Post: #1
Title: تراب بلدي... كمال عباس مع الود الاكيد
Author: طارق جبريل
Date: 10-11-2009, 04:00 PM
|
Post: #2
Title: Re: تراب بلدي... كمال عباس مع الود الاكيد
Author: كمال عباس
Date: 10-11-2009, 05:54 PM
Parent: #1
...
سلام عليك ياطارق وياسلام علي ذوقك وإحساسك المرهف وشكرا ليك كتير ياراجل
يا راقي ...أستمتعت با لكلمات الحنينة والمليانة شجن وحب ولوعة
ونزيف الفرقة والوداع :
...ادنقر فوق تراب بلدي
أخم بي إيدي في رحلي
اقول يا ليل افارق الدار
اجر فوق الوداع مسدا ر
ادخل إيدي في رحلي
تراباً فيهو تسوى الكون
تراب اهلى..تراب اهلى
بشم طيبة اهلي منو
تفوح ترد الروح...
بس لم أتمكن من سماع الصوت وماعارف السبب شنو!!
تقديري وإحترامي
|
Post: #3
Title: Re: تراب بلدي... كمال عباس مع الود الاكيد
Author: عمر عبد الله فضل المولى
Date: 10-11-2009, 06:48 PM
Parent: #2
يا سلام على هذا النغم الجميل
|
Post: #4
Title: Re: تراب بلدي... كمال عباس مع الود الاكيد
Author: مجدي عبدالرحيم فضل
Date: 10-11-2009, 07:03 PM
Parent: #3
لحن خالد أبو ريم الله يديك العافية
،،،،أبوقصي،،،،
|
Post: #6
Title: Re: تراب بلدي... كمال عباس مع الود الاكيد
Author: حسين نوباتيا
Date: 10-11-2009, 07:57 PM
Parent: #4
دا غناء ليهو طعم و رائحة ولون..
ينزل في جوفك ذي الحليب الساقط..
تسلم يا طارق ..
|
Post: #10
Title: Re: تراب بلدي... كمال عباس مع الود الاكيد
Author: طارق جبريل
Date: 10-11-2009, 09:01 PM
Parent: #6
Quote: دا غناء ليهو طعم و رائحة ولون..
ينزل في جوفك ذي الحليب الساقط..
تسلم يا طارق .. |
حسن كيفنك
النغم الاصيل اثبت انه لا يموت ابدا
|
Post: #9
Title: Re: تراب بلدي... كمال عباس مع الود الاكيد
Author: طارق جبريل
Date: 10-11-2009, 09:00 PM
Parent: #4
Quote: لحن خالد أبو ريم الله يديك العافية
،،،،أبوقصي،،،، |
ابو قصي يا حبيب
كيفنك ياخ
|
Post: #5
Title: Re: تراب بلدي... كمال عباس مع الود الاكيد
Author: كمال عباس
Date: 10-11-2009, 07:30 PM
Parent: #3
شكرا طارق
مدني أحد الأخوة قبل لحظات بهذا الرابط وتمكنت من سماع جزء كبير الاغنية بصوت
محمد جبارة .........
http://algorer.com/vb/showthread.php?t=3969
|
Post: #11
Title: Re: تراب بلدي... كمال عباس مع الود الاكيد
Author: طارق جبريل
Date: 10-11-2009, 09:02 PM
Parent: #5
Quote: شكرا طارق
مدني أحد الأخوة قبل لحظات بهذا الرابط وتمكنت من سماع جزء كبير الاغنية بصوت
محمد جبارة .........
|
كدي جرب الرابط الفوق داك
|
Post: #14
Title: Re: تراب بلدي... كمال عباس مع الود الاكيد
Author: كمال عباس
Date: 10-12-2009, 01:51 PM
Parent: #11
....
|
Post: #8
Title: Re: تراب بلدي... كمال عباس مع الود الاكيد
Author: طارق جبريل
Date: 10-11-2009, 08:59 PM
Parent: #3
| Quote: يا سلام على هذا النغم الجميل |
عمر ازيك ياخ
نغم يدخل القلب بدون استئذان
|
Post: #7
Title: Re: تراب بلدي... كمال عباس مع الود الاكيد
Author: طارق جبريل
Date: 10-11-2009, 08:58 PM
Parent: #2
كمال كيفنك ابوي
محمد جبارة والسر عثمان ديل
والله يخلو الزول يقيف مشدوه ضُمة ضُمة
كدي جرب الرابط دة:
تراب بلدي للحفظ
الغريبة انا عندي شغالة
وباقي الناس سامعاها
لا يبقى كمبيوترك دة صايدو جن
|
Post: #12
Title: Re: تراب بلدي... كمال عباس مع الود الاكيد
Author: كمال عباس
Date: 10-11-2009, 10:05 PM
Parent: #7
شكرا
طارق
Quote: الغريبة انا عندي شغالة
وباقي الناس سامعاها
لا يبقى كمبيوترك دة صايدو جن |
والغريبة أنو الرابط الاخير دا مضبوط تمام معاي
|
Post: #13
Title: Re: تراب بلدي... كمال عباس مع الود الاكيد
Author: كمال عباس
Date: 10-11-2009, 11:07 PM
Parent: #12
.........الأغنية ياطارق شحنة من العواطف ومزيج عجيب من الشجن واللوعة
والحنين والحب وفيها تعبير حي علي قدرة السر الروائية الهائلة في تخزين
وحشد التفاصيل الصغيرة والمشاهدالتي لاتستوقف غيرالمبدع وللسر فوق ذلك
القدرة علي ال flash back والأسترجاع الأبداعي للمشاهد وصبها في لوحة
شعرية ... شوف المشاهد والصورة المابتنشاف والتي ولدتها لثمة تخيلية لتراب البلد:
ادخل إيدي في رحلي
تراباً فيهو تسوى الكون
تراب اهلى..تراب اهلى
بشم طيبة اهلي منو
تفوح ترد الروح
عويناتن تلوح وتلوح
انين الساقي لما تنوح
حسيس البربخ المفتوح
عراريقن طواقيهن
طواريهن سواقيهن
واشيل من زادي واتكرف
واشوف فيك يا تراب اهلى
الحنين المابي يتوصف
اشوف فيك صورة ماب تنشاف
واشم ريحة الكُليت والشاف
شوف كيف يصبح التراب كائن حي يتنفس وينبض بالحنين الذي لايوصف وتنبعث
من ريحة الكليت والشاف وتنشم منه ريحة طيبة الأهل ويتناهي للأسماع عبره
أنين الساقية وصوت البربخ وخرير الماء المنساب عبر فتحاته!!
وشوف ال flash back والإسترجاع الرائع لهذا المشهد
بنات بلدي... بنات بلدي
رقيصاتن... شبابيلن
طريحاتن... مناديلن
وهذه اللوحة النابضة بالحيوية
سماح ناساً حلاة ناساً ب
لا السكر
طعم قراصه في قدحاً من الدبكر
كواريك شفع المغرب
يقلبوا في الجمر قنقر
وهذه اللقطة الجميلة لأولاد بلده
ولاد بلدي يا ناس... ولاد بلدى
جبابيدن سنانيرن
نقاقيرن طنابيرن
وشوف كيف صور وحدته وغربته ولوعته وكيف أرتبطت عنده بتلوت الليل وتبعثر النجوم وكثافة الظلام وإنعدام الرفقة وسكون الحركة
مغستي رحل تلوت الليل
شقاوتي رحل تلوت الليل
مسالكي ضلمه ما بتنشق
سكت روح نويرة الفرقة
جوة الجوف تسوي البق
مشيت لا زاد أشيلو معاي
ولا زولاً معا اترفق
لما بقيت مفارق الدار
نجيم الليل مشي إتفرق
بكيت و بكيت طريف العين متمسح
و بالدموع رقرق
ولايخفي شجنه ولوعته وخوفه من الفراق
اسوى الوووب نحاس احزانى
جوه قليبى ينقر دق
يلوعنى يوهدبنى
و اخاف من المصير واشفق
اوادع الناس افوت مجبور
وبعدها يبدأ تداعي الصورة الماضية في ذهنه ويتحرك شريط الإ سترجاع وتتوالي المشاهد راسمة لوحة واحدة من أجمل الأغاني...
وطبعا يا طارق أستطاع ود جبارة بحسه الابداعي المتفرد أن يعطي القصيدة
حقها ويشحنها بدفق من الحنان وفيض من الشجن الصوتي .. تقمص الكلمات
و إحساس نبض الشاعر و إعطاء كل حرف حقه!! فمحمد جبار من أعمق الفنانين
إحساسا بالكلمة وإنفعالا بما تحويه الاغنية من مشاعر..........
كمال
|
Post: #18
Title: Re: تراب بلدي... كمال عباس مع الود الاكيد
Author: طارق جبريل
Date: 10-12-2009, 09:33 PM
Parent: #13
والله يا كمال الاغنية سويتها ام فتفت كله كله
يمين جيهتها تب
الله يعدلها عليك شقيش تقبل
|
Post: #15
Title: Re: تراب بلدي... كمال عباس مع الود الاكيد
Author: ممدوح أبارو
Date: 10-12-2009, 02:23 PM
Parent: #7
يا دوك سلامات
أنا برضو عندي ما شغالة!!!!
ــــــــــــــــ
جايين متين ياعمك راجنكم بهناك
|
Post: #16
Title: Re: تراب بلدي... كمال عباس مع الود الاكيد
Author: الفاتح عبد الله طه
Date: 10-12-2009, 03:02 PM
Parent: #15
اخونا ( طارق) ...تحيات طيبات...
تنصب ( الشراك)..لإصطياد ...الذين تستهويهم ( اوتار طمبور محمد جباره ) وكلمات السر عثمان الطيب...ويطيب الجلوس ...امام ( لوحات)..السفر ..الوداع ..الزاد ..تراب بلدي التي هي بحق ( بتسوى) الكون ...وتتراءى امام اللوحة...ولاد بلدي ..عراريقهم ،طوايقهم..وبنات بلدي ...طريحاتهن ..مناديلن ..رقيصاتن ..شبابيلن ...تجسيد ..تجسيد ...لرحلة...اجتمعت فيها كل معاني ( الجمال )...
|
Post: #19
Title: Re: تراب بلدي... كمال عباس مع الود الاكيد
Author: طارق جبريل
Date: 10-12-2009, 09:35 PM
Parent: #16
الفاتح كيفنك ابوي
وكيفنهم ناس القرير الحنان بالحيل
عاد يا الحبيب الما ينطرب لي كلمات السر عثمان
وحنية صوت محمد جبارة
اصله ماهو بني آدم شي
|
Post: #17
Title: Re: تراب بلدي... كمال عباس مع الود الاكيد
Author: كمال عباس
Date: 10-12-2009, 07:37 PM
Parent: #15
Quote: يا دوك سلامات
أنا برضو عندي ما شغالة!!!! |
الرابط التاني شغال ياممدوح
|
Post: #20
Title: Re: تراب بلدي... كمال عباس مع الود الاكيد
Author: طارق جبريل
Date: 10-12-2009, 09:37 PM
Parent: #17
يا ود ابارو كيفنك
شوف الرابط القالو ليك كمال دة
وحكاية جيتي دي باقيلي كذبة اكتوبر
كمال ياخي ما تمسك بوستيك دة
|
Post: #21
Title: Re: تراب بلدي... كمال عباس مع الود الاكيد
Author: كمال عباس
Date: 10-13-2009, 06:34 AM
Parent: #20
| Quote: كمال ياخي ما تمسك بوستيك دة |
....أها مسكناه تب وربنا يعدلا عليك شقيش ماتقبل...
|
|