حبش....
كورتنا الله يرفعها,,,
حكومتنا الله ينتقم لينا منها...
|
Post: #3
Title: Re: وداعا كرة القدم السودانية على جميع الأصعدة
Author: طلحة عبدالله
Date: 10-11-2009, 09:20 PM
Parent: #2
قصدك الله إفتكرو بدون واو جماعة لو عايز باللغة الدارجة
لكن المهم اها فرضنا انو كمال شداد سبب هزائم منتخب المحترفين دا
فما هو سبب هزائم المريخ والهلال ..؟؟؟؟؟؟
السؤال التاني والأهم :
قبل كمال شداد موقع الكورة السودانية من الخارطة الأفريقية والعالمية شنو ..؟؟؟؟
|
Post: #5
Title: Re: وداعا كرة القدم السودانية على جميع الأصعدة
Author: Mohamad Shamseldin
Date: 10-11-2009, 09:32 PM
| Quote: [قبل كمال شداد موقع الكورة السودانية من الخارطة الأفريقية والعالمية شنو |
طلحه
هو... ده ما من سنة دو....
تنظبرو.... كتير فايت الحد
.....
هسه قسطنطبن ده لقطو من وين... لو ما بلد ما عندها وجيع و سايبه
..
الهلال و المريخ سببهم اداراتهم و الصحفيين الفاشلين
|
Post: #6
Title: Re: وداعا كرة القدم السودانية على جميع الأصعدة
Author: طلحة عبدالله
Date: 10-11-2009, 09:44 PM
Parent: #5
Quote: البعاتي ده ما من سنة دو....
|
كدا يا محمد أخوي حقو نتفق انو ما نسىء للناس خاصة اذا كان زول ما معانا هنا في المنبر
وممكن يرد على الإساءة ..
الحكاية ياخوي في النهاية كورة ..
وبعدين كلامك دا ما صاح لان قبل شداد كان أكتر من رئيس اتحاد ..
|
Post: #8
Title: Re: وداعا كرة القدم السودانية على جميع الأصعدة
Author: Mohamad Shamseldin
Date: 10-11-2009, 10:06 PM
Parent: #6
| Quote: كدا يا محمد أخوي حقو نتفق انو ما نسىء للناس خاصة اذا كان زول ما معانا هنا في المنبر |
صاح يا طلحة .....ساسحب الإساءة...
...
الراجل ده فاقع مرارتنا...
هو لب بناجح سواء مدرب أو أداري...
|
Post: #4
Title: Re: وداعا كرة القدم السودانية على جميع الأصعدة
Author: طلحة عبدالله
Date: 10-11-2009, 09:23 PM
Parent: #1
Quote: أقالو من هو أكثر منه تجبرا ودكتاتورية
|
غايتو يا كمال زي ما قال ليك الأخ الا شداد دا يموت واللا براهو كدا يزح
لكن كدا ساي زلزال ما بشيلو
اها السبب البعدو
|
Post: #7
Title: Re: وداعا كرة القدم السودانية على جميع الأصعدة
Author: كمال حسن
Date: 10-11-2009, 10:03 PM
Parent: #4
الحبيب طلحه
إنت عارف يعني ممكن الزول زي شداد ده يكون منقطه عديييل كده وأحسن زول في السودان ده كلو ودكتور وكلللللووو شيء
لكن ما موفق
يعني الله ماكاتب ليهو التوفيق
ياخي هو زاتو مفروض يقول كدي أدي الناس دي فرصه يجربو زول تاني غيري
وبعدين الزول التاني يمكن يكون أنحس منو
اليدينا هو فرصه نجي نقول حلييييل زمن كمال شداد
عشان لم نقول كده اليجي راجع لينا، ويطلع في راسنا عديييل كده... بس هو اليدينا الفرصه دي
بعدين ياطلحه عليك الله تقول قبل شداد وين كان موقع السودان؟
ياخي هو قبل شداد ده كان بتين
غايتو معظم أبناء الجيل ده فتحوا عيونهم علي كورة السجم دي وشداد ده ياهو رئيس الإتحاد
ياخي مايديها زول إن شاء الله مادكتور بس زول يكون متلحلح شويه وبي يتألم لي حال الكورة وبقية المناشط في مقدمتهم ألعاب القوى،والجري خاصة ، خاصة نحن عندنا خامات طيبه شوف بي جاي لينا الكينيين والإثيوبيين مامكن نكون نحن البلد الفي وسطهم الإتنين، وناسنا بيحملو نفس مواصفات جيرانا ديل وزايدين عليهم بالطول وبعد ده حصيلتنا في المشاركات بعض ميداليات خجولة
يا طلحه حال كورتنا وسياستنا ديل مابنصلحوا إلا لما يفكوها الديناصورات ديل
شداد والترابي والصادق المهدي ونقد و الميرغني
|
Post: #9
Title: Re: وداعا كرة القدم السودانية على جميع الأصعدة
Author: Mohamad Shamseldin
Date: 10-11-2009, 10:20 PM
Parent: #7
تعرف التنظير الكتير بتاع شداد و امثاله لم يفيد السودان او كورته
...
نميري كان عندو قصة في تنظير أساتذة الجامعات...
عين أحد الوزراء (اظنها الطاقة) من كلية الهندسة جامعة الخرطوم....
و في كل اجتماع مجلس وزراء ...
ياتي ذلك البروفيسور حاملا ال slide ruler (كانت بمثابة الألة الحاسبة ) و البلد ما فيها بنزين... يطلع مسطرتو و يبدأ يحسب ... "كم جالون... يعني كم طن ...يعني كم باخرة" ... فقام نميري عليهو ... قلع منو المسطرة كسرها و قال ليهو " أها بعد ما المسطرة اتكسرت حا تحل المشكلة كيف".......
......
أهم حاجة أذا الواحد لم يستطيع أن يغير و يأتي بنتائج أفضل أن يتنازل لغيره...
|
Post: #10
Title: Re: وداعا كرة القدم السودانية على جميع الأصعدة
Author: طلحة عبدالله
Date: 10-11-2009, 10:48 PM
Parent: #9
ياكمال ومحمد
ياخي المشكلة أكبر من مدرب وإداري
المشكلة في انعدام ثقافة الإحتراف البتعامل بيها الوسط الرياضي كلو ..
لاعبين همهم كلو يصلوا مرحلة مريخ هلال وبعد كدا دخلوا الجنة فانعدم طموحهم وترفعوا على التطور
والنهوض بموهبتهم إن وجدت إلى حيث الإحتراف كما يفعل كل لاعبي كرة القدم في العالم .
إعلام عبارة عن عصابة بتاعين مشجعين متعصبين لاندية مريخ هلال نزلوا من المدرجات ليمارسوا
التشجيع على صفحات الصحف لا فكرة ولا خبرة ولا رأيا منير .
جمهور مغيب أفسدت ذوقه ما تسمي بالصحافة الرياضة لا يعرف من أمر كرة القدم إلا الذهاب والشمس
في كبد السماء ليدافر ويعافر في صف التذاكر التى يقتطع ثمنها من أخص خصوصيات ما يدخره ثم وقبل
حتى ان تبدأ المباراة يكورك ويهتف بفشل التحكيم ويصفق للاعب أساء السلوك ويشتم أم آخر وينعل
سنسفيل أبو ثالث وهو ياكل في التمرس ويقزقز في التسالي ثم يخرج قبل خمس دقائق من نهاية الدافوري
ليكابس في المواصلات ويذهب لينام ويقوم في الصباح ليغالط وينظر في قرارات الحكم وخطة المدرب
وطريقة اللعب وتبديلات الفريق وكانه شاهد مباراة بين برشلونة والإنتر .
أين هي كرة القدم التى تتحدثان عنها في المشاهد الفوق دي ..؟
|
Post: #11
Title: Re: وداعا كرة القدم السودانية على جميع الأصعدة
Author: كمال حسن
Date: 10-12-2009, 00:02 AM
Parent: #10
ياعزيزي طلحه
ما أشرت إليه هو بالتحديد جزء من المشكلة لأنها في الأساس مشكلة مركبة لا يمكن حلها جزئيا بمعزل عن الأجزاء الأخرى
ما أشرت إليه
وهو اللاعبين
و الجمهور
والإعلام
هي زوايا ثلاثية من الزوايا الست المكونة للهرم الرياضي في السودان
وأنا أعتقد أنك أعرف مني بأن الزوايا الأخرى الثلاثة تفوق ماذكرتها أنت أهمية إذ أنها تساهم في خلق الواقع الأفضل الذي من خلاله يتم تفريخ لاعبين ذوي عقلية إحترافية يوجههم طموح ليس محدود بسقف القمة السودانية، كما تخلق واقعا إعلاميا أفضل تصوغه مجموعة من القيم والمثل الأخلاق القومية والوطنية وتوجهه أهداف جماعية لا تحكمهاأهواء شخصية ولا إنفعالات وقتية، وبالتالي يخلق الجمهور المثالي الذي يشكل سندا حقيقيا للنجاحات في شتى المجالات
تلك الزوايا التي أقصدها هي النظم السياسية والإدارة والبنى التحتية.
المشكلة السياسية هي كما هو معلوم هي أس المشاكل في السودان، وهي التي لعبت دورا مقدرا في هجرة الكثير من العقول والكوادر الإدارية والإعلامية المؤهلة التي كان يمكن أن تلعب دورا فاعلا ورئيسا في خلق المناخ المناسب الذي يمكن أن تتشكل فيه نهضة رياضية حقيقية تنبني على الإمكانت المتاحة ولنا في دول مثل إثيوبيا، كينيا، البرازيل وجامايكا خير مثال على أن ليس بالإمكانات وحدها تبدع الشعوب، بالرغم من أنها في غاية الأهمية، إلا أن غياب الإمكنيات وشحها لا يجعل الشعوب تيأس وتستسلم بل يجب عليها الإعتماد على خاماتها المحلية و الإستفادة منها بقدر الإمكان.
إن غياب الكوادر الوطنية المؤهلة والنزيهة وغير ذات القرض من الفضاء الإعلامي، هو ما خلق مساحة لتدني ذوق الجمهور العام وإنعدام بوصلته ......
ونواصل غدا بإذن الله
|
Post: #12
Title: Re: وداعا كرة القدم السودانية على جميع الأصعدة
Author: Mohamad Shamseldin
Date: 10-12-2009, 01:46 AM
Parent: #11
لماذا لا يتم تخصيص الهلال و المريخ…..
……
أساسا نظرية التصويت و أعضاء الناديين الكبيرين فاشلة و هي تزييف… العضوية ضعيفة وستظل كذلك…. قد تأتي بادارات أثبتت عدم جدواها و إكتراثها…..
أما تعيين الإدارات بقرار من الوزير فقد أتت بادارات ليست لها علاقة بالرياضة…
الأندية العالمية الكبري يمتلكها أشخاص إشتروها في سوق الله أكبر….و يبيعونها في سوق الله أكبر
لماذا لا ننقل تجربة الأندية الأوربية … برشلونة…. مانشيستر يونايتد…
ليشتري الهلال و المريخ أي شخص … و يحسبها حساب الربح و الخسارة….
….
مشجعي هذه الفرق لا يهمهم من يمتلك النادي… و قد لا يعرفونه….
يهمهم من يلعب فيه….إذا أدي الفريق مباريات ممتازة… زاد الدخل من المباريات و الدعايات ….و كان المالك المستفيد الأول….
كان الفريق سيئا …أول الخاسرين مالك الفريق…
إذا إمتلك الهلال زعيط أو معيط …. و فاز الهلال بالكاس ساكون مبسوط 24 قيراط……و إذا خسر الهلال ساحزن لكن صاحبنا سيكون أخدها صايمة
|
Post: #13
Title: Re: وداعا كرة القدم السودانية على جميع الأصعدة
Author: Hisham Ibrahim
Date: 10-12-2009, 08:58 AM
Parent: #12
يا كمال
بارك الله فيك على البوست دا
بس أديك من الآخر كدا
وللأسف الشديد خالص
القوس ما عـند باريها !
هشام
|
|